Ayodhya Kand — अयोध्याकाण्ड

अयोध्याकाण्ड · दोहा २४३–२६०

सीलसिंधु सुनि गुर आगवनू। सिय समीप राखे रिपुदवनू॥ चले सबेग रामु तेहि काला। धीर धरम धुर दीनदयाला॥

sīlasiṃdhu suni gura āgavanū| siya samīpa rākhe ripudavanū|| cale sabega rāmu tehi kālā| dhīra dharama dhura dīnadayālā||

गुरहि देखि सानुज अनुरागे। दंड प्रनाम करन प्रभु लागे॥ मुनिबर धाइ लिए उर लाई। प्रेम उमगि भेंटे दोउ भाई॥

gurahi dekhi sānuja anurāge| daṃḍa pranāma karana prabhu lāge|| munibara dhāi lie ura lāī| prema umagi bheṃṭe dou bhāī||

प्रेम पुलकि केवट कहि नामू। कीन्ह दूरि तें दंड प्रनामू॥ रामसखा रिषि बरबस भेंटा। जनु महि लुठत सनेह समेटा॥

prema pulaki kevaṭa kahi nāmū| kīnha dūri teṃ daṃḍa pranāmū|| rāmasakhā riṣi barabasa bheṃṭā| janu mahi luṭhata saneha sameṭā||

रघुपति भगति सुमंगल मूला। नभ सराहि सुर बरिसहिं फूला॥ एहि सम निपट नीच कोउ नाहीं। बड़ बसिष्ठ सम को जग माहीं॥

raghupati bhagati sumaṃgala mūlā| nabha sarāhi sura barisahiṃ phūlā|| ehi sama nipaṭa nīca kou nāhīṃ| baṛa basiṣṭha sama ko jaga māhīṃ||

Doha

जेहि लखि लखनहु तें अधिक मिले मुदित मुनिराउ।

jehi lakhi lakhanahu teṃ adhika mile mudita munirāu|

Sortha २४३

सो सीतापति भजन को प्रगट प्रताप प्रभाउ ॥ २४३॥

so sītāpati bhajana ko pragaṭa pratāpa prabhāu || 243||

आरत लोग राम सबु जाना। करुनाकर सुजान भगवाना॥ जो जेहि भायँ रहा अभिलाषी। तेहि तेहि कै तसि तसि रुख राखी॥

ārata loga rāma sabu jānā| karunākara sujāna bhagavānā|| jo jehi bhāyam̐ rahā abhilāṣī| tehi tehi kai tasi tasi rukha rākhī||

सानुज मिलि पल महु सब काहू। कीन्ह दूरि दुखु दारुन दाहू॥ यह बड़ि बातँ राम कै नाहीं। जिमि घट कोटि एक रबि छाहीं॥

sānuja mili pala mahu saba kāhū| kīnha dūri dukhu dāruna dāhū|| yaha baṛi bātam̐ rāma kai nāhīṃ| jimi ghaṭa koṭi eka rabi chāhīṃ||

मिलि केवटिहि उमगि अनुरागा। पुरजन सकल सराहहिं भागा॥ देखीं राम दुखित महतारीं। जनु सुबेलि अवलीं हिम मारीं॥

mili kevaṭihi umagi anurāgā| purajana sakala sarāhahiṃ bhāgā|| dekhīṃ rāma dukhita mahatārīṃ| janu subeli avalīṃ hima mārīṃ||

प्रथम राम भेंटी कैकेई। सरल सुभायँ भगति मति भेई॥ पग परि कीन्ह प्रबोधु बहोरी। काल करम बिधि सिर धरि खोरी॥

prathama rāma bheṃṭī kaikeī| sarala subhāyam̐ bhagati mati bheī|| paga pari kīnha prabodhu bahorī| kāla karama bidhi sira dhari khorī||

Doha २४४

भेटीं रघुबर मातु सब करि प्रबोधु परितोषु। अंब ईस आधीन जगु काहु न देइअ दोषु ॥ २४४॥

bheṭīṃ raghubara mātu saba kari prabodhu paritoṣu| aṃba īsa ādhīna jagu kāhu na deia doṣu || 244||

गुरतिय पद बंदे दुहु भाई। सहित बिप्रतिय जे सँग आई॥ गंग गौरि सम सब सनमानीं। देहिं असीस मुदित मृदु बानी॥

guratiya pada baṃde duhu bhāī| sahita bipratiya je sam̐ga āī|| gaṃga gauri sama saba sanamānīṃ| dehiṃ asīsa mudita mṛdu bānī||

गहि पद लगे सुमित्रा अंका। जनु भेटीं संपति अति रंका॥ पुनि जननि चरननि दोउ भ्राता। परे पेम ब्याकुल सब गाता॥

gahi pada lage sumitrā aṃkā| janu bheṭīṃ saṃpati ati raṃkā|| puni janani caranani dou bhrātā| pare pema byākula saba gātā||

अति अनुराग अंब उर लाए। नयन सनेह सलिल अन्हवाए॥ तेहि अवसर कर हरष बिषादू। किमि कबि कहै मूक जिमि स्वादू॥

ati anurāga aṃba ura lāe| nayana saneha salila anhavāe|| tehi avasara kara haraṣa biṣādū| kimi kabi kahai mūka jimi svādū||

मिलि जननहि सानुज रघुराऊ। गुर सन कहेउ कि धारिअ पाऊ॥ पुरजन पाइ मुनीस नियोगू। जल थल तकि तकि उतरेउ लोगू॥

mili jananahi sānuja raghurāū| gura sana kaheu ki dhāria pāū|| purajana pāi munīsa niyogū| jala thala taki taki utareu logū||

Doha २४५

महिसुर मंत्री मातु गुर गने लोग लिए साथ। पावन आश्रम गवनु किय भरत लखन रघुनाथ। २५॥

mahisura maṃtrī mātu gura gane loga lie sātha| pāvana āśrama gavanu kiya bharata lakhana raghunātha| 25||

सीय आइ मुनिबर पग लागी। उचित असीस लही मन मागी॥ गुरपतिनिहि मुनितियन्ह समेता। मिली पेमु कहि जाइ न जेता॥

sīya āi munibara paga lāgī| ucita asīsa lahī mana māgī|| gurapatinihi munitiyanha sametā| milī pemu kahi jāi na jetā||

बंदि बंदि पग सिय सबही के। आसिरबचन लहे प्रिय जी के॥ सासु सकल जब सीयँ निहारीं। मूदे नयन सहमि सुकुमारीं॥

baṃdi baṃdi paga siya sabahī ke| āsirabacana lahe priya jī ke|| sāsu sakala jaba sīyam̐ nihārīṃ| mūde nayana sahami sukumārīṃ||

परीं बधिक बस मनहुँ मरालीं। काह कीन्ह करतार कुचालीं॥ तिन्ह सिय निरखि निपट दुखु पावा। सो सबु सहिअ जो दैउ सहावा॥

parīṃ badhika basa manahum̐ marālīṃ| kāha kīnha karatāra kucālīṃ|| tinha siya nirakhi nipaṭa dukhu pāvā| so sabu sahia jo daiu sahāvā||

जनकसुता तब उर धरि धीरा। नील नलिन लोयन भरि नीरा॥ मिली सकल सासुन्ह सिय जाई। तेहि अवसर करुना महि छाई॥

janakasutā taba ura dhari dhīrā| nīla nalina loyana bhari nīrā|| milī sakala sāsunha siya jāī| tehi avasara karunā mahi chāī||

Doha २४६

लागि लागि पग सबनि सिय भेंटति अति अनुराग। हृदयँ असीसहिं पेम बस रहिअहु भरी सोहाग ॥ २४६॥

lāgi lāgi paga sabani siya bheṃṭati ati anurāga| hṛdayam̐ asīsahiṃ pema basa rahiahu bharī sohāga || 246||

बिकल सनेहँ सीय सब रानीं। बैठन सबहि कहेउ गुर ग्यानीं॥ कहि जग गति मायिक मुनिनाथा। कहे कछुक परमारथ गाथा॥

bikala saneham̐ sīya saba rānīṃ| baiṭhana sabahi kaheu gura gyānīṃ|| kahi jaga gati māyika munināthā| kahe kachuka paramāratha gāthā||

नृप कर सुरपुर गवनु सुनावा। सुनि रघुनाथ दुसह दुखु पावा॥ मरन हेतु निज नेहु बिचारी। भे अति बिकल धीर धुर धारी॥

nṛpa kara surapura gavanu sunāvā| suni raghunātha dusaha dukhu pāvā|| marana hetu nija nehu bicārī| bhe ati bikala dhīra dhura dhārī||

कुलिस कठोर सुनत कटु बानी। बिलपत लखन सीय सब रानी॥

kulisa kaṭhora sunata kaṭu bānī| bilapata lakhana sīya saba rānī||

Sortha ३

सोक बिकल अति सकल समाजू। मानहुँ राजु अकाजेउ आजू॥

soka bikala ati sakala samājū| mānahum̐ rāju akājeu ājū||

मुनिबर बहुरि राम समुझाए। सहित समाज सुसरित नहाए॥ ब्रतु निरंबु तेहि दिन प्रभु कीन्हा। मुनिहु कहें जलु काहुँ न लीन्हा॥

munibara bahuri rāma samujhāe| sahita samāja susarita nahāe|| bratu niraṃbu tehi dina prabhu kīnhā| munihu kaheṃ jalu kāhum̐ na līnhā||

Doha २४७

भोरु भएँ रघुनंदनहि जो मुनि आयसु दीन्ह। श्रद्धा भगति समेत प्रभु सो सबु सादरु कीन्ह ॥ २४७॥

bhoru bhaem̐ raghunaṃdanahi jo muni āyasu dīnha| śraddhā bhagati sameta prabhu so sabu sādaru kīnha || 247||

करि पितु क्रिया बेद जसि बरनी। भे पुनीत पातक तम तरनी॥ जासु नाम पावक अघ तूला। सुमिरत सकल सुमंगल मूला॥

kari pitu kriyā beda jasi baranī| bhe punīta pātaka tama taranī|| jāsu nāma pāvaka agha tūlā| sumirata sakala sumaṃgala mūlā||

सुद्ध सो भयउ साधु संमत अस। तीरथ आवाहन सुरसरि जस॥ सुद्ध भएँ दुइ बासर बीते। बोले गुर सन राम पिरीते॥

suddha so bhayau sādhu saṃmata asa| tīratha āvāhana surasari jasa|| suddha bhaem̐ dui bāsara bīte| bole gura sana rāma pirīte||

नाथ लोग सब निपट दुखारी। कंद मूल फल अंबु अहारी॥ सानुज भरतु सचिव सब माता। देखि मोहि पल जिमि जुग जाता॥

nātha loga saba nipaṭa dukhārī| kaṃda mūla phala aṃbu ahārī|| sānuja bharatu saciva saba mātā| dekhi mohi pala jimi juga jātā||

सब समेत पुर धारिअ पाऊ। आपु इहाँ अमरावति राऊ॥ बहुत कहेउँ सब कियउँ ढिठाई। उचित होइ तस करिअ गोसाँई॥

saba sameta pura dhāria pāū| āpu ihām̐ amarāvati rāū|| bahuta kaheum̐ saba kiyaum̐ ḍhiṭhāī| ucita hoi tasa karia gosām̐ī||

Doha २४८

धर्म सेतु करुनायतन कस न कहहु अस राम। लोग दुखित दिन दुइ दरस देखि लहहुँ बिश्राम ॥ २४८॥

dharma setu karunāyatana kasa na kahahu asa rāma| loga dukhita dina dui darasa dekhi lahahum̐ biśrāma || 248||

राम बचन सुनि सभय समाजू। जनु जलनिधि महुँ बिकल जहाजू॥ सुनि गुर गिरा सुमंगल मूला। भयउ मनहुँ मारुत अनुकुला॥

rāma bacana suni sabhaya samājū| janu jalanidhi mahum̐ bikala jahājū|| suni gura girā sumaṃgala mūlā| bhayau manahum̐ māruta anukulā||

पावन पयँ तिहुँ काल नहाहीं। जो बिलोकि अंघ ओघ नसाहीं॥ मंगलमूरति लोचन भरि भरि। निरखहिं हरषि दंडवत करि करि॥

pāvana payam̐ tihum̐ kāla nahāhīṃ| jo biloki aṃgha ogha nasāhīṃ|| maṃgalamūrati locana bhari bhari| nirakhahiṃ haraṣi daṃḍavata kari kari||

राम सैल बन देखन जाहीं। जहँ सुख सकल सकल दुख नाहीं॥ झरना झरिहिं सुधासम बारी। त्रिबिध तापहर त्रिबिध बयारी॥

rāma saila bana dekhana jāhīṃ| jaham̐ sukha sakala sakala dukha nāhīṃ|| jharanā jharihiṃ sudhāsama bārī| tribidha tāpahara tribidha bayārī||

बिटप बेलि तृन अगनित जाती। फल प्रसून पल्लव बहु भाँती॥ सुंदर सिला सुखद तरु छाहीं। जाइ बरनि बन छबि केहि पाहीं॥

biṭapa beli tṛna aganita jātī| phala prasūna pallava bahu bhām̐tī|| suṃdara silā sukhada taru chāhīṃ| jāi barani bana chabi kehi pāhīṃ||

Doha २४९

सरनि सरोरुह जल बिहग कूजत गुंजत भृंग। बैर बिगत बिहरत बिपिन मृग बिहंग बहुरंग ॥ २४९॥

sarani saroruha jala bihaga kūjata guṃjata bhṛṃga| baira bigata biharata bipina mṛga bihaṃga bahuraṃga || 249||

कोल किरात भिल्ल बनबासी। मधु सुचि सुंदर स्वादु सुधा सी॥ भरि भरि परन पुटीं रचि रुरी। कंद मूल फल अंकुर जूरी॥

kola kirāta bhilla banabāsī| madhu suci suṃdara svādu sudhā sī|| bhari bhari parana puṭīṃ raci rurī| kaṃda mūla phala aṃkura jūrī||

सबहि देहिं करि बिनय प्रनामा। कहि कहि स्वाद भेद गुन नामा॥ देहिं लोग बहु मोल न लेहीं। फेरत राम दोहाई देहीं॥

sabahi dehiṃ kari binaya pranāmā| kahi kahi svāda bheda guna nāmā|| dehiṃ loga bahu mola na lehīṃ| pherata rāma dohāī dehīṃ||

कहहिं सनेह मगन मृदु बानी। मानत साधु पेम पहिचानी॥ तुम्ह सुकृती हम नीच निषादा। पावा दरसनु राम प्रसादा॥

kahahiṃ saneha magana mṛdu bānī| mānata sādhu pema pahicānī|| tumha sukṛtī hama nīca niṣādā| pāvā darasanu rāma prasādā||

हमहि अगम अति दरसु तुम्हारा। जस मरु धरनि देवधुनि धारा॥ राम कृपाल निषाद नेवाजा। परिजन प्रजउ चहिअ जस राजा॥

hamahi agama ati darasu tumhārā| jasa maru dharani devadhuni dhārā|| rāma kṛpāla niṣāda nevājā| parijana prajau cahia jasa rājā||

Doha २५०

यह जिंयँ जानि सँकोचु तजि करिअ छोहु लखि नेहु। हमहि कृतारथ करन लगि फल तृन अंकुर लेहु ॥ २५०॥

yaha jiṃyam̐ jāni sam̐kocu taji karia chohu lakhi nehu| hamahi kṛtāratha karana lagi phala tṛna aṃkura lehu || 250||

तुम्ह प्रिय पाहुने बन पगु धारे। सेवा जोगु न भाग हमारे॥ देब काह हम तुम्हहि गोसाँई। ईधनु पात किरात मिताई॥

tumha priya pāhune bana pagu dhāre| sevā jogu na bhāga hamāre|| deba kāha hama tumhahi gosām̐ī| īdhanu pāta kirāta mitāī||

यह हमारि अति बड़ि सेवकाई। लेहि न बासन बसन चोराई॥ हम जड़ जीव जीव गन घाती। कुटिल कुचाली कुमति कुजाती॥

yaha hamāri ati baṛi sevakāī| lehi na bāsana basana corāī|| hama jaṛa jīva jīva gana ghātī| kuṭila kucālī kumati kujātī||

पाप करत निसि बासर जाहीं। नहिं पट कटि नहि पेट अघाहीं॥ सपोनेहुँ धरम बुद्धि कस काऊ। यह रघुनंदन दरस प्रभाऊ॥

pāpa karata nisi bāsara jāhīṃ| nahiṃ paṭa kaṭi nahi peṭa aghāhīṃ|| saponehum̐ dharama buddhi kasa kāū| yaha raghunaṃdana darasa prabhāū||

जब तें प्रभु पद पदुम निहारे। मिटे दुसह दुख दोष हमारे॥ बचन सुनत पुरजन अनुरागे। तिन्ह के भाग सराहन लागे॥

jaba teṃ prabhu pada paduma nihāre| miṭe dusaha dukha doṣa hamāre|| bacana sunata purajana anurāge| tinha ke bhāga sarāhana lāge||

Chhand

लागे सराहन भाग सब अनुराग बचन सुनावहीं। बोलनि मिलनि सिय राम चरन सनेहु लखि सुखु पावहीं॥ नरनारि निद्रहिं नेहु निज सुनि कोल भशिल्लनि की गिरा। तुलसी कृपा रघुबंसमनि की लोह ले लौका तिरा॥

lāge sarāhana bhāga saba anurāga bacana sunāvahīṃ| bolani milani siya rāma carana sanehu lakhi sukhu pāvahīṃ|| naranāri nidrahiṃ nehu nija suni kola bhaśillani kī girā| tulasī kṛpā raghubaṃsamani kī loha le laukā tirā||

Sortha २५१

बिहरहिं बन चहु ओर प्रतिदिन प्रमुदित लोग सब। जल ज्यों दादुर मोर भए पीन पावस प्रथम ॥ २५१॥

biharahiṃ bana cahu ora pratidina pramudita loga saba| jala jyoṃ dādura mora bhae pīna pāvasa prathama || 251||

पुर जन नारि मगन अति प्रीती। बासर जाहिं पलक सम बीती॥ सीय सासु प्रति बेष बनाई। सादर करइ सरिस सेवकाई॥

pura jana nāri magana ati prītī| bāsara jāhiṃ palaka sama bītī|| sīya sāsu prati beṣa banāī| sādara karai sarisa sevakāī||

लखा न मरमु राम बिनु काहूँ। माया सब सिय माया माहूँ॥ सीयँ सासु सेवा बस कीन्हीं। तिन्ह लहि सुख सिख आसिष दीन्हीं॥

lakhā na maramu rāma binu kāhūm̐| māyā saba siya māyā māhūm̐|| sīyam̐ sāsu sevā basa kīnhīṃ| tinha lahi sukha sikha āsiṣa dīnhīṃ||

लखि सिय सहित सरल दोउ भाई। कुटिल रानि पछितानि अघाई॥ अवनि जमहि जाचति कैकेई। महि न बीचु बिधि मीचु न देई॥

lakhi siya sahita sarala dou bhāī| kuṭila rāni pachitāni aghāī|| avani jamahi jācati kaikeī| mahi na bīcu bidhi mīcu na deī||

लोकहुँ बेद बिदित कबि कहहीं। राम बिमुख थलु नरक न लहहीं॥ यहु संसउ सब के मन माहीं। राम गवनु बिधि अवध कि नाहीं॥

lokahum̐ beda bidita kabi kahahīṃ| rāma bimukha thalu naraka na lahahīṃ|| yahu saṃsau saba ke mana māhīṃ| rāma gavanu bidhi avadha ki nāhīṃ||

Doha २५२

निसि न नीद नहिं भूख दिन भरतु बिकल सुचि सोच। नीच कीच बिच मगन जस मीनहि सलिल सँकोच ॥ २५२॥

nisi na nīda nahiṃ bhūkha dina bharatu bikala suci soca| nīca kīca bica magana jasa mīnahi salila sam̐koca || 252||

कीन्ही मातु मिस काल कुचाली। ईति भीति जस पाकत साली॥ केहि बिधि होइ राम अभिषेकू। मोहि अवकलत उपाउ न एकू॥

kīnhī mātu misa kāla kucālī| īti bhīti jasa pākata sālī|| kehi bidhi hoi rāma abhiṣekū| mohi avakalata upāu na ekū||

अवसि फिरहिं गुर आयसु मानी। मुनि पुनि कहब राम रुचि जानी॥ मातु कहेहुँ बहुरहिं रघुराऊ। राम जननि हठ करबि कि काऊ॥

avasi phirahiṃ gura āyasu mānī| muni puni kahaba rāma ruci jānī|| mātu kahehum̐ bahurahiṃ raghurāū| rāma janani haṭha karabi ki kāū||

मोहि अनुचर कर केतिक बाता। तेहि महँ कुसमउ बाम बिधाता॥ जौं हठ करउँ त निपट कुकरमू। हरगिरि तें गुरु सेवक धरमू॥

mohi anucara kara ketika bātā| tehi maham̐ kusamau bāma bidhātā|| jauṃ haṭha karaum̐ ta nipaṭa kukaramū| haragiri teṃ guru sevaka dharamū||

एकउ जुगुति न मन ठहरानी। सोचत भरतहि रैनि बिहानी॥ प्रात नहाइ प्रभुहि सिर नाई। बैठत पठए रिषयँ बोलाई॥

ekau juguti na mana ṭhaharānī| socata bharatahi raini bihānī|| prāta nahāi prabhuhi sira nāī| baiṭhata paṭhae riṣayam̐ bolāī||

Doha २५३

गुर पद कमल प्रनामु करि बैठे आयसु पाइ। बिप्र महाजन सचिव सब जुरे सभासद आइ ॥ २५३॥

gura pada kamala pranāmu kari baiṭhe āyasu pāi| bipra mahājana saciva saba jure sabhāsada āi || 253||

बोले मुनिबरु समय समाना। सुनहु सभासद भरत सुजाना॥ धरम धुरीन भानुकुल भानू। राजा रामु स्वबस भगवानू॥

bole munibaru samaya samānā| sunahu sabhāsada bharata sujānā|| dharama dhurīna bhānukula bhānū| rājā rāmu svabasa bhagavānū||

सत्यसंध पालक श्रुति सेतू। राम जनमु जग मंगल हेतू॥ गुर पितु मातु बचन अनुसारी। खल दलु दलन देव हितकारी॥

satyasaṃdha pālaka śruti setū| rāma janamu jaga maṃgala hetū|| gura pitu mātu bacana anusārī| khala dalu dalana deva hitakārī||

नीति प्रीति परमारथ स्वारथु। कोउ न राम सम जान जथारथु॥ बिधि हरि हरु ससि रबि दिसिपाला। माया जीव करम कुलि काला॥

nīti prīti paramāratha svārathu| kou na rāma sama jāna jathārathu|| bidhi hari haru sasi rabi disipālā| māyā jīva karama kuli kālā||

अहिप महिप जहँ लगि प्रभुताई। जोग सिद्धि निगमागम गाई॥ करि बिचार जिंयँ देखहु नीकें। राम रजाइ सीस सबही कें॥

ahipa mahipa jaham̐ lagi prabhutāī| joga siddhi nigamāgama gāī|| kari bicāra jiṃyam̐ dekhahu nīkeṃ| rāma rajāi sīsa sabahī keṃ||

Doha २५४

राखें राम रजाइ रुख हम सब कर हित होइ। समुझि सयाने करहु अब सब मिलि संमत सोइ ॥ २५४॥

rākheṃ rāma rajāi rukha hama saba kara hita hoi| samujhi sayāne karahu aba saba mili saṃmata soi || 254||

सब कहुँ सुखद राम अभिषेकू। मंगल मोद मूल मग एकू॥ केहि बिधि अवध चलहिं रघुराऊ। कहहु समुझि सोइ करिअ उपाऊ॥

saba kahum̐ sukhada rāma abhiṣekū| maṃgala moda mūla maga ekū|| kehi bidhi avadha calahiṃ raghurāū| kahahu samujhi soi karia upāū||

सब सादर सुनि मुनिबर बानी। नय परमारथ स्वारथ सानी॥ उतरु न आव लोग भए भोरे। तब सिरु नाइ भरत कर जोरे॥

saba sādara suni munibara bānī| naya paramāratha svāratha sānī|| utaru na āva loga bhae bhore| taba siru nāi bharata kara jore||

भानुबंस भए भूप घनेरे। अधिक एक तें एक बड़ेरे॥ जनमु हेतु सब कहँ पितु माता। करम सुभासुभ देइ बिधाता॥

bhānubaṃsa bhae bhūpa ghanere| adhika eka teṃ eka baṛere|| janamu hetu saba kaham̐ pitu mātā| karama subhāsubha dei bidhātā||

दलि दुख सजइ सकल कल्याना। अस असीस राउरि जगु जाना॥

dali dukha sajai sakala kalyānā| asa asīsa rāuri jagu jānā||

Sortha ४

सो गोसाइँ बिधि गति जेहिं छेंकी। सकइ को टारि टेक जो टेकी॥

so gosāim̐ bidhi gati jehiṃ cheṃkī| sakai ko ṭāri ṭeka jo ṭekī||

Doha २५५

बूझिअ मोहि उपाउ अब सो सब मोर अभागु। सुनि सनेहमय बचन गुर उर उमगा अनुरागु ॥ २५५॥

būjhia mohi upāu aba so saba mora abhāgu| suni sanehamaya bacana gura ura umagā anurāgu || 255||

तात बात फुरि राम कृपाहीं। राम बिमुख सिधि सपनेहुँ नाहीं॥ सकुचउँ तात कहत एक बाता। अरध तजहिं बुध सरबस जाता॥

tāta bāta phuri rāma kṛpāhīṃ| rāma bimukha sidhi sapanehum̐ nāhīṃ|| sakucaum̐ tāta kahata eka bātā| aradha tajahiṃ budha sarabasa jātā||

तुम्ह कानन गवनहु दोउ भाई। फेरिअहिं लखन सीय रघुराई॥ सुनि सुबचन हरषे दोउ भ्राता। भे प्रमोद परिपूरन गाता॥

tumha kānana gavanahu dou bhāī| pheriahiṃ lakhana sīya raghurāī|| suni subacana haraṣe dou bhrātā| bhe pramoda paripūrana gātā||

मन प्रसन्न तन तेजु बिराजा। जनु जिय राउ रामु भए राजा॥ बहुत लाभ लोगन्ह लघु हानी। सम दुख सुख सब रोवहिं रानी॥

mana prasanna tana teju birājā| janu jiya rāu rāmu bhae rājā|| bahuta lābha loganha laghu hānī| sama dukha sukha saba rovahiṃ rānī||

कहहिं भरतु मुनि कहा सो कीन्हे। फलु जग जीवन्ह अभिमत दीन्हे॥ कानन करउँ जनम भरि बासू। एहिं तें अधिक न मोर सुपासू॥

kahahiṃ bharatu muni kahā so kīnhe| phalu jaga jīvanha abhimata dīnhe|| kānana karaum̐ janama bhari bāsū| ehiṃ teṃ adhika na mora supāsū||

Doha २५६

अँतरजामी रामु सिय तुम्ह सरबग्य सुजान। जो फुर कहहु त नाथ निज कीजिअ बचनु प्रवान ॥ २५६॥

am̐tarajāmī rāmu siya tumha sarabagya sujāna| jo phura kahahu ta nātha nija kījia bacanu pravāna || 256||

भरत बचन सुनि देखि सनेहू। सभा सहित मुनि भए बिदेहू॥ भरत महा महिमा जलरासी। मुनि मति ठाढ़ि तीर अबला सी॥

bharata bacana suni dekhi sanehū| sabhā sahita muni bhae bidehū|| bharata mahā mahimā jalarāsī| muni mati ṭhāṛhi tīra abalā sī||

गा चह पार जतनु हियँ हेरा। पावति नाव न बोहितु बेरा॥ औरु करिहि को भरत बड़ाई। सरसी सीपि कि सिंधु समाई॥

gā caha pāra jatanu hiyam̐ herā| pāvati nāva na bohitu berā|| auru karihi ko bharata baṛāī| sarasī sīpi ki siṃdhu samāī||

भरतु मुनिहि मन भीतर भाए। सहित समाज राम पहिं आए॥ प्रभु प्रनामु करि दीन्ह सुआसनु। बैठे सब सुनि मुनि अनुसासनु॥

bharatu munihi mana bhītara bhāe| sahita samāja rāma pahiṃ āe|| prabhu pranāmu kari dīnha suāsanu| baiṭhe saba suni muni anusāsanu||

बोले मुनिबरु बचन बिचारी। देस काल अवसर अनुहारी॥ सुनहु राम सरबग्य सुजाना। धरम नीति गुन ग्यान निधाना॥

bole munibaru bacana bicārī| desa kāla avasara anuhārī|| sunahu rāma sarabagya sujānā| dharama nīti guna gyāna nidhānā||

Doha २५७

सब के उर अंतर बसहु जानहु भाउ कुभाउ। पुरजन जननी भरत हित होइ सो कहिअ उपाउ ॥ २५७॥

saba ke ura aṃtara basahu jānahu bhāu kubhāu| purajana jananī bharata hita hoi so kahia upāu || 257||

आरत कहहिं बिचारि न काऊ। सूझ जूआरिहि आपन दाऊ॥ सुनि मुनि बचन कहत रघुराऊ। नाथ तुम्हारेहि हाथ उपाऊ॥

ārata kahahiṃ bicāri na kāū| sūjha jūārihi āpana dāū|| suni muni bacana kahata raghurāū| nātha tumhārehi hātha upāū||

सब कर हित रुख राउरि राखें। आयसु किएँ मुदित फुर भाषें॥ प्रथम जो आयसु मो कहुँ होई। माथें मानि करौ सिख सोई॥

saba kara hita rukha rāuri rākheṃ| āyasu kiem̐ mudita phura bhāṣeṃ|| prathama jo āyasu mo kahum̐ hoī| mātheṃ māni karau sikha soī||

पुनि जेहि कहँ जस कहब गोसाईं। सो सब भाँति घटिहि सेवकाईं॥ कह मुनि राम सत्य तुम्ह भाषा। भरत सनेहँ बिचारु न राखा॥

puni jehi kaham̐ jasa kahaba gosāīṃ| so saba bhām̐ti ghaṭihi sevakāīṃ|| kaha muni rāma satya tumha bhāṣā| bharata saneham̐ bicāru na rākhā||

तेहि तें कहउँ बहोरि बहोरी। भरत भगति बस भइ मति मोरी॥ मोरें जान भरत रुचि राखि। जो कीजिअ सो सुभ सिव साखी॥

tehi teṃ kahaum̐ bahori bahorī| bharata bhagati basa bhai mati morī|| moreṃ jāna bharata ruci rākhi| jo kījia so subha siva sākhī||

Doha २५८

भरत बिनय सादर सुनिअ करिअ बिचारु बहोरि। करब साधुमत लोकमत नृपनय निगम निचोरि ॥ २५८॥

bharata binaya sādara sunia karia bicāru bahori| karaba sādhumata lokamata nṛpanaya nigama nicori || 258||

गुरु अनुराग भरत पर देखी। राम ह्दयँ आनंदु बिसेषी॥ भरतहि धरम धुरंधर जानी। निज सेवक तन मानस बानी॥

guru anurāga bharata para dekhī| rāma hdayam̐ ānaṃdu biseṣī|| bharatahi dharama dhuraṃdhara jānī| nija sevaka tana mānasa bānī||

बोले गुर आयस अनुकूला। बचन मंजु मृदु मंगलमूला॥ नाथ सपथ पितु चरन दोहाई। भयउ न भुअन भरत सम भाई॥

bole gura āyasa anukūlā| bacana maṃju mṛdu maṃgalamūlā|| nātha sapatha pitu carana dohāī| bhayau na bhuana bharata sama bhāī||

जे गुर पद अंबुज अनुरागी। ते लोकहुँ बेदहुँ बड़भागी॥ राउर जा पर अस अनुरागू। को कहि सकइ भरत कर भागू॥

je gura pada aṃbuja anurāgī| te lokahum̐ bedahum̐ baṛabhāgī|| rāura jā para asa anurāgū| ko kahi sakai bharata kara bhāgū||

लखि लघु बंधु बुद्धि सकुचाई। करत बदन पर भरत बड़ाई॥ भरतु कहहीं सोइ किएँ भलाई। अस कहि राम रहे अरगाई॥

lakhi laghu baṃdhu buddhi sakucāī| karata badana para bharata baṛāī|| bharatu kahahīṃ soi kiem̐ bhalāī| asa kahi rāma rahe aragāī||

Doha २५९

तब मुनि बोले भरत सन सब सँकोचु तजि तात। कृपासिंधु प्रिय बंधु सन कहहु हृदय कै बात ॥ २५९॥

taba muni bole bharata sana saba sam̐kocu taji tāta| kṛpāsiṃdhu priya baṃdhu sana kahahu hṛdaya kai bāta || 259||

सुनि मुनि बचन राम रुख पाई। गुरु साहिब अनुकूल अघाई॥ लखि अपने सिर सबु छरु भारू। कहि न सकहिं कछु करहिं बिचारू॥

suni muni bacana rāma rukha pāī| guru sāhiba anukūla aghāī|| lakhi apane sira sabu charu bhārū| kahi na sakahiṃ kachu karahiṃ bicārū||

पुलकि सरीर सभाँ भए ठाढें। नीरज नयन नेह जल बाढ़ें॥ कहब मोर मुनिनाथ निबाहा। एहि तें अधिक कहौं मैं काहा॥

pulaki sarīra sabhām̐ bhae ṭhāḍheṃ| nīraja nayana neha jala bāṛheṃ|| kahaba mora muninātha nibāhā| ehi teṃ adhika kahauṃ maiṃ kāhā||

मैं जानउँ निज नाथ सुभाऊ। अपराधिहु पर कोह न काऊ॥ मो पर कृपा सनेह बिसेषी। खेलत खुनिस न कबहूँ देखी॥

maiṃ jānaum̐ nija nātha subhāū| aparādhihu para koha na kāū|| mo para kṛpā saneha biseṣī| khelata khunisa na kabahūm̐ dekhī||

सिसुपन तेम परिहरेउँ न संगू। कबहुँ न कीन्ह मोर मन भंगू॥ मैं प्रभु कृपा रीति जियँ जोही। हारेहुँ खेल जितावहिं मोही॥

sisupana tema parihareum̐ na saṃgū| kabahum̐ na kīnha mora mana bhaṃgū|| maiṃ prabhu kṛpā rīti jiyam̐ johī| hārehum̐ khela jitāvahiṃ mohī||

Doha २६०

महूँ सनेह सकोच बस सनमुख कही न बैन। दरसन तृपित न आजु लगि पेम पिआसे नैन ॥ २६०॥

mahūm̐ saneha sakoca basa sanamukha kahī na baina| darasana tṛpita na āju lagi pema piāse naina || 260||