बालकाण्ड

बालकाण्ड · दोहा ३४७–३६१

साझा करें

धूप धूम नभु मेचक भयऊ। सावन घन घमंडु जनु ठयऊ॥ सुरतरु सुमन माल सुर बरषहिं। मनहुँ बलाक अवलि मनु करषहिं॥

dhūpa dhūma nabhu mecaka bhayaū| sāvana ghana ghamaṃḍu janu ṭhayaū|| surataru sumana māla sura baraṣahiṃ| manahum̐ balāka avali manu karaṣahiṃ||

मंजुल मनिमय बंदनिवारे। मनहुँ पाकरिपु चाप सँवारे॥ प्रगटहिं दुरहिं अटन्ह पर भामिनि। चारु चपल जनु दमकहिं दामिनि॥

maṃjula manimaya baṃdanivāre| manahum̐ pākaripu cāpa sam̐vāre|| pragaṭahiṃ durahiṃ aṭanha para bhāmini| cāru capala janu damakahiṃ dāmini||

दुंदुभि धुनि घन गरजनि घोरा। जाचक चातक दादुर मोरा॥ सुर सुगन्ध सुचि बरषहिं बारी। सुखी सकल ससि पुर नर नारी॥

duṃdubhi dhuni ghana garajani ghorā| jācaka cātaka dādura morā|| sura sugandha suci baraṣahiṃ bārī| sukhī sakala sasi pura nara nārī||

समउ जानी गुर आयसु दीन्हा। पुर प्रबेसु रघुकुलमनि कीन्हा॥ सुमिरि संभु गिरजा गनराजा। मुदित महीपति सहित समाजा॥

samau jānī gura āyasu dīnhā| pura prabesu raghukulamani kīnhā|| sumiri saṃbhu girajā ganarājā| mudita mahīpati sahita samājā||

दोहा ३४७

होहिं सगुन बरषहिं सुमन सुर दुंदुभीं बजाइ। बिबुध बधू नाचहिं मुदित मंजुल मंगल गाइ ॥ ३४७॥

hohiṃ saguna baraṣahiṃ sumana sura duṃdubhīṃ bajāi| bibudha badhū nācahiṃ mudita maṃjula maṃgala gāi || 347||

मागध सूत बंदि नट नागर। गावहिं जसु तिहु लोक उजागर॥ जय धुनि बिमल बेद बर बानी। दस दिसि सुनिअ सुमंगल सानी॥

māgadha sūta baṃdi naṭa nāgara| gāvahiṃ jasu tihu loka ujāgara|| jaya dhuni bimala beda bara bānī| dasa disi sunia sumaṃgala sānī||

बिपुल बाजने बाजन लागे। नभ सुर नगर लोग अनुरागे॥ बने बराती बरनि न जाहीं। महा मुदित मन सुख न समाहीं॥

bipula bājane bājana lāge| nabha sura nagara loga anurāge|| bane barātī barani na jāhīṃ| mahā mudita mana sukha na samāhīṃ||

पुरबासिन्ह तब राय जोहारे। देखत रामहि भए सुखारे॥ करहिं निछावरि मनिगन चीरा। बारि बिलोचन पुलक सरीरा॥

purabāsinha taba rāya johāre| dekhata rāmahi bhae sukhāre|| karahiṃ nichāvari manigana cīrā| bāri bilocana pulaka sarīrā||

आरति करहिं मुदित पुर नारी। हरषहिं निरखि कुँअर बर चारी॥ सिबिका सुभग ओहार उघारी। देखि दुलहिनिन्ह होहिं सुखारी॥

ārati karahiṃ mudita pura nārī| haraṣahiṃ nirakhi kum̐ara bara cārī|| sibikā subhaga ohāra ughārī| dekhi dulahininha hohiṃ sukhārī||

दोहा ३४८

एहि बिधि सबही देत सुखु आए राजदुआर। मुदित मातु परुछनि करहिं बधुन्ह समेत कुमार ॥ ३४८॥

ehi bidhi sabahī deta sukhu āe rājaduāra| mudita mātu paruchani karahiṃ badhunha sameta kumāra || 348||

भूषन मनि पट नाना जाती। करही निछावरि अगनित भाँती॥

bhūṣana mani paṭa nānā jātī| karahī nichāvari aganita bhām̐tī||

बधुन्ह समेत देखि सुत चारी। परमानंद मगन महतारी॥ पुनि पुनि सीय राम छबि देखी। मुदित सफल जग जीवन लेखी॥

badhunha sameta dekhi suta cārī| paramānaṃda magana mahatārī|| puni puni sīya rāma chabi dekhī| mudita saphala jaga jīvana lekhī||

सखीं सीय मुख पुनि पुनि चाही। गान करहिं निज सुकृत सराही॥ बरषहिं सुमन छनहिं छन देवा। नाचहिं गावहिं लावहिं सेवा॥

sakhīṃ sīya mukha puni puni cāhī| gāna karahiṃ nija sukṛta sarāhī|| baraṣahiṃ sumana chanahiṃ chana devā| nācahiṃ gāvahiṃ lāvahiṃ sevā||

देखि मनोहर चारिउ जोरीं। सारद उपमा सकल ढँढोरीं॥ देत न बनहिं निपट लघु लागी। एकटक रहीं रूप अनुरागीं॥

dekhi manohara cāriu jorīṃ| sārada upamā sakala ḍham̐ḍhorīṃ|| deta na banahiṃ nipaṭa laghu lāgī| ekaṭaka rahīṃ rūpa anurāgīṃ||

दोहा ३४९

निगम नीति कुल रीति करि अरघ पाँवड़े देत। बधुन्ह सहित सुत परिछि सब चलीं लवाइ निकेत ॥ ३४९॥

nigama nīti kula rīti kari aragha pām̐vaṛe deta| badhunha sahita suta parichi saba calīṃ lavāi niketa || 349||

चारि सिंघासन सहज सुहाए। जनु मनोज निज हाथ बनाए॥ तिन्ह पर कुअँरि कुअँर बैठारे। सादर पाय पुनित पखारे॥

cāri siṃghāsana sahaja suhāe| janu manoja nija hātha banāe|| tinha para kuam̐ri kuam̐ra baiṭhāre| sādara pāya punita pakhāre||

धूप दीप नैबेद बेद बिधि। पूजे बर दुलहिनि मंगलनिधि॥

dhūpa dīpa naibeda beda bidhi| pūje bara dulahini maṃgalanidhi||

बस्तु अनेक निछावर होहीं। भरीं प्रमोद मातु सब सोहीं॥ पावा परम तत्व जनु जोगीं। अमृत लहेउ जनु संतत रोगीं॥

bastu aneka nichāvara hohīṃ| bharīṃ pramoda mātu saba sohīṃ|| pāvā parama tatva janu jogīṃ| amṛta laheu janu saṃtata rogīṃ||

जनम रंक जनु पारस पावा। अंधहि लोचन लाभु सुहावा॥ मूक बदन जनु सारद छाई। मानहुँ समर सूर जय पाई॥

janama raṃka janu pārasa pāvā| aṃdhahi locana lābhu suhāvā|| mūka badana janu sārada chāī| mānahum̐ samara sūra jaya pāī||

दोहा ३५०(क)

एहि सुख ते सत कोटि गुन पावहिं मातु अनंदु। भाइन्ह सहित बिआहि घर आए रघुकुलचंदु ॥ ३५० (क)॥

ehi sukha te sata koṭi guna pāvahiṃ mātu anaṃdu| bhāinha sahita biāhi ghara āe raghukulacaṃdu || 350 (ka)||

दोहा ३५०(ख)

लोक रीत जननी करहिं बर दुलहिनि सकुचाहिं। मोदु बिनोदु बिलोकि बड़ रामु मनहिं मुसकाहिं ॥ ३५० (ख)॥

loka rīta jananī karahiṃ bara dulahini sakucāhiṃ| modu binodu biloki baṛa rāmu manahiṃ musakāhiṃ || 350 (kha)||

देव पितर पूजे बिधि नीकी। पूजीं सकल बासना जी की॥ सबहिं बंदि मागहिं बरदाना। भाइन्ह सहित राम कल्याना॥

deva pitara pūje bidhi nīkī| pūjīṃ sakala bāsanā jī kī|| sabahiṃ baṃdi māgahiṃ baradānā| bhāinha sahita rāma kalyānā||

अंतरहित सुर आसिष देहीं। मुदित मातु अंचल भरि लेंहीं॥ भूपति बोलि बराती लीन्हे। जान बसन मनि भूषन दीन्हे॥

aṃtarahita sura āsiṣa dehīṃ| mudita mātu aṃcala bhari leṃhīṃ|| bhūpati boli barātī līnhe| jāna basana mani bhūṣana dīnhe||

आयसु पाइ राखि उर रामहि। मुदित गए सब निज निज धामहि॥ पुर नर नारि सकल पहिराए। घर घर बाजन लगे बधाए॥

āyasu pāi rākhi ura rāmahi| mudita gae saba nija nija dhāmahi|| pura nara nāri sakala pahirāe| ghara ghara bājana lage badhāe||

जाचक जन जाचहि जोइ जोई। प्रमुदित राउ देहिं सोइ सोई॥ सेवक सकल बजनिआ नाना। पूरन किए दान सनमाना॥

jācaka jana jācahi joi joī| pramudita rāu dehiṃ soi soī|| sevaka sakala bajaniā nānā| pūrana kie dāna sanamānā||

दोहा ३५१

देंहिं असीस जोहारि सब गावहिं गुन गन गाथ। तब गुर भूसुर सहित गृहँ गवनु कीन्ह नरनाथ ॥ ३५१॥

deṃhiṃ asīsa johāri saba gāvahiṃ guna gana gātha| taba gura bhūsura sahita gṛham̐ gavanu kīnha naranātha || 351||

जो बसिष्ठ अनुसासन दीन्ही। लोक बेद बिधि सादर कीन्ही॥ भूसुर भीर देखि सब रानी। सादर उठीं भाग्य बड़ जानी॥

jo basiṣṭha anusāsana dīnhī| loka beda bidhi sādara kīnhī|| bhūsura bhīra dekhi saba rānī| sādara uṭhīṃ bhāgya baṛa jānī||

पाय पखारि सकल अन्हवाए। पूजि भली बिधि भूप जेवाँए॥ आदर दान प्रेम परिपोषे। देत असीस चले मन तोषे॥

pāya pakhāri sakala anhavāe| pūji bhalī bidhi bhūpa jevām̐e|| ādara dāna prema paripoṣe| deta asīsa cale mana toṣe||

बहु बिधि कीन्हि गाधिसुत पूजा। नाथ मोहि सम धन्य न दूजा॥ कीन्हि प्रसंसा भूपति भूरी। रानिन्ह सहित लीन्हि पग धूरी॥

bahu bidhi kīnhi gādhisuta pūjā| nātha mohi sama dhanya na dūjā|| kīnhi prasaṃsā bhūpati bhūrī| rāninha sahita līnhi paga dhūrī||

भीतर भवन दीन्ह बर बासु। मन जोगवत रह नृप रनिवासू॥ पूजे गुर पद कमल बहोरी। कीन्हि बिनय उर प्रीति न थोरी॥

bhītara bhavana dīnha bara bāsu| mana jogavata raha nṛpa ranivāsū|| pūje gura pada kamala bahorī| kīnhi binaya ura prīti na thorī||

दोहा ३५२

बधुन्ह समेत कुमार सब रानिन्ह सहित महीसु। पुनि पुनि बंदत गुर चरन देत असीस मुनीसु ॥ ३५२॥

badhunha sameta kumāra saba rāninha sahita mahīsu| puni puni baṃdata gura carana deta asīsa munīsu || 352||

बिनय कीन्हि उर अति अनुरागें। सुत संपदा राखि सब आगें॥ नेगु मागि मुनिनायक लीन्हा। आसिरबादु बहुत बिधि दीन्हा॥

binaya kīnhi ura ati anurāgeṃ| suta saṃpadā rākhi saba āgeṃ|| negu māgi munināyaka līnhā| āsirabādu bahuta bidhi dīnhā||

उर धरि रामहि सीय समेता। हरषि कीन्ह गुर गवनु निकेता॥ बिप्रबधू सब भूप बोलाई। चैल चारु भूषन पहिराई॥

ura dhari rāmahi sīya sametā| haraṣi kīnha gura gavanu niketā|| biprabadhū saba bhūpa bolāī| caila cāru bhūṣana pahirāī||

बहुरि बोलाइ सुआसिनि लीन्हीं। रुचि बिचारि पहिरावनि दीन्हीं॥ नेगी नेग जोग सब लेहीं। रुचि अनुरुप भूपमनि देहीं॥

bahuri bolāi suāsini līnhīṃ| ruci bicāri pahirāvani dīnhīṃ|| negī nega joga saba lehīṃ| ruci anurupa bhūpamani dehīṃ||

प्रिय पाहुने पूज्य जे जाने। भूपति भली भाँति सनमाने॥ देव देखि रघुबीर बिबाहू। बरषि प्रसून प्रसंसि उछाहू॥

priya pāhune pūjya je jāne| bhūpati bhalī bhām̐ti sanamāne|| deva dekhi raghubīra bibāhū| baraṣi prasūna prasaṃsi uchāhū||

दोहा ३५३

चले निसान बजाइ सुर निज निज पुर सुख पाइ। कहत परसपर राम जसु प्रेम न हृदयँ समाइ ॥ ३५३॥

cale nisāna bajāi sura nija nija pura sukha pāi| kahata parasapara rāma jasu prema na hṛdayam̐ samāi || 353||

सब बिधि सबहि समदि नरनाहू। रहा हृदयँ भरि पूरि उछाहू॥ जहँ रनिवासु तहाँ पगु धारे। सहित बहूटिन्ह कुअँर निहारे॥

saba bidhi sabahi samadi naranāhū| rahā hṛdayam̐ bhari pūri uchāhū|| jaham̐ ranivāsu tahām̐ pagu dhāre| sahita bahūṭinha kuam̐ra nihāre||

लिए गोद करि मोद समेता। को कहि सकइ भयउ सुखु जेता॥ बधू सप्रेम गोद बैठारीं। बार बार हियँ हरषि दुलारीं॥

lie goda kari moda sametā| ko kahi sakai bhayau sukhu jetā|| badhū saprema goda baiṭhārīṃ| bāra bāra hiyam̐ haraṣi dulārīṃ||

देखि समाजु मुदित रनिवासू। सब कें उर अनंद कियो बासू॥ कहेउ भूप जिमि भयउ बिबाहू। सुनि हरषु होत सब काहू॥

dekhi samāju mudita ranivāsū| saba keṃ ura anaṃda kiyo bāsū|| kaheu bhūpa jimi bhayau bibāhū| suni haraṣu hota saba kāhū||

जनक राज गुन सीलु बड़ाई। प्रीति रीति संपदा सुहाई॥ बहुबिधि भूप भाट जिमि बरनी। रानीं सब प्रमुदित सुनि करनी॥

janaka rāja guna sīlu baṛāī| prīti rīti saṃpadā suhāī|| bahubidhi bhūpa bhāṭa jimi baranī| rānīṃ saba pramudita suni karanī||

दोहा ३५४

सुतन्ह समेत नहाइ नृप बोलि बिप्र गुर ग्याति। भोजन कीन्ह अनेक बिधि घरी पंच गइ राति ॥ ३५४॥

sutanha sameta nahāi nṛpa boli bipra gura gyāti| bhojana kīnha aneka bidhi gharī paṃca gai rāti || 354||

मंगलगान करहिं बर भामिनि। भै सुखमूल मनोहर जामिनि॥ अँचइ पान सब काहूँ पाए। स्त्रग सुगंध भूषित छबि छाए॥

maṃgalagāna karahiṃ bara bhāmini| bhai sukhamūla manohara jāmini|| am̐cai pāna saba kāhūm̐ pāe| straga sugaṃdha bhūṣita chabi chāe||

रामहि देखि रजायसु पाई। निज निज भवन चले सिर नाई॥ प्रेम प्रमोद बिनोदु बढ़ाई। समउ समाजु मनोहरताई॥

rāmahi dekhi rajāyasu pāī| nija nija bhavana cale sira nāī|| prema pramoda binodu baṛhāī| samau samāju manoharatāī||

कहि न सकहि सत सारद सेसू। बेद बिरंचि महेस गनेसू॥

kahi na sakahi sata sārada sesū| beda biraṃci mahesa ganesū||

सोरठा ३

में कहाँ कवन बिधि बरनी। भूमिनागु सिर धरइ कि धरनी॥

meṃ kahām̐ kavana bidhi baranī| bhūmināgu sira dharai ki dharanī||

नृप सब भाँति सबहि सनमानी। कहि मृदु बचन बोलाई रानी॥ बधू लरिकनीं पर घर आईं। राखेहु नयन पलक की नाई॥

nṛpa saba bhām̐ti sabahi sanamānī| kahi mṛdu bacana bolāī rānī|| badhū larikanīṃ para ghara āīṃ| rākhehu nayana palaka kī nāī||

दोहा ३५५

लरिका श्रमित उनीद बस सयन करावहु जाइ। अस कहि गे बिश्रामगृहँ राम चरन चितु लाइ ॥ ३५५॥

larikā śramita unīda basa sayana karāvahu jāi| asa kahi ge biśrāmagṛham̐ rāma carana citu lāi || 355||

भूप बचन सुनि सहज सुहाए। जरित कनक मनि पलँग डसाए॥ सुभग सुरभि पय फेन समाना। कोमल कलित सुपेतीं नाना॥

bhūpa bacana suni sahaja suhāe| jarita kanaka mani palam̐ga ḍasāe|| subhaga surabhi paya phena samānā| komala kalita supetīṃ nānā||

उपबरहन बर बरनि न जाहीं। स्त्रग सुगंध मनिमंदिर माहीं॥ रतनदीप सुठि चारु चँदोवा। कहत न बनइ जान जेहिं जोवा॥

upabarahana bara barani na jāhīṃ| straga sugaṃdha manimaṃdira māhīṃ|| ratanadīpa suṭhi cāru cam̐dovā| kahata na banai jāna jehiṃ jovā||

सेज रुचिर रचि रामु उठाए। प्रेम समेत पलँग पौढ़ाए॥ अग्या पुनि पुनि भाइन्ह दीन्ही। निज निज सेज सयन तिन्ह कीन्ही॥

seja rucira raci rāmu uṭhāe| prema sameta palam̐ga pauṛhāe|| agyā puni puni bhāinha dīnhī| nija nija seja sayana tinha kīnhī||

देखि स्याम मृदु मंजुल गाता। कहहिं सप्रेम बचन सब माता॥ मारग जात भयावनि भारी। केहि बिधि तात ताड़का मारी॥

dekhi syāma mṛdu maṃjula gātā| kahahiṃ saprema bacana saba mātā|| māraga jāta bhayāvani bhārī| kehi bidhi tāta tāṛakā mārī||

दोहा ३५६

घोर निसाचर बिकट भट समर गनहिं नहिं काहु। मारे सहित सहाय किमि खल मारीच सुबाहु ॥ ३५६॥

ghora nisācara bikaṭa bhaṭa samara ganahiṃ nahiṃ kāhu| māre sahita sahāya kimi khala mārīca subāhu || 356||

मुनि प्रसाद बलि तात तुम्हारी। ईस अनेक करवरें टारी॥ मख रखवारी करि दुहुँ भाई। गुरु प्रसाद सब बिद्या पाई॥

muni prasāda bali tāta tumhārī| īsa aneka karavareṃ ṭārī|| makha rakhavārī kari duhum̐ bhāī| guru prasāda saba bidyā pāī||

मुनितय तरी लगत पग धूरी। कीरति रही भुवन भरि पूरी॥ कमठ पीठि पबि कूट कठोरा। नृप समाज महुँ सिव धनु तोरा॥

munitaya tarī lagata paga dhūrī| kīrati rahī bhuvana bhari pūrī|| kamaṭha pīṭhi pabi kūṭa kaṭhorā| nṛpa samāja mahum̐ siva dhanu torā||

बिस्व बिजय जसु जानकि पाई। आए भवन ब्याहि सब भाई॥ सकल अमानुष करम तुम्हारे। केवल कौसिक कृपाँ सुधारे॥

bisva bijaya jasu jānaki pāī| āe bhavana byāhi saba bhāī|| sakala amānuṣa karama tumhāre| kevala kausika kṛpām̐ sudhāre||

आजु सुफल जग जनमु हमारा। देखि तात बिधुबदन तुम्हारा॥ जे दिन गए तुम्हहि बिनु देखें। ते बिरंचि जनि पारहिं लेखें॥

āju suphala jaga janamu hamārā| dekhi tāta bidhubadana tumhārā|| je dina gae tumhahi binu dekheṃ| te biraṃci jani pārahiṃ lekheṃ||

दोहा ३५७

राम प्रतोषीं मातु सब कहि बिनीत बर बैन। सुमिरि संभु गुर बिप्र पद किए नीदबस नैन ॥ ३५७॥

rāma pratoṣīṃ mātu saba kahi binīta bara baina| sumiri saṃbhu gura bipra pada kie nīdabasa naina || 357||

नीदउँ बदन सोह सुठि लोना। मनहुँ साँझ सरसीरुह सोना॥ घर घर करहिं जागरन नारीं। देहिं परसपर मंगल गारीं॥

nīdaum̐ badana soha suṭhi lonā| manahum̐ sām̐jha sarasīruha sonā|| ghara ghara karahiṃ jāgarana nārīṃ| dehiṃ parasapara maṃgala gārīṃ||

पुरी बिराजति राजति रजनी। रानीं कहहिं बिलोकहु सजनी॥ सुंदर बधुन्ह सासु लै सोई। फनिकन्ह जनु सिरमनि उर गोई॥

purī birājati rājati rajanī| rānīṃ kahahiṃ bilokahu sajanī|| suṃdara badhunha sāsu lai soī| phanikanha janu siramani ura goī||

प्रात पुनीत काल प्रभु जागे। अरुनचूड़ बर बोलन लागे॥ बंदि मागधन्हि गुनगन गाए। पुरजन द्वार जोहारन आए॥

prāta punīta kāla prabhu jāge| arunacūṛa bara bolana lāge|| baṃdi māgadhanhi gunagana gāe| purajana dvāra johārana āe||

बंदि बिप्र सुर गुर पितु माता। पाइ असीस मुदित सब भ्राता॥ जननिन्ह सादर बदन निहारे। भूपति संग द्वार पगु धारे॥

baṃdi bipra sura gura pitu mātā| pāi asīsa mudita saba bhrātā|| jananinha sādara badana nihāre| bhūpati saṃga dvāra pagu dhāre||

दोहा ३५८

कीन्ह सौच सब सहज सुचि सरित पुनीत नहाइ। प्रातक्रिया करि तात पहिं आए चारिउ भाइ ॥ ३५८॥

kīnha sauca saba sahaja suci sarita punīta nahāi| prātakriyā kari tāta pahiṃ āe cāriu bhāi || 358||

भूप बिलोकि लिए उर लाई। बैठै हरषि रजायसु पाई॥ देखि रामु सब सभा जुड़ानी। लोचन लाभ अवधि अनुमानी॥

bhūpa biloki lie ura lāī| baiṭhai haraṣi rajāyasu pāī|| dekhi rāmu saba sabhā juṛānī| locana lābha avadhi anumānī||

पुनि बसिष्टु मुनि कौसिक आए। सुभग आसनन्हि मुनि बैठाए॥ सुतन्ह समेत पूजि पद लागे। निरखि रामु दोउ गुर अनुरागे॥

puni basiṣṭu muni kausika āe| subhaga āsananhi muni baiṭhāe|| sutanha sameta pūji pada lāge| nirakhi rāmu dou gura anurāge||

कहहिं बसिष्टु धरम इतिहासा। सुनहिं महीसु सहित रनिवासा॥ मुनि मन अगम गाधिसुत करनी। मुदित बसिष्ट बिपुल बिधि बरनी॥

kahahiṃ basiṣṭu dharama itihāsā| sunahiṃ mahīsu sahita ranivāsā|| muni mana agama gādhisuta karanī| mudita basiṣṭa bipula bidhi baranī||

बोले बामदेउ सब साँची। कीरति कलित लोक तिहुँ माची॥ सुनि आनंदु भयउ सब काहू। राम लखन उर अधिक उछाहू॥

bole bāmadeu saba sām̐cī| kīrati kalita loka tihum̐ mācī|| suni ānaṃdu bhayau saba kāhū| rāma lakhana ura adhika uchāhū||

दोहा ३५९

मंगल मोद उछाह नित जाहिं दिवस एहि भाँति। उमगी अवध अनंद भरि अधिक अधिक अधिकाति ॥ ३५९॥

maṃgala moda uchāha nita jāhiṃ divasa ehi bhām̐ti| umagī avadha anaṃda bhari adhika adhika adhikāti || 359||

सुदिन सोधि कल कंकन छौरे। मंगल मोद बिनोद न थोरे॥ नित नव सुखु सुर देखि सिहाहीं। अवध जन्म जाचहिं बिधि पाहीं॥

sudina sodhi kala kaṃkana chaure| maṃgala moda binoda na thore|| nita nava sukhu sura dekhi sihāhīṃ| avadha janma jācahiṃ bidhi pāhīṃ||

बिस्वामित्रु चलन नित चहहीं। राम सप्रेम बिनय बस रहहीं॥ दिन दिन सयगुन भूपति भाऊ। देखि सराह महामुनिराऊ॥

bisvāmitru calana nita cahahīṃ| rāma saprema binaya basa rahahīṃ|| dina dina sayaguna bhūpati bhāū| dekhi sarāha mahāmunirāū||

मागत बिदा राउ अनुरागे। सुतन्ह समेत ठाढ़ भे आगे॥ नाथ सकल संपदा तुम्हारी। मैं सेवकु समेत सुत नारी॥

māgata bidā rāu anurāge| sutanha sameta ṭhāṛha bhe āge|| nātha sakala saṃpadā tumhārī| maiṃ sevaku sameta suta nārī||

करब सदा लरिकनः पर छोहू। दरसन देत रहब मुनि मोहू॥ अस कहि राउ सहित सुत रानी। परेउ चरन मुख आव न बानी॥

karaba sadā larikanaḥ para chohū| darasana deta rahaba muni mohū|| asa kahi rāu sahita suta rānī| pareu carana mukha āva na bānī||

दीन्ह असीस बिप्र बहु भाँती। चले न प्रीति रीति कहि जाती॥ रामु सप्रेम संग सब भाई। आयसु पाइ फिरे पहुँचाई॥

dīnha asīsa bipra bahu bhām̐tī| cale na prīti rīti kahi jātī|| rāmu saprema saṃga saba bhāī| āyasu pāi phire pahum̐cāī||

दोहा ३६०

राम रूपु भूपति भगति ब्याहु उछाहु अनंदु। जात सराहत मनहिं मन मुदित गाधिकुलचंदु ॥ ३६०॥

rāma rūpu bhūpati bhagati byāhu uchāhu anaṃdu| jāta sarāhata manahiṃ mana mudita gādhikulacaṃdu || 360||

बामदेव रघुकुल गुर ग्यानी। बहुरि गाधिसुत कथा बखानी॥ सुनि मुनि सुजसु मनहिं मन राऊ। बरनत आपन पुन्य प्रभाऊ॥

bāmadeva raghukula gura gyānī| bahuri gādhisuta kathā bakhānī|| suni muni sujasu manahiṃ mana rāū| baranata āpana punya prabhāū||

बहुरे लोग रजायसु भयऊ। सुतन्ह समेत नृपति गृहँ गयऊ॥ जहँ तहँ राम ब्याहु सबु गावा। सुजसु पुनीत लोक तिहुँ छावा॥

bahure loga rajāyasu bhayaū| sutanha sameta nṛpati gṛham̐ gayaū|| jaham̐ taham̐ rāma byāhu sabu gāvā| sujasu punīta loka tihum̐ chāvā||

आए ब्याहि रामु घर जब तें। बसइ अनंद अवध सब तब तें॥ प्रभु बिबाहँ जस भयउ उछाहू। सकहिं न बरनि गिरा अहिनाहू॥

āe byāhi rāmu ghara jaba teṃ| basai anaṃda avadha saba taba teṃ|| prabhu bibāham̐ jasa bhayau uchāhū| sakahiṃ na barani girā ahināhū||

कबिकुल जीवनु पावन जानी। राम सीय जसु मंगल खानी॥ तेहि ते मैं कछु कहा बखानी। करन पुनीत हेतु निज बानी॥

kabikula jīvanu pāvana jānī| rāma sīya jasu maṃgala khānī|| tehi te maiṃ kachu kahā bakhānī| karana punīta hetu nija bānī||

छंद

निज गिरा पावनि करन कारन राम जसु तुलसीं कह्यो। रघुबीर चरित अपार बारिधि पारु कबि कोनें लक्मो॥ उपबीत ब्याह उछाह मंगल सुनि जे सादर गावहीं। बेदेहि राम प्रसाद ते जन सर्बदा सुखु पावहीं॥

nija girā pāvani karana kārana rāma jasu tulasīṃ kahyo| raghubīra carita apāra bāridhi pāru kabi koneṃ lakmo|| upabīta byāha uchāha maṃgala suni je sādara gāvahīṃ| bedehi rāma prasāda te jana sarbadā sukhu pāvahīṃ||

सोरठा ३६१

सिय रघुबीर बिबाहु जे सप्रेम गावहिं सुनहिं। तिन्ह कहु सदा उछाहु मगलायतन राम जसु ॥ ३६१॥

siya raghubīra bibāhu je saprema gāvahiṃ sunahiṃ| tinha kahu sadā uchāhu magalāyatana rāma jasu || 361||