Bal Kand — बालकाण्ड

बालकाण्ड · दोहा २८४–३०२

देव दनुज भूपति भट नाना। समबल अधिक होउ बलवाना॥ जौं रन हमहि पचारै कोऊ। लरहिं सुखेन कालु किन होऊ॥

deva danuja bhūpati bhaṭa nānā| samabala adhika hou balavānā|| jauṃ rana hamahi pacārai koū| larahiṃ sukhena kālu kina hoū||

छत्रिय तनु धरि समर सकाना। कुल कलंकु तेहिं पावँर आना॥ कहउँ सुभाउ न कुलहि प्रसंसी। कालहु डरहिं न रन रघुबंसी॥

chatriya tanu dhari samara sakānā| kula kalaṃku tehiṃ pāvam̐ra ānā|| kahaum̐ subhāu na kulahi prasaṃsī| kālahu ḍarahiṃ na rana raghubaṃsī||

बिप्रबंस कै असि प्रभुताई। अभय होइ जो तुम्हहि डेराई॥ सुनु मृदु गूढ़ बचन रघुपति के। उघरे पटल परसुधर मति के॥

biprabaṃsa kai asi prabhutāī| abhaya hoi jo tumhahi ḍerāī|| sunu mṛdu gūṛha bacana raghupati ke| ughare paṭala parasudhara mati ke||

राम रमापति कर धनु लेहू। खैंचहु मिटै मोर संदेहू॥ देत चापु आपुहिं चलि गयऊ। परसुराम मन बिसमय भयऊ॥

rāma ramāpati kara dhanu lehū| khaiṃcahu miṭai mora saṃdehū|| deta cāpu āpuhiṃ cali gayaū| parasurāma mana bisamaya bhayaū||

Doha २८४

जाना राम प्रभाउ तब पुलक प्रफुल्लित गात। जोरि पानि बोले बचन ह्दयँ न प्रेमु अमात ॥ २८४॥

jānā rāma prabhāu taba pulaka praphullita gāta| jori pāni bole bacana hdayam̐ na premu amāta || 284||

जय रघुबंस बनज बन भानू। गहन दनुज कुल दहन कृसानु॥ जय सुर बिप्र धेनु हितकारी। जय मद मोह कोह भ्रम हारी॥

jaya raghubaṃsa banaja bana bhānū| gahana danuja kula dahana kṛsānu|| jaya sura bipra dhenu hitakārī| jaya mada moha koha bhrama hārī||

बिनय सील करुना गुन सागर। जयति बचन रचना अति नागर॥ सेवक सुखद सुभग सब अंगा। जय सरीर छबि कोटि अनंगा॥

binaya sīla karunā guna sāgara| jayati bacana racanā ati nāgara|| sevaka sukhada subhaga saba aṃgā| jaya sarīra chabi koṭi anaṃgā||

करौं काह मुख एक प्रसंसा। जय महेस मन मानस हंसा॥ अनुचित बहुत कहेउँ अग्याता। छमहु छमामंदिर दोउ भ्राता॥

karauṃ kāha mukha eka prasaṃsā| jaya mahesa mana mānasa haṃsā|| anucita bahuta kaheum̐ agyātā| chamahu chamāmaṃdira dou bhrātā||

कहि जय जय जय रघुकुलकेतू। भृगुपति गए बनहि तप हेतू॥ अपभयँ कुटिल महीप डेराने। जहँ तहँ कायर गवँहिं पराने॥

kahi jaya jaya jaya raghukulaketū| bhṛgupati gae banahi tapa hetū|| apabhayam̐ kuṭila mahīpa ḍerāne| jaham̐ taham̐ kāyara gavam̐hiṃ parāne||

Doha २८५

देवन्ह दीन्हीं दुंदुभीं प्रभु पर बरषहिं फूल। हरषे पुर नर नारि सब मिटी मोहमय सूल ॥ २८५॥

devanha dīnhīṃ duṃdubhīṃ prabhu para baraṣahiṃ phūla| haraṣe pura nara nāri saba miṭī mohamaya sūla || 285||

अति गहगहे बाजने बाजे। सबहिं मनोहर मंगल साजे॥ जूथ जूथ मिलि सुमुख सुनयनीं। करहिं गान कल कोकिलबयनी॥

ati gahagahe bājane bāje| sabahiṃ manohara maṃgala sāje|| jūtha jūtha mili sumukha sunayanīṃ| karahiṃ gāna kala kokilabayanī||

सुखु बिदेह कर बरनि न जाई। जन्मदरिद्र मनहुँ निधि पाई॥ गत त्रास भइ सीय सुखारी। जनु बिधु उदयँ चकोरकुमारी॥

sukhu bideha kara barani na jāī| janmadaridra manahum̐ nidhi pāī|| gata trāsa bhai sīya sukhārī| janu bidhu udayam̐ cakorakumārī||

जनक कीन्ह कौसिकहि प्रनामा। प्रभु प्रसाद धनु भंजेउ रामा॥ मोहि कृतकृत्य कीन्ह दुहुँ भाईं। अब जो उचित सो कहिअ गोसाई॥

janaka kīnha kausikahi pranāmā| prabhu prasāda dhanu bhaṃjeu rāmā|| mohi kṛtakṛtya kīnha duhum̐ bhāīṃ| aba jo ucita so kahia gosāī||

कह मुनि सुनु नरनाथ प्रबीना। रहा बिबाहु चाप आधीना॥ टूटतहीं धनु भयउ बिबाहू। सुर नर नाग बिदित सब काहु॥

kaha muni sunu naranātha prabīnā| rahā bibāhu cāpa ādhīnā|| ṭūṭatahīṃ dhanu bhayau bibāhū| sura nara nāga bidita saba kāhu||

Doha २८६

तदपि जाइ तुम्ह करहु अब जथा बंस ब्यवहारु। बूझि बिप्र कुलबृद्ध गुर बेद बिदित आचारु ॥ २८६॥

tadapi jāi tumha karahu aba jathā baṃsa byavahāru| būjhi bipra kulabṛddha gura beda bidita ācāru || 286||

दूत अवधपुर पठवहु जाई। आनहिं नृप दसरथहि बोलाई॥ मुदित राउ कहि भलेहिं कृपाला। पठए दूत बोलि तेहि काला॥

dūta avadhapura paṭhavahu jāī| ānahiṃ nṛpa dasarathahi bolāī|| mudita rāu kahi bhalehiṃ kṛpālā| paṭhae dūta boli tehi kālā||

बहुरि महाजन सकल बोलाए। आइ सबन्हि सादर सिर नाए॥ हाट बाट मंदिर सुरबासा। नगरु सँवारहु चारिहुँ पासा॥

bahuri mahājana sakala bolāe| āi sabanhi sādara sira nāe|| hāṭa bāṭa maṃdira surabāsā| nagaru sam̐vārahu cārihum̐ pāsā||

हरषि चले निज निज गृह आए। पुनि परिचारक बोलि पठाए॥ रचहु बिचित्र बितान बनाई। सिर धरि बचन चले सचु पाई॥

haraṣi cale nija nija gṛha āe| puni paricāraka boli paṭhāe|| racahu bicitra bitāna banāī| sira dhari bacana cale sacu pāī||

पठए बोलि गुनी तिन्ह नाना। जे बितान बिधि कुसल सुजाना॥ बिधिहि बंदि तिन्ह कीन्ह अरंभा। बिरचे कनक कदलि के खंभा॥

paṭhae boli gunī tinha nānā| je bitāna bidhi kusala sujānā|| bidhihi baṃdi tinha kīnha araṃbhā| birace kanaka kadali ke khaṃbhā||

Doha २८७

हरित मनिन्ह के पत्र फल पदुमराग के फूल। रचना देखि बिचित्र अति मनु बिरंचि कर भूल ॥ २८७॥

harita maninha ke patra phala padumarāga ke phūla| racanā dekhi bicitra ati manu biraṃci kara bhūla || 287||

बेनि हरित मनिमय सब कीन्हे। सरल सपरब परहिं नहिं चीन्हे॥ कनक कलित अहिबेल बनाई। लखि नहि परइ सपरन सुहाई॥

beni harita manimaya saba kīnhe| sarala saparaba parahiṃ nahiṃ cīnhe|| kanaka kalita ahibela banāī| lakhi nahi parai saparana suhāī||

तेहि के रचि पचि बंध बनाए। बिच बिच मुकता दाम सुहाए॥ मानिक मरकत कुलिस पिरोजा। चीरि कोरि पचि रचे सरोजा॥

tehi ke raci paci baṃdha banāe| bica bica mukatā dāma suhāe|| mānika marakata kulisa pirojā| cīri kori paci race sarojā||

किए भृंग बहुरंग बिहंगा। गुंजहिं कूजहिं पवन प्रसंगा॥ सुर प्रतिमा खंभन गढ़ी काढ़ी। मंगल द्रब्य लिएँ सब ठाढ़ी॥

kie bhṛṃga bahuraṃga bihaṃgā| guṃjahiṃ kūjahiṃ pavana prasaṃgā|| sura pratimā khaṃbhana gaṛhī kāṛhī| maṃgala drabya liem̐ saba ṭhāṛhī||

चौंकें भाँति अनेक पुराईं। सिंधुर मनिमय सहज सुहाई॥

cauṃkeṃ bhām̐ti aneka purāīṃ| siṃdhura manimaya sahaja suhāī||

Doha २८८

सौरभ पल्लव सुभग सुठि किए नीलमनि कोरि। हेम बौर मरकत घवरि लसत पाटमय डोरि ॥ २८८॥

saurabha pallava subhaga suṭhi kie nīlamani kori| hema baura marakata ghavari lasata pāṭamaya ḍori || 288||

रचे रुचिर बर बंदनिबारे। मनहूं मनोभवें फंद संवारे॥ मंगल कलस अनेक बनाए। ध्वज पताक पट चमर सुहाए॥

race rucira bara baṃdanibāre| manahūṃ manobhaveṃ phaṃda saṃvāre|| maṃgala kalasa aneka banāe| dhvaja patāka paṭa camara suhāe||

दीप मनोहर मनिमय नाना। जाइ न बरनि बिचित्र बिताना॥ जेहिं मंडप दुलहिनि बैदेही। सो बरनै असि मति कबि केही॥

dīpa manohara manimaya nānā| jāi na barani bicitra bitānā|| jehiṃ maṃḍapa dulahini baidehī| so baranai asi mati kabi kehī||

दूलहु रामु रूप गुन सागर। सो बितानु तिहुँ लोक उजागर॥ जनक भवन कै सौभा जैसी। गृह गृह प्रति पुर देखिअ तैसी॥

dūlahu rāmu rūpa guna sāgara| so bitānu tihum̐ loka ujāgara|| janaka bhavana kai saubhā jaisī| gṛha gṛha prati pura dekhia taisī||

जेहिं तेरहुति तेहि समय निहारी। तेहि लघु लगहिं भुवन दस चारी॥ जो संपदा नीच गृह सोहा। सो बिलोकि सुरनायक मोहा॥

jehiṃ terahuti tehi samaya nihārī| tehi laghu lagahiṃ bhuvana dasa cārī|| jo saṃpadā nīca gṛha sohā| so biloki suranāyaka mohā||

Doha २८९

बसइ नगर जेहि लच्छ करि कपट नारि बर बेषु। तेहि पुर कै सोभा कहत सकुचहिं सारद सेषु ॥ २८९॥

basai nagara jehi laccha kari kapaṭa nāri bara beṣu| tehi pura kai sobhā kahata sakucahiṃ sārada seṣu || 289||

पहुँचे दूत राम पुर पावन। हरषे नगर बिलोकि सुहावन॥ भूप द्वार तिन्ह खबरि जनाई। दसरथ नृप सुनि लिए बोलाई॥

pahum̐ce dūta rāma pura pāvana| haraṣe nagara biloki suhāvana|| bhūpa dvāra tinha khabari janāī| dasaratha nṛpa suni lie bolāī||

करि प्रनामु तिन्ह पाती दीन्ही। मुदित महीप आपु उठि लीन्ही॥ बारि बिलोचन बाचत पाँती। पुलक गात आई भरि छाती॥

kari pranāmu tinha pātī dīnhī| mudita mahīpa āpu uṭhi līnhī|| bāri bilocana bācata pām̐tī| pulaka gāta āī bhari chātī||

रामु लखनु उर कर बर चीठी। रहि गए कहत न खाटी मीठी॥ पुनि धरि धीर पत्रिका बाँची। हरषी सभा बात सुनि साँची॥

rāmu lakhanu ura kara bara cīṭhī| rahi gae kahata na khāṭī mīṭhī|| puni dhari dhīra patrikā bām̐cī| haraṣī sabhā bāta suni sām̐cī||

खेलत रहे तहाँ सुधि पाई। आए भरतु सहित हित भाई॥ पूछत अति सनेहँ सकुचाई। तात कहाँ तें पाती आई

khelata rahe tahām̐ sudhi pāī| āe bharatu sahita hita bhāī|| pūchata ati saneham̐ sakucāī| tāta kahām̐ teṃ pātī āī

Doha २९०

कुसल प्रानप्रिय बंधु दोउ अहहिं कहहु केहिं देस। सुनि सनेह साने बचन बाची बहुरि नरेस ॥ २९०॥

kusala prānapriya baṃdhu dou ahahiṃ kahahu kehiṃ desa| suni saneha sāne bacana bācī bahuri naresa || 290||

सुनि पाती पुलके दोउ भ्राता। अधिक सनेहु समात न गाता॥ प्रीति पुनीत भरत कै देखी। सकल सभाँ सुखु लहेउ बिसेषी॥

suni pātī pulake dou bhrātā| adhika sanehu samāta na gātā|| prīti punīta bharata kai dekhī| sakala sabhām̐ sukhu laheu biseṣī||

तब नृप दूत निकट बैठारे। मधुर मनोहर बचन उचारे॥ भैया कहहु कुसल दोउ बारे। तुम्ह नीकें निज नयन निहारे॥

taba nṛpa dūta nikaṭa baiṭhāre| madhura manohara bacana ucāre|| bhaiyā kahahu kusala dou bāre| tumha nīkeṃ nija nayana nihāre||

स्यामल गौर धरें धनु भाथा। बय किसोर कौसिक मुनि साथा॥ पहिचानहु तुम्ह कहहु सुभाऊ। प्रेम बिबस पुनि पुनि कह राऊ॥

syāmala gaura dhareṃ dhanu bhāthā| baya kisora kausika muni sāthā|| pahicānahu tumha kahahu subhāū| prema bibasa puni puni kaha rāū||

जा दिन तें मुनि गए लवाई। तब तें आजु साँचि सुधि पाई॥ कहहु बिदेह कवन बिधि जाने। सुनि प्रिय बचन दूत मुसकाने॥

jā dina teṃ muni gae lavāī| taba teṃ āju sām̐ci sudhi pāī|| kahahu bideha kavana bidhi jāne| suni priya bacana dūta musakāne||

Doha २९१

सुनहु महीपति मुकुट मनि तुम्ह सम धन्य न कोउ। रामु लखनु जिन्ह के तनय बिस्व बिभूषन दोउ ॥ २९१॥

sunahu mahīpati mukuṭa mani tumha sama dhanya na kou| rāmu lakhanu jinha ke tanaya bisva bibhūṣana dou || 291||

पूछन जोगु न तनय तुम्हारे। पुरुषसिंघ तिहु पुर उजिआरे॥ जिन्ह के जस प्रताप कें आगे। ससि मलीन रबि सीतल लागे॥

pūchana jogu na tanaya tumhāre| puruṣasiṃgha tihu pura ujiāre|| jinha ke jasa pratāpa keṃ āge| sasi malīna rabi sītala lāge||

तिन्ह कहँ कहिअ नाथ किमि चीन्हे। देखिअ रबि कि दीप कर लीन्हे॥ सीय स्वयंबर भूप अनेका। समिटे सुभट एक तें एका॥

tinha kaham̐ kahia nātha kimi cīnhe| dekhia rabi ki dīpa kara līnhe|| sīya svayaṃbara bhūpa anekā| samiṭe subhaṭa eka teṃ ekā||

संभु सरासनु काहुँ न टारा। हारे सकल बीर बरिआरा॥ तीनि लोक महँ जे भटमानी। सभ कै सकति संभु धनु भानी॥

saṃbhu sarāsanu kāhum̐ na ṭārā| hāre sakala bīra bariārā|| tīni loka maham̐ je bhaṭamānī| sabha kai sakati saṃbhu dhanu bhānī||

सकइ उठाइ सरासुर मेरू। सोउ हियँ हारि गयउ करि फेरू॥ जेहि कौतुक सिवसैलु उठावा। सोउ तेहि सभाँ पराभउ पावा॥

sakai uṭhāi sarāsura merū| sou hiyam̐ hāri gayau kari pherū|| jehi kautuka sivasailu uṭhāvā| sou tehi sabhām̐ parābhau pāvā||

Doha २९२

तहाँ राम रघुबंस मनि सुनिअ महा महिपाल। भंजेउ चाप प्रयास बिनु जिमि गज पंकज नाल ॥ २९२॥

tahām̐ rāma raghubaṃsa mani sunia mahā mahipāla| bhaṃjeu cāpa prayāsa binu jimi gaja paṃkaja nāla || 292||

सुनि सरोष भृगुनायकु आए। बहुत भाँति तिन्ह आँखि देखाए॥ देखि राम बलु निज धनु दीन्हा। करि बहु बिनय गवनु बन कीन्हा॥

suni saroṣa bhṛgunāyaku āe| bahuta bhām̐ti tinha ām̐khi dekhāe|| dekhi rāma balu nija dhanu dīnhā| kari bahu binaya gavanu bana kīnhā||

राजन रामु अतुलबल जैसें। तेज निधान लखनु पुनि तैसें॥ कंपहि भूप बिलोकत जाकें। जिमि गज हरि किसोर के ताकें॥

rājana rāmu atulabala jaiseṃ| teja nidhāna lakhanu puni taiseṃ|| kaṃpahi bhūpa bilokata jākeṃ| jimi gaja hari kisora ke tākeṃ||

देव देखि तव बालक दोऊ। अब न आँखि तर आवत कोऊ॥ दूत बचन रचना प्रिय लागी। प्रेम प्रताप बीर रस पागी॥

deva dekhi tava bālaka doū| aba na ām̐khi tara āvata koū|| dūta bacana racanā priya lāgī| prema pratāpa bīra rasa pāgī||

सभा समेत राउ अनुरागे। दूतन्ह देन निछावरि लागे॥ कहि अनीति ते मूदहिं काना। धरमु बिचारि सबहिं सुख माना॥

sabhā sameta rāu anurāge| dūtanha dena nichāvari lāge|| kahi anīti te mūdahiṃ kānā| dharamu bicāri sabahiṃ sukha mānā||

Doha २९३

तब उठि भूप बसिष्ठ कहुँ दीन्हि पत्रिका जाइ। कथा सुनाई गुरहि सब सादर दूत बोलाइ ॥ २९३॥

taba uṭhi bhūpa basiṣṭha kahum̐ dīnhi patrikā jāi| kathā sunāī gurahi saba sādara dūta bolāi || 293||

सुनि बोले गुर अति सुखु पाई। पुन्य पुरुष कहुँ महि सुख छाई॥ जिमि सरिता सागर महुँ जाहीं। जद्यपि ताहि कामना नाहीं॥

suni bole gura ati sukhu pāī| punya puruṣa kahum̐ mahi sukha chāī|| jimi saritā sāgara mahum̐ jāhīṃ| jadyapi tāhi kāmanā nāhīṃ||

तिमि सुख संपति बिनहिं बोलाएँ। धरमसील पहिं जाहिं सुभाएँ॥ तुम्ह गुर बिप्र धेनु सुर सेबी। तसि पुनीत कौसल्या देबी॥

timi sukha saṃpati binahiṃ bolāem̐| dharamasīla pahiṃ jāhiṃ subhāem̐|| tumha gura bipra dhenu sura sebī| tasi punīta kausalyā debī||

सुकृती तुम्ह समान जग माहीं। भयउ न है कोउ होनेउ नाहीं॥ तुम्ह ते अधिक पुन्य बड़ काकें। राजन राम सरिस सुत जाकें॥

sukṛtī tumha samāna jaga māhīṃ| bhayau na hai kou honeu nāhīṃ|| tumha te adhika punya baṛa kākeṃ| rājana rāma sarisa suta jākeṃ||

बीर बिनीत धरम ब्रत धारी। गुन सागर बर बालक चारी॥ तुम्ह कहुँ सर्ब काल कल्याना। सजहु बरात बजाइ निसाना॥

bīra binīta dharama brata dhārī| guna sāgara bara bālaka cārī|| tumha kahum̐ sarba kāla kalyānā| sajahu barāta bajāi nisānā||

Doha २९४

चलहु बेगि सुनि गुर बचन भलेहिं नाथ सिरु नाइ। भूपति गवने भवन तब दूतन्ह बासु देवाइ ॥ २९४॥

calahu begi suni gura bacana bhalehiṃ nātha siru nāi| bhūpati gavane bhavana taba dūtanha bāsu devāi || 294||

राजा सबु रनिवास बोलाई। जनक पत्रिका बाचि सुनाई॥ सुनि संदेसु सकल हरषानीं। अपर कथा सब भूप बखानीं॥

rājā sabu ranivāsa bolāī| janaka patrikā bāci sunāī|| suni saṃdesu sakala haraṣānīṃ| apara kathā saba bhūpa bakhānīṃ||

प्रेम प्रफुल्लित राजहिं रानी। मनहुँ सिखिनि सुनि बारिद बनी॥ मुदित असीस देहिं गुरु नारीं। अति आनंद मगन महतारीं॥

prema praphullita rājahiṃ rānī| manahum̐ sikhini suni bārida banī|| mudita asīsa dehiṃ guru nārīṃ| ati ānaṃda magana mahatārīṃ||

लेहिं परस्पर अति प्रिय पाती। हृदयँ लगाइ जुड़ावहिं छाती॥ राम लखन कै कीरति करनी। बारहिं बार भूपबर बरनी॥

lehiṃ paraspara ati priya pātī| hṛdayam̐ lagāi juṛāvahiṃ chātī|| rāma lakhana kai kīrati karanī| bārahiṃ bāra bhūpabara baranī||

मुनि प्रसादु कहि द्वार सिधाए। रानिन्ह तब महिदेव बोलाए॥ दिए दान आनंद समेता। चले बिप्रबर आसिष देता॥

muni prasādu kahi dvāra sidhāe| rāninha taba mahideva bolāe|| die dāna ānaṃda sametā| cale biprabara āsiṣa detā||

Sortha २९५

जाचक लिए हँकारि दीन्हि निछावरि कोटि बिधि। चिरु जीवहुँ सुत चारि चक्रबर्ति दसरत्थ के ॥ २९५॥

jācaka lie ham̐kāri dīnhi nichāvari koṭi bidhi| ciru jīvahum̐ suta cāri cakrabarti dasarattha ke || 295||

कहत चले पहिरें पट नाना। हरषि हने गहगहे निसाना॥ समाचार सब लोगन्ह पाए। लागे घर घर होने बधाए॥

kahata cale pahireṃ paṭa nānā| haraṣi hane gahagahe nisānā|| samācāra saba loganha pāe| lāge ghara ghara hone badhāe||

भुवन चारि दस भरा उछाहू। जनकसुता रघुबीर बिआहू॥ सुनि सुभ कथा लोग अनुरागे। मग गृह गलीं सँवारन लागे॥

bhuvana cāri dasa bharā uchāhū| janakasutā raghubīra biāhū|| suni subha kathā loga anurāge| maga gṛha galīṃ sam̐vārana lāge||

जद्यपि अवध सदैव सुहावनि। राम पुरी मंगलमय पावनि॥ तदपि प्रीति कै प्रीति सुहाई। मंगल रचना रची बनाई॥

jadyapi avadha sadaiva suhāvani| rāma purī maṃgalamaya pāvani|| tadapi prīti kai prīti suhāī| maṃgala racanā racī banāī||

ध्वज पताक पट चामर चारु। छावा परम बिचित्र बजारू॥ कनक कलस तोरन मनि जाला। हरद दूब दधि अच्छत माला॥

dhvaja patāka paṭa cāmara cāru| chāvā parama bicitra bajārū|| kanaka kalasa torana mani jālā| harada dūba dadhi acchata mālā||

Doha २९६

मंगलमय निज निज भवन लोगन्ह रचे बनाइ। बीथीं सीचीं चतुरसम चौकें चारु पुराइ ॥ २९६॥

maṃgalamaya nija nija bhavana loganha race banāi| bīthīṃ sīcīṃ caturasama caukeṃ cāru purāi || 296||

जहँ तहँ जूथ जूथ मिलि भामिनि। सजि नव सप्त सकल दुति दामिनि॥ बिधुबदनीं मृग सावक लोचनि। निज सरुप रति मानु बिमोचनि॥

jaham̐ taham̐ jūtha jūtha mili bhāmini| saji nava sapta sakala duti dāmini|| bidhubadanīṃ mṛga sāvaka locani| nija sarupa rati mānu bimocani||

गावहिं मंगल मंजुल बानीं। सुनिकल रव कलकंठि लजानीं॥ भूप भवन किमि जाइ बखाना। बिस्व बिमोहन रचेउ बिताना॥

gāvahiṃ maṃgala maṃjula bānīṃ| sunikala rava kalakaṃṭhi lajānīṃ|| bhūpa bhavana kimi jāi bakhānā| bisva bimohana raceu bitānā||

मंगल द्रब्य मनोहर नाना। राजत बाजत बिपुल निसाना॥ कतहुँ बिरिद बंदी उच्चरहीं। कतहुँ बेद धुनि भूसुर करहीं॥

maṃgala drabya manohara nānā| rājata bājata bipula nisānā|| katahum̐ birida baṃdī uccarahīṃ| katahum̐ beda dhuni bhūsura karahīṃ||

गावहिं सुंदरि मंगल गीता। लै लै नामु रामु अरु सीता॥ बहुत उछाहु भवनु अति थोरा। मानहुँ उमगि चला चहु ओरा॥

gāvahiṃ suṃdari maṃgala gītā| lai lai nāmu rāmu aru sītā|| bahuta uchāhu bhavanu ati thorā| mānahum̐ umagi calā cahu orā||

Doha २९७

सोभा दसरथ भवन कइ को कबि बरनै पार। जहाँ सकल सुर सीस मनि राम लीन्ह अवतार ॥ २९७॥

sobhā dasaratha bhavana kai ko kabi baranai pāra| jahām̐ sakala sura sīsa mani rāma līnha avatāra || 297||

भूप भरत पुनि लिए बोलाई। हय गय स्यंदन साजहु जाई॥ चलहु बेगि रघुबीर बराता। सुनत पुलक पूरे दोउ भ्राता॥

bhūpa bharata puni lie bolāī| haya gaya syaṃdana sājahu jāī|| calahu begi raghubīra barātā| sunata pulaka pūre dou bhrātā||

भरत सकल साहनी बोलाए। आयसु दीन्ह मुदित उठि धाए॥ रचि रुचि जीन तुरग तिन्ह साजे। बरन बरन बर बाजि बिराजे॥

bharata sakala sāhanī bolāe| āyasu dīnha mudita uṭhi dhāe|| raci ruci jīna turaga tinha sāje| barana barana bara bāji birāje||

सुभग सकल सुठि चंचल करनी। अय इव जरत धरत पग धरनी॥ नाना जाति न जाहिं बखाने। निदरि पवनु जनु चहत उड़ाने॥

subhaga sakala suṭhi caṃcala karanī| aya iva jarata dharata paga dharanī|| nānā jāti na jāhiṃ bakhāne| nidari pavanu janu cahata uṛāne||

तिन्ह सब छयल भए असवारा। भरत सरिस बय राजकुमारा॥ सब सुंदर सब भूषनधारी। कर सर चाप तून कटि भारी॥

tinha saba chayala bhae asavārā| bharata sarisa baya rājakumārā|| saba suṃdara saba bhūṣanadhārī| kara sara cāpa tūna kaṭi bhārī||

Doha २९८

छरे छबीले छयल सब सूर सुजान नबीन। जुग पदचर असवार प्रति जे असिकला प्रबीन ॥ २९८॥

chare chabīle chayala saba sūra sujāna nabīna| juga padacara asavāra prati je asikalā prabīna || 298||

बाँधे बिरद बीर रन गाढ़े। निकसि भए पुर बाहेर ठाढ़े॥ फेरहिं चतुर तुरग गति नाना। हरषहिं सुनि सुनि पवन निसाना॥

bām̐dhe birada bīra rana gāṛhe| nikasi bhae pura bāhera ṭhāṛhe|| pherahiṃ catura turaga gati nānā| haraṣahiṃ suni suni pavana nisānā||

रथ सारथिन्ह बिचित्र बनाए। ध्वज पताक मनि भूषन लाए॥ चवँर चारु किंकिन धुनि करही। भानु जान सोभा अपहरहीं॥

ratha sārathinha bicitra banāe| dhvaja patāka mani bhūṣana lāe|| cavam̐ra cāru kiṃkina dhuni karahī| bhānu jāna sobhā apaharahīṃ||

सावँकरन अगनित हय होते। ते तिन्ह रथन्ह सारथिन्ह जोते॥ सुंदर सकल अलंकृत सोहे। जिन्हहि बिलोकत मुनि मन मोहे॥

sāvam̐karana aganita haya hote| te tinha rathanha sārathinha jote|| suṃdara sakala alaṃkṛta sohe| jinhahi bilokata muni mana mohe||

जे जल चलहिं थलहि की नाई। टाप न बूड़ बेग अधिकाई॥ अस्त्र सस्त्र सबु साजु बनाई। रथी सारथिन्ह लिए बोलाई॥

je jala calahiṃ thalahi kī nāī| ṭāpa na būṛa bega adhikāī|| astra sastra sabu sāju banāī| rathī sārathinha lie bolāī||

Doha २९९

चढ़ि चढ़ि रथ बाहेर नगर लागी जुरन बरात। होत सगुन सुन्दर सबहि जो जेहि कारज जात ॥ २९९॥

caṛhi caṛhi ratha bāhera nagara lāgī jurana barāta| hota saguna sundara sabahi jo jehi kāraja jāta || 299||

कलित करिबरन्हि परीं अँबारीं। कहि न जाहिं जेहि भाँति सँवारीं॥ चले मत्तगज घंट बिराजी। मनहुँ सुभग सावन घन राजी॥

kalita karibaranhi parīṃ am̐bārīṃ| kahi na jāhiṃ jehi bhām̐ti sam̐vārīṃ|| cale mattagaja ghaṃṭa birājī| manahum̐ subhaga sāvana ghana rājī||

बाहन अपर अनेक बिधाना। सिबिका सुभग सुखासन जाना॥ तिन्ह चढ़ि चले बिप्रबर बृन्दा। जनु तनु धरें सकल श्रुति छंदा॥

bāhana apara aneka bidhānā| sibikā subhaga sukhāsana jānā|| tinha caṛhi cale biprabara bṛndā| janu tanu dhareṃ sakala śruti chaṃdā||

मागध सूत बंदि गुनगायक। चले जान चढ़ि जो जेहि लायक॥ बेसर ऊँट बृषभ बहु जाती। चले बस्तु भरि अगनित भाँती॥

māgadha sūta baṃdi gunagāyaka| cale jāna caṛhi jo jehi lāyaka|| besara ūm̐ṭa bṛṣabha bahu jātī| cale bastu bhari aganita bhām̐tī||

कोटिन्ह काँवरि चले कहारा। बिबिध बस्तु को बरनै पारा॥ चले सकल सेवक समुदाई। निज निज साजु समाजु बनाई॥

koṭinha kām̐vari cale kahārā| bibidha bastu ko baranai pārā|| cale sakala sevaka samudāī| nija nija sāju samāju banāī||

Doha ३००

सब कें उर निर्भर हरषु पूरित पुलक सरीर। कबहिं देखिबे नयन भरि रामु लखनू दोउ बीर ॥ ३००॥

saba keṃ ura nirbhara haraṣu pūrita pulaka sarīra| kabahiṃ dekhibe nayana bhari rāmu lakhanū dou bīra || 300||

गरजहिं गज घंटा धुनि घोरा। रथ रव बाजि हिंस चहु ओरा॥ निदरि घनहि घुर्म्मरहिं निसाना। निज पराइ कछु सुनिअ न काना॥

garajahiṃ gaja ghaṃṭā dhuni ghorā| ratha rava bāji hiṃsa cahu orā|| nidari ghanahi ghurmmarahiṃ nisānā| nija parāi kachu sunia na kānā||

महा भीर भूपति के द्वारें। रज होइ जाइ पषान पबारें॥

mahā bhīra bhūpati ke dvāreṃ| raja hoi jāi paṣāna pabāreṃ||

गावहिं गीत मनोहर नाना। अति आनंदु न जाइ बखाना॥ तब सुमंत्र दुइ स्पंदन साजी। जोते रबि हय निंदक बाजी॥

gāvahiṃ gīta manohara nānā| ati ānaṃdu na jāi bakhānā|| taba sumaṃtra dui spaṃdana sājī| jote rabi haya niṃdaka bājī||

Doha ४

दोउ रथ रुचिर भूप पहिं आने। नहिं सारद पहिं जाहिं बखाने॥ राज समाजु एक रथ साजा। दूसर तेज पुंज अति भ्राजा॥

dou ratha rucira bhūpa pahiṃ āne| nahiṃ sārada pahiṃ jāhiṃ bakhāne|| rāja samāju eka ratha sājā| dūsara teja puṃja ati bhrājā||

Doha ३०१

तेहिं रथ रुचिर बसिष्ठ कहुँ हरषि चढ़ाइ नरेसु। आपु चढ़ेउ स्पंदन सुमिरि हर गुर गौरि गनेसु ॥ ३०१॥

tehiṃ ratha rucira basiṣṭha kahum̐ haraṣi caṛhāi naresu| āpu caṛheu spaṃdana sumiri hara gura gauri ganesu || 301||

सहित बसिष्ठ सोह नृप कैसें। सुर गुर संग पुरंदर जैसें॥ करि कुल रीति बेद बिधि राऊ। देखि सबहि सब भाँति बनाऊ॥

sahita basiṣṭha soha nṛpa kaiseṃ| sura gura saṃga puraṃdara jaiseṃ|| kari kula rīti beda bidhi rāū| dekhi sabahi saba bhām̐ti banāū||

सुमिरि रामु गुर आयसु पाई। चले महीपति संख बजाई॥ हरषे बिबुध बिलोकि बराता। बरषहिं सुमन सुमंगल दाता॥

sumiri rāmu gura āyasu pāī| cale mahīpati saṃkha bajāī|| haraṣe bibudha biloki barātā| baraṣahiṃ sumana sumaṃgala dātā||

भयउ कोलाहल हय गय गाजे। ब्योम बरात बाजने बाजे॥ सुर नर नारि सुमंगल गाई। सरस राग बाजहिं सहनाई॥

bhayau kolāhala haya gaya gāje| byoma barāta bājane bāje|| sura nara nāri sumaṃgala gāī| sarasa rāga bājahiṃ sahanāī||

घंट घंटि धुनि बरनि न जाहीं। सरव करहिं पाइक फहराहीं॥ करहिं बिदूषक कौतुक नाना। हास कुसल कल गान सुजाना॥

ghaṃṭa ghaṃṭi dhuni barani na jāhīṃ| sarava karahiṃ pāika phaharāhīṃ|| karahiṃ bidūṣaka kautuka nānā| hāsa kusala kala gāna sujānā||

Doha ३०२

तुरग नचावहिं कुँअर बर अकनि मृदंग निसान। नागर नट चितवहिं चकित डगहिं न ताल बँधान ॥ ३०२॥

turaga nacāvahiṃ kum̐ara bara akani mṛdaṃga nisāna| nāgara naṭa citavahiṃ cakita ḍagahiṃ na tāla bam̐dhāna || 302||