अरण्यकाण्ड

अरण्यकाण्ड · दोहा ८–१९(ख)

साझा करें

जोग जग्य जप तप ब्रत कीन्हा। प्रभु कहँ देइ भगति बर लीन्हा॥ एहि बिधि सर रचि मुनि सरभंगा। बैठे हृदयँ छाड़ि सब संगा॥

joga jagya japa tapa brata kīnhā| prabhu kaham̐ dei bhagati bara līnhā|| ehi bidhi sara raci muni sarabhaṃgā| baiṭhe hṛdayam̐ chāṛi saba saṃgā||

दोहा ८

सीता अनुज समेत प्रभु नील जलद तनु स्याम। मम हियँ बसहु निरंतर सगुनरुप श्रीराम ॥ ८॥

sītā anuja sameta prabhu nīla jalada tanu syāma| mama hiyam̐ basahu niraṃtara sagunarupa śrīrāma || 8||

अस कहि जोग अगिनि तनु जारा। राम कृपाँ बैकुंठ सिधारा॥ ताते मुनि हरि लीन न भयऊ। प्रथमहिं भेद भगति बर लयऊ॥

asa kahi joga agini tanu jārā| rāma kṛpām̐ baikuṃṭha sidhārā|| tāte muni hari līna na bhayaū| prathamahiṃ bheda bhagati bara layaū||

रिषि निकाय मुनिबर गति देखि। सुखी भए निज हृदयँ बिसेषी॥ अस्तुति करहिं सकल मुनि बृंदा। जयति प्रनत हित करुना कंदा॥

riṣi nikāya munibara gati dekhi| sukhī bhae nija hṛdayam̐ biseṣī|| astuti karahiṃ sakala muni bṛṃdā| jayati pranata hita karunā kaṃdā||

पुनि रघुनाथ चले बन आगे। मुनिबर बृंद बिपुल सँग लागे॥ अस्थि समूह देखि रघुराया। पूछी मुनिन्ह लागि अति दाया॥

puni raghunātha cale bana āge| munibara bṛṃda bipula sam̐ga lāge|| asthi samūha dekhi raghurāyā| pūchī muninha lāgi ati dāyā||

जानतहुँ पूछिअ कस स्वामी। सबदरसी तुम्ह अंतरजामी॥ निसिचर निकर सकल मुनि खाए। सुनि रघुबीर नयन जल छाए॥

jānatahum̐ pūchia kasa svāmī| sabadarasī tumha aṃtarajāmī|| nisicara nikara sakala muni khāe| suni raghubīra nayana jala chāe||

दोहा ९

निसिचर हीन करउँ महि भुज उठाइ पन कीन्ह। सकल मुनिन्ह के आश्रमन्हि जाइ जाइ सुख दीन्ह॥ ९१

nisicara hīna karaum̐ mahi bhuja uṭhāi pana kīnha| sakala muninha ke āśramanhi jāi jāi sukha dīnha|| 91

मुनि अगस्ति कर सिष्य सुजाना। नाम सुतीछन रति भगवाना॥ मन क्रम बचन राम पद सेवक। सपनेहुँ आन भरोस न देवक॥

muni agasti kara siṣya sujānā| nāma sutīchana rati bhagavānā|| mana krama bacana rāma pada sevaka| sapanehum̐ āna bharosa na devaka||

प्रभु आगवनु श्रवन सुनि पावा। करत मनोरथ आतुर धावा॥ हे बिधि दीनबंधु रघुराया। मो से सठ पर करिहहिं दाया॥

prabhu āgavanu śravana suni pāvā| karata manoratha ātura dhāvā|| he bidhi dīnabaṃdhu raghurāyā| mo se saṭha para karihahiṃ dāyā||

सहित अनुज मोहि राम गोसाई। मिलिहहिं निज सेवक की नाई॥ मोरे जियँ भरोस दृढ़ नाहीं। भगति बिरति न ग्यान मन माहीं॥

sahita anuja mohi rāma gosāī| milihahiṃ nija sevaka kī nāī|| more jiyam̐ bharosa dṛṛha nāhīṃ| bhagati birati na gyāna mana māhīṃ||

नहिं सतसंग जोग जप जागा। नहिं दृढ़ चरन कमल अनुरागा॥ एक बानि करुनानिधान की। सो प्रिय जाकें गति न आन की॥

nahiṃ satasaṃga joga japa jāgā| nahiṃ dṛṛha carana kamala anurāgā|| eka bāni karunānidhāna kī| so priya jākeṃ gati na āna kī||

होइहैं सुफल आजु मम लोचन। देखि बदन पंकज भव मोचन॥ निर्भर प्रेम मगन मुनि ग्यानी। कहि न जाइ सो दसा भवानी॥

hoihaiṃ suphala āju mama locana| dekhi badana paṃkaja bhava mocana|| nirbhara prema magana muni gyānī| kahi na jāi so dasā bhavānī||

दिसि अरु बिदिसि पंथ नहिं सूझा। को मैं चलेउँ कहाँ नहिं बूझा॥ कबहुँक फिरि पाछें पुनि जाई। कबहुँक नृत्य करइ गुन गाई॥

disi aru bidisi paṃtha nahiṃ sūjhā| ko maiṃ caleum̐ kahām̐ nahiṃ būjhā|| kabahum̐ka phiri pācheṃ puni jāī| kabahum̐ka nṛtya karai guna gāī||

अबिरल प्रेम भगति मुनि पाई। प्रभु देखैं तरु ओट लुकाई॥ अतिसय प्रीति देखि रघुबीरा। प्रगटे हृदयँ हरन भव भीरा॥

abirala prema bhagati muni pāī| prabhu dekhaiṃ taru oṭa lukāī|| atisaya prīti dekhi raghubīrā| pragaṭe hṛdayam̐ harana bhava bhīrā||

मुनि मग माझ अचल होइ बैसा। पुलक सरीर पनस फल जैसा॥ तब रघुनाथ निकट चलि आए। देखि दसा निज जन मन भाए॥

muni maga mājha acala hoi baisā| pulaka sarīra panasa phala jaisā|| taba raghunātha nikaṭa cali āe| dekhi dasā nija jana mana bhāe||

मुनिहि राम बहु भाँति जगावा। जाग न ध्यानजनित सुख पावा॥ भूप रूप तब राम दुरावा। हृदयँ चतुर्भुज रूप देखावा॥

munihi rāma bahu bhām̐ti jagāvā| jāga na dhyānajanita sukha pāvā|| bhūpa rūpa taba rāma durāvā| hṛdayam̐ caturbhuja rūpa dekhāvā||

मुनि अकुलाइ उठा तब कैसें। बिकल हीन मनि फनि बर जैसें॥ आगें देखि राम तन स्यामा। सीता अनुज सहित सुख धामा॥

muni akulāi uṭhā taba kaiseṃ| bikala hīna mani phani bara jaiseṃ|| āgeṃ dekhi rāma tana syāmā| sītā anuja sahita sukha dhāmā||

परेउ लकुट इव चरनन्हि लागी। प्रेम मगन मुनिबर बड़भागी॥ भुज बिसाल गहि लिए उठाई। परम प्रीति राखे उर लाई॥

pareu lakuṭa iva carananhi lāgī| prema magana munibara baṛabhāgī|| bhuja bisāla gahi lie uṭhāī| parama prīti rākhe ura lāī||

मुनिहि मिलत अस सोह कृपाला। कनक तरुहि जनु भेंट तमाला॥ राम बदनु बिलोक मुनि ठाढ़ा। मानहुँ चित्र माझ लिखि काढ़ा॥

munihi milata asa soha kṛpālā| kanaka taruhi janu bheṃṭa tamālā|| rāma badanu biloka muni ṭhāṛhā| mānahum̐ citra mājha likhi kāṛhā||

दोहा १०

तब मुनि हृदयँ धीर धीर गहि पद बारहिं बार। निज आश्रम प्रभु आनि करि पूजा बिबिध प्रकार ॥ १०॥

taba muni hṛdayam̐ dhīra dhīra gahi pada bārahiṃ bāra| nija āśrama prabhu āni kari pūjā bibidha prakāra || 10||

कह मुनि प्रभु सुनु बिनती मोरी। अस्तुति करौं कवन बिधि तोरी॥ महिमा अमित मोरि मति थोरी। रबि सन्मुख खद्योत अँजोरी॥

kaha muni prabhu sunu binatī morī| astuti karauṃ kavana bidhi torī|| mahimā amita mori mati thorī| rabi sanmukha khadyota am̐jorī||

श्याम तामरस दाम शरीरं। जटा मुकुट परिधन मुनिचीरं॥ पाणि चाप शर कटि तूणीरं। नौमि निरंतर श्रीरघुवीरं॥

śyāma tāmarasa dāma śarīraṃ| jaṭā mukuṭa paridhana municīraṃ|| pāṇi cāpa śara kaṭi tūṇīraṃ| naumi niraṃtara śrīraghuvīraṃ||

मोह विपिन घन दहन कृशानुः। संत सरोरुह कानन भानुः॥ निशिचर करि वरूथ मृगराजः। त्रातु सदा नो भव खग बाजः॥

moha vipina ghana dahana kṛśānuḥ| saṃta saroruha kānana bhānuḥ|| niśicara kari varūtha mṛgarājaḥ| trātu sadā no bhava khaga bājaḥ||

अरुण नयन राजीव सुवेशं। सीता नयन चकोर निशेशं॥ हर ह्रदि मानस बाल मरालं। नौमि राम उर बाहु विशालं॥

aruṇa nayana rājīva suveśaṃ| sītā nayana cakora niśeśaṃ|| hara hradi mānasa bāla marālaṃ| naumi rāma ura bāhu viśālaṃ||

संशय सर्प ग्रसन उरगादः। शमन सुकर्कश तर्क विषादः॥ भव भंजन रंजन सुर यूथः। त्रातु सदा नो कृपा वरूथः॥

saṃśaya sarpa grasana uragādaḥ| śamana sukarkaśa tarka viṣādaḥ|| bhava bhaṃjana raṃjana sura yūthaḥ| trātu sadā no kṛpā varūthaḥ||

निर्गुण सगुण विषम सम रूपं। ज्ञान गिरा गोतीतमनूपं॥ अमलमखिलमनवद्यमपारं। नौमि राम भंजन महि भारं॥

nirguṇa saguṇa viṣama sama rūpaṃ| jñāna girā gotītamanūpaṃ|| amalamakhilamanavadyamapāraṃ| naumi rāma bhaṃjana mahi bhāraṃ||

भक्त कल्पपादप आरामः। तर्जन क्रोध लोभ मद कामः॥ अति नागर भव सागर सेतुः। त्रातु सदा दिनकर कुल केतुः॥

bhakta kalpapādapa ārāmaḥ| tarjana krodha lobha mada kāmaḥ|| ati nāgara bhava sāgara setuḥ| trātu sadā dinakara kula ketuḥ||

अतुलित भुज प्रताप बल धामः। कलि मल विपुल विभंजन नामः॥ धर्म वर्म नर्मद गुण ग्रामः। संतत शं तनोतु मम रामः॥

atulita bhuja pratāpa bala dhāmaḥ| kali mala vipula vibhaṃjana nāmaḥ|| dharma varma narmada guṇa grāmaḥ| saṃtata śaṃ tanotu mama rāmaḥ||

जदपि बिरज ब्यापक अबिनासी। सब के हृदयँ निरंतर बासी॥ तदपि अनुज श्री सहित खरारी। बसतु मनसि मम काननचारी॥

jadapi biraja byāpaka abināsī| saba ke hṛdayam̐ niraṃtara bāsī|| tadapi anuja śrī sahita kharārī| basatu manasi mama kānanacārī||

जे जानहिं ते जानहुँ स्वामी। सगुन अगुन उर अंतरजामी॥ जो कोसल पति राजिव नयना। करउ सो राम हृदय मम अयना॥

je jānahiṃ te jānahum̐ svāmī| saguna aguna ura aṃtarajāmī|| jo kosala pati rājiva nayanā| karau so rāma hṛdaya mama ayanā||

अस अभिमान जाइ जनि भोरे। मैं सेवक रघुपति पति मोरे॥ सुनि मुनि बचन राम मन भाए। बहुरि हरषि मुनिबर उर लाए॥

asa abhimāna jāi jani bhore| maiṃ sevaka raghupati pati more|| suni muni bacana rāma mana bhāe| bahuri haraṣi munibara ura lāe||

परम प्रसन्न जानु मुनि मोही। जो बर मागहु देउ सो तोही॥ मुनि कह मै बर कबहुँ न जाचा। समुझि न परइ झूठ का साचा॥

parama prasanna jānu muni mohī| jo bara māgahu deu so tohī|| muni kaha mai bara kabahum̐ na jācā| samujhi na parai jhūṭha kā sācā||

तुम्हहि नीक लागै रघुराई। सो मोहि देहु दास सुखदाई॥ अबिरल भगति बिरति बिग्याना। होहु सकल गुन ग्यान निधाना॥

tumhahi nīka lāgai raghurāī| so mohi dehu dāsa sukhadāī|| abirala bhagati birati bigyānā| hohu sakala guna gyāna nidhānā||

प्रभु जो दीन्ह सो बरु मैं पावा। अब सो देहु मोहि जो भावा॥

prabhu jo dīnha so baru maiṃ pāvā| aba so dehu mohi jo bhāvā||

दोहा ११

अनुज जानकी सहित प्रभु चाप बान धर राम। मम हिय गगन इंदु इव बसहु सदा निहकाम ॥ ११॥

anuja jānakī sahita prabhu cāpa bāna dhara rāma| mama hiya gagana iṃdu iva basahu sadā nihakāma || 11||

एवमस्तु करि रमानिवासा। हरषि चले कुभंज रिषि पासा॥ बहुत दिवस गुर दरसन पाएँ। भए मोहि एहिं आश्रम आएँ॥

evamastu kari ramānivāsā| haraṣi cale kubhaṃja riṣi pāsā|| bahuta divasa gura darasana pāem̐| bhae mohi ehiṃ āśrama āem̐||

अब प्रभु संग जाउँ गुर पाहीं। तुम्ह कहँ नाथ निहोरा नाहीं॥ देखि कृपानिधि मुनि चतुराई। लिए संग बिहसै द्वौ भाई॥

aba prabhu saṃga jāum̐ gura pāhīṃ| tumha kaham̐ nātha nihorā nāhīṃ|| dekhi kṛpānidhi muni caturāī| lie saṃga bihasai dvau bhāī||

पंथ कहत निज भगति अनूपा। मुनि आश्रम पहुँचे सुरभूपा॥ तुरत सुतीछन गुर पहिं गयऊ। करि दंडवत कहत अस भयऊ॥

paṃtha kahata nija bhagati anūpā| muni āśrama pahum̐ce surabhūpā|| turata sutīchana gura pahiṃ gayaū| kari daṃḍavata kahata asa bhayaū||

नाथ कौसलाधीस कुमारा। आए मिलन जगत आधारा॥ राम अनुज समेत बैदेही। निसि दिनु देव जपत हहु जेही॥

nātha kausalādhīsa kumārā| āe milana jagata ādhārā|| rāma anuja sameta baidehī| nisi dinu deva japata hahu jehī||

सुनत अगस्ति तुरत उठि धाए। हरि बिलोकि लोचन जल छाए॥ मुनि पद कमल परे द्वौ भाई। रिषि अति प्रीति लिए उर लाई॥

sunata agasti turata uṭhi dhāe| hari biloki locana jala chāe|| muni pada kamala pare dvau bhāī| riṣi ati prīti lie ura lāī||

सादर कुसल पूछि मुनि ग्यानी। आसन बर बैठारे आनी॥ पुनि करि बहु प्रकार प्रभु पूजा। मोहि सम भाग्यवंत नहिं दूजा॥

sādara kusala pūchi muni gyānī| āsana bara baiṭhāre ānī|| puni kari bahu prakāra prabhu pūjā| mohi sama bhāgyavaṃta nahiṃ dūjā||

जहँ लगि रहे अपर मुनि बृंदा। हरषे सब बिलोकि सुखकंदा॥

jaham̐ lagi rahe apara muni bṛṃdā| haraṣe saba biloki sukhakaṃdā||

दोहा १२

मुनि समूह महँ बैठे सन्मुख सब की ओर। सरद इंदु तन चितवत मानहुँ निकर चकोर ॥ १२॥

muni samūha maham̐ baiṭhe sanmukha saba kī ora| sarada iṃdu tana citavata mānahum̐ nikara cakora || 12||

तब रघुबीर कहा मुनि पाहीं। तुम्ह सन प्रभु दुराव कछु नाही॥ तुम्ह जानहु जेहि कारन आयउँ। ताते तात न कहि समुझायउँ॥

taba raghubīra kahā muni pāhīṃ| tumha sana prabhu durāva kachu nāhī|| tumha jānahu jehi kārana āyaum̐| tāte tāta na kahi samujhāyaum̐||

अब सो मंत्र देहु प्रभु मोही। जेहि प्रकार मारौं मुनिद्रोही॥ मुनि मुसकाने सुनि प्रभु बानी। पूछेहु नाथ मोहि का जानी॥

aba so maṃtra dehu prabhu mohī| jehi prakāra mārauṃ munidrohī|| muni musakāne suni prabhu bānī| pūchehu nātha mohi kā jānī||

तुम्हरेइँ भजन प्रभाव अघारी। जानउँ महिमा कछुक तुम्हारी॥ ऊमरि तरु बिसाल तव माया। फल ब्रह्मांड अनेक निकाया॥

tumhareim̐ bhajana prabhāva aghārī| jānaum̐ mahimā kachuka tumhārī|| ūmari taru bisāla tava māyā| phala brahmāṃḍa aneka nikāyā||

जीव चराचर जंतु समाना। भीतर बसहि न जानहिं आना॥ ते फल भच्छक कठिन कराला। तव भयँ डरत सदा सोउ काला॥

jīva carācara jaṃtu samānā| bhītara basahi na jānahiṃ ānā|| te phala bhacchaka kaṭhina karālā| tava bhayam̐ ḍarata sadā sou kālā||

ते तुम्ह सकल लोकपति साईं। पूँछेहु मोहि मनुज की नाईं॥ यह बर मागउँ कृपानिकेता। बसहु हृदयँ श्री अनुज समेता॥

te tumha sakala lokapati sāīṃ| pūm̐chehu mohi manuja kī nāīṃ|| yaha bara māgaum̐ kṛpāniketā| basahu hṛdayam̐ śrī anuja sametā||

अबिरल भगति बिरति सतसंगा। चरन सरोरुह प्रीति अभंगा॥ जद्यपि ब्रह्म अखंड अनंता। अनुभव गम्य भजहिं जेहि संता॥

abirala bhagati birati satasaṃgā| carana saroruha prīti abhaṃgā|| jadyapi brahma akhaṃḍa anaṃtā| anubhava gamya bhajahiṃ jehi saṃtā||

अस तव रूप बखानउँ जानउँ। फिरि फिरि सगुन ब्रह्म रति मानउँ॥ संतत दासन्ह देहु बड़ाई। तातें मोहि पूँछेहु रघुराई॥

asa tava rūpa bakhānaum̐ jānaum̐| phiri phiri saguna brahma rati mānaum̐|| saṃtata dāsanha dehu baṛāī| tāteṃ mohi pūm̐chehu raghurāī||

है प्रभु परम मनोहर ठाऊँ। पावन पंचबटी तेहि नाऊँ॥ दंडक बन पुनीत प्रभु करहू। उग्र साप मुनिबर कर हरहू॥

hai prabhu parama manohara ṭhāūm̐| pāvana paṃcabaṭī tehi nāūm̐|| daṃḍaka bana punīta prabhu karahū| ugra sāpa munibara kara harahū||

बास करहु तहँ रघुकुल राया। कीजे सकल मुनिन्ह पर दाया॥ चले राम मुनि आयसु पाई। तुरतहिं पंचबटी निअराई॥

bāsa karahu taham̐ raghukula rāyā| kīje sakala muninha para dāyā|| cale rāma muni āyasu pāī| turatahiṃ paṃcabaṭī niarāī||

दोहा १३

गीधराज सैं भैंट भइ बहु बिधि प्रीति बढ़ाइ। गोदावरी निकट प्रभु रहे परन गृह छाइ ॥ १३॥

gīdharāja saiṃ bhaiṃṭa bhai bahu bidhi prīti baṛhāi| godāvarī nikaṭa prabhu rahe parana gṛha chāi || 13||

जब ते राम कीन्ह तहँ बासा। सुखी भए मुनि बीती त्रासा॥ गिरि बन नदीं ताल छबि छाए। दिन दिन प्रति अति हौहिं सुहाए॥

jaba te rāma kīnha taham̐ bāsā| sukhī bhae muni bītī trāsā|| giri bana nadīṃ tāla chabi chāe| dina dina prati ati hauhiṃ suhāe||

खग मृग बृंद अनंदित रहहीं। मधुप मधुर गंजत छबि लहहीं॥

khaga mṛga bṛṃda anaṃdita rahahīṃ| madhupa madhura gaṃjata chabi lahahīṃ||

सोरठा २

सो बन बरनि न सक अहिराजा। जहाँ प्रगट रघुबीर बिराजा॥

so bana barani na saka ahirājā| jahām̐ pragaṭa raghubīra birājā||

एक बार प्रभु सुख आसीना। लछिमन बचन कहे छलहीना॥ सुर नर मुनि सचराचर साईं। मैं पूछउँ निज प्रभु की नाई॥

eka bāra prabhu sukha āsīnā| lachimana bacana kahe chalahīnā|| sura nara muni sacarācara sāīṃ| maiṃ pūchaum̐ nija prabhu kī nāī||

मोहि समुझाइ कहहु सोइ देवा। सब तजि करौं चरन रज सेवा॥ कहहु ग्यान बिराग अरु माया। कहहु सो भगति करहु जेहिं दाया॥

mohi samujhāi kahahu soi devā| saba taji karauṃ carana raja sevā|| kahahu gyāna birāga aru māyā| kahahu so bhagati karahu jehiṃ dāyā||

दोहा १४

ईस्वर जीव भेद प्रभु सकल कहौ समुझाइ। जातें होइ चरन रति सोक मोह भ्रम जाइ ॥ १४॥

īsvara jīva bheda prabhu sakala kahau samujhāi| jāteṃ hoi carana rati soka moha bhrama jāi || 14||

थोरेहि महँ सब कहउँ बुझाई। सुनहु तात मति मन चित लाई॥ मैं अरु मोर तोर तैं माया। जेहिं बस कीन्हे जीव निकाया॥

thorehi maham̐ saba kahaum̐ bujhāī| sunahu tāta mati mana cita lāī|| maiṃ aru mora tora taiṃ māyā| jehiṃ basa kīnhe jīva nikāyā||

गो गोचर जहँ लगि मन जाई। सो सब माया जानेहु भाई॥ तेहि कर भेद सुनहु तुम्ह सोऊ। बिद्या अपर अबिद्या दोऊ॥

go gocara jaham̐ lagi mana jāī| so saba māyā jānehu bhāī|| tehi kara bheda sunahu tumha soū| bidyā apara abidyā doū||

एक दुष्ट अतिसय दुखरूपा। जा बस जीव परा भवकूपा॥ एक रचइ जग गुन बस जाकें। प्रभु प्रेरित नहिं निज बल ताकें॥

eka duṣṭa atisaya dukharūpā| jā basa jīva parā bhavakūpā|| eka racai jaga guna basa jākeṃ| prabhu prerita nahiṃ nija bala tākeṃ||

ग्यान मान जहँ एकउ नाहीं। देख ब्रह्म समान सब माही॥ कहिअ तात सो परम बिरागी। तृन सम सिद्धि तीनि गुन त्यागी॥

gyāna māna jaham̐ ekau nāhīṃ| dekha brahma samāna saba māhī|| kahia tāta so parama birāgī| tṛna sama siddhi tīni guna tyāgī||

दोहा १५

माया ईस न आपु कहुँ जान कहिअ सो जीव। बंध मोच्छ प्रद सर्बपर माया प्रेरक सीव ॥ १५॥

māyā īsa na āpu kahum̐ jāna kahia so jīva| baṃdha moccha prada sarbapara māyā preraka sīva || 15||

धर्म तें बिरति जोग तें ग्याना। ग्यान मोच्छप्रद बेद बखाना॥ जातें बेगि द्रवउँ मैं भाई। सो मम भगति भगत सुखदाई॥

dharma teṃ birati joga teṃ gyānā| gyāna mocchaprada beda bakhānā|| jāteṃ begi dravaum̐ maiṃ bhāī| so mama bhagati bhagata sukhadāī||

सोरठा २

सो सुतंत्र अवलंब न आना। तेहि आधीन ग्यान बिग्याना॥ भगति तात अनुपम सुखमूला। मिलइ जो संत होइँ अनुकूला॥

so sutaṃtra avalaṃba na ānā| tehi ādhīna gyāna bigyānā|| bhagati tāta anupama sukhamūlā| milai jo saṃta hoim̐ anukūlā||

भगति कि साधन कहउँ बखानी। सुगम पंथ मोहि पावहिं प्रानी॥ प्रथमहिं बिप्र चरन अति प्रीती। निज निज कर्म निरत श्रुति रीती॥

bhagati ki sādhana kahaum̐ bakhānī| sugama paṃtha mohi pāvahiṃ prānī|| prathamahiṃ bipra carana ati prītī| nija nija karma nirata śruti rītī||

एहि कर फल पुनि बिषय बिरागा। तब मम धर्म उपज अनुरागा॥ श्रवनादिक नव भक्ति दृढ़ाहीं। मम लीला रति अति मन माहीं॥

ehi kara phala puni biṣaya birāgā| taba mama dharma upaja anurāgā|| śravanādika nava bhakti dṛṛhāhīṃ| mama līlā rati ati mana māhīṃ||

संत चरन पंकज अति प्रेमा। मन क्रम बचन भजन दृढ़ नेमा॥ गुरु पितु मातु बंधु पति देवा। सब मोहि कहँ जाने दृढ़ सेवा॥

saṃta carana paṃkaja ati premā| mana krama bacana bhajana dṛṛha nemā|| guru pitu mātu baṃdhu pati devā| saba mohi kaham̐ jāne dṛṛha sevā||

मम गुन गावत पुलक सरीरा। गदगद गिरा नयन बह नीरा॥ काम आदि मद दंभ न जाकें। तात निरंतर बस मैं ताकें॥

mama guna gāvata pulaka sarīrā| gadagada girā nayana baha nīrā|| kāma ādi mada daṃbha na jākeṃ| tāta niraṃtara basa maiṃ tākeṃ||

दोहा १६

बचन कर्म मन मोरि गति भजनु करहिं निःकाम। तिन्ह के हृदय कमल महुँ करउँ सदा बिश्राम ॥ १६॥

bacana karma mana mori gati bhajanu karahiṃ niḥkāma| tinha ke hṛdaya kamala mahum̐ karaum̐ sadā biśrāma || 16||

भगति जोग सुनि अति सुख पावा। लछिमन प्रभु चरनन्हि सिरु नावा॥ एहि बिधि गए कछुक दिन बीती। कहत बिराग ग्यान गुन नीती॥

bhagati joga suni ati sukha pāvā| lachimana prabhu carananhi siru nāvā|| ehi bidhi gae kachuka dina bītī| kahata birāga gyāna guna nītī||

सूपनखा रावन कै बहिनी। दुष्ट हृदय दारुन जस अहिनी॥ पंचबटी सो गइ एक बारा। देखि बिकल भइ जुगल कुमारा॥

sūpanakhā rāvana kai bahinī| duṣṭa hṛdaya dāruna jasa ahinī|| paṃcabaṭī so gai eka bārā| dekhi bikala bhai jugala kumārā||

भ्राता पिता पुत्र उरगारी। पुरुष मनोहर निरखत नारी॥ होइ बिकल सक मनहि न रोकी। जिमि रबिमनि द्रव रबिहि बिलोकी॥

bhrātā pitā putra uragārī| puruṣa manohara nirakhata nārī|| hoi bikala saka manahi na rokī| jimi rabimani drava rabihi bilokī||

रुचिर रुप धरि प्रभु पहिं जाई। बोली बचन बहुत मुसुकाई॥ तुम्ह सम पुरुष न मो सम नारी। यह सँजोग बिधि रचा बिचारी॥

rucira rupa dhari prabhu pahiṃ jāī| bolī bacana bahuta musukāī|| tumha sama puruṣa na mo sama nārī| yaha sam̐joga bidhi racā bicārī||

मम अनुरूप पुरुष जग माहीं। देखेउँ खोजि लोक तिहु नाहीं॥ ताते अब लगि रहिउँ कुमारी। मनु माना कछु तुम्हहि निहारी॥

mama anurūpa puruṣa jaga māhīṃ| dekheum̐ khoji loka tihu nāhīṃ|| tāte aba lagi rahium̐ kumārī| manu mānā kachu tumhahi nihārī||

सीतहि चितइ कही प्रभु बाता। अहइ कुआर मोर लघु भ्राता॥ गइ लछिमन रिपु भगिनी जानी। प्रभु बिलोकि बोले मृदु बानी॥

sītahi citai kahī prabhu bātā| ahai kuāra mora laghu bhrātā|| gai lachimana ripu bhaginī jānī| prabhu biloki bole mṛdu bānī||

सुंदरि सुनु मैं उन्ह कर दासा। पराधीन नहिं तोर सुपासा॥ प्रभु समर्थ कोसलपुर राजा। जो कछु करहिं उनहि सब छाजा॥

suṃdari sunu maiṃ unha kara dāsā| parādhīna nahiṃ tora supāsā|| prabhu samartha kosalapura rājā| jo kachu karahiṃ unahi saba chājā||

सेवक सुख चह मान भिखारी। ब्यसनी धन सुभ गति बिभिचारी॥ लोभी जसु चह चार गुमानी। नभ दुहि दूध चहत ए प्रानी॥

sevaka sukha caha māna bhikhārī| byasanī dhana subha gati bibhicārī|| lobhī jasu caha cāra gumānī| nabha duhi dūdha cahata e prānī||

पुनि फिरि राम निकट सो आई। प्रभु लछिमन पहिं बहुरि पठाई॥ लछिमन कहा तोहि सो बरई। जो तृन तोरि लाज परिहरई॥

puni phiri rāma nikaṭa so āī| prabhu lachimana pahiṃ bahuri paṭhāī|| lachimana kahā tohi so baraī| jo tṛna tori lāja pariharaī||

तब खिसिआनि राम पहिं गई। रूप भयंकर प्रगटत भई॥ सीतहि सभय देखि रघुराई। कहा अनुज सन सयन बुझाई॥

taba khisiāni rāma pahiṃ gaī| rūpa bhayaṃkara pragaṭata bhaī|| sītahi sabhaya dekhi raghurāī| kahā anuja sana sayana bujhāī||

दोहा १७

लछिमन अति लाघवँ सो नाक कान बिनु कीन्हि। ताके कर रावन कहँ मनौ चुनौती दीन्हि ॥ १७॥

lachimana ati lāghavam̐ so nāka kāna binu kīnhi| tāke kara rāvana kaham̐ manau cunautī dīnhi || 17||

नाक कान बिनु भइ बिकरारा। जनु स्त्रव सैल गैरु कै धारा॥ खर दूषन पहिं गइ बिलपाता। धिग धिग तव पौरुष बल भ्राता॥

nāka kāna binu bhai bikarārā| janu strava saila gairu kai dhārā|| khara dūṣana pahiṃ gai bilapātā| dhiga dhiga tava pauruṣa bala bhrātā||

तेहि पूछा सब कहेसि बुझाई। जातुधान सुनि सेन बनाई॥ धाए निसिचर निकर बरूथा। जनु सपच्छ कज्जल गिरि जूथा॥

tehi pūchā saba kahesi bujhāī| jātudhāna suni sena banāī|| dhāe nisicara nikara barūthā| janu sapaccha kajjala giri jūthā||

नाना बाहन नानाकारा। नानायुध धर घोर अपारा॥ सुपनखा आगें करि लीनी। असुभ रूप श्रुति नासा हीनी॥

nānā bāhana nānākārā| nānāyudha dhara ghora apārā|| supanakhā āgeṃ kari līnī| asubha rūpa śruti nāsā hīnī||

असगुन अमित होहिं भयकारी। गनहिं न मृत्यु बिबस सब झारी॥ गर्जहि तर्जहिं गगन उड़ाहीं। देखि कटकु भट अति हरषाहीं॥

asaguna amita hohiṃ bhayakārī| ganahiṃ na mṛtyu bibasa saba jhārī|| garjahi tarjahiṃ gagana uṛāhīṃ| dekhi kaṭaku bhaṭa ati haraṣāhīṃ||

कोउ कह जिअत धरहु द्वौ भाई। धरि मारहु तिय लेहु छड़ाई॥ धूरि पूरि नभ मंडल रहा। राम बोलाइ अनुज सन कहा॥

kou kaha jiata dharahu dvau bhāī| dhari mārahu tiya lehu chaṛāī|| dhūri pūri nabha maṃḍala rahā| rāma bolāi anuja sana kahā||

लै जानकिहि जाहु गिरि कंदर। आवा निसिचर कटकु भयंकर॥ रहेहु सजग सुनि प्रभु कै बानी। चले सहित श्री सर धनु पानी॥

lai jānakihi jāhu giri kaṃdara| āvā nisicara kaṭaku bhayaṃkara|| rahehu sajaga suni prabhu kai bānī| cale sahita śrī sara dhanu pānī||

देखि राम रिपुदल चलि आवा। बिहसि कठिन कोदंड चढ़ावा॥

dekhi rāma ripudala cali āvā| bihasi kaṭhina kodaṃḍa caṛhāvā||

छंद

कोदंड कठिन चढ़ाइ सिर जट जूट बाँधत सोह क्यों। मरकत सयल पर लरत दामिनि कोटि सों जुग भुजग ज्यों॥ कटि कसि निषंग बिसाल भुज गहि चाप बिसिख सुधारि कै। चितवत मनहूँ मृगराज प्रभु गजराज घटा निहारि कै॥

kodaṃḍa kaṭhina caṛhāi sira jaṭa jūṭa bām̐dhata soha kyoṃ| marakata sayala para larata dāmini koṭi soṃ juga bhujaga jyoṃ|| kaṭi kasi niṣaṃga bisāla bhuja gahi cāpa bisikha sudhāri kai| citavata manahūm̐ mṛgarāja prabhu gajarāja ghaṭā nihāri kai||

सोरठा १८

आइ गए बगमेल धरहू धरहु धावत सुभट। जथा बिलोकि अकेल बाल रबिहि घेरत दनुज ॥ १८॥

āi gae bagamela dharahū dharahu dhāvata subhaṭa| jathā biloki akela bāla rabihi gherata danuja || 18||

प्रभु बिलोकि सर सकहिं न डारी। थकित भई रजनीचर धारी॥ सचिव बोलि बोले खर दूषन। यह कोउ नृपबालक नर भूषन॥

prabhu biloki sara sakahiṃ na ḍārī| thakita bhaī rajanīcara dhārī|| saciva boli bole khara dūṣana| yaha kou nṛpabālaka nara bhūṣana||

नाग असुर सुर नर मुनि जेते। देखे जिते हते हम केते॥ हम भरि जन्म सुनहु सब भाई। देखी नहिं असि सुंदरताई॥

nāga asura sura nara muni jete| dekhe jite hate hama kete|| hama bhari janma sunahu saba bhāī| dekhī nahiṃ asi suṃdaratāī||

जद्यपि भगिनी कीन्ह कुरूपा। बध लायक नहिं पुरुष अनूपा॥ देहु तुरत निज नारि दुराई। जीअत भवन जाहु द्वौ भाई॥

jadyapi bhaginī kīnha kurūpā| badha lāyaka nahiṃ puruṣa anūpā|| dehu turata nija nāri durāī| jīata bhavana jāhu dvau bhāī||

मोर कहा तुम्ह ताहि सुनावहु। तासु बचन सुनि आतुर आवहु॥ दूतन्ह कहा राम सन जाई। सुनत राम बोले मुसकाई॥

mora kahā tumha tāhi sunāvahu| tāsu bacana suni ātura āvahu|| dūtanha kahā rāma sana jāī| sunata rāma bole musakāī||

हम छत्री मृगया बन करहीं। तुम्ह से खल मृग खौजत फिरहीं॥ रिपु बलवंत देखि नहिं डरहीं। एक बार कालहु सन लरहीं॥

hama chatrī mṛgayā bana karahīṃ| tumha se khala mṛga khaujata phirahīṃ|| ripu balavaṃta dekhi nahiṃ ḍarahīṃ| eka bāra kālahu sana larahīṃ||

जद्यपि मनुज दनुज कुल घालक। मुनि पालक खल सालक बालक॥ जौं न होइ बल घर फिरि जाहू। समर बिमुख मैं हतउँ न काहू॥

jadyapi manuja danuja kula ghālaka| muni pālaka khala sālaka bālaka|| jauṃ na hoi bala ghara phiri jāhū| samara bimukha maiṃ hataum̐ na kāhū||

रन चढ़ि करिअ कपट चतुराई। रिपु पर कृपा परम कदराई॥ दूतन्ह जाइ तुरत सब कहेऊ। सुनि खर दूषन उर अति दहेऊ॥

rana caṛhi karia kapaṭa caturāī| ripu para kṛpā parama kadarāī|| dūtanha jāi turata saba kaheū| suni khara dūṣana ura ati daheū||

छंद

उर दहेउ कहेउ कि धरहु धाए बिकट भट रजनीचरा। सर चाप तोमर सक्ति सूल पान कृ परिघ परसु धरा॥ प्रभु कीन्हि धनुष टकोर प्रथम कठोर घोर भयावहा। भए बधिर ब्याकुल जातुधान न ग्यान तेहि अवसर रहा॥

ura daheu kaheu ki dharahu dhāe bikaṭa bhaṭa rajanīcarā| sara cāpa tomara sakti sūla pāna kṛ parigha parasu dharā|| prabhu kīnhi dhanuṣa ṭakora prathama kaṭhora ghora bhayāvahā| bhae badhira byākula jātudhāna na gyāna tehi avasara rahā||

दोहा १९(क)

सावधान होइ धाए जानि सबल आराति। लागे बरषन राम पर अस्त्र सस्त्र बहुभाँति ॥ १९ (क)॥

sāvadhāna hoi dhāe jāni sabala ārāti| lāge baraṣana rāma para astra sastra bahubhām̐ti || 19 (ka)||

दोहा १९(ख)

तिन्ह के आयुध तिल सम करि काटे रघुबीर। तानिसरासन श्रवन लगि पुनि छॉड़े निज तीर ॥ १९ (ख)॥

tinha ke āyudha tila sama kari kāṭe raghubīra| tānisarāsana śravana lagi puni chôṛe nija tīra || 19 (kha)||

दोहा १

तब चले जान बबान कराल। फुंकरत जनु बहु ब्याल॥ कोपेउ समर श्रीराम। चले बिसिख निसित निकाम॥

taba cale jāna babāna karāla| phuṃkarata janu bahu byāla|| kopeu samara śrīrāma| cale bisikha nisita nikāma||

दोहा २

अवलोकि खरतर तीर। मुरि चले निसिचर बीर॥ भए क्रुद्ध तीनिउ भाइ। जो भागि रन ते जाइ॥

avaloki kharatara tīra| muri cale nisicara bīra|| bhae kruddha tīniu bhāi| jo bhāgi rana te jāi||

दोहा ३

तेहि बधब हम निज पानि। फिरे मरन मन महुँ ठानि॥ आयुध अनेक प्रकार। सनमुख ते करहिं प्रहार॥

tehi badhaba hama nija pāni| phire marana mana mahum̐ ṭhāni|| āyudha aneka prakāra| sanamukha te karahiṃ prahāra||

दोहा ४

रिपु परम कोपे जानि। प्रभु धनुष सर संधानि॥ छाँड़े बिपुल नाराच। लगे कटन बिकट पिसाच॥

ripu parama kope jāni| prabhu dhanuṣa sara saṃdhāni|| chām̐ṛe bipula nārāca| lage kaṭana bikaṭa pisāca||

दोहा ५

उर सीस भुज कर चरन। जहँ तहँ लगे महि परन॥ चिक्करत लागत बान। धर परत कुधर समान॥

ura sīsa bhuja kara carana| jaham̐ taham̐ lage mahi parana|| cikkarata lāgata bāna| dhara parata kudhara samāna||