लङ्काकाण्ड

लङ्काकाण्ड · दोहा २७–४०

साझा करें

सुनु रावन परिहरि चतुराई। भजसि न कृपासिंधु रघुराई॥ जौ खल भएसि राम कर द्रोही। ब्रह्म रुद्र सक राखि न तोही॥

sunu rāvana parihari caturāī| bhajasi na kṛpāsiṃdhu raghurāī|| jau khala bhaesi rāma kara drohī| brahma rudra saka rākhi na tohī||

मूढ़ बृथा जनि मारसि गाला। राम बयर अस होइहि हाला॥ तव सिर निकर कपिन्ह के आगें। परिहहिं धरनि राम सर लागें॥

mūṛha bṛthā jani mārasi gālā| rāma bayara asa hoihi hālā|| tava sira nikara kapinha ke āgeṃ| parihahiṃ dharani rāma sara lāgeṃ||

ते तव सिर कंदुक सम नाना। खेलहहिं भालु कीस चौगाना॥ जबहिं समर कोपहि रघुनायक। छुटिहहिं अति कराल बहु सायक॥

te tava sira kaṃduka sama nānā| khelahahiṃ bhālu kīsa caugānā|| jabahiṃ samara kopahi raghunāyaka| chuṭihahiṃ ati karāla bahu sāyaka||

तब कि चलिहि अस गाल तुम्हारा। अस बिचारि भजु राम उदारा॥ सुनत बचन रावन परजरा। जरत महानल जनु घृत परा॥

taba ki calihi asa gāla tumhārā| asa bicāri bhaju rāma udārā|| sunata bacana rāvana parajarā| jarata mahānala janu ghṛta parā||

दोहा २७

कुंभकरन अस बंधु मम सुत प्रसिद्ध सक्रारि। मोर पराक्रम नहिं सुनेहि जितेउँ चराचर झारि ॥ २७॥

kuṃbhakarana asa baṃdhu mama suta prasiddha sakrāri| mora parākrama nahiṃ sunehi jiteum̐ carācara jhāri || 27||

सठ साखामृग जोरि सहाई। बाँधा सिंधु इहइ प्रभुताई॥ नाघहिं खग अनेक बारीसा। सूर न होहिं ते सुनु सब कीसा॥

saṭha sākhāmṛga jori sahāī| bām̐dhā siṃdhu ihai prabhutāī|| nāghahiṃ khaga aneka bārīsā| sūra na hohiṃ te sunu saba kīsā||

मम भुज सागर बल जल पूरा। जहँ बूड़े बहु सुर नर सूरा॥ बीस पयोधि अगाध अपारा। को अस बीर जो पाइहि पारा॥

mama bhuja sāgara bala jala pūrā| jaham̐ būṛe bahu sura nara sūrā|| bīsa payodhi agādha apārā| ko asa bīra jo pāihi pārā||

दिगपालन्ह मैं नीर भरावा। भूप सुजस खल मोहि सुनावा॥ जौं पै समर सुभट तव नाथा। पुनि पुनि कहसि जासु गुन गाथा॥

digapālanha maiṃ nīra bharāvā| bhūpa sujasa khala mohi sunāvā|| jauṃ pai samara subhaṭa tava nāthā| puni puni kahasi jāsu guna gāthā||

तौ बसीठ पठवत केहि काजा। रिपु सन प्रीति करत नहिं लाजा॥ हरगिरि मथन निरखु मम बाहू। पुनि सठ कपि निज प्रभुहि सराहू॥

tau basīṭha paṭhavata kehi kājā| ripu sana prīti karata nahiṃ lājā|| haragiri mathana nirakhu mama bāhū| puni saṭha kapi nija prabhuhi sarāhū||

दोहा २८

सूर कवन रावन सरिस स्वकर काटि जेहिं सीस। हुने अनल अति हरष बहु बार साखि गौरीस ॥ २८॥

sūra kavana rāvana sarisa svakara kāṭi jehiṃ sīsa| hune anala ati haraṣa bahu bāra sākhi gaurīsa || 28||

जरत बिलोकेउँ जबहिं कपाला। बिधि के लिखे अंक निज भाला॥ नर कें कर आपन बध बाँची। हसेउँ जानि बिधि गिरा असाँची॥

jarata bilokeum̐ jabahiṃ kapālā| bidhi ke likhe aṃka nija bhālā|| nara keṃ kara āpana badha bām̐cī| haseum̐ jāni bidhi girā asām̐cī||

सोरठा २

सोउ मन समुझि त्रास नहिं मोरें। लिखा बिरंचि जरठ मति भोरें॥ आन बीर बल सठ मम आगें। पुनि पुनि कहसि लाज पति त्यागे॥

sou mana samujhi trāsa nahiṃ moreṃ| likhā biraṃci jaraṭha mati bhoreṃ|| āna bīra bala saṭha mama āgeṃ| puni puni kahasi lāja pati tyāge||

कह अंगद सलज्ज जग माहीं। रावन तोहि समान कोउ नाहीं॥ लाजवंत तव सहज सुभाऊ। निज मुख निज गुन कहसि न काऊ॥

kaha aṃgada salajja jaga māhīṃ| rāvana tohi samāna kou nāhīṃ|| lājavaṃta tava sahaja subhāū| nija mukha nija guna kahasi na kāū||

सिर अरु सैल कथा चित रही। ताते बार बीस तैं कही॥

sira aru saila kathā cita rahī| tāte bāra bīsa taiṃ kahī||

सोरठा ४

सो भुजबल राखेउ उर घाली। जीतेहु सहसबाहु बलि बाली॥

so bhujabala rākheu ura ghālī| jītehu sahasabāhu bali bālī||

सुनु मतिमंद देहि अब पूरा। काटें सीस कि होइअ सूरा॥ इंद्रजालि कहु कहिअ न बीरा। काटइ निज कर सकल सरीरा॥

sunu matimaṃda dehi aba pūrā| kāṭeṃ sīsa ki hoia sūrā|| iṃdrajāli kahu kahia na bīrā| kāṭai nija kara sakala sarīrā||

दोहा २९

जरहिं पतंग मोह बस भार बहहिं खर बृंद। ते नहिं सूर कहावहिं समुझि देखु मतिमंद ॥ २९॥

jarahiṃ pataṃga moha basa bhāra bahahiṃ khara bṛṃda| te nahiṃ sūra kahāvahiṃ samujhi dekhu matimaṃda || 29||

अब जनि बतबढ़ाव खल करही। सुनु मम बचन मान परिहरही॥ दसमुख मैं न बसीठीं आयउँ। अस बिचारि रघुबीर पठायउँ॥

aba jani batabaṛhāva khala karahī| sunu mama bacana māna pariharahī|| dasamukha maiṃ na basīṭhīṃ āyaum̐| asa bicāri raghubīra paṭhāyaum̐||

बार बार अस कहइ कृपाला। नहिं गजारि जसु बधें सृकाला॥ मन महुँ समुझि बचन प्रभु केरे। सहेउँ कठोर बचन सठ तेरे॥

bāra bāra asa kahai kṛpālā| nahiṃ gajāri jasu badheṃ sṛkālā|| mana mahum̐ samujhi bacana prabhu kere| saheum̐ kaṭhora bacana saṭha tere||

नाहिं त करि मुख भंजन तोरा। लै जातेउँ सीतहि बरजोरा॥ जानेउँ तव बल अधम सुरारी। सूनें हरि आनिहि परनारी॥

nāhiṃ ta kari mukha bhaṃjana torā| lai jāteum̐ sītahi barajorā|| jāneum̐ tava bala adhama surārī| sūneṃ hari ānihi paranārī||

तैं निसिचर पति गर्ब बहूता। मैं रघुपति सेवक कर दूता॥ जौं न राम अपमानहि डरउँ। तोहि देखत अस कौतुक करऊँ॥

taiṃ nisicara pati garba bahūtā| maiṃ raghupati sevaka kara dūtā|| jauṃ na rāma apamānahi ḍaraum̐| tohi dekhata asa kautuka karaūm̐||

दोहा ३०

तोहि पटकि महि सेन हति चौपट करि तव गाउँ। तव जुबतिन्ह समेत सठ जनकसुतहि लै जाउँ ॥ ३०॥

tohi paṭaki mahi sena hati caupaṭa kari tava gāum̐| tava jubatinha sameta saṭha janakasutahi lai jāum̐ || 30||

जौ अस करौं तदपि न बड़ाई। मुएहि बधें नहिं कछु मनुसाई॥ कौल कामबस कृपिन बिमूढ़ा। अति दरिद्र अजसी अति बूढ़ा॥

jau asa karauṃ tadapi na baṛāī| muehi badheṃ nahiṃ kachu manusāī|| kaula kāmabasa kṛpina bimūṛhā| ati daridra ajasī ati būṛhā||

सदा रोगबस संतत क्रोधी। बिष्नु बिमूख श्रुति संत बिरोधी॥ तनु पोषक निंदक अघ खानी। जीवन सव सम चौदह प्रानी॥

sadā rogabasa saṃtata krodhī| biṣnu bimūkha śruti saṃta birodhī|| tanu poṣaka niṃdaka agha khānī| jīvana sava sama caudaha prānī||

अस बिचारि खल बधउँ न तोही। अब जनि रिस उपजावसि मोही॥ सुनि सकोप कह निसिचर नाथा। अधर दसन दसि मीजत हाथा॥

asa bicāri khala badhaum̐ na tohī| aba jani risa upajāvasi mohī|| suni sakopa kaha nisicara nāthā| adhara dasana dasi mījata hāthā||

रे कपि अधम मरन अब चहसी। छोटे बदन बात बड़ि कहसी॥ कटु जल्पसि जड़ कपि बल जाकें। बल प्रताप बुधि तेज न ताकें॥

re kapi adhama marana aba cahasī| choṭe badana bāta baṛi kahasī|| kaṭu jalpasi jaṛa kapi bala jākeṃ| bala pratāpa budhi teja na tākeṃ||

दोहा

अगुन अमान जानि तेहि दीन्ह पिता बनबास।

aguna amāna jāni tehi dīnha pitā banabāsa|

सोरठा ३१(क)

सो दुख अरु जुबती बिरह पुनि निसि दिन मम त्रास ॥ ३१ (क)॥

so dukha aru jubatī biraha puni nisi dina mama trāsa || 31 (ka)||

दोहा ३१(ख)

जिन्ह के बल कर गर्ब तोहि अइसे मनुज अनेक। खाहीं निसाचर दिवस निसि मूढ़ समुझु तजि टेक ॥ ३१ (ख)॥

jinha ke bala kara garba tohi aise manuja aneka| khāhīṃ nisācara divasa nisi mūṛha samujhu taji ṭeka || 31 (kha)||

जब तेहिं कीन्ह राम कै निंदा। क्रोधवंत अति भयउ कपिंदा॥ हरि हर निंदा सुनइ जो काना। होइ पाप गोघात समाना॥

jaba tehiṃ kīnha rāma kai niṃdā| krodhavaṃta ati bhayau kapiṃdā|| hari hara niṃdā sunai jo kānā| hoi pāpa goghāta samānā||

कटकटान कपिकुंजर भारी। दुहु भुजदंड तमकि महि मारी॥ डोलत धरनि सभासद खसे। चले भाजि भय मारुत ग्रसे॥

kaṭakaṭāna kapikuṃjara bhārī| duhu bhujadaṃḍa tamaki mahi mārī|| ḍolata dharani sabhāsada khase| cale bhāji bhaya māruta grase||

गिरत सँभारि उठा दसकंधर। भूतल परे मुकुट अति सुंदर॥ कछु तेहिं लै निज सिरन्हि सँवारे। कछु अंगद प्रभु पास पबारे॥

girata sam̐bhāri uṭhā dasakaṃdhara| bhūtala pare mukuṭa ati suṃdara|| kachu tehiṃ lai nija siranhi sam̐vāre| kachu aṃgada prabhu pāsa pabāre||

आवत मुकुट देखि कपि भागे। दिनहीं लूक परन बिधि लागे॥ की रावन करि कोप चलाए। कुलिस चारि आवत अति धाए॥

āvata mukuṭa dekhi kapi bhāge| dinahīṃ lūka parana bidhi lāge|| kī rāvana kari kopa calāe| kulisa cāri āvata ati dhāe||

कह प्रभु हँसि जनि हृदयँ डेराहू। लूक न असनि केतु नहिं राहू॥ ए किरीट दसकंधर केरे। आवत बालितनय के प्रेरे॥

kaha prabhu ham̐si jani hṛdayam̐ ḍerāhū| lūka na asani ketu nahiṃ rāhū|| e kirīṭa dasakaṃdhara kere| āvata bālitanaya ke prere||

दोहा ३२(क)

तरकि पवनसुत कर गहे आनि धरे प्रभु पास। कौतुक देखहिं भालु कपि दिनकर सरिस प्रकास ॥ ३२ (क)॥

taraki pavanasuta kara gahe āni dhare prabhu pāsa| kautuka dekhahiṃ bhālu kapi dinakara sarisa prakāsa || 32 (ka)||

उहाँ सकोपि दसानन सब सन कहत रिसाइ। धरहु कपिहि धरि मारहु सुनि अंगद मुसुकाइ॥ ३२ (ख )॥

uhām̐ sakopi dasānana saba sana kahata risāi| dharahu kapihi dhari mārahu suni aṃgada musukāi|| 32 (kha )||

एहि बिधि बेगि सूभट सब धावहु। खाहु भालु कपि जहँ जहँ पावहु॥ मर्कटहीन करहु महि जाई। जिअत धरहु तापस द्वौ भाई॥

ehi bidhi begi sūbhaṭa saba dhāvahu| khāhu bhālu kapi jaham̐ jaham̐ pāvahu|| markaṭahīna karahu mahi jāī| jiata dharahu tāpasa dvau bhāī||

पुनि सकोप बोलेउ जुबराजा। गाल बजावत तोहि न लाजा॥ मरु गर काटि निलज कुलघाती। बल बिलोकि बिहरति नहिं छाती॥

puni sakopa boleu jubarājā| gāla bajāvata tohi na lājā|| maru gara kāṭi nilaja kulaghātī| bala biloki biharati nahiṃ chātī||

रे त्रिय चोर कुमारग गामी। खल मल रासि मंदमति कामी॥ सन्यपात जल्पसि दुर्बादा। भएसि कालबस खल मनुजादा॥

re triya cora kumāraga gāmī| khala mala rāsi maṃdamati kāmī|| sanyapāta jalpasi durbādā| bhaesi kālabasa khala manujādā||

याको फलु पावहिगो आगें। बानर भालु चपेटन्हि लागें॥ रामु मनुज बोलत असि बानी। गिरहिं न तव रसना अभिमानी॥

yāko phalu pāvahigo āgeṃ| bānara bhālu capeṭanhi lāgeṃ|| rāmu manuja bolata asi bānī| girahiṃ na tava rasanā abhimānī||

गिरिहहिं रसना संसय नाहीं। सिरन्हि समेत समर महि माहीं॥

girihahiṃ rasanā saṃsaya nāhīṃ| siranhi sameta samara mahi māhīṃ||

सोरठा ३३(क)

सो नर क्यों दसकंध बालि बध्यो जेहिं एक सर। बीसहुँ लोचन अंध धिग तव जन्म कुजाति जड़ ॥ ३३ (क)॥

so nara kyoṃ dasakaṃdha bāli badhyo jehiṃ eka sara| bīsahum̐ locana aṃdha dhiga tava janma kujāti jaṛa || 33 (ka)||

तब सोनित की प्यास तृषित राम सायक निकर। तजउँ तोहि तेहि त्रास कटु जल्पक निसिचर अधम॥ ३३ (ख )॥

taba sonita kī pyāsa tṛṣita rāma sāyaka nikara| tajaum̐ tohi tehi trāsa kaṭu jalpaka nisicara adhama|| 33 (kha )||

मै तव दसन तोरिबे लायक। आयसु मोहि न दीन्ह रघुनायक॥ असि रिस होति दसउ मुख तोरौं। लंका गहि समुद्र महँ बोरौं॥

mai tava dasana toribe lāyaka| āyasu mohi na dīnha raghunāyaka|| asi risa hoti dasau mukha torauṃ| laṃkā gahi samudra maham̐ borauṃ||

गूलरि फल समान तव लंका। बसहु मध्य तुम्ह जंतु असंका॥ मैं बानर फल खात न बारा। आयसु दीन्ह न राम उदारा॥

gūlari phala samāna tava laṃkā| basahu madhya tumha jaṃtu asaṃkā|| maiṃ bānara phala khāta na bārā| āyasu dīnha na rāma udārā||

जुगति सुनत रावन मुसुकाई। मूढ़ सिखिहि कहँ बहुत झुठाई॥ बालि न कबहुँ गाल अस मारा। मिलि तपसिन्ह तैं भएसि लबारा॥

jugati sunata rāvana musukāī| mūṛha sikhihi kaham̐ bahuta jhuṭhāī|| bāli na kabahum̐ gāla asa mārā| mili tapasinha taiṃ bhaesi labārā||

साँचेहुँ मैं लबार भुज बीहा। जौं न उपारिउँ तव दस जीहा॥ समुझि राम प्रताप कपि कोपा। सभा माझ पन करि पद रोपा॥

sām̐cehum̐ maiṃ labāra bhuja bīhā| jauṃ na upārium̐ tava dasa jīhā|| samujhi rāma pratāpa kapi kopā| sabhā mājha pana kari pada ropā||

जौं मम चरन सकसि सठ टारी। फिरहिं रामु सीता मैं हारी॥ सुनहु सुभट सब कह दससीसा। पद गहि धरनि पछारहु कीसा॥

jauṃ mama carana sakasi saṭha ṭārī| phirahiṃ rāmu sītā maiṃ hārī|| sunahu subhaṭa saba kaha dasasīsā| pada gahi dharani pachārahu kīsā||

इंद्रजीत आदिक बलवाना। हरषि उठे जहँ तहँ भट नाना॥ झपटहिं करि बल बिपुल उपाई। पद न टरइ बैठहिं सिरु नाई॥

iṃdrajīta ādika balavānā| haraṣi uṭhe jaham̐ taham̐ bhaṭa nānā|| jhapaṭahiṃ kari bala bipula upāī| pada na ṭarai baiṭhahiṃ siru nāī||

पुनि उठि झपटहीं सुर आराती। टरइ न कीस चरन एहि भाँती॥ पुरुष कुजोगी जिमि उरगारी। मोह बिटप नहिं सकहिं उपारी॥

puni uṭhi jhapaṭahīṃ sura ārātī| ṭarai na kīsa carana ehi bhām̐tī|| puruṣa kujogī jimi uragārī| moha biṭapa nahiṃ sakahiṃ upārī||

दोहा ३४(क)

कोटिन्ह मेघनाद सम सुभट उठे हरषाइ। झपटहिं टरै न कपि चरन पुनि बैठहिं सिर नाइ ॥ ३४ (क)॥

koṭinha meghanāda sama subhaṭa uṭhe haraṣāi| jhapaṭahiṃ ṭarai na kapi carana puni baiṭhahiṃ sira nāi || 34 (ka)||

दोहा ३४(ख)

भूमि न छाँडत कपि चरन देखत रिपु मद भाग। कोटि बिघ्न ते संत कर मन जिमि नीति न त्याग ॥ ३४ (ख)॥

bhūmi na chām̐ḍata kapi carana dekhata ripu mada bhāga| koṭi bighna te saṃta kara mana jimi nīti na tyāga || 34 (kha)||

कपि बल देखि सकल हियँ हारे। उठा आपु कपि कें परचारे॥ गहत चरन कह बालिकुमारा। मम पद गहें न तोर उबारा॥

kapi bala dekhi sakala hiyam̐ hāre| uṭhā āpu kapi keṃ paracāre|| gahata carana kaha bālikumārā| mama pada gaheṃ na tora ubārā||

गहसि न राम चरन सठ जाई। सुनत फिरा मन अति सकुचाई॥ भयउ तेजहत श्री सब गई। मध्य दिवस जिमि ससि सोहई॥

gahasi na rāma carana saṭha jāī| sunata phirā mana ati sakucāī|| bhayau tejahata śrī saba gaī| madhya divasa jimi sasi sohaī||

सिंघासन बैठेउ सिर नाई। मानहुँ संपति सकल गँवाई॥ जगदातमा प्रानपति रामा। तासु बिमुख किमि लह बिश्रामा॥

siṃghāsana baiṭheu sira nāī| mānahum̐ saṃpati sakala gam̐vāī|| jagadātamā prānapati rāmā| tāsu bimukha kimi laha biśrāmā||

उमा राम की भृकुटि बिलासा। होइ बिस्व पुनि पावइ नासा॥ तृन ते कुलिस कुलिस तृन करई। तासु दूत पन कहु किमि टरई॥

umā rāma kī bhṛkuṭi bilāsā| hoi bisva puni pāvai nāsā|| tṛna te kulisa kulisa tṛna karaī| tāsu dūta pana kahu kimi ṭaraī||

पुनि कपि कही नीति बिधि नाना। मान न ताहि कालु निअराना॥ रिपु मद मथि प्रभु सुजसु सुनायो। यह कहि चल्यो बालि नृप जायो॥

puni kapi kahī nīti bidhi nānā| māna na tāhi kālu niarānā|| ripu mada mathi prabhu sujasu sunāyo| yaha kahi calyo bāli nṛpa jāyo||

हतौं न खेत खेलाइ खेलाई। तोहि अबहिं का करौं बड़ाई॥ प्रथमहिं तासु तनय कपि मारा। सो सुनि रावन भयउ दुखारा॥

hatauṃ na kheta khelāi khelāī| tohi abahiṃ kā karauṃ baṛāī|| prathamahiṃ tāsu tanaya kapi mārā| so suni rāvana bhayau dukhārā||

जातुधान अंगद पन देखी। भय ब्याकुल सब भए बिसेषी॥

jātudhāna aṃgada pana dekhī| bhaya byākula saba bhae biseṣī||

दोहा ३५(क)

रिपु बल धरषि हरषि कपि बालितनय बल पुंज। पुलक सरीर नयन जल गहे राम पद कंज ॥ ३५ (क)॥

ripu bala dharaṣi haraṣi kapi bālitanaya bala puṃja| pulaka sarīra nayana jala gahe rāma pada kaṃja || 35 (ka)||

दोहा ३५(ख)

साँझ जानि दसकंधर भवन गयउ बिलखाइ। मंदोदरी रावनहि बहुरि कहा समुझाइ ॥ ३५ (ख)॥

sām̐jha jāni dasakaṃdhara bhavana gayau bilakhāi| maṃdodarī rāvanahi bahuri kahā samujhāi || 35 (kha)||

कंत समुझि मन तजहु कुमतिही। सोह न समर तुम्हहि रघुपतिही॥ रामानुज लघु रेख खचाई। सोउ नहिं नाघेहु असि मनुसाई॥

kaṃta samujhi mana tajahu kumatihī| soha na samara tumhahi raghupatihī|| rāmānuja laghu rekha khacāī| sou nahiṃ nāghehu asi manusāī||

पिय तुम्ह ताहि जितब संग्रामा। जाके दूत केर यह कामा॥ कौतुक सिंधु नाघी तव लंका। आयउ कपि केहरी असंका॥

piya tumha tāhi jitaba saṃgrāmā| jāke dūta kera yaha kāmā|| kautuka siṃdhu nāghī tava laṃkā| āyau kapi keharī asaṃkā||

रखवारे हति बिपिन उजारा। देखत तोहि अच्छ तेहिं मारा॥ जारि सकल पुर कीन्हेसि छारा। कहाँ रहा बल गर्ब तुम्हारा॥

rakhavāre hati bipina ujārā| dekhata tohi accha tehiṃ mārā|| jāri sakala pura kīnhesi chārā| kahām̐ rahā bala garba tumhārā||

अब पति मृषा गाल जनि मारहु। मोर कहा कछु हृदयँ बिचारहु॥ पति रघुपतिहि नृपति जनि मानहु। अग जग नाथ अतुल बल जानहु॥

aba pati mṛṣā gāla jani mārahu| mora kahā kachu hṛdayam̐ bicārahu|| pati raghupatihi nṛpati jani mānahu| aga jaga nātha atula bala jānahu||

बान प्रताप जान मारीचा। तासु कहा नहिं मानेहि नीचा॥ जनक सभाँ अगनित भूपाला। रहे तुम्हउ बल अतुल बिसाला॥

bāna pratāpa jāna mārīcā| tāsu kahā nahiṃ mānehi nīcā|| janaka sabhām̐ aganita bhūpālā| rahe tumhau bala atula bisālā||

भंजि धनुष जानकी बिआही। तब संग्राम जितेहु किन ताही॥ सुरपति सुत जानइ बल थोरा। राखा जिअत आँखि गहि फोरा॥

bhaṃji dhanuṣa jānakī biāhī| taba saṃgrāma jitehu kina tāhī|| surapati suta jānai bala thorā| rākhā jiata ām̐khi gahi phorā||

सूपनखा कै गति तुम्ह देखी। तदपि हृदयँ नहिं लाज बिषेषी॥

sūpanakhā kai gati tumha dekhī| tadapi hṛdayam̐ nahiṃ lāja biṣeṣī||

दोहा ३६

बधि बिराध खर दूषनहि लींलाँ हत्यो कबंध। बालि एक सर मारयो तेहि जानहु दसकंध ॥ ३६॥

badhi birādha khara dūṣanahi līṃlām̐ hatyo kabaṃdha| bāli eka sara mārayo tehi jānahu dasakaṃdha || 36||

जेहिं जलनाथ बँधायउ हेला। उतरे प्रभु दल सहित सुबेला॥ कारुनीक दिनकर कुल केतू। दूत पठायउ तव हित हेतू॥

jehiṃ jalanātha bam̐dhāyau helā| utare prabhu dala sahita subelā|| kārunīka dinakara kula ketū| dūta paṭhāyau tava hita hetū||

सभा माझ जेहिं तव बल मथा। करि बरूथ महुँ मृगपति जथा॥ अंगद हनुमत अनुचर जाके। रन बाँकुरे बीर अति बाँके॥

sabhā mājha jehiṃ tava bala mathā| kari barūtha mahum̐ mṛgapati jathā|| aṃgada hanumata anucara jāke| rana bām̐kure bīra ati bām̐ke||

तेहि कहँ पिय पुनि पुनि नर कहहू। मुधा मान ममता मद बहहू॥ अहह कंत कृत राम बिरोधा। काल बिबस मन उपज न बोधा॥

tehi kaham̐ piya puni puni nara kahahū| mudhā māna mamatā mada bahahū|| ahaha kaṃta kṛta rāma birodhā| kāla bibasa mana upaja na bodhā||

काल दंड गहि काहु न मारा। हरइ धर्म बल बुद्धि बिचारा॥ निकट काल जेहि आवत साईं। तेहि भ्रम होइ तुम्हारिहि नाईं॥

kāla daṃḍa gahi kāhu na mārā| harai dharma bala buddhi bicārā|| nikaṭa kāla jehi āvata sāīṃ| tehi bhrama hoi tumhārihi nāīṃ||

दोहा ३७

दुइ सुत मरे दहेउ पुर अजहुँ पूर पिय देहु। कृपासिंधु रघुनाथ भजि नाथ बिमल जसु लेहु ॥ ३७॥

dui suta mare daheu pura ajahum̐ pūra piya dehu| kṛpāsiṃdhu raghunātha bhaji nātha bimala jasu lehu || 37||

नारि बचन सुनि बिसिख समाना। सभाँ गयउ उठि होत बिहाना॥ बैठ जाइ सिंघासन फूली। अति अभिमान त्रास सब भूली॥

nāri bacana suni bisikha samānā| sabhām̐ gayau uṭhi hota bihānā|| baiṭha jāi siṃghāsana phūlī| ati abhimāna trāsa saba bhūlī||

इहाँ राम अंगदहि बोलावा। आइ चरन पंकज सिरु नावा॥ अति आदर सपीप बैठारी। बोले बिहँसि कृपाल खरारी॥

ihām̐ rāma aṃgadahi bolāvā| āi carana paṃkaja siru nāvā|| ati ādara sapīpa baiṭhārī| bole biham̐si kṛpāla kharārī||

बालितनय कौतुक अति मोही। तात सत्य कहु पूछउँ तोही॥ रावनु जातुधान कुल टीका। भुज बल अतुल जासु जग लीका॥

bālitanaya kautuka ati mohī| tāta satya kahu pūchaum̐ tohī|| rāvanu jātudhāna kula ṭīkā| bhuja bala atula jāsu jaga līkā||

तासु मुकुट तुम्ह चारि चलाए। कहहु तात कवनी बिधि पाए॥ सुनु सर्बग्य प्रनत सुखकारी। मुकुट न होहिं भूप गुन चारी॥

tāsu mukuṭa tumha cāri calāe| kahahu tāta kavanī bidhi pāe|| sunu sarbagya pranata sukhakārī| mukuṭa na hohiṃ bhūpa guna cārī||

साम दान अरु दंड बिभेदा। नृप उर बसहिं नाथ कह बेदा॥ नीति धर्म के चरन सुहाए। अस जियँ जानि नाथ पहिं आए॥

sāma dāna aru daṃḍa bibhedā| nṛpa ura basahiṃ nātha kaha bedā|| nīti dharma ke carana suhāe| asa jiyam̐ jāni nātha pahiṃ āe||

दोहा ३८(क)

धर्महीन प्रभु पद बिमुख काल बिबस दससीस। तेहि परिहरि गुन आए सुनहु कोसलाधीस ॥ ३८ (क)॥

dharmahīna prabhu pada bimukha kāla bibasa dasasīsa| tehi parihari guna āe sunahu kosalādhīsa || 38 (ka)||

दोहा ३८(ख)

परम चतुरता श्रवन सुनि बिहँसे रामु उदार। समाचार पुनि सब कहे गढ़ के बालिकुमार ॥ ३८ (ख)॥

parama caturatā śravana suni biham̐se rāmu udāra| samācāra puni saba kahe gaṛha ke bālikumāra || 38 (kha)||

रिपु के समाचार जब पाए। राम सचिव सब निकट बोलाए॥ लंका बाँके चारि दुआरा। केहि बिधि लागिअ करहु बिचारा॥

ripu ke samācāra jaba pāe| rāma saciva saba nikaṭa bolāe|| laṃkā bām̐ke cāri duārā| kehi bidhi lāgia karahu bicārā||

तब कपीस रिच्छेस बिभीषन। सुमिरि हृदयँ दिनकर कुल भूषन॥ करि बिचार तिन्ह मंत्र दृढ़ावा। चारि अनी कपि कटकु बनावा॥

taba kapīsa ricchesa bibhīṣana| sumiri hṛdayam̐ dinakara kula bhūṣana|| kari bicāra tinha maṃtra dṛṛhāvā| cāri anī kapi kaṭaku banāvā||

जथाजोग सेनापति कीन्हे। जूथप सकल बोलि तब लीन्हे॥ प्रभु प्रताप कहि सब समुझाए। सुनि कपि सिंघनाद करि धाए॥

jathājoga senāpati kīnhe| jūthapa sakala boli taba līnhe|| prabhu pratāpa kahi saba samujhāe| suni kapi siṃghanāda kari dhāe||

हरषित राम चरन सिर नावहिं। गहि गिरि सिखर बीर सब धावहिं॥ गर्जहिं तर्जहिं भालु कपीसा। जय रघुबीर कोसलाधीसा॥

haraṣita rāma carana sira nāvahiṃ| gahi giri sikhara bīra saba dhāvahiṃ|| garjahiṃ tarjahiṃ bhālu kapīsā| jaya raghubīra kosalādhīsā||

जानत परम दुर्ग अति लंका। प्रभु प्रताप कपि चले असंका॥ घटाटोप करि चहुँ दिसि घेरी। मुखहिं निसान बजावहीं भेरी॥

jānata parama durga ati laṃkā| prabhu pratāpa kapi cale asaṃkā|| ghaṭāṭopa kari cahum̐ disi gherī| mukhahiṃ nisāna bajāvahīṃ bherī||

दोहा ३९

जयति राम जय लछिमन जय कपीस सुग्रीव। गर्जहिं सिंघनाद कपि भालु महा बल सींव ॥ ३९॥

jayati rāma jaya lachimana jaya kapīsa sugrīva| garjahiṃ siṃghanāda kapi bhālu mahā bala sīṃva || 39||

लंकाँ भयउ कोलाहल भारी। सुना दसानन अति अहँकारी॥ देखहु बनरन्ह केरि ढिठाई। बिहँसि निसाचर सेन बोलाई॥

laṃkām̐ bhayau kolāhala bhārī| sunā dasānana ati aham̐kārī|| dekhahu banaranha keri ḍhiṭhāī| biham̐si nisācara sena bolāī||

आए कीस काल के प्रेरे। छुधावंत सब निसिचर मेरे॥ अस कहि अट्टहास सठ कीन्हा। गृह बैठे अहार बिधि दीन्हा॥

āe kīsa kāla ke prere| chudhāvaṃta saba nisicara mere|| asa kahi aṭṭahāsa saṭha kīnhā| gṛha baiṭhe ahāra bidhi dīnhā||

सुभट सकल चारिहुँ दिसि जाहू। धरि धरि भालु कीस सब खाहू॥ उमा रावनहि अस अभिमाना। जिमि टिट्टिभ खग सूत उताना॥

subhaṭa sakala cārihum̐ disi jāhū| dhari dhari bhālu kīsa saba khāhū|| umā rāvanahi asa abhimānā| jimi ṭiṭṭibha khaga sūta utānā||

चले निसाचर आयसु मागी। गहि कर भिंडिपाल बर साँगी॥ तोमर मुग्दर परसु प्रचंडा। सुल कृपान परिघ गिरिखंडा॥

cale nisācara āyasu māgī| gahi kara bhiṃḍipāla bara sām̐gī|| tomara mugdara parasu pracaṃḍā| sula kṛpāna parigha girikhaṃḍā||

जिमि अरुनोपल निकर निहारी। धावहिं सठ खग मांस अहारी॥ चोंच भंग दुख तिन्हहि न सूझा। तिमि धाए मनुजाद अबूझा॥

jimi arunopala nikara nihārī| dhāvahiṃ saṭha khaga māṃsa ahārī|| coṃca bhaṃga dukha tinhahi na sūjhā| timi dhāe manujāda abūjhā||

दोहा ४०

नानायुध सर चाप धर जातुधान बल बीर। कोट कँगूरन्हि चढ़ि गए कोटि कोटि रनधीर ॥ ४०॥

nānāyudha sara cāpa dhara jātudhāna bala bīra| koṭa kam̐gūranhi caṛhi gae koṭi koṭi ranadhīra || 40||