Bal Kand — बालकाण्ड

बालकाण्ड · दोहा २२–३३

साझा करें

नाम जीहँ जपि जागहिं जोगी। बिरति बिरंचि प्रपंच बियोगी॥ ब्रह्मसुखहि अनुभवहिं अनूपा। अकथ अनामय नाम न रूपा॥

nāma jīham̐ japi jāgahiṃ jogī| birati biraṃci prapaṃca biyogī|| brahmasukhahi anubhavahiṃ anūpā| akatha anāmaya nāma na rūpā||

जाना चहहिं गूढ़ गति जेऊ। नाम जीहँ जपि जानहिं तेऊ॥ साधक नाम जपहिं लय लाएँ। होहिं सिद्ध अनिमादिक पाएँ॥

jānā cahahiṃ gūṛha gati jeū| nāma jīham̐ japi jānahiṃ teū|| sādhaka nāma japahiṃ laya lāem̐| hohiṃ siddha animādika pāem̐||

जपहिं नामु जन आरत भारी। मिटहिं कुसंकट होहिं सुखारी॥ राम भगत जग चारि प्रकारा। सुकृती चारिउ अनघ उदारा॥

japahiṃ nāmu jana ārata bhārī| miṭahiṃ kusaṃkaṭa hohiṃ sukhārī|| rāma bhagata jaga cāri prakārā| sukṛtī cāriu anagha udārā||

चहू चतुर कहुँ नाम अधारा। ग्यानी प्रभुहि बिसेषि पिआरा॥ चहुँ जुग चहुँ श्रुति ना प्रभाऊ। कलि बिसेषि नहिं आन उपाऊ॥

cahū catura kahum̐ nāma adhārā| gyānī prabhuhi biseṣi piārā|| cahum̐ juga cahum̐ śruti nā prabhāū| kali biseṣi nahiṃ āna upāū||

दोहा २२

सकल कामना हीन जे राम भगति रस लीन। नाम सुप्रेम पियूष हद तिन्हहुँ किए मन मीन ॥ २२॥

sakala kāmanā hīna je rāma bhagati rasa līna| nāma suprema piyūṣa hada tinhahum̐ kie mana mīna || 22||

अगुन सगुन दुइ ब्रह्म सरूपा। अकथ अगाध अनादि अनूपा॥ मोरें मत बड़ नामु दुहू तें। किए जेहिं जुग निज बस निज बूतें॥

aguna saguna dui brahma sarūpā| akatha agādha anādi anūpā|| moreṃ mata baṛa nāmu duhū teṃ| kie jehiṃ juga nija basa nija būteṃ||

प्रोढ़ि सुजन जनि जानहिं जन की। कहउँ प्रतीति प्रीति रुचि मन की॥ एकु दारुगत देखिअ एकू। पावक सम जुग ब्रह्म बिबेकू॥ उभय अगम जुग सुगम नाम तें। कहेउँ नामु बड़ ब्रह्म राम तें॥ ब्यापकु एकु ब्रह्म अबिनासी। सत चेतन धन आनँद रासी॥

proṛhi sujana jani jānahiṃ jana kī| kahaum̐ pratīti prīti ruci mana kī|| eku dārugata dekhia ekū| pāvaka sama juga brahma bibekū|| ubhaya agama juga sugama nāma teṃ| kaheum̐ nāmu baṛa brahma rāma teṃ|| byāpaku eku brahma abināsī| sata cetana dhana ānam̐da rāsī||

अस प्रभु हृदयँ अछत अबिकारी। सकल जीव जग दीन दुखारी॥ नाम निरूपन नाम जतन तें। सोउ प्रगटत जिमि मोल रतन तें॥

asa prabhu hṛdayam̐ achata abikārī| sakala jīva jaga dīna dukhārī|| nāma nirūpana nāma jatana teṃ| sou pragaṭata jimi mola ratana teṃ||

दोहा २३

निरगुन तें एहि भाँति बड़ नाम प्रभाउ अपार। कहउँ नामु बड़ राम तें निज बिचार अनुसार ॥ २३॥

niraguna teṃ ehi bhām̐ti baṛa nāma prabhāu apāra| kahaum̐ nāmu baṛa rāma teṃ nija bicāra anusāra || 23||

राम भगत हित नर तनु धारी। सहि संकट किए साधु सुखारी॥ नामु सप्रेम जपत अनयासा। भगत होहिं मुद मंगल बासा॥

rāma bhagata hita nara tanu dhārī| sahi saṃkaṭa kie sādhu sukhārī|| nāmu saprema japata anayāsā| bhagata hohiṃ muda maṃgala bāsā||

राम एक तापस तिय तारी। नाम कोटि खल कुमति सुधारी॥ रिषि हित राम सुकेतुसुता की। सहित सेन सुत कीन्ह बिबाकी॥ सहित दोष दुख दास दुरासा। दलइ नामु जिमि रबि निसि नासा॥ भंजेउ राम आपु भव चापू। भव भय भंजन नाम प्रतापू॥

rāma eka tāpasa tiya tārī| nāma koṭi khala kumati sudhārī|| riṣi hita rāma suketusutā kī| sahita sena suta kīnha bibākī|| sahita doṣa dukha dāsa durāsā| dalai nāmu jimi rabi nisi nāsā|| bhaṃjeu rāma āpu bhava cāpū| bhava bhaya bhaṃjana nāma pratāpū||

दंडक बनु प्रभु कीन्ह सुहावन। जन मन अमित नाम किए पावन॥ निसिचर निकर दले रघुनंदन। नामु सकल कलि कलुष निकंदन॥

daṃḍaka banu prabhu kīnha suhāvana| jana mana amita nāma kie pāvana|| nisicara nikara dale raghunaṃdana| nāmu sakala kali kaluṣa nikaṃdana||

दोहा २४

सबरी गीध सुसेवकनि सुगति दीन्हि रघुनाथ। नाम उधारे अमित खल बेद बिदित गुन गाथ ॥ २४॥

sabarī gīdha susevakani sugati dīnhi raghunātha| nāma udhāre amita khala beda bidita guna gātha || 24||

राम सुकंठ बिभीषन दोऊ। राखे सरन जान सबु कोऊ॥ नाम गरीब अनेक नेवाजे। लोक बेद बर बिरिद बिराजे॥

rāma sukaṃṭha bibhīṣana doū| rākhe sarana jāna sabu koū|| nāma garība aneka nevāje| loka beda bara birida birāje||

राम भालु कपि कटकु बटोरा। सेतु हेतु श्रमु कीन्ह न थोरा॥ नामु लेत भवसिंधु सुखाहीं। करहु बिचारु सुजन मन माहीं॥

rāma bhālu kapi kaṭaku baṭorā| setu hetu śramu kīnha na thorā|| nāmu leta bhavasiṃdhu sukhāhīṃ| karahu bicāru sujana mana māhīṃ||

राम सकुल रन रावनु मारा। सीय सहित निज पुर पगु धारा॥ राजा रामु अवध रजधानी। गावत गुन सुर मुनि बर बानी॥ सेवक सुमिरत नामु सप्रीती। बिनु श्रम प्रबल मोह दलु जीती॥ फिरत सनेहँ मगन सुख अपनें। नाम प्रसाद सोच नहिं सपनें॥

rāma sakula rana rāvanu mārā| sīya sahita nija pura pagu dhārā|| rājā rāmu avadha rajadhānī| gāvata guna sura muni bara bānī|| sevaka sumirata nāmu saprītī| binu śrama prabala moha dalu jītī|| phirata saneham̐ magana sukha apaneṃ| nāma prasāda soca nahiṃ sapaneṃ||

दोहा २५

ब्रह्म राम तें नामु बड़ बर दायक बर दानि। रामचरित सत कोटि महँ लिय महेस जियँ जानि ॥ २५॥

brahma rāma teṃ nāmu baṛa bara dāyaka bara dāni| rāmacarita sata koṭi maham̐ liya mahesa jiyam̐ jāni || 25||

नाम प्रसाद संभु अबिनासी। साजु अमंगल मंगल रासी॥ सुक सनकादि सिद्ध मुनि जोगी। नाम प्रसाद ब्रह्मसुख भोगी॥

nāma prasāda saṃbhu abināsī| sāju amaṃgala maṃgala rāsī|| suka sanakādi siddha muni jogī| nāma prasāda brahmasukha bhogī||

नारद जानेउ नाम प्रतापू। जग प्रिय हरि हरि हर प्रिय आपू॥ नामु जपत प्रभु कीन्ह प्रसादू। भगत सिरोमनि भे प्रहलादू॥

nārada jāneu nāma pratāpū| jaga priya hari hari hara priya āpū|| nāmu japata prabhu kīnha prasādū| bhagata siromani bhe prahalādū||

ध्रुवँ सगलानि जपेउ हरि नाऊँ। पायउ अचल अनूपम ठाऊँ॥ सुमिरि पवनसुत पावन नामू। अपने बस करि राखे रामू॥

dhruvam̐ sagalāni japeu hari nāūm̐| pāyau acala anūpama ṭhāūm̐|| sumiri pavanasuta pāvana nāmū| apane basa kari rākhe rāmū||

अपतु अजामिलु गजु गनिकाऊ। भए मुकुत हरि नाम प्रभाऊ॥ कहौं कहाँ लगि नाम बड़ाई। रामु न सकहिं नाम गुन गाई॥

apatu ajāmilu gaju ganikāū| bhae mukuta hari nāma prabhāū|| kahauṃ kahām̐ lagi nāma baṛāī| rāmu na sakahiṃ nāma guna gāī||

दोहा २६

नामु राम को कलपतरु कलि कल्यान निवासु। जो सुमिरत भयो भाँग तें तुलसी तुलसीदासु ॥ २६॥

nāmu rāma ko kalapataru kali kalyāna nivāsu| jo sumirata bhayo bhām̐ga teṃ tulasī tulasīdāsu || 26||

चहुँ जुग तीनि काल तिहुँ लोका। भए नाम जपि जीव बिसोका॥ बेद पुरान संत मत एहू। सकल सुकृत फल राम सनेहू॥

cahum̐ juga tīni kāla tihum̐ lokā| bhae nāma japi jīva bisokā|| beda purāna saṃta mata ehū| sakala sukṛta phala rāma sanehū||

ध्यानु प्रथम जुग मखबिधि दूजें। द्वापर परितोषत प्रभु पूजें॥ कलि केवल मल मूल मलीना। पाप पयोनिधि जन मन मीना॥

dhyānu prathama juga makhabidhi dūjeṃ| dvāpara paritoṣata prabhu pūjeṃ|| kali kevala mala mūla malīnā| pāpa payonidhi jana mana mīnā||

नाम कामतरु काल कराला। सुमिरत समन सकल जग जाला॥ राम नाम कलि अभिमत दाता। हित परलोक लोक पितु माता॥

nāma kāmataru kāla karālā| sumirata samana sakala jaga jālā|| rāma nāma kali abhimata dātā| hita paraloka loka pitu mātā||

नहिं कलि करम न भगति बिबेकू। राम नाम अवलंबन एकू॥ कालनेमि कलि कपट निधानू। नाम सुमति समरथ हनुमानू॥

nahiṃ kali karama na bhagati bibekū| rāma nāma avalaṃbana ekū|| kālanemi kali kapaṭa nidhānū| nāma sumati samaratha hanumānū||

दोहा २७

राम नाम नरकेसरी कनककसिपु कलिकाल। जापक जन प्रहलाद जिमि पालिहि दलि सुरसाल ॥ २७॥

rāma nāma narakesarī kanakakasipu kalikāla| jāpaka jana prahalāda jimi pālihi dali surasāla || 27||

भायँ कुभायँ अनख आलसहूँ। नाम जपत मंगल दिसि दसहूँ॥ सुमिरि सो नाम राम गुन गाथा। करउँ नाइ रघुनाथहि माथा॥

bhāyam̐ kubhāyam̐ anakha ālasahūm̐| nāma japata maṃgala disi dasahūm̐|| sumiri so nāma rāma guna gāthā| karaum̐ nāi raghunāthahi māthā||

मोरि सुधारिहि सो सब भाँती। जासु कृपा नहिं कृपाँ अघाती॥ राम सुस्वामि कुसेवकु मोसो। निज दिसि दैखि दयानिधि पोसो॥

mori sudhārihi so saba bhām̐tī| jāsu kṛpā nahiṃ kṛpām̐ aghātī|| rāma susvāmi kusevaku moso| nija disi daikhi dayānidhi poso||

लोकहुँ बेद सुसाहिब रीतीं। बिनय सुनत पहिचानत प्रीती॥ गनी गरीब ग्रामनर नागर। पंडित मूढ़ मलीन उजागर॥

lokahum̐ beda susāhiba rītīṃ| binaya sunata pahicānata prītī|| ganī garība grāmanara nāgara| paṃḍita mūṛha malīna ujāgara||

सुकबि कुकबि निज मति अनुहारी। नृपहि सराहत सब नर नारी॥ साधु सुजान सुसील नृपाला। ईस अंस भव परम कृपाला॥

sukabi kukabi nija mati anuhārī| nṛpahi sarāhata saba nara nārī|| sādhu sujāna susīla nṛpālā| īsa aṃsa bhava parama kṛpālā||

सुनि सनमानहिं सबहि सुबानी। भनिति भगति नति गति पहिचानी॥ यह प्राकृत महिपाल सुभाऊ। जान सिरोमनि कोसलराऊ॥

suni sanamānahiṃ sabahi subānī| bhaniti bhagati nati gati pahicānī|| yaha prākṛta mahipāla subhāū| jāna siromani kosalarāū||

रीझत राम सनेह निसोतें। को जग मंद मलिनमति मोतें॥

rījhata rāma saneha nisoteṃ| ko jaga maṃda malinamati moteṃ||

दोहा २८(क)

सठ सेवक की प्रीति रुचि रखिहहिं राम कृपालु। उपल किए जलजान जेहिं सचिव सुमति कपि भालु ॥ २८ (क)॥

saṭha sevaka kī prīti ruci rakhihahiṃ rāma kṛpālu| upala kie jalajāna jehiṃ saciva sumati kapi bhālu || 28 (ka)||

दोहा २८(ख)

हौहु कहावत सबु कहत राम सहत उपहास। साहिब सीतानाथ सो सेवक तुलसीदास ॥ २८ (ख)॥

hauhu kahāvata sabu kahata rāma sahata upahāsa| sāhiba sītānātha so sevaka tulasīdāsa || 28 (kha)||

अति बड़ि मोरि ढिठाई खोरी। सुनि अघ नरकहुँ नाक सकोरी॥ समुझि सहम मोहि अपडर अपनें। सो सुधि राम कीन्हि नहिं सपनें॥

ati baṛi mori ḍhiṭhāī khorī| suni agha narakahum̐ nāka sakorī|| samujhi sahama mohi apaḍara apaneṃ| so sudhi rāma kīnhi nahiṃ sapaneṃ||

सुनि अवलोकि सुचित चख चाही। भगति मोरि मति स्वामि सराही॥ कहत नसाइ होइ हियँ नीकी। रीझत राम जानि जन जी की॥

suni avaloki sucita cakha cāhī| bhagati mori mati svāmi sarāhī|| kahata nasāi hoi hiyam̐ nīkī| rījhata rāma jāni jana jī kī||

रहति न प्रभु चित चूक किए की। करत सुरति सय बार हिए की॥ जेहिं अघ बधेउ ब्याध जिमि बाली। फिरि सुकंठ सोइ कीन्ह कुचाली॥

rahati na prabhu cita cūka kie kī| karata surati saya bāra hie kī|| jehiṃ agha badheu byādha jimi bālī| phiri sukaṃṭha soi kīnha kucālī||

सोरठा ४

सोइ करतूति बिभीषन केरी। सपनेहुँ सो न राम हियँ हेरी॥ ते भरतहि भेंटत सनमाने। राजसभाँ रघुबीर बखाने॥

soi karatūti bibhīṣana kerī| sapanehum̐ so na rāma hiyam̐ herī|| te bharatahi bheṃṭata sanamāne| rājasabhām̐ raghubīra bakhāne||

दोहा २९(क)

प्रभु तरु तर कपि डार पर ते किए आपु समान। तुलसी कहूँ न राम से साहिब सीलनिधान ॥ २९ (क)॥

prabhu taru tara kapi ḍāra para te kie āpu samāna| tulasī kahūm̐ na rāma se sāhiba sīlanidhāna || 29 (ka)||

दोहा २९(ख)

राम निकाईं रावरी है सबही को नीक। जों यह साँची है सदा तौ नीको तुलसीक ॥ २९ (ख)॥

rāma nikāīṃ rāvarī hai sabahī ko nīka| joṃ yaha sām̐cī hai sadā tau nīko tulasīka || 29 (kha)||

एहि बिधि निज गुन दोष कहि सबहि बहुरि सिरु नाइ। बरनउँ रघुबर बिसद जसु सुनि कलि कलुष नसाइ॥ २९ (ग)॥

ehi bidhi nija guna doṣa kahi sabahi bahuri siru nāi| baranaum̐ raghubara bisada jasu suni kali kaluṣa nasāi|| 29 (ga)||

जागबलिक जो कथा सुहाई। भरद्वाज मुनिबरहि सुनाई॥ कहिहउँ सोइ संबाद बखानी। सुनहुँ सकल सज्जन सुखु मानी॥

jāgabalika jo kathā suhāī| bharadvāja munibarahi sunāī|| kahihaum̐ soi saṃbāda bakhānī| sunahum̐ sakala sajjana sukhu mānī||

संभु कीन्ह यह चरित सुहावा। बहुरि कृपा करि उमहि सुनावा॥

saṃbhu kīnha yaha carita suhāvā| bahuri kṛpā kari umahi sunāvā||

सोरठा २

सोइ सिव कागभुसुंडिहि दीन्हा। राम भगत अधिकारी चीन्हा॥

soi siva kāgabhusuṃḍihi dīnhā| rāma bhagata adhikārī cīnhā||

तेहि सन जागबलिक पुनि पावा। तिन्ह पुनि भरद्वाज प्रति गावा॥ ते श्रोता बकता समसीला। सवँदरसी जानहिं हरिलीला॥

tehi sana jāgabalika puni pāvā| tinha puni bharadvāja prati gāvā|| te śrotā bakatā samasīlā| savam̐darasī jānahiṃ harilīlā||

जानहिं तीनि काल निज ग्याना। करतल गत आमलक समाना॥ औरउ जे हरिभगत सुजाना। कहहिं सुनहिं समुझहिं बिधि नाना॥

jānahiṃ tīni kāla nija gyānā| karatala gata āmalaka samānā|| aurau je haribhagata sujānā| kahahiṃ sunahiṃ samujhahiṃ bidhi nānā||

दोहा ३०(क)

मै पुनि निज गुर सन सुनी कथा सो सूकरखेत। समुझी नहि तसि बालपन तब अति रहेउँ अचेत ॥ ३० (क)॥

mai puni nija gura sana sunī kathā so sūkarakheta| samujhī nahi tasi bālapana taba ati raheum̐ aceta || 30 (ka)||

दोहा ३०(ख)

श्रोता बकता ग्याननिधि कथा राम कै गूढ़। किमि समुझौं मै जीव जड़ कलि मल ग्रसित बिमूढ़ ॥ ३० (ख)॥

śrotā bakatā gyānanidhi kathā rāma kai gūṛha| kimi samujhauṃ mai jīva jaṛa kali mala grasita bimūṛha || 30 (kha)||

तदपि कही गुर बारहिं बारा। समुझि परी कछु मति अनुसारा॥ भाषाबद्ध करबि मैं सोई। मोरें मन प्रबोध जेहिं होई॥

tadapi kahī gura bārahiṃ bārā| samujhi parī kachu mati anusārā|| bhāṣābaddha karabi maiṃ soī| moreṃ mana prabodha jehiṃ hoī||

जस कछु बुधि बिबेक बल मेरें। तस कहिहउँ हियँ हरि के प्रेरें॥ निज संदेह मोह भ्रम हरनी। करउँ कथा भव सरिता तरनी॥

jasa kachu budhi bibeka bala mereṃ| tasa kahihaum̐ hiyam̐ hari ke prereṃ|| nija saṃdeha moha bhrama haranī| karaum̐ kathā bhava saritā taranī||

बुध बिश्राम सकल जन रंजनि। रामकथा कलि कलुष बिभंजनि॥ रामकथा कलि पंनग भरनी। पुनि बिबेक पावक कहुँ अरनी॥

budha biśrāma sakala jana raṃjani| rāmakathā kali kaluṣa bibhaṃjani|| rāmakathā kali paṃnaga bharanī| puni bibeka pāvaka kahum̐ aranī||

रामकथा कलि कामद गाई। सुजन सजीवनि मूरि सुहाई॥

rāmakathā kali kāmada gāī| sujana sajīvani mūri suhāī||

सोरठा ४

सोइ बसुधातल सुधा तरंगिनि। भय भंजनि भ्रम भेक भुअंगिनि॥

soi basudhātala sudhā taraṃgini| bhaya bhaṃjani bhrama bheka bhuaṃgini||

असुर सेन सम नरक निकंदिनि। साधु बिबुध कुल हित गिरिनंदिनि॥ संत समाज पयोधि रमा सी। बिस्व भार भर अचल छमा सी॥

asura sena sama naraka nikaṃdini| sādhu bibudha kula hita girinaṃdini|| saṃta samāja payodhi ramā sī| bisva bhāra bhara acala chamā sī||

जम गन मुहँ मसि जग जमुना सी। जीवन मुकुति हेतु जनु कासी॥ रामहि प्रिय पावनि तुलसी सी। तुलसिदास हित हियँ हुलसी सी॥

jama gana muham̐ masi jaga jamunā sī| jīvana mukuti hetu janu kāsī|| rāmahi priya pāvani tulasī sī| tulasidāsa hita hiyam̐ hulasī sī||

सिवप्रय मेकल सैल सुता सी। सकल सिद्धि सुख संपति रासी॥ सदगुन सुरगन अंब अदिति सी। रघुबर भगति प्रेम परमिति सी॥

sivapraya mekala saila sutā sī| sakala siddhi sukha saṃpati rāsī|| sadaguna suragana aṃba aditi sī| raghubara bhagati prema paramiti sī||

दोहा ३१

राम कथा मंदाकिनी चित्रकूट चित चारु। तुलसी सुभग सनेह बन सिय रघुबीर बिहारु ॥ ३१॥

rāma kathā maṃdākinī citrakūṭa cita cāru| tulasī subhaga saneha bana siya raghubīra bihāru || 31||

राम चरित चिंतामनि चारू। संत सुमति तिय सुभग सिंगारू॥ जग मंगल गुन ग्राम राम के। दानि मुकुति धन धरम धाम के॥

rāma carita ciṃtāmani cārū| saṃta sumati tiya subhaga siṃgārū|| jaga maṃgala guna grāma rāma ke| dāni mukuti dhana dharama dhāma ke||

सदगुर ग्यान बिराग जोग के। बिबुध बैद भव भीम रोग के॥ जननि जनक सिय राम प्रेम के। बीज सकल ब्रत धरम नेम के॥

sadagura gyāna birāga joga ke| bibudha baida bhava bhīma roga ke|| janani janaka siya rāma prema ke| bīja sakala brata dharama nema ke||

समन पाप संताप सोक के। प्रिय पालक परलोक लोक के॥ सचिव सुभट भूपति बिचार के। कुंभज लोभ उदधि अपार के॥

samana pāpa saṃtāpa soka ke| priya pālaka paraloka loka ke|| saciva subhaṭa bhūpati bicāra ke| kuṃbhaja lobha udadhi apāra ke||

काम कोह कलिमल करिगन के। केहरि सावक जन मन बन के॥ अतिथि पूज्य प्रियतम पुरारि के। कामद घन दारिद दवारि के॥

kāma koha kalimala karigana ke| kehari sāvaka jana mana bana ke|| atithi pūjya priyatama purāri ke| kāmada ghana dārida davāri ke||

मंत्र महामनि बिषय ब्याल के। मेटत कठिन कुअंक भाल के॥ हरन मोह तम दिनकर कर से। सेवक सालि पाल जलधर से॥

maṃtra mahāmani biṣaya byāla ke| meṭata kaṭhina kuaṃka bhāla ke|| harana moha tama dinakara kara se| sevaka sāli pāla jaladhara se||

अभिमत दानि देवतरु बर से। सेवत सुलभ सुखद हरि हर से॥ सुकबि सरद नभ मन उडगन से। रामभगत जन जीवन धन से॥

abhimata dāni devataru bara se| sevata sulabha sukhada hari hara se|| sukabi sarada nabha mana uḍagana se| rāmabhagata jana jīvana dhana se||

सकल सुकृत फल भूरि भोग से। जग हित निरुपधि साधु लोग से॥ सेवक मन मानस मराल से। पावक गंग तंरग माल से॥

sakala sukṛta phala bhūri bhoga se| jaga hita nirupadhi sādhu loga se|| sevaka mana mānasa marāla se| pāvaka gaṃga taṃraga māla se||

दोहा ३२(क)

कुपथ कुतरक कुचालि कलि कपट दंभ पाषंड। दहन राम गुन ग्राम जिमि इंधन अनल प्रचंड ॥ ३२ (क)॥

kupatha kutaraka kucāli kali kapaṭa daṃbha pāṣaṃḍa| dahana rāma guna grāma jimi iṃdhana anala pracaṃḍa || 32 (ka)||

दोहा ३२(ख)

रामचरित राकेस कर सरिस सुखद सब काहु। सज्जन कुमुद चकोर चित हित बिसेषि बड़ लाहु ॥ ३२ (ख)॥

rāmacarita rākesa kara sarisa sukhada saba kāhu| sajjana kumuda cakora cita hita biseṣi baṛa lāhu || 32 (kha)||

कीन्हि प्रस्न जेहि भाँति भवानी। जेहि बिधि संकर कहा बखानी॥

kīnhi prasna jehi bhām̐ti bhavānī| jehi bidhi saṃkara kahā bakhānī||

सोरठा १

सो सब हेतु कहब मैं गाई। कथाप्रबंध बिचित्र बनाई॥

so saba hetu kahaba maiṃ gāī| kathāprabaṃdha bicitra banāī||

जेहि यह कथा सुनी नहिं होई। जनि आचरजु करैं सुनि सोई॥ कथा अलौकिक सुनहिं जे ग्यानी। नहिं आचरजु करहिं अस जानी॥ रामकथा कै मिति जग नाहीं। असि प्रतीति तिन्ह के मन माहीं॥ नाना भाँति राम अवतारा। रामायन सत कोटि अपारा॥

jehi yaha kathā sunī nahiṃ hoī| jani ācaraju karaiṃ suni soī|| kathā alaukika sunahiṃ je gyānī| nahiṃ ācaraju karahiṃ asa jānī|| rāmakathā kai miti jaga nāhīṃ| asi pratīti tinha ke mana māhīṃ|| nānā bhām̐ti rāma avatārā| rāmāyana sata koṭi apārā||

कलपभेद हरिचरित सुहाए। भाँति अनेक मुनीसन्ह गाए॥ करिअ न संसय अस उर आनी। सुनिअ कथा सारद रति मानी॥

kalapabheda haricarita suhāe| bhām̐ti aneka munīsanha gāe|| karia na saṃsaya asa ura ānī| sunia kathā sārada rati mānī||

दोहा ३३

राम अनंत अनंत गुन अमित कथा बिस्तार। सुनि आचरजु न मानिहहिं जिन्ह कें बिमल बिचार ॥ ३३॥

rāma anaṃta anaṃta guna amita kathā bistāra| suni ācaraju na mānihahiṃ jinha keṃ bimala bicāra || 33||