किष्किन्धाकाण्ड

किष्किन्धाकाण्ड · दोहा १७–३०(ख)

साझा करें

सुखी मीन जे नीर अगाधा। जिमि हरि सरन न एकउ बाधा॥ फूलें कमल सोह सर कैसा। निर्गुन ब्रम्ह सगुन भएँ जैसा॥

sukhī mīna je nīra agādhā| jimi hari sarana na ekau bādhā|| phūleṃ kamala soha sara kaisā| nirguna bramha saguna bhaem̐ jaisā||

गुंजत मधुकर मुखर अनूपा। सुंदर खग रव नाना रूपा॥ चक्रबाक मन दुख निसि पैखी। जिमि दुर्जन पर संपति देखी॥

guṃjata madhukara mukhara anūpā| suṃdara khaga rava nānā rūpā|| cakrabāka mana dukha nisi paikhī| jimi durjana para saṃpati dekhī||

चातक रटत तृषा अति ओही। जिमि सुख लहइ न संकरद्रोही॥ सरदातप निसि ससि अपहरई। संत दरस जिमि पातक टरई॥

cātaka raṭata tṛṣā ati ohī| jimi sukha lahai na saṃkaradrohī|| saradātapa nisi sasi apaharaī| saṃta darasa jimi pātaka ṭaraī||

देखि इंदु चकोर समुदाई। चितवतहिं जिमि हरिजन हरि पाई॥ मसक दंस बीते हिम त्रासा। जिमि द्विज द्रोह किएँ कुल नासा॥

dekhi iṃdu cakora samudāī| citavatahiṃ jimi harijana hari pāī|| masaka daṃsa bīte hima trāsā| jimi dvija droha kiem̐ kula nāsā||

दोहा १७

भूमि जीव संकुल रहे गए सरद रितु पाइ। सदगुर मिले जाहिं जिमि संसय भ्रम समुदाइ ॥ १७॥

bhūmi jīva saṃkula rahe gae sarada ritu pāi| sadagura mile jāhiṃ jimi saṃsaya bhrama samudāi || 17||

बरषा गत निर्मल रितु आई। सुधि न तात सीता कै पाई॥ एक बार कैसेहुँ सुधि जानौं। कालहु जीत निमिष महुँ आनौं॥

baraṣā gata nirmala ritu āī| sudhi na tāta sītā kai pāī|| eka bāra kaisehum̐ sudhi jānauṃ| kālahu jīta nimiṣa mahum̐ ānauṃ||

कतहुँ रहउ जौं जीवति होई। तात जतन करि आनेउँ सोई॥ सुग्रीवहुँ सुधि मोरि बिसारी। पावा राज कोस पुर नारी॥

katahum̐ rahau jauṃ jīvati hoī| tāta jatana kari āneum̐ soī|| sugrīvahum̐ sudhi mori bisārī| pāvā rāja kosa pura nārī||

जेहिं सायक मारा मैं बाली। तेहिं सर हतौं मूढ़ कहँ काली॥ जासु कृपाँ छूटहीं मद मोहा। ता कहुँ उमा कि सपनेहुँ कोहा॥

jehiṃ sāyaka mārā maiṃ bālī| tehiṃ sara hatauṃ mūṛha kaham̐ kālī|| jāsu kṛpām̐ chūṭahīṃ mada mohā| tā kahum̐ umā ki sapanehum̐ kohā||

जानहिं यह चरित्र मुनि ग्यानी। जिन्ह रघुबीर चरन रति मानी॥ लछिमन क्रोधवंत प्रभु जाना। धनुष चढ़ाइ गहे कर बाना॥

jānahiṃ yaha caritra muni gyānī| jinha raghubīra carana rati mānī|| lachimana krodhavaṃta prabhu jānā| dhanuṣa caṛhāi gahe kara bānā||

दोहा १८

तब अनुजहि समुझावा रघुपति करुना सींव। भय देखाइ लै आवहु तात सखा सुग्रीव ॥ १८॥

taba anujahi samujhāvā raghupati karunā sīṃva| bhaya dekhāi lai āvahu tāta sakhā sugrīva || 18||

इहाँ पवनसुत हृदयँ बिचारा। राम काजु सुग्रीवँ बिसारा॥ निकट जाइ चरनन्हि सिरु नावा। चारिहु बिधि तेहि कहि समुझावा॥

ihām̐ pavanasuta hṛdayam̐ bicārā| rāma kāju sugrīvam̐ bisārā|| nikaṭa jāi carananhi siru nāvā| cārihu bidhi tehi kahi samujhāvā||

सुनि सुग्रीवँ परम भय माना। बिषयँ मोर हरि लीन्हेउ ग्याना॥ अब मारुतसुत दूत समूहा। पठवहु जहँ तहँ बानर जूहा॥

suni sugrīvam̐ parama bhaya mānā| biṣayam̐ mora hari līnheu gyānā|| aba mārutasuta dūta samūhā| paṭhavahu jaham̐ taham̐ bānara jūhā||

कहहु पाख महुँ आव न जोई। मोरें कर ता कर बध होई॥ तब हनुमंत बोलाए दूता। सब कर करि सनमान बहूता॥

kahahu pākha mahum̐ āva na joī| moreṃ kara tā kara badha hoī|| taba hanumaṃta bolāe dūtā| saba kara kari sanamāna bahūtā||

भय अरु प्रीति नीति देखाई। चले सकल चरनन्हि सिर नाई॥ एहि अवसर लछिमन पुर आए। क्रोध देखि जहँ तहँ कपि धाए॥

bhaya aru prīti nīti dekhāī| cale sakala carananhi sira nāī|| ehi avasara lachimana pura āe| krodha dekhi jaham̐ taham̐ kapi dhāe||

दोहा १९

धनुष चढ़ाइ कहा तब जारि करउँ पुर छार। ब्याकुल नगर देखि तब आयउ बालिकुमार ॥ १९॥

dhanuṣa caṛhāi kahā taba jāri karaum̐ pura chāra| byākula nagara dekhi taba āyau bālikumāra || 19||

चरन नाइ सिरु बिनती कीन्ही। लछिमन अभय बाँह तेहि दीन्ही॥ क्रोधवंत लछिमन सुनि काना। कह कपीस अति भयँ अकुलाना॥

carana nāi siru binatī kīnhī| lachimana abhaya bām̐ha tehi dīnhī|| krodhavaṃta lachimana suni kānā| kaha kapīsa ati bhayam̐ akulānā||

सुनु हनुमंत संग लै तारा। करि बिनती समुझाउ कुमारा॥ तारा सहित जाइ हनुमाना। चरन बंदि प्रभु सुजस बखाना॥

sunu hanumaṃta saṃga lai tārā| kari binatī samujhāu kumārā|| tārā sahita jāi hanumānā| carana baṃdi prabhu sujasa bakhānā||

करि बिनती मंदिर लै आए। चरन पखारि पलँग बैठाए॥ तब कपीस चरनन्हि सिरु नावा। गहि भुज लछिमन कंठ लगावा॥

kari binatī maṃdira lai āe| carana pakhāri palam̐ga baiṭhāe|| taba kapīsa carananhi siru nāvā| gahi bhuja lachimana kaṃṭha lagāvā||

नाथ बिषय सम मद कछु नाहीं। मुनि मन मोह करइ छन माहीं॥ सुनत बिनीत बचन सुख पावा। लछिमन तेहि बहु बिधि समुझावा॥

nātha biṣaya sama mada kachu nāhīṃ| muni mana moha karai chana māhīṃ|| sunata binīta bacana sukha pāvā| lachimana tehi bahu bidhi samujhāvā||

पवन तनय सब कथा सुनाई। जेहि बिधि गए दूत समुदाई॥

pavana tanaya saba kathā sunāī| jehi bidhi gae dūta samudāī||

दोहा २०

हरषि चले सुग्रीव तब अंगदादि कपि साथ। रामानुज आगें करि आए जहँ रघुनाथ ॥ २०॥

haraṣi cale sugrīva taba aṃgadādi kapi sātha| rāmānuja āgeṃ kari āe jaham̐ raghunātha || 20||

नाइ चरन सिरु कह कर जोरी। नाथ मोहि कछु नाहिन खोरी॥ अतिसय प्रबल देव तब माया। छूटइ राम करहु जौं दाया॥

nāi carana siru kaha kara jorī| nātha mohi kachu nāhina khorī|| atisaya prabala deva taba māyā| chūṭai rāma karahu jauṃ dāyā||

बिषय बस्य सुर नर मुनि स्वामी। मैं पावँर पसु कपि अति कामी॥ नारि नयन सर जाहि न लागा। घोर क्रोध तम निसि जो जागा॥

biṣaya basya sura nara muni svāmī| maiṃ pāvam̐ra pasu kapi ati kāmī|| nāri nayana sara jāhi na lāgā| ghora krodha tama nisi jo jāgā||

लोभ पाँस जेहिं गर न बँधाया। सो नर तुम्ह समान रघुराया॥ यह गुन साधन तें नहिं होई। तुम्हरी कृपाँ पाव कोइ कोई॥

lobha pām̐sa jehiṃ gara na bam̐dhāyā| so nara tumha samāna raghurāyā|| yaha guna sādhana teṃ nahiṃ hoī| tumharī kṛpām̐ pāva koi koī||

तब रघुपति बोले मुसकाई। तुम्ह प्रिय मोहि भरत जिमि भाई॥ अब सोइ जतनु करहु मन लाई। जेहि बिधि सीता कै सुधि पाई॥

taba raghupati bole musakāī| tumha priya mohi bharata jimi bhāī|| aba soi jatanu karahu mana lāī| jehi bidhi sītā kai sudhi pāī||

दोहा २१

एहि बिधि होत बतकही आए बानर जूथ। नाना बरन सकल दिसि देखिअ कीस बरुथ ॥ २१॥

ehi bidhi hota batakahī āe bānara jūtha| nānā barana sakala disi dekhia kīsa barutha || 21||

बानर कटक उमा में देखा। सो मूरुख जो करन चह लेखा॥ आइ राम पद नावहिं माथा। निरखि बदनु सब होहिं सनाथा॥

bānara kaṭaka umā meṃ dekhā| so mūrukha jo karana caha lekhā|| āi rāma pada nāvahiṃ māthā| nirakhi badanu saba hohiṃ sanāthā||

अस कपि एक न सेना माहीं। राम कुसल जेहि पूछी नाहीं॥ यह कछु नहिं प्रभु कइ अधिकाई। बिस्वरूप ब्यापक रघुराई॥

asa kapi eka na senā māhīṃ| rāma kusala jehi pūchī nāhīṃ|| yaha kachu nahiṃ prabhu kai adhikāī| bisvarūpa byāpaka raghurāī||

ठाढ़े जहँ तहँ आयसु पाई। कह सुग्रीव सबहि समुझाई॥ राम काजु अरु मोर निहोरा। बानर जूथ जाहु चहुँ ओरा॥

ṭhāṛhe jaham̐ taham̐ āyasu pāī| kaha sugrīva sabahi samujhāī|| rāma kāju aru mora nihorā| bānara jūtha jāhu cahum̐ orā||

जनकसुता कहुँ खोजहु जाई। मास दिवस महँ आएहु भाई॥ अवधि मेटि जो बिनु सुधि पाएँ। आवइ बनिहि सो मोहि मराएँ॥

janakasutā kahum̐ khojahu jāī| māsa divasa maham̐ āehu bhāī|| avadhi meṭi jo binu sudhi pāem̐| āvai banihi so mohi marāem̐||

दोहा २२

बचन सुनत सब बानर जहँ तहँ चले तुरंत। तब सुग्रीवँ बोलाए अंगद नल हनुमंत ॥ २२॥

bacana sunata saba bānara jaham̐ taham̐ cale turaṃta| taba sugrīvam̐ bolāe aṃgada nala hanumaṃta || 22||

सुनहु नील अंगद हनुमाना। जामवंत मतिधीर सुजाना॥ सकल सुभट मिलि दच्छिन जाहू। सीता सुधि पूँछेउ सब काहू॥

sunahu nīla aṃgada hanumānā| jāmavaṃta matidhīra sujānā|| sakala subhaṭa mili dacchina jāhū| sītā sudhi pūm̐cheu saba kāhū||

मन क्रम बचन सो जतन बिचारेहु। रामचंद्र कर काजु सँवारेहु॥ भानु पीठि सेइअ उर आगी। स्वामिहि सर्ब भाव छल त्यागी॥

mana krama bacana so jatana bicārehu| rāmacaṃdra kara kāju sam̐vārehu|| bhānu pīṭhi seia ura āgī| svāmihi sarba bhāva chala tyāgī||

तजि माया सेइअ परलोका। मिटहिं सकल भव संभव सोका॥ देह धरे कर यह फलु भाई। भजिअ राम सब काम बिहाई॥

taji māyā seia paralokā| miṭahiṃ sakala bhava saṃbhava sokā|| deha dhare kara yaha phalu bhāī| bhajia rāma saba kāma bihāī||

सोइ गुनग्य सोई बड़भागी। जो रघुबीर चरन अनुरागी॥ आयसु मागि चरन सिरु नाई। चले हरषि सुमिरत रघुराई॥

soi gunagya soī baṛabhāgī| jo raghubīra carana anurāgī|| āyasu māgi carana siru nāī| cale haraṣi sumirata raghurāī||

पाछें पवन तनय सिरु नावा। जानि काज प्रभु निकट बोलावा॥ परसा सीस सरोरुह पानी। करमुद्रिका दीन्हि जन जानी॥

pācheṃ pavana tanaya siru nāvā| jāni kāja prabhu nikaṭa bolāvā|| parasā sīsa saroruha pānī| karamudrikā dīnhi jana jānī||

बहु प्रकार सीतहि समुझाएहु। कहि बल बिरह बेगि तुम्ह आएहु॥ हनुमत जन्म सुफल करि माना। चलेउ हृदयँ धरि कृपानिधाना॥

bahu prakāra sītahi samujhāehu| kahi bala biraha begi tumha āehu|| hanumata janma suphala kari mānā| caleu hṛdayam̐ dhari kṛpānidhānā||

जद्यपि प्रभु जानत सब बाता। राजनीति राखत सुरत्राता॥

jadyapi prabhu jānata saba bātā| rājanīti rākhata suratrātā||

दोहा २३

चले सकल बन खोजत सरिता सर गिरि खोह। राम काज लयलीन मन बिसरा तन कर छोह ॥ २३॥

cale sakala bana khojata saritā sara giri khoha| rāma kāja layalīna mana bisarā tana kara choha || 23||

कतहुँ होइ निसिचर सैं भेटा। प्रान लेहिं एक एक चपेटा॥ बहु प्रकार गिरि कानन हेरहिं। कोउ मुनि मिलत ताहि सब घेरहिं॥

katahum̐ hoi nisicara saiṃ bheṭā| prāna lehiṃ eka eka capeṭā|| bahu prakāra giri kānana herahiṃ| kou muni milata tāhi saba gherahiṃ||

लागि तृषा अतिसय अकुलाने। मिलइ न जल घन गहन भुलाने॥ मन हनुमान कीन्ह अनुमाना। मरन चहत सब बिनु जल पाना॥

lāgi tṛṣā atisaya akulāne| milai na jala ghana gahana bhulāne|| mana hanumāna kīnha anumānā| marana cahata saba binu jala pānā||

चढ़ि गिरि सिखर चहूँ दिसि देखा। भूमि बिबिर एक कौतुक पेखा॥ चक्रबाक बक हंस उड़ाहीं। बहुतक खग प्रबिसहिं तेहि माहीं॥

caṛhi giri sikhara cahūm̐ disi dekhā| bhūmi bibira eka kautuka pekhā|| cakrabāka baka haṃsa uṛāhīṃ| bahutaka khaga prabisahiṃ tehi māhīṃ||

गिरि ते उतरि पवनसुत आवा। सब कहुँ लै सोइ बिबर देखावा॥ आगें कै हनुमंतहि लीन्हा। पैठे बिबर बिलंबु न कीन्हा॥

giri te utari pavanasuta āvā| saba kahum̐ lai soi bibara dekhāvā|| āgeṃ kai hanumaṃtahi līnhā| paiṭhe bibara bilaṃbu na kīnhā||

दोहा २४

दीख जाइ उपवन बर सर बिगसित बहु कंज। मंदिर एक रुचिर तहँ बैठि नारि तप पुंज ॥ २४॥

dīkha jāi upavana bara sara bigasita bahu kaṃja| maṃdira eka rucira taham̐ baiṭhi nāri tapa puṃja || 24||

दूरि ते ताहि सबन्हि सिर नावा। पूछें निज बृत्तांत सुनावा॥ तेहिं तब कहा करहु जल पाना। खाहु सुरस सुंदर फल नाना॥

dūri te tāhi sabanhi sira nāvā| pūcheṃ nija bṛttāṃta sunāvā|| tehiṃ taba kahā karahu jala pānā| khāhu surasa suṃdara phala nānā||

मज्जनु कीन्ह मधुर फल खाए। तासु निकट पुनि सब चलि आए॥ तेहिं सब आपनि कथा सुनाई। मैं अब जाब जहाँ रघुराई॥

majjanu kīnha madhura phala khāe| tāsu nikaṭa puni saba cali āe|| tehiṃ saba āpani kathā sunāī| maiṃ aba jāba jahām̐ raghurāī||

मूदहु नयन बिबर तजि जाहू। पैहहु सीतहि जनि पछिताहू॥ नयन मूदि पुनि देखहिं बीरा। ठाढ़े सकल सिंधु कें तीरा॥

mūdahu nayana bibara taji jāhū| paihahu sītahi jani pachitāhū|| nayana mūdi puni dekhahiṃ bīrā| ṭhāṛhe sakala siṃdhu keṃ tīrā||

सोरठा ४

सो पुनि गई जहाँ रघुनाथा। जाइ कमल पद नाएसि माथा॥ नाना भाँति बिनय तेहिं कीन्ही। अनपायनी भगति प्रभु दीन्ही॥

so puni gaī jahām̐ raghunāthā| jāi kamala pada nāesi māthā|| nānā bhām̐ti binaya tehiṃ kīnhī| anapāyanī bhagati prabhu dīnhī||

दोहा २५

बदरीबन कहुँ सो गई प्रभु अग्या धरि सीस। उर धरि राम चरन जुग जे बंदत अज ईस ॥ २५॥

badarībana kahum̐ so gaī prabhu agyā dhari sīsa| ura dhari rāma carana juga je baṃdata aja īsa || 25||

इहाँ बिचारहिं कपि मन माहीं। बीती अवधि काज कछु नाहीं॥ सब मिलि कहहिं परस्पर बाता। बिनु सुधि लएँ करब का भ्राता॥

ihām̐ bicārahiṃ kapi mana māhīṃ| bītī avadhi kāja kachu nāhīṃ|| saba mili kahahiṃ paraspara bātā| binu sudhi laem̐ karaba kā bhrātā||

कह अंगद लोचन भरि बारी। दुहुँ प्रकार भइ मृत्यु हमारी॥ इहाँ न सुधि सीता कै पाई। उहाँ गएँ मारिहि कपिराई॥

kaha aṃgada locana bhari bārī| duhum̐ prakāra bhai mṛtyu hamārī|| ihām̐ na sudhi sītā kai pāī| uhām̐ gaem̐ mārihi kapirāī||

पिता बधे पर मारत मोही। राखा राम निहोर न ओही॥ पुनि पुनि अंगद कह सब पाहीं। मरन भयउ कछु संसय नाहीं॥

pitā badhe para mārata mohī| rākhā rāma nihora na ohī|| puni puni aṃgada kaha saba pāhīṃ| marana bhayau kachu saṃsaya nāhīṃ||

अंगद बचन सुनत कपि बीरा। बोलि न सकहिं नयन बह नीरा॥ छन एक सोच मगन होइ रहे। पुनि अस वचन कहत सब भए॥

aṃgada bacana sunata kapi bīrā| boli na sakahiṃ nayana baha nīrā|| chana eka soca magana hoi rahe| puni asa vacana kahata saba bhae||

हम सीता कै सुधि लिन्हें बिना। नहिं जैंहैं जुबराज प्रबीना॥ अस कहि लवन सिंधु तट जाई। बैठे कपि सब दर्भ डसाई॥

hama sītā kai sudhi linheṃ binā| nahiṃ jaiṃhaiṃ jubarāja prabīnā|| asa kahi lavana siṃdhu taṭa jāī| baiṭhe kapi saba darbha ḍasāī||

जामवंत अंगद दुख देखी। कहिं कथा उपदेस बिसेषी॥ तात राम कहुँ नर जनि मानहु। निर्गुन ब्रम्ह अजित अज जानहु॥

jāmavaṃta aṃgada dukha dekhī| kahiṃ kathā upadesa biseṣī|| tāta rāma kahum̐ nara jani mānahu| nirguna bramha ajita aja jānahu||

हम सब सेवक अति बड़भागी। संतत सगुन ब्रह्म अनुरागी॥

hama saba sevaka ati baṛabhāgī| saṃtata saguna brahma anurāgī||

दोहा २६

निज इच्छा प्रभु अवतरइ सुर महि गो द्विज लागि। सगुन उपासक संग तहँ रहहिं मोच्छ सब त्यागि ॥ २६॥

nija icchā prabhu avatarai sura mahi go dvija lāgi| saguna upāsaka saṃga taham̐ rahahiṃ moccha saba tyāgi || 26||

एहि बिधि कथा कहहिं बहु भाँती। गिरि कंदराँ सुनी संपाती॥ बाहेर होइ देखि बहु कीसा। मोहि अहार दीन्ह जगदीसा॥

ehi bidhi kathā kahahiṃ bahu bhām̐tī| giri kaṃdarām̐ sunī saṃpātī|| bāhera hoi dekhi bahu kīsā| mohi ahāra dīnha jagadīsā||

आजु सबहि कहँ भच्छन करऊँ। दिन बहु चले अहार बिनु मरऊँ॥ कबहुँ न मिल भरि उदर अहारा। आजु दीन्ह बिधि एकहिं बारा॥

āju sabahi kaham̐ bhacchana karaūm̐| dina bahu cale ahāra binu maraūm̐|| kabahum̐ na mila bhari udara ahārā| āju dīnha bidhi ekahiṃ bārā||

डरपे गीध बचन सुनि काना। अब भा मरन सत्य हम जाना॥ कपि सब उठे गीध कहँ देखी। जामवंत मन सोच बिसेषी॥

ḍarape gīdha bacana suni kānā| aba bhā marana satya hama jānā|| kapi saba uṭhe gīdha kaham̐ dekhī| jāmavaṃta mana soca biseṣī||

कह अंगद बिचारि मन माहीं। धन्य जटायू सम कोउ नाहीं॥ राम काज कारन तनु त्यागी। हरि पुर गयउ परम बड़ भागी॥

kaha aṃgada bicāri mana māhīṃ| dhanya jaṭāyū sama kou nāhīṃ|| rāma kāja kārana tanu tyāgī| hari pura gayau parama baṛa bhāgī||

सुनि खग हरष सोक जुत बानी। आवा निकट कपिन्ह भय मानी॥ तिन्हहि अभय करि पूछेसि जाई। कथा सकल तिन्ह ताहि सुनाई॥

suni khaga haraṣa soka juta bānī| āvā nikaṭa kapinha bhaya mānī|| tinhahi abhaya kari pūchesi jāī| kathā sakala tinha tāhi sunāī||

सुनि संपाति बंधु कै करनी। रघुपति महिमा बधुबिधि बरनी॥

suni saṃpāti baṃdhu kai karanī| raghupati mahimā badhubidhi baranī||

दोहा २७

मोहि लै जाहु सिंधुतट देउँ तिलांजलि ताहि। बचन सहाइ करवि मैं पैहहु खोजहु जाहि ॥ २७॥

mohi lai jāhu siṃdhutaṭa deum̐ tilāṃjali tāhi| bacana sahāi karavi maiṃ paihahu khojahu jāhi || 27||

अनुज क्रिया करि सागर तीरा। कहि निज कथा सुनहु कपि बीरा॥ हम द्वौ बंधु प्रथम तरुनाई। गगन गए रबि निकट उडाई॥

anuja kriyā kari sāgara tīrā| kahi nija kathā sunahu kapi bīrā|| hama dvau baṃdhu prathama tarunāī| gagana gae rabi nikaṭa uḍāī||

तेज न सहि सक सो फिरि आवा। मै अभिमानी रबि निअरावा॥ जरे पंख अति तेज अपारा। परेउँ भूमि करि घोर चिकारा॥

teja na sahi saka so phiri āvā| mai abhimānī rabi niarāvā|| jare paṃkha ati teja apārā| pareum̐ bhūmi kari ghora cikārā||

मुनि एक नाम चंद्रमा ओही। लागी दया देखी करि मोही॥ बहु प्रकार तेंहि ग्यान सुनावा। देहि जनित अभिमानी छड़ावा॥

muni eka nāma caṃdramā ohī| lāgī dayā dekhī kari mohī|| bahu prakāra teṃhi gyāna sunāvā| dehi janita abhimānī chaṛāvā||

त्रेताँ ब्रह्म मनुज तनु धरिही। तासु नारि निसिचर पति हरिही॥ तासु खोज पठइहि प्रभू दूता। तिन्हहि मिलें तैं होब पुनीता॥

tretām̐ brahma manuja tanu dharihī| tāsu nāri nisicara pati harihī|| tāsu khoja paṭhaihi prabhū dūtā| tinhahi mileṃ taiṃ hoba punītā||

जमिहहिं पंख करसि जनि चिंता। तिन्हहि देखाइ देहेसु तैं सीता॥ मुनि कइ गिरा सत्य भइ आजू। सुनि मम बचन करहु प्रभु काजू॥

jamihahiṃ paṃkha karasi jani ciṃtā| tinhahi dekhāi dehesu taiṃ sītā|| muni kai girā satya bhai ājū| suni mama bacana karahu prabhu kājū||

गिरि त्रिकूट ऊपर बस लंका। तहँ रह रावन सहज असंका॥ तहँ असोक उपबन जहँ रहई। सीता बैठि सोच रत अहई॥

giri trikūṭa ūpara basa laṃkā| taham̐ raha rāvana sahaja asaṃkā|| taham̐ asoka upabana jaham̐ rahaī| sītā baiṭhi soca rata ahaī||

दोहा २८

मैं देखउँ तुम्ह नाहि गीघहि दष्टि अपार। बूढ भयउँ न त करतेउँ कछुक सहाय तुम्हार ॥ २८॥

maiṃ dekhaum̐ tumha nāhi gīghahi daṣṭi apāra| būḍha bhayaum̐ na ta karateum̐ kachuka sahāya tumhāra || 28||

जो नाघइ सत जोजन सागर। करइ सो राम काज मति आगर॥ मोहि बिलोकि धरहु मन धीरा। राम कृपाँ कस भयउ सरीरा॥

jo nāghai sata jojana sāgara| karai so rāma kāja mati āgara|| mohi biloki dharahu mana dhīrā| rāma kṛpām̐ kasa bhayau sarīrā||

पापिउ जा कर नाम सुमिरहीं। अति अपार भवसागर तरहीं॥ तासु दूत तुम्ह तजि कदराई। राम हृदयँ धरि करहु उपाई॥

pāpiu jā kara nāma sumirahīṃ| ati apāra bhavasāgara tarahīṃ|| tāsu dūta tumha taji kadarāī| rāma hṛdayam̐ dhari karahu upāī||

अस कहि गरुड़ गीध जब गयऊ। तिन्ह कें मन अति बिसमय भयऊ॥ निज निज बल सब काहूँ भाषा। पार जाइ कर संसय राखा॥

asa kahi garuṛa gīdha jaba gayaū| tinha keṃ mana ati bisamaya bhayaū|| nija nija bala saba kāhūm̐ bhāṣā| pāra jāi kara saṃsaya rākhā||

जरठ भयउँ अब कहइ रिछेसा। नहिं तन रहा प्रथम बल लेसा॥ जबहिं त्रिबिक्रम भए खरारी। तब मैं तरुन रहेउँ बल भारी॥

jaraṭha bhayaum̐ aba kahai richesā| nahiṃ tana rahā prathama bala lesā|| jabahiṃ tribikrama bhae kharārī| taba maiṃ taruna raheum̐ bala bhārī||

दोहा २९

बलि बाँधत प्रभु बाढेउ सो तनु बरनि न जाई। उभय धरी महँ दीन्ही सात प्रदच्छिन धाइ ॥ २९॥

bali bām̐dhata prabhu bāḍheu so tanu barani na jāī| ubhaya dharī maham̐ dīnhī sāta pradacchina dhāi || 29||

अंगद कहइ जाउँ मैं पारा। जियँ संसय कछु फिरती बारा॥ जामवंत कह तुम्ह सब लायक। पठइअ किमि सब ही कर नायक॥

aṃgada kahai jāum̐ maiṃ pārā| jiyam̐ saṃsaya kachu phiratī bārā|| jāmavaṃta kaha tumha saba lāyaka| paṭhaia kimi saba hī kara nāyaka||

कहइ रीछपति सुनु हनुमाना। का चुप साधि रहेहु बलवाना॥ पवन तनय बल पवन समाना। बुधि बिबेक बिग्यान निधाना॥

kahai rīchapati sunu hanumānā| kā cupa sādhi rahehu balavānā|| pavana tanaya bala pavana samānā| budhi bibeka bigyāna nidhānā||

कवन सो काज कठिन जग माहीं। जो नहिं होइ तात तुम्ह पाहीं॥ राम काज लगि तब अवतारा। सुनतहिं भयउ पर्वताकारा॥

kavana so kāja kaṭhina jaga māhīṃ| jo nahiṃ hoi tāta tumha pāhīṃ|| rāma kāja lagi taba avatārā| sunatahiṃ bhayau parvatākārā||

कनक बरन तन तेज बिराजा। मानहु अपर गिरिन्ह कर राजा॥ सिंहनाद करि बारहिं बारा। लीलहीं नाषउँ जलनिधि खारा॥

kanaka barana tana teja birājā| mānahu apara girinha kara rājā|| siṃhanāda kari bārahiṃ bārā| līlahīṃ nāṣaum̐ jalanidhi khārā||

सहित सहाय रावनहि मारी। आनउँ इहाँ त्रिकूट उपारी॥ जामवंत मैं पूँछउँ तोही। उचित सिखावनु दीजहु मोही॥

sahita sahāya rāvanahi mārī| ānaum̐ ihām̐ trikūṭa upārī|| jāmavaṃta maiṃ pūm̐chaum̐ tohī| ucita sikhāvanu dījahu mohī||

एतना करहु तात तुम्ह जाई। किष्किन्धाकाएड सीतहि देखि कहह सुधि आई ७9१४॥ तब निज भुज बल राजिव नैना। कौतुक लागि संग कपि सेना॥

etanā karahu tāta tumha jāī| kiṣkindhākāeḍa sītahi dekhi kahaha sudhi āī 7914|| taba nija bhuja bala rājiva nainā| kautuka lāgi saṃga kapi senā||

छंद

कपि सेन संग सँघारि निसिचर रामु सीतहि आनिहैं। त्रैलोक पावन सुजसु सुर मुनि नारदादि बखानिहैं॥ जो सुनत गावत कहत समुझत परम पद नर पावई। रघुबीर पद पाथोज मधुकर दास तुलसी गावई॥

kapi sena saṃga sam̐ghāri nisicara rāmu sītahi ānihaiṃ| trailoka pāvana sujasu sura muni nāradādi bakhānihaiṃ|| jo sunata gāvata kahata samujhata parama pada nara pāvaī| raghubīra pada pāthoja madhukara dāsa tulasī gāvaī||

दोहा ३०(क)

भव भेषज रघुनाथ जसु सुनहि जे नर अरु नारि। तिन्ह कर सकल मनोरथ सिद्ध करिहि त्रिसिरारि ॥ ३० (क)॥

bhava bheṣaja raghunātha jasu sunahi je nara aru nāri| tinha kara sakala manoratha siddha karihi trisirāri || 30 (ka)||

सोरठा ३०(ख)

नीलोत्पल तन स्याम काम कोटि सोभा अधिक। सुनिअ तासु गुन ग्राम जासु नाम अघ खग बधिक ॥ ३० (ख)॥

nīlotpala tana syāma kāma koṭi sobhā adhika| sunia tāsu guna grāma jāsu nāma agha khaga badhika || 30 (kha)||