बालकाण्ड

बालकाण्ड · दोहा २३४–२४९

साझा करें

धरि धीरजु एक आलि सयानी। सीता सन बोली गहि पानी॥ बहुरि गौरि कर ध्यान करेहू। भूपकिसोर देखि किन लेहू॥

dhari dhīraju eka āli sayānī| sītā sana bolī gahi pānī|| bahuri gauri kara dhyāna karehū| bhūpakisora dekhi kina lehū||

सकुचि सीयँ तब नयन उघारे। सनमुख दोउ रघुसिंघ निहारे॥ नख सिख देखि राम कै सोभा। सुमिरि पिता पनु मनु अति छोभा॥

sakuci sīyam̐ taba nayana ughāre| sanamukha dou raghusiṃgha nihāre|| nakha sikha dekhi rāma kai sobhā| sumiri pitā panu manu ati chobhā||

परबस सखिन्ह लखी जब सीता। भयउ गहरु सब कहहि सभीता॥ पुनि आउब एहि बेरिआँ काली। अस कहि मन बिहसी एक आली॥

parabasa sakhinha lakhī jaba sītā| bhayau gaharu saba kahahi sabhītā|| puni āuba ehi beriām̐ kālī| asa kahi mana bihasī eka ālī||

गूढ़ गिरा सुनि सिय सकुचानी। भयउ बिलंबु मातु भय मानी॥ धरि बड़ि धीर रामु उर आने। फिरि अपनपउ पितुबस जाने॥

gūṛha girā suni siya sakucānī| bhayau bilaṃbu mātu bhaya mānī|| dhari baṛi dhīra rāmu ura āne| phiri apanapau pitubasa jāne||

दोहा २३४

देखन मिस मृग बिहग तरु फिरइ बहोरि बहोरि। निरखि निरखि रघुबीर छबि बाढ़इ प्रीति न थोरि ॥ २३४॥

dekhana misa mṛga bihaga taru phirai bahori bahori| nirakhi nirakhi raghubīra chabi bāṛhai prīti na thori || 234||

जानि कठिन सिवचाप बिसूरति। चली राखि उर स्यामल मूरति॥ प्रभु जब जात जानकी जानी। सुख सनेह सोभा गुन खानी॥

jāni kaṭhina sivacāpa bisūrati| calī rākhi ura syāmala mūrati|| prabhu jaba jāta jānakī jānī| sukha saneha sobhā guna khānī||

परम प्रेममय मृदु मसि कीन्ही। चारु चित भीतीं लिख लीन्ही॥ गई भवानी भवन बहोरी। बंदि चरन बोली कर जोरी॥

parama premamaya mṛdu masi kīnhī| cāru cita bhītīṃ likha līnhī|| gaī bhavānī bhavana bahorī| baṃdi carana bolī kara jorī||

जय जय गिरिबरराज किसोरी। जय महेस मुख चंद चकोरी॥ जय गज बदन षड़ानन माता। जगत जननि दामिनि दुति गाता॥

jaya jaya giribararāja kisorī| jaya mahesa mukha caṃda cakorī|| jaya gaja badana ṣaṛānana mātā| jagata janani dāmini duti gātā||

नहिं तव आदि मध्य अवसाना। अमित प्रभाउ बेदु नहिं जाना॥ भव भव बिभव पराभव कारिनि। बिस्व बिमोहनि स्वबस बिहारिनि॥

nahiṃ tava ādi madhya avasānā| amita prabhāu bedu nahiṃ jānā|| bhava bhava bibhava parābhava kārini| bisva bimohani svabasa bihārini||

दोहा २३५

पतिदेवता सुतीय महुँ मातु प्रथम तव रेख। महिमा अमित न सकहिं कहि सहस सारदा सेष ॥ २३५॥

patidevatā sutīya mahum̐ mātu prathama tava rekha| mahimā amita na sakahiṃ kahi sahasa sāradā seṣa || 235||

सेवत तोहि सुलभ फल चारी। बरदायनी पुरारि पिआरी॥ देबि पूजि पद कमल तुम्हारे। सुर नर मुनि सब होहिं सुखारे॥

sevata tohi sulabha phala cārī| baradāyanī purāri piārī|| debi pūji pada kamala tumhāre| sura nara muni saba hohiṃ sukhāre||

मोर मनोरथु जानहु नीकें। बसहु सदा उर पुर सबही कें॥ कीन्हेउँ प्रगट न कारन तेहीं। अस कहि चरन गहे बैदेहीं॥

mora manorathu jānahu nīkeṃ| basahu sadā ura pura sabahī keṃ|| kīnheum̐ pragaṭa na kārana tehīṃ| asa kahi carana gahe baidehīṃ||

बिनय प्रेम बस भई भवानी। खसी माल मूरति मुसुकानी॥ सादर सियँ प्रसादु सिर धरेऊ। बोली गौरि हरषु हियँ भरेऊ॥

binaya prema basa bhaī bhavānī| khasī māla mūrati musukānī|| sādara siyam̐ prasādu sira dhareū| bolī gauri haraṣu hiyam̐ bhareū||

सुनु सिय सत्य असीस हमारी। पूजिहि मन कामना तुम्हारी॥ नारद बचन सदा सुचि साचा। सो बरु मिलिहि जाहिं मनु राचा॥

sunu siya satya asīsa hamārī| pūjihi mana kāmanā tumhārī|| nārada bacana sadā suci sācā| so baru milihi jāhiṃ manu rācā||

छंद

मनु जाहिं राचेउ मिलिहि सो बरु सहज सुंदर साँवरो। करुना निधान सुजान सीलु सनेहु जानत रावरो॥ एहि भाँति गौरि असीस सुनि सिय सहित हियें हरषीं अली। तुलसी भवानिहि पूजि पुनि पुनि मुदित मन मंदिर चली॥

manu jāhiṃ rāceu milihi so baru sahaja suṃdara sām̐varo| karunā nidhāna sujāna sīlu sanehu jānata rāvaro|| ehi bhām̐ti gauri asīsa suni siya sahita hiyeṃ haraṣīṃ alī| tulasī bhavānihi pūji puni puni mudita mana maṃdira calī||

सोरठा २३६

जानि गौरि अनुकूल सिय हिय हरषु न जाइ कहि। मंजुल मंगल मूल बाम अंग फरकन लगे ॥ २३६॥

jāni gauri anukūla siya hiya haraṣu na jāi kahi| maṃjula maṃgala mūla bāma aṃga pharakana lage || 236||

हृदयँ सराहत सीय लोनाई। गुर समीप गवने दोउ भाई॥ राम कहा सबु कौसिक पाहीं। सरल सुभाउ छुअत छल नाहीं॥

hṛdayam̐ sarāhata sīya lonāī| gura samīpa gavane dou bhāī|| rāma kahā sabu kausika pāhīṃ| sarala subhāu chuata chala nāhīṃ||

सुमन पाइ मुनि पूजा कीन्ही। पुनि असीस दुहु भाइन्ह दीन्ही॥ सुफल मनोरथ होहुँ तुम्हारे। रामु लखनु सुनि भए सुखारे॥

sumana pāi muni pūjā kīnhī| puni asīsa duhu bhāinha dīnhī|| suphala manoratha hohum̐ tumhāre| rāmu lakhanu suni bhae sukhāre||

करि भोजनु मुनिबर बिग्यानी। लगे कहन कछु कथा पुरानी॥ बिगत दिवसु गुरु आयसु पाई। संध्या करन चले दोउ भाई॥

kari bhojanu munibara bigyānī| lage kahana kachu kathā purānī|| bigata divasu guru āyasu pāī| saṃdhyā karana cale dou bhāī||

प्राची दिसि ससि उयउ सुहावा। सिय मुख सरिस देखि सुखु पावा॥ बहुरि बिचारु कीन्ह मन माहीं। सीय बदन सम हिमकर नाहीं॥

prācī disi sasi uyau suhāvā| siya mukha sarisa dekhi sukhu pāvā|| bahuri bicāru kīnha mana māhīṃ| sīya badana sama himakara nāhīṃ||

दोहा २३७

जनमु सिंधु पुनि बंधु बिषु दिन मलीन सकलंक। सिय मुख समता पाव किमि चंदु बापुरो रंक ॥ २३७॥

janamu siṃdhu puni baṃdhu biṣu dina malīna sakalaṃka| siya mukha samatā pāva kimi caṃdu bāpuro raṃka || 237||

घटइ बढ़इ बिरहनि दुखदाई। ग्रसइ राहु निज संधिहिं पाई॥ कोक सिकप्रद पंकज द्रोही। अवगुन बहुत चंद्रमा तोही॥

ghaṭai baṛhai birahani dukhadāī| grasai rāhu nija saṃdhihiṃ pāī|| koka sikaprada paṃkaja drohī| avaguna bahuta caṃdramā tohī||

बैदेही मुख पटतर दीन्हे। होइ दोष बड़ अनुचित कीन्हे॥ सिय मुख छबि बिधु ब्याज बखानी। गुरु पहिं चले निसा बड़ि जानी॥

baidehī mukha paṭatara dīnhe| hoi doṣa baṛa anucita kīnhe|| siya mukha chabi bidhu byāja bakhānī| guru pahiṃ cale nisā baṛi jānī||

करि मुनि चरन सरोज प्रनामा। आयसु पाइ कीन्ह बिश्रामा॥ बिगत निसा रघुनायक जागे। बंधु बिलोकि कहन अस लागे॥

kari muni carana saroja pranāmā| āyasu pāi kīnha biśrāmā|| bigata nisā raghunāyaka jāge| baṃdhu biloki kahana asa lāge||

उदउ अरुन अवलोकहु ताता। पंकज कोक लोक सुखदाता॥ बोले लखनु जोरि जुग पानी। प्रभु प्रभाउ सूचक मृदु बानी॥

udau aruna avalokahu tātā| paṃkaja koka loka sukhadātā|| bole lakhanu jori juga pānī| prabhu prabhāu sūcaka mṛdu bānī||

दोहा २३८

अरुनोदयँ सकुचे कुमुद उडगन जोति मलीन। जिमि तुम्हार आगमन सुनि भए नृपति बलहीन ॥ २३८॥

arunodayam̐ sakuce kumuda uḍagana joti malīna| jimi tumhāra āgamana suni bhae nṛpati balahīna || 238||

नृप सब नखत करहिं उजिआरी। टारि न सकहिं चाप तम भारी॥ कमल कोक मधुकर खग नाना। हरषे सकल निसा अवसाना॥

nṛpa saba nakhata karahiṃ ujiārī| ṭāri na sakahiṃ cāpa tama bhārī|| kamala koka madhukara khaga nānā| haraṣe sakala nisā avasānā||

ऐसेहिं प्रभु सब भगत तुम्हारे। होइहहिं टूटें धनुष सुखारे॥ उयउ भानु बिनु श्रम तम नासा। दुरे नखत जग तेजु प्रकासा॥

aisehiṃ prabhu saba bhagata tumhāre| hoihahiṃ ṭūṭeṃ dhanuṣa sukhāre|| uyau bhānu binu śrama tama nāsā| dure nakhata jaga teju prakāsā||

रबि निज उदय ब्याज रघुराया। प्रभु प्रतापु सब नृपन्ह दिखाया॥ तव भुज बल महिमा उदघाटी। प्रगटी धनु बिघटन परिपाटी॥

rabi nija udaya byāja raghurāyā| prabhu pratāpu saba nṛpanha dikhāyā|| tava bhuja bala mahimā udaghāṭī| pragaṭī dhanu bighaṭana paripāṭī||

बंधु बचन सुनि प्रभु मुसुकाने। होइ सुचि सहज पुनीत नहाने॥ नित्यक्रिया करि गुरु पहिं आए। चरन सरोज सुभग सिर नाए॥

baṃdhu bacana suni prabhu musukāne| hoi suci sahaja punīta nahāne|| nityakriyā kari guru pahiṃ āe| carana saroja subhaga sira nāe||

सतानंदु तब जनक बोलाए। कौसिक मुनि पहिं तुरत पठाए॥ जनक बिनय तिन्ह आइ सुनाई। हरषे बोलि लिए दोउ भाई॥

satānaṃdu taba janaka bolāe| kausika muni pahiṃ turata paṭhāe|| janaka binaya tinha āi sunāī| haraṣe boli lie dou bhāī||

दोहा २३९

सतानंदपद बंदि प्रभु बैठे गुर पहिं जाइ। चलहु तात मुनि कहेउ तब पठवा जनक बोलाइ ॥ २३९॥

satānaṃdapada baṃdi prabhu baiṭhe gura pahiṃ jāi| calahu tāta muni kaheu taba paṭhavā janaka bolāi || 239||

सीय स्वयंबरु देखिअ जाई। ईसु काहि धौं देइ बड़ाई॥ लखन कहा जस भाजनु सोई। नाथ कृपा तव जापर होई॥

sīya svayaṃbaru dekhia jāī| īsu kāhi dhauṃ dei baṛāī|| lakhana kahā jasa bhājanu soī| nātha kṛpā tava jāpara hoī||

हरषे मुनि सब सुनि बर बानी। दीन्हि असीस सबहिं सुखु मानी॥ पुनि मुनिबृंद समेत कृपाला। देखन चले धनुषमख साला॥

haraṣe muni saba suni bara bānī| dīnhi asīsa sabahiṃ sukhu mānī|| puni munibṛṃda sameta kṛpālā| dekhana cale dhanuṣamakha sālā||

रंगभूमि आए दोउ भाई। असि सुधि सब पुरबासिन्ह पाई॥ चले सकल गृह काज बिसारी। बाल जुबान जरठ नर नारी॥

raṃgabhūmi āe dou bhāī| asi sudhi saba purabāsinha pāī|| cale sakala gṛha kāja bisārī| bāla jubāna jaraṭha nara nārī||

देखी जनक भीर भै भारी। सुचि सेवक सब लिए हँकारी॥ तुरत सकल लोगन्ह पहिं जाहू। आसन उचित देहू सब काहू॥

dekhī janaka bhīra bhai bhārī| suci sevaka saba lie ham̐kārī|| turata sakala loganha pahiṃ jāhū| āsana ucita dehū saba kāhū||

दोहा २४०

कहि मृदु बचन बिनीत तिन्ह बैठारे नर नारि। उत्तम मध्यम नीच लघु निज निज थल अनुहारि ॥ २४०॥

kahi mṛdu bacana binīta tinha baiṭhāre nara nāri| uttama madhyama nīca laghu nija nija thala anuhāri || 240||

राजकुअँर तेहि अवसर आए। मनहुँ मनोहरता तन छाए॥ गुन सागर नागर बर बीरा। सुंदर स्यामल गौर सरीरा॥

rājakuam̐ra tehi avasara āe| manahum̐ manoharatā tana chāe|| guna sāgara nāgara bara bīrā| suṃdara syāmala gaura sarīrā||

राज समाज बिराजत रूरे। उडगन महुँ जनु जुग बिधु पूरे॥ जिन्ह कें रही भावना जैसी। प्रभु मूरति तिन्ह देखी तैसी॥

rāja samāja birājata rūre| uḍagana mahum̐ janu juga bidhu pūre|| jinha keṃ rahī bhāvanā jaisī| prabhu mūrati tinha dekhī taisī||

देखहिं रूप महा रनधीरा। मनहुँ बीर रसु धरें सरीरा॥ डरे कुटिल नृप प्रभुहि निहारी। मनहुँ भयानक मूरति भारी॥

dekhahiṃ rūpa mahā ranadhīrā| manahum̐ bīra rasu dhareṃ sarīrā|| ḍare kuṭila nṛpa prabhuhi nihārī| manahum̐ bhayānaka mūrati bhārī||

रहे असुर छल छोनिप बेषा। तिन्ह प्रभु प्रगट कालसम देखा॥ पुरबासिन्ह देखे दोउ भाई। नरभूषन लोचन सुखदाई॥

rahe asura chala chonipa beṣā| tinha prabhu pragaṭa kālasama dekhā|| purabāsinha dekhe dou bhāī| narabhūṣana locana sukhadāī||

दोहा २४१

नारि बिलोकहिं हरषि हियँ निज निज रुचि अनुरूप। जनु सोहत सिंगार धरि मूरति परम अनूप ॥ २४१॥

nāri bilokahiṃ haraṣi hiyam̐ nija nija ruci anurūpa| janu sohata siṃgāra dhari mūrati parama anūpa || 241||

बिदुषन्ह प्रभु बिराटमय दीसा। बहु मुख कर पग लोचन सीसा॥ जनक जाति अवलोकहिं कैसैं। सजन सगे प्रिय लागहिं जैसें॥

biduṣanha prabhu birāṭamaya dīsā| bahu mukha kara paga locana sīsā|| janaka jāti avalokahiṃ kaisaiṃ| sajana sage priya lāgahiṃ jaiseṃ||

सहित बिदेह बिलोकहिं रानी। सिसु सम प्रीति न जाति बखानी॥ जोगिन्ह परम तत्वमय भासा। सांत सुद्ध सम सहज प्रकासा॥

sahita bideha bilokahiṃ rānī| sisu sama prīti na jāti bakhānī|| joginha parama tatvamaya bhāsā| sāṃta suddha sama sahaja prakāsā||

हरिभगतन्ह देखे दोउ भ्राता। इष्टदेव इव सब सुख दाता॥ रामहि चितव भायँ जेहि सीया। सो सनेहु सुखु नहिं कथनीया॥

haribhagatanha dekhe dou bhrātā| iṣṭadeva iva saba sukha dātā|| rāmahi citava bhāyam̐ jehi sīyā| so sanehu sukhu nahiṃ kathanīyā||

उर अनुभवति न कहि सक सोऊ। कवन प्रकार कहै कबि कोऊ॥ एहि बिधि रहा जाहि जस भाऊ। तेहिं तस देखेउ कोसलराऊ॥

ura anubhavati na kahi saka soū| kavana prakāra kahai kabi koū|| ehi bidhi rahā jāhi jasa bhāū| tehiṃ tasa dekheu kosalarāū||

दोहा २४२

राजत राज समाज महुँ कोसलराज किसोर। सुंदर स्यामल गौर तन बिस्व बिलोचन चोर ॥ २४२॥

rājata rāja samāja mahum̐ kosalarāja kisora| suṃdara syāmala gaura tana bisva bilocana cora || 242||

सहज मनोहर मूरति दोऊ। कोटि काम उपमा लघु सोऊ॥ सरद चंद निंदक मुख नीके। नीरज नयन भावते जी के॥

sahaja manohara mūrati doū| koṭi kāma upamā laghu soū|| sarada caṃda niṃdaka mukha nīke| nīraja nayana bhāvate jī ke||

चितवत चारु मार मनु हरनी। भावति हृदय जाति नहीं बरनी॥ कल कपोल श्रुति कुंडल लोला। चिबुक अधर सुंदर मृदु बोला॥

citavata cāru māra manu haranī| bhāvati hṛdaya jāti nahīṃ baranī|| kala kapola śruti kuṃḍala lolā| cibuka adhara suṃdara mṛdu bolā||

कुमुदबंधु कर निंदक हाँसा। भृकुटी बिकट मनोहर नासा॥ भाल बिसाल तिलक झलकाहीं। कच बिलोकि अलि अवलि लजाहीं॥

kumudabaṃdhu kara niṃdaka hām̐sā| bhṛkuṭī bikaṭa manohara nāsā|| bhāla bisāla tilaka jhalakāhīṃ| kaca biloki ali avali lajāhīṃ||

पीत चौतनीं सिरन्हि सुहाई। कुसुम कलीं बिच बीच बनाईं॥ रेखें रुचिर कंबु कल गीवाँ। जनु त्रिभुवन सुषमा की सीवाँ॥

pīta cautanīṃ siranhi suhāī| kusuma kalīṃ bica bīca banāīṃ|| rekheṃ rucira kaṃbu kala gīvām̐| janu tribhuvana suṣamā kī sīvām̐||

दोहा २४३

कुंजर मनि कंठा कलित उरन्हि तुलसिका माल। बृषभ कंध केहरि ठवनि बल निधि बाहु बिसाल ॥ २४३॥

kuṃjara mani kaṃṭhā kalita uranhi tulasikā māla| bṛṣabha kaṃdha kehari ṭhavani bala nidhi bāhu bisāla || 243||

कटि तूनीर पीत पट बाँधे। कर सर धनुष बाम बर काँधे॥ पीत जग्य उपबीत सुहाए। नख सिख मंजु महाछबि छाए॥

kaṭi tūnīra pīta paṭa bām̐dhe| kara sara dhanuṣa bāma bara kām̐dhe|| pīta jagya upabīta suhāe| nakha sikha maṃju mahāchabi chāe||

देखि लोग सब भए सुखारे। एकटक लोचन चलत न तारे॥ हरषे जनकु देखि दोउ भाई। मुनि पद कमल गहे तब जाई॥

dekhi loga saba bhae sukhāre| ekaṭaka locana calata na tāre|| haraṣe janaku dekhi dou bhāī| muni pada kamala gahe taba jāī||

करि बिनती निज कथा सुनाई। रंग अवनि सब मुनिहि देखाई॥ जहँ जहँ जाहि कुअँर बर दोऊ। तहँ तहँ चकित चितव सबु कोऊ॥

kari binatī nija kathā sunāī| raṃga avani saba munihi dekhāī|| jaham̐ jaham̐ jāhi kuam̐ra bara doū| taham̐ taham̐ cakita citava sabu koū||

निज निज रुख रामहि सबु देखा। कोउ न जान कछु मरमु बिसेषा॥ भलि रचना मुनि नृप सन कहेऊ। राजाँ मुदित महासुख लहेऊ॥

nija nija rukha rāmahi sabu dekhā| kou na jāna kachu maramu biseṣā|| bhali racanā muni nṛpa sana kaheū| rājām̐ mudita mahāsukha laheū||

दोहा २४४

सब मंचन्ह ते मंचु एक सुंदर बिसद बिसाल। मुनि समेत दोउ बंधु तहँ बैठारे महिपाल ॥ २४४॥

saba maṃcanha te maṃcu eka suṃdara bisada bisāla| muni sameta dou baṃdhu taham̐ baiṭhāre mahipāla || 244||

प्रभुहि देखि सब नृप हिंयँ हारे। जनु राकेस उदय भएँ तारे॥ असि प्रतीति सब के मन माहीं। राम चाप तोरब सक नाहीं॥

prabhuhi dekhi saba nṛpa hiṃyam̐ hāre| janu rākesa udaya bhaem̐ tāre|| asi pratīti saba ke mana māhīṃ| rāma cāpa toraba saka nāhīṃ||

बिनु भंजेहुँ भव धनुषु बिसाला। मेलिहि सीय राम उर माला॥ अस बिचारि गवनहु घर भाई। जसु प्रतापु बलु तेजु गवाँई॥

binu bhaṃjehum̐ bhava dhanuṣu bisālā| melihi sīya rāma ura mālā|| asa bicāri gavanahu ghara bhāī| jasu pratāpu balu teju gavām̐ī||

बिहसे अपर भूप सुनि बानी। जे अबिबेक अंध अभिमानी॥ तोरेहुँ धनुषु ब्याहु अवगाहा। बिनु तोरें को कुअँरि बिआहा॥

bihase apara bhūpa suni bānī| je abibeka aṃdha abhimānī|| torehum̐ dhanuṣu byāhu avagāhā| binu toreṃ ko kuam̐ri biāhā||

एक बार कालउ किन होऊ। सिय हित समर जितब हम सोऊ॥ यह सुनि अवर महिप मुसकाने। धरमसील हरिभगत सयाने॥

eka bāra kālau kina hoū| siya hita samara jitaba hama soū|| yaha suni avara mahipa musakāne| dharamasīla haribhagata sayāne||

सोरठा २४५

सीय बिआहबि राम गरब दूरि करि नृपन्ह के। जीति को सक संग्राम दसरथ के रन बाँकुरे ॥ २४५॥

sīya biāhabi rāma garaba dūri kari nṛpanha ke| jīti ko saka saṃgrāma dasaratha ke rana bām̐kure || 245||

ब्यर्थ मरहु जनि गाल बजाई। मन मोदकन्हि कि भूख बुताई॥ सिख हमारि सुनि परम पुनीता। जगदंबा जानहु जियँ सीता॥

byartha marahu jani gāla bajāī| mana modakanhi ki bhūkha butāī|| sikha hamāri suni parama punītā| jagadaṃbā jānahu jiyam̐ sītā||

जगत पिता रघुपतिहि बिचारी। भरि लोचन छबि लेहु निहारी॥ सुंदर सुखद सकल गुन रासी। ए दोउ बंधु संभु उर बासी॥

jagata pitā raghupatihi bicārī| bhari locana chabi lehu nihārī|| suṃdara sukhada sakala guna rāsī| e dou baṃdhu saṃbhu ura bāsī||

सुधा समुद्र समीप बिहाई। मृगजलु निरखि मरहु कत धाई॥ करहु जाइ जा कहुँ जोई भावा। हम तौ आजु जनम फलु पावा॥

sudhā samudra samīpa bihāī| mṛgajalu nirakhi marahu kata dhāī|| karahu jāi jā kahum̐ joī bhāvā| hama tau āju janama phalu pāvā||

अस कहि भले भूप अनुरागे। रूप अनूप बिलोकन लागे॥ देखहिं सुर नभ चढ़े बिमाना। बरषहिं सुमन करहिं कल गाना॥

asa kahi bhale bhūpa anurāge| rūpa anūpa bilokana lāge|| dekhahiṃ sura nabha caṛhe bimānā| baraṣahiṃ sumana karahiṃ kala gānā||

दोहा २४६

जानि सुअवसरु सीय तब पठई जनक बोलाई। चतुर सखीं सुंदर सकल सादर चलीं लवाईं ॥ २४६॥

jāni suavasaru sīya taba paṭhaī janaka bolāī| catura sakhīṃ suṃdara sakala sādara calīṃ lavāīṃ || 246||

सिय सोभा नहिं जाइ बखानी। जगदंबिका रूप गुन खानी॥ उपमा सकल मोहि लघु लागीं। प्राकृत नारि अंग अनुरागीं॥

siya sobhā nahiṃ jāi bakhānī| jagadaṃbikā rūpa guna khānī|| upamā sakala mohi laghu lāgīṃ| prākṛta nāri aṃga anurāgīṃ||

सिय बरनिअ तेइ उपमा देई। कुकबि कहाइ अजसु को लेई॥ जौ पटतरिअ तीय सम सीया। जग असि जुबति कहाँ कमनीया॥

siya barania tei upamā deī| kukabi kahāi ajasu ko leī|| jau paṭataria tīya sama sīyā| jaga asi jubati kahām̐ kamanīyā||

गिरा मुखर तन अरध भवानी। रति अति दुखित अतनु पति जानी॥ बिष बारुनी बंधु प्रिय जेही। कहिअ रमासम किमि बैदेही॥

girā mukhara tana aradha bhavānī| rati ati dukhita atanu pati jānī|| biṣa bārunī baṃdhu priya jehī| kahia ramāsama kimi baidehī||

जौ छबि सुधा पयोनिधि होई। परम रूपमय कच्छप सोई॥

jau chabi sudhā payonidhi hoī| parama rūpamaya kacchapa soī||

सोरठा ४

सोभा रजु मंदरु सिंगारू। मथै पानि पंकज निज मारू॥

sobhā raju maṃdaru siṃgārū| mathai pāni paṃkaja nija mārū||

दोहा २४७

एहि बिधि उपजै लच्छि जब सुंदरता सुख मूल। तदपि सकोच समेत कबि कहहिं सीय समतूल ॥ २४७॥

ehi bidhi upajai lacchi jaba suṃdaratā sukha mūla| tadapi sakoca sameta kabi kahahiṃ sīya samatūla || 247||

चलिं संग लै सखीं सयानी। गावत गीत मनोहर बानी॥

caliṃ saṃga lai sakhīṃ sayānī| gāvata gīta manohara bānī||

सोरठा १

सोह नवल तनु सुंदर सारी। जगत जननि अतुलित छबि भारी॥

soha navala tanu suṃdara sārī| jagata janani atulita chabi bhārī||

भूषन सकल सुदेस सुहाए। अंग अंग रचि सखिन्ह बनाए॥ रंगभूमि जब सिय पगु धारी। देखि रूप मोहे नर नारी॥

bhūṣana sakala sudesa suhāe| aṃga aṃga raci sakhinha banāe|| raṃgabhūmi jaba siya pagu dhārī| dekhi rūpa mohe nara nārī||

हरषि सुरन्ह दुंदुभीं बजाई। बरषि प्रसून अपछरा गाई॥ पानि सरोज सोह जयमाला। अवचट चितए सकल भुआला॥

haraṣi suranha duṃdubhīṃ bajāī| baraṣi prasūna apacharā gāī|| pāni saroja soha jayamālā| avacaṭa citae sakala bhuālā||

सीय चकित चित रामहि चाहा। भए मोहबस सब नरनाहा॥ मुनि समीप देखे दोउ भाई। लगे ललकि लोचन निधि पाई॥

sīya cakita cita rāmahi cāhā| bhae mohabasa saba naranāhā|| muni samīpa dekhe dou bhāī| lage lalaki locana nidhi pāī||

दोहा २४८

गुरजन लाज समाजु बड़ देखि सीय सकुचानि। लागि बिलोकन सखिन्ह तन रघुबीरहि उर आनि ॥ २४८॥

gurajana lāja samāju baṛa dekhi sīya sakucāni| lāgi bilokana sakhinha tana raghubīrahi ura āni || 248||

राम रूपु अरु सिय छबि देखें। नर नारिन्ह परिहरीं निमेषें॥

rāma rūpu aru siya chabi dekheṃ| nara nārinha pariharīṃ nimeṣeṃ||

सोरठा १

सोचहिं सकल कहत सकुचाहीं। बिधि सन बिनय करहिं मन माहीं॥

socahiṃ sakala kahata sakucāhīṃ| bidhi sana binaya karahiṃ mana māhīṃ||

हरु बिधि बेगि जनक जड़ताई। मति हमारि असि देहि सुहाई॥ बिनु बिचार पनु तजि नरनाहु। सीय राम कर करै बिबाहू॥

haru bidhi begi janaka jaṛatāī| mati hamāri asi dehi suhāī|| binu bicāra panu taji naranāhu| sīya rāma kara karai bibāhū||

जग भल कहहि भाव सब काहू। हठ कीन्हे अंतहुँ उर दाहू॥ एहिं लालसाँ मगन सब लोगू। बरु साँवरो जानकी जोगू॥

jaga bhala kahahi bhāva saba kāhū| haṭha kīnhe aṃtahum̐ ura dāhū|| ehiṃ lālasām̐ magana saba logū| baru sām̐varo jānakī jogū||

तब बंदीजन जनक बौलाए। बिरिदावली कहत चलि आए॥ कह नृप जाइ कहहु पन मोरा। चले भाट हियँ हरषु न थोरा॥

taba baṃdījana janaka baulāe| biridāvalī kahata cali āe|| kaha nṛpa jāi kahahu pana morā| cale bhāṭa hiyam̐ haraṣu na thorā||

दोहा २४९

बोले बंदी बचन बर सुनहु सकल महिपाल। पन बिदेह कर कहहिं हम भुजा उठाइ बिसाल ॥ २४९॥

bole baṃdī bacana bara sunahu sakala mahipāla| pana bideha kara kahahiṃ hama bhujā uṭhāi bisāla || 249||

नृप भुजबल बिधु सिवधनु राहू। गरुअ कठोर बिदित सब काहू॥ रावनु बानु महाभट भारे। देखि सरासन गवँहिं सिधारे॥

nṛpa bhujabala bidhu sivadhanu rāhū| garua kaṭhora bidita saba kāhū|| rāvanu bānu mahābhaṭa bhāre| dekhi sarāsana gavam̐hiṃ sidhāre||

सोरठा २

सोइ पुरारि कोदंडु कठोरा। राज समाज आजु जोइ तोरा॥ त्रिभुवन जय समेत बैदेही। बिनहिं बिचार बरइ हठि तेही॥

soi purāri kodaṃḍu kaṭhorā| rāja samāja āju joi torā|| tribhuvana jaya sameta baidehī| binahiṃ bicāra barai haṭhi tehī||