Ayodhya Kand — अयोध्याकाण्ड

अयोध्याकाण्ड · दोहा १०८–१२६

साझा करें

यह सुधि पाइ प्रयाग निवासी। बटु तापस मुनि सिद्ध उदासी॥ भरद्वाज आश्रम सब आए। देखन दसरथ सुअन सुहाए॥

yaha sudhi pāi prayāga nivāsī| baṭu tāpasa muni siddha udāsī|| bharadvāja āśrama saba āe| dekhana dasaratha suana suhāe||

राम प्रनाम कीन्ह सब काहू। मुदित भए लहि लोयन लाहू॥ देहिं असीस परम सुखु पाई। फिरे सराहत सुंदरताई॥

rāma pranāma kīnha saba kāhū| mudita bhae lahi loyana lāhū|| dehiṃ asīsa parama sukhu pāī| phire sarāhata suṃdaratāī||

दोहा १०८

राम कीन्ह बिश्राम निसि प्रात प्रयाग नहाइ। चले सहित सिय लखन जन मुददित मुनिहि सिरु नाइ ॥ १०८॥

rāma kīnha biśrāma nisi prāta prayāga nahāi| cale sahita siya lakhana jana mudadita munihi siru nāi || 108||

राम सप्रेम कहेउ मुनि पाहीं। नाथ कहिअ हम केहि मग जाहीं॥ मुनि मन बिहसि राम सन कहहीं। सुगम सकल मग तुम्ह कहुँ अहहीं॥

rāma saprema kaheu muni pāhīṃ| nātha kahia hama kehi maga jāhīṃ|| muni mana bihasi rāma sana kahahīṃ| sugama sakala maga tumha kahum̐ ahahīṃ||

साथ लागि मुनि सिष्य बोलाए। सुनि मन मुदित पचासक आए॥ सबन्हि राम पर प्रेम अपारा। सकल कहहि मगु दीख हमारा॥

sātha lāgi muni siṣya bolāe| suni mana mudita pacāsaka āe|| sabanhi rāma para prema apārā| sakala kahahi magu dīkha hamārā||

मुनि बटु चारि संग तब दीन्हे। जिन्ह बहु जनम सुकृत सब कीन्हे॥ करि प्रनामु रिषि आयसु पाई। प्रमुदित हृदयँ चले रघुराई॥

muni baṭu cāri saṃga taba dīnhe| jinha bahu janama sukṛta saba kīnhe|| kari pranāmu riṣi āyasu pāī| pramudita hṛdayam̐ cale raghurāī||

ग्राम निकट जब निकसहि जाई। देखहि दरसु नारि नर धाई॥ होहि सनाथ जनम फलु पाई। फिरहि दुखित मनु संग पठाई॥

grāma nikaṭa jaba nikasahi jāī| dekhahi darasu nāri nara dhāī|| hohi sanātha janama phalu pāī| phirahi dukhita manu saṃga paṭhāī||

दोहा १०९

बिदा किए बटु बिनय करि फिरे पाइ मन काम। उतरि नहाए जमुन जल जो सरीर सम स्याम ॥ १०९॥

bidā kie baṭu binaya kari phire pāi mana kāma| utari nahāe jamuna jala jo sarīra sama syāma || 109||

सुनत तीरवासी नर नारी। धाए निज निज काज बिसारी॥ लखन राम सिय सुन्दरताई। देखि करहिं निज भाग्य बड़ाई॥

sunata tīravāsī nara nārī| dhāe nija nija kāja bisārī|| lakhana rāma siya sundaratāī| dekhi karahiṃ nija bhāgya baṛāī||

अति लालसा बसहिं मन माहीं। नाउँ गाउँ बूझत सकुचाहीं॥ जे तिन्ह महुँ बयबिरिध सयाने। तिन्ह करि जुगुति रामु पहिचाने॥

ati lālasā basahiṃ mana māhīṃ| nāum̐ gāum̐ būjhata sakucāhīṃ|| je tinha mahum̐ bayabiridha sayāne| tinha kari juguti rāmu pahicāne||

सकल कथा तिन्ह सबहि सुनाई। बनहि चले पितु आयसु पाई॥ सुनि सबिषाद सकल पछिताहीं। रानी रायँ कीन्ह भल नाहीं॥

sakala kathā tinha sabahi sunāī| banahi cale pitu āyasu pāī|| suni sabiṣāda sakala pachitāhīṃ| rānī rāyam̐ kīnha bhala nāhīṃ||

तेहि अवसर एक तापसु आवा। तेजपुंज लघुबयस सुहावा॥ कवि अलखित गति बेषु बिरागी। मन क्रम बचन राम अनुरागी॥

tehi avasara eka tāpasu āvā| tejapuṃja laghubayasa suhāvā|| kavi alakhita gati beṣu birāgī| mana krama bacana rāma anurāgī||

दोहा ११०

सजल नयन तन पुलकि निज इष्टदेउ पहिचानि। परेउ दंड जिमि धरनितल दसा न जाइ बखानि ॥ ११०॥

sajala nayana tana pulaki nija iṣṭadeu pahicāni| pareu daṃḍa jimi dharanitala dasā na jāi bakhāni || 110||

राम सप्रेम पुलकि उर लावा। परम रंक जनु पारसु पावा॥ मनहुँ प्रेमु परमारथु दोऊ। मिलत धरे तन कह सबु कोऊ॥

rāma saprema pulaki ura lāvā| parama raṃka janu pārasu pāvā|| manahum̐ premu paramārathu doū| milata dhare tana kaha sabu koū||

बहुरि लखन पायन्ह सोइ लागा। लीन्ह उठाइ उमगि अनुरागा॥ पुनि सिय चरन धूरि धरि सीसा। जननि जानि सिसु दीन्हि असीसा॥

bahuri lakhana pāyanha soi lāgā| līnha uṭhāi umagi anurāgā|| puni siya carana dhūri dhari sīsā| janani jāni sisu dīnhi asīsā||

कीन्ह निषाद दंडवत तेही। मिलेउ मुदित लखि राम सनेही॥ पिअत नयन पुट रूपु पियूषा। मुदित सुअसनु पाइ जिमि भूखा॥

kīnha niṣāda daṃḍavata tehī| mileu mudita lakhi rāma sanehī|| piata nayana puṭa rūpu piyūṣā| mudita suasanu pāi jimi bhūkhā||

ते पितु मातु कहहु सखि कैसे। जिन्ह पठए बन बालक ऐसे॥ राम लखन सिय रूपु निहारी। होहिं सनेह बिकल नर नारी॥

te pitu mātu kahahu sakhi kaise| jinha paṭhae bana bālaka aise|| rāma lakhana siya rūpu nihārī| hohiṃ saneha bikala nara nārī||

दोहा १११

तब रघुबीर अनेक बिधि सखहि सिखावनु दीन्ह। राम रजायसु सीस धरि भवन गवनु तेंइँ कीन्ह ॥ १११॥

taba raghubīra aneka bidhi sakhahi sikhāvanu dīnha| rāma rajāyasu sīsa dhari bhavana gavanu teṃim̐ kīnha || 111||

पुनि सियँ राम लखन कर जोरी। जमुनहि कीन्ह प्रनामु बहोरी॥ चले ससीय मुदित दोउ भाई। रबितनुजा कइ करत बड़ाई॥

puni siyam̐ rāma lakhana kara jorī| jamunahi kīnha pranāmu bahorī|| cale sasīya mudita dou bhāī| rabitanujā kai karata baṛāī||

पथिक अनेक मिलहिं मग जाता। कहहिं सप्रेम देखि दोउ भ्राता॥ राज लखन सब अंग तुम्हारें। देखि सोचु अति हृदय हमारें॥

pathika aneka milahiṃ maga jātā| kahahiṃ saprema dekhi dou bhrātā|| rāja lakhana saba aṃga tumhāreṃ| dekhi socu ati hṛdaya hamāreṃ||

मारग चलहु पयादेहि पाएँ। ज्योतिषु झूठ हमारें भाएँ॥ अगमु पंथ गिरि कानन भारी। तेहि महँ साथ नारि सुकुमारी॥

māraga calahu payādehi pāem̐| jyotiṣu jhūṭha hamāreṃ bhāem̐|| agamu paṃtha giri kānana bhārī| tehi maham̐ sātha nāri sukumārī||

करि केहरि बन जाइ न जोई। हम सँग चलहि जो आयसु होई॥ जाब जहाँ लगि तहँ पहुँचाई। फिरब बहोरि तुम्हहि सिरु नाई॥

kari kehari bana jāi na joī| hama sam̐ga calahi jo āyasu hoī|| jāba jahām̐ lagi taham̐ pahum̐cāī| phiraba bahori tumhahi siru nāī||

दोहा ११२

एहि बिधि पूँछहिं प्रेम बस पुलक गात जलु नैन। कृपासिंधु फेरहि तिन्हहि कहि बिनीत मृदु बैन ॥ ११२॥

ehi bidhi pūm̐chahiṃ prema basa pulaka gāta jalu naina| kṛpāsiṃdhu pherahi tinhahi kahi binīta mṛdu baina || 112||

जे पुर गाँव बसहिं मग माहीं। तिन्हहि नाग सुर नगर सिहाहीं॥ केहि सुकृतीं केहि घरीं बसाए। धन्य पुन्यमय परम सुहाए॥

je pura gām̐va basahiṃ maga māhīṃ| tinhahi nāga sura nagara sihāhīṃ|| kehi sukṛtīṃ kehi gharīṃ basāe| dhanya punyamaya parama suhāe||

जहँ जहँ राम चरन चलि जाहीं। तिन्ह समान अमरावति नाहीं॥ पुन्यपुंज मग निकट निवासी। तिन्हहि सराहहिं सुरपुरबासी॥

jaham̐ jaham̐ rāma carana cali jāhīṃ| tinha samāna amarāvati nāhīṃ|| punyapuṃja maga nikaṭa nivāsī| tinhahi sarāhahiṃ surapurabāsī||

जे भरि नयन बिलोकहिं रामहि। सीता लखन सहित घनस्यामहि॥ जे सर सरित राम अवगाहहिं। तिन्हहि देव सर सरित सराहहिं॥

je bhari nayana bilokahiṃ rāmahi| sītā lakhana sahita ghanasyāmahi|| je sara sarita rāma avagāhahiṃ| tinhahi deva sara sarita sarāhahiṃ||

जेहि तरु तर प्रभु बैठहिं जाई। करहिं कलपतरु तासु बड़ाई॥ परसि राम पद पदुम परागा। मानति भूमि भूरि निज भागा॥

jehi taru tara prabhu baiṭhahiṃ jāī| karahiṃ kalapataru tāsu baṛāī|| parasi rāma pada paduma parāgā| mānati bhūmi bhūri nija bhāgā||

दोहा ११३

छाँह करहि घन बिबुधगन बरषहि सुमन सिहाहिं। देखत गिरि बन बिहग मृग रामु चले मग जाहिं ॥ ११३॥

chām̐ha karahi ghana bibudhagana baraṣahi sumana sihāhiṃ| dekhata giri bana bihaga mṛga rāmu cale maga jāhiṃ || 113||

सीता लखन सहित रघुराई। गाँव निकट जब निकसहिं जाई॥ सुनि सब बाल बृद्ध नर नारी। चलहिं तुरत गृहकाजु बिसारी॥

sītā lakhana sahita raghurāī| gām̐va nikaṭa jaba nikasahiṃ jāī|| suni saba bāla bṛddha nara nārī| calahiṃ turata gṛhakāju bisārī||

राम लखन सिय रूप निहारी। पाइ नयनफलु होहिं सुखारी॥ सजल बिलोचन पुलक सरीरा। सब भए मगन देखि दोउ बीरा॥

rāma lakhana siya rūpa nihārī| pāi nayanaphalu hohiṃ sukhārī|| sajala bilocana pulaka sarīrā| saba bhae magana dekhi dou bīrā||

बरनि न जाइ दसा तिन्ह केरी। लहि जनु रंकन्ह सुरमनि ढेरी॥ एकन्ह एक बोलि सिख देहीं। लोचन लाहु लेहु छन एहीं॥

barani na jāi dasā tinha kerī| lahi janu raṃkanha suramani ḍherī|| ekanha eka boli sikha dehīṃ| locana lāhu lehu chana ehīṃ||

रामहि देखि एक अनुरागे। चितवत चले जाहिं सँग लागे॥ एक नयन मग छबि उर आनी। होहिं सिथिल तन मन बर बानी॥

rāmahi dekhi eka anurāge| citavata cale jāhiṃ sam̐ga lāge|| eka nayana maga chabi ura ānī| hohiṃ sithila tana mana bara bānī||

दोहा ११४

एक देखिं बट छाँह भलि डासि मृदुल तृन पात। कहहिं गवाँइअ छिनुकु श्रमु गवनब अबहिं कि प्रात ॥ ११४॥

eka dekhiṃ baṭa chām̐ha bhali ḍāsi mṛdula tṛna pāta| kahahiṃ gavām̐ia chinuku śramu gavanaba abahiṃ ki prāta || 114||

एक कलस भरि आनहिं पानी। अँचइअ नाथ कहहिं मृदु बानी॥ सुनि प्रिय बचन प्रीति अति देखी। राम कृपाल सुसील बिसेषी॥

eka kalasa bhari ānahiṃ pānī| am̐caia nātha kahahiṃ mṛdu bānī|| suni priya bacana prīti ati dekhī| rāma kṛpāla susīla biseṣī||

जानी श्रमित सीय मन माहीं। घरिक बिलंबु कीन्ह बट छाहीं॥ मुदित नारि नर देखहिं सोभा। रूप अनूप नयन मनु लोभा॥

jānī śramita sīya mana māhīṃ| gharika bilaṃbu kīnha baṭa chāhīṃ|| mudita nāri nara dekhahiṃ sobhā| rūpa anūpa nayana manu lobhā||

एकटक सब सोहहिं चहुँ ओरा। रामचंद्र मुख चंद चकोरा॥ तरुन तमाल बरन तनु सोहा। देखत कोटि मदन मनु मोहा॥

ekaṭaka saba sohahiṃ cahum̐ orā| rāmacaṃdra mukha caṃda cakorā|| taruna tamāla barana tanu sohā| dekhata koṭi madana manu mohā||

दामिनि बरन लखन सुठि नीके। नख सिख सुभग भावते जी के॥ मुनिपट कटिन्ह कसें तूनीरा। सोहहिं कर कमलिनि धनु तीरा॥

dāmini barana lakhana suṭhi nīke| nakha sikha subhaga bhāvate jī ke|| munipaṭa kaṭinha kaseṃ tūnīrā| sohahiṃ kara kamalini dhanu tīrā||

दोहा ११५

जटा मुकुट सीसनि सुभग उर भुज नयन बिसाल। सरद परब बिधु बदन बर लसत स्वेद कन जाल ॥ ११५॥

jaṭā mukuṭa sīsani subhaga ura bhuja nayana bisāla| sarada paraba bidhu badana bara lasata sveda kana jāla || 115||

बरनि न जाइ मनोहर जोरी। सोभा बहुत थोरि मति मोरी॥ राम लखन सिय सुंदरताई। सब चितवहिं चित मन मति लाई॥

barani na jāi manohara jorī| sobhā bahuta thori mati morī|| rāma lakhana siya suṃdaratāī| saba citavahiṃ cita mana mati lāī||

थके नारि नर प्रेम पिआसे। मनहुँ मृगी मृग देखि दिआ से॥ सीय समीप ग्रामतिय जाहीं। पूँछत अति सनेहँ सकुचाहीं॥

thake nāri nara prema piāse| manahum̐ mṛgī mṛga dekhi diā se|| sīya samīpa grāmatiya jāhīṃ| pūm̐chata ati saneham̐ sakucāhīṃ||

बार बार सब लागहिं पाएँ। कहहिं बचन मृदु सरल सुभाएँ॥ राजकुमारि बिनय हम करहीं। तिय सुभायँ कछु पूँछत डरहीं॥

bāra bāra saba lāgahiṃ pāem̐| kahahiṃ bacana mṛdu sarala subhāem̐|| rājakumāri binaya hama karahīṃ| tiya subhāyam̐ kachu pūm̐chata ḍarahīṃ||

स्वामिनि अबिनय छमबि हमारी। बिलगु न मानब जानि गवाँरी॥ राजकुअँर दोउ सहज सलोने। इन्ह तें लही दुति मरकत सोने॥

svāmini abinaya chamabi hamārī| bilagu na mānaba jāni gavām̐rī|| rājakuam̐ra dou sahaja salone| inha teṃ lahī duti marakata sone||

दोहा ११६

स्यामल गौर किसोर बर सुंदर सुषमा ऐन। सरद सर्बरीनाथ मुखु सरद सरोरुह नैन ॥ ११६॥

syāmala gaura kisora bara suṃdara suṣamā aina| sarada sarbarīnātha mukhu sarada saroruha naina || 116||

कोटि मनोज लजावनिहारे। सुमुखि कहहु को आहिं तुम्हारे॥ सुनि सनेहमय मंजुल बानी। सकुची सिय मन महुँ मुसुकानी॥

koṭi manoja lajāvanihāre| sumukhi kahahu ko āhiṃ tumhāre|| suni sanehamaya maṃjula bānī| sakucī siya mana mahum̐ musukānī||

तिन्हहि बिलोकि बिलोकति धरनी। दुहुँ सकोच सकुचित बरबरनी॥ सकुचि सप्रेम बाल मृग नयनी। बोली मधुर बचन पिकबयनी॥

tinhahi biloki bilokati dharanī| duhum̐ sakoca sakucita barabaranī|| sakuci saprema bāla mṛga nayanī| bolī madhura bacana pikabayanī||

सहज सुभाय सुभग तन गोरे। नामु लखनु लघु देवर मोरे॥ बहुरि बदनु बिधु अंचल ढाँकी। पिय तन चितइ भौंह करि बाँकी॥

sahaja subhāya subhaga tana gore| nāmu lakhanu laghu devara more|| bahuri badanu bidhu aṃcala ḍhām̐kī| piya tana citai bhauṃha kari bām̐kī||

खंजन मंजु तिरीछे नयननि। निज पति कहेउ तिन्हहि सियँ सयननि॥ भइ मुदित सब ग्रामबधूटीं। रंकन्ह राय रासि जनु लूटीं॥

khaṃjana maṃju tirīche nayanani| nija pati kaheu tinhahi siyam̐ sayanani|| bhai mudita saba grāmabadhūṭīṃ| raṃkanha rāya rāsi janu lūṭīṃ||

दोहा ११७

अति सप्रेम सिय पायँ परि बहुबिधि देहिं असीस। सदा सोहागिनि होहु तुम्ह जब लगि महि अहि सीस ॥ ११७॥

ati saprema siya pāyam̐ pari bahubidhi dehiṃ asīsa| sadā sohāgini hohu tumha jaba lagi mahi ahi sīsa || 117||

पारबती सम पतिप्रिय होहू। देबि न हम पर छाड़ब छोहू॥ पुनि पुनि बिनय करिअ कर जोरी। जौं एहि मारग फिरिअ बहोरी॥

pārabatī sama patipriya hohū| debi na hama para chāṛaba chohū|| puni puni binaya karia kara jorī| jauṃ ehi māraga phiria bahorī||

दरसनु देब जानि निज दासी। लखीं सीयँ सब प्रेम पिआसी॥ मधुर बचन कहि कहि परितोषीं। जनु कुमुदिनीं कौमुदीं पोषीं॥

darasanu deba jāni nija dāsī| lakhīṃ sīyam̐ saba prema piāsī|| madhura bacana kahi kahi paritoṣīṃ| janu kumudinīṃ kaumudīṃ poṣīṃ||

तबहिं लखन रघुबर रुख जानी। पूँछेउ मगु लोगन्हि मृदु बानी॥ सुनत नारि नर भए दुखारी। पुलकित गात बिलोचन बारी॥

tabahiṃ lakhana raghubara rukha jānī| pūm̐cheu magu loganhi mṛdu bānī|| sunata nāri nara bhae dukhārī| pulakita gāta bilocana bārī||

मिटा मोदु मन भए मलीने। बिधि निधि दीन्ह लेत जनु छीने॥ समुझि करम गति धीरजु कीन्हा। सोधि सुगम मगु तिन्ह कहि दीन्हा॥

miṭā modu mana bhae malīne| bidhi nidhi dīnha leta janu chīne|| samujhi karama gati dhīraju kīnhā| sodhi sugama magu tinha kahi dīnhā||

दोहा ११८

लखन जानकी सहित तब गवनु कीन्ह रघुनाथ। फेरे सब प्रिय बचन कहि लिए लाइ मन साथ ॥ ११८॥

lakhana jānakī sahita taba gavanu kīnha raghunātha| phere saba priya bacana kahi lie lāi mana sātha || 118||

फिरत नारि नर अति पछिताहीं। देअहि दोषु देहिं मन माहीं॥ सहित बिषाद परसपर कहहीं। बिधि करतब उलटे सब अहहीं॥

phirata nāri nara ati pachitāhīṃ| deahi doṣu dehiṃ mana māhīṃ|| sahita biṣāda parasapara kahahīṃ| bidhi karataba ulaṭe saba ahahīṃ||

निपट निरंकुस निठुर निसंकू। जेहिं ससि कीन्ह सरुज सकलंकू॥ रूख कलपतरु सागरु खारा। तेहिं पठए बन राजकुमारा॥

nipaṭa niraṃkusa niṭhura nisaṃkū| jehiṃ sasi kīnha saruja sakalaṃkū|| rūkha kalapataru sāgaru khārā| tehiṃ paṭhae bana rājakumārā||

जौं पे इन्हहि दीन्ह बनबासू। कीन्ह बादि बिधि भोग बिलासू॥ ए बिचरहिं मग बिनु पदत्राना। रचे बादि बिधि बाहन नाना॥

jauṃ pe inhahi dīnha banabāsū| kīnha bādi bidhi bhoga bilāsū|| e bicarahiṃ maga binu padatrānā| race bādi bidhi bāhana nānā||

ए महि परहिं डासि कुस पाता। सुभग सेज कत सृजत बिधाता॥ तरुबर बास इन्हहि बिधि दीन्हा। धवल धाम रचि रचि श्रमु कीन्हा॥

e mahi parahiṃ ḍāsi kusa pātā| subhaga seja kata sṛjata bidhātā|| tarubara bāsa inhahi bidhi dīnhā| dhavala dhāma raci raci śramu kīnhā||

दोहा ११९

जौं ए मुनि पट धर जटिल सुंदर सुठि सुक़ुमार। बिबिध भाँति भूषन बसन बादि किए करतार ॥ ११९॥

jauṃ e muni paṭa dhara jaṭila suṃdara suṭhi suqumāra| bibidha bhām̐ti bhūṣana basana bādi kie karatāra || 119||

जौं ए कंद मूल फल खाहीं। बादि सुधादि असन जग माहीं॥ एक कहहिं ए सहज सुहाए। आपु प्रगट भए बिधि न बनाए॥

jauṃ e kaṃda mūla phala khāhīṃ| bādi sudhādi asana jaga māhīṃ|| eka kahahiṃ e sahaja suhāe| āpu pragaṭa bhae bidhi na banāe||

जहँ लगि बेद कही बिधि करनी। श्रवन नयन मन गोचर बरनी॥ देखहु खोजि भुअन दस चारी। कहँ अस पुरुष कहाँ असि नारी॥

jaham̐ lagi beda kahī bidhi karanī| śravana nayana mana gocara baranī|| dekhahu khoji bhuana dasa cārī| kaham̐ asa puruṣa kahām̐ asi nārī||

इन्हहि देखि बिधि मनु अनुरागा। पटतर जोग बनावै लागा॥ कीन्ह बहुत श्रम ऐक न आए। तेहिं इरिषा बन आनि दुराए॥

inhahi dekhi bidhi manu anurāgā| paṭatara joga banāvai lāgā|| kīnha bahuta śrama aika na āe| tehiṃ iriṣā bana āni durāe||

एक कहहिं हम बहुत न जानहिं। आपुहि परम धन्य करि मानहिं॥ ते पुनि पुन्यपुंज हम लेखे। जे देखहिं देखिहहिं जिन्ह देखे॥

eka kahahiṃ hama bahuta na jānahiṃ| āpuhi parama dhanya kari mānahiṃ|| te puni punyapuṃja hama lekhe| je dekhahiṃ dekhihahiṃ jinha dekhe||

दोहा १२०

एहि बिधि कहि कहि बचन प्रिय लेहिं नयन भरि नीर। किमि चलिहहि मारग अगम सुठि सुकुमार सरीर ॥ १२०॥

ehi bidhi kahi kahi bacana priya lehiṃ nayana bhari nīra| kimi calihahi māraga agama suṭhi sukumāra sarīra || 120||

नारि सनेह बिकल बस होहीं। चकई साँझ समय जनु सोहीं॥ मृदु पद कमल कठिन मगु जानी। गहबरि हृदयँ कहहिं बर बानी॥

nāri saneha bikala basa hohīṃ| cakaī sām̐jha samaya janu sohīṃ|| mṛdu pada kamala kaṭhina magu jānī| gahabari hṛdayam̐ kahahiṃ bara bānī||

परसत मृदुल चरन अरुनारे। सकुचति महि जिमि हृदय हमारे॥ जौं जगदीस इन्हहि बनु दीन्हा। कस न सुमनमय मारगु कीन्हा॥

parasata mṛdula carana arunāre| sakucati mahi jimi hṛdaya hamāre|| jauṃ jagadīsa inhahi banu dīnhā| kasa na sumanamaya māragu kīnhā||

जौं मागा पाइअ बिधि पाहीं। ए रखिअहिं सखि आँखिन्ह माहीं॥ जे नर नारि न अवसर आए। तिन्ह सिय रामु न देखन पाए॥

jauṃ māgā pāia bidhi pāhīṃ| e rakhiahiṃ sakhi ām̐khinha māhīṃ|| je nara nāri na avasara āe| tinha siya rāmu na dekhana pāe||

सुनि सुरुप बूझहिं अकुलाई। अब लगि गए कहाँ लगि भाई॥ समरथ धाइ बिलोकहिं जाई। प्रमुदित फिरहिं जनमफलु पाई॥

suni surupa būjhahiṃ akulāī| aba lagi gae kahām̐ lagi bhāī|| samaratha dhāi bilokahiṃ jāī| pramudita phirahiṃ janamaphalu pāī||

दोहा १२१

अबला बालक बृद्ध जन कर मीजहिं पछिताहिं। होहिं प्रेमबस लोग इमि रामु जहाँ जहँ जाहिं ॥ १२१॥

abalā bālaka bṛddha jana kara mījahiṃ pachitāhiṃ| hohiṃ premabasa loga imi rāmu jahām̐ jaham̐ jāhiṃ || 121||

गाँव गाँव अस होइ अनंदू। देखि भानुकुल कैरव चंदू॥ जे कछु समाचार सुनि पावहिं। ते नृप रानिहि दोसु लगावहिं॥

gām̐va gām̐va asa hoi anaṃdū| dekhi bhānukula kairava caṃdū|| je kachu samācāra suni pāvahiṃ| te nṛpa rānihi dosu lagāvahiṃ||

कहहिं एक अति भल नरनाहू। दीन्ह हमहि जोइ लोचन लाहू॥ कहहिं परस्पर लोग लोगाईं। बातें सरल सनेह सुहाईं॥

kahahiṃ eka ati bhala naranāhū| dīnha hamahi joi locana lāhū|| kahahiṃ paraspara loga logāīṃ| bāteṃ sarala saneha suhāīṃ||

ते पितु मातु धन्य जिन्ह जाए। धन्य सो नगरु जहाँ तें आए॥ धन्य सो देसु सैलु बन गाऊँ। जहँ जहँ जाहिं धन्य सोइ ठाऊँ॥

te pitu mātu dhanya jinha jāe| dhanya so nagaru jahām̐ teṃ āe|| dhanya so desu sailu bana gāūm̐| jaham̐ jaham̐ jāhiṃ dhanya soi ṭhāūm̐||

सुख पायउ बिरंचि रचि तेही। ए जेहि के सब भाँति सनेही॥ राम लखन पथि कथा सुहाई। रही सकल मग कानन छाई॥

sukha pāyau biraṃci raci tehī| e jehi ke saba bhām̐ti sanehī|| rāma lakhana pathi kathā suhāī| rahī sakala maga kānana chāī||

दोहा १२२

एहि बिधि रघुकुल कमल रबि मग लोगन्ह सुख देत। जाहिं चले देखत बिपिन सिय सौमित्रि समेत ॥ १२२॥

ehi bidhi raghukula kamala rabi maga loganha sukha deta| jāhiṃ cale dekhata bipina siya saumitri sameta || 122||

आगे रामु लखनु बने पाछें। तापस बेष बिराजत काछें॥ उभय बीच सिय सोहति कैसे। ब्रह्म जीव बिच माया जैसे॥

āge rāmu lakhanu bane pācheṃ| tāpasa beṣa birājata kācheṃ|| ubhaya bīca siya sohati kaise| brahma jīva bica māyā jaise||

बहुरि कहउँ छबि जसि मन बसई। जनु मधु मदन मध्य रति लसई॥ उपमा बहुरि कहउँ जियँ जोही। जनु बुध बिधु बिच रोहिनि सोही॥

bahuri kahaum̐ chabi jasi mana basaī| janu madhu madana madhya rati lasaī|| upamā bahuri kahaum̐ jiyam̐ johī| janu budha bidhu bica rohini sohī||

प्रभु पद रेख बीच बिच सीता। धरति चरन मग चलति सभीता॥ सीय राम पद अंक बराएँ। लखन चलहिं मगु दाहिन लाएँ॥

prabhu pada rekha bīca bica sītā| dharati carana maga calati sabhītā|| sīya rāma pada aṃka barāem̐| lakhana calahiṃ magu dāhina lāem̐||

राम लखन सिय प्रीति सुहाई। बचन अगोचर किमि कहि जाई॥ खग मृग मगन देखि छबि होहीं। लिए चोरि चित राम बटोहीं॥

rāma lakhana siya prīti suhāī| bacana agocara kimi kahi jāī|| khaga mṛga magana dekhi chabi hohīṃ| lie cori cita rāma baṭohīṃ||

दोहा १२३

जिन्ह जिन्ह देखे पथिक प्रिय सिय समेत दोउ भाइ। भव मगु अगमु अनंदु तेइ बिनु श्रम रहे सिराइ ॥ १२३॥

jinha jinha dekhe pathika priya siya sameta dou bhāi| bhava magu agamu anaṃdu tei binu śrama rahe sirāi || 123||

अजहुँ जासु उर सपनेहुँ काऊ। बसहुँ लखनु सिय रामु बटाऊ॥ राम धाम पथ पाइहि सोई। जो पथ पाव कबहुँ मुनि कोई॥

ajahum̐ jāsu ura sapanehum̐ kāū| basahum̐ lakhanu siya rāmu baṭāū|| rāma dhāma patha pāihi soī| jo patha pāva kabahum̐ muni koī||

तब रघुबीर श्रमित सिय जानी। देखि निकट बटु सीतल पानी॥ तहँ बसि कंद मूल फल खाई। प्रात नहाइ चले रघुराई॥

taba raghubīra śramita siya jānī| dekhi nikaṭa baṭu sītala pānī|| taham̐ basi kaṃda mūla phala khāī| prāta nahāi cale raghurāī||

देखत बन सर सैल सुहाए। बालमीकि आश्रम प्रभु आए॥ राम दीख मुनि बासु सुहावन। सुंदर गिरि काननु जलु पावन॥

dekhata bana sara saila suhāe| bālamīki āśrama prabhu āe|| rāma dīkha muni bāsu suhāvana| suṃdara giri kānanu jalu pāvana||

सरनि सरोज बिटप बन फूले। गुंजत मंजु मधुप रस भूले॥ खग मृग बिपुल कोलाहल करहीं। बिरहित बैर मुदित मन चरहीं॥

sarani saroja biṭapa bana phūle| guṃjata maṃju madhupa rasa bhūle|| khaga mṛga bipula kolāhala karahīṃ| birahita baira mudita mana carahīṃ||

दोहा १२४

सुचि सुंदर आश्रमु निरखि हरषे राजिवनेन। सुनि रघुबर आगमनु मुनि आगें आयउ लेन ॥ १२४॥

suci suṃdara āśramu nirakhi haraṣe rājivanena| suni raghubara āgamanu muni āgeṃ āyau lena || 124||

मुनि कहुँ राम दंडवत कीन्हा। आसिरबादु बिप्रबर दीन्हा॥ देखि राम छबि नयन जुड़ाने। करि सनमानु आश्रमहिं आने॥

muni kahum̐ rāma daṃḍavata kīnhā| āsirabādu biprabara dīnhā|| dekhi rāma chabi nayana juṛāne| kari sanamānu āśramahiṃ āne||

मुनिबर अतिथि प्रानप्रिय पाए। कंद मूल फल मधुर मगाए॥ सिय सौमित्रि राम फल खाए। तब मुनि आश्रम दिए सुहाए॥

munibara atithi prānapriya pāe| kaṃda mūla phala madhura magāe|| siya saumitri rāma phala khāe| taba muni āśrama die suhāe||

बालमीकि मन आनँदु भारी। मंगल मूरति नयन निहारी॥ तब कर कमल जोरि रघुराई। बोले बचन श्रवन सुखदाई॥

bālamīki mana ānam̐du bhārī| maṃgala mūrati nayana nihārī|| taba kara kamala jori raghurāī| bole bacana śravana sukhadāī||

तुम्ह त्रिकाल दरसी मुनिनाथा। बिस्व बदर जिमि तुम्हरें हाथा॥ अस कहि प्रभु सब कथा बखानी। जेहि जेहि भाँति दीन्ह बनु रानी॥

tumha trikāla darasī munināthā| bisva badara jimi tumhareṃ hāthā|| asa kahi prabhu saba kathā bakhānī| jehi jehi bhām̐ti dīnha banu rānī||

दोहा १२५

तात बचन पुनि मातु हित भाइ भरत अस राउ। मो कहुँ दरस तुम्हार प्रभु सबु मम पुन्य प्रभाउ ॥ १२५॥

tāta bacana puni mātu hita bhāi bharata asa rāu| mo kahum̐ darasa tumhāra prabhu sabu mama punya prabhāu || 125||

देखि पाय मुनिराय तुम्हारे। भए सुकृत सब सुफल हमारे॥ अब जहँ राउर आयसु होई। मुनि उदबेगु न पावै कोई॥

dekhi pāya munirāya tumhāre| bhae sukṛta saba suphala hamāre|| aba jaham̐ rāura āyasu hoī| muni udabegu na pāvai koī||

मुनि तापस जिन्ह तें दुखु लहहीं। ते नरेस बिनु पावक दहहीं॥ मंगल मूल बिप्र परितोषू। दहइ कोटि कुल भूसुर रोषू॥

muni tāpasa jinha teṃ dukhu lahahīṃ| te naresa binu pāvaka dahahīṃ|| maṃgala mūla bipra paritoṣū| dahai koṭi kula bhūsura roṣū||

अस जियँ जानि कहिअ सोइ ठाऊँ। सिय सौमित्रि सहित जहँ जाऊँ॥ तहँ रचि रुचिर परन तृन साला। बासु करौ कछु काल कृपाला॥

asa jiyam̐ jāni kahia soi ṭhāūm̐| siya saumitri sahita jaham̐ jāūm̐|| taham̐ raci rucira parana tṛna sālā| bāsu karau kachu kāla kṛpālā||

सहज सरल सुनि रघुबर बानी। साधु साधु बोले मुनि ग्यानी॥ कस न कहहु अस रघुकुलकेतू। तुम्ह पालक संतत श्रुति सेतू॥

sahaja sarala suni raghubara bānī| sādhu sādhu bole muni gyānī|| kasa na kahahu asa raghukulaketū| tumha pālaka saṃtata śruti setū||

छंद

श्रुति सेतु पालक राम तुम्ह जगदीस माया जानकी। जो सृजति जगु पालति हरति रुख पाइ कृपानिधान की॥ जो सहससीसु अहीसु महिधरु लखनु सचराचर धनी। सुर काज धरि नरराज तनु चले दलन खल निसिचर अनी॥

śruti setu pālaka rāma tumha jagadīsa māyā jānakī| jo sṛjati jagu pālati harati rukha pāi kṛpānidhāna kī|| jo sahasasīsu ahīsu mahidharu lakhanu sacarācara dhanī| sura kāja dhari nararāja tanu cale dalana khala nisicara anī||

सोरठा १२६

राम सरूप तुम्हार बचन अगोचर बुद्धिपर। अबिगत अकथ अपार नेति नेति नित निगम कह ॥ १२६॥

rāma sarūpa tumhāra bacana agocara buddhipara| abigata akatha apāra neti neti nita nigama kaha || 126||

जगु पेखन तुम्ह देखनिहारे। बिधि हरि संभु नचावनिहारे॥ तेउ न जानहिं मरमु तुम्हारा। औरु तुम्हहि को जाननिहारा॥

jagu pekhana tumha dekhanihāre| bidhi hari saṃbhu nacāvanihāre|| teu na jānahiṃ maramu tumhārā| auru tumhahi ko jānanihārā||

सोरठा २

सोइ जानइ जेहि देहु जनाई। जानत तुम्हहि तुम्हइ होइ जाई॥ तुम्हरिहि कृपाँ तुम्हहि रघुनंदन। जानहिं भगत भगत उर चंदन॥

soi jānai jehi dehu janāī| jānata tumhahi tumhai hoi jāī|| tumharihi kṛpām̐ tumhahi raghunaṃdana| jānahiṃ bhagata bhagata ura caṃdana||