लङ्काकाण्ड

लङ्काकाण्ड · दोहा १५(क)–२६

साझा करें

पद पाताल सीस अज धामा। अपर लोक अँग अँग बिश्रामा॥ भृकुटि बिलास भयंकर काला। नयन दिवाकर कच घन माला॥

pada pātāla sīsa aja dhāmā| apara loka am̐ga am̐ga biśrāmā|| bhṛkuṭi bilāsa bhayaṃkara kālā| nayana divākara kaca ghana mālā||

जासु घ्रान अस्विनीकुमारा। निसि अरु दिवस निमेष अपारा॥ श्रवन दिसा दस बेद बखानी। मारुत स्वास निगम निज बानी॥

jāsu ghrāna asvinīkumārā| nisi aru divasa nimeṣa apārā|| śravana disā dasa beda bakhānī| māruta svāsa nigama nija bānī||

अधर लोभ जम दसन कराला। माया हास बाहु दिगपाला॥ आनन अनल अंबुपति जीहा। उतपति पालन प्रलय समीहा॥

adhara lobha jama dasana karālā| māyā hāsa bāhu digapālā|| ānana anala aṃbupati jīhā| utapati pālana pralaya samīhā||

रोम राजि अष्टादस भारा। अस्थि सैल सरिता नस जारा॥ उदर उदधि अधगो जातना। जगमय प्रभु का बहु कलपना॥

roma rāji aṣṭādasa bhārā| asthi saila saritā nasa jārā|| udara udadhi adhago jātanā| jagamaya prabhu kā bahu kalapanā||

दोहा १५(क)

अहंकार सिव बुद्धि अज मन ससि चित्त महान। मनुज बास सचराचर रुप राम भगवान ॥ १५ (क)॥

ahaṃkāra siva buddhi aja mana sasi citta mahāna| manuja bāsa sacarācara rupa rāma bhagavāna || 15 (ka)||

दोहा १५(ख)

अस बिचारि सुनु प्रानपति प्रभु सन बयरु बिहाइ। प्रीति करहु रघुबीर पद मम अहिवात न जाइ ॥ १५ (ख)॥

asa bicāri sunu prānapati prabhu sana bayaru bihāi| prīti karahu raghubīra pada mama ahivāta na jāi || 15 (kha)||

बिहँसा नारि बचन सुनि काना। अहो मोह महिमा बलवाना॥ नारि सुभाउ सत्य सब कहहीं। अवगुन आठ सदा उर रहहीं॥

biham̐sā nāri bacana suni kānā| aho moha mahimā balavānā|| nāri subhāu satya saba kahahīṃ| avaguna āṭha sadā ura rahahīṃ||

साहस अनृत चपलता माया। भय अबिबेक असौच अदाया॥ रिपु कर रुप सकल तैं गावा। अति बिसाल भय मोहि सुनावा॥

sāhasa anṛta capalatā māyā| bhaya abibeka asauca adāyā|| ripu kara rupa sakala taiṃ gāvā| ati bisāla bhaya mohi sunāvā||

सोरठा ३

सो सब प्रिया सहज बस मोरें। समुझि परा प्रसाद अब तोरें॥ जानिउँ प्रिया तोरि चतुराई। एहि बिधि कहहु मोरि प्रभुताई॥

so saba priyā sahaja basa moreṃ| samujhi parā prasāda aba toreṃ|| jānium̐ priyā tori caturāī| ehi bidhi kahahu mori prabhutāī||

तव बतकही गूढ़ मृगलोचनि। समुझत सुखद सुनत भय मोचनि॥ मंदोदरि मन महुँ अस ठयऊ। पियहि काल बस मतिभ्रम भयऊ॥

tava batakahī gūṛha mṛgalocani| samujhata sukhada sunata bhaya mocani|| maṃdodari mana mahum̐ asa ṭhayaū| piyahi kāla basa matibhrama bhayaū||

दोहा १६(क)

एहि बिधि करत बिनोद बहु प्रात प्रगट दसकंध। सहज असंक लंकपति सभाँ गयउ मद अंध ॥ १६ (क)॥

ehi bidhi karata binoda bahu prāta pragaṭa dasakaṃdha| sahaja asaṃka laṃkapati sabhām̐ gayau mada aṃdha || 16 (ka)||

सोरठा १६(ख)

फूलह फरइ न बेत जदपि सुधा बरषहिं जलद। मूरुख हृदयँ न चेत जौं गुर मिलहिं बिरंचि सम ॥ १६ (ख)॥

phūlaha pharai na beta jadapi sudhā baraṣahiṃ jalada| mūrukha hṛdayam̐ na ceta jauṃ gura milahiṃ biraṃci sama || 16 (kha)||

इहाँ प्रात जागे रघुराई। पूछा मत सब सचिव बोलाई॥ कहहु बेगि का करिअ उपाई। जामवंत कह पद सिरु नाई॥

ihām̐ prāta jāge raghurāī| pūchā mata saba saciva bolāī|| kahahu begi kā karia upāī| jāmavaṃta kaha pada siru nāī||

सुनु सर्बग्य सकल उर बासी। बुधि बल तेज धर्म गुन रासी॥ मंत्र कहउँ निज मति अनुसारा। दूत पठाइअ बालिकुमारा॥

sunu sarbagya sakala ura bāsī| budhi bala teja dharma guna rāsī|| maṃtra kahaum̐ nija mati anusārā| dūta paṭhāia bālikumārā||

नीक मंत्र सब के मन माना। अंगद सन कह कृपानिधाना॥ बालितनय बुधि बल गुन धामा। लंका जाहु तात मम कामा॥

nīka maṃtra saba ke mana mānā| aṃgada sana kaha kṛpānidhānā|| bālitanaya budhi bala guna dhāmā| laṃkā jāhu tāta mama kāmā||

बहुत बुझाइ तुम्हहि का कहऊँ। परम चतुर मैं जानत अहऊँ॥ काजु हमार तासु हित होई। रिपु सन करेहु बतकही सोई॥

bahuta bujhāi tumhahi kā kahaūm̐| parama catura maiṃ jānata ahaūm̐|| kāju hamāra tāsu hita hoī| ripu sana karehu batakahī soī||

सोरठा

प्रभु अग्या धरि सीस चरन बंदि अंगद उठेउ।

prabhu agyā dhari sīsa carana baṃdi aṃgada uṭheu|

सोरठा १७(क)

सोइ गुन सागर ईस राम कृपा जा पर करहु ॥ १७ (क)॥

soi guna sāgara īsa rāma kṛpā jā para karahu || 17 (ka)||

दोहा १७(ख)

स्वयं सिद्ध सब काज नाथ मोहि आदरु दियउ। अस बिचारि जुबराज तन पुलकित हरषित हियउ ॥ १७ (ख)॥

svayaṃ siddha saba kāja nātha mohi ādaru diyau| asa bicāri jubarāja tana pulakita haraṣita hiyau || 17 (kha)||

बंदि चरन उर धरि प्रभुताई। अंगद चलेउ सबहि सिरु नाई॥ प्रभु प्रताप उर सहज असंका। रन बाँकुरा बालिसुत बंका॥

baṃdi carana ura dhari prabhutāī| aṃgada caleu sabahi siru nāī|| prabhu pratāpa ura sahaja asaṃkā| rana bām̐kurā bālisuta baṃkā||

पुर पैठत रावन कर बेटा। खेलत रहा सो होइ गै भैंटा॥ बातहिं बात करष बढ़ि आई। जुगल अतुल बल पुनि तरुनाई॥

pura paiṭhata rāvana kara beṭā| khelata rahā so hoi gai bhaiṃṭā|| bātahiṃ bāta karaṣa baṛhi āī| jugala atula bala puni tarunāī||

तेहि अंगद कहुँ लात उठाई। गहि पद पटकेउ भूमि भर्वॉर्ड॥ निसिचर निकर देखि भट भारी। जहँ तहँ चले न सकहिं पुकारी॥

tehi aṃgada kahum̐ lāta uṭhāī| gahi pada paṭakeu bhūmi bharvôrḍa|| nisicara nikara dekhi bhaṭa bhārī| jaham̐ taham̐ cale na sakahiṃ pukārī||

एक एक सन मरमु न कहहीं। समुझि तासु बध चुप करि रहहीं॥ भयउ कोलाहल नगर मझारी। आवा कपि लंका जेहीं जारी॥

eka eka sana maramu na kahahīṃ| samujhi tāsu badha cupa kari rahahīṃ|| bhayau kolāhala nagara majhārī| āvā kapi laṃkā jehīṃ jārī||

अब धौं कहा करिहि करतारा। अति सभीत सब करहिं बिचारा॥ बिनु पूछें मगु देहिं दिखाई। जेहि बिलोक सोइ जाइ सुखाई॥

aba dhauṃ kahā karihi karatārā| ati sabhīta saba karahiṃ bicārā|| binu pūcheṃ magu dehiṃ dikhāī| jehi biloka soi jāi sukhāī||

दोहा १८

गयउ सभा दरबार तब सुमिरि राम पद कंज। सिंह ठवनि इत उत चितव धीर बीर बल पुंज ॥ १८॥

gayau sabhā darabāra taba sumiri rāma pada kaṃja| siṃha ṭhavani ita uta citava dhīra bīra bala puṃja || 18||

तुरत निसाचर एक पठावा। समाचार रावनहि जनावा॥ सुनत बिहँसि बोला दससीसा। आनहु बोलि कहाँ कर कीसा॥

turata nisācara eka paṭhāvā| samācāra rāvanahi janāvā|| sunata biham̐si bolā dasasīsā| ānahu boli kahām̐ kara kīsā||

आयसु पाइ दूत बहु धाए। कपिकुंजरहि बोलि लै आए॥ अंगद दीख दसानन बैंसें। सहित प्रान कज्जलगिरि जैसें॥

āyasu pāi dūta bahu dhāe| kapikuṃjarahi boli lai āe|| aṃgada dīkha dasānana baiṃseṃ| sahita prāna kajjalagiri jaiseṃ||

भुजा बिटप सिर सृंग समाना। रोमावली लता जनु नाना॥ मुख नासिका नयन अरु काना। गिरि कंदरा खोह अनुमाना॥

bhujā biṭapa sira sṛṃga samānā| romāvalī latā janu nānā|| mukha nāsikā nayana aru kānā| giri kaṃdarā khoha anumānā||

गयउ सभाँ मन नेकु न मुरा। बालितनय अतिबल बाँकुरा॥ उठे सभासद कपि कहुँ देखी। रावन उर भा क्रौध बिसेषी॥

gayau sabhām̐ mana neku na murā| bālitanaya atibala bām̐kurā|| uṭhe sabhāsada kapi kahum̐ dekhī| rāvana ura bhā kraudha biseṣī||

दोहा १९

जथा मत्त गज जूथ महुँ पंचानन चलि जाइ। राम प्रताप सुमिरि मन बैठ सभाँ सिरु नाइ ॥ १९॥

jathā matta gaja jūtha mahum̐ paṃcānana cali jāi| rāma pratāpa sumiri mana baiṭha sabhām̐ siru nāi || 19||

कह दसकंठ कवन तैं बंदर। मैं रघुबीर दूत दसकंधर॥ मम जनकहि तोहि रही मिताई। तव हित कारन आयउँ भाई॥

kaha dasakaṃṭha kavana taiṃ baṃdara| maiṃ raghubīra dūta dasakaṃdhara|| mama janakahi tohi rahī mitāī| tava hita kārana āyaum̐ bhāī||

उत्तम कुल पुलस्ति कर नाती। सिव बिरंचि पूजेहु बहु भाँती॥ बर पायहु कीन्हेहु सब काजा। जीतेहु लोकपाल सब राजा॥

uttama kula pulasti kara nātī| siva biraṃci pūjehu bahu bhām̐tī|| bara pāyahu kīnhehu saba kājā| jītehu lokapāla saba rājā||

नृप अभिमान मोह बस किंबा। हरि आनिहु सीता जगदंबा॥ अब सुभ कहा सुनहु तुम्ह मोरा। सब अपराध छमिहि प्रभु तोरा॥

nṛpa abhimāna moha basa kiṃbā| hari ānihu sītā jagadaṃbā|| aba subha kahā sunahu tumha morā| saba aparādha chamihi prabhu torā||

दसन गहहु तृन कंठ कुठारी। परिजन सहित संग निज नारी॥ सादर जनकसुता करि आगें। एहि बिधि चलहु सकल भय त्यागें॥

dasana gahahu tṛna kaṃṭha kuṭhārī| parijana sahita saṃga nija nārī|| sādara janakasutā kari āgeṃ| ehi bidhi calahu sakala bhaya tyāgeṃ||

दोहा २०

प्रनतपाल रघुबंसमनि त्राहि त्राहि अब मोहि। आरत गिरा सुनत प्रभु अभय करैगो तोहि ॥ २०॥

pranatapāla raghubaṃsamani trāhi trāhi aba mohi| ārata girā sunata prabhu abhaya karaigo tohi || 20||

रे कपिपोत बोलु संभारी। मूढ़ न जानेहि मोहि सुरारी॥ कहु निज नाम जनक कर भाई। केहि नातें मानिऐ मिताई॥

re kapipota bolu saṃbhārī| mūṛha na jānehi mohi surārī|| kahu nija nāma janaka kara bhāī| kehi nāteṃ māniai mitāī||

अंगद नाम बालि कर बेटा। तासों कबहुँ भई ही भेटा॥ अंगद बचन सुनत सकुचाना। रहा बालि बानर मैं जाना॥

aṃgada nāma bāli kara beṭā| tāsoṃ kabahum̐ bhaī hī bheṭā|| aṃgada bacana sunata sakucānā| rahā bāli bānara maiṃ jānā||

अंगद तहीं बालि कर बालक। उपजेहु बंस अनल कुल घालक॥ गर्भ न गयहु ब्यर्थ तुम्ह जायहु। निज मुख तापस दूत कहायहु॥

aṃgada tahīṃ bāli kara bālaka| upajehu baṃsa anala kula ghālaka|| garbha na gayahu byartha tumha jāyahu| nija mukha tāpasa dūta kahāyahu||

अब कहु कुसल बालि कहँ अहई। बिहँसि बचन तब अंगद कहई॥ दिन दस गएँ बालि पहिं जाई। बूझेहु कुसल सखा उर लाई॥

aba kahu kusala bāli kaham̐ ahaī| biham̐si bacana taba aṃgada kahaī|| dina dasa gaem̐ bāli pahiṃ jāī| būjhehu kusala sakhā ura lāī||

राम बिरोध कुसल जसि होई। सो सब तोहि सुनाइहि सोई॥ सुनु सठ भेद होइ मन ताकें। श्रीरघुबीर हृदय नहिं जाकें॥

rāma birodha kusala jasi hoī| so saba tohi sunāihi soī|| sunu saṭha bheda hoi mana tākeṃ| śrīraghubīra hṛdaya nahiṃ jākeṃ||

दोहा २१

हम कुल घालक सत्य तुम्ह कुल पालक दससीस। अंधउ बधिर न अस कहहिं नयन कान तव बीस ॥ २१॥

hama kula ghālaka satya tumha kula pālaka dasasīsa| aṃdhau badhira na asa kahahiṃ nayana kāna tava bīsa || 21||

सिव बिरंचि सुर मुनि समुदाई। चाहत जासु चरन सेवकाई॥ तासु दूत होइ हम कुल बोरा। अइसिहुँ मति उर बिहर न तोरा॥

siva biraṃci sura muni samudāī| cāhata jāsu carana sevakāī|| tāsu dūta hoi hama kula borā| aisihum̐ mati ura bihara na torā||

सुनि कठोर बानी कपि केरी। कहत दसानन नयन तरेरी॥ खल तव कठिन बचन सब सहऊँ। नीति धर्म मैं जानत अहऊँ॥

suni kaṭhora bānī kapi kerī| kahata dasānana nayana tarerī|| khala tava kaṭhina bacana saba sahaūm̐| nīti dharma maiṃ jānata ahaūm̐||

कह कपि धर्मसीलता तोरी। हमहुँ सुनी कृत पर त्रिय चोरी॥ देखी नयन दूत रखवारी। बूड़ि न मरहु धर्म ब्रतधारी॥

kaha kapi dharmasīlatā torī| hamahum̐ sunī kṛta para triya corī|| dekhī nayana dūta rakhavārī| būṛi na marahu dharma bratadhārī||

कान नाक बिनु भगिनि निहारी। छमा कीन्हि तुम्ह धर्म बिचारी॥ धर्मसीलता तव जग जागी। पावा दरसु हमहुँ बड़भागी॥

kāna nāka binu bhagini nihārī| chamā kīnhi tumha dharma bicārī|| dharmasīlatā tava jaga jāgī| pāvā darasu hamahum̐ baṛabhāgī||

दोहा २२(क)

जनि जल्पसि जड़ जंतु कपि सठ बिलोकु मम बाहु। लोकपाल बल बिपुल ससि ग्रसन हेतु सब राहु ॥ २२ (क)॥

jani jalpasi jaṛa jaṃtu kapi saṭha biloku mama bāhu| lokapāla bala bipula sasi grasana hetu saba rāhu || 22 (ka)||

दोहा

पुनि नभ सर मम कर निकर कमलन्हि पर करि बास।

puni nabha sara mama kara nikara kamalanhi para kari bāsa|

सोरठा २२(ख)

सोभत भयउ मराल इव संभु सहित कैलास ॥ २२ (ख)॥

sobhata bhayau marāla iva saṃbhu sahita kailāsa || 22 (kha)||

तुम्हरे कटक माझ सुनु अंगद। मो सन भिरिहि कवन जोधा बद॥ तव प्रभु नारि बिरहँ बलहीना। अनुज तासु दुख दुखी मलीना॥

tumhare kaṭaka mājha sunu aṃgada| mo sana bhirihi kavana jodhā bada|| tava prabhu nāri biraham̐ balahīnā| anuja tāsu dukha dukhī malīnā||

तुम्ह सुग्रीव कूलद्रुम दोऊ। अनुज हमार भीरु अति सोऊ॥ जामवंत मंत्री अति बूढ़ा। सो कि होइ अब समरारूढ़ा॥

tumha sugrīva kūladruma doū| anuja hamāra bhīru ati soū|| jāmavaṃta maṃtrī ati būṛhā| so ki hoi aba samarārūṛhā||

सिल्पि कर्म जानहिं नल नीला। है कपि एक महा बलसीला॥ आवा प्रथम नगरु जेंहिं जारा। सुनत बचन कह बालिकुमारा॥

silpi karma jānahiṃ nala nīlā| hai kapi eka mahā balasīlā|| āvā prathama nagaru jeṃhiṃ jārā| sunata bacana kaha bālikumārā||

सत्य बचन कहु निसिचर नाहा। साँचेहुँ कीस कीन्ह पुर दाहा॥ रावन नगर अल्प कपि दहई। सुनि अस बचन सत्य को कहई॥

satya bacana kahu nisicara nāhā| sām̐cehum̐ kīsa kīnha pura dāhā|| rāvana nagara alpa kapi dahaī| suni asa bacana satya ko kahaī||

जो अति सुभट सराहेहु रावन। सो सुग्रीव केर लघु धावन॥ चलइ बहुत सो बीर न होई। पठवा खबरि लेन हम सोई॥

jo ati subhaṭa sarāhehu rāvana| so sugrīva kera laghu dhāvana|| calai bahuta so bīra na hoī| paṭhavā khabari lena hama soī||

दोहा २३(क)

सत्य नगरु कपि जारेउ बिनु प्रभु आयसु पाइ। फिरि न गयउ सुग्रीव पहिं तेहिं भय रहा लुकाइ ॥ २३ (क)॥

satya nagaru kapi jāreu binu prabhu āyasu pāi| phiri na gayau sugrīva pahiṃ tehiṃ bhaya rahā lukāi || 23 (ka)||

दोहा २३(ख)

सत्य कहहि दसकंठ सब मोहि न सुनि कछु कोह। कोउ न हमारें कटक अस तो सन लरत जो सोह ॥ २३ (ख)॥

satya kahahi dasakaṃṭha saba mohi na suni kachu koha| kou na hamāreṃ kaṭaka asa to sana larata jo soha || 23 (kha)||

प्रीति बिरोध समान सन करिअ नीति असि आहि। जौं मृगपति बध मेड़ुकन्हि भल कि कहइ कोउ ताहि॥ २३ ( ग )॥

prīti birodha samāna sana karia nīti asi āhi| jauṃ mṛgapati badha meṛukanhi bhala ki kahai kou tāhi|| 23 ( ga )||

जद्यपि लघुता राम कहुँ तोहि बधें बड़ दोष। तदपि कठिन दसकंठ सुनु छत्र जाति कर रोष॥ २३ (घ)॥

jadyapi laghutā rāma kahum̐ tohi badheṃ baṛa doṣa| tadapi kaṭhina dasakaṃṭha sunu chatra jāti kara roṣa|| 23 (gha)||

बक्र उक्ति धनु बचन सर हृदय दहेउ रिपु कीस। प्रतिउत्तर सड़सिन्ह मनहुँ काढ़त भट दससीस॥ २३ ( ड)॥

bakra ukti dhanu bacana sara hṛdaya daheu ripu kīsa| pratiuttara saṛasinha manahum̐ kāṛhata bhaṭa dasasīsa|| 23 ( ḍa)||

हँसि बोलेउ दसमौलि तब कपि कर बड़ गुन एक। जो प्रतिपालइ तासु हित करइ उपाय अनेक॥ २३ (च )॥

ham̐si boleu dasamauli taba kapi kara baṛa guna eka| jo pratipālai tāsu hita karai upāya aneka|| 23 (ca )||

धन्य कीस जो निज प्रभु काजा। जहँ तहँ नाचइ परिहरि लाजा॥ नाचि कूदि करि लोग रिझाई। पति हित करइ धर्म निपुनाई॥

dhanya kīsa jo nija prabhu kājā| jaham̐ taham̐ nācai parihari lājā|| nāci kūdi kari loga rijhāī| pati hita karai dharma nipunāī||

अंगद स्वामिभक्त तव जाती। प्रभु गुन कस न कहसि एहि भाँती॥ मैं गुन गाहक परम सुजाना। तव कटु रटनि करउँ नहिं काना॥

aṃgada svāmibhakta tava jātī| prabhu guna kasa na kahasi ehi bhām̐tī|| maiṃ guna gāhaka parama sujānā| tava kaṭu raṭani karaum̐ nahiṃ kānā||

कह कपि तव गुन गाहकताई। सत्य पवनसुत मोहि सुनाई॥ बन बिधंसि सुत बधि पुर जारा। तदपि न तेहिं कछु कृत अपकारा॥

kaha kapi tava guna gāhakatāī| satya pavanasuta mohi sunāī|| bana bidhaṃsi suta badhi pura jārā| tadapi na tehiṃ kachu kṛta apakārā||

सोरठा ४

सोइ बिचारि तव प्रकृति सुहाई। दसकंधर मैं कीन्हि ढिठाई॥ देखेउँ आइ जो कछु कपि भाषा। तुम्हरें लाज न रोष न माखा॥

soi bicāri tava prakṛti suhāī| dasakaṃdhara maiṃ kīnhi ḍhiṭhāī|| dekheum̐ āi jo kachu kapi bhāṣā| tumhareṃ lāja na roṣa na mākhā||

जौं असि मति पितु खाए कीसा। कहि अस बचन हँसा दससीसा॥ पितहि खाइ खातेउँ पुनि तोही। अबहीं समुझि परा कछु मोही॥

jauṃ asi mati pitu khāe kīsā| kahi asa bacana ham̐sā dasasīsā|| pitahi khāi khāteum̐ puni tohī| abahīṃ samujhi parā kachu mohī||

बालि बिमल जस भाजन जानी। हतउँ न तोहि अधम अभिमानी॥ कहु रावन रावन जग केते। मैं निज श्रवन सुने सुनु जेते॥

bāli bimala jasa bhājana jānī| hataum̐ na tohi adhama abhimānī|| kahu rāvana rāvana jaga kete| maiṃ nija śravana sune sunu jete||

बलिहि जितन एक गयउ पताला। राखेउ बाँधि सिसुन्ह हयसाला॥ खेलहिं बालक मारहिं जाई। दया लागि बलि दीन्ह छोड़ाई॥

balihi jitana eka gayau patālā| rākheu bām̐dhi sisunha hayasālā|| khelahiṃ bālaka mārahiṃ jāī| dayā lāgi bali dīnha choṛāī||

एक बहोरि सहसभुज देखा। धाइ धरा जिमि जंतु बिसेषा॥ कौतुक लागि भवन लै आवा। सो पुलस्ति मुनि जाइ छोड़ावा॥

eka bahori sahasabhuja dekhā| dhāi dharā jimi jaṃtu biseṣā|| kautuka lāgi bhavana lai āvā| so pulasti muni jāi choṛāvā||

दोहा २४

एक कहत मोहि सकुच अति रहा बालि की काँख। इन्ह महुँ रावन तैं कवन सत्य बदहि तजि माख ॥ २४॥

eka kahata mohi sakuca ati rahā bāli kī kām̐kha| inha mahum̐ rāvana taiṃ kavana satya badahi taji mākha || 24||

सुनु सठ सोइ रावन बलसीला। हरगिरि जान जासु भुज लीला॥ जान उमापति जासु सुराई। पूजेउँ जेहि सिर सुमन चढ़ाई॥

sunu saṭha soi rāvana balasīlā| haragiri jāna jāsu bhuja līlā|| jāna umāpati jāsu surāī| pūjeum̐ jehi sira sumana caṛhāī||

सिर सरोज निज करन्हि उतारी। पूजेउँ अमित बार त्रिपुरारी॥ भुज बिक्रम जानहिं दिगपाला। सठ अजहूँ जिन्ह कें उर साला॥

sira saroja nija karanhi utārī| pūjeum̐ amita bāra tripurārī|| bhuja bikrama jānahiṃ digapālā| saṭha ajahūm̐ jinha keṃ ura sālā||

जानहिं दिग्गज उर कठिनाई। जब जब भिरउँ जाइ बरिआई॥ जिन्ह के दसन कराल न फूटे। उर लागत मूलक इव टूटे॥

jānahiṃ diggaja ura kaṭhināī| jaba jaba bhiraum̐ jāi bariāī|| jinha ke dasana karāla na phūṭe| ura lāgata mūlaka iva ṭūṭe||

जासु चलत डोलति इमि धरनी। चढ़त मत्त गज जिमि लघु तरनी॥

jāsu calata ḍolati imi dharanī| caṛhata matta gaja jimi laghu taranī||

सोरठा ४

सोइ रावन जग बिदित प्रतापी। सुनेहि न श्रवन अलीक प्रलापी॥

soi rāvana jaga bidita pratāpī| sunehi na śravana alīka pralāpī||

दोहा २५

तेहि रावन कहँ लघु कहसि नर कर करसि बखान। रे कपि बर्बर खर्ब खल अब जाना तव ग्यान ॥ २५॥

tehi rāvana kaham̐ laghu kahasi nara kara karasi bakhāna| re kapi barbara kharba khala aba jānā tava gyāna || 25||

सुनि अंगद सकोप कह बानी। बोलु सँभारि अधम अभिमानी॥ सहसबाहु भुज गहन अपारा। दहन अनल सम जासु कुठारा॥

suni aṃgada sakopa kaha bānī| bolu sam̐bhāri adhama abhimānī|| sahasabāhu bhuja gahana apārā| dahana anala sama jāsu kuṭhārā||

जासु परसु सागर खर धारा। बूड़े नृप अगनित बहु बारा॥ तासु गर्ब जेहि देखत भागा। सो नर क्यों दससीस अभागा॥

jāsu parasu sāgara khara dhārā| būṛe nṛpa aganita bahu bārā|| tāsu garba jehi dekhata bhāgā| so nara kyoṃ dasasīsa abhāgā||

राम मनुज कस रे सठ बंगा। धन्वी कामु नदी पुनि गंगा॥ पसु सुरधेनु कल्पतरु रूखा। अन्न दान अरु रस पीयूषा॥

rāma manuja kasa re saṭha baṃgā| dhanvī kāmu nadī puni gaṃgā|| pasu suradhenu kalpataru rūkhā| anna dāna aru rasa pīyūṣā||

बैनतेय खग अहि सहसानन। चिंतामनि पुनि उपल दसानन॥ सुनु मतिमंद लोक बैकुंठा। लाभ कि रघुपति भगति अकुंठा॥

bainateya khaga ahi sahasānana| ciṃtāmani puni upala dasānana|| sunu matimaṃda loka baikuṃṭhā| lābha ki raghupati bhagati akuṃṭhā||

दोहा २६

सेन सहित तब मान मथि बन उजारि पुर जारि। कस रे सठ हनुमान कपि गयउ जो तव सुत मारि ॥ २६॥

sena sahita taba māna mathi bana ujāri pura jāri| kasa re saṭha hanumāna kapi gayau jo tava suta māri || 26||