Shri Rama Raksha Stotram

Text

View

Viniyoga

ॐ अस्य श्रीरामरक्षास्तोत्रमन्त्रस्य बुधकौशिक ऋषिः। श्रीसीतारामचन्द्रो देवता। अनुष्टुप् छन्दः। सीता शक्तिः। श्रीमान् हनुमान् कीलकम्। श्रीसीतारामचन्द्रप्रीत्यर्थे रामरक्षास्तोत्रजपे विनियोगः॥

oṃ asya śrīrāmarakṣāstotramantrasya budhakauśika ṛṣiḥ| śrīsītārāmacandro devatā| anuṣṭup chandaḥ| sītā śaktiḥ| śrīmān hanumān kīlakam| śrīsītārāmacandraprītyarthe rāmarakṣāstotrajape viniyogaḥ||

Dhyanam

ध्यायेदाजानुबाहुं धृतशरधनुषं बद्धपद्मासनस्थं पीतं वासो वसानं नवकमलदलस्पर्धिनेत्रं प्रसन्नम्। वामाङ्कारूढसीतामुखकमलमिलल्लोचनं नीरदाभं नानालङ्कारदीप्तं दधतमुरुजटामण्डलं रामचन्द्रम्॥

dhyāyedājānubāhuṃ dhṛtaśaradhanuṣaṃ baddhapadmāsanasthaṃ pītaṃ vāso vasānaṃ navakamaladalaspardhinetraṃ prasannam| vāmāṅkārūḍhasītāmukhakamalamilallocanaṃ nīradābhaṃ nānālaṅkāradīptaṃ dadhatamurujaṭāmaṇḍalaṃ rāmacandram||

Stotra

चरितं रघुनाथस्य शतकोटिप्रविस्तरम्। एकैकमक्षरं पुंसां महापातकनाशनम्॥१॥

caritaṃ raghunāthasya śatakoṭipravistaram| ekaikamakṣaraṃ puṃsāṃ mahāpātakanāśanam||1||

ध्यात्वा नीलोत्पलश्यामं रामं राजीवलोचनम्। जानकीलक्ष्मणोपेतं जटामुकुटमण्डितम्॥२॥

dhyātvā nīlotpalaśyāmaṃ rāmaṃ rājīvalocanam| jānakīlakṣmaṇopetaṃ jaṭāmukuṭamaṇḍitam||2||

सासितूणधनुर्बाणपाणिं नक्तंचरान्तकम्। स्वलीलया जगत्त्रातुमाविर्भूतमजं विभुम्॥३॥

sāsitūṇadhanurbāṇapāṇiṃ naktaṃcarāntakam| svalīlayā jagattrātumāvirbhūtamajaṃ vibhum||3||

रामरक्षां पठेत्प्राज्ञः पापघ्नीं सर्वकामदाम्। शिरो मे राघवः पातु भालं दशरथात्मजः॥४॥

rāmarakṣāṃ paṭhetprājñaḥ pāpaghnīṃ sarvakāmadām| śiro me rāghavaḥ pātu bhālaṃ daśarathātmajaḥ||4||

कौसल्येयो दृशौ पातु विश्वामित्रप्रियः श्रुती। घ्राणं पातु मखत्राता मुखं सौमित्रिवत्सलः॥५॥

kausalyeyo dṛśau pātu viśvāmitrapriyaḥ śrutī| ghrāṇaṃ pātu makhatrātā mukhaṃ saumitrivatsalaḥ||5||

जिह्वां विद्यानिधिः पातु कण्ठं भरतवन्दितः। स्कन्धौ दिव्यायुधः पातु भुजौ भग्नेशकार्मुकः॥६॥

jihvāṃ vidyānidhiḥ pātu kaṇṭhaṃ bharatavanditaḥ| skandhau divyāyudhaḥ pātu bhujau bhagneśakārmukaḥ||6||

करौ सीतापतिः पातु हृदयं जामदग्न्यजित्। मध्यं पातु खरध्वंसी नाभिं जाम्बवदाश्रयः॥७॥

karau sītāpatiḥ pātu hṛdayaṃ jāmadagnyajit| madhyaṃ pātu kharadhvaṃsī nābhiṃ jāmbavadāśrayaḥ||7||

सुग्रीवेशः कटी पातु सक्थिनी हनुमत्प्रभुः। ऊरू रघूत्तमः पातु रक्षःकुलविनाशकृत्॥८॥

sugrīveśaḥ kaṭī pātu sakthinī hanumatprabhuḥ| ūrū raghūttamaḥ pātu rakṣaḥkulavināśakṛt||8||

जानुनी सेतुकृत्पातु जङ्घे दशमुखान्तकः। पादौ बिभीषणश्रीदः पातु रामोऽखिलं वपुः॥९॥

jānunī setukṛtpātu jaṅghe daśamukhāntakaḥ| pādau bibhīṣaṇaśrīdaḥ pātu rāmo'khilaṃ vapuḥ||9||

एतां रामबलोपेतां रक्षां यः सुकृती पठेत्। स चिरायुः सुखी पुत्री विजयी विनयी भवेत्॥१०॥

etāṃ rāmabalopetāṃ rakṣāṃ yaḥ sukṛtī paṭhet| sa cirāyuḥ sukhī putrī vijayī vinayī bhavet||10||

पातालभूतलव्योमचारिणश्छद्मचारिणः। न द्रष्टुमपि शक्तास्ते रक्षितं रामनामभिः॥११॥

pātālabhūtalavyomacāriṇaśchadmacāriṇaḥ| na draṣṭumapi śaktāste rakṣitaṃ rāmanāmabhiḥ||11||

रामेति रामभद्रेति रामचन्द्रेति वा स्मरन्। नरो न लिप्यते पापैर्भुक्तिं मुक्तिं च विन्दति॥१२॥

rāmeti rāmabhadreti rāmacandreti vā smaran| naro na lipyate pāpairbhuktiṃ muktiṃ ca vindati||12||

जगज्जैत्रैकमन्त्रेण रामनाम्नाभिरक्षितम्। यः कण्ठे धारयेत्तस्य करस्थाः सर्वसिद्धयः॥१३॥

jagajjaitraikamantreṇa rāmanāmnābhirakṣitam| yaḥ kaṇṭhe dhārayettasya karasthāḥ sarvasiddhayaḥ||13||

वज्रपञ्जरनामेदं यो रामकवचं स्मरेत्। अव्याहताज्ञः सर्वत्र लभते जयमङ्गलम्॥१४॥

vajrapañjaranāmedaṃ yo rāmakavacaṃ smaret| avyāhatājñaḥ sarvatra labhate jayamaṅgalam||14||

आदिष्टवान्यथा स्वप्ने रामरक्षामिमां हरः। तथा लिखितवान्प्रातः प्रबुद्धो बुधकौशिकः॥१५॥

ādiṣṭavānyathā svapne rāmarakṣāmimāṃ haraḥ| tathā likhitavānprātaḥ prabuddho budhakauśikaḥ||15||

आरामः कल्पवृक्षाणां विरामः सकलापदाम्। अभिरामस्त्रिलोकानां रामः श्रीमान्स नः प्रभुः॥१६॥

ārāmaḥ kalpavṛkṣāṇāṃ virāmaḥ sakalāpadām| abhirāmastrilokānāṃ rāmaḥ śrīmānsa naḥ prabhuḥ||16||

तरुणौ रूपसम्पन्नौ सुकुमारौ महाबलौ। पुण्डरीकविशालाक्षौ चीरकृष्णाजिनाम्बरौ॥१७॥

taruṇau rūpasampannau sukumārau mahābalau| puṇḍarīkaviśālākṣau cīrakṛṣṇājināmbarau||17||

फलमूलाशिनौ दान्तौ तापसौ ब्रह्मचारिणौ। पुत्रौ दशरथस्यैतौ भ्रातरौ रामलक्ष्मणौ॥१८॥

phalamūlāśinau dāntau tāpasau brahmacāriṇau| putrau daśarathasyaitau bhrātarau rāmalakṣmaṇau||18||

शरण्यौ सर्वसत्त्वानां श्रेष्ठौ सर्वधनुष्मताम्। रक्षःकुलनिहन्तारौ त्रायेतां नो रघूत्तमौ॥१९॥

śaraṇyau sarvasattvānāṃ śreṣṭhau sarvadhanuṣmatām| rakṣaḥkulanihantārau trāyetāṃ no raghūttamau||19||

आत्तसज्जधनुषाविषुस्पृशावक्षयाशुगनिषङ्गसङ्गिनौ। रक्षणाय मम रामलक्ष्मणावग्रतः पथि सदैव गच्छताम्॥२०॥

āttasajjadhanuṣāviṣuspṛśāvakṣayāśuganiṣaṅgasaṅginau| rakṣaṇāya mama rāmalakṣmaṇāvagrataḥ pathi sadaiva gacchatām||20||

सन्नद्धः कवची खड्गी चापबाणधरो युवा। गच्छन्मनोरथान्नश्च रामः पातु सलक्ष्मणः॥२१॥

sannaddhaḥ kavacī khaḍgī cāpabāṇadharo yuvā| gacchanmanorathānnaśca rāmaḥ pātu salakṣmaṇaḥ||21||

रामो दाशरथिः शूरो लक्ष्मणानुचरो बली। काकुत्स्थः पुरुषः पूर्णः कौसल्येयो रघूत्तमः॥२२॥

rāmo dāśarathiḥ śūro lakṣmaṇānucaro balī| kākutsthaḥ puruṣaḥ pūrṇaḥ kausalyeyo raghūttamaḥ||22||

वेदान्तवेद्यो यज्ञेशः पुराणपुरुषोत्तमः। जानकीवल्लभः श्रीमानप्रमेयपराक्रमः॥२३॥

vedāntavedyo yajñeśaḥ purāṇapuruṣottamaḥ| jānakīvallabhaḥ śrīmānaprameyaparākramaḥ||23||

इत्येतानि जपन्नित्यं मद्भक्तः श्रद्धयान्वितः। अश्वमेधाधिकं पुण्यं सम्प्राप्नोति न संशयः॥२४॥

ityetāni japannityaṃ madbhaktaḥ śraddhayānvitaḥ| aśvamedhādhikaṃ puṇyaṃ samprāpnoti na saṃśayaḥ||24||

रामं दूर्वादलश्यामं पद्माक्षं पीतवाससम्। स्तुवन्ति नामभिर्दिव्यैर्न ते संसारिणो नरः॥२५॥

rāmaṃ dūrvādalaśyāmaṃ padmākṣaṃ pītavāsasam| stuvanti nāmabhirdivyairna te saṃsāriṇo naraḥ||25||

रामं लक्ष्मणपूर्वजं रघुवरं सीतापतिं सुन्दरं काकुत्स्थं करुणार्णवं गुणनिधिं विप्रप्रियं धार्मिकम्। राजेन्द्रं सत्यसन्धं दशरथतनयं श्यामलं शान्तमूर्तिं वन्दे लोकाभिरामं रघुकुलतिलकं राघवं रावणारिम्॥२६॥

rāmaṃ lakṣmaṇapūrvajaṃ raghuvaraṃ sītāpatiṃ sundaraṃ kākutsthaṃ karuṇārṇavaṃ guṇanidhiṃ viprapriyaṃ dhārmikam| rājendraṃ satyasandhaṃ daśarathatanayaṃ śyāmalaṃ śāntamūrtiṃ vande lokābhirāmaṃ raghukulatilakaṃ rāghavaṃ rāvaṇārim||26||

रामाय रामभद्राय रामचन्द्राय वेधसे। रघुनाथाय नाथाय सीतायाः पतये नमः॥२७॥

rāmāya rāmabhadrāya rāmacandrāya vedhase| raghunāthāya nāthāya sītāyāḥ pataye namaḥ||27||

श्रीराम राम रघुनन्दन राम राम। श्रीराम राम भरताग्रज राम राम। श्रीराम राम रणकर्कश राम राम। श्रीराम राम शरणं भव राम राम॥२८॥

śrīrāma rāma raghunandana rāma rāma| śrīrāma rāma bharatāgraja rāma rāma| śrīrāma rāma raṇakarkaśa rāma rāma| śrīrāma rāma śaraṇaṃ bhava rāma rāma||28||

श्रीराम चन्द्र चरणौ मनसा स्मरामि। श्रीराम चन्द्र चरणौ वचसा गृणामि। श्रीराम चन्द्र चरणौ शिरसा नमामि। श्रीराम चन्द्र चरणौ शरणं प्रपद्ये॥२९॥

śrīrāma candra caraṇau manasā smarāmi| śrīrāma candra caraṇau vacasā gṛṇāmi| śrīrāma candra caraṇau śirasā namāmi| śrīrāma candra caraṇau śaraṇaṃ prapadye||29||

माता रामो मत्पिता रामचन्द्रः। स्वामी रामो मत्सखा रामचन्द्रः। सर्वस्वं मे रामचन्द्रो दयालुर्नान्यं जाने नैव जाने न जाने॥३०॥

mātā rāmo matpitā rāmacandraḥ| svāmī rāmo matsakhā rāmacandraḥ| sarvasvaṃ me rāmacandro dayālurnānyaṃ jāne naiva jāne na jāne||30||

दक्षिणे लक्ष्मणो यस्य वामे च जनकात्मजा। पुरतो मारुतिर्यस्य तं वन्दे रघुनन्दनम्॥३१॥

dakṣiṇe lakṣmaṇo yasya vāme ca janakātmajā| purato mārutiryasya taṃ vande raghunandanam||31||

लोकाभिरामं रणरङ्गधीरं राजीवनेत्रं रघुवंशनाथम्। कारुण्यरूपं करुणाकरं तं श्रीरामचन्द्रं शरणं प्रपद्ये॥३२॥

lokābhirāmaṃ raṇaraṅgadhīraṃ rājīvanetraṃ raghuvaṃśanātham| kāruṇyarūpaṃ karuṇākaraṃ taṃ śrīrāmacandraṃ śaraṇaṃ prapadye||32||

मनोजवं मारुततुल्यवेगं जितेन्द्रियं बुद्धिमतां वरिष्ठम्। वातात्मजं वानरयूथमुख्यं श्रीरामदूतं शरणं प्रपद्ये॥३३॥

manojavaṃ mārutatulyavegaṃ jitendriyaṃ buddhimatāṃ variṣṭham| vātātmajaṃ vānarayūthamukhyaṃ śrīrāmadūtaṃ śaraṇaṃ prapadye||33||

कूजन्तं रामरामेति मधुरं मधुराक्षरम्। आरुह्य कविताशाखां वन्दे वाल्मीकिकोकिलम्॥३४॥

kūjantaṃ rāmarāmeti madhuraṃ madhurākṣaram| āruhya kavitāśākhāṃ vande vālmīkikokilam||34||

आपदामपहर्तारं दातारं सर्वसम्पदाम्। लोकाभिरामं श्रीरामं भूयो भूयो नमाम्यहम्॥३५॥

āpadāmapahartāraṃ dātāraṃ sarvasampadām| lokābhirāmaṃ śrīrāmaṃ bhūyo bhūyo namāmyaham||35||

भर्जनं भवबीजानामर्जनं सुखसम्पदाम्। तर्जनं यमदूतानां रामरामेति गर्जनम्॥३६॥

bharjanaṃ bhavabījānāmarjanaṃ sukhasampadām| tarjanaṃ yamadūtānāṃ rāmarāmeti garjanam||36||

रामो राजमणिः सदा विजयते रामं रमेशं भजे। रामेणाभिहता निशाचरचमू रामाय तस्मै नमः। रामान्नास्ति परायणं परतरं रामस्य दासोऽस्म्यहम्। रामे चित्तलयः सदा भवतु मे भो राम मामुद्धर॥३७॥

rāmo rājamaṇiḥ sadā vijayate rāmaṃ rameśaṃ bhaje| rāmeṇābhihatā niśācaracamū rāmāya tasmai namaḥ| rāmānnāsti parāyaṇaṃ parataraṃ rāmasya dāso'smyaham| rāme cittalayaḥ sadā bhavatu me bho rāma māmuddhara||37||

राम रामेति रामेति रमे रामे मनोरमे। सहस्रनाम तत्तुल्यं रामनाम वरानने॥३८॥

rāma rāmeti rāmeti rame rāme manorame| sahasranāma tattulyaṃ rāmanāma varānane||38||