Lanka Kand — लङ्काकाण्ड

लङ्काकाण्ड · दोहा १–१४

साझा करें

(लड्टाकाण्ड

(laḍṭākāṇḍa

श्लोक १

रामं कामारिसेव्यं भवभयहरणं कालमत्तेभसिंहं योगीन्द्रं ज्ञानगम्यं गुणनिधिमजितं निर्गुणं निर्विकारम्। मायातीतं सुरेशं खलवधनिरतं ब्रह्मवृन्दैकदेवं वन्दे कन्दावदातं सरसिजनयनं देवमुर्वीशरूपम्॥ १॥

rāmaṃ kāmārisevyaṃ bhavabhayaharaṇaṃ kālamattebhasiṃhaṃ yogīndraṃ jñānagamyaṃ guṇanidhimajitaṃ nirguṇaṃ nirvikāram| māyātītaṃ sureśaṃ khalavadhanirataṃ brahmavṛndaikadevaṃ vande kandāvadātaṃ sarasijanayanaṃ devamurvīśarūpam|| 1||

श्लोक २

शङ्खेन्द्वाभमतीवसुन्दरतनुं शार्दूलचर्माम्बरं कालव्यालकरालभूषणधरं गङ्गाशशाङ्कप्रियम्। काशीशं कलिकल्मषौघशमनं कल्याणकल्पद्रुमं नौमीड्यं गिरिजापतिं गुणनिधिं कन्दर्पहं शङ्करम्॥ २॥

śaṅkhendvābhamatīvasundaratanuṃ śārdūlacarmāmbaraṃ kālavyālakarālabhūṣaṇadharaṃ gaṅgāśaśāṅkapriyam| kāśīśaṃ kalikalmaṣaughaśamanaṃ kalyāṇakalpadrumaṃ naumīḍyaṃ girijāpatiṃ guṇanidhiṃ kandarpahaṃ śaṅkaram|| 2||

श्लोक ३

यो ददाति सतां शम्भुः कैवल्यमपि दुर्लभम्। खलानां दण्डकृद्योऽसौ शङ्करः शं तनोतु मे॥ ३॥

yo dadāti satāṃ śambhuḥ kaivalyamapi durlabham| khalānāṃ daṇḍakṛdyo'sau śaṅkaraḥ śaṃ tanotu me|| 3||

दोहा

लव निमेष परमानु जुग बरष कलप सर चंड। भजसि न मन तेहि राम को कालु जासु कोदंड॥

lava nimeṣa paramānu juga baraṣa kalapa sara caṃḍa| bhajasi na mana tehi rāma ko kālu jāsu kodaṃḍa||

सोरठा

सिंधु बचन सुनि राम सचिव बोलि प्रभु अस कहेउ। अब बिलंबु केहि काम करहु सेतु उतरे कटकु॥

siṃdhu bacana suni rāma saciva boli prabhu asa kaheu| aba bilaṃbu kehi kāma karahu setu utare kaṭaku||

दोहा

सुनहु भानुकुल केतु जामवंत कर जोरि कह। नाथ नाम तव सेतु नर चढ़ि भव सागर तरहिं॥

sunahu bhānukula ketu jāmavaṃta kara jori kaha| nātha nāma tava setu nara caṛhi bhava sāgara tarahiṃ||

यह लघु जलधि तरत कति बारा। अस सुनि पुनि कह पवनकुमारा॥ प्रभु प्रताप बड़वानल भारी। सोषेउ प्रथम पयोनिधि बारी॥

yaha laghu jaladhi tarata kati bārā| asa suni puni kaha pavanakumārā|| prabhu pratāpa baṛavānala bhārī| soṣeu prathama payonidhi bārī||

तब रिपु नारी रुदन जल धारा। भरेउ बहोरि भयउ तेहिं खारा॥ सुनि अति उकुति पवनसुत केरी। हरषे कपि रघुपति तन हेरी॥

taba ripu nārī rudana jala dhārā| bhareu bahori bhayau tehiṃ khārā|| suni ati ukuti pavanasuta kerī| haraṣe kapi raghupati tana herī||

जामवंत बोले दोउ भाई। नल नीलहि सब कथा सुनाई॥ राम प्रताप सुमिरि मन माहीं। करहु सेतु प्रयास कछु नाहीं॥

jāmavaṃta bole dou bhāī| nala nīlahi saba kathā sunāī|| rāma pratāpa sumiri mana māhīṃ| karahu setu prayāsa kachu nāhīṃ||

बोलि लिए कपि निकर बहोरी। सकल सुनहु बिनती कछु मोरी॥ राम चरन पंकज उर धरहू। कौतुक एक भालु कपि करहू॥

boli lie kapi nikara bahorī| sakala sunahu binatī kachu morī|| rāma carana paṃkaja ura dharahū| kautuka eka bhālu kapi karahū||

धावहु मर्कट बिकट बरूथा। आनहु बिटप गिरिन्ह के जूथा॥ सुनि कपि भालु चले करि हूहा। जय रघुबीर प्रताप समूहा॥

dhāvahu markaṭa bikaṭa barūthā| ānahu biṭapa girinha ke jūthā|| suni kapi bhālu cale kari hūhā| jaya raghubīra pratāpa samūhā||

दोहा १

अति उतंग गिरि पादप लीलहिं लेहिं उठाइ। आनि देहिं नल नीलहि रचहिं ते सेतु बनाइ ॥ १॥

ati utaṃga giri pādapa līlahiṃ lehiṃ uṭhāi| āni dehiṃ nala nīlahi racahiṃ te setu banāi || 1||

सैल बिसाल आनि कपि देहीं। कंदुक इव नल नील ते लेहीं॥ देखि सेतु अति सुंदर रचना। बिहसि कृपानिधि बोले बचना॥

saila bisāla āni kapi dehīṃ| kaṃduka iva nala nīla te lehīṃ|| dekhi setu ati suṃdara racanā| bihasi kṛpānidhi bole bacanā||

परम रम्य उत्तम यह धरनी। महिमा अमित जाइ नहिं बरनी॥ करिहउँ इहाँ संभु थापना। मोरे हृदयँ परम कलपना॥

parama ramya uttama yaha dharanī| mahimā amita jāi nahiṃ baranī|| karihaum̐ ihām̐ saṃbhu thāpanā| more hṛdayam̐ parama kalapanā||

सुनि कपीस बहु दूत पठाए। मुनिबर सकल बोलि लै आए॥ लिंग थापि बिधिवत करि पूजा। सिव समान प्रिय मोहि न दूजा॥

suni kapīsa bahu dūta paṭhāe| munibara sakala boli lai āe|| liṃga thāpi bidhivata kari pūjā| siva samāna priya mohi na dūjā||

सिव द्रोही मम भगत कहावा। सो नर सपनेहुँ मोहि न पावा॥ संकर बिमुख भगति चह मोरी। सो नारकी मूढ़ मति थोरी॥

siva drohī mama bhagata kahāvā| so nara sapanehum̐ mohi na pāvā|| saṃkara bimukha bhagati caha morī| so nārakī mūṛha mati thorī||

दोहा २

संकर प्रिय मम द्रोही सिव द्रोही मम दास। ते नर करहि कलप भरि धोर नरक महुँ बास ॥ २॥

saṃkara priya mama drohī siva drohī mama dāsa| te nara karahi kalapa bhari dhora naraka mahum̐ bāsa || 2||

जे रामेस्वर दरसनु करिहहिं। ते तनु तजि मम लोक सिधरिहहिं॥ जो गंगाजलु आनि चढ़ाइहि। सो साजुज्य मुक्ति नर पाइहि॥

je rāmesvara darasanu karihahiṃ| te tanu taji mama loka sidharihahiṃ|| jo gaṃgājalu āni caṛhāihi| so sājujya mukti nara pāihi||

होइ अकाम जो छल तजि सेइहि। भगति मोरि तेहि संकर देइहि॥ मम कृत सेतु जो दरसनु करिही। सो बिनु श्रम भवसागर तरिही॥

hoi akāma jo chala taji seihi| bhagati mori tehi saṃkara deihi|| mama kṛta setu jo darasanu karihī| so binu śrama bhavasāgara tarihī||

राम बचन सब के जिय भाए। मुनिबर निज निज आश्रम आए॥ गिरिजा रघुपति कै यह रीती। संतत करहिं प्रनत पर प्रीती॥

rāma bacana saba ke jiya bhāe| munibara nija nija āśrama āe|| girijā raghupati kai yaha rītī| saṃtata karahiṃ pranata para prītī||

बाँधा सेतु नील नल नागर। राम कृपाँ जसु भयउ उजागर॥ बूड़हिं आनहि बोरहिं जेई। भए उपल बोहित सम तेई॥

bām̐dhā setu nīla nala nāgara| rāma kṛpām̐ jasu bhayau ujāgara|| būṛahiṃ ānahi borahiṃ jeī| bhae upala bohita sama teī||

महिमा यह न जलधि कइ बरनी। पाहन गुन न कपिन्ह कइ करनी॥

mahimā yaha na jaladhi kai baranī| pāhana guna na kapinha kai karanī||

दोहा ३

श्री रघुबीर प्रताप ते सिंधु तरे पाषान। ते मतिमंद जे राम तजि भजहिं जाइ प्रभु आन ॥ ३॥

śrī raghubīra pratāpa te siṃdhu tare pāṣāna| te matimaṃda je rāma taji bhajahiṃ jāi prabhu āna || 3||

बाँधि सेतु अति सुदृढ़ बनावा। देखि कृपानिधि के मन भावा॥ चली सेन कछु बरनि न जाई। गर्जहिं मर्कट भट समुदाई॥

bām̐dhi setu ati sudṛṛha banāvā| dekhi kṛpānidhi ke mana bhāvā|| calī sena kachu barani na jāī| garjahiṃ markaṭa bhaṭa samudāī||

सेतुबंध ढिग चढ़ि रघुराई। चितव कृपाल सिंधु बहुताई॥ देखन कहुँ प्रभु करुना कंदा। प्रगट भए सब जलचर बृंदा॥

setubaṃdha ḍhiga caṛhi raghurāī| citava kṛpāla siṃdhu bahutāī|| dekhana kahum̐ prabhu karunā kaṃdā| pragaṭa bhae saba jalacara bṛṃdā||

मकर नक्र नाना झष ब्याला। सत जोजन तन परम बिसाला॥ अइसेउ एक तिन्हहि जे खाहीं। एकन्ह कें डर तेपि डेराहीं॥

makara nakra nānā jhaṣa byālā| sata jojana tana parama bisālā|| aiseu eka tinhahi je khāhīṃ| ekanha keṃ ḍara tepi ḍerāhīṃ||

प्रभुहि बिलोकहिं टरहिं न टारे। मन हरषित सब भए सुखारे॥ तिन्ह की ओट न देखिअ बारी। मगन भए हरि रूप निहारी॥

prabhuhi bilokahiṃ ṭarahiṃ na ṭāre| mana haraṣita saba bhae sukhāre|| tinha kī oṭa na dekhia bārī| magana bhae hari rūpa nihārī||

चला कटकु प्रभु आयसु पाई। को कहि सक कपि दल बिपुलाई॥

calā kaṭaku prabhu āyasu pāī| ko kahi saka kapi dala bipulāī||

दोहा ४

सेतुबंध भइ भीर अति कपि नभ पंथ उड़ाहिं। अपर जलचरन्हि ऊपर चढ़ि चढ़ि पारहि जाहिं ॥ ४॥

setubaṃdha bhai bhīra ati kapi nabha paṃtha uṛāhiṃ| apara jalacaranhi ūpara caṛhi caṛhi pārahi jāhiṃ || 4||

अस कौतुक बिलोकि द्वौ भाई। बिहँसि चले कृपाल रघुराई॥ सेन सहित उतरे रघुबीरा। कहि न जाइ कपि जूथप भीरा॥

asa kautuka biloki dvau bhāī| biham̐si cale kṛpāla raghurāī|| sena sahita utare raghubīrā| kahi na jāi kapi jūthapa bhīrā||

सिंधु पार प्रभु डेरा कीन्हा। सकल कपिन्ह कहुँ आयसु दीन्हा॥ खाहु जाइ फल मूल सुहाए। सुनत भालु कपि जहँ तहँ धाए॥

siṃdhu pāra prabhu ḍerā kīnhā| sakala kapinha kahum̐ āyasu dīnhā|| khāhu jāi phala mūla suhāe| sunata bhālu kapi jaham̐ taham̐ dhāe||

सब तरु फरे राम हित लागी। रितु अरु कुरितु काल गति त्यागी॥ खाहिं मधुर फल बटप हलावहिं। लंका सन्मुख सिखर चलावहिं॥

saba taru phare rāma hita lāgī| ritu aru kuritu kāla gati tyāgī|| khāhiṃ madhura phala baṭapa halāvahiṃ| laṃkā sanmukha sikhara calāvahiṃ||

जहँ कहुँ फिरत निसाचर पावहिं। घेरि सकल बहु नाच नचावहिं॥ दसनन्हि काटि नासिका काना। कहि प्रभु सुजसु देहिं तब जाना॥

jaham̐ kahum̐ phirata nisācara pāvahiṃ| gheri sakala bahu nāca nacāvahiṃ|| dasananhi kāṭi nāsikā kānā| kahi prabhu sujasu dehiṃ taba jānā||

जिन्ह कर नासा कान निपाता। तिन्ह रावनहि कही सब बाता॥ सुनत श्रवन बारिधि बंधाना। दस मुख बोलि उठा अकुलाना॥

jinha kara nāsā kāna nipātā| tinha rāvanahi kahī saba bātā|| sunata śravana bāridhi baṃdhānā| dasa mukha boli uṭhā akulānā||

दोहा ५

बांध्यो बननिधि नीरनिधि जलधि सिंधु बारीस। सत्य तोयनिधि कंपति उदधि पयोधि नदीस ॥ ५॥

bāṃdhyo bananidhi nīranidhi jaladhi siṃdhu bārīsa| satya toyanidhi kaṃpati udadhi payodhi nadīsa || 5||

निज बिकलता बिचारि बहोरी। बिहँसि गयउ ग्रह करि भय भोरी॥ मंदोदरीं सुन्यो प्रभु आयो। कौतुकहीं पाथोधि बँधायो॥

nija bikalatā bicāri bahorī| biham̐si gayau graha kari bhaya bhorī|| maṃdodarīṃ sunyo prabhu āyo| kautukahīṃ pāthodhi bam̐dhāyo||

कर गहि पतिहि भवन निज आनी। बोली परम मनोहर बानी॥ चरन नाइ सिरु अंचलु रोपा। सुनहु बचन पिय परिहरि कोपा॥

kara gahi patihi bhavana nija ānī| bolī parama manohara bānī|| carana nāi siru aṃcalu ropā| sunahu bacana piya parihari kopā||

नाथ बयरु कीजे ताही सों। बुधि बल सकिअ जीति जाही सों॥ तुम्हहि रघुपतिहि अंतर कैसा। खलु खद्योत दिनकरहि जैसा॥

nātha bayaru kīje tāhī soṃ| budhi bala sakia jīti jāhī soṃ|| tumhahi raghupatihi aṃtara kaisā| khalu khadyota dinakarahi jaisā||

अतिबल मधु कैटभ जेहिं मारे। महाबीर दितिसुत संघारे॥ जेहिं बलि बाँधि सहजभुज मारा। सोइ अवतरेउ हरन महि भारा॥

atibala madhu kaiṭabha jehiṃ māre| mahābīra ditisuta saṃghāre|| jehiṃ bali bām̐dhi sahajabhuja mārā| soi avatareu harana mahi bhārā||

तासु बिरोध न कीजिअ नाथा। काल करम जिव जाकें हाथा॥

tāsu birodha na kījia nāthā| kāla karama jiva jākeṃ hāthā||

दोहा ६

रामहि सौपि जानकी नाइ कमल पद माथ। सुत कहुँ राज समर्पि बन जाइ भजिअ रघुनाथ ॥ ६॥

rāmahi saupi jānakī nāi kamala pada mātha| suta kahum̐ rāja samarpi bana jāi bhajia raghunātha || 6||

नाथ दीनदयाल रघुराई। बाघउ सनमुख गएँ न खाई॥ चाहिअ करन सो सब करि बीते। तुम्ह सुर असुर चराचर जीते॥

nātha dīnadayāla raghurāī| bāghau sanamukha gaem̐ na khāī|| cāhia karana so saba kari bīte| tumha sura asura carācara jīte||

संत कहहिं असि नीति दसानन। चौथेंपन जाइहि नृप कानन॥ तासु भजन कीजिअ तहँ भर्ता। जो कर्ता पालक संहर्ता॥

saṃta kahahiṃ asi nīti dasānana| cautheṃpana jāihi nṛpa kānana|| tāsu bhajana kījia taham̐ bhartā| jo kartā pālaka saṃhartā||

सोरठा ३

सोइ रघुवीर प्रनत अनुरागी। भजहु नाथ ममता सब त्यागी॥ मुनिबर जतनु करहिं जेहि लागी। भूप राजु तजि होहिं बिरागी॥

soi raghuvīra pranata anurāgī| bhajahu nātha mamatā saba tyāgī|| munibara jatanu karahiṃ jehi lāgī| bhūpa rāju taji hohiṃ birāgī||

सोरठा ४

सोइ कोसलधीस रघुराया। आयउ करन तोहि पर दाया॥ जौं पिय मानहु मोर सिखावन। सुजसु होइ तिहुँ पुर अति पावन॥

soi kosaladhīsa raghurāyā| āyau karana tohi para dāyā|| jauṃ piya mānahu mora sikhāvana| sujasu hoi tihum̐ pura ati pāvana||

दोहा ७

अस कहि नयन नीर भरि गहि पद कंपित गात। नाथ भजहु रघुनाथहि अचल होइ अहिवात ॥ ७॥

asa kahi nayana nīra bhari gahi pada kaṃpita gāta| nātha bhajahu raghunāthahi acala hoi ahivāta || 7||

तब रावन मयसुता उठाई। कहै लाग खल निज प्रभुताई॥ सुनु तै प्रिया बृथा भय माना। जग जोधा को मोहि समाना॥

taba rāvana mayasutā uṭhāī| kahai lāga khala nija prabhutāī|| sunu tai priyā bṛthā bhaya mānā| jaga jodhā ko mohi samānā||

बरुन कुबेर पवन जम काला। भुज बल जितेउँ सकल दिगपाला॥ देव दनुज नर सब बस मोरें। कवन हेतु उपजा भय तोरें॥

baruna kubera pavana jama kālā| bhuja bala jiteum̐ sakala digapālā|| deva danuja nara saba basa moreṃ| kavana hetu upajā bhaya toreṃ||

नाना बिधि तेहि कहेसि बुझाई। सभाँ बहोरि बैठ सो जाई॥ मंदोदरीं हदयँ अस जाना। काल बस्य उपजा अभिमाना॥

nānā bidhi tehi kahesi bujhāī| sabhām̐ bahori baiṭha so jāī|| maṃdodarīṃ hadayam̐ asa jānā| kāla basya upajā abhimānā||

सभाँ आइ मंत्रिन्ह तेंहि बूझा। करब कवन बिधि रिपु सैं जूझा॥ कहहिं सचिव सुनु निसिचर नाहा। बार बार प्रभु पूछहु काहा॥

sabhām̐ āi maṃtrinha teṃhi būjhā| karaba kavana bidhi ripu saiṃ jūjhā|| kahahiṃ saciva sunu nisicara nāhā| bāra bāra prabhu pūchahu kāhā||

कहहु कवन भय करिअ बिचारा। नर कपि भालु अहार हमारा॥

kahahu kavana bhaya karia bicārā| nara kapi bhālu ahāra hamārā||

दोहा ८

सब के बचन श्रवन सुनि कह प्रहस्त कर जोरि। निति बिरोध न करिअ प्रभु मत्रिंन्ह मति अति थोरि ॥ ८॥

saba ke bacana śravana suni kaha prahasta kara jori| niti birodha na karia prabhu matriṃnha mati ati thori || 8||

कहहिं सचिव सठ ठकुरसोहाती। नाथ न पूर आव एहि भाँती॥ बारिधि नाघि एक कपि आवा। तासु चरित मन महुँ सबु गावा॥

kahahiṃ saciva saṭha ṭhakurasohātī| nātha na pūra āva ehi bhām̐tī|| bāridhi nāghi eka kapi āvā| tāsu carita mana mahum̐ sabu gāvā||

छुधा न रही तुम्हहि तब काहू। जारत नगरु कस न धरि खाहू॥ सुनत नीक आगें दुख पावा। सचिवन अस मत प्रभुहि सुनावा॥

chudhā na rahī tumhahi taba kāhū| jārata nagaru kasa na dhari khāhū|| sunata nīka āgeṃ dukha pāvā| sacivana asa mata prabhuhi sunāvā||

जेहिं बारीस बँधायउ हेला। उतरेउ सेन समेत सुबेला॥

jehiṃ bārīsa bam̐dhāyau helā| utareu sena sameta subelā||

सोरठा ३

सो भनु मनुज खाब हम भाई। बचन कहहिं सब गाल फुलाई॥

so bhanu manuja khāba hama bhāī| bacana kahahiṃ saba gāla phulāī||

तात बचन मम सुनु अति आदर। जनि मन गुनहु मोहि करि कादर॥ प्रिय बानी जे सुनहिं जे कहहीं। ऐसे नर निकाय जग अहहीं॥

tāta bacana mama sunu ati ādara| jani mana gunahu mohi kari kādara|| priya bānī je sunahiṃ je kahahīṃ| aise nara nikāya jaga ahahīṃ||

बचन परम हित सुनत कठोरे। सुनहिं जे कहहिं ते नर प्रभु थोरे॥ प्रथम बसीठ पठउ सुनु नीती। सीता देइ करहु पुनि प्रीती॥

bacana parama hita sunata kaṭhore| sunahiṃ je kahahiṃ te nara prabhu thore|| prathama basīṭha paṭhau sunu nītī| sītā dei karahu puni prītī||

दोहा ९

नारि पाइ फिरि जाहिं जौं तौ न बढ़ाइअ रारि। नाहिं त सन्मुख समर महि तात करिअ हठि मारि ॥ ९॥

nāri pāi phiri jāhiṃ jauṃ tau na baṛhāia rāri| nāhiṃ ta sanmukha samara mahi tāta karia haṭhi māri || 9||

यह मत जौं मानहु प्रभु मोरा। उभय प्रकार सुजसु जग तोरा॥ सुत सन कह दसकंठ रिसाई। असि मति सठ केहिं तोहि सिखाई॥

yaha mata jauṃ mānahu prabhu morā| ubhaya prakāra sujasu jaga torā|| suta sana kaha dasakaṃṭha risāī| asi mati saṭha kehiṃ tohi sikhāī||

अबहीं ते उर संसय होई। बेनुमूल सुत भयहु घमोई॥ सुनि पितु गिरा परुष अति घोरा। चला भवन कहि बचन कठोरा॥

abahīṃ te ura saṃsaya hoī| benumūla suta bhayahu ghamoī|| suni pitu girā paruṣa ati ghorā| calā bhavana kahi bacana kaṭhorā||

हित मत तोहि न लागत कैसें। काल बिबस कहुँ भेषज जैसें॥ संध्या समय जानि दससीसा। भवन चलेउ निरखत भुज बीसा॥

hita mata tohi na lāgata kaiseṃ| kāla bibasa kahum̐ bheṣaja jaiseṃ|| saṃdhyā samaya jāni dasasīsā| bhavana caleu nirakhata bhuja bīsā||

लंका सिखर उपर आगारा। अति बिचित्र तहँ होइ अखारा॥ बैठ जाइ तेही मंदिर रावन। लागे किंनर गुन गन गावन॥

laṃkā sikhara upara āgārā| ati bicitra taham̐ hoi akhārā|| baiṭha jāi tehī maṃdira rāvana| lāge kiṃnara guna gana gāvana||

बाजहिं ताल पखाउज बीना। नृत्य करहिं अपछरा प्रबीना॥

bājahiṃ tāla pakhāuja bīnā| nṛtya karahiṃ apacharā prabīnā||

दोहा १०

सुनासीर सत सरिस सो संतत करइ बिलास। परम प्रबल रिपु सीस पर तद्यपि सोच न त्रास ॥ १०॥

sunāsīra sata sarisa so saṃtata karai bilāsa| parama prabala ripu sīsa para tadyapi soca na trāsa || 10||

इहाँ सुबेल सैल रघुबीरा। उतरे सेन सहित अति भीरा॥ सिखर एक उतंग अति देखी। परम रम्य सम सुभ्र बिसेषी॥

ihām̐ subela saila raghubīrā| utare sena sahita ati bhīrā|| sikhara eka utaṃga ati dekhī| parama ramya sama subhra biseṣī||

तहँ तरु किसलय सुमन सुहाए। लछिमन रचि निज हाथ डसाए॥ ता पर रूचिर मृदुल मृगछाला। तेहीं आसान आसीन कृपाला॥

taham̐ taru kisalaya sumana suhāe| lachimana raci nija hātha ḍasāe|| tā para rūcira mṛdula mṛgachālā| tehīṃ āsāna āsīna kṛpālā||

प्रभु कृत सीस कपीस उछंगा। बाम दहिन दिसि चाप निषंगा॥ दुहुँ कर कमल सुधारत बाना। कह लंकेस मंत्र लगि काना॥

prabhu kṛta sīsa kapīsa uchaṃgā| bāma dahina disi cāpa niṣaṃgā|| duhum̐ kara kamala sudhārata bānā| kaha laṃkesa maṃtra lagi kānā||

बड़भागी अंगद हनुमाना। चरन कमल चापत बिधि नाना॥ प्रभु पाछें लछिमन बीरासन। कटि निषंग कर बान सरासन॥

baṛabhāgī aṃgada hanumānā| carana kamala cāpata bidhi nānā|| prabhu pācheṃ lachimana bīrāsana| kaṭi niṣaṃga kara bāna sarāsana||

दोहा ११(क)

एहि बिधि कृपा रूप गुन धाम रामु आसीन। धन्य ते नर एहिं ध्यान जे रहत सदा लयलीन ॥ ११ (क)॥

ehi bidhi kṛpā rūpa guna dhāma rāmu āsīna| dhanya te nara ehiṃ dhyāna je rahata sadā layalīna || 11 (ka)||

दोहा ११(ख)

पूरब दिसा बिलोकि प्रभु देखा उदित मंयक। कहत सबहि देखहु ससिहि मृगपति सरिस असंक ॥ ११ (ख)॥

pūraba disā biloki prabhu dekhā udita maṃyaka| kahata sabahi dekhahu sasihi mṛgapati sarisa asaṃka || 11 (kha)||

पूरब दिसि गिरिगुहा निवासी। परम प्रताप तेज बल रासी॥ मत्त नाग तम कुंभ बिदारी। ससि केसरी गगन बन चारी॥

pūraba disi giriguhā nivāsī| parama pratāpa teja bala rāsī|| matta nāga tama kuṃbha bidārī| sasi kesarī gagana bana cārī||

बिथुरे नभ मुकुताहल तारा। निसि सुंदरी केर सिंगारा॥ कह प्रभु ससि महुँ मेचकताई। कहहु काह निज निज मति भाई॥

bithure nabha mukutāhala tārā| nisi suṃdarī kera siṃgārā|| kaha prabhu sasi mahum̐ mecakatāī| kahahu kāha nija nija mati bhāī||

कह सुग़ीव सुनहु रघुराई। ससि महुँ प्रगट भूमि कै झाँई॥ मारेउ राहु ससिहि कह कोई। उर महँ परी स्यामता सोई॥

kaha suġīva sunahu raghurāī| sasi mahum̐ pragaṭa bhūmi kai jhām̐ī|| māreu rāhu sasihi kaha koī| ura maham̐ parī syāmatā soī||

कोउ कह जब बिधि रति मुख कीन्हा। सार भाग ससि कर हरि लीन्हा॥ छिद्र सो प्रगट इंदु उर माहीं। तेहि मग देखिअ नभ परिछाहीं॥

kou kaha jaba bidhi rati mukha kīnhā| sāra bhāga sasi kara hari līnhā|| chidra so pragaṭa iṃdu ura māhīṃ| tehi maga dekhia nabha parichāhīṃ||

प्रभु कह गरल बंधु ससि केरा। अति प्रिय निज उर दीन्ह बसेरा॥ बिष संजुत कर निकर पसारी। जारत बिरहवंत नर नारी॥

prabhu kaha garala baṃdhu sasi kerā| ati priya nija ura dīnha baserā|| biṣa saṃjuta kara nikara pasārī| jārata birahavaṃta nara nārī||

दोहा १२(क)

कह हनुमंत सुनहु प्रभु ससि तुम्हारा प्रिय दास। तव मूरति बिधु उर बसति सोइ स्यामता अभास ॥ १२ (क)॥

kaha hanumaṃta sunahu prabhu sasi tumhārā priya dāsa| tava mūrati bidhu ura basati soi syāmatā abhāsa || 12 (ka)||

पवन तनय के बचन सुनि बिहँसे रामु सुजान। दच्छिन दिसि अवलोकि प्रभु बोले कृपा निधान॥ १२ ( ख )॥

pavana tanaya ke bacana suni biham̐se rāmu sujāna| dacchina disi avaloki prabhu bole kṛpā nidhāna|| 12 ( kha )||

देखु बिभीषन दच्छिन आसा। घन घंमड दामिनि बिलासा॥ मधुर मधुर गरजइ घन घोरा। होइ बृष्टि जनि उपल कठोरा॥

dekhu bibhīṣana dacchina āsā| ghana ghaṃmaḍa dāmini bilāsā|| madhura madhura garajai ghana ghorā| hoi bṛṣṭi jani upala kaṭhorā||

कहत बिभीषन सुनहु कृपाला। होइ न तड़ित न बारिद माला॥ लंका सिखर उपर आगारा। तहँ दसकंघर देख अखारा॥

kahata bibhīṣana sunahu kṛpālā| hoi na taṛita na bārida mālā|| laṃkā sikhara upara āgārā| taham̐ dasakaṃghara dekha akhārā||

छत्र मेघडंबर सिर धारी। सोइ जनु जलद घटा अति कारी॥ मंदोदरी श्रवन ताटंका। सोइ प्रभु जनु दामिनी दमंका॥

chatra meghaḍaṃbara sira dhārī| soi janu jalada ghaṭā ati kārī|| maṃdodarī śravana tāṭaṃkā| soi prabhu janu dāminī damaṃkā||

बाजहिं ताल मृदंग अनूपा। सोइ रव मधुर सुनहु सुरभूपा॥ प्रभु मुसुकान समुझि अभिमाना। चाप चढ़ाइ बान संधाना॥

bājahiṃ tāla mṛdaṃga anūpā| soi rava madhura sunahu surabhūpā|| prabhu musukāna samujhi abhimānā| cāpa caṛhāi bāna saṃdhānā||

दोहा १३(क)

छत्र मुकुट ताटंक तब हते एकहीं बान। सबकें देखत महि परे मरमु न कोऊ जान ॥ १३ (क)॥

chatra mukuṭa tāṭaṃka taba hate ekahīṃ bāna| sabakeṃ dekhata mahi pare maramu na koū jāna || 13 (ka)||

दोहा १३(ख)

अस कौतुक करि राम सर प्रबिसेउ आइ निषंग। रावन सभा ससंक सब देखि महा रसभंग ॥ १३ (ख)॥

asa kautuka kari rāma sara prabiseu āi niṣaṃga| rāvana sabhā sasaṃka saba dekhi mahā rasabhaṃga || 13 (kha)||

कंप न भूमि न मरुत बिसेषा। अस्त्र सस्त्र कछु नयन न देखा॥

kaṃpa na bhūmi na maruta biseṣā| astra sastra kachu nayana na dekhā||

सोरठा १

सोचहिं सब निज हृदय मझारी। असगुन भयउ भयंकर भारी॥

socahiṃ saba nija hṛdaya majhārī| asaguna bhayau bhayaṃkara bhārī||

दसमुख देखि सभा भय पाई। बिहसि बचन कह जुगुति बनाई॥ सिरउ गिरे संतत सुभ जाही। मुकुट परे कस असगुन ताही॥

dasamukha dekhi sabhā bhaya pāī| bihasi bacana kaha juguti banāī|| sirau gire saṃtata subha jāhī| mukuṭa pare kasa asaguna tāhī||

सयन करहु निज निज गृह जाई। गवने भवन सकल सिर नाई॥ मंदोदरी सोच उर बसेऊ। जब ते श्रवनपूर महि खसेऊ॥

sayana karahu nija nija gṛha jāī| gavane bhavana sakala sira nāī|| maṃdodarī soca ura baseū| jaba te śravanapūra mahi khaseū||

सजल नयन कह जुग कर जोरी। सुनहु प्रानपति बिनती मोरी॥ कंत राम बिरोध परिहरहू। जानि मनुज जनि हठ मन धरहू॥

sajala nayana kaha juga kara jorī| sunahu prānapati binatī morī|| kaṃta rāma birodha pariharahū| jāni manuja jani haṭha mana dharahū||

दोहा १४

बिस्वरुप रघुबंस मनि करहु बचन बिस्वासु। लोक कल्पना बेद कर अंग अंग प्रति जासु ॥ १४॥

bisvarupa raghubaṃsa mani karahu bacana bisvāsu| loka kalpanā beda kara aṃga aṃga prati jāsu || 14||