बालकाण्ड

बालकाण्ड · दोहा २१७–२३३

साझा करें

मुनि तव चरन देखि कह राऊ। कहि न सकउँ निज पुन्य प्राभाऊ॥ सुंदर स्याम गौर दोउ भ्राता। आनँदहू के आनँद दाता॥

muni tava carana dekhi kaha rāū| kahi na sakaum̐ nija punya prābhāū|| suṃdara syāma gaura dou bhrātā| ānam̐dahū ke ānam̐da dātā||

इन्ह कै प्रीति परसपर पावनि। कहि न जाइ मन भाव सुहावनि॥ सुनहु नाथ कह मुदित बिदेहू। ब्रह्म जीव इव सहज सनेहू॥

inha kai prīti parasapara pāvani| kahi na jāi mana bhāva suhāvani|| sunahu nātha kaha mudita bidehū| brahma jīva iva sahaja sanehū||

पुनि पुनि प्रभुहि चितव नरनाहू। पुलक गात उर अधिक उछाहू॥ म्रुनिहि प्रसंसि नाइ पद सीसू। चलेउ लवाइ नगर अवनीसू॥

puni puni prabhuhi citava naranāhū| pulaka gāta ura adhika uchāhū|| mrunihi prasaṃsi nāi pada sīsū| caleu lavāi nagara avanīsū||

सुंदर सदनु सुखद सब काला। तहाँ बासु लै दीन्ह भुआला॥ करि पूजा सब बिधि सेवकाई। गयउ राउ गृह बिदा कराई॥

suṃdara sadanu sukhada saba kālā| tahām̐ bāsu lai dīnha bhuālā|| kari pūjā saba bidhi sevakāī| gayau rāu gṛha bidā karāī||

दोहा २१७

रिषय संग रघुबंस मनि करि भोजनु बिश्रामु। बैठे प्रभु भ्राता सहित दिवसु रहा भरि जामु ॥ २१७॥

riṣaya saṃga raghubaṃsa mani kari bhojanu biśrāmu| baiṭhe prabhu bhrātā sahita divasu rahā bhari jāmu || 217||

लखन हृदयँ लालसा बिसेषी। जाइ जनकपुर आइअ देखी॥ प्रभु भय बहुरि मुनिहि सकुचाहीं। प्रगट न कहहिं मनहिं मुसुकाहीं॥

lakhana hṛdayam̐ lālasā biseṣī| jāi janakapura āia dekhī|| prabhu bhaya bahuri munihi sakucāhīṃ| pragaṭa na kahahiṃ manahiṃ musukāhīṃ||

राम अनुज मन की गति जानी। भगत बछलता हिंयँ हुलसानी॥ परम बिनीत सकुचि मुसुकाई। बोले गुर अनुसासन पाई॥

rāma anuja mana kī gati jānī| bhagata bachalatā hiṃyam̐ hulasānī|| parama binīta sakuci musukāī| bole gura anusāsana pāī||

नाथ लखनु पुरु देखन चहहीं। प्रभु सकोच डर प्रगट न कहहीं॥ जौं राउर आयसु मैं पावौं। नगर देखाइ तुरत लै आवौ॥

nātha lakhanu puru dekhana cahahīṃ| prabhu sakoca ḍara pragaṭa na kahahīṃ|| jauṃ rāura āyasu maiṃ pāvauṃ| nagara dekhāi turata lai āvau||

सुनि मुनीसु कह बचन सप्रीती। कस न राम तुम्ह राखहु नीती॥ धरम सेतु पालक तुम्ह ताता। प्रेम बिबस सेवक सुखदाता॥

suni munīsu kaha bacana saprītī| kasa na rāma tumha rākhahu nītī|| dharama setu pālaka tumha tātā| prema bibasa sevaka sukhadātā||

दोहा २१८

जाइ देखी आवहु नगरु सुख निधान दोउ भाइ। करहु सुफल सब के नयन सुंदर बदन देखाइ ॥ २१८॥

jāi dekhī āvahu nagaru sukha nidhāna dou bhāi| karahu suphala saba ke nayana suṃdara badana dekhāi || 218||

मुनि पद कमल बंदि दोउ भ्राता। चले लोक लोचन सुख दाता॥ बालक बृंदि देखि अति सोभा। लगे संग लोचन मनु लोभा॥

muni pada kamala baṃdi dou bhrātā| cale loka locana sukha dātā|| bālaka bṛṃdi dekhi ati sobhā| lage saṃga locana manu lobhā||

पीत बसन परिकर कटि भाथा। चारु चाप सर सोहत हाथा॥ तन अनुहरत सुचंदन खोरी। स्यामल गौर मनोहर जोरी॥

pīta basana parikara kaṭi bhāthā| cāru cāpa sara sohata hāthā|| tana anuharata sucaṃdana khorī| syāmala gaura manohara jorī||

केहरि कंधर बाहु बिसाला। उर अति रुचिर नागमनि माला॥ सुभग सोन सरसीरुह लोचन। बदन मयंक तापत्रय मोचन॥

kehari kaṃdhara bāhu bisālā| ura ati rucira nāgamani mālā|| subhaga sona sarasīruha locana| badana mayaṃka tāpatraya mocana||

कानन्हि कनक फूल छबि देहीं। चितवत चितहि चोरि जनु लेहीं॥ चितवनि चारु भृकुटि बर बाँकी। तिलक रेखा सोभा जनु चाँकी॥

kānanhi kanaka phūla chabi dehīṃ| citavata citahi cori janu lehīṃ|| citavani cāru bhṛkuṭi bara bām̐kī| tilaka rekhā sobhā janu cām̐kī||

दोहा २१९

रुचिर चौतनीं सुभग सिर मेचक कुंचित केस। नख सिख सुंदर बंधु दोउ सोभा सकल सुदेस ॥ २१९॥

rucira cautanīṃ subhaga sira mecaka kuṃcita kesa| nakha sikha suṃdara baṃdhu dou sobhā sakala sudesa || 219||

देखन नगरु भूपसुत आए। समाचार पुरबासिन्ह पाए॥ धाए धाम काम सब त्यागी। मनहु रंक निधि लूटन लागी॥

dekhana nagaru bhūpasuta āe| samācāra purabāsinha pāe|| dhāe dhāma kāma saba tyāgī| manahu raṃka nidhi lūṭana lāgī||

निरखि सहज सुंदर दोउ भाई। होहिं सुखी लोचन फल पाई॥ जुबतीं भवन झरोखन्हि लागीं। निरखहिं राम रूप अनुरागीं॥

nirakhi sahaja suṃdara dou bhāī| hohiṃ sukhī locana phala pāī|| jubatīṃ bhavana jharokhanhi lāgīṃ| nirakhahiṃ rāma rūpa anurāgīṃ||

कहहिं परसपर बचन सप्रीती। सखि इन्ह कोटि काम छबि जीती॥ सुर नर असुर नाग मुनि माहीं। सोभा असि कहुँ सुनिअति नाहीं॥

kahahiṃ parasapara bacana saprītī| sakhi inha koṭi kāma chabi jītī|| sura nara asura nāga muni māhīṃ| sobhā asi kahum̐ suniati nāhīṃ||

बिष्नु चारि भुज बिघि मुख चारी। बिकट बेष मुख पंच पुरारी॥ अपर देउ अस कोउ न आही। यह छबि सखि पटतरिअ जाही॥

biṣnu cāri bhuja bighi mukha cārī| bikaṭa beṣa mukha paṃca purārī|| apara deu asa kou na āhī| yaha chabi sakhi paṭataria jāhī||

दोहा २२०

बय किसोर सुषमा सदन स्याम गौर सुख घाम। अंग अंग पर वारिअहिं कोटि कोटि सत काम ॥ २२०॥

baya kisora suṣamā sadana syāma gaura sukha ghāma| aṃga aṃga para vāriahiṃ koṭi koṭi sata kāma || 220||

कहहु सखी अस को तनुधारी। जो न मोह यह रूप निहारी॥ कोउ सप्रेम बोली मृदु बानी। जो मैं सुना सो सुनहु सयानी॥

kahahu sakhī asa ko tanudhārī| jo na moha yaha rūpa nihārī|| kou saprema bolī mṛdu bānī| jo maiṃ sunā so sunahu sayānī||

ए दोऊ दसरथ के ढोटा। बाल मरालन्हि के कल जोटा॥ मुनि कौसिक मख के रखवारे। जिन्ह रन अजिर निसाचर मारे॥

e doū dasaratha ke ḍhoṭā| bāla marālanhi ke kala joṭā|| muni kausika makha ke rakhavāre| jinha rana ajira nisācara māre||

स्याम गात कल कंज बिलोचन। जो मारीच सुभुज मदु मोचन॥ कौसल्या सुत सो सुख खानी। नामु रामु धनु सायक पानी॥

syāma gāta kala kaṃja bilocana| jo mārīca subhuja madu mocana|| kausalyā suta so sukha khānī| nāmu rāmu dhanu sāyaka pānī||

गौर किसोर बेषु बर काछें। कर सर चाप राम के पाछें॥ लछिमनु नामु राम लघु भ्राता। सुनु सखि तासु सुमित्रा माता॥

gaura kisora beṣu bara kācheṃ| kara sara cāpa rāma ke pācheṃ|| lachimanu nāmu rāma laghu bhrātā| sunu sakhi tāsu sumitrā mātā||

दोहा २२१

बिप्रकाजु करि बंधु दोउ मग मुनिबधू उधारि। आए देखन चापमख सुनि हरषीं सब नारि ॥ २२१॥

biprakāju kari baṃdhu dou maga munibadhū udhāri| āe dekhana cāpamakha suni haraṣīṃ saba nāri || 221||

देखि राम छबि कोउ एक कहई। जोगु जानकिहि यह बरु अहई॥ जौ सखि इन्हहि देख नरनाहू। पन परिहरि हठि करइ बिबाहू॥

dekhi rāma chabi kou eka kahaī| jogu jānakihi yaha baru ahaī|| jau sakhi inhahi dekha naranāhū| pana parihari haṭhi karai bibāhū||

कोउ कह ए भूपति पहिचाने। मुनि समेत सादर सनमाने॥ सखि परंतु पनु राउ न तजई। बिधि बस हठि अबिबेकहि भजई॥

kou kaha e bhūpati pahicāne| muni sameta sādara sanamāne|| sakhi paraṃtu panu rāu na tajaī| bidhi basa haṭhi abibekahi bhajaī||

कोउ कह जौं भल अहइ बिधाता। सब कहँ सुनिअ उचित फलदाता॥ तौ जानकिहि मिलिहि बरु एहू। नाहिन आलि इहाँ संदेहू॥

kou kaha jauṃ bhala ahai bidhātā| saba kaham̐ sunia ucita phaladātā|| tau jānakihi milihi baru ehū| nāhina āli ihām̐ saṃdehū||

जौ बिधि बस अस बनै सँजोगू। तौ कृतकृत्य होइ सब लोगू॥ सखि हमरें आरति अति तातें। कबहुँक ए आवहिं एहि नातें॥

jau bidhi basa asa banai sam̐jogū| tau kṛtakṛtya hoi saba logū|| sakhi hamareṃ ārati ati tāteṃ| kabahum̐ka e āvahiṃ ehi nāteṃ||

दोहा २२२

नाहिं त हम कहुँ सुनहु सखि इन्ह कर दरसनु दूरि। यह संघटु तब होइ जब पुन्य पुराकृत भूरि ॥ २२२॥

nāhiṃ ta hama kahum̐ sunahu sakhi inha kara darasanu dūri| yaha saṃghaṭu taba hoi jaba punya purākṛta bhūri || 222||

बोली अपर कहेहु सखि नीका। एहिं बिआह अति हित सबहीं का॥ कोउ कह संकर चाप कठोरा। ए स्यामल मृदुगात किसोरा॥

bolī apara kahehu sakhi nīkā| ehiṃ biāha ati hita sabahīṃ kā|| kou kaha saṃkara cāpa kaṭhorā| e syāmala mṛdugāta kisorā||

सबु असमंजस अहइ सयानी। यह सुनि अपर कहइ मृदु बानी॥ सखि इन्ह कहँ कोउ कोउ अस कहहीं। बड़ प्रभाउ देखत लघु अहहीं॥

sabu asamaṃjasa ahai sayānī| yaha suni apara kahai mṛdu bānī|| sakhi inha kaham̐ kou kou asa kahahīṃ| baṛa prabhāu dekhata laghu ahahīṃ||

परसि जासु पद पंकज धूरी। तरी अहल्या कृत अघ भूरी॥

parasi jāsu pada paṃkaja dhūrī| tarī ahalyā kṛta agha bhūrī||

सोरठा ३

सो कि रहिहि बिनु सिवधनु तोरें। यह प्रतीति परिहरिअ न भोरें॥

so ki rahihi binu sivadhanu toreṃ| yaha pratīti pariharia na bhoreṃ||

जेहिं बिरंचि रचि सीय सँवारी। तेहिं स्यामल बरु रचेउ बिचारी॥ तासु बचन सुनि सब हरषानीं। ऐसेइ होउ कहहिं मुदु बानी॥

jehiṃ biraṃci raci sīya sam̐vārī| tehiṃ syāmala baru raceu bicārī|| tāsu bacana suni saba haraṣānīṃ| aisei hou kahahiṃ mudu bānī||

दोहा २२३

हियँ हरषहिं बरषहिं सुमन सुमुखि सुलोचनि बृंद। जाहिं जहाँ जहँ बंधु दोउ तहँ तहँ परमानंद ॥ २२३॥

hiyam̐ haraṣahiṃ baraṣahiṃ sumana sumukhi sulocani bṛṃda| jāhiṃ jahām̐ jaham̐ baṃdhu dou taham̐ taham̐ paramānaṃda || 223||

पुर पूरब दिसि गे दोउ भाई। जहँ धनुमख हित भूमि बनाई॥ अति बिस्तार चारु गच ढारी। बिमल बेदिका रुचिर सँवारी॥

pura pūraba disi ge dou bhāī| jaham̐ dhanumakha hita bhūmi banāī|| ati bistāra cāru gaca ḍhārī| bimala bedikā rucira sam̐vārī||

चहुँ दिसि कंचन मंच बिसाला। रचे जहाँ बेठहिं महिपाला॥ तेहि पाछें समीप चहुँ पासा। अपर मंच मंडली बिलासा॥

cahum̐ disi kaṃcana maṃca bisālā| race jahām̐ beṭhahiṃ mahipālā|| tehi pācheṃ samīpa cahum̐ pāsā| apara maṃca maṃḍalī bilāsā||

कछुक ऊँचि सब भाँति सुहाई। बैठहिं नगर लोग जहँ जाई॥ तिन्ह के निकट बिसाल सुहाए। धवल धाम बहुबरन बनाए॥

kachuka ūm̐ci saba bhām̐ti suhāī| baiṭhahiṃ nagara loga jaham̐ jāī|| tinha ke nikaṭa bisāla suhāe| dhavala dhāma bahubarana banāe||

जहँ बैंठैं देखहिं सब नारी। जथा जोगु निज कुल अनुहारी॥ पुर बालक कहि कहि मृदु बचना। सादर प्रभुहि देखावहिं रचना॥

jaham̐ baiṃṭhaiṃ dekhahiṃ saba nārī| jathā jogu nija kula anuhārī|| pura bālaka kahi kahi mṛdu bacanā| sādara prabhuhi dekhāvahiṃ racanā||

दोहा २२४

सब सिसु एहि मिस प्रेमबस परसि मनोहर गात। तन पुलकहिं अति हरषु हियँ देखि देखि दोउ भ्रात ॥ २२४॥

saba sisu ehi misa premabasa parasi manohara gāta| tana pulakahiṃ ati haraṣu hiyam̐ dekhi dekhi dou bhrāta || 224||

सिसु सब राम प्रेमबस जाने। प्रीति समेत निकेत बखाने॥ निज निज रुचि सब लेंहिं बोलाई। सहित सनेह जाहिं दोउ भाई॥

sisu saba rāma premabasa jāne| prīti sameta niketa bakhāne|| nija nija ruci saba leṃhiṃ bolāī| sahita saneha jāhiṃ dou bhāī||

राम देखावहिं अनुजहि रचना। कहि मृदु मधुर मनोहर बचना॥ लव निमेष महँ भुवन निकाया। रचइ जासु अनुसासन माया॥

rāma dekhāvahiṃ anujahi racanā| kahi mṛdu madhura manohara bacanā|| lava nimeṣa maham̐ bhuvana nikāyā| racai jāsu anusāsana māyā||

भगति हेतु सोइ दीनदयाला। चितवत चकित धनुष मखसाला॥ कौतुक देखि चले गुरु पाहीं। जानि बिलंबु त्रास मन माहीं॥

bhagati hetu soi dīnadayālā| citavata cakita dhanuṣa makhasālā|| kautuka dekhi cale guru pāhīṃ| jāni bilaṃbu trāsa mana māhīṃ||

जासु त्रास डर कहुँ डर होई। भजन प्रभाउ देखावत सोई॥ कहि बातें मृदु मधुर सुहाईं। किए बिदा बालक बरिआई॥

jāsu trāsa ḍara kahum̐ ḍara hoī| bhajana prabhāu dekhāvata soī|| kahi bāteṃ mṛdu madhura suhāīṃ| kie bidā bālaka bariāī||

दोहा २२५

सभय सप्रेम बिनीत अति सकुच सहित दोउ भाइ। गुर पद पंकज नाइ सिर बैठे आयसु पाइ ॥ २२५॥

sabhaya saprema binīta ati sakuca sahita dou bhāi| gura pada paṃkaja nāi sira baiṭhe āyasu pāi || 225||

निसि प्रबेस मुनि आयसु दीन्हा। सबहीं संध्याबंदनु कीन्हा॥ कहत कथा इतिहास पुरानी। रुचिर रजनि जुग जाम सिरानी॥

nisi prabesa muni āyasu dīnhā| sabahīṃ saṃdhyābaṃdanu kīnhā|| kahata kathā itihāsa purānī| rucira rajani juga jāma sirānī||

मुनिबर सयन कीन्हि तब जाई। लगे चरन चापन दोउ भाई॥ जिन्ह के चरन सरोरुह लागी। करत बिबिध जप जोग बिरागी॥

munibara sayana kīnhi taba jāī| lage carana cāpana dou bhāī|| jinha ke carana saroruha lāgī| karata bibidha japa joga birāgī||

तेइ दोउ बंधु प्रेम जनु जीते। गुर पद कमल पलोटत प्रीते॥ बारबार मुनि अग्या दीन्ही। रघुबर जाइ सयन तब कीन्ही॥

tei dou baṃdhu prema janu jīte| gura pada kamala paloṭata prīte|| bārabāra muni agyā dīnhī| raghubara jāi sayana taba kīnhī||

चापत चरन लखनु उर लाएँ। सभय सप्रेम परम सचु पाएँ॥ पुनि पुनि प्रभु कह सोवहु ताता। पौढ़े धरि उर पद जलजाता॥

cāpata carana lakhanu ura lāem̐| sabhaya saprema parama sacu pāem̐|| puni puni prabhu kaha sovahu tātā| pauṛhe dhari ura pada jalajātā||

दोहा २२६

उठे लखन निसि बिगत सुनि अरुनसिखा धुनि कान। गुर तें पहिलेहिं जगतपति जागे रामु सुजान ॥ २२६॥

uṭhe lakhana nisi bigata suni arunasikhā dhuni kāna| gura teṃ pahilehiṃ jagatapati jāge rāmu sujāna || 226||

सकल सौच करि जाइ नहाए। नित्य निबाहि मुनिहि सिर नाए॥ समय जानि गुर आयसु पाई। लेन प्रसून चले दोउ भाई॥

sakala sauca kari jāi nahāe| nitya nibāhi munihi sira nāe|| samaya jāni gura āyasu pāī| lena prasūna cale dou bhāī||

भूप बागु बर देखेउ जाई। जहँ बसंत रितु रही लोभाई॥ लागे बिटप मनोहर नाना। बरन बरन बर बेलि बिताना॥

bhūpa bāgu bara dekheu jāī| jaham̐ basaṃta ritu rahī lobhāī|| lāge biṭapa manohara nānā| barana barana bara beli bitānā||

नव पल्लव फल सुमान सुहाए। निज संपति सुर रूख लजाए॥ चातक कोकिल कीर चकोरा। कूजत बिहग नटत कल मोरा॥

nava pallava phala sumāna suhāe| nija saṃpati sura rūkha lajāe|| cātaka kokila kīra cakorā| kūjata bihaga naṭata kala morā||

बिमल सलिलु सरसिज बहुरंगा। जलखग कूजत गुंजत भृंगा॥

bimala salilu sarasija bahuraṃgā| jalakhaga kūjata guṃjata bhṛṃgā||

दोहा २२७

बागु तड़ागु बिलोकि प्रभु हरषे बंधु समेत। परम रम्य आरामु यहु जो रामहि सुख देत ॥ २२७॥

bāgu taṛāgu biloki prabhu haraṣe baṃdhu sameta| parama ramya ārāmu yahu jo rāmahi sukha deta || 227||

चहुँ दिसि चितइ पूँछि मालिगन। लगे लेन दल फूल मुदित मन॥ तेहि अवसर सीता तहँ आई। गिरिजा पूजन जननि पठाई॥

cahum̐ disi citai pūm̐chi māligana| lage lena dala phūla mudita mana|| tehi avasara sītā taham̐ āī| girijā pūjana janani paṭhāī||

संग सखीं सब सुभग सयानी। गावहिं गीत मनोहर बानी॥ सर समीप गिरिजा गृह सोहा। बरनि न जाइ देखि मनु मोहा॥

saṃga sakhīṃ saba subhaga sayānī| gāvahiṃ gīta manohara bānī|| sara samīpa girijā gṛha sohā| barani na jāi dekhi manu mohā||

मज्जनु करि सर सखिन्ह समेता। गई मुदित मन गौरि निकेता॥ पूजा कीन्हि अधिक अनुरागा। निज अनुरूप सुभग बरु मागा॥

majjanu kari sara sakhinha sametā| gaī mudita mana gauri niketā|| pūjā kīnhi adhika anurāgā| nija anurūpa subhaga baru māgā||

एक सखी सिय संगु बिहाई। गई रही देखन फुलवाई॥ तेहि दोउ बंधु बिलोके जाई। प्रेम बिबस सीता पहिं आई॥

eka sakhī siya saṃgu bihāī| gaī rahī dekhana phulavāī|| tehi dou baṃdhu biloke jāī| prema bibasa sītā pahiṃ āī||

दोहा २२८

तासु दसा देखि सखिन्ह पुलक गात जलु नैन। कहु कारनु निज हरष कर पूछहि सब मृदु बैन ॥ २२८॥

tāsu dasā dekhi sakhinha pulaka gāta jalu naina| kahu kāranu nija haraṣa kara pūchahi saba mṛdu baina || 228||

देखन बागु कुअँर दुइ आए। बय किसोर सब भाँति सुहाए॥ स्याम गौर किमि कहौं बखानी। गिरा अनयन नयन बिनु बानी॥

dekhana bāgu kuam̐ra dui āe| baya kisora saba bhām̐ti suhāe|| syāma gaura kimi kahauṃ bakhānī| girā anayana nayana binu bānī||

सुनि हरषीं सब सखीं सयानी। सिय हियँ अति उतकंठा जानी॥ एक कहइ नृपसुत तेइ आली। सुने जे मुनि सँग आए काली॥

suni haraṣīṃ saba sakhīṃ sayānī| siya hiyam̐ ati utakaṃṭhā jānī|| eka kahai nṛpasuta tei ālī| sune je muni sam̐ga āe kālī||

जिन्ह निज रूप मोहनी डारी। कीन्ह स्वबस नगर नर नारी॥ बरनत छबि जहँ तहँ सब लोगू। अवसि देखिअहिं देखन जोगू॥

jinha nija rūpa mohanī ḍārī| kīnha svabasa nagara nara nārī|| baranata chabi jaham̐ taham̐ saba logū| avasi dekhiahiṃ dekhana jogū||

तासु वचन अति सियहि सुहाने। दरस लागि लोचन अकुलाने॥ चली अग्र करि प्रिय सखि सोई। प्रीति पुरातन लखइ न कोई॥

tāsu vacana ati siyahi suhāne| darasa lāgi locana akulāne|| calī agra kari priya sakhi soī| prīti purātana lakhai na koī||

दोहा २२९

सुमिरि सीय नारद बचन उपजी प्रीति पुनीत। चकित बिलोकति सकल दिसि जनु सिसु मृगी सभीत ॥ २२९॥

sumiri sīya nārada bacana upajī prīti punīta| cakita bilokati sakala disi janu sisu mṛgī sabhīta || 229||

कंकन किंकिनि नूपुर धुनि सुनि। कहत लखन सन रामु हृदयँ गुनि॥ मानहुँ मदन दुंदुभी दीन्ही। मनसा बिस्व बिजय कहँ कीन्ही॥

kaṃkana kiṃkini nūpura dhuni suni| kahata lakhana sana rāmu hṛdayam̐ guni|| mānahum̐ madana duṃdubhī dīnhī| manasā bisva bijaya kaham̐ kīnhī||

अस कहि फिरि चितए तेहि ओरा। सिय मुख ससि भए नयन चकोरा॥ भए बिलोचन चारु अचंचल। मनहुँ सकुचि निमि तजे दिगंचल॥

asa kahi phiri citae tehi orā| siya mukha sasi bhae nayana cakorā|| bhae bilocana cāru acaṃcala| manahum̐ sakuci nimi taje digaṃcala||

देखि सीय सोभा सुखु पावा। हृदयँ सराहत बचनु न आवा॥ जनु बिरंचि सब निज निपुनाई। बिरचि बिस्व कहँ प्रगटि देखाई॥

dekhi sīya sobhā sukhu pāvā| hṛdayam̐ sarāhata bacanu na āvā|| janu biraṃci saba nija nipunāī| biraci bisva kaham̐ pragaṭi dekhāī||

सुंदरता कहुँ सुंदर करई। छबिगृहँ दीपसिखा जनु बरई॥ सब उपमा कबि रहे जुठारी। केहिं पटतरौं बिदेहकुमारी॥

suṃdaratā kahum̐ suṃdara karaī| chabigṛham̐ dīpasikhā janu baraī|| saba upamā kabi rahe juṭhārī| kehiṃ paṭatarauṃ bidehakumārī||

दोहा २३०

सिय सोभा हियँ बरनि प्रभु आपनि दसा बिचारि। बोले सुचि मन अनुज सन बचन समय अनुहारि ॥ २३०॥

siya sobhā hiyam̐ barani prabhu āpani dasā bicāri| bole suci mana anuja sana bacana samaya anuhāri || 230||

तात जनकतनया यह सोई। धनुषजग्य जेहि कारन होई॥ पूजन गौरि सखीं लै आई। करत प्रकासु फिरइ फुलवाई॥

tāta janakatanayā yaha soī| dhanuṣajagya jehi kārana hoī|| pūjana gauri sakhīṃ lai āī| karata prakāsu phirai phulavāī||

जासु बिलोकि अलोकिक सोभा। सहज पुनीत मोर मनु छोभा॥

jāsu biloki alokika sobhā| sahaja punīta mora manu chobhā||

सोरठा २

सो सबु कारन जान बिधाता। फरकहिं सुभद अंग सुनु भ्राता॥

so sabu kārana jāna bidhātā| pharakahiṃ subhada aṃga sunu bhrātā||

रघुबंसिन्ह कर सहज सुभाऊ। मनु कुपंथ पगु धरइ न काऊ॥ मोहि अतिसय प्रतीति मन केरी। जेहिं सपनेहुँ परनारि न हेरी॥

raghubaṃsinha kara sahaja subhāū| manu kupaṃtha pagu dharai na kāū|| mohi atisaya pratīti mana kerī| jehiṃ sapanehum̐ paranāri na herī||

जिन्ह कै लहहिं न रिपु रन पीठी। नहिं पावहिं परतिय मनु डीठी॥ मंगन लहहि न जिन्ह कै नाहीं। ते नरबर थोरे जग माहीं॥

jinha kai lahahiṃ na ripu rana pīṭhī| nahiṃ pāvahiṃ paratiya manu ḍīṭhī|| maṃgana lahahi na jinha kai nāhīṃ| te narabara thore jaga māhīṃ||

दोहा २३१

करत बतकहि अनुज सन मन सिय रूप लोभान। मुख सरोज मकरंद छबि करइ मधुप इव पान ॥ २३१॥

karata batakahi anuja sana mana siya rūpa lobhāna| mukha saroja makaraṃda chabi karai madhupa iva pāna || 231||

चितवहि चकित चहूँ दिसि सीता। कहँ गए नृपकिसोर मनु चिंता॥ जहँ बिलोक मृग सावक नैनी। जनु तहँ बरिस कमल सित श्रेनी॥

citavahi cakita cahūm̐ disi sītā| kaham̐ gae nṛpakisora manu ciṃtā|| jaham̐ biloka mṛga sāvaka nainī| janu taham̐ barisa kamala sita śrenī||

लता ओट तब सखिन्ह लखाए। स्यामल गौर किसोर सुहाए॥ देखि रूप लोचन ललचाने। हरषे जनु निज निधि पहिचाने॥

latā oṭa taba sakhinha lakhāe| syāmala gaura kisora suhāe|| dekhi rūpa locana lalacāne| haraṣe janu nija nidhi pahicāne||

थके नयन रघुपति छबि देखें। पलकन्हिहूँ परिहरीं निमेषें॥ अधिक सनेहँ देह भै भोरी। सरद ससिहि जनु चितव चकोरी॥

thake nayana raghupati chabi dekheṃ| palakanhihūm̐ pariharīṃ nimeṣeṃ|| adhika saneham̐ deha bhai bhorī| sarada sasihi janu citava cakorī||

लोचन मग रामहि उर आनी। दीन्हे पलक कपाट सयानी॥ जब सिय सखिन्ह प्रेमबस जानी। कहि न सकहिं कछु मन सकुचानी॥

locana maga rāmahi ura ānī| dīnhe palaka kapāṭa sayānī|| jaba siya sakhinha premabasa jānī| kahi na sakahiṃ kachu mana sakucānī||

दोहा २३२

लताभवन तें प्रगट भे तेहि अवसर दोउ भाइ। निकसे जनु जुग बिमल बिधु जलद पटल बिलगाइ ॥ २३२॥

latābhavana teṃ pragaṭa bhe tehi avasara dou bhāi| nikase janu juga bimala bidhu jalada paṭala bilagāi || 232||

सोरठा १

सोभा सीवँ सुभग दोउ बीरा। नील पीत जलजाभ सरीरा॥ मोरपंख सिर सोहत नीके। गुच्छ बीच बिच कुसुम कली के॥

sobhā sīvam̐ subhaga dou bīrā| nīla pīta jalajābha sarīrā|| morapaṃkha sira sohata nīke| guccha bīca bica kusuma kalī ke||

भाल तिलक श्रमबिंदु सुहाए। श्रवन सुभग भूषन छबि छाए॥ बिकट भृकुटि कच घूघरवारे। नव सरोज लोचन रतनारे॥

bhāla tilaka śramabiṃdu suhāe| śravana subhaga bhūṣana chabi chāe|| bikaṭa bhṛkuṭi kaca ghūgharavāre| nava saroja locana ratanāre||

चारु चिबुक नासिका कपोला। हास बिलास लेत मनु मोला॥ मुखछबि कहि न जाइ मोहि पाहीं। जो बिलोकि बहु काम लजाहीं॥

cāru cibuka nāsikā kapolā| hāsa bilāsa leta manu molā|| mukhachabi kahi na jāi mohi pāhīṃ| jo biloki bahu kāma lajāhīṃ||

उर मनि माल कंबु कल गीवा। काम कलभ कर भुज बलसींवा॥ सुमन समेत बाम कर दोना। सावँर कुअँर सखी सुठि लोना॥

ura mani māla kaṃbu kala gīvā| kāma kalabha kara bhuja balasīṃvā|| sumana sameta bāma kara donā| sāvam̐ra kuam̐ra sakhī suṭhi lonā||

दोहा २३३

केहरि कटि पट पीत धर सुषमा सील निधान। देखि भानुकुलभूषनहि बिसरा सखिन्ह अपान ॥ २३३॥

kehari kaṭi paṭa pīta dhara suṣamā sīla nidhāna| dekhi bhānukulabhūṣanahi bisarā sakhinha apāna || 233||