बालकाण्ड

बालकाण्ड · दोहा १८६–१९९

साझा करें

दोहा ४

सारद श्रुति सेषा रिषय असेषा जा कहुँ कोउ नहि जाना। जेहि दीन पिआरे बेद पुकारे द्रवउ सो श्रीभगवाना॥ भव बारिधि मंदर सब बिधि सुंदर गुनमंदिर सुखपुंजा। मुनि सिद्ध सकल सुर परम भयातुर नमत नाथ पद कंजा॥

sārada śruti seṣā riṣaya aseṣā jā kahum̐ kou nahi jānā| jehi dīna piāre beda pukāre dravau so śrībhagavānā|| bhava bāridhi maṃdara saba bidhi suṃdara gunamaṃdira sukhapuṃjā| muni siddha sakala sura parama bhayātura namata nātha pada kaṃjā||

दोहा १८६

जानि सभय सुर भूमि सुनि बचन समेत सनेह। गगनगिरा गंभीर भइ हरनि सोक संदेह ॥ १८६॥

jāni sabhaya sura bhūmi suni bacana sameta saneha| gaganagirā gaṃbhīra bhai harani soka saṃdeha || 186||

जनि डरपहु मुनि सिद्ध सुरेसा। तुम्हहि लागि धरिहउँ नर बेसा॥ अंसन्ह सहित मनुज अवतारा। लेहउँ दिनकर बंस उदारा॥

jani ḍarapahu muni siddha suresā| tumhahi lāgi dharihaum̐ nara besā|| aṃsanha sahita manuja avatārā| lehaum̐ dinakara baṃsa udārā||

कस्यप अदिति महातप कीन्हा। तिन्ह कहुँ मैं पूरब बर दीन्हा॥ ते दसरथ कौसल्या रूपा। कोसलपुरीं प्रगट नरभूपा॥

kasyapa aditi mahātapa kīnhā| tinha kahum̐ maiṃ pūraba bara dīnhā|| te dasaratha kausalyā rūpā| kosalapurīṃ pragaṭa narabhūpā||

तिन्ह के गृह अवतरिहउँ जाई। रघुकुल तिलक सो चारिउ भाई॥ नारद बचन सत्य सब करिहउँ। परम सक्ति समेत अवतरिहउँ॥

tinha ke gṛha avatarihaum̐ jāī| raghukula tilaka so cāriu bhāī|| nārada bacana satya saba karihaum̐| parama sakti sameta avatarihaum̐||

हरिहउँ सकल भूमि गरुआई। निर्भय होहु देव समुदाई॥ गगन ब्रह्मबानी सुनी काना। तुरत फिरे सुर हृदय जुड़ाना॥

harihaum̐ sakala bhūmi garuāī| nirbhaya hohu deva samudāī|| gagana brahmabānī sunī kānā| turata phire sura hṛdaya juṛānā||

तब ब्रह्मा धरनिहि समुझावा। अभय भई भरोस जियँ आवा॥

taba brahmā dharanihi samujhāvā| abhaya bhaī bharosa jiyam̐ āvā||

दोहा १८७

निज लोकहि बिरंचि गे देवन्ह इहइ सिखाइ। बानर तनु धरि धरि महि हरि पद सेवहु जाइ ॥ १८७॥

nija lokahi biraṃci ge devanha ihai sikhāi| bānara tanu dhari dhari mahi hari pada sevahu jāi || 187||

गए देव सब निज निज धामा। भूमि सहित मन कहुँ बिश्रामा॥ जो कछु आयसु ब्रह्माँ दीन्हा। हरषे देव बिलंब न कीन्हा॥

gae deva saba nija nija dhāmā| bhūmi sahita mana kahum̐ biśrāmā|| jo kachu āyasu brahmām̐ dīnhā| haraṣe deva bilaṃba na kīnhā||

बनचर देह धरि छिति माहीं। अतुलित बल प्रताप तिन्ह पाहीं॥ गिरि तरु नख आयुध सब बीरा। हरि मारग चितवहिं मतिधीरा॥

banacara deha dhari chiti māhīṃ| atulita bala pratāpa tinha pāhīṃ|| giri taru nakha āyudha saba bīrā| hari māraga citavahiṃ matidhīrā||

गिरि कानन जहँ तहँ भरि पूरी। रहे निज निज अनीक रचि रूरी॥ यह सब रुचिर चरित मैं भाषा। अब सो सुनहु जो बीचहिं राखा॥

giri kānana jaham̐ taham̐ bhari pūrī| rahe nija nija anīka raci rūrī|| yaha saba rucira carita maiṃ bhāṣā| aba so sunahu jo bīcahiṃ rākhā||

अवधपुरीं रघुकुलमनि राऊ। बेद बिदित तेहि दसरथ नाऊँ॥ धरम धुरंधर गुननिधि ग्यानी। हृदयँ भगति मति सारँगपानी॥

avadhapurīṃ raghukulamani rāū| beda bidita tehi dasaratha nāūm̐|| dharama dhuraṃdhara gunanidhi gyānī| hṛdayam̐ bhagati mati sāram̐gapānī||

दोहा १८८

कौसल्यादि नारि प्रिय सब आचरन पुनीत। पति अनुकूल प्रेम दृढ़ हरि पद कमल बिनीत ॥ १८८॥

kausalyādi nāri priya saba ācarana punīta| pati anukūla prema dṛṛha hari pada kamala binīta || 188||

एक बार भूपति मन माहीं। भै गलानि मोरें सुत नाहीं॥ गुर गृह गयउ तुरत महिपाला। चरन लागि करि बिनय बिसाला॥

eka bāra bhūpati mana māhīṃ| bhai galāni moreṃ suta nāhīṃ|| gura gṛha gayau turata mahipālā| carana lāgi kari binaya bisālā||

निज दुख सुख सब गुरहि सुनायउ। कहि बसिष्ठ बहुबिधि समुझायउ॥ धरहु धीर होइहहिं सुत चारी। त्रिभुवन बिदित भगत भय हारी॥

nija dukha sukha saba gurahi sunāyau| kahi basiṣṭha bahubidhi samujhāyau|| dharahu dhīra hoihahiṃ suta cārī| tribhuvana bidita bhagata bhaya hārī||

सृंगी रिषहि बसिष्ठ बोलावा। पुत्रकाम सुभ जग्य करावा॥ भगति सहित मुनि आहुति दीन्हें। प्रगटे अगिनि चरू कर लीन्हें॥

sṛṃgī riṣahi basiṣṭha bolāvā| putrakāma subha jagya karāvā|| bhagati sahita muni āhuti dīnheṃ| pragaṭe agini carū kara līnheṃ||

जो बसिष्ठ कछु हृदयँ बिचारा। सकल काजु भा सिद्ध तुम्हारा॥ यह हबि बाँटि देहु नृप जाई। जथा जोग जेहि भाग बनाई॥

jo basiṣṭha kachu hṛdayam̐ bicārā| sakala kāju bhā siddha tumhārā|| yaha habi bām̐ṭi dehu nṛpa jāī| jathā joga jehi bhāga banāī||

दोहा १८९

तब अदृस्य भए पावक सकल सभहि समुझाइ। परमानंद मगन नृप हरष न हृदयँ समाइ ॥ १८९॥

taba adṛsya bhae pāvaka sakala sabhahi samujhāi| paramānaṃda magana nṛpa haraṣa na hṛdayam̐ samāi || 189||

तबहिं रायँ प्रिय नारि बोलाईं। कौसल्यादि तहाँ चलि आई॥ अर्ध भाग कौसल्याहि दीन्हा। उभय भाग आधे कर कीन्हा॥

tabahiṃ rāyam̐ priya nāri bolāīṃ| kausalyādi tahām̐ cali āī|| ardha bhāga kausalyāhi dīnhā| ubhaya bhāga ādhe kara kīnhā||

कैकेई कहँ नृप सो दयऊ। रह्यो सो उभय भाग पुनि भयऊ॥ कौसल्या कैकेई हाथ धरि। दीन्ह सुमित्रहि मन प्रसन्न करि॥

kaikeī kaham̐ nṛpa so dayaū| rahyo so ubhaya bhāga puni bhayaū|| kausalyā kaikeī hātha dhari| dīnha sumitrahi mana prasanna kari||

एहि बिधि गर्भसहित सब नारी। भईं हृदयँ हरषित सुख भारी॥ जा दिन तें हरि गर्भहिं आए। सकल लोक सुख संपति छाए॥

ehi bidhi garbhasahita saba nārī| bhaīṃ hṛdayam̐ haraṣita sukha bhārī|| jā dina teṃ hari garbhahiṃ āe| sakala loka sukha saṃpati chāe||

मंदिर महँ सब राजहिं रानी। सोभा सील तेज की खानीं॥ सुख जुत कछुक काल चलि गयऊ। जेहिं प्रभु प्रगट सो अवसर भयऊ॥

maṃdira maham̐ saba rājahiṃ rānī| sobhā sīla teja kī khānīṃ|| sukha juta kachuka kāla cali gayaū| jehiṃ prabhu pragaṭa so avasara bhayaū||

दोहा १९०

जोग लगन ग्रह बार तिथि सकल भए अनुकूल। चर अरु अचर हर्षजुत राम जनम सुखमूल ॥ १९०॥

joga lagana graha bāra tithi sakala bhae anukūla| cara aru acara harṣajuta rāma janama sukhamūla || 190||

नौमी तिथि मधु मास पुनीता। सुकल पच्छ अभिजित हरिप्रीता॥ मध्यदिवस अति सीत न घामा। पावन काल लोक बिश्रामा॥

naumī tithi madhu māsa punītā| sukala paccha abhijita hariprītā|| madhyadivasa ati sīta na ghāmā| pāvana kāla loka biśrāmā||

सीतल मंद सुरभि बह बाऊ। हरषित सुर संतन मन चाऊ॥ बन कुसुमित गिरिगन मनिआरा। स्त्रवहिं सकल सरिताऽमृतधारा॥

sītala maṃda surabhi baha bāū| haraṣita sura saṃtana mana cāū|| bana kusumita girigana maniārā| stravahiṃ sakala saritā'mṛtadhārā||

सोरठा ३

सो अवसर बिरंचि जब जाना। चले सकल सुर साजि बिमाना॥ गगन बिमल सकुल सुर जूथा। गावहिं गुन गंधर्ब बरूथा॥

so avasara biraṃci jaba jānā| cale sakala sura sāji bimānā|| gagana bimala sakula sura jūthā| gāvahiṃ guna gaṃdharba barūthā||

बरषहिं सुमन सुअंजलि साजी। गहगहि गगन दुंदुभी बाजी॥ अस्तुति करहिं नाग मुनि देवा। बहुबिधि लावहिं निज निज सेवा॥

baraṣahiṃ sumana suaṃjali sājī| gahagahi gagana duṃdubhī bājī|| astuti karahiṃ nāga muni devā| bahubidhi lāvahiṃ nija nija sevā||

दोहा १९१

सुर समूह बिनती करि पहुँचे निज निज धाम। जगनिवास प्रभु प्रगटे अखिल लोक बिश्राम ॥ १९१॥

sura samūha binatī kari pahum̐ce nija nija dhāma| jaganivāsa prabhu pragaṭe akhila loka biśrāma || 191||

छंद १

भए प्रगट कृपाला दीनदयाला कौसल्या हितकारी। हरषित महतारी मुनि मन हारी अद्भुत रूप बिचारी॥ लोचन अभिरामा तनु घनस्यामा निज आयुध भुज चारी। भूषन बनमाला नयन बिसाला सोभासिंधु खरारी॥

bhae pragaṭa kṛpālā dīnadayālā kausalyā hitakārī| haraṣita mahatārī muni mana hārī adbhuta rūpa bicārī|| locana abhirāmā tanu ghanasyāmā nija āyudha bhuja cārī| bhūṣana banamālā nayana bisālā sobhāsiṃdhu kharārī||

दोहा

कह दुइ कर जोरी अस्तुति तोरी केहि बिधि करौं अनंता। माया गुन ग्यानातीत अमाना बेद पुरान भनंता॥ करुना सुख सागर सब गुन आगर जेहि गावहिं श्रुति संता।

kaha dui kara jorī astuti torī kehi bidhi karauṃ anaṃtā| māyā guna gyānātīta amānā beda purāna bhanaṃtā|| karunā sukha sāgara saba guna āgara jehi gāvahiṃ śruti saṃtā|

सोरठा २

सो मम हित लागी जन अनुरागी भयउ प्रगट श्रीकंता॥

so mama hita lāgī jana anurāgī bhayau pragaṭa śrīkaṃtā||

दोहा ३

ब्रह्मांड निकाया निर्मित माया रोम रोम प्रति बेद कहै। मम उर सो बासी यह उपहासी सुनत धीर पति थिर न रहै॥ उपजा जब ग्याना प्रभु मुसकाना चरित बहुत बिधि कीन्ह चहै। कहि कथा सुहाई मातु बुझाई जेहि प्रकार सुत प्रेम लहै॥

brahmāṃḍa nikāyā nirmita māyā roma roma prati beda kahai| mama ura so bāsī yaha upahāsī sunata dhīra pati thira na rahai|| upajā jaba gyānā prabhu musakānā carita bahuta bidhi kīnha cahai| kahi kathā suhāī mātu bujhāī jehi prakāra suta prema lahai||

दोहा ४

माता पुनि बोली सो मति डौली तजहु तात यह रूपा। कीजै सिसुलीला अति प्रियसीला यह सुख परम अनूपा॥ सुनि बचन सुजाना रोदन ठाना होइ बालक सुरभूपा। यह चरित जे गावहिं हरिपद पावहिं ते न परहिं भवकूपा॥

mātā puni bolī so mati ḍaulī tajahu tāta yaha rūpā| kījai sisulīlā ati priyasīlā yaha sukha parama anūpā|| suni bacana sujānā rodana ṭhānā hoi bālaka surabhūpā| yaha carita je gāvahiṃ haripada pāvahiṃ te na parahiṃ bhavakūpā||

दोहा १९२

बिप्र धेनु सुर संत हित लीन्ह मनुज अवतार। निज इच्छा निर्मित तनु माया गुन गो पार ॥ १९२॥

bipra dhenu sura saṃta hita līnha manuja avatāra| nija icchā nirmita tanu māyā guna go pāra || 192||

सुनि सिसु रुदन परम प्रिय बानी। संभ्रम चलि आई सब रानी॥ हरषित जहँ तहँ धाईं दासी। आनँद मगन सकल पुरबासी॥

suni sisu rudana parama priya bānī| saṃbhrama cali āī saba rānī|| haraṣita jaham̐ taham̐ dhāīṃ dāsī| ānam̐da magana sakala purabāsī||

दसरथ पुत्रजन्म सुनि काना। मानहुँ ब्रह्मानंद समाना॥ परम प्रेम मन पुलक सरीरा। चाहत उठत करत मति धीरा॥

dasaratha putrajanma suni kānā| mānahum̐ brahmānaṃda samānā|| parama prema mana pulaka sarīrā| cāhata uṭhata karata mati dhīrā||

जाकर नाम सुनत सुभ होई। मोरें गृह आवा प्रभु सोई॥ परमानंद पूरि मन राजा। कहा बोलाइ बजावहु बाजा॥

jākara nāma sunata subha hoī| moreṃ gṛha āvā prabhu soī|| paramānaṃda pūri mana rājā| kahā bolāi bajāvahu bājā||

गुर बसिष्ठ कहँ गयउ हँकारा। आए द्विजन सहित नृपद्वारा॥ अनुपम बालक देखेन्हि जाई। रूप रासि गुन कहि न सिराई॥

gura basiṣṭha kaham̐ gayau ham̐kārā| āe dvijana sahita nṛpadvārā|| anupama bālaka dekhenhi jāī| rūpa rāsi guna kahi na sirāī||

दोहा १९३

नंदीमुख सराध करि जातकरम सब कीन्ह। हाटक धेनु बसन मनि नृप बिप्रन्ह कहँ दीन्ह ॥ १९३॥

naṃdīmukha sarādha kari jātakarama saba kīnha| hāṭaka dhenu basana mani nṛpa bipranha kaham̐ dīnha || 193||

ध्वज पताक तोरन पुर छावा। कहि न जाइ जेहि भाँति बनावा॥ सुमनबृष्टि अकास तें होई। ब्रह्मानंद मगन सब लोई॥

dhvaja patāka torana pura chāvā| kahi na jāi jehi bhām̐ti banāvā|| sumanabṛṣṭi akāsa teṃ hoī| brahmānaṃda magana saba loī||

बृंद बृंद मिलि चलीं लोगाई। सहज संगार किएँ उठि धाई॥ कनक कलस मंगल धरि थारा। गावत पैठहिं भूप दुआरा॥

bṛṃda bṛṃda mili calīṃ logāī| sahaja saṃgāra kiem̐ uṭhi dhāī|| kanaka kalasa maṃgala dhari thārā| gāvata paiṭhahiṃ bhūpa duārā||

करि आरति नेवछावरि करहीं। बार बार सिसु चरनन्हि परहीं॥ मागध सूत बंदिगन गायक। पावन गुन गावहिं रघुनायक॥

kari ārati nevachāvari karahīṃ| bāra bāra sisu carananhi parahīṃ|| māgadha sūta baṃdigana gāyaka| pāvana guna gāvahiṃ raghunāyaka||

सर्बस दान दीन्ह सब काहू। जेहिं पावा राखा नहिं ताहू॥ मृगमद चंदन कुंकुम कीचा। मची सकल बीथिन्ह बिच बीचा॥

sarbasa dāna dīnha saba kāhū| jehiṃ pāvā rākhā nahiṃ tāhū|| mṛgamada caṃdana kuṃkuma kīcā| macī sakala bīthinha bica bīcā||

दोहा १९४

गृह गृह बाज बधाव सुभ प्रगटे सुषमा कंद। हरषवंत सब जहँ तहँ नगर नारि नर बृंद ॥ १९४॥

gṛha gṛha bāja badhāva subha pragaṭe suṣamā kaṃda| haraṣavaṃta saba jaham̐ taham̐ nagara nāri nara bṛṃda || 194||

कैकयसुता सुमित्रा दोऊ। सुंदर सुत जनमत भैं ओऊ॥ वह सुख संपति समय समाजा। कहि न सकइ सारद अहिराजा॥

kaikayasutā sumitrā doū| suṃdara suta janamata bhaiṃ oū|| vaha sukha saṃpati samaya samājā| kahi na sakai sārada ahirājā||

अवधपुरी सोहइ एहि भाँती। प्रभुहि मिलन आई जनु राती॥ देखि भानू जनु मन सकुचानी। तदपि बनी संध्या अनुमानी॥

avadhapurī sohai ehi bhām̐tī| prabhuhi milana āī janu rātī|| dekhi bhānū janu mana sakucānī| tadapi banī saṃdhyā anumānī||

अगर धूप बहु जनु अँधिआरी। उड़इ अभीर मनहुँ अरुनारी॥ मंदिर मनि समूह जनु तारा। नृप गृह कलस सो इंदु उदारा॥

agara dhūpa bahu janu am̐dhiārī| uṛai abhīra manahum̐ arunārī|| maṃdira mani samūha janu tārā| nṛpa gṛha kalasa so iṃdu udārā||

भवन बेदधुनि अति मृदु बानी। जनु खग मूखर समयँ जनु सानी॥ कौतुक देखि पतंग भुलाना। एक मास तेइँ जात न जाना॥

bhavana bedadhuni ati mṛdu bānī| janu khaga mūkhara samayam̐ janu sānī|| kautuka dekhi pataṃga bhulānā| eka māsa teim̐ jāta na jānā||

दोहा १९५

मास दिवस कर दिवस भा मरम न जानइ कोइ। रथ समेत रबि थाकेउ निसा कवन बिधि होइ ॥ १९५॥

māsa divasa kara divasa bhā marama na jānai koi| ratha sameta rabi thākeu nisā kavana bidhi hoi || 195||

यह रहस्य काहू नहिं जाना। दिन मनि चले करत गुनगाना॥ देखि महोत्सव सुर मुनि नागा। चले भवन बरनत निज भागा॥

yaha rahasya kāhū nahiṃ jānā| dina mani cale karata gunagānā|| dekhi mahotsava sura muni nāgā| cale bhavana baranata nija bhāgā||

औरउ एक कहउँ निज चोरी। सुनु गिरिजा अति दृढ़ मति तोरी॥ काक भुसुंडि संग हम दोऊ। मनुजरूप जानइ नहिं कोऊ॥

aurau eka kahaum̐ nija corī| sunu girijā ati dṛṛha mati torī|| kāka bhusuṃḍi saṃga hama doū| manujarūpa jānai nahiṃ koū||

परमानंद प्रेमसुख फूले। बीथिन्ह फिरहिं मगन मन भूले॥ यह सुभ चरित जान पै सोई। कृपा राम कै जापर होई॥

paramānaṃda premasukha phūle| bīthinha phirahiṃ magana mana bhūle|| yaha subha carita jāna pai soī| kṛpā rāma kai jāpara hoī||

तेहि अवसर जो जेहि बिधि आवा। दीन्ह भूप जो जेहि मन भावा॥ गज रथ तुरग हेम गो हीरा। दीन्हे नृप नानाबिधि चीरा॥

tehi avasara jo jehi bidhi āvā| dīnha bhūpa jo jehi mana bhāvā|| gaja ratha turaga hema go hīrā| dīnhe nṛpa nānābidhi cīrā||

दोहा १९६

मन संतोषे सबन्हि के जहँ तहँ देहि असीस। सकल तनय चिर जीवहुँ तुलसिदास के ईस ॥ १९६॥

mana saṃtoṣe sabanhi ke jaham̐ taham̐ dehi asīsa| sakala tanaya cira jīvahum̐ tulasidāsa ke īsa || 196||

कछुक दिवस बीते एहि भाँती। जात न जानिअ दिन अरु राती॥ नामकरन कर अवसरु जानी। भूप बोलि पठए मुनि ग्यानी॥

kachuka divasa bīte ehi bhām̐tī| jāta na jānia dina aru rātī|| nāmakarana kara avasaru jānī| bhūpa boli paṭhae muni gyānī||

करि पूजा भूपति अस भाषा। धरिअ नाम जो मुनि गुनि राखा॥ इन्ह के नाम अनेक अनूपा। मैं नृप कहब स्वमति अनुरूपा॥

kari pūjā bhūpati asa bhāṣā| dharia nāma jo muni guni rākhā|| inha ke nāma aneka anūpā| maiṃ nṛpa kahaba svamati anurūpā||

जो आनंद सिंधु सुखरासी। सीकर तें त्रैलोक सुपासी॥

jo ānaṃda siṃdhu sukharāsī| sīkara teṃ trailoka supāsī||

सोरठा ३

सो सुख धाम राम अस नामा। अखिल लोक दायक बिश्रामा॥

so sukha dhāma rāma asa nāmā| akhila loka dāyaka biśrāmā||

बिस्व भरन पोषन कर जोई। ताकर नाम भरत अस होई॥ जाके सुमिरन तें रिपु नासा। नाम सत्रुहन बेद प्रकासा॥

bisva bharana poṣana kara joī| tākara nāma bharata asa hoī|| jāke sumirana teṃ ripu nāsā| nāma satruhana beda prakāsā||

दोहा १९७

लच्छन धाम राम प्रिय सकल जगत आधार। गुरु बसिष्ट तेहि राखा लछिमन नाम उदार ॥ १९७॥

lacchana dhāma rāma priya sakala jagata ādhāra| guru basiṣṭa tehi rākhā lachimana nāma udāra || 197||

धरे नाम गुर हृदयँ बिचारी। बेद तत्व नृप तव सुत चारी॥ मुनि धन जन सरबस सिव प्राना। बाल केलि तेहिं सुख माना॥

dhare nāma gura hṛdayam̐ bicārī| beda tatva nṛpa tava suta cārī|| muni dhana jana sarabasa siva prānā| bāla keli tehiṃ sukha mānā||

बारेहि ते निज हित पति जानी। लछिमन राम चरन रति मानी॥ भरत सत्रुहन दूनउ भाई। प्रभु सेवक जसि प्रीति बड़ाई॥

bārehi te nija hita pati jānī| lachimana rāma carana rati mānī|| bharata satruhana dūnau bhāī| prabhu sevaka jasi prīti baṛāī||

स्याम गौर सुंदर दोउ जोरी। निरखहिं छबि जननीं तृन तोरी॥ चारिउ सील रूप गुन धामा। तदपि अधिक सुखसागर रामा॥

syāma gaura suṃdara dou jorī| nirakhahiṃ chabi jananīṃ tṛna torī|| cāriu sīla rūpa guna dhāmā| tadapi adhika sukhasāgara rāmā||

हृदयँ अनुग्रह इंदु प्रकासा। सूचत किरन मनोहर हासा॥ कबहुँ उछंग कबहुँ बर पलना। मातु दुलारइ कहि प्रिय ललना॥

hṛdayam̐ anugraha iṃdu prakāsā| sūcata kirana manohara hāsā|| kabahum̐ uchaṃga kabahum̐ bara palanā| mātu dulārai kahi priya lalanā||

दोहा

ब्यापक ब्रह्म निरंजन निर्गुन बिगत बिनोद।

byāpaka brahma niraṃjana nirguna bigata binoda|

सोरठा १९८

सो अज प्रेम भगति बस कौसल्या के गोद ॥ १९८॥

so aja prema bhagati basa kausalyā ke goda || 198||

काम कोटि छबि स्याम सरीरा। नील कंज बारिद गंभीरा॥ अरुन चरन पकंज नख जोती। कमल दलन्हि बैठे जनु मोती॥

kāma koṭi chabi syāma sarīrā| nīla kaṃja bārida gaṃbhīrā|| aruna carana pakaṃja nakha jotī| kamala dalanhi baiṭhe janu motī||

रेख कुलिस धवज अंकुर सोहे। नूपुर धुनि सुनि मुनि मन मोहे॥ कटि किंकिनी उदर त्रय रेखा। नाभि गभीर जान जेहि देखा॥

rekha kulisa dhavaja aṃkura sohe| nūpura dhuni suni muni mana mohe|| kaṭi kiṃkinī udara traya rekhā| nābhi gabhīra jāna jehi dekhā||

भुज बिसाल भूषन जुत भूरी। हियँ हरि नख अति सोभा रूरी॥ उर मनिहार पदिक की सोभा। बिप्र चरन देखत मन लोभा॥

bhuja bisāla bhūṣana juta bhūrī| hiyam̐ hari nakha ati sobhā rūrī|| ura manihāra padika kī sobhā| bipra carana dekhata mana lobhā||

कंबु कंठ अति चिबुक सुहाई। आनन अमित मदन छबि छाई॥ दुइ दुइ दसन अधर अरुनारे। नासा तिलक को बरनै पारे॥

kaṃbu kaṃṭha ati cibuka suhāī| ānana amita madana chabi chāī|| dui dui dasana adhara arunāre| nāsā tilaka ko baranai pāre||

सुंदर श्रवन सुचारु कपोला। अति प्रिय मधुर तोतरे बोला॥ चिक्कन कच कुंचित गभुआरे। बहु प्रकार रचि मातु सँवारे॥

suṃdara śravana sucāru kapolā| ati priya madhura totare bolā|| cikkana kaca kuṃcita gabhuāre| bahu prakāra raci mātu sam̐vāre||

पीत झगुलिआ तनु पहिराई। जानु पानि बिचरनि मोहि भाई॥ रूप सकहिं नहिं कहि श्रुति सेषा। सो जानइ सपनेहुँ जेहि देखा॥

pīta jhaguliā tanu pahirāī| jānu pāni bicarani mohi bhāī|| rūpa sakahiṃ nahiṃ kahi śruti seṣā| so jānai sapanehum̐ jehi dekhā||

दोहा १९९

सुख संदोह मोहपर ग्यान गिरा गोतीत। दंपति परम प्रेम बस कर सिसुचरित पुनीत ॥ १९९॥

sukha saṃdoha mohapara gyāna girā gotīta| daṃpati parama prema basa kara sisucarita punīta || 199||