Ayodhya Kand — अयोध्याकाण्ड

अयोध्याकाण्ड · दोहा १४४–१५७

गुह सारथिहि फिरेउ पहुँचाई। बिरहु बिषादु बरनि नहिं जाई॥ चले अवध लेइ रथहि निषादा। होहि छनहिं छन मगन बिषादा॥

guha sārathihi phireu pahum̐cāī| birahu biṣādu barani nahiṃ jāī|| cale avadha lei rathahi niṣādā| hohi chanahiṃ chana magana biṣādā||

Sortha २

सोच सुमंत्र बिकल दुख दीना। धिग जीवन रघुबीर बिहीना॥ रहिहि न अंतहुँ अधम सरीरू। जसु न लहेउ बिछुरत रघुबीरू॥

soca sumaṃtra bikala dukha dīnā| dhiga jīvana raghubīra bihīnā|| rahihi na aṃtahum̐ adhama sarīrū| jasu na laheu bichurata raghubīrū||

भए अजस अघ भाजन प्राना। कवन हेतु नहिं करत पयाना॥ अहह मंद मनु अवसर चूका। अजहुँ न हृदय होत दुइ टूका॥

bhae ajasa agha bhājana prānā| kavana hetu nahiṃ karata payānā|| ahaha maṃda manu avasara cūkā| ajahum̐ na hṛdaya hota dui ṭūkā||

मीजि हाथ सिरु धुनि पछिताई। मनहँ कृपन धन रासि गवाँई॥ बिरिद बाँधि बर बीरु कहाई। चलेउ समर जनु सुभट पराई॥

mīji hātha siru dhuni pachitāī| manaham̐ kṛpana dhana rāsi gavām̐ī|| birida bām̐dhi bara bīru kahāī| caleu samara janu subhaṭa parāī||

Doha १४४

बिप्र बिबेकी बेदबिद संमत साधु सुजाति। जिमि धोखें मदपान कर सचिव सोच तेहि भाँति ॥ १४४॥

bipra bibekī bedabida saṃmata sādhu sujāti| jimi dhokheṃ madapāna kara saciva soca tehi bhām̐ti || 144||

जिमि कुलीन तिय साधु सयानी। पतिदेवता करम मन बानी॥ रहै करम बस परिहरि नाहू। सचिव हृदयँ तिमि दारुन दाहु॥

jimi kulīna tiya sādhu sayānī| patidevatā karama mana bānī|| rahai karama basa parihari nāhū| saciva hṛdayam̐ timi dāruna dāhu||

लोचन सजल डीठि भइ थोरी। सुनइ न श्रवन बिकल मति भोरी॥ सूखहिं अधर लागि मुहँ लाटी। जिउ न जाइ उर अवधि कपाटी॥

locana sajala ḍīṭhi bhai thorī| sunai na śravana bikala mati bhorī|| sūkhahiṃ adhara lāgi muham̐ lāṭī| jiu na jāi ura avadhi kapāṭī||

बिबरन भयउ न जाइ निहारी। मारेसि मनहुँ पिता महतारी॥ हानि गलानि बिपुल मन ब्यापी। जमपुर पंथ सोच जिमि पापी॥

bibarana bhayau na jāi nihārī| māresi manahum̐ pitā mahatārī|| hāni galāni bipula mana byāpī| jamapura paṃtha soca jimi pāpī||

बचनु न आव हृदयँ पछिताई। अवध काह मैं देखब जाई॥ राम रहित रथ देखिहि जोई। सकुचिहि मोहि बिलोकत सोई॥

bacanu na āva hṛdayam̐ pachitāī| avadha kāha maiṃ dekhaba jāī|| rāma rahita ratha dekhihi joī| sakucihi mohi bilokata soī||

Doha १४५

-धाइ पूँछिहहिं मोहि जब बिकल नगर नर नारि। उतरु देब मैं सबहि तब हृदयँ बज्रु बैठारि ॥ १४५॥

-dhāi pūm̐chihahiṃ mohi jaba bikala nagara nara nāri| utaru deba maiṃ sabahi taba hṛdayam̐ bajru baiṭhāri || 145||

पुछिहहिं दीन दुखित सब माता। कहब काह मैं तिन्हहि बिधाता॥ पूछिहि जबहिं लखन महतारी। कहिहउँ कवन सँदेस सुखारी॥

puchihahiṃ dīna dukhita saba mātā| kahaba kāha maiṃ tinhahi bidhātā|| pūchihi jabahiṃ lakhana mahatārī| kahihaum̐ kavana sam̐desa sukhārī||

राम जननि जब आइहि धाई। सुमिरि बच्छु जिमि धेनु लवाई॥ पूँछत उतरु देब मैं तेही। गे बनु राम लखनु बैदेही॥

rāma janani jaba āihi dhāī| sumiri bacchu jimi dhenu lavāī|| pūm̐chata utaru deba maiṃ tehī| ge banu rāma lakhanu baidehī||

जोइ पूँछिहि तेहि ऊतरु देबा। जाइ अवध अब यहु सुखु लेबा॥ पूँछिहि जबहिं राउ दुख दीना। जिवनु जासु रघुनाथ अधीना॥

joi pūm̐chihi tehi ūtaru debā| jāi avadha aba yahu sukhu lebā|| pūm̐chihi jabahiṃ rāu dukha dīnā| jivanu jāsu raghunātha adhīnā||

देहउँ उतरु कौनु मुहु लाई। आयउँ कुसल कुअँर पहुँचाई॥ सुनत लखन सिय राम सँदेसू। तृन जिमि तनु परिहरिहि नरेसू॥

dehaum̐ utaru kaunu muhu lāī| āyaum̐ kusala kuam̐ra pahum̐cāī|| sunata lakhana siya rāma sam̐desū| tṛna jimi tanu pariharihi naresū||

Doha १४६

-ह्रदउ न बिदरेउ पंक जिमि बिछुरत प्रीतमु नीरु। जानत हौं मोहि दीन्ह बिधि यहु जातना सरीरु ॥ १४६॥

-hradau na bidareu paṃka jimi bichurata prītamu nīru| jānata hauṃ mohi dīnha bidhi yahu jātanā sarīru || 146||

एहि बिधि करत पंथ पछितावा। तमसा तीर तुरत रथु आवा॥ बिदा किए करि बिनय निषादा। फिरे पायँ परि बिकल बिषादा॥

ehi bidhi karata paṃtha pachitāvā| tamasā tīra turata rathu āvā|| bidā kie kari binaya niṣādā| phire pāyam̐ pari bikala biṣādā||

पैठत नगर सचिव सकुचाई। जनु मारेसि गुर बाँभन गाई॥ बैठि बिटप तर दिवसु गवाँवा। साँझ समय तब अवसरु पावा॥

paiṭhata nagara saciva sakucāī| janu māresi gura bām̐bhana gāī|| baiṭhi biṭapa tara divasu gavām̐vā| sām̐jha samaya taba avasaru pāvā||

अवध प्रबेसु कीन्ह अँधिआरें। पैठ भवन रथु राखि दुआरें॥ जिन्ह जिन्ह समाचार सुनि पाए। भूप द्वार रथु देखन आए॥

avadha prabesu kīnha am̐dhiāreṃ| paiṭha bhavana rathu rākhi duāreṃ|| jinha jinha samācāra suni pāe| bhūpa dvāra rathu dekhana āe||

रथु पहिचानि बिकल लखि घोरे। गरहिं गात जिमि आतप ओरे॥ नगर नारि नर ब्याकुल कैंसें। निघटत नीर मीनगन जैंसें॥

rathu pahicāni bikala lakhi ghore| garahiṃ gāta jimi ātapa ore|| nagara nāri nara byākula kaiṃseṃ| nighaṭata nīra mīnagana jaiṃseṃ||

Doha १४७

-सचिव आगमनु सुनत सबु बिकल भयउ रनिवासु। भवन भयंकरु लाग तेहि मानहुँ प्रेत निवासु ॥ १४७॥

-saciva āgamanu sunata sabu bikala bhayau ranivāsu| bhavana bhayaṃkaru lāga tehi mānahum̐ preta nivāsu || 147||

अति आरति सब पूँछहिं रानी। उतरु न आव बिकल भइ बानी॥ सुनइ न श्रवन नयन नहिं सूझा। कहहु कहाँ नृप तेहि तेहि बूझा॥

ati ārati saba pūm̐chahiṃ rānī| utaru na āva bikala bhai bānī|| sunai na śravana nayana nahiṃ sūjhā| kahahu kahām̐ nṛpa tehi tehi būjhā||

दासिन्ह दीख सचिव बिकलाई। कौसल्या गृहँ गईं लवाई॥ जाइ सुमंत्र दीख कस राजा। अमिअ रहित जनु चंदु बिराजा॥

dāsinha dīkha saciva bikalāī| kausalyā gṛham̐ gaīṃ lavāī|| jāi sumaṃtra dīkha kasa rājā| amia rahita janu caṃdu birājā||

आसन सयन बिभूषन हीना। परेउ भूमितल निपट मलीना॥ लेइ उसासु सोच एहि भाँती। सुरपुर तें जनु खँसेउ जजाती॥

āsana sayana bibhūṣana hīnā| pareu bhūmitala nipaṭa malīnā|| lei usāsu soca ehi bhām̐tī| surapura teṃ janu kham̐seu jajātī||

लेत सोच भरि छिनु छिनु छाती। जनु जरि पंख परेउ संपाती॥ राम राम कह राम सनेही। पुनि कह राम लखन बैदेही॥

leta soca bhari chinu chinu chātī| janu jari paṃkha pareu saṃpātī|| rāma rāma kaha rāma sanehī| puni kaha rāma lakhana baidehī||

Doha १४८

देखि सचिवँ जय जीव कहि कीन्हेउ दंड प्रनामु। सुनत उठेउ ब्याकुल नृपति कहु सुमंत्र कहँ रामु ॥ १४८॥

dekhi sacivam̐ jaya jīva kahi kīnheu daṃḍa pranāmu| sunata uṭheu byākula nṛpati kahu sumaṃtra kaham̐ rāmu || 148||

भूप सुमंत्रु लीन्ह उर लाई। बूड़त कछु अधार जनु पाई॥ सहित सनेह निकट बैठारी। पूँछत राउ नयन भरि बारी॥

bhūpa sumaṃtru līnha ura lāī| būṛata kachu adhāra janu pāī|| sahita saneha nikaṭa baiṭhārī| pūm̐chata rāu nayana bhari bārī||

राम कुसल कहु सखा सनेही। कहँ रघुनाथु लखनु बैदेही॥ आने फेरि कि बनहि सिधाए। सुनत सचिव लोचन जल छाए॥

rāma kusala kahu sakhā sanehī| kaham̐ raghunāthu lakhanu baidehī|| āne pheri ki banahi sidhāe| sunata saciva locana jala chāe||

Sortha ३

सोक बिकल पुनि पूँछ नरेसू। कहु सिय राम लखन संदेसू॥ राम रूप गुन सील सुभाऊ। सुमिरि सुमिरि उर सोचत राऊ॥

soka bikala puni pūm̐cha naresū| kahu siya rāma lakhana saṃdesū|| rāma rūpa guna sīla subhāū| sumiri sumiri ura socata rāū||

राउ सुनाइ दीन्ह बनबासू। सुनि मन भयउ न हरषु हराँसू॥

rāu sunāi dīnha banabāsū| suni mana bhayau na haraṣu harām̐sū||

Sortha ४

सो सुत बिछुरत गए न प्राना। को पापी बड़ मोहि समाना॥

so suta bichurata gae na prānā| ko pāpī baṛa mohi samānā||

Doha १४९

सखा रामु सिय लखनु जहँ तहाँ मोहि पहुँचाउ। नाहिं त चाहत चलन अब प्रान कहउँ सतिभाउ ॥ १४९॥

sakhā rāmu siya lakhanu jaham̐ tahām̐ mohi pahum̐cāu| nāhiṃ ta cāhata calana aba prāna kahaum̐ satibhāu || 149||

पुनि पुनि पूँछत मंत्रहि राऊ। प्रियतम सुअन सँदेस सुनाऊ॥ करहि सखा सोइ बेगि उपाऊ। रामु लखनु सिय नयन देखाऊ॥

puni puni pūm̐chata maṃtrahi rāū| priyatama suana sam̐desa sunāū|| karahi sakhā soi begi upāū| rāmu lakhanu siya nayana dekhāū||

सचिव धीर धरि कह मुदु बानी। महाराज तुम्ह पंडित ग्यानी॥ बीर सुधीर धुरंधर देवा। साधु समाजु सदा तुम्ह सेवा॥

saciva dhīra dhari kaha mudu bānī| mahārāja tumha paṃḍita gyānī|| bīra sudhīra dhuraṃdhara devā| sādhu samāju sadā tumha sevā||

जनम मरन सब दुख भोगा। हानि लाभ प्रिय मिलन बियोगा॥ काल करम बस हौहिं गोसाईं। बरबस राति दिवस की नाईं॥

janama marana saba dukha bhogā| hāni lābha priya milana biyogā|| kāla karama basa hauhiṃ gosāīṃ| barabasa rāti divasa kī nāīṃ||

सुख हरषहिं जड़ दुख बिलखाहीं। दोउ सम धीर धरहिं मन माहीं॥ धीरज धरहु बिबेकु बिचारी। छाड़िअ सोच सकल हितकारी॥

sukha haraṣahiṃ jaṛa dukha bilakhāhīṃ| dou sama dhīra dharahiṃ mana māhīṃ|| dhīraja dharahu bibeku bicārī| chāṛia soca sakala hitakārī||

Doha १५०

प्रथम बासु तमसा भयउ दूसर सुरसरि तीर। न्हाई रहे जलपानु करि सिय समेत दोउ बीर ॥ १५०॥

prathama bāsu tamasā bhayau dūsara surasari tīra| nhāī rahe jalapānu kari siya sameta dou bīra || 150||

केवट कीन्हि बहुत सेवकाई। सो जामिनि सिंगरौर गवाँई॥ होत प्रात बट छीरु मगावा। जटा मुकुट निज सीस बनावा॥

kevaṭa kīnhi bahuta sevakāī| so jāmini siṃgaraura gavām̐ī|| hota prāta baṭa chīru magāvā| jaṭā mukuṭa nija sīsa banāvā||

राम सखाँ तब नाव मगाई। प्रिया चढ़ाइ चढ़े रघुराई॥ लखन बान धनु धरे बनाई। आपु चढ़े प्रभु आयसु पाई॥

rāma sakhām̐ taba nāva magāī| priyā caṛhāi caṛhe raghurāī|| lakhana bāna dhanu dhare banāī| āpu caṛhe prabhu āyasu pāī||

बिकल बिलोकि मोहि रघुबीरा। बोले मधुर बचन धरि धीरा॥ तात प्रनामु तात सन कहेहु। बार बार पद पंकज गहेहू।

bikala biloki mohi raghubīrā| bole madhura bacana dhari dhīrā|| tāta pranāmu tāta sana kahehu| bāra bāra pada paṃkaja gahehū|

करबि पायँ परि बिनय बहोरी। तात करिअ जनि चिंता मोरी॥ बन मग मंगल कुसल हमारें। कृपा अनुग्रह पुन्य तुम्हारें॥

karabi pāyam̐ pari binaya bahorī| tāta karia jani ciṃtā morī|| bana maga maṃgala kusala hamāreṃ| kṛpā anugraha punya tumhāreṃ||

Chhand

तुम्हरें अनुग्रह तात कानन जात सब सुखु पाइहौं। प्रतिपालि आयसु कुसल देखन पाय पुनि फिरि आइहौँ॥ जननीं सकल परितोषि परि परि पाये करि बिनती घनी। तुलसी करेहु सोइ जतनु जेहिं कुसली रहहिं कोसलधनी॥

tumhareṃ anugraha tāta kānana jāta saba sukhu pāihauṃ| pratipāli āyasu kusala dekhana pāya puni phiri āihaum̐|| jananīṃ sakala paritoṣi pari pari pāye kari binatī ghanī| tulasī karehu soi jatanu jehiṃ kusalī rahahiṃ kosaladhanī||

Sortha १५१

गुर सन कहब सेंदेसु बार बार पद पदुम गहि। करब सोइ उपदेसु जेहिं न सोच मोहि अवधपति ॥ १५१॥

gura sana kahaba seṃdesu bāra bāra pada paduma gahi| karaba soi upadesu jehiṃ na soca mohi avadhapati || 151||

पुरजन परिजन सकल निहोरी। तात सुनाएहु बिनती मोरी॥

purajana parijana sakala nihorī| tāta sunāehu binatī morī||

Sortha १

सोइ सब भाँति मोर हितकारी। जातें रह नरनाहु सुखारी॥

soi saba bhām̐ti mora hitakārī| jāteṃ raha naranāhu sukhārī||

कहब सँदेसु भरत के आएँ। नीति न तजिअ राजपदु पाएँ॥ पालेहु प्रजहि करम मन बानी। सेएहु मातु सकल सम जानी॥

kahaba sam̐desu bharata ke āem̐| nīti na tajia rājapadu pāem̐|| pālehu prajahi karama mana bānī| seehu mātu sakala sama jānī||

ओर निबाहेहु भायप भाई। करि पितु मातु सुजन सेवकाई॥ तात भाँति तेहि राखब राऊ। सोच मोर जेहिं करै न काऊ॥

ora nibāhehu bhāyapa bhāī| kari pitu mātu sujana sevakāī|| tāta bhām̐ti tehi rākhaba rāū| soca mora jehiṃ karai na kāū||

लखन कहे कछु बचन कठोरा। बरजि राम पुनि मोहि निहोरा॥ बार बार निज सपथ देवाई। कहबि न तात लखन लरिकाई॥

lakhana kahe kachu bacana kaṭhorā| baraji rāma puni mohi nihorā|| bāra bāra nija sapatha devāī| kahabi na tāta lakhana larikāī||

Doha १५२

कहि प्रनाम कछु कहन लिय सिय भइ सिथिल सनेह। थकित बचन लोचन सजल पुलक पल्लवित देह ॥ १५२॥

kahi pranāma kachu kahana liya siya bhai sithila saneha| thakita bacana locana sajala pulaka pallavita deha || 152||

तेहि अवसर रघुबर रूख पाई। केवट पारहि नाव चलाई॥ रघुकुलतिलक चले एहि भाँती। देखउँ ठाढ़ कुलिस धरि छाती॥

tehi avasara raghubara rūkha pāī| kevaṭa pārahi nāva calāī|| raghukulatilaka cale ehi bhām̐tī| dekhaum̐ ṭhāṛha kulisa dhari chātī||

मैं आपन किमि कहौं कलेसू। जिअत फिरेउँ लेइ राम सँदेसू॥ अस कहि सचिव बचन रहि गयऊ। हानि गलानि सोच बस भयऊ॥

maiṃ āpana kimi kahauṃ kalesū| jiata phireum̐ lei rāma sam̐desū|| asa kahi saciva bacana rahi gayaū| hāni galāni soca basa bhayaū||

सुत बचन सुनतहिं नरनाहू। परेउ धरनि उर दारुन दाहू॥ तलफत बिषम मोह मन मापा। माजा मनहुँ मीन कहुँ ब्यापा॥

suta bacana sunatahiṃ naranāhū| pareu dharani ura dāruna dāhū|| talaphata biṣama moha mana māpā| mājā manahum̐ mīna kahum̐ byāpā||

करि बिलाप सब रोवहिं रानी। महा बिपति किमि जाइ बखानी॥ सुनि बिलाप दुखहू दुखु लागा। धीरजहू कर धीरजु भागा॥

kari bilāpa saba rovahiṃ rānī| mahā bipati kimi jāi bakhānī|| suni bilāpa dukhahū dukhu lāgā| dhīrajahū kara dhīraju bhāgā||

Doha १५३

भयउ कोलाहलु अवध अति सुनि नृप राउर सोरु। बिपुल बिहग बन परेउ निसि मानहुँ कुलिस कठोरु ॥ १५३॥

bhayau kolāhalu avadha ati suni nṛpa rāura soru| bipula bihaga bana pareu nisi mānahum̐ kulisa kaṭhoru || 153||

प्रान कंठगत भयउ भुआलू। मनि बिहीन जनु ब्याकुल ब्यालू॥ इद्रीं सकल बिकल भइँ भारी। जनु सर सरसिज बनु बिनु बारी॥

prāna kaṃṭhagata bhayau bhuālū| mani bihīna janu byākula byālū|| idrīṃ sakala bikala bhaim̐ bhārī| janu sara sarasija banu binu bārī||

कौसल्याँ नृपु दीख मलाना। रबिकुल रबि अँथयउ जियँ जाना॥ उर धरि धीर राम महतारी। बोली बचन समय अनुसारी॥

kausalyām̐ nṛpu dīkha malānā| rabikula rabi am̐thayau jiyam̐ jānā|| ura dhari dhīra rāma mahatārī| bolī bacana samaya anusārī||

नाथ समुझि मन करिअ बिचारू। राम बियोग पयोधि अपारू॥ करनधार तुम्ह अवध जहाजू। चढ़ेउ सकल प्रिय पथिक समाजू॥

nātha samujhi mana karia bicārū| rāma biyoga payodhi apārū|| karanadhāra tumha avadha jahājū| caṛheu sakala priya pathika samājū||

धीरजु धरिअ त पाइअ पारू। नाहिं त बूड़िहि सबु परिवारू॥ जौं जियँ धरिअ बिनय पिय मोरी। रामु लखनु सिय मिलहिं बहोरी॥

dhīraju dharia ta pāia pārū| nāhiṃ ta būṛihi sabu parivārū|| jauṃ jiyam̐ dharia binaya piya morī| rāmu lakhanu siya milahiṃ bahorī||

Doha १५४

प्रिया बचन मृदु सुनत नृपु चितयउ आँखि उघारि। तलफत मीन मलीन जनु सींचत सीतल बारि ॥ १५४॥

priyā bacana mṛdu sunata nṛpu citayau ām̐khi ughāri| talaphata mīna malīna janu sīṃcata sītala bāri || 154||

धरि धीरजु उठी बैठ भुआलू। कहु सुमंत्र कहँ राम कृपालू॥ कहाँ लखनु कहँ रामु सनेही। कहँ प्रिय पुत्रबधू बैदेही॥

dhari dhīraju uṭhī baiṭha bhuālū| kahu sumaṃtra kaham̐ rāma kṛpālū|| kahām̐ lakhanu kaham̐ rāmu sanehī| kaham̐ priya putrabadhū baidehī||

बिलपत राउ बिकल बहु भाँती। भइ जुग सरिस सिराति न राती॥ तापस अंध साप सुधि आई। कौसल्यहि सब कथा सुनाई॥

bilapata rāu bikala bahu bhām̐tī| bhai juga sarisa sirāti na rātī|| tāpasa aṃdha sāpa sudhi āī| kausalyahi saba kathā sunāī||

भयउ बिकल बरनत इतिहासा। राम रहित धिग जीवन आसा॥

bhayau bikala baranata itihāsā| rāma rahita dhiga jīvana āsā||

Sortha ३

सो तनु राखि करब मैं काहा। जेंहि न प्रेम पनु मोर निबाहा॥

so tanu rākhi karaba maiṃ kāhā| jeṃhi na prema panu mora nibāhā||

हा रघुनंदन प्रान पिरीते। तुम्ह बिनु जिअत बहुत दिन बीते॥ हा जानकी लखन हा रघुबर। हा पितु हित चित चातक जलधर॥

hā raghunaṃdana prāna pirīte| tumha binu jiata bahuta dina bīte|| hā jānakī lakhana hā raghubara| hā pitu hita cita cātaka jaladhara||

Doha १५५

राम राम कहि राम कहि राम राम कहि राम। तनु परिहरि रघुबर बिरहँ राउ गयउ सुरधाम ॥ १५५॥

rāma rāma kahi rāma kahi rāma rāma kahi rāma| tanu parihari raghubara biraham̐ rāu gayau suradhāma || 155||

जिअन मरन फलु दसरथ पावा। अंड अनेक अमल जसु छावा॥ जिअत राम बिधु बदनु निहारा। राम बिरह करि मरनु सँवारा॥

jiana marana phalu dasaratha pāvā| aṃḍa aneka amala jasu chāvā|| jiata rāma bidhu badanu nihārā| rāma biraha kari maranu sam̐vārā||

Sortha २

सोक बिकल सब रोवहिं रानी। रूपु सील बलु तेजु बखानी॥ करहिं बिलाप अनेक प्रकारा। परहीं भूमितल बारहिं बारा॥

soka bikala saba rovahiṃ rānī| rūpu sīla balu teju bakhānī|| karahiṃ bilāpa aneka prakārā| parahīṃ bhūmitala bārahiṃ bārā||

बिलपहिं बिकल दास अरु दासी। घर घर रुदनु करहिं पुरबासी॥ अँथयउ आजु भानुकुल भानू। धरम अवधि गुन रूप निधानू॥

bilapahiṃ bikala dāsa aru dāsī| ghara ghara rudanu karahiṃ purabāsī|| am̐thayau āju bhānukula bhānū| dharama avadhi guna rūpa nidhānū||

गारीं सकल कैकइहि देहीं। नयन बिहीन कीन्ह जग जेहीं॥ एहि बिधि बिलपत रैनि बिहानी। आए सकल महामुनि ग्यानी॥

gārīṃ sakala kaikaihi dehīṃ| nayana bihīna kīnha jaga jehīṃ|| ehi bidhi bilapata raini bihānī| āe sakala mahāmuni gyānī||

Doha

तब बसिष्ठ मुनि समय सम कहि अनेक इतिहास।

taba basiṣṭha muni samaya sama kahi aneka itihāsa|

Sortha १५६

सोक नेवारेउ सबहि कर निज बिग्यान प्रकास ॥ १५६॥

soka nevāreu sabahi kara nija bigyāna prakāsa || 156||

तेल नाँव भरि नृप तनु राखा। दूत बोलाइ बहुरि अस भाषा॥ धावहु बेगि भरत पहिं जाहू। नृप सुधि कतहुँ कहहु जनि काहू॥

tela nām̐va bhari nṛpa tanu rākhā| dūta bolāi bahuri asa bhāṣā|| dhāvahu begi bharata pahiṃ jāhū| nṛpa sudhi katahum̐ kahahu jani kāhū||

एतनेइ कहेहु भरत सन जाई। गुर बोलाई पठयउ दोउ भाई॥ सुनि मुनि आयसु धावन धाए। चले बेग बर बाजि लजाए॥

etanei kahehu bharata sana jāī| gura bolāī paṭhayau dou bhāī|| suni muni āyasu dhāvana dhāe| cale bega bara bāji lajāe||

अनरथु अवध अरंभेउ जब तें। कुसगुन होहिं भरत कहुँ तब तें॥ देखहिं राति भयानक सपना। जागि करहिं कटु कोटि कलपना॥

anarathu avadha araṃbheu jaba teṃ| kusaguna hohiṃ bharata kahum̐ taba teṃ|| dekhahiṃ rāti bhayānaka sapanā| jāgi karahiṃ kaṭu koṭi kalapanā||

बिप्र जेवाँइ देहिं दिन दाना। सिव अभिषेक करहिं बिधि नाना॥ मागहिं हृदयँ महेस मनाई। कुसल मातु पितु परिजन भाई॥

bipra jevām̐i dehiṃ dina dānā| siva abhiṣeka karahiṃ bidhi nānā|| māgahiṃ hṛdayam̐ mahesa manāī| kusala mātu pitu parijana bhāī||

Doha १५७

एहि बिधि सोचत भरत मन धावन पहुँचे आइ। गुर अनुसासन श्रवन सुनि चले गनेसु मनाइ ॥ १५७॥

ehi bidhi socata bharata mana dhāvana pahum̐ce āi| gura anusāsana śravana suni cale ganesu manāi || 157||