बालकाण्ड

बालकाण्ड · दोहा १३४–१५२

विभज्यताम्

जेंहि समाज बैंठे मुनि जाई। हृदयँ रूप अहमिति अधिकाई॥ तहँ बैठ महेस गन दोऊ। बिप्रबेष गति लखइ न कोऊ॥

jeṃhi samāja baiṃṭhe muni jāī| hṛdayam̐ rūpa ahamiti adhikāī|| taham̐ baiṭha mahesa gana doū| biprabeṣa gati lakhai na koū||

करहिं कूटि नारदहि सुनाई। नीकि दीन्हि हरि सुंदरताई॥ रीझहि राजकुअँरि छबि देखी। इन्हहि बरिहि हरि जानि बिसेषी॥

karahiṃ kūṭi nāradahi sunāī| nīki dīnhi hari suṃdaratāī|| rījhahi rājakuam̐ri chabi dekhī| inhahi barihi hari jāni biseṣī||

मुनिहि मोह मन हाथ पराएँ। हँसहिं संभु गन अति सचु पाएँ॥ जदपि सुनहिं मुनि अटपटि बानी। समुझि न परइ बुद्धि भ्रम सानी॥

munihi moha mana hātha parāem̐| ham̐sahiṃ saṃbhu gana ati sacu pāem̐|| jadapi sunahiṃ muni aṭapaṭi bānī| samujhi na parai buddhi bhrama sānī||

काहुँ न लखा सो चरित बिसेषा। सो सरूप नृपकन्याँ देखा॥ मर्कट बदन भयंकर देही। देखत हृदयँ क्रोध भा तेही॥

kāhum̐ na lakhā so carita biseṣā| so sarūpa nṛpakanyām̐ dekhā|| markaṭa badana bhayaṃkara dehī| dekhata hṛdayam̐ krodha bhā tehī||

दोहा १३४

सखीं संग लै कुअँरि तब चलि जनु राजमराल। देखत फिरइ महीप सब कर सरोज जयमाल ॥ १३४॥

sakhīṃ saṃga lai kuam̐ri taba cali janu rājamarāla| dekhata phirai mahīpa saba kara saroja jayamāla || 134||

जेहि दिसि बैठे नारद फूली। सो दिसि देहि न बिलोकी भूली॥ पुनि पुनि मुनि उकसहिं अकुलाहीं। देखि दसा हर गन मुसकाहीं॥

jehi disi baiṭhe nārada phūlī| so disi dehi na bilokī bhūlī|| puni puni muni ukasahiṃ akulāhīṃ| dekhi dasā hara gana musakāhīṃ||

धरि नृपतनु तहँ गयउ कृपाला। कुअँरि हरषि मेलेउ जयमाला॥ दुलहिनि लै गे लच्छिनिवासा। नृपसमाज सब भयउ निरासा॥

dhari nṛpatanu taham̐ gayau kṛpālā| kuam̐ri haraṣi meleu jayamālā|| dulahini lai ge lacchinivāsā| nṛpasamāja saba bhayau nirāsā||

मुनि अति बिकल मोंहँ मति नाठी। मनि गिरि गई छूटि जनु गाँठी॥ तब हर गन बोले मुसुकाई। निज मुख मुकुर बिलोकहु जाई॥

muni ati bikala moṃham̐ mati nāṭhī| mani giri gaī chūṭi janu gām̐ṭhī|| taba hara gana bole musukāī| nija mukha mukura bilokahu jāī||

अस कहि दोउ भागे भयँ भारी। बदन दीख मुनि बारि निहारी॥ बेषु बिलोकि क्रोध अति बाढ़ा। तिन्हहि सराप दीन्ह अति गाढ़ा॥

asa kahi dou bhāge bhayam̐ bhārī| badana dīkha muni bāri nihārī|| beṣu biloki krodha ati bāṛhā| tinhahi sarāpa dīnha ati gāṛhā||

दोहा १३५

होहु निसाचर जाइ तुम्ह कपटी पापी दोउ। हँसेहु हमहि सो लेहु फल बहुरि हँसेहु मुनि कोउ ॥ १३५॥

hohu nisācara jāi tumha kapaṭī pāpī dou| ham̐sehu hamahi so lehu phala bahuri ham̐sehu muni kou || 135||

पुनि जल दीख रूप निज पावा। तदपि हृदयँ संतोष न आवा॥ फरकत अधर कोप मन माहीं। सपदी चले कमलापति पाहीं॥

puni jala dīkha rūpa nija pāvā| tadapi hṛdayam̐ saṃtoṣa na āvā|| pharakata adhara kopa mana māhīṃ| sapadī cale kamalāpati pāhīṃ||

देहउँ श्राप कि मरिहउँ जाई। जगत मोर उपहास कराई॥ बीचहिं पंथ मिले दनुजारी। संग रमा सोइ राजकुमारी॥

dehaum̐ śrāpa ki marihaum̐ jāī| jagata mora upahāsa karāī|| bīcahiṃ paṃtha mile danujārī| saṃga ramā soi rājakumārī||

बोले मधुर बचन सुरसाईं। मुनि कहँ चले बिकल की नाईं॥ सुनत बचन उपजा अति क्रोधा। माया बस न रहा मन बोधा॥

bole madhura bacana surasāīṃ| muni kaham̐ cale bikala kī nāīṃ|| sunata bacana upajā ati krodhā| māyā basa na rahā mana bodhā||

पर संपदा सकहु नहिं देखी। तुम्हरें इरिषा कपट बिसेषी॥ मथत सिंधु रुद्रहि बौरायहु। सुरन्ह प्रेरी बिष पान करायहु॥

para saṃpadā sakahu nahiṃ dekhī| tumhareṃ iriṣā kapaṭa biseṣī|| mathata siṃdhu rudrahi baurāyahu| suranha prerī biṣa pāna karāyahu||

दोहा १३६

असुर सुरा बिष संकरहि आपु रमा मनि चारु। स्वारथ साधक कुटिल तुम्ह सदा कपट ब्यवहारु ॥ १३६॥

asura surā biṣa saṃkarahi āpu ramā mani cāru| svāratha sādhaka kuṭila tumha sadā kapaṭa byavahāru || 136||

परम स्वतंत्र न सिर पर कोई। भावइ मनहि करहु तुम्ह सोई॥ भलेहि मंद मंदेहि भल करहू। बिसमय हरष न हियँ कछु धरहू॥

parama svataṃtra na sira para koī| bhāvai manahi karahu tumha soī|| bhalehi maṃda maṃdehi bhala karahū| bisamaya haraṣa na hiyam̐ kachu dharahū||

डहकि डहकि परिचेहु सब काहू। अति असंक मन सदा उछाहू॥ करम सुभासुभ तुम्हहि न बाधा। अब लगि तुम्हहि न काहूँ साधा॥

ḍahaki ḍahaki paricehu saba kāhū| ati asaṃka mana sadā uchāhū|| karama subhāsubha tumhahi na bādhā| aba lagi tumhahi na kāhūm̐ sādhā||

भले भवन अब बायन दीन्हा। पावहुगे फल आपन कीन्हा॥ बंचेहु मोहि जवनि धरि देहा। सोइ तनु धरहु श्राप मम एहा॥

bhale bhavana aba bāyana dīnhā| pāvahuge phala āpana kīnhā|| baṃcehu mohi javani dhari dehā| soi tanu dharahu śrāpa mama ehā||

कपि आकृति तुम्ह कीन्हि हमारी। करिहहिं कीस सहाय तुम्हारी॥ मम अपकार कीन्ही तुम्ह भारी। नारी बिरहँ तुम्ह होब दुखारी॥

kapi ākṛti tumha kīnhi hamārī| karihahiṃ kīsa sahāya tumhārī|| mama apakāra kīnhī tumha bhārī| nārī biraham̐ tumha hoba dukhārī||

दोहा १३७

श्राप सीस धरी हरषि हियँ प्रभु बहु बिनती कीन्हि। निज माया कै प्रबलता करषि कृपानिधि लीन्हि ॥ १३७॥

śrāpa sīsa dharī haraṣi hiyam̐ prabhu bahu binatī kīnhi| nija māyā kai prabalatā karaṣi kṛpānidhi līnhi || 137||

जब हरि माया दूरि निवारी। नहिं तहँ रमा न राजकुमारी॥ तब मुनि अति सभीत हरि चरना। गहे पाहि प्रनतारति हरना॥

jaba hari māyā dūri nivārī| nahiṃ taham̐ ramā na rājakumārī|| taba muni ati sabhīta hari caranā| gahe pāhi pranatārati haranā||

मृषा होउ मम श्राप कृपाला। मम इच्छा कह दीनदयाला॥ मैं दुर्बचन कहे बहुतेरे। कह मुनि पाप मिटिहिं किमि मेरे॥

mṛṣā hou mama śrāpa kṛpālā| mama icchā kaha dīnadayālā|| maiṃ durbacana kahe bahutere| kaha muni pāpa miṭihiṃ kimi mere||

जपहु जाइ संकर सत नामा। होइहि हृदयँ तुरंत बिश्रामा॥ कोउ नहिं सिव समान प्रिय मोरें। असि परतीति तजहु जनि भोरें॥

japahu jāi saṃkara sata nāmā| hoihi hṛdayam̐ turaṃta biśrāmā|| kou nahiṃ siva samāna priya moreṃ| asi paratīti tajahu jani bhoreṃ||

जेहि पर कृपा न करहिं पुरारी। सो न पाव मुनि भगति हमारी॥ अस उर धरि महि बिचरहु जाई। अब न तुम्हहि माया निअराई॥

jehi para kṛpā na karahiṃ purārī| so na pāva muni bhagati hamārī|| asa ura dhari mahi bicarahu jāī| aba na tumhahi māyā niarāī||

दोहा १३८

बहुबिधि मुनिहि प्रबोधि प्रभु तब भए अंतरधान। सत्यलोक नारद चले करत राम गुन गान ॥ १३८॥

bahubidhi munihi prabodhi prabhu taba bhae aṃtaradhāna| satyaloka nārada cale karata rāma guna gāna || 138||

हर गन मुनिहि जात पथ देखी। बिगतमोह मन हरष बिसेषी॥ अति सभीत नारद पहिं आए। गहि पद आरत बचन सुनाए॥

hara gana munihi jāta patha dekhī| bigatamoha mana haraṣa biseṣī|| ati sabhīta nārada pahiṃ āe| gahi pada ārata bacana sunāe||

हर गन हम न बिप्र मुनिराया। बड़ अपराध कीन्ह फल पाया॥ श्राप अनुग्रह करहु कृपाला। बोले नारद दीनदयाला॥

hara gana hama na bipra munirāyā| baṛa aparādha kīnha phala pāyā|| śrāpa anugraha karahu kṛpālā| bole nārada dīnadayālā||

निसिचर जाइ होहु तुम्ह दोऊ। बैभव बिपुल तेज बल होऊ॥ भुजबल बिस्व जितब तुम्ह जहिआ। धरिहहिं बिष्नु मनुज तनु तहिआ॥

nisicara jāi hohu tumha doū| baibhava bipula teja bala hoū|| bhujabala bisva jitaba tumha jahiā| dharihahiṃ biṣnu manuja tanu tahiā||

समर मरन हरि हाथ तुम्हारा। होइहहु मुकुत न पुनि संसारा॥ चले जुगल मुनि पद सिर नाई। भए निसाचर कालहि पाई॥

samara marana hari hātha tumhārā| hoihahu mukuta na puni saṃsārā|| cale jugala muni pada sira nāī| bhae nisācara kālahi pāī||

दोहा १३९

एक कलप एहि हेतु प्रभु लीन्ह मनुज अवतार। सुर रंजन सज्जन सुखद हरि भंजन भुबि भार ॥ १३९॥

eka kalapa ehi hetu prabhu līnha manuja avatāra| sura raṃjana sajjana sukhada hari bhaṃjana bhubi bhāra || 139||

एहि बिधि जनम करम हरि केरे। सुंदर सुखद बिचित्र घनेरे॥ कलप कलप प्रति प्रभु अवतरहीं। चारु चरित नानाबिधि करहीं॥

ehi bidhi janama karama hari kere| suṃdara sukhada bicitra ghanere|| kalapa kalapa prati prabhu avatarahīṃ| cāru carita nānābidhi karahīṃ||

तब तब कथा मुनीसन्ह गाई। परम पुनीत प्रबंध बनाई॥ बिबिध प्रसंग अनूप बखाने। करहिं न सुनि आचरजु सयाने॥

taba taba kathā munīsanha gāī| parama punīta prabaṃdha banāī|| bibidha prasaṃga anūpa bakhāne| karahiṃ na suni ācaraju sayāne||

हरि अनंत हरिकथा अनंता। कहहिं सुनहिं बहुबिधि सब संता॥ रामचंद्र के चरित सुहाए। कलप कोटि लगि जाहिं न गाए॥

hari anaṃta harikathā anaṃtā| kahahiṃ sunahiṃ bahubidhi saba saṃtā|| rāmacaṃdra ke carita suhāe| kalapa koṭi lagi jāhiṃ na gāe||

यह प्रसंग मैं कहा भवानी। हरिमायाँ मोहहिं मुनि ग्यानी॥ प्रभु कौतुकी प्रनत हितकारी। सेवत सुलभ सकल दुख हारी॥

yaha prasaṃga maiṃ kahā bhavānī| harimāyām̐ mohahiṃ muni gyānī|| prabhu kautukī pranata hitakārī| sevata sulabha sakala dukha hārī||

सोरठा १४०

सुर नर मुनि कोउ नाहिं जेहि न मोह माया प्रबल। अस बिचारि मन माहिं भजिअ महामाया पतिहि ॥ १४०॥

sura nara muni kou nāhiṃ jehi na moha māyā prabala| asa bicāri mana māhiṃ bhajia mahāmāyā patihi || 140||

अपर हेतु सुनु सैलकुमारी। कहउँ बिचित्र कथा बिस्तारी॥ जेहि कारन अज अगुन अरूपा। ब्रह्म भयउ कोसलपुर भूपा॥

apara hetu sunu sailakumārī| kahaum̐ bicitra kathā bistārī|| jehi kārana aja aguna arūpā| brahma bhayau kosalapura bhūpā||

जो प्रभु बिपिन फिरत तुम्ह देखा। बंधु समेत धरें मुनिबेषा॥ जासु चरित अवलोकि भवानी। सती सरीर रहिहु बौरानी॥

jo prabhu bipina phirata tumha dekhā| baṃdhu sameta dhareṃ munibeṣā|| jāsu carita avaloki bhavānī| satī sarīra rahihu baurānī||

अजहुँ न छाया मिटति तुम्हारी। तासु चरित सुनु भ्रम रुज हारी॥ लीला कीन्हि जो तेहिं अवतारा। सो सब कहिहउँ मति अनुसारा॥

ajahum̐ na chāyā miṭati tumhārī| tāsu carita sunu bhrama ruja hārī|| līlā kīnhi jo tehiṃ avatārā| so saba kahihaum̐ mati anusārā||

भरद्वाज सुनि संकर बानी। सकुचि सप्रेम उमा मुसकानी॥ लगे बहुरि बरने बृषकेतू। सो अवतार भयउ जेहि हेतू॥

bharadvāja suni saṃkara bānī| sakuci saprema umā musakānī|| lage bahuri barane bṛṣaketū| so avatāra bhayau jehi hetū||

दोहा १४१

सो मैं तुम्ह सन कहउँ सबु सुनु मुनीस मन लाई। राम कथा कलि मल हरनि मंगल करनि सुहाइ ॥ १४१॥

so maiṃ tumha sana kahaum̐ sabu sunu munīsa mana lāī| rāma kathā kali mala harani maṃgala karani suhāi || 141||

स्वायंभू मनु अरु सतरूपा। जिन्ह तें भै नरसृष्टि अनूपा॥ दंपति धरम आचरन नीका। अजहुँ गाव श्रुति जिन्ह कै लीका॥

svāyaṃbhū manu aru satarūpā| jinha teṃ bhai narasṛṣṭi anūpā|| daṃpati dharama ācarana nīkā| ajahum̐ gāva śruti jinha kai līkā||

नृप उत्तानपाद सुत तासू। ध्रुव हरि भगत भयउ सुत जासू॥ लघु सुत नाम प्रिय्रब्रत ताही। बेद पुरान प्रसंसहि जाही॥

nṛpa uttānapāda suta tāsū| dhruva hari bhagata bhayau suta jāsū|| laghu suta nāma priyrabrata tāhī| beda purāna prasaṃsahi jāhī||

देवहूति पुनि तासु कुमारी। जो मुनि कर्दम कै प्रिय नारी॥ आदिदेव प्रभु दीनदयाला। जठर धरेउ जेहिं कपिल कृपाला॥

devahūti puni tāsu kumārī| jo muni kardama kai priya nārī|| ādideva prabhu dīnadayālā| jaṭhara dhareu jehiṃ kapila kṛpālā||

सांख्य सास्त्र जिन्ह प्रगट बखाना। तत्व बिचार निपुन भगवाना॥ तेहिं मनु राज कीन्ह बहु काला। प्रभु आयसु सब बिधि प्रतिपाला॥

sāṃkhya sāstra jinha pragaṭa bakhānā| tatva bicāra nipuna bhagavānā|| tehiṃ manu rāja kīnha bahu kālā| prabhu āyasu saba bidhi pratipālā||

सोरठा १४२

होइ न बिषय बिराग भवन बसत भा चौथपन। हृदयँ बहुत दुख लाग जनम गयउ हरिभगति बिनु ॥ १४२॥

hoi na biṣaya birāga bhavana basata bhā cauthapana| hṛdayam̐ bahuta dukha lāga janama gayau haribhagati binu || 142||

बरबस राज सुतहि तब दीन्हा। नारि समेत गवन बन कीन्हा॥ तीरथ बर नैमिष बिख्याता। अति पुनीत साधक सिधि दाता॥

barabasa rāja sutahi taba dīnhā| nāri sameta gavana bana kīnhā|| tīratha bara naimiṣa bikhyātā| ati punīta sādhaka sidhi dātā||

बसहिं तहाँ मुनि सिद्ध समाजा। तहँ हियँ हरषि चलेउ मनु राजा॥ पंथ जात सोहहिं मतिधीरा। ग्यान भगति जनु धरें सरीरा॥

basahiṃ tahām̐ muni siddha samājā| taham̐ hiyam̐ haraṣi caleu manu rājā|| paṃtha jāta sohahiṃ matidhīrā| gyāna bhagati janu dhareṃ sarīrā||

पहुँचे जाइ धेनुमति तीरा। हरषि नहाने निरमल नीरा॥ आए मिलन सिद्ध मुनि ग्यानी। धरम धुरंधर नृपरिषि जानी॥

pahum̐ce jāi dhenumati tīrā| haraṣi nahāne niramala nīrā|| āe milana siddha muni gyānī| dharama dhuraṃdhara nṛpariṣi jānī||

जहँ जँह तीरथ रहे सुहाए। मुनिन्ह सकल सादर करवाए॥ कृस सरीर मुनिपट परिधाना। सत समाज नित सुनहिं पुराना॥

jaham̐ jam̐ha tīratha rahe suhāe| muninha sakala sādara karavāe|| kṛsa sarīra munipaṭa paridhānā| sata samāja nita sunahiṃ purānā||

दोहा १४३

द्वादस अच्छर मंत्र पुनि जपहिं सहित अनुराग। बासुदेव पद पंकरुह दंपति मन अति लाग ॥ १४३॥

dvādasa acchara maṃtra puni japahiṃ sahita anurāga| bāsudeva pada paṃkaruha daṃpati mana ati lāga || 143||

करहिं अहार साक फल कंदा। सुमिरहिं ब्रह्म सच्चिदानंदा॥ पुनि हरि हेतु करन तप लागे। बारि अधार मूल फल त्यागे॥

karahiṃ ahāra sāka phala kaṃdā| sumirahiṃ brahma saccidānaṃdā|| puni hari hetu karana tapa lāge| bāri adhāra mūla phala tyāge||

उर अभिलाष निंरंतर होई। देखअ नयन परम प्रभु सोई॥ अगुन अखंड अनंत अनादी। जेहि चिंतहिं परमारथबादी॥

ura abhilāṣa niṃraṃtara hoī| dekhaa nayana parama prabhu soī|| aguna akhaṃḍa anaṃta anādī| jehi ciṃtahiṃ paramārathabādī||

नेति नेति जेहि बेद निरूपा। निजानंद निरुपाधि अनूपा॥ संभु बिरंचि बिष्नु भगवाना। उपजहिं जासु अंस तें नाना॥

neti neti jehi beda nirūpā| nijānaṃda nirupādhi anūpā|| saṃbhu biraṃci biṣnu bhagavānā| upajahiṃ jāsu aṃsa teṃ nānā||

ऐसेउ प्रभु सेवक बस अहई। भगत हेतु लीलातनु गहई॥ जौं यह बचन सत्य श्रुति भाषा। तौ हमार पूजहि अभिलाषा॥

aiseu prabhu sevaka basa ahaī| bhagata hetu līlātanu gahaī|| jauṃ yaha bacana satya śruti bhāṣā| tau hamāra pūjahi abhilāṣā||

दोहा १४४

एहि बिधि बीतें बरष षट सहस बारि आहार। संबत सप्त सहस्त्र पुनि रहे समीर अधार ॥ १४४॥

ehi bidhi bīteṃ baraṣa ṣaṭa sahasa bāri āhāra| saṃbata sapta sahastra puni rahe samīra adhāra || 144||

बरष सहस दस त्यागेउ सोऊ। ठाढ़े रहे एक पद दोऊ॥ बिधि हरि तप देखि अपारा। मनु समीप आए बहु बारा॥

baraṣa sahasa dasa tyāgeu soū| ṭhāṛhe rahe eka pada doū|| bidhi hari tapa dekhi apārā| manu samīpa āe bahu bārā||

मागहु बर बहु भाँति लोभाए। परम धीर नहिं चलहिं चलाए॥ अस्थिमात्र होइ रहे सरीरा। तदपि मनाग मनहिं नहिं पीरा॥

māgahu bara bahu bhām̐ti lobhāe| parama dhīra nahiṃ calahiṃ calāe|| asthimātra hoi rahe sarīrā| tadapi manāga manahiṃ nahiṃ pīrā||

प्रभु सर्बग्य दास निज जानी। गति अनन्य तापस नृप रानी॥ मागु मागु बरु भै नभ बानी। परम गभीर कृपामृत सानी॥

prabhu sarbagya dāsa nija jānī| gati ananya tāpasa nṛpa rānī|| māgu māgu baru bhai nabha bānī| parama gabhīra kṛpāmṛta sānī||

मृतक जिआवनि गिरा सुहाई। श्रबन रंध्र होइ उर जब आई॥ ह्रष्टपुष्ट तन भए सुहाए। मानहुँ अबहिं भवन ते आए॥

mṛtaka jiāvani girā suhāī| śrabana raṃdhra hoi ura jaba āī|| hraṣṭapuṣṭa tana bhae suhāe| mānahum̐ abahiṃ bhavana te āe||

दोहा १४५

श्रवन सुधा सम बचन सुनि पुलक प्रफुल्लित गात। बोले मनु करि दंडवत प्रेम न हृदयँ समात ॥ १४५॥

śravana sudhā sama bacana suni pulaka praphullita gāta| bole manu kari daṃḍavata prema na hṛdayam̐ samāta || 145||

सुनु सेवक सुरतरु सुरधेनु। बिधि हरि हर बंदित पद रेनू॥ सेवत सुलभ सकल सुख दायक। प्रनतपाल सचराचर नायक॥

sunu sevaka surataru suradhenu| bidhi hari hara baṃdita pada renū|| sevata sulabha sakala sukha dāyaka| pranatapāla sacarācara nāyaka||

जौं अनाथ हित हम पर नेहू। तौ प्रसन्न होइ यह बर देहू॥ जो सरूप बस सिव मन माहीं। जेहि कारन मुनि जतन कराहीं॥

jauṃ anātha hita hama para nehū| tau prasanna hoi yaha bara dehū|| jo sarūpa basa siva mana māhīṃ| jehi kārana muni jatana karāhīṃ||

जो भुसुंडि मन मानस हंसा। सगुन अगुन जेहि निगम प्रसंसा॥ देखहिं हम सो रूप भरि लोचन। कृपा करहु प्रनतारति मोचन॥

jo bhusuṃḍi mana mānasa haṃsā| saguna aguna jehi nigama prasaṃsā|| dekhahiṃ hama so rūpa bhari locana| kṛpā karahu pranatārati mocana||

दंपति बचन परम प्रिय लागे। मुदुल बिनीत प्रेम रस पागे॥ भगत बछल प्रभु कृपानिधाना। बिस्वबास प्रगटे भगवाना॥

daṃpati bacana parama priya lāge| mudula binīta prema rasa pāge|| bhagata bachala prabhu kṛpānidhānā| bisvabāsa pragaṭe bhagavānā||

दोहा १४६

नील सरोरुह नील मनि नील नीरधर स्याम। लाजहिं तन सोभा निरखि कोटि कोटि सत काम ॥ १४६॥

nīla saroruha nīla mani nīla nīradhara syāma| lājahiṃ tana sobhā nirakhi koṭi koṭi sata kāma || 146||

सरद मयंक बदन छबि सींवा। चारु कपोल चिबुक दर ग्रीवा॥ अधर अरुन रद सुंदर नासा। बिधु कर निकर बिनिंदक हासा॥

sarada mayaṃka badana chabi sīṃvā| cāru kapola cibuka dara grīvā|| adhara aruna rada suṃdara nāsā| bidhu kara nikara biniṃdaka hāsā||

नव अबुंज अंबक छबि नीकी। चितवनि ललित भावँती जी की॥ भुकुटि मनोज चाप छबि हारी। तिलक ललाट पटल दुतिकारी॥

nava abuṃja aṃbaka chabi nīkī| citavani lalita bhāvam̐tī jī kī|| bhukuṭi manoja cāpa chabi hārī| tilaka lalāṭa paṭala dutikārī||

कुंडल मकर मुकुट सिर भ्राजा। कुटिल केस जनु मधुप समाजा॥ उर श्रीबत्स रुचिर बनमाला। पदिक हार भूषन मनिजाला॥

kuṃḍala makara mukuṭa sira bhrājā| kuṭila kesa janu madhupa samājā|| ura śrībatsa rucira banamālā| padika hāra bhūṣana manijālā||

केहरि कंधर चारु जनेउ। बाहु बिभूषन सुंदर तेऊ॥ करि कर सरि सुभग भुजदंडा। कटि निषंग कर सर कोदंडा॥

kehari kaṃdhara cāru janeu| bāhu bibhūṣana suṃdara teū|| kari kara sari subhaga bhujadaṃḍā| kaṭi niṣaṃga kara sara kodaṃḍā||

दोहा १४७

तडित बिनिंदक पीत पट उदर रेख बर तीनि। नाभि मनोहर लेति जनु जमुन भवँर छबि छीनि ॥ १४७॥

taḍita biniṃdaka pīta paṭa udara rekha bara tīni| nābhi manohara leti janu jamuna bhavam̐ra chabi chīni || 147||

पद राजीव बरनि नहि जाहीं। मुनि मन मधुप बसहिं जेन्ह माहीं॥ बाम भाग सोभति अनुकूला। आदिसक्ति छबिनिधि जगमूला॥

pada rājīva barani nahi jāhīṃ| muni mana madhupa basahiṃ jenha māhīṃ|| bāma bhāga sobhati anukūlā| ādisakti chabinidhi jagamūlā||

जासु अंस उपजहिं गुनखानी। अगनित लच्छि उमा ब्रह्मानी॥ भृकुटि बिलास जासु जग होई। राम बाम दिसि सीता सोई॥

jāsu aṃsa upajahiṃ gunakhānī| aganita lacchi umā brahmānī|| bhṛkuṭi bilāsa jāsu jaga hoī| rāma bāma disi sītā soī||

छबिसमुद्र हरि रूप बिलोकी। एकटक रहे नयन पट रोकी॥ चितवहिं सादर रूप अनूपा। तृप्ति न मानहिं मनु सतरूपा॥

chabisamudra hari rūpa bilokī| ekaṭaka rahe nayana paṭa rokī|| citavahiṃ sādara rūpa anūpā| tṛpti na mānahiṃ manu satarūpā||

हरष बिबस तन दसा भुलानी। परे दंड इव गहि पद पानी॥ सिर परसे प्रभु निज कर कंजा। तुरत उठाए करुनापुंजा॥

haraṣa bibasa tana dasā bhulānī| pare daṃḍa iva gahi pada pānī|| sira parase prabhu nija kara kaṃjā| turata uṭhāe karunāpuṃjā||

दोहा १४८

बोले कृपानिधान पुनि अति प्रसन्न मोहि जानि। मागहु बर जोइ भाव मन महादानि अनुमानि ॥ १४८॥

bole kṛpānidhāna puni ati prasanna mohi jāni| māgahu bara joi bhāva mana mahādāni anumāni || 148||

सुनि प्रभु बचन जोरि जुग पानी। धरि धीरजु बोली मृदु बानी॥ नाथ देखि पद कमल तुम्हारे। अब पूरे सब काम हमारे॥

suni prabhu bacana jori juga pānī| dhari dhīraju bolī mṛdu bānī|| nātha dekhi pada kamala tumhāre| aba pūre saba kāma hamāre||

एक लालसा बड़ि उर माही। सुगम अगम कहि जात सो नाहीं॥ तुम्हहि देत अति सुगम गोसाईं। अगम लाग मोहि निज कृपनाईं॥

eka lālasā baṛi ura māhī| sugama agama kahi jāta so nāhīṃ|| tumhahi deta ati sugama gosāīṃ| agama lāga mohi nija kṛpanāīṃ||

जथा दरिद्र बिबुधतरु पाई। बहु संपति मागत सकुचाई॥ तासु प्रभा जान नहिं सोई। तथा हृदयँ मम संसय होई॥

jathā daridra bibudhataru pāī| bahu saṃpati māgata sakucāī|| tāsu prabhā jāna nahiṃ soī| tathā hṛdayam̐ mama saṃsaya hoī||

सोरठा ४

सो तुम्ह जानहु अंतरजामी। पुरवहु मोर मनोरथ स्वामी॥ सकुच बिहाइ मागु नृप मोहि। मोरें नहिं अदेय कछु तोही॥

so tumha jānahu aṃtarajāmī| puravahu mora manoratha svāmī|| sakuca bihāi māgu nṛpa mohi| moreṃ nahiṃ adeya kachu tohī||

दोहा १४९

दानि सिरोमनि कृपानिधि नाथ कहउँ सतिभाउ। चाहउँ तुम्हहि समान सुत प्रभु सन कवन दुराउ ॥ १४९॥

dāni siromani kṛpānidhi nātha kahaum̐ satibhāu| cāhaum̐ tumhahi samāna suta prabhu sana kavana durāu || 149||

देखि प्रीति सुनि बचन अमोले। एवमस्तु करुनानिधि बोले॥ आपु सरिस खोजौं कहँ जाई। नृप तव तनय होब मैं आई॥

dekhi prīti suni bacana amole| evamastu karunānidhi bole|| āpu sarisa khojauṃ kaham̐ jāī| nṛpa tava tanaya hoba maiṃ āī||

सतरूपहि बिलोकि कर जोरें। देबि मागु बरु जो रुचि तोरे॥ जो बरु नाथ चतुर नृप मागा। सोइ कृपाल मोहि अति प्रिय लागा॥

satarūpahi biloki kara joreṃ| debi māgu baru jo ruci tore|| jo baru nātha catura nṛpa māgā| soi kṛpāla mohi ati priya lāgā||

प्रभु परंतु सुठि होति ढिठाई। जदपि भगत हित तुम्हहि सोहाई॥ तुम्ह ब्रह्मादि जनक जग स्वामी। ब्रह्म सकल उर अंतरजामी॥

prabhu paraṃtu suṭhi hoti ḍhiṭhāī| jadapi bhagata hita tumhahi sohāī|| tumha brahmādi janaka jaga svāmī| brahma sakala ura aṃtarajāmī||

अस समुझत मन संसय होई। कहा जो प्रभु प्रवान पुनि सोई॥ जे निज भगत नाथ तव अहहीं। जो सुख पावहिं जो गति लहहीं॥

asa samujhata mana saṃsaya hoī| kahā jo prabhu pravāna puni soī|| je nija bhagata nātha tava ahahīṃ| jo sukha pāvahiṃ jo gati lahahīṃ||

दोहा

सोइ सुख सोइ गति सोइ भगति सोइ निज चरन सनेहु।

soi sukha soi gati soi bhagati soi nija carana sanehu|

सोरठा १५०

सोइ बिबेक सोइ रहनि प्रभु हमहि कृपा करि देहु ॥ १५०॥

soi bibeka soi rahani prabhu hamahi kṛpā kari dehu || 150||

सुनु मृदु गूढ़ रुचिर बर रचना। कृपासिंधु बोले मृदु बचना॥ जो कछु रुचि तुम्हेर मन माहीं। मैं सो दीन्ह सब संसय नाहीं॥

sunu mṛdu gūṛha rucira bara racanā| kṛpāsiṃdhu bole mṛdu bacanā|| jo kachu ruci tumhera mana māhīṃ| maiṃ so dīnha saba saṃsaya nāhīṃ||

मातु बिबेक अलोकिक तोरें। कबहुँ न मिटिहि अनुग्रह मोरें॥ बंदि चरन मनु कहेउ बहोरी। अवर एक बिनति प्रभु मोरी॥

mātu bibeka alokika toreṃ| kabahum̐ na miṭihi anugraha moreṃ|| baṃdi carana manu kaheu bahorī| avara eka binati prabhu morī||

सुत बिषइक तव पद रति होऊ। मोहि बड़ मूढ़ कहै किन कोऊ॥ मनि बिनु फनि जिमि जल बिनु मीना। मम जीवन तिमि तुम्हहि अधीना॥

suta biṣaika tava pada rati hoū| mohi baṛa mūṛha kahai kina koū|| mani binu phani jimi jala binu mīnā| mama jīvana timi tumhahi adhīnā||

अस बरु मागि चरन गहि रहेऊ। एवमस्तु करुनानिधि कहेऊ॥ अब तुम्ह मम अनुसासन मानी। बसहु जाइ सुरपति रजधानी॥

asa baru māgi carana gahi raheū| evamastu karunānidhi kaheū|| aba tumha mama anusāsana mānī| basahu jāi surapati rajadhānī||

सोरठा १५१

तहँ करि भोग बिसाल तात गउँ कछु काल पुनि। होइहहु अवध भुआल तब मैं होब तुम्हार सुत ॥ १५१॥

taham̐ kari bhoga bisāla tāta gaum̐ kachu kāla puni| hoihahu avadha bhuāla taba maiṃ hoba tumhāra suta || 151||

इच्छामय नरबेष सँवारें। होइहउँ प्रगट निकेत तुम्हारे॥ अंसन्ह सहित देह धरि ताता। करिहउँ चरित भगत सुखदाता॥

icchāmaya narabeṣa sam̐vāreṃ| hoihaum̐ pragaṭa niketa tumhāre|| aṃsanha sahita deha dhari tātā| karihaum̐ carita bhagata sukhadātā||

जे सुनि सादर नर बड़भागी। भव तरिहहिं ममता मद त्यागी॥ आदिसक्ति जेहिं जग उपजाया। सोउ अवतरिहि मोरि यह माया॥

je suni sādara nara baṛabhāgī| bhava tarihahiṃ mamatā mada tyāgī|| ādisakti jehiṃ jaga upajāyā| sou avatarihi mori yaha māyā||

पुरउब मैं अभिलाष तुम्हारा। सत्य सत्य पन सत्य हमारा॥ पुनि पुनि अस कहि कृपानिधाना। अंतरधान भए भगवाना॥

purauba maiṃ abhilāṣa tumhārā| satya satya pana satya hamārā|| puni puni asa kahi kṛpānidhānā| aṃtaradhāna bhae bhagavānā||

दंपति उर धरि भगत कृपाला। तेहिं आश्रम निवसे कछु काला॥ समय पाइ तनु तजि अनयासा। जाइ कीन्ह अमरावति बासा॥

daṃpati ura dhari bhagata kṛpālā| tehiṃ āśrama nivase kachu kālā|| samaya pāi tanu taji anayāsā| jāi kīnha amarāvati bāsā||

दोहा १५२

यह इतिहास पुनीत अति उमहि कही बृषकेतु। भरद्वाज सुनु अपर पुनि राम जनम कर हेतु ॥ १५२॥

yaha itihāsa punīta ati umahi kahī bṛṣaketu| bharadvāja sunu apara puni rāma janama kara hetu || 152||