उत्तरकाण्ड

उत्तरकाण्ड · दोहा ८८(क)–९७(क)

साझा करें

बहु बिधि मोहि प्रबोधि सुख देई। लगे करन सिसु कौतुक तेई॥ सजल नयन कछु मुख करि रूखा। चितइ मातु लागी अति भूखा॥

bahu bidhi mohi prabodhi sukha deī| lage karana sisu kautuka teī|| sajala nayana kachu mukha kari rūkhā| citai mātu lāgī ati bhūkhā||

देखि मातु आतुर उठि धाई। कहि मृदु बचन लिए उर लाई॥ गोद राखि कराव पय पाना। रघुपति चरित ललित कर गाना॥

dekhi mātu ātura uṭhi dhāī| kahi mṛdu bacana lie ura lāī|| goda rākhi karāva paya pānā| raghupati carita lalita kara gānā||

सोरठा ८८(क)

जेहि सुख लागि पुरारि असुभ बेष कृत सिव सुखद। अवधपुरी नर नारि तेहि सुख महुं संतत मगन ॥ ८८ (क)॥

jehi sukha lāgi purāri asubha beṣa kṛta siva sukhada| avadhapurī nara nāri tehi sukha mahuṃ saṃtata magana || 88 (ka)||

सोरठा ८८(ख)

ई सुख लवलेस जिन्ह बारक सपनेहूँ लहेउ। ते नहिं गनहिं खगेस ब्रहासुखहि सज्जन सुमति ॥ ८८ (ख)॥

ī sukha lavalesa jinha bāraka sapanehūm̐ laheu| te nahiṃ ganahiṃ khagesa brahāsukhahi sajjana sumati || 88 (kha)||

मैं पुनि अवध रहेउँ कछु काला। देखेउँ बालबिनोद रसाला॥ राम प्रसाद भगति बर पायउँ। प्रभु पद बंदि निजाश्रम आयउँ॥

maiṃ puni avadha raheum̐ kachu kālā| dekheum̐ bālabinoda rasālā|| rāma prasāda bhagati bara pāyaum̐| prabhu pada baṃdi nijāśrama āyaum̐||

तब ते मोहि न ब्यापी माया। जब ते रघुनायक अपनाया॥ यह सब गुप्त चरित मैं गावा। हरि मायाँ जिमि मोहि नचावा॥

taba te mohi na byāpī māyā| jaba te raghunāyaka apanāyā|| yaha saba gupta carita maiṃ gāvā| hari māyām̐ jimi mohi nacāvā||

निज अनुभव अब कहउँ खगेसा। बिनु हरि भजन न जाहि कलेसा॥ राम कृपा बिनु सुनु खगराई। जानि न जाइ राम प्रभुताई॥

nija anubhava aba kahaum̐ khagesā| binu hari bhajana na jāhi kalesā|| rāma kṛpā binu sunu khagarāī| jāni na jāi rāma prabhutāī||

जानें बिनु न होइ परतीती। बिनु परतीति होइ नहिं प्रीती॥ प्रीति बिना नहिं भगति दिढ़ाई। जिमि खगपति जल कै चिकनाई॥

jāneṃ binu na hoi paratītī| binu paratīti hoi nahiṃ prītī|| prīti binā nahiṃ bhagati diṛhāī| jimi khagapati jala kai cikanāī||

सोरठा ८९(क)

बिनु गुर होइ कि ग्यान ग्यान कि होइ बिराग बिनु। गावहिं बेद पुरान सुख कि लहिअ हरि भगति बिनु ॥ ८९ (क)॥

binu gura hoi ki gyāna gyāna ki hoi birāga binu| gāvahiṃ beda purāna sukha ki lahia hari bhagati binu || 89 (ka)||

दोहा ८९(ख)

कोउ बिश्राम कि पाव तात सहज संतोष बिनु। चलै कि जल बिनु नाव कोटि जतन पचि पचि मरिअ ॥ ८९ (ख)॥

kou biśrāma ki pāva tāta sahaja saṃtoṣa binu| calai ki jala binu nāva koṭi jatana paci paci maria || 89 (kha)||

बिनु संतोष न काम नसाहीं। काम अछत सुख सपनेहुँ नाहीं॥ राम भजन बिनु मिटहिं कि कामा। थल बिहीन तरु कबहुँ कि जामा॥

binu saṃtoṣa na kāma nasāhīṃ| kāma achata sukha sapanehum̐ nāhīṃ|| rāma bhajana binu miṭahiṃ ki kāmā| thala bihīna taru kabahum̐ ki jāmā||

बिनु बिग्यान कि समता आवइ। कोउ अवकास कि नभ बिनु पावइ॥ श्रद्धा बिना धर्म नहिं होई। बिनु महि गंध कि पावइ कोई॥

binu bigyāna ki samatā āvai| kou avakāsa ki nabha binu pāvai|| śraddhā binā dharma nahiṃ hoī| binu mahi gaṃdha ki pāvai koī||

बिनु तप तेज कि कर बिस्तारा। जल बिनु रस कि होइ संसारा॥ सील कि मिल बिनु बुध सेवकाई। जिमि बिनु तेज न रूप गोसाई॥

binu tapa teja ki kara bistārā| jala binu rasa ki hoi saṃsārā|| sīla ki mila binu budha sevakāī| jimi binu teja na rūpa gosāī||

निज सुख बिनु मन होइ कि थीरा। परस कि होइ बिहीन समीरा॥ कवनिउ सिद्धि कि बिनु बिस्वासा। बिनु हरि भजन न भव भय नासा॥

nija sukha binu mana hoi ki thīrā| parasa ki hoi bihīna samīrā|| kavaniu siddhi ki binu bisvāsā| binu hari bhajana na bhava bhaya nāsā||

दोहा ९०(क)

बिनु बिस्वास भगति नहिं तेहि बिनु द्रवहिं न रामु। राम कृपा बिनु सपनेहुँ जीव न लह बिश्रामु ॥ ९० (क)॥

binu bisvāsa bhagati nahiṃ tehi binu dravahiṃ na rāmu| rāma kṛpā binu sapanehum̐ jīva na laha biśrāmu || 90 (ka)||

सोरठा ९०(ख)

अस बिचारि मतिधीर तजि कुतर्क संसय सकल। भजहु राम रघुबीर करुनाकर सुंदर सुखद ॥ ९० (ख)॥

asa bicāri matidhīra taji kutarka saṃsaya sakala| bhajahu rāma raghubīra karunākara suṃdara sukhada || 90 (kha)||

निज मति सरिस नाथ मैं गाई। प्रभु प्रताप महिमा खगराई॥ कहेउँ न कछु करि जुगुति बिसेषी। यह सब मैं निज नयनन्हि देखी॥

nija mati sarisa nātha maiṃ gāī| prabhu pratāpa mahimā khagarāī|| kaheum̐ na kachu kari juguti biseṣī| yaha saba maiṃ nija nayananhi dekhī||

महिमा नाम रूप गुन गाथा। सकल अमित अनंत रघुनाथा॥ निज निज मति मुनि हरि गुन गावहिं। निगम सेष सिव पार न पावहिं॥

mahimā nāma rūpa guna gāthā| sakala amita anaṃta raghunāthā|| nija nija mati muni hari guna gāvahiṃ| nigama seṣa siva pāra na pāvahiṃ||

तुम्हहि आदि खग मसक प्रजंता। नभ उड़ाहिं नहिं पावहिं अंता॥ तिमि रघुपति महिमा अवगाहा। तात कबहुँ कोउ पाव कि थाहा॥

tumhahi ādi khaga masaka prajaṃtā| nabha uṛāhiṃ nahiṃ pāvahiṃ aṃtā|| timi raghupati mahimā avagāhā| tāta kabahum̐ kou pāva ki thāhā||

रामु काम सत कोटि सुभग तन। दुर्गा कोटि अमित अरि मर्दन॥ सक्र कोटि सत सरिस बिलासा। नभ सत कोटि अमित अवकासा॥

rāmu kāma sata koṭi subhaga tana| durgā koṭi amita ari mardana|| sakra koṭi sata sarisa bilāsā| nabha sata koṭi amita avakāsā||

दोहा ९१(क)

मरुत कोटि सत बिपुल बल रबि सत कोटि प्रकास। ससि सत कोटि सुसीतल समन सकल भव त्रास ॥ ९१ (क)॥

maruta koṭi sata bipula bala rabi sata koṭi prakāsa| sasi sata koṭi susītala samana sakala bhava trāsa || 91 (ka)||

काल कोटि सत सरिस अति दुस्तर दुर्ग दुरंत। धूमकेतु सत कोटि सम दुराधरष भगवंत॥ ९१ ( ख )॥

kāla koṭi sata sarisa ati dustara durga duraṃta| dhūmaketu sata koṭi sama durādharaṣa bhagavaṃta|| 91 ( kha )||

प्रभु अगाध सत कोटि पताला। समन कोटि सत सरिस कराला॥ तीरथ अमित कोटि सम पावन। नाम अखिल अघ पूग नसावन॥

prabhu agādha sata koṭi patālā| samana koṭi sata sarisa karālā|| tīratha amita koṭi sama pāvana| nāma akhila agha pūga nasāvana||

हिमगिरि कोटि अचल रघुबीरा। सिंधु कोटि सत सम गंभीरा॥ कामधेनु सत कोटि समाना। सकल काम दायक भगवाना॥

himagiri koṭi acala raghubīrā| siṃdhu koṭi sata sama gaṃbhīrā|| kāmadhenu sata koṭi samānā| sakala kāma dāyaka bhagavānā||

सारद कोटि अमित चतुराई। बिधि सत कोटि सृष्टि निपुनाई॥ बिष्नु कोटि सम पालन कर्ता। रुद्र कोटि सत सम संहर्ता॥

sārada koṭi amita caturāī| bidhi sata koṭi sṛṣṭi nipunāī|| biṣnu koṭi sama pālana kartā| rudra koṭi sata sama saṃhartā||

धनद कोटि सत सम धनवाना। माया कोटि प्रपंच निधाना॥ भार धरन सत कोटि अहीसा। निरवधि निरुपम प्रभु जगदीसा॥

dhanada koṭi sata sama dhanavānā| māyā koṭi prapaṃca nidhānā|| bhāra dharana sata koṭi ahīsā| niravadhi nirupama prabhu jagadīsā||

छंद

निरुपम न उपमा आन राम समान रामु निगम कहै। जिमि कोटि सत खटद्योत सम रबि कहत अति लघुता लहै॥ एहि भाँति निज निज मति बिलास मुनीस हरिहि बखानहीं। प्रभु भाव गाहक अति कृपाल सप्रेम सुनि सुख मानहीं॥

nirupama na upamā āna rāma samāna rāmu nigama kahai| jimi koṭi sata khaṭadyota sama rabi kahata ati laghutā lahai|| ehi bhām̐ti nija nija mati bilāsa munīsa harihi bakhānahīṃ| prabhu bhāva gāhaka ati kṛpāla saprema suni sukha mānahīṃ||

दोहा ९२(क)

रामु अमित गुन सागर थाह कि पावइ कोइ। संतन्ह सन जस किछ सुनेउँ तुम्हहि सुनायउँ सोइ़ ॥ ९२ (क)॥

rāmu amita guna sāgara thāha ki pāvai koi| saṃtanha sana jasa kicha suneum̐ tumhahi sunāyaum̐ soi || 92 (ka)||

सोरठा ९२(ख)

भाव बस्य भगवान सुख निधान करुना भवन। तजि ममता मद मान भजिअ सदा सीतारवन ॥ ९२ (ख)॥

bhāva basya bhagavāna sukha nidhāna karunā bhavana| taji mamatā mada māna bhajia sadā sītāravana || 92 (kha)||

सुनि भुसुंडि के बचन सुहाए। हरषित खगपति पंख फुलाए॥ नयन नीर मन अति हरषाना। श्रीरघुपति प्रताप उर आना॥

suni bhusuṃḍi ke bacana suhāe| haraṣita khagapati paṃkha phulāe|| nayana nīra mana ati haraṣānā| śrīraghupati pratāpa ura ānā||

पाछिल मोह समुझि पछिताना। ब्रह्म अनादि मनुज करि माना॥ पुनि पुनि काग चरन सिरु नावा। जानि राम सम प्रेम बढ़ावा॥

pāchila moha samujhi pachitānā| brahma anādi manuja kari mānā|| puni puni kāga carana siru nāvā| jāni rāma sama prema baṛhāvā||

गुर बिनु भव निधि तरइ न कोई। जौं बिरंचि संकर सम होई॥ संसय सर्प ग्रसेउ मोहि ताता। दुखद लहरि कुतर्क बहु ब्राता॥

gura binu bhava nidhi tarai na koī| jauṃ biraṃci saṃkara sama hoī|| saṃsaya sarpa graseu mohi tātā| dukhada lahari kutarka bahu brātā||

तव सरूप गारुड़ि रघुनायक। मोहि जिआयउ जन सुखदायक॥ तव प्रसाद मम मोह नसाना। राम रहस्य अनूपम जाना॥

tava sarūpa gāruṛi raghunāyaka| mohi jiāyau jana sukhadāyaka|| tava prasāda mama moha nasānā| rāma rahasya anūpama jānā||

दोहा ९३(क)

ताहि प्रसंसि बिबिधि बिधि सीस नाइ कर जोरि। बचन बिनीत सप्रेम मृदु बोलेउ गरुड़ बहोरि ॥ ९३ (क)॥

tāhi prasaṃsi bibidhi bidhi sīsa nāi kara jori| bacana binīta saprema mṛdu boleu garuṛa bahori || 93 (ka)||

दोहा ९३(ख)

प्रभु अपने अबिबेक ते बूझउँ स्वामी तोहि। कृपासिंधु सादर कहट्ठु जानि दास निज मोहि ॥ ९३ (ख)॥

prabhu apane abibeka te būjhaum̐ svāmī tohi| kṛpāsiṃdhu sādara kahaṭṭhu jāni dāsa nija mohi || 93 (kha)||

तुम्ह सर्बग्य तन्य तम पारा। सुमति सुसील सरल आचारा॥ ग्यान बिरति बिग्यान निवासा। रघुनायक के तुम्ह प्रिय दासा॥

tumha sarbagya tanya tama pārā| sumati susīla sarala ācārā|| gyāna birati bigyāna nivāsā| raghunāyaka ke tumha priya dāsā||

कारन कवन देह यह पाई। तात सकल मोहि कहहु बुझाई॥ राम चरित सर सुंदर स्वामी। पायहु कहाँ कहहु नभगामी॥

kārana kavana deha yaha pāī| tāta sakala mohi kahahu bujhāī|| rāma carita sara suṃdara svāmī| pāyahu kahām̐ kahahu nabhagāmī||

नाथ सुना मैं अस सिव पाहीं। महा प्रलयहुँ नास तव नाहीं॥ मुधा बचन नहिं ईस्वर कहई। सोउ मोरें मन संसय अहई॥

nātha sunā maiṃ asa siva pāhīṃ| mahā pralayahum̐ nāsa tava nāhīṃ|| mudhā bacana nahiṃ īsvara kahaī| sou moreṃ mana saṃsaya ahaī||

अग जग जीव नाग नर देवा। नाथ सकल जगु काल कलेवा॥ अंड कटाह अमित लय कारी। कालु सदा दुरतिक्रम भारी॥

aga jaga jīva nāga nara devā| nātha sakala jagu kāla kalevā|| aṃḍa kaṭāha amita laya kārī| kālu sadā duratikrama bhārī||

सोरठा ९४(क)

तुम्हहि न ब्यापत काल अति कराल कारन कवन। मोहि सो कह कृपाल ग्यान प्रभाव कि जोग बल ॥ ९४ (क)॥

tumhahi na byāpata kāla ati karāla kārana kavana| mohi so kaha kṛpāla gyāna prabhāva ki joga bala || 94 (ka)||

दोहा ९४(ख)

प्रभु तब आश्रम आएँ मोर मोह भ्रम भाग। कारन कवन सो नाथ सब कहहु सहित अनुराग ॥ ९४ (ख)॥

prabhu taba āśrama āem̐ mora moha bhrama bhāga| kārana kavana so nātha saba kahahu sahita anurāga || 94 (kha)||

गरुड़ गिरा सुनि हरषेउ कागा। बोलेउ उमा परम अनुरागा॥ धन्य धन्य तव मति उरगारी। प्रस्न तुम्हारि मोहि अति प्यारी॥

garuṛa girā suni haraṣeu kāgā| boleu umā parama anurāgā|| dhanya dhanya tava mati uragārī| prasna tumhāri mohi ati pyārī||

सुनि तव प्रस्न सप्रेम सुहाई। बहुत जनम कै सुधि मोहि आई॥ सब निज कथा कहउँ मैं गाई। तात सुनहु सादर मन लाई॥

suni tava prasna saprema suhāī| bahuta janama kai sudhi mohi āī|| saba nija kathā kahaum̐ maiṃ gāī| tāta sunahu sādara mana lāī||

जप तप मख सम दम ब्रत दाना। बिरति बिबेक जोग बिग्याना॥ सब कर फल रघुपति पद प्रेमा। तेहि बिनु कोउ न पावइ छेमा॥

japa tapa makha sama dama brata dānā| birati bibeka joga bigyānā|| saba kara phala raghupati pada premā| tehi binu kou na pāvai chemā||

एहि तन राम भगति मैं पाई। ताते मोहि ममता अधिकाई॥ जेहि तें कछु निज स्वारथ होई। तेहि पर ममता कर सब कोई॥

ehi tana rāma bhagati maiṃ pāī| tāte mohi mamatā adhikāī|| jehi teṃ kachu nija svāratha hoī| tehi para mamatā kara saba koī||

सोरठा ९५(क)

पन्नगारि असि नीति श्रुति संमत सजन कहहिं। अति नीचहु सन प्रीति करिअ जानि निज परम हित ॥ ९५ (क)॥

pannagāri asi nīti śruti saṃmata sajana kahahiṃ| ati nīcahu sana prīti karia jāni nija parama hita || 95 (ka)||

दोहा ९५(ख)

पाट कीट तें होइ तेहि तें पाटंबर रुचिर। कृमि पालइ सबु कोड परम अपावन प्रान सम ॥ ९५ (ख)॥

pāṭa kīṭa teṃ hoi tehi teṃ pāṭaṃbara rucira| kṛmi pālai sabu koḍa parama apāvana prāna sama || 95 (kha)||

स्वारथ साँच जीव कहुँ एहा। मन क्रम बचन राम पद नेहा॥

svāratha sām̐ca jīva kahum̐ ehā| mana krama bacana rāma pada nehā||

सोरठा १

सोइ पावन सोइ सुभग सरीरा। जो तनु पाइ भजिअ रघुबीरा॥

soi pāvana soi subhaga sarīrā| jo tanu pāi bhajia raghubīrā||

राम बिमुख लहि बिधि सम देही। कबि कोबिद न प्रसंसहिं तेही॥ राम भगति एहिं तन उर जामी। ताते मोहि परम प्रिय स्वामी॥

rāma bimukha lahi bidhi sama dehī| kabi kobida na prasaṃsahiṃ tehī|| rāma bhagati ehiṃ tana ura jāmī| tāte mohi parama priya svāmī||

तजउँ न तन निज इच्छा मरना। तन बिनु बेद भजन नहिं बरना॥ प्रथम मोहँ मोहि बहुत बिगोवा। राम बिमुख सुख कबहुँ न सोवा॥

tajaum̐ na tana nija icchā maranā| tana binu beda bhajana nahiṃ baranā|| prathama moham̐ mohi bahuta bigovā| rāma bimukha sukha kabahum̐ na sovā||

नाना जनम कर्म पुनि नाना। किए जोग जप तप मख दाना॥ कवन जोनि जनमेउँ जहँ नाहीं। मैं खगेस भ्रमि भ्रमि जग माहीं॥

nānā janama karma puni nānā| kie joga japa tapa makha dānā|| kavana joni janameum̐ jaham̐ nāhīṃ| maiṃ khagesa bhrami bhrami jaga māhīṃ||

देखेउँ करि सब करम गोसाई। सुखी न भयउँ अबहिं की नाई॥ सुधि मोहि नाथ जन्म बहु केरी। सिव प्रसाद मति मोहँ न घेरी॥

dekheum̐ kari saba karama gosāī| sukhī na bhayaum̐ abahiṃ kī nāī|| sudhi mohi nātha janma bahu kerī| siva prasāda mati moham̐ na gherī||

दोहा ९६(क)

प्रथम जन्म के चरित अब कहरँ सुनह बिहगेस। सुनि प्रभु पद रति उपजट् जातें मिटहिं कलेस ॥ ९६ (क)॥

prathama janma ke carita aba kaharam̐ sunaha bihagesa| suni prabhu pada rati upajaṭ jāteṃ miṭahiṃ kalesa || 96 (ka)||

दोहा ९६(ख)

पूरुब कल्प एक प्रभु जुग कलिजुग मल मूल। नर अरु नारि अधर्म रत सकल निगम प्रतिकूल ॥ ९६ (ख)॥

pūruba kalpa eka prabhu juga kalijuga mala mūla| nara aru nāri adharma rata sakala nigama pratikūla || 96 (kha)||

तेहि कलिजुग कोसलपुर जाई। जन्मत भयउँ सूद्र तनु पाई॥ सिव सेवक मन क्रम अरु बानी। आन देव निंदक अभिमानी॥

tehi kalijuga kosalapura jāī| janmata bhayaum̐ sūdra tanu pāī|| siva sevaka mana krama aru bānī| āna deva niṃdaka abhimānī||

धन मद मत्त परम बाचाला। उग्रबुद्धि उर दंभ बिसाला॥ जदपि रहेउँ रघुपति रजधानी। तदपि न कछु महिमा तब जानी॥

dhana mada matta parama bācālā| ugrabuddhi ura daṃbha bisālā|| jadapi raheum̐ raghupati rajadhānī| tadapi na kachu mahimā taba jānī||

अब जाना मैं अवध प्रभावा। निगमागम पुरान अस गावा॥ कवनेहुँ जन्म अवध बस जोई। राम परायन सो परि होई॥

aba jānā maiṃ avadha prabhāvā| nigamāgama purāna asa gāvā|| kavanehum̐ janma avadha basa joī| rāma parāyana so pari hoī||

अवध प्रभाव जान तब प्रानी। जब उर बसहिं रामु धनुपानी॥

avadha prabhāva jāna taba prānī| jaba ura basahiṃ rāmu dhanupānī||

सोरठा ४

सो कलिकाल कठिन उरगारी। पाप परायन सब नर नारी॥

so kalikāla kaṭhina uragārī| pāpa parāyana saba nara nārī||

दोहा ९७(क)

कलिमल ग्रसे धर्म सब लुप्त भए सदग्रंथ। दंभिन्‍्ह निज मति कल्पि करि प्रगट किए बहु पंथ ॥ ९७ (क)॥

kalimala grase dharma saba lupta bhae sadagraṃtha| daṃbhinha nija mati kalpi kari pragaṭa kie bahu paṃtha || 97 (ka)||