बालकाण्ड

बालकाण्ड · दोहा १२०(ख)–१३३

विभज्यताम्

सोरठा १२०(ख)

सुनु सुभ कथा भवानि बिमल। कहा भुसुंडि बखानि सुना बिहग नायक गरुड ॥ १२० (ख)॥

sunu subha kathā bhavāni bimala| kahā bhusuṃḍi bakhāni sunā bihaga nāyaka garuḍa || 120 (kha)||

सोरठा १२०(ग)

सो संबाद उदार जेहि बिधि भा आगें कहब। सुनहु राम अवतार चरित परम सुंदर अनघ ॥ १२० (ग)॥

so saṃbāda udāra jehi bidhi bhā āgeṃ kahaba| sunahu rāma avatāra carita parama suṃdara anagha || 120 (ga)||

दोहा १२०(घ)

हरि गुन नाम अपार कथा रूप अगनित अमित। मैं निज मति अनुसार कहउँ उमा सादर सुनहु ॥ १२० (घ)॥

hari guna nāma apāra kathā rūpa aganita amita| maiṃ nija mati anusāra kahaum̐ umā sādara sunahu || 120 (gha)||

सुनु गिरिजा हरिचरित सुहाए। बिपुल बिसद निगमागम गाए॥ हरि अवतार हेतु जेहि होई। इदमित्थं कहि जाइ न सोई॥

sunu girijā haricarita suhāe| bipula bisada nigamāgama gāe|| hari avatāra hetu jehi hoī| idamitthaṃ kahi jāi na soī||

राम अर्तक्य बुद्धि मन बानी। मत हमार अस सुनहि सयानी॥ तदपि संत मुनि बेद पुराना। जस कछु कहहिं स्वमति अनुमाना॥

rāma artakya buddhi mana bānī| mata hamāra asa sunahi sayānī|| tadapi saṃta muni beda purānā| jasa kachu kahahiṃ svamati anumānā||

तस मैं सुमुखि सुनावउँ तोही। समुझि परइ जस कारन मोही॥ जब जब होइ धरम कै हानी। बाढहिं असुर अधम अभिमानी॥

tasa maiṃ sumukhi sunāvaum̐ tohī| samujhi parai jasa kārana mohī|| jaba jaba hoi dharama kai hānī| bāḍhahiṃ asura adhama abhimānī||

करहिं अनीति जाइ नहिं बरनी। सीदहिं बिप्र धेनु सुर धरनी॥ तब तब प्रभु धरि बिबिध सरीरा। हरहि कृपानिधि सज्जन पीरा॥

karahiṃ anīti jāi nahiṃ baranī| sīdahiṃ bipra dhenu sura dharanī|| taba taba prabhu dhari bibidha sarīrā| harahi kṛpānidhi sajjana pīrā||

दोहा १२१

असुर मारि थापहिं सुरन्ह राखहिं निज श्रुति सेतु। जग बिस्तारहिं बिसद जस राम जन्म कर हेतु ॥ १२१॥

asura māri thāpahiṃ suranha rākhahiṃ nija śruti setu| jaga bistārahiṃ bisada jasa rāma janma kara hetu || 121||

सोरठा १

सोइ जस गाइ भगत भव तरहीं। कृपासिंधु जन हित तनु धरहीं॥ राम जनम के हेतु अनेका। परम बिचित्र एक तें एका॥

soi jasa gāi bhagata bhava tarahīṃ| kṛpāsiṃdhu jana hita tanu dharahīṃ|| rāma janama ke hetu anekā| parama bicitra eka teṃ ekā||

जनम एक दुइ कहउँ बखानी। सावधान सुनु सुमति भवानी॥ द्वारपाल हरि के प्रिय दोऊ। जय अरु बिजय जान सब कोऊ॥

janama eka dui kahaum̐ bakhānī| sāvadhāna sunu sumati bhavānī|| dvārapāla hari ke priya doū| jaya aru bijaya jāna saba koū||

बिप्र श्राप तें दूनउ भाई। तामस असुर देह तिन्ह पाई॥ कनककसिपु अरु हाटक लोचन। जगत बिदित सुरपति मद मोचन॥

bipra śrāpa teṃ dūnau bhāī| tāmasa asura deha tinha pāī|| kanakakasipu aru hāṭaka locana| jagata bidita surapati mada mocana||

बिजई समर बीर बिख्याता। धरि बराह बपु एक निपाता॥ होइ नरहरि दूसर पुनि मारा। जन प्रहलाद सुजस बिस्तारा॥

bijaī samara bīra bikhyātā| dhari barāha bapu eka nipātā|| hoi narahari dūsara puni mārā| jana prahalāda sujasa bistārā||

दोहा १२२

भए निसाचर जाइ तेइ महाबीर बलवान। कुंभकरन रावण सुभट सुर बिजई जग जान ॥ १२२॥

bhae nisācara jāi tei mahābīra balavāna| kuṃbhakarana rāvaṇa subhaṭa sura bijaī jaga jāna || 122||

मुकुत न भए हते भगवाना। तीनि जनम द्विज बचन प्रवाना॥ एक बार तिन्ह के हित लागी। धरेउ सरीर भगत अनुरागी॥

mukuta na bhae hate bhagavānā| tīni janama dvija bacana pravānā|| eka bāra tinha ke hita lāgī| dhareu sarīra bhagata anurāgī||

कस्यप अदिति तहाँ पितु माता। दसरथ कौसल्या बिख्याता॥ एक कलप एहि बिधि अवतारा। चरित्र पवित्र किए संसारा॥

kasyapa aditi tahām̐ pitu mātā| dasaratha kausalyā bikhyātā|| eka kalapa ehi bidhi avatārā| caritra pavitra kie saṃsārā||

एक कलप सुर देखि दुखारे। समर जलंधर सन सब हारे॥ संभु कीन्ह संग्राम अपारा। दनुज महाबल मरइ न मारा॥

eka kalapa sura dekhi dukhāre| samara jalaṃdhara sana saba hāre|| saṃbhu kīnha saṃgrāma apārā| danuja mahābala marai na mārā||

परम सती असुराधिप नारी। तेहि बल ताहि न जितहिं पुरारी॥

parama satī asurādhipa nārī| tehi bala tāhi na jitahiṃ purārī||

दोहा १२३

छल करि टारेउ तासु ब्रत प्रभु सुर कारज कीन्ह। जब तेहि जानेउ मरम तब श्राप कोप करि दीन्ह ॥ १२३॥

chala kari ṭāreu tāsu brata prabhu sura kāraja kīnha| jaba tehi jāneu marama taba śrāpa kopa kari dīnha || 123||

तासु श्राप हरि दीन्ह प्रमाना। कौतुकनिधि कृपाल भगवाना॥ तहाँ जलंधर रावन भयऊ। रन हति राम परम पद दयऊ॥

tāsu śrāpa hari dīnha pramānā| kautukanidhi kṛpāla bhagavānā|| tahām̐ jalaṃdhara rāvana bhayaū| rana hati rāma parama pada dayaū||

एक जनम कर कारन एहा। जेहि लागि राम धरी नरदेहा॥ प्रति अवतार कथा प्रभु केरी। सुनु मुनि बरनी कबिन्ह घनेरी॥

eka janama kara kārana ehā| jehi lāgi rāma dharī naradehā|| prati avatāra kathā prabhu kerī| sunu muni baranī kabinha ghanerī||

नारद श्राप दीन्ह एक बारा। कलप एक तेहि लगि अवतारा॥ गिरिजा चकित भई सुनि बानी। नारद बिष्नुभगत पुनि ग्यानि॥

nārada śrāpa dīnha eka bārā| kalapa eka tehi lagi avatārā|| girijā cakita bhaī suni bānī| nārada biṣnubhagata puni gyāni||

कारन कवन श्राप मुनि दीन्हा। का अपराध रमापति कीन्हा॥ यह प्रसंग मोहि कहहु पुरारी। मुनि मन मोह आचरज भारी॥

kārana kavana śrāpa muni dīnhā| kā aparādha ramāpati kīnhā|| yaha prasaṃga mohi kahahu purārī| muni mana moha ācaraja bhārī||

दोहा १२४(क)

बोले बिहसि महेस तब ग्यानी मूढ़ न कोइ। जेहि जस रघुपति करहिं जब सो तस तेहि छन होइ ॥ १२४ (क)॥

bole bihasi mahesa taba gyānī mūṛha na koi| jehi jasa raghupati karahiṃ jaba so tasa tehi chana hoi || 124 (ka)||

सोरठा १२४(ख)

कहउँ राम गुन गाथ भरद्वाज सादर सुनहु। भव भंजन रघुनाथ भजु तुलसी तजि मान मद ॥ १२४ (ख)॥

kahaum̐ rāma guna gātha bharadvāja sādara sunahu| bhava bhaṃjana raghunātha bhaju tulasī taji māna mada || 124 (kha)||

हिमगिरि गुहा एक अति पावनि। बह समीप सुरसरी सुहावनि॥ आश्रम परम पुनीत सुहावा। देखि देवरिषि मन अति भावा॥

himagiri guhā eka ati pāvani| baha samīpa surasarī suhāvani|| āśrama parama punīta suhāvā| dekhi devariṣi mana ati bhāvā||

निरखि सैल सरि बिपिन बिभागा। भयउ रमापति पद अनुरागा॥ सुमिरत हरिहि श्राप गति बाधी। सहज बिमल मन लागि समाधी॥

nirakhi saila sari bipina bibhāgā| bhayau ramāpati pada anurāgā|| sumirata harihi śrāpa gati bādhī| sahaja bimala mana lāgi samādhī||

मुनि गति देखि सुरेस डेराना। कामहि बोलि कीन्ह सनमाना॥ सहित सहाय जाहु मम हेतू। चकेउ हरषि हियँ जलचरकेतू॥

muni gati dekhi suresa ḍerānā| kāmahi boli kīnha sanamānā|| sahita sahāya jāhu mama hetū| cakeu haraṣi hiyam̐ jalacaraketū||

सुनासीर मन महुँ असि त्रासा। चहत देवरिषि मम पुर बासा॥ जे कामी लोलुप जग माहीं। कुटिल काक इव सबहि डेराहीं॥

sunāsīra mana mahum̐ asi trāsā| cahata devariṣi mama pura bāsā|| je kāmī lolupa jaga māhīṃ| kuṭila kāka iva sabahi ḍerāhīṃ||

दोहा १२५

सुख हाड़ लै भाग सठ स्वान निरखि मृगराज। छीनि लेइ जनि जान जड़ तिमि सुरपतिहि न लाज ॥ १२५॥

sukha hāṛa lai bhāga saṭha svāna nirakhi mṛgarāja| chīni lei jani jāna jaṛa timi surapatihi na lāja || 125||

तेहि आश्रमहिं मदन जब गयऊ। निज मायाँ बसंत निरमयऊ॥ कुसुमित बिबिध बिटप बहुरंगा। कूजहिं कोकिल गुंजहि भृंगा॥

tehi āśramahiṃ madana jaba gayaū| nija māyām̐ basaṃta niramayaū|| kusumita bibidha biṭapa bahuraṃgā| kūjahiṃ kokila guṃjahi bhṛṃgā||

चली सुहावनि त्रिबिध बयारी। काम कृसानु बढ़ावनिहारी॥ रंभादिक सुरनारि नबीना। सकल असमसर कला प्रबीना॥

calī suhāvani tribidha bayārī| kāma kṛsānu baṛhāvanihārī|| raṃbhādika suranāri nabīnā| sakala asamasara kalā prabīnā||

करहिं गान बहु तान तरंगा। बहुबिधि क्रीड़हि पानि पतंगा॥ देखि सहाय मदन हरषाना। कीन्हेसि पुनि प्रपंच बिधि नाना॥

karahiṃ gāna bahu tāna taraṃgā| bahubidhi krīṛahi pāni pataṃgā|| dekhi sahāya madana haraṣānā| kīnhesi puni prapaṃca bidhi nānā||

काम कला कछु मुनिहि न ब्यापी। निज भयँ डरेउ मनोभव पापी॥ सीम कि चाँपि सकइ कोउ तासु। बड़ रखवार रमापति जासू॥

kāma kalā kachu munihi na byāpī| nija bhayam̐ ḍareu manobhava pāpī|| sīma ki cām̐pi sakai kou tāsu| baṛa rakhavāra ramāpati jāsū||

दोहा १२६

सहित सहाय सभीत अति मानि हारि मन मैन। गहेसि जाइ मुनि चरन तब कहि सुठि आरत बैन ॥ १२६॥

sahita sahāya sabhīta ati māni hāri mana maina| gahesi jāi muni carana taba kahi suṭhi ārata baina || 126||

भयउ न नारद मन कछु रोषा। कहि प्रिय बचन काम परितोषा॥ नाइ चरन सिरु आयसु पाई। गयउ मदन तब सहित सहाई॥

bhayau na nārada mana kachu roṣā| kahi priya bacana kāma paritoṣā|| nāi carana siru āyasu pāī| gayau madana taba sahita sahāī||

मुनि सुसीलता आपनि करनी। सुरपति सभाँ जाइ सब बरनी॥ सुनि सब कें मन अचरजु आवा। मुनिहि प्रसंसि हरिहि सिरु नावा॥

muni susīlatā āpani karanī| surapati sabhām̐ jāi saba baranī|| suni saba keṃ mana acaraju āvā| munihi prasaṃsi harihi siru nāvā||

तब नारद गवने सिव पाहीं। जिता काम अहमिति मन माहीं॥ मार चरित संकरहिं सुनाए। अतिप्रिय जानि महेस सिखाए॥

taba nārada gavane siva pāhīṃ| jitā kāma ahamiti mana māhīṃ|| māra carita saṃkarahiṃ sunāe| atipriya jāni mahesa sikhāe||

बार बार बिनवउँ मुनि तोहीं। जिमि यह कथा सुनायहु मोहीं॥ तिमि जनि हरिहि सुनावहु कबहूँ। चलेहुँ प्रसंग दुराएडु तबहूँ॥

bāra bāra binavaum̐ muni tohīṃ| jimi yaha kathā sunāyahu mohīṃ|| timi jani harihi sunāvahu kabahūm̐| calehum̐ prasaṃga durāeḍu tabahūm̐||

दोहा १२७

संभु दीन्ह उपदेस हित नहिं नारदहि सोहान। भारद्वाज कौतुक सुनहु हरि इच्छा बलवान ॥ १२७॥

saṃbhu dīnha upadesa hita nahiṃ nāradahi sohāna| bhāradvāja kautuka sunahu hari icchā balavāna || 127||

राम कीन्ह चाहहिं सोइ होई। करै अन्यथा अस नहिं कोई॥ संभु बचन मुनि मन नहिं भाए। तब बिरंचि के लोक सिधाए॥

rāma kīnha cāhahiṃ soi hoī| karai anyathā asa nahiṃ koī|| saṃbhu bacana muni mana nahiṃ bhāe| taba biraṃci ke loka sidhāe||

एक बार करतल बर बीना। गावत हरि गुन गान प्रबीना॥ छीरसिंधु गवने मुनिनाथा। जहँ बस श्रीनिवास श्रुतिमाथा॥

eka bāra karatala bara bīnā| gāvata hari guna gāna prabīnā|| chīrasiṃdhu gavane munināthā| jaham̐ basa śrīnivāsa śrutimāthā||

हरषि मिले उठि रमानिकेता। बैठे आसन रिषिहि समेता॥ बोले बिहसि चराचर राया। बहुते दिनन कीन्हि मुनि दाया॥

haraṣi mile uṭhi ramāniketā| baiṭhe āsana riṣihi sametā|| bole bihasi carācara rāyā| bahute dinana kīnhi muni dāyā||

काम चरित नारद सब भाषे। जद्यपि प्रथम बरजि सिवँ राखे॥ अति प्रचंड रघुपति कै माया। जेहि न मोह अस को जग जाया॥

kāma carita nārada saba bhāṣe| jadyapi prathama baraji sivam̐ rākhe|| ati pracaṃḍa raghupati kai māyā| jehi na moha asa ko jaga jāyā||

दोहा १२८

रूख बदन करि बचन मृदु बोले श्रीभगवान। तुम्हरे सुमिरन तें मिटहिं मोह मार मद मान ॥ १२८॥

rūkha badana kari bacana mṛdu bole śrībhagavāna| tumhare sumirana teṃ miṭahiṃ moha māra mada māna || 128||

सुनु मुनि मोह होइ मन ताकें। ग्यान बिराग हृदय नहिं जाके॥ ब्रह्मचरज ब्रत रत मतिधीरा। तुम्हहि कि करइ मनोभव पीरा॥

sunu muni moha hoi mana tākeṃ| gyāna birāga hṛdaya nahiṃ jāke|| brahmacaraja brata rata matidhīrā| tumhahi ki karai manobhava pīrā||

नारद कहेउ सहित अभिमाना। कृपा तुम्हारि सकल भगवाना॥ करुनानिधि मन दीख बिचारी। उर अंकुरेउ गरब तरु भारी॥

nārada kaheu sahita abhimānā| kṛpā tumhāri sakala bhagavānā|| karunānidhi mana dīkha bicārī| ura aṃkureu garaba taru bhārī||

बेगि सो मै डारिहउँ उखारी। पन हमार सेवक हितकारी॥ मुनि कर हित मम कौतुक होई। अवसि उपाय करबि मै सोई॥

begi so mai ḍārihaum̐ ukhārī| pana hamāra sevaka hitakārī|| muni kara hita mama kautuka hoī| avasi upāya karabi mai soī||

तब नारद हरि पद सिर नाई। चले हृदयँ अहमिति अधिकाई॥ श्रीपति निज माया तब प्रेरी। सुनहु कठिन करनी तेहि केरी॥

taba nārada hari pada sira nāī| cale hṛdayam̐ ahamiti adhikāī|| śrīpati nija māyā taba prerī| sunahu kaṭhina karanī tehi kerī||

दोहा १२९

बिरचेउ मग महुँ नगर तेहिं सत जोजन बिस्तार। श्रीनिवासपुर तें अधिक रचना बिबिध प्रकार ॥ १२९॥

biraceu maga mahum̐ nagara tehiṃ sata jojana bistāra| śrīnivāsapura teṃ adhika racanā bibidha prakāra || 129||

बसहिं नगर सुंदर नर नारी। जनु बहु मनसिज रति तनुधारी॥ तेहिं पुर बसइ सीलनिधि राजा। अगनित हय गय सेन समाजा॥

basahiṃ nagara suṃdara nara nārī| janu bahu manasija rati tanudhārī|| tehiṃ pura basai sīlanidhi rājā| aganita haya gaya sena samājā||

सत सुरेस सम बिभव बिलासा। रूप तेज बल नीति निवासा॥ बिस्वमोहनी तासु कुमारी। श्री बिमोह जिसु रूपु निहारी॥

sata suresa sama bibhava bilāsā| rūpa teja bala nīti nivāsā|| bisvamohanī tāsu kumārī| śrī bimoha jisu rūpu nihārī||

सोरठा ३

सोइ हरिमाया सब गुन खानी। सोभा तासु कि जाइ बखानी॥ करइ स्वयंबर सो नृपबाला। आए तहँ अगनित महिपाला॥

soi harimāyā saba guna khānī| sobhā tāsu ki jāi bakhānī|| karai svayaṃbara so nṛpabālā| āe taham̐ aganita mahipālā||

मुनि कौतुकी नगर तेहिं गयऊ। पुरबासिन्ह सब पूछत भयऊ॥ सुनि सब चरित भूपगृहँ आए। करि पूजा नृप मुनि बैठाए॥

muni kautukī nagara tehiṃ gayaū| purabāsinha saba pūchata bhayaū|| suni saba carita bhūpagṛham̐ āe| kari pūjā nṛpa muni baiṭhāe||

दोहा १३०

आनि देखाई नारदहि भूपति राजकुमारि। कहहु नाथ गुन दोष सब एहि के हृदयँ बिचारि ॥ १३०॥

āni dekhāī nāradahi bhūpati rājakumāri| kahahu nātha guna doṣa saba ehi ke hṛdayam̐ bicāri || 130||

देखि रूप मुनि बिरति बिसारी। बड़ी बार लगि रहे निहारी॥ लच्छन तासु बिलोकि भुलाने। हृदयँ हरष नहिं प्रगट बखाने॥

dekhi rūpa muni birati bisārī| baṛī bāra lagi rahe nihārī|| lacchana tāsu biloki bhulāne| hṛdayam̐ haraṣa nahiṃ pragaṭa bakhāne||

जो एहि बरइ अमर सोइ होई। समरभूमि तेहि जीत न कोई॥ सेवहिं सकल चराचर ताही। बरइ सीलनिधि कन्या जाही॥

jo ehi barai amara soi hoī| samarabhūmi tehi jīta na koī|| sevahiṃ sakala carācara tāhī| barai sīlanidhi kanyā jāhī||

लच्छन सब बिचारि उर राखे। कछुक बनाइ भूप सन भाषे॥ सुता सुलच्छन कहि नृप पाहीं। नारद चले सोच मन माहीं॥

lacchana saba bicāri ura rākhe| kachuka banāi bhūpa sana bhāṣe|| sutā sulacchana kahi nṛpa pāhīṃ| nārada cale soca mana māhīṃ||

करौं जाइ सोइ जतन बिचारी। जेहि प्रकार मोहि बरै कुमारी॥ जप तप कछु न होइ तेहि काला। हे बिधि मिलइ कवन बिधि बाला॥

karauṃ jāi soi jatana bicārī| jehi prakāra mohi barai kumārī|| japa tapa kachu na hoi tehi kālā| he bidhi milai kavana bidhi bālā||

दोहा १३१

एहि अवसर चाहिअ परम सोभा रूप बिसाल। जो बिलोकि रीझै कुअँरि तब मेलै जयमाल ॥ १३१॥

ehi avasara cāhia parama sobhā rūpa bisāla| jo biloki rījhai kuam̐ri taba melai jayamāla || 131||

हरि सन मागौं सुंदरताई। होइहि जात गहरु अति भाई॥ मोरें हित हरि सम नहिं कोऊ। एहि अवसर सहाय सोइ होऊ॥

hari sana māgauṃ suṃdaratāī| hoihi jāta gaharu ati bhāī|| moreṃ hita hari sama nahiṃ koū| ehi avasara sahāya soi hoū||

बहुबिधि बिनय कीन्हि तेहि काला। प्रगटेउ प्रभु कौतुकी कृपाला॥ प्रभु बिलोकि मुनि नयन जुड़ाने। होइहि काजु हिएँ हरषाने॥

bahubidhi binaya kīnhi tehi kālā| pragaṭeu prabhu kautukī kṛpālā|| prabhu biloki muni nayana juṛāne| hoihi kāju hiem̐ haraṣāne||

अति आरति कहि कथा सुनाई। करहु कृपा करि होहु सहाई॥ आपन रूप देहु प्रभु मोही। आन भाँति नहिं पावौं ओही॥

ati ārati kahi kathā sunāī| karahu kṛpā kari hohu sahāī|| āpana rūpa dehu prabhu mohī| āna bhām̐ti nahiṃ pāvauṃ ohī||

जेहि बिधि नाथ होइ हित मोरा। करहु सो बेगि दास मैं तोरा॥ निज माया बल देखि बिसाला। हियँ हँसि बोले दीनदयाला॥

jehi bidhi nātha hoi hita morā| karahu so begi dāsa maiṃ torā|| nija māyā bala dekhi bisālā| hiyam̐ ham̐si bole dīnadayālā||

दोहा

जेहि बिधि होइहि परम हित नारद सुनहु तुम्हार।

jehi bidhi hoihi parama hita nārada sunahu tumhāra|

सोरठा १३२

सोइ हम करब न आन कछु बचन न मृषा हमार॥

soi hama karaba na āna kachu bacana na mṛṣā hamāra||

कुपथ माग रुज ब्याकुल रोगी। बैद न देइ सुनहु मुनि जोगी॥ एहि बिधि हित तुम्हार मैं ठयऊ। कहि अस अंतरहित प्रभु भयऊ॥

kupatha māga ruja byākula rogī| baida na dei sunahu muni jogī|| ehi bidhi hita tumhāra maiṃ ṭhayaū| kahi asa aṃtarahita prabhu bhayaū||

माया बिबस भए मुनि मूढ़ा। समुझी नहिं हरि गिरा निगूढ़ा॥ गवने तुरत तहाँ रिषिराई। जहाँ स्वयंबर भूमि बनाई॥

māyā bibasa bhae muni mūṛhā| samujhī nahiṃ hari girā nigūṛhā|| gavane turata tahām̐ riṣirāī| jahām̐ svayaṃbara bhūmi banāī||

निज निज आसन बैठे राजा। बहु बनाव करि सहित समाजा॥ मुनि मन हरष रूप अति मोरें। मोहि तजि आनहि बारिहि न भोरें॥

nija nija āsana baiṭhe rājā| bahu banāva kari sahita samājā|| muni mana haraṣa rūpa ati moreṃ| mohi taji ānahi bārihi na bhoreṃ||

मुनि हित कारन कृपानिधाना। दीन्ह कुरूप न जाइ बखाना॥

muni hita kārana kṛpānidhānā| dīnha kurūpa na jāi bakhānā||

सोरठा ४

सो चरित्र लखि काहुँ न पावा। नारद जानि सबहिं सिर नावा॥

so caritra lakhi kāhum̐ na pāvā| nārada jāni sabahiṃ sira nāvā||

दोहा १३३

रहे तहाँ दुइ रुद्र गन ते जानहिं सब भेउ। बिप्रबेष देखत फिरहिं परम कौतुकी तेउ ॥ १३३॥

rahe tahām̐ dui rudra gana te jānahiṃ saba bheu| biprabeṣa dekhata phirahiṃ parama kautukī teu || 133||