Bal Kand — बालकाण्ड

बालकाण्ड · दोहा ३०३–३२१

बनइ न बरनत बनी बराता। होहिं सगुन सुंदर सुभदाता॥ चारा चाषु बाम दिसि लेई। मनहुँ सकल मंगल कहि देई॥

banai na baranata banī barātā| hohiṃ saguna suṃdara subhadātā|| cārā cāṣu bāma disi leī| manahum̐ sakala maṃgala kahi deī||

दाहिन काग सुखेत सुहावा। नकुल दरसु सब काहूँ पावा॥ सानुकूल बह त्रिबिध बयारी। सघट सवाल आव बर नारी॥

dāhina kāga sukheta suhāvā| nakula darasu saba kāhūm̐ pāvā|| sānukūla baha tribidha bayārī| saghaṭa savāla āva bara nārī||

लोवा फिरि फिरि दरसु देखावा। सुरभी सनमुख सिसुहि पिआवा॥ मृगमाला फिरि दाहिनि आई। मंगल गन जनु दीन्हि देखाई॥

lovā phiri phiri darasu dekhāvā| surabhī sanamukha sisuhi piāvā|| mṛgamālā phiri dāhini āī| maṃgala gana janu dīnhi dekhāī||

छेमकरी कह छेम बिसेषी। स्यामा बाम सुतरु पर देखी॥ सनमुख आयउ दधि अरु मीना। कर पुस्तक दुइ बिप्र प्रबीना॥

chemakarī kaha chema biseṣī| syāmā bāma sutaru para dekhī|| sanamukha āyau dadhi aru mīnā| kara pustaka dui bipra prabīnā||

Doha ३०३

मंगलमय कल्यानमय अभिमत फल दातार। जनु सब साचे होन हित भए सगुन एक बार ॥ ३०३॥

maṃgalamaya kalyānamaya abhimata phala dātāra| janu saba sāce hona hita bhae saguna eka bāra || 303||

मंगल सगुन सुगम सब ताकें। सगुन ब्रह्म सुंदर सुत जाकें॥ राम सरिस बरु दुलहिनि सीता। समधी दसरथु जनकु पुनीता॥

maṃgala saguna sugama saba tākeṃ| saguna brahma suṃdara suta jākeṃ|| rāma sarisa baru dulahini sītā| samadhī dasarathu janaku punītā||

सुनि अस ब्याहु सगुन सब नाचे। अब कीन्हे बिरंचि हम साँचे॥ एहि बिधि कीन्ह बरात पयाना। हय गय गाजहिं हने निसाना॥

suni asa byāhu saguna saba nāce| aba kīnhe biraṃci hama sām̐ce|| ehi bidhi kīnha barāta payānā| haya gaya gājahiṃ hane nisānā||

आवत जानि भानुकुल केतू। सरितन्हि जनक बँधाए सेतू॥ बीच बीच बर बास बनाए। सुरपुर सरिस संपदा छाए॥

āvata jāni bhānukula ketū| saritanhi janaka bam̐dhāe setū|| bīca bīca bara bāsa banāe| surapura sarisa saṃpadā chāe||

असन सयन बर बसन सुहाए। पावहिं सब निज निज मन भाए॥ नित नूतन सुख लखि अनुकूले। सकल बरातिन्ह मंदिर भूले॥

asana sayana bara basana suhāe| pāvahiṃ saba nija nija mana bhāe|| nita nūtana sukha lakhi anukūle| sakala barātinha maṃdira bhūle||

Doha ३०४

आवत जानि बरात बर सुनि गहगहे निसान। सजि गज रथ पदचर तुरग लेन चले अगवान ॥ ३०४॥

āvata jāni barāta bara suni gahagahe nisāna| saji gaja ratha padacara turaga lena cale agavāna || 304||

कनक कलस भरि कोपर थारा। भाजन ललित अनेक प्रकारा॥ भरे सुधासम सब पकवाने। नाना भाँति न जाहिं बखाने॥

kanaka kalasa bhari kopara thārā| bhājana lalita aneka prakārā|| bhare sudhāsama saba pakavāne| nānā bhām̐ti na jāhiṃ bakhāne||

फल अनेक बर बस्तु सुहाईं। हरषि भेंट हित भूप पठाईं॥ भूषन बसन महामनि नाना। खग मृग हय गय बहुबिधि जाना॥

phala aneka bara bastu suhāīṃ| haraṣi bheṃṭa hita bhūpa paṭhāīṃ|| bhūṣana basana mahāmani nānā| khaga mṛga haya gaya bahubidhi jānā||

मंगल सगुन सुगंध सुहाए। बहुत भाँति महिपाल पठाए॥ दधि चिउरा उपहार अपारा। भरि भरि काँवरि चले कहारा॥

maṃgala saguna sugaṃdha suhāe| bahuta bhām̐ti mahipāla paṭhāe|| dadhi ciurā upahāra apārā| bhari bhari kām̐vari cale kahārā||

अगवानन्ह जब दीखि बराता। उर आनंदु पुलक भर गाता॥ देखि बनाव सहित अगवाना। मुदित बरातिन्ह हने निसाना॥

agavānanha jaba dīkhi barātā| ura ānaṃdu pulaka bhara gātā|| dekhi banāva sahita agavānā| mudita barātinha hane nisānā||

Doha ३०५

हरषि परसपर मिलन हित कछुक चले बगमेल। जनु आनंद समुद्र दुइ मिलत बिहाइ सुबेल ॥ ३०५॥

haraṣi parasapara milana hita kachuka cale bagamela| janu ānaṃda samudra dui milata bihāi subela || 305||

बरषि सुमन सुर सुंदरि गावहिं। मुदित देव दुंदुभीं बजावहिं॥ बस्तु सकल राखीं नृप आगें। बिनय कीन्ह तिन्ह अति अनुरागें॥

baraṣi sumana sura suṃdari gāvahiṃ| mudita deva duṃdubhīṃ bajāvahiṃ|| bastu sakala rākhīṃ nṛpa āgeṃ| binaya kīnha tinha ati anurāgeṃ||

प्रेम समेत रायँ सबु लीन्हा। भै बकसीस जाचकन्हि दीन्हा॥ करि पूजा मान्यता बड़ाई। जनवासे कहुँ चले लवाई॥

prema sameta rāyam̐ sabu līnhā| bhai bakasīsa jācakanhi dīnhā|| kari pūjā mānyatā baṛāī| janavāse kahum̐ cale lavāī||

बसन बिचित्र पाँवड़े परहीं। देखि धनहु धन मदु परिहरहीं॥ अति सुंदर दीन्हेउ जनवासा। जहँ सब कहुँ सब भाँति सुपासा॥

basana bicitra pām̐vaṛe parahīṃ| dekhi dhanahu dhana madu pariharahīṃ|| ati suṃdara dīnheu janavāsā| jaham̐ saba kahum̐ saba bhām̐ti supāsā||

जानी सियँ बरात पुर आई। कछु निज महिमा प्रगटि जनाई॥ हृदयँ सुमिरि सब सिद्धि बोलाई। भूप पहुनई करन पठाई॥

jānī siyam̐ barāta pura āī| kachu nija mahimā pragaṭi janāī|| hṛdayam̐ sumiri saba siddhi bolāī| bhūpa pahunaī karana paṭhāī||

Doha ३०६

सिधि सब सिय आयसु अकनि गईं जहाँ जनवास। लिएँ संपदा सकल सुख सुरपुर भोग बिलास ॥ ३०६॥

sidhi saba siya āyasu akani gaīṃ jahām̐ janavāsa| liem̐ saṃpadā sakala sukha surapura bhoga bilāsa || 306||

निज निज बास बिलोकि बराती। सुर सुख सकल सुलभ सब भाँती॥ बिभव भेद कछु कोउ न जाना। सकल जनक कर करहिं बखाना॥

nija nija bāsa biloki barātī| sura sukha sakala sulabha saba bhām̐tī|| bibhava bheda kachu kou na jānā| sakala janaka kara karahiṃ bakhānā||

सिय महिमा रघुनायक जानी। हरषे हृदयँ हेतु पहिचानी॥ पितु आगमनु सुनत दोउ भाई। हृदयँ न अति आनंदु अमाई॥

siya mahimā raghunāyaka jānī| haraṣe hṛdayam̐ hetu pahicānī|| pitu āgamanu sunata dou bhāī| hṛdayam̐ na ati ānaṃdu amāī||

सकुचन्ह कहि न सकत गुरु पाहीं। पितु दरसन लालचु मन माहीं॥ बिस्वामित्र बिनय बड़ि देखी। उपजा उर संतोषु बिसेषी॥

sakucanha kahi na sakata guru pāhīṃ| pitu darasana lālacu mana māhīṃ|| bisvāmitra binaya baṛi dekhī| upajā ura saṃtoṣu biseṣī||

हरषि बंधु दोउ हृदयँ लगाए। पुलक अंग अंबक जल छाए॥ चले जहाँ दसरथु जनवासे। मनहुँ सरोबर तकेउ पिआसे॥

haraṣi baṃdhu dou hṛdayam̐ lagāe| pulaka aṃga aṃbaka jala chāe|| cale jahām̐ dasarathu janavāse| manahum̐ sarobara takeu piāse||

Doha ३०७

भूप बिलोके जबहिं मुनि आवत सुतन्ह समेत। उठे हरषि सुखसिंधु महुँ चले थाह सी लेत ॥ ३०७॥

bhūpa biloke jabahiṃ muni āvata sutanha sameta| uṭhe haraṣi sukhasiṃdhu mahum̐ cale thāha sī leta || 307||

मुनिहि दंडवत कीन्ह महीसा। बार बार पद रज धरि सीसा॥ कौसिक राउ लिये उर लाई। कहि असीस पूछी कुसलाई॥

munihi daṃḍavata kīnha mahīsā| bāra bāra pada raja dhari sīsā|| kausika rāu liye ura lāī| kahi asīsa pūchī kusalāī||

पुनि दंडवत करत दोउ भाई। देखि नृपति उर सुखु न समाई॥ सुत हियँ लाइ दुसह दुख मेटे। मृतक सरीर प्रान जनु भेंटे॥

puni daṃḍavata karata dou bhāī| dekhi nṛpati ura sukhu na samāī|| suta hiyam̐ lāi dusaha dukha meṭe| mṛtaka sarīra prāna janu bheṃṭe||

पुनि बसिष्ठ पद सिर तिन्ह नाए। प्रेम मुदित मुनिबर उर लाए॥ बिप्र बृंद बंदे दुहुँ भाईं। मन भावती असीसें पाईं॥

puni basiṣṭha pada sira tinha nāe| prema mudita munibara ura lāe|| bipra bṛṃda baṃde duhum̐ bhāīṃ| mana bhāvatī asīseṃ pāīṃ||

भरत सहानुज कीन्ह प्रनामा। लिए उठाइ लाइ उर रामा॥ हरषे लखन देखि दोउ भ्राता। मिले प्रेम परिपूरित गाता॥

bharata sahānuja kīnha pranāmā| lie uṭhāi lāi ura rāmā|| haraṣe lakhana dekhi dou bhrātā| mile prema paripūrita gātā||

Doha ३०८

पुरजन परिजन जातिजन जाचक मंत्री मीत। मिले जथाबिधि सबहि प्रभु परम कृपाल बिनीत ॥ ३०८॥

purajana parijana jātijana jācaka maṃtrī mīta| mile jathābidhi sabahi prabhu parama kṛpāla binīta || 308||

रामहि देखि बरात जुड़ानी। प्रीति कि रीति न जाति बखानी॥ नृप समीप सोहहिं सुत चारी। जनु धन धरमादिक तनुधारी॥

rāmahi dekhi barāta juṛānī| prīti ki rīti na jāti bakhānī|| nṛpa samīpa sohahiṃ suta cārī| janu dhana dharamādika tanudhārī||

सुतन्ह समेत दसरथहि देखी। मुदित नगर नर नारि बिसेषी॥ सुमन बरिसि सुर हनहिं निसाना। नाकनटीं नाचहिं करि गाना॥

sutanha sameta dasarathahi dekhī| mudita nagara nara nāri biseṣī|| sumana barisi sura hanahiṃ nisānā| nākanaṭīṃ nācahiṃ kari gānā||

सतानंद अरु बिप्र सचिव गन। मागध सूत बिदुष बंदीजन॥ सहित बरात राउ सनमाना। आयसु मागि फिरे अगवाना॥

satānaṃda aru bipra saciva gana| māgadha sūta biduṣa baṃdījana|| sahita barāta rāu sanamānā| āyasu māgi phire agavānā||

प्रथम बरात लगन तें आई। तातें पुर प्रमोदु अधिकाई॥ ब्रह्मानंदु लोग सब लहहीं। बढ़हुँ दिवस निसि बिधि सन कहहीं॥

prathama barāta lagana teṃ āī| tāteṃ pura pramodu adhikāī|| brahmānaṃdu loga saba lahahīṃ| baṛhahum̐ divasa nisi bidhi sana kahahīṃ||

Doha ३०९

रामु सीय सोभा अवधि सुकृत अवधि दोउ राज। जहँ जहँ पुरजन कहहिं अस मिलि नर नारि समाज ॥ ३०९॥

rāmu sīya sobhā avadhi sukṛta avadhi dou rāja| jaham̐ jaham̐ purajana kahahiṃ asa mili nara nāri samāja || 309||

जनक सुकृत मूरति बैदेही। दसरथ सुकृत रामु धरें देही॥ इन्ह सम काँहु न सिव अवराधे। काहिं न इन्ह समान फल लाधे॥

janaka sukṛta mūrati baidehī| dasaratha sukṛta rāmu dhareṃ dehī|| inha sama kām̐hu na siva avarādhe| kāhiṃ na inha samāna phala lādhe||

इन्ह सम कोउ न भयउ जग माहीं। है नहिं कतहूँ होनेउ नाहीं॥ हम सब सकल सुकृत कै रासी। भए जग जनमि जनकपुर बासी॥

inha sama kou na bhayau jaga māhīṃ| hai nahiṃ katahūm̐ honeu nāhīṃ|| hama saba sakala sukṛta kai rāsī| bhae jaga janami janakapura bāsī||

जिन्ह जानकी राम छबि देखी। को सुकृती हम सरिस बिसेषी॥ पुनि देखब रघुबीर बिआहू। लेब भली बिधि लोचन लाहू॥

jinha jānakī rāma chabi dekhī| ko sukṛtī hama sarisa biseṣī|| puni dekhaba raghubīra biāhū| leba bhalī bidhi locana lāhū||

कहहिं परसपर कोकिलबयनीं। एहि बिआहँ बड़ लाभु सुनयनीं॥ बड़ें भाग बिधि बात बनाई। नयन अतिथि होइहहिं दोउ भाई॥

kahahiṃ parasapara kokilabayanīṃ| ehi biāham̐ baṛa lābhu sunayanīṃ|| baṛeṃ bhāga bidhi bāta banāī| nayana atithi hoihahiṃ dou bhāī||

Doha ३१०

बारहिं बार सनेह बस जनक बोलाउब सीय। लेन आइहहिं बंधु दोउ कोटि काम कमनीय ॥ ३१०॥

bārahiṃ bāra saneha basa janaka bolāuba sīya| lena āihahiṃ baṃdhu dou koṭi kāma kamanīya || 310||

बिबिध भाँति होइहि पहुनाई। प्रिय न काहि अस सासुर माई॥ तब तब राम लखनहि निहारी। होइहहिं सब पुर लोग सुखारी॥

bibidha bhām̐ti hoihi pahunāī| priya na kāhi asa sāsura māī|| taba taba rāma lakhanahi nihārī| hoihahiṃ saba pura loga sukhārī||

सखि जस राम लखनकर जोटा। तैसेइ भूप संग दुइ ढोटा॥ स्याम गौर सब अंग सुहाए। ते सब कहहिं देखि जे आए॥

sakhi jasa rāma lakhanakara joṭā| taisei bhūpa saṃga dui ḍhoṭā|| syāma gaura saba aṃga suhāe| te saba kahahiṃ dekhi je āe||

कहा एक मैं आजु निहारे। जनु बिरंचि निज हाथ सँवारे॥ भरतु रामही की अनुहारी। सहसा लखि न सकहिं नर नारी॥

kahā eka maiṃ āju nihāre| janu biraṃci nija hātha sam̐vāre|| bharatu rāmahī kī anuhārī| sahasā lakhi na sakahiṃ nara nārī||

लखनु सत्रुसूदनु एकरूपा। नख सिख ते सब अंग अनूपा॥ मन भावहिं मुख बरनि न जाहीं। उपमा कहुँ त्रिभुवन कोउ नाहीं॥

lakhanu satrusūdanu ekarūpā| nakha sikha te saba aṃga anūpā|| mana bhāvahiṃ mukha barani na jāhīṃ| upamā kahum̐ tribhuvana kou nāhīṃ||

Chhand

उपमा न कोउ कह दास तुलसी कतहूँ कबि कोबिद कहैं। बल बिनय बिद्या सील सोभा सिंधु इन्ह से एड उतहें॥ पुर नारि सकल पसारि अंचल बिधिहि बचन सुनावहीं। ब्याहिअहुं चारिउ भाइ एहिं पुर हम सुमंगल गावहीं॥

upamā na kou kaha dāsa tulasī katahūm̐ kabi kobida kahaiṃ| bala binaya bidyā sīla sobhā siṃdhu inha se eḍa utaheṃ|| pura nāri sakala pasāri aṃcala bidhihi bacana sunāvahīṃ| byāhiahuṃ cāriu bhāi ehiṃ pura hama sumaṃgala gāvahīṃ||

Sortha ३११

कहहिं परस्पर नारि बारि बिलोचन पुलक तन। सखि सबु करब पुरारि पुन्य पयोनिधि भूप दोउ ॥ ३११॥

kahahiṃ paraspara nāri bāri bilocana pulaka tana| sakhi sabu karaba purāri punya payonidhi bhūpa dou || 311||

एहि बिधि सकल मनोरथ करहीं। आनँद उमगि उमगि उर भरहीं॥ जे नृप सीय स्वयंबर आए। देखि बंधु सब तिन्ह सुख पाए॥

ehi bidhi sakala manoratha karahīṃ| ānam̐da umagi umagi ura bharahīṃ|| je nṛpa sīya svayaṃbara āe| dekhi baṃdhu saba tinha sukha pāe||

कहत राम जसु बिसद बिसाला। निज निज भवन गए महिपाला॥ गए बीति कुछ दिन एहि भाँती। प्रमुदित पुरजन सकल बराती॥

kahata rāma jasu bisada bisālā| nija nija bhavana gae mahipālā|| gae bīti kucha dina ehi bhām̐tī| pramudita purajana sakala barātī||

मंगल मूल लगन दिनु आवा। हिम रितु अगहनु मासु सुहावा॥ ग्रह तिथि नखतु जोगु बर बारू। लगन सोधि बिधि कीन्ह बिचारू॥

maṃgala mūla lagana dinu āvā| hima ritu agahanu māsu suhāvā|| graha tithi nakhatu jogu bara bārū| lagana sodhi bidhi kīnha bicārū||

पठै दीन्हि नारद सन सोई। गनी जनक के गनकन्ह जोई॥ सुनी सकल लोगन्ह यह बाता। कहहिं जोतिषी आहिं बिधाता॥

paṭhai dīnhi nārada sana soī| ganī janaka ke ganakanha joī|| sunī sakala loganha yaha bātā| kahahiṃ jotiṣī āhiṃ bidhātā||

Doha ३१२

धेनुधूरि बेला बिमल सकल सुमंगल मूल। बिप्रन्ह कहेउ बिदेह सन जानि सगुन अनुकुल ॥ ३१२॥

dhenudhūri belā bimala sakala sumaṃgala mūla| bipranha kaheu bideha sana jāni saguna anukula || 312||

उपरोहितहि कहेउ नरनाहा। अब बिलंब कर कारनु काहा॥ सतानंद तब सचिव बोलाए। मंगल सकल साजि सब ल्याए॥

uparohitahi kaheu naranāhā| aba bilaṃba kara kāranu kāhā|| satānaṃda taba saciva bolāe| maṃgala sakala sāji saba lyāe||

संख निसान पनव बहु बाजे। मंगल कलस सगुन सुभ साजे॥ सुभग सुआसिनि गावहिं गीता। करहिं बेद धुनि बिप्र पुनीता॥

saṃkha nisāna panava bahu bāje| maṃgala kalasa saguna subha sāje|| subhaga suāsini gāvahiṃ gītā| karahiṃ beda dhuni bipra punītā||

लेन चले सादर एहि भाँती। गए जहाँ जनवास बराती॥ कोसलपति कर देखि समाजू। अति लघु लाग तिन्हहि सुरराजू॥

lena cale sādara ehi bhām̐tī| gae jahām̐ janavāsa barātī|| kosalapati kara dekhi samājū| ati laghu lāga tinhahi surarājū||

भयउ समउ अब धारिअ पाऊ। यह सुनि परा निसानहिं घाऊ॥ गुरहि पूछि करि कुल बिधि राजा। चले संग मुनि साधु समाजा॥

bhayau samau aba dhāria pāū| yaha suni parā nisānahiṃ ghāū|| gurahi pūchi kari kula bidhi rājā| cale saṃga muni sādhu samājā||

Doha ३१३

भाग्य बिभव अवधेस कर देखि देव ब्रह्मादि। लगे सराहन सहस मुख जानि जनम निज बादि ॥ ३१३॥

bhāgya bibhava avadhesa kara dekhi deva brahmādi| lage sarāhana sahasa mukha jāni janama nija bādi || 313||

सुरन्ह सुमंगल अवसरु जाना। बरषहिं सुमन बजाइ निसाना॥ सिव ब्रह्मादिक बिबुध बरूथा। चढ़े बिमानन्हि नाना जूथा॥

suranha sumaṃgala avasaru jānā| baraṣahiṃ sumana bajāi nisānā|| siva brahmādika bibudha barūthā| caṛhe bimānanhi nānā jūthā||

प्रेम पुलक तन हृदयँ उछाहू। चले बिलोकन राम बिआहू॥ देखि जनकपुरु सुर अनुरागे। निज निज लोक सबहिं लघु लागे॥

prema pulaka tana hṛdayam̐ uchāhū| cale bilokana rāma biāhū|| dekhi janakapuru sura anurāge| nija nija loka sabahiṃ laghu lāge||

चितवहिं चकित बिचित्र बिताना। रचना सकल अलौकिक नाना॥ नगर नारि नर रूप निधाना। सुघर सुधरम सुसील सुजाना॥

citavahiṃ cakita bicitra bitānā| racanā sakala alaukika nānā|| nagara nāri nara rūpa nidhānā| sughara sudharama susīla sujānā||

तिन्हहि देखि सब सुर सुरनारीं। भए नखत जनु बिधु उजिआरीं॥ बिधिहि भयह आचरजु बिसेषी। निज करनी कछु कतहुँ न देखी॥

tinhahi dekhi saba sura suranārīṃ| bhae nakhata janu bidhu ujiārīṃ|| bidhihi bhayaha ācaraju biseṣī| nija karanī kachu katahum̐ na dekhī||

Doha ३१४

सिवँ समुझाए देव सब जनि आचरज भुलाहु। हृदयँ बिचारहु धीर धरि सिय रघुबीर बिआहु ॥ ३१४॥

sivam̐ samujhāe deva saba jani ācaraja bhulāhu| hṛdayam̐ bicārahu dhīra dhari siya raghubīra biāhu || 314||

जिन्ह कर नामु लेत जग माहीं। सकल अमंगल मूल नसाहीं॥ करतल होहिं पदारथ चारी। तेइ सिय रामु कहेउ कामारी॥

jinha kara nāmu leta jaga māhīṃ| sakala amaṃgala mūla nasāhīṃ|| karatala hohiṃ padāratha cārī| tei siya rāmu kaheu kāmārī||

एहि बिधि संभु सुरन्ह समुझावा। पुनि आगें बर बसह चलावा॥ देवन्ह देखे दसरथु जाता। महामोद मन पुलकित गाता॥

ehi bidhi saṃbhu suranha samujhāvā| puni āgeṃ bara basaha calāvā|| devanha dekhe dasarathu jātā| mahāmoda mana pulakita gātā||

साधु समाज संग महिदेवा। जनु तनु धरें करहिं सुख सेवा॥

sādhu samāja saṃga mahidevā| janu tanu dhareṃ karahiṃ sukha sevā||

Sortha ३

सोहत साथ सुभग सुत चारी। जनु अपबरग सकल तनुधारी॥

sohata sātha subhaga suta cārī| janu apabaraga sakala tanudhārī||

मरकत कनक बरन बर जोरी। देखि सुरन्ह भै प्रीति न थोरी॥ पुनि रामहि बिलोकि हियँ हरषे। नृपहि सराहि सुमन तिन्ह बरषे॥

marakata kanaka barana bara jorī| dekhi suranha bhai prīti na thorī|| puni rāmahi biloki hiyam̐ haraṣe| nṛpahi sarāhi sumana tinha baraṣe||

Doha ३१५

राम रूपु नख सिख सुभग बारहिं बार निहारि। पुलक गात लोचन सजल उमा समेत पुरारि ॥ ३१५॥

rāma rūpu nakha sikha subhaga bārahiṃ bāra nihāri| pulaka gāta locana sajala umā sameta purāri || 315||

केकि कंठ दुति स्यामल अंगा। तड़ित बिनिंदक बसन सुरंगा॥ ब्याह बिभूषन बिबिध बनाए। मंगल सब सब भाँति सुहाए॥

keki kaṃṭha duti syāmala aṃgā| taṛita biniṃdaka basana suraṃgā|| byāha bibhūṣana bibidha banāe| maṃgala saba saba bhām̐ti suhāe||

सरद बिमल बिधु बदनु सुहावन। नयन नवल राजीव लजावन॥ सकल अलौकिक सुंदरताई। कहि न जाइ मनहीं मन भाई॥

sarada bimala bidhu badanu suhāvana| nayana navala rājīva lajāvana|| sakala alaukika suṃdaratāī| kahi na jāi manahīṃ mana bhāī||

बंधु मनोहर सोहहिं संगा। जात नचावत चपल तुरंगा॥ राजकुअँर बर बाजि देखावहिं। बंस प्रसंसक बिरिद सुनावहिं॥

baṃdhu manohara sohahiṃ saṃgā| jāta nacāvata capala turaṃgā|| rājakuam̐ra bara bāji dekhāvahiṃ| baṃsa prasaṃsaka birida sunāvahiṃ||

जेहि तुरंग पर रामु बिराजे। गति बिलोकि खगनायकु लाजे॥ कहि न जाइ सब भाँति सुहावा। बाजि बेषु जनु काम बनावा॥

jehi turaṃga para rāmu birāje| gati biloki khaganāyaku lāje|| kahi na jāi saba bhām̐ti suhāvā| bāji beṣu janu kāma banāvā||

Chhand

जनु बाजि बेषु बनाइ मनसिजु राम हित अति सोहई। आपनें बय बल रूप गुन गति सकल भुवन बिमोहई॥ जगमगत जीनु जराव जोति सुमोति मनि मानिक लगे। किंकिनि ललाम लगामु ललित बिलोकि सुर नर मुनि ठगे॥

janu bāji beṣu banāi manasiju rāma hita ati sohaī| āpaneṃ baya bala rūpa guna gati sakala bhuvana bimohaī|| jagamagata jīnu jarāva joti sumoti mani mānika lage| kiṃkini lalāma lagāmu lalita biloki sura nara muni ṭhage||

Doha ३१६

प्रभु मनसहिं लयलीन मनु चलत बाजि छबि पाव। भूषित उड़गन तड़ित घनु जनु बर बरहि नचाव ॥ ३१६॥

prabhu manasahiṃ layalīna manu calata bāji chabi pāva| bhūṣita uṛagana taṛita ghanu janu bara barahi nacāva || 316||

जेहिं बर बाजि रामु असवारा। तेहि सारदउ न बरनै पारा॥ संकरु राम रूप अनुरागे। नयन पंचदस अति प्रिय लागे॥

jehiṃ bara bāji rāmu asavārā| tehi sāradau na baranai pārā|| saṃkaru rāma rūpa anurāge| nayana paṃcadasa ati priya lāge||

हरि हित सहित रामु जब जोहे। रमा समेत रमापति मोहे॥ निरखि राम छबि बिधि हरषाने। आठइ नयन जानि पछिताने॥

hari hita sahita rāmu jaba johe| ramā sameta ramāpati mohe|| nirakhi rāma chabi bidhi haraṣāne| āṭhai nayana jāni pachitāne||

सुर सेनप उर बहुत उछाहू। बिधि ते डेवढ़ लोचन लाहू॥ रामहि चितव सुरेस सुजाना। गौतम श्रापु परम हित माना॥

sura senapa ura bahuta uchāhū| bidhi te ḍevaṛha locana lāhū|| rāmahi citava suresa sujānā| gautama śrāpu parama hita mānā||

देव सकल सुरपतिहि सिहाहीं। आजु पुरंदर सम कोउ नाहीं॥ मुदित देवगन रामहि देखी। नृपसमाज दुहुँ हरषु बिसेषी॥

deva sakala surapatihi sihāhīṃ| āju puraṃdara sama kou nāhīṃ|| mudita devagana rāmahi dekhī| nṛpasamāja duhum̐ haraṣu biseṣī||

Chhand

अति हरषु राजसमाज दुहु दिसि दुंदुभी बाजहिं घनी। बरषहिं सुमन सुर हरषि कहि जय जयति जय रघुकुलमनी॥ एहि भाँति जानि बरात आवत बाजने बहु बाजहीं। रानी सुआसिनि बोलि परिछनि हेतु मंगल साजहीं॥

ati haraṣu rājasamāja duhu disi duṃdubhī bājahiṃ ghanī| baraṣahiṃ sumana sura haraṣi kahi jaya jayati jaya raghukulamanī|| ehi bhām̐ti jāni barāta āvata bājane bahu bājahīṃ| rānī suāsini boli parichani hetu maṃgala sājahīṃ||

Doha ३१७

चलीं मुदित परिछनि करन गजगामिनि बर नारि ॥ ३१७॥

calīṃ mudita parichani karana gajagāmini bara nāri || 317||

बिधुबदनीं सब सब मृगलोचनि। सब निज तन छबि रति मदु मोचनि॥ पहिरें बरन बरन बर चीरा। सकल बिभूषन सजें सरीरा॥

bidhubadanīṃ saba saba mṛgalocani| saba nija tana chabi rati madu mocani|| pahireṃ barana barana bara cīrā| sakala bibhūṣana sajeṃ sarīrā||

सकल सुमंगल अंग बनाएँ। करहिं गान कलकंठि लजाएँ॥ कंकन किंकिनि नूपुर बाजहिं। चालि बिलोकि काम गज लाजहिं॥

sakala sumaṃgala aṃga banāem̐| karahiṃ gāna kalakaṃṭhi lajāem̐|| kaṃkana kiṃkini nūpura bājahiṃ| cāli biloki kāma gaja lājahiṃ||

बाजहिं बाजने बिबिध प्रकारा। नभ अरु नगर सुमंगलचारा॥ सची सारदा रमा भवानी। जे सुरतिय सुचि सहज सयानी॥

bājahiṃ bājane bibidha prakārā| nabha aru nagara sumaṃgalacārā|| sacī sāradā ramā bhavānī| je suratiya suci sahaja sayānī||

कपट नारि बर बेष बनाई। मिलीं सकल रनिवासहिं जाई॥ करहिं गान कल मंगल बानीं। हरष बिबस सब काहुँ न जानी॥

kapaṭa nāri bara beṣa banāī| milīṃ sakala ranivāsahiṃ jāī|| karahiṃ gāna kala maṃgala bānīṃ| haraṣa bibasa saba kāhum̐ na jānī||

Chhand

को जान केहि आनंद बस सब ब्रह्म बर परिछन चली। कल गान मधुर निसान बरषहिं सुमन सुर सोभा भली॥ आनंदकंदु बिलोकि दूलहु सकल हियें हरषित भई। अंभोज अंबक अंबु उमगि सुअंग पुलकावलि छई॥

ko jāna kehi ānaṃda basa saba brahma bara parichana calī| kala gāna madhura nisāna baraṣahiṃ sumana sura sobhā bhalī|| ānaṃdakaṃdu biloki dūlahu sakala hiyeṃ haraṣita bhaī| aṃbhoja aṃbaka aṃbu umagi suaṃga pulakāvali chaī||

Doha

जो सुखु भा सिय मातु मन देखि राम बर बेषु।

jo sukhu bhā siya mātu mana dekhi rāma bara beṣu|

Sortha ३१८

न सकहिं कहि कलप सत सहस सारदा सेषु ॥ ३१८॥

na sakahiṃ kahi kalapa sata sahasa sāradā seṣu || 318||

नयन नीरु हटि मंगल जानी। परिछनि करहिं मुदित मन रानी॥ बेद बिहित अरु कुल आचारू। कीन्ह भली बिधि सब ब्यवहारू॥

nayana nīru haṭi maṃgala jānī| parichani karahiṃ mudita mana rānī|| beda bihita aru kula ācārū| kīnha bhalī bidhi saba byavahārū||

पंच सबद धुनि मंगल गाना। पट पाँवड़े परहिं बिधि नाना॥

paṃca sabada dhuni maṃgala gānā| paṭa pām̐vaṛe parahiṃ bidhi nānā||

दसरथु सहित समाज बिराजे। बिभव बिलोकि लोकपति लाजे॥ समयँ समयँ सुर बरषहिं फूला। सांति पढ़हिं महिसुर अनुकूला॥

dasarathu sahita samāja birāje| bibhava biloki lokapati lāje|| samayam̐ samayam̐ sura baraṣahiṃ phūlā| sāṃti paṛhahiṃ mahisura anukūlā||

नभ अरु नगर कोलाहल होई। आपनि पर कछु सुनइ न कोई॥ एहि बिधि रामु मंडपहिं आए। अरघु देइ आसन बैठाए॥

nabha aru nagara kolāhala hoī| āpani para kachu sunai na koī|| ehi bidhi rāmu maṃḍapahiṃ āe| araghu dei āsana baiṭhāe||

Doha

मनि बसन भूषन भूरि वारहिं नारि मंगल गावहीं॥ ब्रहमादि सुरबर बिप्र बेष बनाइ कौतुक देखहीं। अवलोकि रघुकुल कमल रबिछबि सुफल जीवन लेखहीं॥

mani basana bhūṣana bhūri vārahiṃ nāri maṃgala gāvahīṃ|| brahamādi surabara bipra beṣa banāi kautuka dekhahīṃ| avaloki raghukula kamala rabichabi suphala jīvana lekhahīṃ||

Doha ३१९

नाऊ बारी भाट नट राम निछावरि पाइ। मुदित असीसहिं नाइ सिर हरषु न हदयें समाइ ॥ ३१९॥

nāū bārī bhāṭa naṭa rāma nichāvari pāi| mudita asīsahiṃ nāi sira haraṣu na hadayeṃ samāi || 319||

मिले जनकु दसरथु अति प्रीतीं। करि बैदिक लौकिक सब रीतीं॥ मिलत महा दोउ राज बिराजे। उपमा खोजि खोजि कबि लाजे॥

mile janaku dasarathu ati prītīṃ| kari baidika laukika saba rītīṃ|| milata mahā dou rāja birāje| upamā khoji khoji kabi lāje||

लही न कतहुँ हारि हियँ मानी। इन्ह सम एइ उपमा उर आनी॥ सामध देखि देव अनुरागे। सुमन बरषि जसु गावन लागे॥

lahī na katahum̐ hāri hiyam̐ mānī| inha sama ei upamā ura ānī|| sāmadha dekhi deva anurāge| sumana baraṣi jasu gāvana lāge||

जगु बिरंचि उपजावा जब तें। देखे सुने ब्याह बहु तब तें॥ सकल भाँति सम साजु समाजू। सम समधी देखे हम आजू॥

jagu biraṃci upajāvā jaba teṃ| dekhe sune byāha bahu taba teṃ|| sakala bhām̐ti sama sāju samājū| sama samadhī dekhe hama ājū||

देव गिरा सुनि सुंदर साँची। प्रीति अलौकिक दुहु दिसि माची॥ देत पाँवड़े अरघु सुहाए। सादर जनकु मंडपहिं ल्याए॥

deva girā suni suṃdara sām̐cī| prīti alaukika duhu disi mācī|| deta pām̐vaṛe araghu suhāe| sādara janaku maṃḍapahiṃ lyāe||

Doha

०--मंडपु बिलोकि बिचित्र रचनों रुचिरतां मुनि मन हरे। निज पानि जनक सुजान सब कहुं आनि सिंघासन धरे॥ कुल इष्ट सरिस बसिष्ट पूजे बिनय करि आसिष लही। कौसिकहि पूजत परम प्रीति कि रीति तौ न परे कही॥

0--maṃḍapu biloki bicitra racanoṃ ruciratāṃ muni mana hare| nija pāni janaka sujāna saba kahuṃ āni siṃghāsana dhare|| kula iṣṭa sarisa basiṣṭa pūje binaya kari āsiṣa lahī| kausikahi pūjata parama prīti ki rīti tau na pare kahī||

Doha ३२०

बामदेव आदिक रिषय पूजे मुदित महीस। दिए दिव्य आसन सबहि सब सन लही असीस ॥ ३२०॥

bāmadeva ādika riṣaya pūje mudita mahīsa| die divya āsana sabahi saba sana lahī asīsa || 320||

बहुरि कीन्ह कोसलपति पूजा। जानि ईस सम भाउ न दूजा॥ कीन्ह जोरि कर बिनय बड़ाई। कहि निज भाग्य बिभव बहुताई॥

bahuri kīnha kosalapati pūjā| jāni īsa sama bhāu na dūjā|| kīnha jori kara binaya baṛāī| kahi nija bhāgya bibhava bahutāī||

पूजे भूपति सकल बराती। समधि सम सादर सब भाँती॥ आसन उचित दिए सब काहू। कहौं काह मूख एक उछाहू॥

pūje bhūpati sakala barātī| samadhi sama sādara saba bhām̐tī|| āsana ucita die saba kāhū| kahauṃ kāha mūkha eka uchāhū||

सकल बरात जनक सनमानी। दान मान बिनती बर बानी॥ बिधि हरि हरु दिसिपति दिनराऊ। जे जानहिं रघुबीर प्रभाऊ॥

sakala barāta janaka sanamānī| dāna māna binatī bara bānī|| bidhi hari haru disipati dinarāū| je jānahiṃ raghubīra prabhāū||

कपट बिप्र बर बेष बनाएँ। कौतुक देखहिं अति सचु पाएँ॥ पूजे जनक देव सम जानें। दिए सुआसन बिनु पहिचानें॥

kapaṭa bipra bara beṣa banāem̐| kautuka dekhahiṃ ati sacu pāem̐|| pūje janaka deva sama jāneṃ| die suāsana binu pahicāneṃ||

Chhand

पहिचान को केहि जान सबहि अपान सुधि भोरी भई। आनंद कंदु बिलोकि दूलहु उभय दिसि आनेंदमई॥ सुर लखे राम सुजान पूजे मानसिक आसन दए। अवलोकि सीलु सुभाउ प्रभु को बिबुध मन प्रमुदित भए॥

pahicāna ko kehi jāna sabahi apāna sudhi bhorī bhaī| ānaṃda kaṃdu biloki dūlahu ubhaya disi āneṃdamaī|| sura lakhe rāma sujāna pūje mānasika āsana dae| avaloki sīlu subhāu prabhu ko bibudha mana pramudita bhae||

Doha ३२१

रामचंद्र मुख चंद्र छबि लोचन चारु चकोर। करत पान सादर सकल प्रेमु प्रमोदु न थोर ॥ ३२१॥

rāmacaṃdra mukha caṃdra chabi locana cāru cakora| karata pāna sādara sakala premu pramodu na thora || 321||