Ayodhya Kand — अयोध्याकाण्ड

अयोध्याकाण्ड · दोहा ३७–५३

साझा करें

राम राम रट बिकल भुआलू। जनु बिनु पंख बिहंग बेहालू॥ हृदयँ मनाव भोरु जनि होई। रामहि जाइ कहै जनि कोई॥

rāma rāma raṭa bikala bhuālū| janu binu paṃkha bihaṃga behālū|| hṛdayam̐ manāva bhoru jani hoī| rāmahi jāi kahai jani koī||

उदउ करहु जनि रबि रघुकुल गुर। अवध बिलोकि सूल होइहि उर॥ भूप प्रीति कैकइ कठिनाई। उभय अवधि बिधि रची बनाई॥

udau karahu jani rabi raghukula gura| avadha biloki sūla hoihi ura|| bhūpa prīti kaikai kaṭhināī| ubhaya avadhi bidhi racī banāī||

बिलपत नृपहि भयउ भिनुसारा। बीना बेनु संख धुनि द्वारा॥ पढ़हिं भाट गुन गावहिं गायक। सुनत नृपहि जनु लागहिं सायक॥

bilapata nṛpahi bhayau bhinusārā| bīnā benu saṃkha dhuni dvārā|| paṛhahiṃ bhāṭa guna gāvahiṃ gāyaka| sunata nṛpahi janu lāgahiṃ sāyaka||

मंगल सकल सोहाहिं न कैसें। सहगामिनिहि बिभूषन जैसें॥ तेहिं निसि नीद परी नहि काहू। राम दरस लालसा उछाहू॥

maṃgala sakala sohāhiṃ na kaiseṃ| sahagāminihi bibhūṣana jaiseṃ|| tehiṃ nisi nīda parī nahi kāhū| rāma darasa lālasā uchāhū||

दोहा ३७

द्वार भीर सेवक सचिव कहहिं उदित रबि देखि। जागेउ अजहुँ न अवधपति कारनु कवनु बिसेषि ॥ ३७॥

dvāra bhīra sevaka saciva kahahiṃ udita rabi dekhi| jāgeu ajahum̐ na avadhapati kāranu kavanu biseṣi || 37||

पछिले पहर भूपु नित जागा। आजु हमहि बड़ अचरजु लागा॥ जाहु सुमंत्र जगावहु जाई। कीजिअ काजु रजायसु पाई॥

pachile pahara bhūpu nita jāgā| āju hamahi baṛa acaraju lāgā|| jāhu sumaṃtra jagāvahu jāī| kījia kāju rajāyasu pāī||

गए सुमंत्रु तब राउर माही। देखि भयावन जात डेराहीं॥ धाइ खाइ जनु जाइ न हेरा। मानहुँ बिपति बिषाद बसेरा॥

gae sumaṃtru taba rāura māhī| dekhi bhayāvana jāta ḍerāhīṃ|| dhāi khāi janu jāi na herā| mānahum̐ bipati biṣāda baserā||

पूछें कोउ न ऊतरु देई। गए जेंहिं भवन भूप कैकैई॥ कहि जयजीव बैठ सिरु नाई। दैखि भूप गति गयउ सुखाई॥

pūcheṃ kou na ūtaru deī| gae jeṃhiṃ bhavana bhūpa kaikaiī|| kahi jayajīva baiṭha siru nāī| daikhi bhūpa gati gayau sukhāī||

सोरठा ४

सोच बिकल बिबरन महि परेऊ। मानहुँ कमल मूलु परिहरेऊ॥ सचिउ सभीत सकइ नहिं पूँछी। बोली असुभ भरी सुभ छूछी॥

soca bikala bibarana mahi pareū| mānahum̐ kamala mūlu parihareū|| saciu sabhīta sakai nahiṃ pūm̐chī| bolī asubha bharī subha chūchī||

दोहा ३८

परी न राजहि नीद निसि हेतु जान जगदीसु। रामु रामु रटि भोरु किय कहइ न मरमु महीसु ॥ ३८॥

parī na rājahi nīda nisi hetu jāna jagadīsu| rāmu rāmu raṭi bhoru kiya kahai na maramu mahīsu || 38||

आनहु रामहि बेगि बोलाई। समाचार तब पूँछेहु आई॥ चलेउ सुमंत्र राय रूख जानी। लखी कुचालि कीन्हि कछु रानी॥

ānahu rāmahi begi bolāī| samācāra taba pūm̐chehu āī|| caleu sumaṃtra rāya rūkha jānī| lakhī kucāli kīnhi kachu rānī||

सोरठा २

सोच बिकल मग परइ न पाऊ। रामहि बोलि कहिहि का राऊ॥ उर धरि धीरजु गयउ दुआरें। पूछँहिं सकल देखि मनु मारें॥

soca bikala maga parai na pāū| rāmahi boli kahihi kā rāū|| ura dhari dhīraju gayau duāreṃ| pūcham̐hiṃ sakala dekhi manu māreṃ||

समाधानु करि सो सबही का। गयउ जहाँ दिनकर कुल टीका॥ रामु सुमंत्रहि आवत देखा। आदरु कीन्ह पिता सम लेखा॥

samādhānu kari so sabahī kā| gayau jahām̐ dinakara kula ṭīkā|| rāmu sumaṃtrahi āvata dekhā| ādaru kīnha pitā sama lekhā||

निरखि बदनु कहि भूप रजाई। रघुकुलदीपहि चलेउ लेवाई॥ रामु कुभाँति सचिव सँग जाहीं। देखि लोग जहँ तहँ बिलखाहीं॥

nirakhi badanu kahi bhūpa rajāī| raghukuladīpahi caleu levāī|| rāmu kubhām̐ti saciva sam̐ga jāhīṃ| dekhi loga jaham̐ taham̐ bilakhāhīṃ||

दोहा ३९

जाइ दीख रघुबंसमनि नरपति निपट कुसाजु। सहमि परेउ लखि सिंघिनिहि मनहुँ बृद्ध गजराजु ॥ ३९॥

jāi dīkha raghubaṃsamani narapati nipaṭa kusāju| sahami pareu lakhi siṃghinihi manahum̐ bṛddha gajarāju || 39||

सूखहिं अधर जरइ सबु अंगू। मनहुँ दीन मनिहीन भुअंगू॥ सरुष समीप दीखि कैकेई। मानहुँ मीचु घरी गनि लेई॥

sūkhahiṃ adhara jarai sabu aṃgū| manahum̐ dīna manihīna bhuaṃgū|| saruṣa samīpa dīkhi kaikeī| mānahum̐ mīcu gharī gani leī||

करुनामय मृदु राम सुभाऊ। प्रथम दीख दुखु सुना न काऊ॥ तदपि धीर धरि समउ बिचारी। पूँछी मधुर बचन महतारी॥

karunāmaya mṛdu rāma subhāū| prathama dīkha dukhu sunā na kāū|| tadapi dhīra dhari samau bicārī| pūm̐chī madhura bacana mahatārī||

मोहि कहु मातु तात दुख कारन। करिअ जतन जेहिं होइ निवारन॥ सुनहु राम सबु कारन एहू। राजहि तुम पर बहुत सनेहू।

mohi kahu mātu tāta dukha kārana| karia jatana jehiṃ hoi nivārana|| sunahu rāma sabu kārana ehū| rājahi tuma para bahuta sanehū|

देन कहेन्हि मोहि दुइ बरदाना। मागेउँ जो कछु मोहि सोहाना॥

dena kahenhi mohi dui baradānā| māgeum̐ jo kachu mohi sohānā||

सोरठा ४

सो सुनि भयउ भूप उर सोचू। छाड़ि न सकहिं तुम्हार सँकोचू॥

so suni bhayau bhūpa ura socū| chāṛi na sakahiṃ tumhāra sam̐kocū||

दोहा ४०

सुत सनेह इत बचनु उत संकट परेउ नरेसु। सकहु न आयसु धरहु सिर मेटहु कठिन कलेसु ॥ ४०॥

suta saneha ita bacanu uta saṃkaṭa pareu naresu| sakahu na āyasu dharahu sira meṭahu kaṭhina kalesu || 40||

निधरक बैठि कहइ कटु बानी। सुनत कठिनता अति अकुलानी॥ जीभ कमान बचन सर नाना। मनहुँ महिप मृदु लच्छ समाना॥

nidharaka baiṭhi kahai kaṭu bānī| sunata kaṭhinatā ati akulānī|| jībha kamāna bacana sara nānā| manahum̐ mahipa mṛdu laccha samānā||

जनु कठोरपनु धरें सरीरू। सिखइ धनुषबिद्या बर बीरू॥ सब प्रसंगु रघुपतिहि सुनाई। बैठि मनहुँ तनु धरि निठुराई॥

janu kaṭhorapanu dhareṃ sarīrū| sikhai dhanuṣabidyā bara bīrū|| saba prasaṃgu raghupatihi sunāī| baiṭhi manahum̐ tanu dhari niṭhurāī||

मन मुसकाइ भानुकुल भानु। रामु सहज आनंद निधानू॥ बोले बचन बिगत सब दूषन। मृदु मंजुल जनु बाग बिभूषन॥

mana musakāi bhānukula bhānu| rāmu sahaja ānaṃda nidhānū|| bole bacana bigata saba dūṣana| mṛdu maṃjula janu bāga bibhūṣana||

सुनु जननी सोइ सुतु बड़भागी। जो पितु मातु बचन अनुरागी॥ तनय मातु पितु तोषनिहारा। दुर्लभ जननि सकल संसारा॥

sunu jananī soi sutu baṛabhāgī| jo pitu mātu bacana anurāgī|| tanaya mātu pitu toṣanihārā| durlabha janani sakala saṃsārā||

दोहा ४१

मुनिगन मिलनु बिसेषि बन सबहि भाँति हित मोर। तेहि महँ पितु आयसु बहुरि संमत जननी तोर ॥ ४१॥

munigana milanu biseṣi bana sabahi bhām̐ti hita mora| tehi maham̐ pitu āyasu bahuri saṃmata jananī tora || 41||

भरत प्रानप्रिय पावहिं राजू। बिधि सब बिधि मोहि सनमुख आजु॥ जों न जाउँ बन ऐसेहु काजा। प्रथम गनिअ मोहि मूढ़ समाजा॥

bharata prānapriya pāvahiṃ rājū| bidhi saba bidhi mohi sanamukha āju|| joṃ na jāum̐ bana aisehu kājā| prathama gania mohi mūṛha samājā||

सेवहिं अरँडु कलपतरु त्यागी। परिहरि अमृत लेहिं बिषु मागी॥ तेउ न पाइ अस समउ चुकाहीं। देखु बिचारि मातु मन माहीं॥

sevahiṃ aram̐ḍu kalapataru tyāgī| parihari amṛta lehiṃ biṣu māgī|| teu na pāi asa samau cukāhīṃ| dekhu bicāri mātu mana māhīṃ||

अंब एक दुखु मोहि बिसेषी। निपट बिकल नरनायकु देखी॥ थोरिहिं बात पितहि दुख भारी। होति प्रतीति न मोहि महतारी॥

aṃba eka dukhu mohi biseṣī| nipaṭa bikala naranāyaku dekhī|| thorihiṃ bāta pitahi dukha bhārī| hoti pratīti na mohi mahatārī||

राउ धीर गुन उदधि अगाधू। भा मोहि ते कछु बड़ अपराधू॥ जातें मोहि न कहत कछु राऊ। मोरि सपथ तोहि कहु सतिभाऊ॥

rāu dhīra guna udadhi agādhū| bhā mohi te kachu baṛa aparādhū|| jāteṃ mohi na kahata kachu rāū| mori sapatha tohi kahu satibhāū||

दोहा ४२

सहज सरल रघुबर बचन कुमति कुटिल करि जान। चलइ जोंक जल बक्रगति जद्यपि सलिलु समान ॥ ४२॥

sahaja sarala raghubara bacana kumati kuṭila kari jāna| calai joṃka jala bakragati jadyapi salilu samāna || 42||

रहसी रानि राम रुख पाई। बोली कपट सनेहु जनाई॥ सपथ तुम्हार भरत कै आना। हेतु न दूसर मै कछु जाना॥

rahasī rāni rāma rukha pāī| bolī kapaṭa sanehu janāī|| sapatha tumhāra bharata kai ānā| hetu na dūsara mai kachu jānā||

तुम्ह अपराध जोगु नहिं ताता। जननी जनक बंधु सुखदाता॥ राम सत्य सबु जो कछु कहहू। तुम्ह पितु मातु बचन रत अहहू॥

tumha aparādha jogu nahiṃ tātā| jananī janaka baṃdhu sukhadātā|| rāma satya sabu jo kachu kahahū| tumha pitu mātu bacana rata ahahū||

पितहि बुझाइ कहहु बलि सोई। चौथेंपन जेहिं अजसु न होई॥ तुम्ह सम सुअन सुकृत जेहिं दीन्हे। उचित न तासु निरादरु कीन्हे॥

pitahi bujhāi kahahu bali soī| cautheṃpana jehiṃ ajasu na hoī|| tumha sama suana sukṛta jehiṃ dīnhe| ucita na tāsu nirādaru kīnhe||

लागहिं कुमुख बचन सुभ कैसे। मगहँ गयादिक तीरथ जैसे॥ रामहि मातु बचन सब भाए। जिमि सुरसरि गत सलिल सुहाए॥

lāgahiṃ kumukha bacana subha kaise| magaham̐ gayādika tīratha jaise|| rāmahi mātu bacana saba bhāe| jimi surasari gata salila suhāe||

दोहा ४३

गइ मुरुछा रामहि सुमिरि नृप फिरि करवट लीन्ह। सचिव राम आगमन कहि बिनय समय सम कीन्ह ॥ ४३॥

gai muruchā rāmahi sumiri nṛpa phiri karavaṭa līnha| saciva rāma āgamana kahi binaya samaya sama kīnha || 43||

अवनिप अकनि रामु पगु धारे। धरि धीरजु तब नयन उघारे॥ सचिवँ सँभारि राउ बैठारे। चरन परत नृप रामु निहारे॥

avanipa akani rāmu pagu dhāre| dhari dhīraju taba nayana ughāre|| sacivam̐ sam̐bhāri rāu baiṭhāre| carana parata nṛpa rāmu nihāre||

लिए सनेह बिकल उर लाई। गै मनि मनहुँ फनिक फिरि पाई॥ रामहि चितइ रहेउ नरनाहू। चला बिलोचन बारि प्रबाहू॥

lie saneha bikala ura lāī| gai mani manahum̐ phanika phiri pāī|| rāmahi citai raheu naranāhū| calā bilocana bāri prabāhū||

सोरठा ३

सोक बिबस कछु कहै न पारा। हृदयँ लगावत बारहिं बारा॥ बिधिहि मनाव राउ मन माहीं। जेहिं रघुनाथ न कानन जाहीं॥

soka bibasa kachu kahai na pārā| hṛdayam̐ lagāvata bārahiṃ bārā|| bidhihi manāva rāu mana māhīṃ| jehiṃ raghunātha na kānana jāhīṃ||

सुमिरि महेसहि कहइ निहोरी। बिनती सुनहु सदासिव मोरी॥ आसुतोष तुम्ह अवढर दानी। आरति हरहु दीन जनु जानी॥

sumiri mahesahi kahai nihorī| binatī sunahu sadāsiva morī|| āsutoṣa tumha avaḍhara dānī| ārati harahu dīna janu jānī||

दोहा ४४

तुम्ह प्रेरक सब के हृदयँ सो मति रामहि देहु। बचनु मोर तजि रहहि घर परिहरि सीलु सनेहु ॥ ४४॥

tumha preraka saba ke hṛdayam̐ so mati rāmahi dehu| bacanu mora taji rahahi ghara parihari sīlu sanehu || 44||

अजसु होउ जग सुजसु नसाऊ। नरक परौ बरु सुरपुरु जाऊ॥ सब दुख दुसह सहावहु मोही। लोचन ओट रामु जनि होंही॥

ajasu hou jaga sujasu nasāū| naraka parau baru surapuru jāū|| saba dukha dusaha sahāvahu mohī| locana oṭa rāmu jani hoṃhī||

अस मन गुनइ राउ नहिं बोला। पीपर पात सरिस मनु डोला॥ रघुपति पितहि प्रेमबस जानी। पुनि कछु कहिहि मातु अनुमानी॥

asa mana gunai rāu nahiṃ bolā| pīpara pāta sarisa manu ḍolā|| raghupati pitahi premabasa jānī| puni kachu kahihi mātu anumānī||

देस काल अवसर अनुसारी। बोले बचन बिनीत बिचारी॥ तात कहउँ कछु करउँ ढिठाई। अनुचितु छमब जानि लरिकाई॥

desa kāla avasara anusārī| bole bacana binīta bicārī|| tāta kahaum̐ kachu karaum̐ ḍhiṭhāī| anucitu chamaba jāni larikāī||

अति लघु बात लागि दुखु पावा। काहुँ न मोहि कहि प्रथम जनावा॥ देखि गोसाइँहि पूँछिउँ माता। सुनि प्रसंगु भए सीतल गाता॥

ati laghu bāta lāgi dukhu pāvā| kāhum̐ na mohi kahi prathama janāvā|| dekhi gosāim̐hi pūm̐chium̐ mātā| suni prasaṃgu bhae sītala gātā||

दोहा

मंगल समय सनेह बस सोच परिहरिअ तात। आयसु देइअ हरषि हियँ कहि पुलके प्रभु गात ॥ ४५॥

maṃgala samaya saneha basa soca pariharia tāta| āyasu deia haraṣi hiyam̐ kahi pulake prabhu gāta || 45||

धन्य जनमु जगतीतल तासू। पितहि प्रमोदु चरित सुनि जासू॥ चारि पदारथ करतल ताकें। प्रिय पितु मातु प्रान सम जाकें॥

dhanya janamu jagatītala tāsū| pitahi pramodu carita suni jāsū|| cāri padāratha karatala tākeṃ| priya pitu mātu prāna sama jākeṃ||

आयसु पालि जनम फलु पाई। ऐहउँ बेगिहिं होउ रजाई॥ बिदा मातु सन आवउँ मागी। चलिहउँ बनहि बहुरि पग लागी॥

āyasu pāli janama phalu pāī| aihaum̐ begihiṃ hou rajāī|| bidā mātu sana āvaum̐ māgī| calihaum̐ banahi bahuri paga lāgī||

अस कहि राम गवनु तब कीन्हा। भूप सोक बसु उतरु न दीन्हा॥ नगर ब्यापि गइ बात सुतीछी। छुअत चढ़ी जनु सब तन बीछी॥

asa kahi rāma gavanu taba kīnhā| bhūpa soka basu utaru na dīnhā|| nagara byāpi gai bāta sutīchī| chuata caṛhī janu saba tana bīchī||

सुनि भए बिकल सकल नर नारी। बेलि बिटप जिमि देखि दवारी॥ जो जहँ सुनइ धुनइ सिरु सोई। बड़ बिषादु नहिं धीरजु होई॥

suni bhae bikala sakala nara nārī| beli biṭapa jimi dekhi davārī|| jo jaham̐ sunai dhunai siru soī| baṛa biṣādu nahiṃ dhīraju hoī||

दोहा ४६

मुख सुखाहिं लोचन स्त्रवहि सोकु न हृदयँ समाइ। मनहुँ करुन रस कटकई उतरी अवध बजाइ ॥ ४६॥

mukha sukhāhiṃ locana stravahi soku na hṛdayam̐ samāi| manahum̐ karuna rasa kaṭakaī utarī avadha bajāi || 46||

मिलेहि माझ बिधि बात बेगारी। जहँ तहँ देहिं कैकेइहि गारी॥ एहि पापिनिहि बूझि का परेऊ। छाइ भवन पर पावकु धरेऊ॥

milehi mājha bidhi bāta begārī| jaham̐ taham̐ dehiṃ kaikeihi gārī|| ehi pāpinihi būjhi kā pareū| chāi bhavana para pāvaku dhareū||

निज कर नयन काढ़ि चह दीखा। डारि सुधा बिषु चाहत चीखा॥ कुटिल कठोर कुबुद्धि अभागी। भइ रघुबंस बेनु बन आगी॥

nija kara nayana kāṛhi caha dīkhā| ḍāri sudhā biṣu cāhata cīkhā|| kuṭila kaṭhora kubuddhi abhāgī| bhai raghubaṃsa benu bana āgī||

पालव बैठि पेड़ु एहिं काटा। सुख महुँ सोक ठाटु धरि ठाटा॥ सदा रामु एहि प्रान समाना। कारन कवन कुटिलपनु ठाना॥

pālava baiṭhi peṛu ehiṃ kāṭā| sukha mahum̐ soka ṭhāṭu dhari ṭhāṭā|| sadā rāmu ehi prāna samānā| kārana kavana kuṭilapanu ṭhānā||

सत्य कहहिं कबि नारि सुभाऊ। सब बिधि अगहु अगाध दुराऊ॥ निज प्रतिबिंबु बरुकु गहि जाई। जानि न जाइ नारि गति भाई॥

satya kahahiṃ kabi nāri subhāū| saba bidhi agahu agādha durāū|| nija pratibiṃbu baruku gahi jāī| jāni na jāi nāri gati bhāī||

दोहा ४७

काह न पावकु जारि सक का न समुद्र समाइ। का न करै अबला प्रबल केहि जग कालु न खाइ ॥ ४७॥

kāha na pāvaku jāri saka kā na samudra samāi| kā na karai abalā prabala kehi jaga kālu na khāi || 47||

का सुनाइ बिधि काह सुनावा। का देखाइ चह काह देखावा॥ एक कहहिं भल भूप न कीन्हा। बरु बिचारि नहिं कुमतिहि दीन्हा॥

kā sunāi bidhi kāha sunāvā| kā dekhāi caha kāha dekhāvā|| eka kahahiṃ bhala bhūpa na kīnhā| baru bicāri nahiṃ kumatihi dīnhā||

जो हठि भयउ सकल दुख भाजनु। अबला बिबस ग्यानु गुनु गा जनु॥ एक धरम परमिति पहिचाने। नृपहि दोसु नहिं देहिं सयाने॥

jo haṭhi bhayau sakala dukha bhājanu| abalā bibasa gyānu gunu gā janu|| eka dharama paramiti pahicāne| nṛpahi dosu nahiṃ dehiṃ sayāne||

सिबि दधीचि हरिचंद कहानी। एक एक सन कहहिं बखानी॥ एक भरत कर संमत कहहीं। एक उदास भायँ सुनि रहहीं॥

sibi dadhīci haricaṃda kahānī| eka eka sana kahahiṃ bakhānī|| eka bharata kara saṃmata kahahīṃ| eka udāsa bhāyam̐ suni rahahīṃ||

कान मूदि कर रद गहि जीहा। एक कहहिं यह बात अलीहा॥ सुकृत जाहिं अस कहत तुम्हारे। रामु भरत कहुँ प्रानपिआरे॥

kāna mūdi kara rada gahi jīhā| eka kahahiṃ yaha bāta alīhā|| sukṛta jāhiṃ asa kahata tumhāre| rāmu bharata kahum̐ prānapiāre||

दोहा ४८

चंदु चवै बरु अनल कन सुधा होइ बिषतूल। सपनेहुँ कबहुँ न करहिं किछु भरतु राम प्रतिकूल ॥ ४८॥

caṃdu cavai baru anala kana sudhā hoi biṣatūla| sapanehum̐ kabahum̐ na karahiṃ kichu bharatu rāma pratikūla || 48||

एक बिधातहिं दूषनु देंहीं। सुधा देखाइ दीन्ह बिषु जेहीं॥ खरभरु नगर सोचु सब काहू। दुसह दाहु उर मिटा उछाहू॥

eka bidhātahiṃ dūṣanu deṃhīṃ| sudhā dekhāi dīnha biṣu jehīṃ|| kharabharu nagara socu saba kāhū| dusaha dāhu ura miṭā uchāhū||

बिप्रबधू कुलमान्य जठेरी। जे प्रिय परम कैकेई केरी॥ लगीं देन सिख सीलु सराही। बचन बानसम लागहिं ताही॥

biprabadhū kulamānya jaṭherī| je priya parama kaikeī kerī|| lagīṃ dena sikha sīlu sarāhī| bacana bānasama lāgahiṃ tāhī||

भरतु न मोहि प्रिय राम समाना। सदा कहहु यहु सबु जगु जाना॥ करहु राम पर सहज सनेहू। केहिं अपराध आजु बनु देहू॥

bharatu na mohi priya rāma samānā| sadā kahahu yahu sabu jagu jānā|| karahu rāma para sahaja sanehū| kehiṃ aparādha āju banu dehū||

कबहुँ न कियहु सवति आरेसू। प्रीति प्रतीति जान सबु देसू॥ कौसल्याँ अब काह बिगारा। तुम्ह जेहि लागि बज्र पुर पारा॥

kabahum̐ na kiyahu savati āresū| prīti pratīti jāna sabu desū|| kausalyām̐ aba kāha bigārā| tumha jehi lāgi bajra pura pārā||

दोहा ४९

सीय कि पिय सँगु परिहरिहि लखनु कि रहिहहिं धाम। राजु कि भूँजब भरत पुर नृपु कि जिइहि बिनु राम ॥ ४९॥

sīya ki piya sam̐gu pariharihi lakhanu ki rahihahiṃ dhāma| rāju ki bhūm̐jaba bharata pura nṛpu ki jiihi binu rāma || 49||

अस बिचारि उर छाड़हु कोहू। सोक कलंक कोठि जनि होहू॥ भरतहि अवसि देहु जुबराजू। कानन काह राम कर काजू॥

asa bicāri ura chāṛahu kohū| soka kalaṃka koṭhi jani hohū|| bharatahi avasi dehu jubarājū| kānana kāha rāma kara kājū||

नाहिन रामु राज के भूखे। धरम धुरीन बिषय रस रूखे॥ गुर गृह बसहुँ रामु तजि गेहू। नृप सन अस बरु दूसर लेहू॥

nāhina rāmu rāja ke bhūkhe| dharama dhurīna biṣaya rasa rūkhe|| gura gṛha basahum̐ rāmu taji gehū| nṛpa sana asa baru dūsara lehū||

जौं नहिं लगिहहु कहें हमारे। नहिं लागिहि कछु हाथ तुम्हारे॥ जौं परिहास कीन्हि कछु होई। तौ कहि प्रगट जनावहु सोई॥

jauṃ nahiṃ lagihahu kaheṃ hamāre| nahiṃ lāgihi kachu hātha tumhāre|| jauṃ parihāsa kīnhi kachu hoī| tau kahi pragaṭa janāvahu soī||

राम सरिस सुत कानन जोगू। काह कहिहि सुनि तुम्ह कहुँ लोगू॥ उठहु बेगि सोइ करहु उपाई। जेहि बिधि सोकु कलंकु नसाई॥

rāma sarisa suta kānana jogū| kāha kahihi suni tumha kahum̐ logū|| uṭhahu begi soi karahu upāī| jehi bidhi soku kalaṃku nasāī||

छंद

जेहि भाँति सोकु कलंकु जाइ उपाय करि कुल पालही। हठि फेरू रामहि जात बन जनि बात दूसरि चालही॥ जिमि भानुबिनुदिनुप्रान बिनुतनुचंद बिनुजिमि जामिनी। तिमि अवध तुलसीदास प्रभुबिनुसमुझि धौं जियें भामिनी॥

jehi bhām̐ti soku kalaṃku jāi upāya kari kula pālahī| haṭhi pherū rāmahi jāta bana jani bāta dūsari cālahī|| jimi bhānubinudinuprāna binutanucaṃda binujimi jāminī| timi avadha tulasīdāsa prabhubinusamujhi dhauṃ jiyeṃ bhāminī||

सोरठा ५०

सखिन्ह सिखावनु दीन्ह सुनत मधुर परिनाम हित। तेइई कछ कान न कीन्ह कुटिल प्रबोधी कूबरी ॥ ५०॥

sakhinha sikhāvanu dīnha sunata madhura parināma hita| teiī kacha kāna na kīnha kuṭila prabodhī kūbarī || 50||

उतरु न देइ दुसह रिस रूखी। मृगिन्ह चितव जनु बाघिनि भूखी॥ ब्याधि असाधि जानि तिन्ह त्यागी। चलीं कहत मतिमंद अभागी॥

utaru na dei dusaha risa rūkhī| mṛginha citava janu bāghini bhūkhī|| byādhi asādhi jāni tinha tyāgī| calīṃ kahata matimaṃda abhāgī||

राजु करत यह दैअँ बिगोई। कीन्हेसि अस जस करइ न कोई॥ एहि बिधि बिलपहिं पुर नर नारीं। देहिं कुचालिहि कोटिक गारीं॥

rāju karata yaha daiam̐ bigoī| kīnhesi asa jasa karai na koī|| ehi bidhi bilapahiṃ pura nara nārīṃ| dehiṃ kucālihi koṭika gārīṃ||

जरहिं बिषम जर लेहिं उसासा। कवनि राम बिनु जीवन आसा॥ बिपुल बियोग प्रजा अकुलानी। जनु जलचर गन सूखत पानी॥

jarahiṃ biṣama jara lehiṃ usāsā| kavani rāma binu jīvana āsā|| bipula biyoga prajā akulānī| janu jalacara gana sūkhata pānī||

अति बिषाद बस लोग लोगाई। गए मातु पहिं रामु गोसाई॥ मुख प्रसन्न चित चौगुन चाऊ। मिटा सोचु जनि राखै राऊ॥

ati biṣāda basa loga logāī| gae mātu pahiṃ rāmu gosāī|| mukha prasanna cita cauguna cāū| miṭā socu jani rākhai rāū||

दोहा ५१

नव गयंदु रघुबीर मनु राजु अलान समान। छूट जानि बन गवनु सुनि उर अनंदु अधिकान ॥ ५१॥

nava gayaṃdu raghubīra manu rāju alāna samāna| chūṭa jāni bana gavanu suni ura anaṃdu adhikāna || 51||

रघुकुलतिलक जोरि दोउ हाथा। मुदित मातु पद नायउ माथा॥ दीन्हि असीस लाइ उर लीन्हे। भूषन बसन निछावरि कीन्हे॥

raghukulatilaka jori dou hāthā| mudita mātu pada nāyau māthā|| dīnhi asīsa lāi ura līnhe| bhūṣana basana nichāvari kīnhe||

बार बार मुख चुंबति माता। नयन नेह जलु पुलकित गाता॥ गोद राखि पुनि हृदयँ लगाए। स्त्रवत प्रेनरस पयद सुहाए॥

bāra bāra mukha cuṃbati mātā| nayana neha jalu pulakita gātā|| goda rākhi puni hṛdayam̐ lagāe| stravata prenarasa payada suhāe||

प्रेमु प्रमोदु न कछु कहि जाई। रंक धनद पदबी जनु पाई॥ सादर सुंदर बदनु निहारी। बोली मधुर बचन महतारी॥

premu pramodu na kachu kahi jāī| raṃka dhanada padabī janu pāī|| sādara suṃdara badanu nihārī| bolī madhura bacana mahatārī||

कहहु तात जननी बलिहारी। कबहिं लगन मुद मंगलकारी॥ सुकृत सील सुख सीवँ सुहाई। जनम लाभ कइ अवधि अघाई॥

kahahu tāta jananī balihārī| kabahiṃ lagana muda maṃgalakārī|| sukṛta sīla sukha sīvam̐ suhāī| janama lābha kai avadhi aghāī||

दोहा ५२

जेहि चाहत नर नारि सब अति आरत एहि भाँति। जिमि चातक चातकि तृषित बृष्टि सरद रितु स्वाति ॥ ५२॥

jehi cāhata nara nāri saba ati ārata ehi bhām̐ti| jimi cātaka cātaki tṛṣita bṛṣṭi sarada ritu svāti || 52||

तात जाउँ बलि बेगि नहाहू। जो मन भाव मधुर कछु खाहू॥ पितु समीप तब जाएहु भैआ। भइ बड़ि बार जाइ बलि मैआ॥

tāta jāum̐ bali begi nahāhū| jo mana bhāva madhura kachu khāhū|| pitu samīpa taba jāehu bhaiā| bhai baṛi bāra jāi bali maiā||

मातु बचन सुनि अति अनुकूला। जनु सनेह सुरतरु के फूला॥ सुख मकरंद भरे श्रियमूला। निरखि राम मनु भवरुँ न भूला॥

mātu bacana suni ati anukūlā| janu saneha surataru ke phūlā|| sukha makaraṃda bhare śriyamūlā| nirakhi rāma manu bhavarum̐ na bhūlā||

धरम धुरीन धरम गति जानी। कहेउ मातु सन अति मृदु बानी॥ पिताँ दीन्ह मोहि कानन राजू। जहँ सब भाँति मोर बड़ काजू॥

dharama dhurīna dharama gati jānī| kaheu mātu sana ati mṛdu bānī|| pitām̐ dīnha mohi kānana rājū| jaham̐ saba bhām̐ti mora baṛa kājū||

आयसु देहि मुदित मन माता। जेहिं मुद मंगल कानन जाता॥ जनि सनेह बस डरपसि भोरें। आनँदु अंब अनुग्रह तोरें॥

āyasu dehi mudita mana mātā| jehiṃ muda maṃgala kānana jātā|| jani saneha basa ḍarapasi bhoreṃ| ānam̐du aṃba anugraha toreṃ||

दोहा ५३

बरष चारिदस बिपिन बसि करि पितु बचन प्रमान। आइ पाय पुनि देखिहउँ मनु जनि करसि मलान ॥ ५३॥

baraṣa cāridasa bipina basi kari pitu bacana pramāna| āi pāya puni dekhihaum̐ manu jani karasi malāna || 53||