Ayodhya Kand — अयोध्याकाण्ड

अयोध्याकाण्ड · दोहा ५४–७१

साझा करें

बचन बिनीत मधुर रघुबर के। सर सम लगे मातु उर करके॥ सहमि सूखि सुनि सीतलि बानी। जिमि जवास परें पावस पानी॥

bacana binīta madhura raghubara ke| sara sama lage mātu ura karake|| sahami sūkhi suni sītali bānī| jimi javāsa pareṃ pāvasa pānī||

कहि न जाइ कछु हृदय बिषादू। मनहुँ मृगी सुनि केहरि नादू॥ नयन सजल तन थर थर काँपी। माजहि खाइ मीन जनु मापी॥

kahi na jāi kachu hṛdaya biṣādū| manahum̐ mṛgī suni kehari nādū|| nayana sajala tana thara thara kām̐pī| mājahi khāi mīna janu māpī||

धरि धीरजु सुत बदनु निहारी। गदगद बचन कहति महतारी॥ तात पितहि तुम्ह प्रानपिआरे। देखि मुदित नित चरित तुम्हारे॥

dhari dhīraju suta badanu nihārī| gadagada bacana kahati mahatārī|| tāta pitahi tumha prānapiāre| dekhi mudita nita carita tumhāre||

राजु देन कहुँ सुभ दिन साधा। कहेउ जान बन केहिं अपराधा॥ तात सुनावहु मोहि निदानू। को दिनकर कुल भयउ कृसानू॥

rāju dena kahum̐ subha dina sādhā| kaheu jāna bana kehiṃ aparādhā|| tāta sunāvahu mohi nidānū| ko dinakara kula bhayau kṛsānū||

दोहा ५४

निरखि राम रुख सचिवसुत कारनु कहेउ बुझाइ। सुनि प्रसंगु रहि मूक जिमि दसा बरनि नहिं जाइ ॥ ५४॥

nirakhi rāma rukha sacivasuta kāranu kaheu bujhāi| suni prasaṃgu rahi mūka jimi dasā barani nahiṃ jāi || 54||

राखि न सकइ न कहि सक जाहू। दुहूँ भाँति उर दारुन दाहू॥ लिखत सुधाकर गा लिखि राहू। बिधि गति बाम सदा सब काहू॥

rākhi na sakai na kahi saka jāhū| duhūm̐ bhām̐ti ura dāruna dāhū|| likhata sudhākara gā likhi rāhū| bidhi gati bāma sadā saba kāhū||

धरम सनेह उभयँ मति घेरी। भइ गति साँप छुछुंदरि केरी॥ राखउँ सुतहि करउँ अनुरोधू। धरमु जाइ अरु बंधु बिरोधू॥

dharama saneha ubhayam̐ mati gherī| bhai gati sām̐pa chuchuṃdari kerī|| rākhaum̐ sutahi karaum̐ anurodhū| dharamu jāi aru baṃdhu birodhū||

कहउँ जान बन तौ बड़ि हानी। संकट सोच बिबस भइ रानी॥ बहुरि समुझि तिय धरमु सयानी। रामु भरतु दोउ सुत सम जानी॥

kahaum̐ jāna bana tau baṛi hānī| saṃkaṭa soca bibasa bhai rānī|| bahuri samujhi tiya dharamu sayānī| rāmu bharatu dou suta sama jānī||

सरल सुभाउ राम महतारी। बोली बचन धीर धरि भारी॥ तात जाउँ बलि कीन्हेहु नीका। पितु आयसु सब धरमक टीका॥

sarala subhāu rāma mahatārī| bolī bacana dhīra dhari bhārī|| tāta jāum̐ bali kīnhehu nīkā| pitu āyasu saba dharamaka ṭīkā||

दोहा ५५

राजु देन कहि दीन्ह बनु मोहि न सो दुख लेसु। तुम्ह बिनु भरतहि भूपतिहि प्रजहि प्रचंड कलेसु ॥ ५५॥

rāju dena kahi dīnha banu mohi na so dukha lesu| tumha binu bharatahi bhūpatihi prajahi pracaṃḍa kalesu || 55||

जौं केवल पितु आयसु ताता। तौ जनि जाहु जानि बड़ि माता॥ जौं पितु मातु कहेउ बन जाना। तौं कानन सत अवध समाना॥

jauṃ kevala pitu āyasu tātā| tau jani jāhu jāni baṛi mātā|| jauṃ pitu mātu kaheu bana jānā| tauṃ kānana sata avadha samānā||

पितु बनदेव मातु बनदेवी। खग मृग चरन सरोरुह सेवी॥ अंतहुँ उचित नृपहि बनबासू। बय बिलोकि हियँ होइ हराँसू॥

pitu banadeva mātu banadevī| khaga mṛga carana saroruha sevī|| aṃtahum̐ ucita nṛpahi banabāsū| baya biloki hiyam̐ hoi harām̐sū||

बड़भागी बनु अवध अभागी। जो रघुबंसतिलक तुम्ह त्यागी॥ जौं सुत कहौ संग मोहि लेहू। तुम्हरे हृदयँ होइ संदेहू॥

baṛabhāgī banu avadha abhāgī| jo raghubaṃsatilaka tumha tyāgī|| jauṃ suta kahau saṃga mohi lehū| tumhare hṛdayam̐ hoi saṃdehū||

पूत परम प्रिय तुम्ह सबही के। प्रान प्रान के जीवन जी के॥ ते तुम्ह कहहु मातु बन जाऊँ। मैं सुनि बचन बैठि पछिताऊँ॥

pūta parama priya tumha sabahī ke| prāna prāna ke jīvana jī ke|| te tumha kahahu mātu bana jāūm̐| maiṃ suni bacana baiṭhi pachitāūm̐||

दोहा ५६

यह बिचारि नहिं करउँ हठ झूठ सनेहु बढ़ाइ। मानि मातु कर नात बलि सुरति बिसरि जनि जाइ ॥ ५६॥

yaha bicāri nahiṃ karaum̐ haṭha jhūṭha sanehu baṛhāi| māni mātu kara nāta bali surati bisari jani jāi || 56||

देव पितर सब तुन्हहि गोसाई। राखहुँ पलक नयन की नाई॥ अवधि अंबु प्रिय परिजन मीना। तुम्ह करुनाकर धरम धुरीना॥

deva pitara saba tunhahi gosāī| rākhahum̐ palaka nayana kī nāī|| avadhi aṃbu priya parijana mīnā| tumha karunākara dharama dhurīnā||

अस बिचारि सोइ करहु उपाई। सबहि जिअत जेहिं भेंटेहु आई॥ जाहु सुखेन बनहि बलि जाऊँ। करि अनाथ जन परिजन गाऊँ॥

asa bicāri soi karahu upāī| sabahi jiata jehiṃ bheṃṭehu āī|| jāhu sukhena banahi bali jāūm̐| kari anātha jana parijana gāūm̐||

सब कर आजु सुकृत फल बीता। भयउ कराल कालु बिपरीता॥ बहुबिधि बिलपि चरन लपटानी। परम अभागिनि आपुहि जानी॥

saba kara āju sukṛta phala bītā| bhayau karāla kālu biparītā|| bahubidhi bilapi carana lapaṭānī| parama abhāgini āpuhi jānī||

दारुन दुसह दाहु उर ब्यापा। बरनि न जाहिं बिलाप कलापा॥ राम उठाइ मातु उर लाई। कहि मृदु बचन बहुरि समुझाई॥

dāruna dusaha dāhu ura byāpā| barani na jāhiṃ bilāpa kalāpā|| rāma uṭhāi mātu ura lāī| kahi mṛdu bacana bahuri samujhāī||

दोहा ५७

समाचार तेहि समय सुनि सीय उठी अकुलाइ। जाइ सासु पद कमल जुग बंदि बैठि सिरु नाइ ॥ ५७॥

samācāra tehi samaya suni sīya uṭhī akulāi| jāi sāsu pada kamala juga baṃdi baiṭhi siru nāi || 57||

दीन्हि असीस सासु मृदु बानी। अति सुकुमारि देखि अकुलानी॥ बैठि नमितमुख सोचति सीता। रूप रासि पति प्रेम पुनीता॥

dīnhi asīsa sāsu mṛdu bānī| ati sukumāri dekhi akulānī|| baiṭhi namitamukha socati sītā| rūpa rāsi pati prema punītā||

चलन चहत बन जीवननाथू। केहि सुकृती सन होइहि साथू॥ की तनु प्रान कि केवल प्राना। बिधि करतबु कछु जाइ न जाना॥

calana cahata bana jīvananāthū| kehi sukṛtī sana hoihi sāthū|| kī tanu prāna ki kevala prānā| bidhi karatabu kachu jāi na jānā||

चारु चरन नख लेखति धरनी। नूपुर मुखर मधुर कबि बरनी॥ मनहुँ प्रेम बस बिनती करहीं। हमहि सीय पद जनि परिहरहीं॥

cāru carana nakha lekhati dharanī| nūpura mukhara madhura kabi baranī|| manahum̐ prema basa binatī karahīṃ| hamahi sīya pada jani pariharahīṃ||

मंजु बिलोचन मोचति बारी। बोली देखि राम महतारी॥ तात सुनहु सिय अति सुकुमारी। सासु ससुर परिजनहि पिआरी॥

maṃju bilocana mocati bārī| bolī dekhi rāma mahatārī|| tāta sunahu siya ati sukumārī| sāsu sasura parijanahi piārī||

दोहा ५८

पिता जनक भूपाल मनि ससुर भानुकुल भानु। पति रबिकुल कैरव बिपिन बिधु गुन रूप निधानु ॥ ५८॥

pitā janaka bhūpāla mani sasura bhānukula bhānu| pati rabikula kairava bipina bidhu guna rūpa nidhānu || 58||

मैं पुनि पुत्रबधू प्रिय पाई। रूप रासि गुन सील सुहाई॥ नयन पुतरि करि प्रीति बढ़ाई। राखेउँ प्रान जानिकिहिं लाई॥

maiṃ puni putrabadhū priya pāī| rūpa rāsi guna sīla suhāī|| nayana putari kari prīti baṛhāī| rākheum̐ prāna jānikihiṃ lāī||

कलपबेलि जिमि बहुबिधि लाली। सींचि सनेह सलिल प्रतिपाली॥ फूलत फलत भयउ बिधि बामा। जानि न जाइ काह परिनामा॥

kalapabeli jimi bahubidhi lālī| sīṃci saneha salila pratipālī|| phūlata phalata bhayau bidhi bāmā| jāni na jāi kāha parināmā||

पलँग पीठ तजि गोद हिंड़ोरा। सियँ न दीन्ह पगु अवनि कठोरा॥ जिअनमूरि जिमि जोगवत रहऊँ। दीप बाति नहिं टारन कहऊँ॥

palam̐ga pīṭha taji goda hiṃṛorā| siyam̐ na dīnha pagu avani kaṭhorā|| jianamūri jimi jogavata rahaūm̐| dīpa bāti nahiṃ ṭārana kahaūm̐||

सोरठा ४

सोइ सिय चलन चहति बन साथा। आयसु काह होइ रघुनाथा॥ चंद किरन रस रसिक चकोरी। रबि रुख नयन सकइ किमि जोरी॥

soi siya calana cahati bana sāthā| āyasu kāha hoi raghunāthā|| caṃda kirana rasa rasika cakorī| rabi rukha nayana sakai kimi jorī||

दोहा ५९

करि केहरि निसिचर चरहिं दुष्ट जंतु बन भूरि। बिष बाटिकाँ कि सोह सुत सुभग सजीवनि मूरि ॥ ५९॥

kari kehari nisicara carahiṃ duṣṭa jaṃtu bana bhūri| biṣa bāṭikām̐ ki soha suta subhaga sajīvani mūri || 59||

बन हित कोल किरात किसोरी। रचीं बिरंचि बिषय सुख भोरी॥ पाइन कृमि जिमि कठिन सुभाऊ। तिन्हहि कलेसु न कानन काऊ॥

bana hita kola kirāta kisorī| racīṃ biraṃci biṣaya sukha bhorī|| pāina kṛmi jimi kaṭhina subhāū| tinhahi kalesu na kānana kāū||

कै तापस तिय कानन जोगू। जिन्ह तप हेतु तजा सब भोगू॥ सिय बन बसिहि तात केहि भाँती। चित्रलिखित कपि देखि डेराती॥

kai tāpasa tiya kānana jogū| jinha tapa hetu tajā saba bhogū|| siya bana basihi tāta kehi bhām̐tī| citralikhita kapi dekhi ḍerātī||

सुरसर सुभग बनज बन चारी। डाबर जोगु कि हंसकुमारी॥ अस बिचारि जस आयसु होई। मैं सिख देउँ जानकिहि सोई॥

surasara subhaga banaja bana cārī| ḍābara jogu ki haṃsakumārī|| asa bicāri jasa āyasu hoī| maiṃ sikha deum̐ jānakihi soī||

जौं सिय भवन रहै कह अंबा। मोहि कहँ होइ बहुत अवलंबा॥ सुनि रघुबीर मातु प्रिय बानी। सील सनेह सुधाँ जनु सानी॥

jauṃ siya bhavana rahai kaha aṃbā| mohi kaham̐ hoi bahuta avalaṃbā|| suni raghubīra mātu priya bānī| sīla saneha sudhām̐ janu sānī||

दोहा ६०

कहि प्रिय बचन बिबेकमय कीन्हि मातु परितोष। लगे प्रबोधन जानकिहि प्रगटि बिपिन गुन दोष ॥ ६०॥

kahi priya bacana bibekamaya kīnhi mātu paritoṣa| lage prabodhana jānakihi pragaṭi bipina guna doṣa || 60||

मातु समीप कहत सकुचाहीं। बोले समउ समुझि मन माहीं॥ राजकुमारि सिखावन सुनहू। आन भाँति जियँ जनि कछु गुनहू॥

mātu samīpa kahata sakucāhīṃ| bole samau samujhi mana māhīṃ|| rājakumāri sikhāvana sunahū| āna bhām̐ti jiyam̐ jani kachu gunahū||

आपन मोर नीक जौं चहहू। बचनु हमार मानि गृह रहहू॥ आयसु मोर सासु सेवकाई। सब बिधि भामिनि भवन भलाई॥

āpana mora nīka jauṃ cahahū| bacanu hamāra māni gṛha rahahū|| āyasu mora sāsu sevakāī| saba bidhi bhāmini bhavana bhalāī||

एहि ते अधिक धरमु नहिं दूजा। सादर सासु ससुर पद पूजा॥ जब जब मातु करिहि सुधि मोरी। होइहि प्रेम बिकल मति भोरी॥

ehi te adhika dharamu nahiṃ dūjā| sādara sāsu sasura pada pūjā|| jaba jaba mātu karihi sudhi morī| hoihi prema bikala mati bhorī||

तब तब तुम्ह कहि कथा पुरानी। सुंदरि समुझाएहु मृदु बानी॥ कहउँ सुभायँ सपथ सत मोही। सुमुखि मातु हित राखउँ तोही॥

taba taba tumha kahi kathā purānī| suṃdari samujhāehu mṛdu bānī|| kahaum̐ subhāyam̐ sapatha sata mohī| sumukhi mātu hita rākhaum̐ tohī||

दोहा ६१

गुर श्रुति संमत धरम फलु पाइअ बिनहिं कलेस। हठ बस सब संकट सहे गालव नहुष नरेस ॥ ६१॥

gura śruti saṃmata dharama phalu pāia binahiṃ kalesa| haṭha basa saba saṃkaṭa sahe gālava nahuṣa naresa || 61||

मैं पुनि करि प्रवान पितु बानी। बेगि फिरब सुनु सुमुखि सयानी॥ दिवस जात नहिं लागिहि बारा। सुंदरि सिखवनु सुनहु हमारा॥

maiṃ puni kari pravāna pitu bānī| begi phiraba sunu sumukhi sayānī|| divasa jāta nahiṃ lāgihi bārā| suṃdari sikhavanu sunahu hamārā||

जौ हठ करहु प्रेम बस बामा। तौ तुम्ह दुखु पाउब परिनामा॥ काननु कठिन भयंकरु भारी। घोर घामु हिम बारि बयारी॥

jau haṭha karahu prema basa bāmā| tau tumha dukhu pāuba parināmā|| kānanu kaṭhina bhayaṃkaru bhārī| ghora ghāmu hima bāri bayārī||

कुस कंटक मग काँकर नाना। चलब पयादेहिं बिनु पदत्राना॥ चरन कमल मुदु मंजु तुम्हारे। मारग अगम भूमिधर भारे॥

kusa kaṃṭaka maga kām̐kara nānā| calaba payādehiṃ binu padatrānā|| carana kamala mudu maṃju tumhāre| māraga agama bhūmidhara bhāre||

कंदर खोह नदीं नद नारे। अगम अगाध न जाहिं निहारे॥ भालु बाघ बृक केहरि नागा। करहिं नाद सुनि धीरजु भागा॥

kaṃdara khoha nadīṃ nada nāre| agama agādha na jāhiṃ nihāre|| bhālu bāgha bṛka kehari nāgā| karahiṃ nāda suni dhīraju bhāgā||

दोहा ६२

भूमि सयन बलकल बसन असनु कंद फल मूल। ते कि सदा सब दिन मिलिहिं सबुइ समय अनुकूल ॥ ६२॥

bhūmi sayana balakala basana asanu kaṃda phala mūla| te ki sadā saba dina milihiṃ sabui samaya anukūla || 62||

नर अहार रजनीचर चरहीं। कपट बेष बिधि कोटिक करहीं॥ लागइ अति पहार कर पानी। बिपिन बिपति नहिं जाइ बखानी॥

nara ahāra rajanīcara carahīṃ| kapaṭa beṣa bidhi koṭika karahīṃ|| lāgai ati pahāra kara pānī| bipina bipati nahiṃ jāi bakhānī||

ब्याल कराल बिहग बन घोरा। निसिचर निकर नारि नर चोरा॥ डरपहिं धीर गहन सुधि आएँ। मृगलोचनि तुम्ह भीरु सुभाएँ॥

byāla karāla bihaga bana ghorā| nisicara nikara nāri nara corā|| ḍarapahiṃ dhīra gahana sudhi āem̐| mṛgalocani tumha bhīru subhāem̐||

हंसगवनि तुम्ह नहिं बन जोगू। सुनि अपजसु मोहि देइहि लोगू॥ मानस सलिल सुधाँ प्रतिपाली। जिअइ कि लवन पयोधि मराली॥

haṃsagavani tumha nahiṃ bana jogū| suni apajasu mohi deihi logū|| mānasa salila sudhām̐ pratipālī| jiai ki lavana payodhi marālī||

नव रसाल बन बिहरनसीला। सोह कि कोकिल बिपिन करीला॥ रहहु भवन अस हृदयँ बिचारी। चंदबदनि दुखु कानन भारी॥

nava rasāla bana biharanasīlā| soha ki kokila bipina karīlā|| rahahu bhavana asa hṛdayam̐ bicārī| caṃdabadani dukhu kānana bhārī||

दोहा

सहज सुह्द गुर स्वामि सिख जो न करइ सिर मानि।

sahaja suhda gura svāmi sikha jo na karai sira māni|

सोरठा ६३

सो पछिताइ अघाइ उर अवसि होइ हित हानि ॥ ६३॥

so pachitāi aghāi ura avasi hoi hita hāni || 63||

सुनि मृदु बचन मनोहर पिय के। लोचन ललित भरे जल सिय के॥ सीतल सिख दाहक भइ कैंसें। चकइहि सरद चंद निसि जैंसें॥

suni mṛdu bacana manohara piya ke| locana lalita bhare jala siya ke|| sītala sikha dāhaka bhai kaiṃseṃ| cakaihi sarada caṃda nisi jaiṃseṃ||

उतरु न आव बिकल बैदेही। तजन चहत सुचि स्वामि सनेही॥ बरबस रोकि बिलोचन बारी। धरि धीरजु उर अवनिकुमारी॥

utaru na āva bikala baidehī| tajana cahata suci svāmi sanehī|| barabasa roki bilocana bārī| dhari dhīraju ura avanikumārī||

लागि सासु पग कह कर जोरी। छमबि देबि बड़ि अबिनय मोरी॥ दीन्हि प्रानपति मोहि सिख सोई। जेहि बिधि मोर परम हित होई॥

lāgi sāsu paga kaha kara jorī| chamabi debi baṛi abinaya morī|| dīnhi prānapati mohi sikha soī| jehi bidhi mora parama hita hoī||

मैं पुनि समुझि दीखि मन माहीं। पिय बियोग सम दुखु जग नाहीं॥

maiṃ puni samujhi dīkhi mana māhīṃ| piya biyoga sama dukhu jaga nāhīṃ||

दोहा ६४

प्राननाथ करुनायतन सुंदर सुखद सुजान। तुम्ह बिनु रघुकुल कुमुद बिधु सुरपुर नरक समान ॥ ६४॥

prānanātha karunāyatana suṃdara sukhada sujāna| tumha binu raghukula kumuda bidhu surapura naraka samāna || 64||

मातु पिता भगिनी प्रिय भाई। प्रिय परिवारु सुह्रद समुदाई॥ सासु ससुर गुर सजन सहाई। सुत सुंदर सुसील सुखदाई॥

mātu pitā bhaginī priya bhāī| priya parivāru suhrada samudāī|| sāsu sasura gura sajana sahāī| suta suṃdara susīla sukhadāī||

जहँ लगि नाथ नेह अरु नाते। पिय बिनु तियहि तरनिहु ते ताते॥ तनु धनु धामु धरनि पुर राजू। पति बिहीन सबु सोक समाजू॥

jaham̐ lagi nātha neha aru nāte| piya binu tiyahi taranihu te tāte|| tanu dhanu dhāmu dharani pura rājū| pati bihīna sabu soka samājū||

भोग रोगसम भूषन भारू। जम जातना सरिस संसारू॥ प्राननाथ तुम्ह बिनु जग माहीं। मो कहुँ सुखद कतहुँ कछु नाहीं॥

bhoga rogasama bhūṣana bhārū| jama jātanā sarisa saṃsārū|| prānanātha tumha binu jaga māhīṃ| mo kahum̐ sukhada katahum̐ kachu nāhīṃ||

जिय बिनु देह नदी बिनु बारी। तैसिअ नाथ पुरुष बिनु नारी॥ नाथ सकल सुख साथ तुम्हारें। सरद बिमल बिधु बदनु निहारें॥

jiya binu deha nadī binu bārī| taisia nātha puruṣa binu nārī|| nātha sakala sukha sātha tumhāreṃ| sarada bimala bidhu badanu nihāreṃ||

दोहा ६५

खग मृग परिजन नगरु बनु बलकल बिमल दुकूल। नाथ साथ सुरसदन सम परनसाल सुख मूल ॥ ६५॥

khaga mṛga parijana nagaru banu balakala bimala dukūla| nātha sātha surasadana sama paranasāla sukha mūla || 65||

बनदेवीं बनदेव उदारा। करिहहिं सासु ससुर सम सारा॥ कुस किसलय साथरी सुहाई। प्रभु सँग मंजु मनोज तुराई॥

banadevīṃ banadeva udārā| karihahiṃ sāsu sasura sama sārā|| kusa kisalaya sātharī suhāī| prabhu sam̐ga maṃju manoja turāī||

कंद मूल फल अमिअ अहारू। अवध सौध सत सरिस पहारू॥ छिनु छिनु प्रभु पद कमल बिलोकि। रहिहउँ मुदित दिवस जिमि कोकी॥

kaṃda mūla phala amia ahārū| avadha saudha sata sarisa pahārū|| chinu chinu prabhu pada kamala biloki| rahihaum̐ mudita divasa jimi kokī||

बन दुख नाथ कहे बहुतेरे। भय बिषाद परिताप घनेरे॥ प्रभु बियोग लवलेस समाना। सब मिलि होहिं न कृपानिधाना॥

bana dukha nātha kahe bahutere| bhaya biṣāda paritāpa ghanere|| prabhu biyoga lavalesa samānā| saba mili hohiṃ na kṛpānidhānā||

अस जियँ जानि सुजान सिरोमनि। लेइअ संग मोहि छाड़िअ जनि॥ बिनती बहुत करौं का स्वामी। करुनामय उर अंतरजामी॥

asa jiyam̐ jāni sujāna siromani| leia saṃga mohi chāṛia jani|| binatī bahuta karauṃ kā svāmī| karunāmaya ura aṃtarajāmī||

दोहा ६६

राखिअ अवध जो अवधि लगि रहत न जनिअहिं प्रान। दीनबंधु संदर सुखद सील सनेह निधान ॥ ६६॥

rākhia avadha jo avadhi lagi rahata na janiahiṃ prāna| dīnabaṃdhu saṃdara sukhada sīla saneha nidhāna || 66||

मोहि मग चलत न होइहि हारी। छिनु छिनु चरन सरोज निहारी॥ सबहि भाँति पिय सेवा करिहौं। मारग जनित सकल श्रम हरिहौं॥

mohi maga calata na hoihi hārī| chinu chinu carana saroja nihārī|| sabahi bhām̐ti piya sevā karihauṃ| māraga janita sakala śrama harihauṃ||

पाय पखारी बैठि तरु छाहीं। करिहउँ बाउ मुदित मन माहीं॥ श्रम कन सहित स्याम तनु देखें। कहँ दुख समउ प्रानपति पेखें॥

pāya pakhārī baiṭhi taru chāhīṃ| karihaum̐ bāu mudita mana māhīṃ|| śrama kana sahita syāma tanu dekheṃ| kaham̐ dukha samau prānapati pekheṃ||

सम महि तृन तरुपल्लव डासी। पाग पलोटिहि सब निसि दासी॥ बारबार मृदु मूरति जोही। लागहि तात बयारि न मोही॥

sama mahi tṛna tarupallava ḍāsī| pāga paloṭihi saba nisi dāsī|| bārabāra mṛdu mūrati johī| lāgahi tāta bayāri na mohī||

को प्रभु सँग मोहि चितवनिहारा। सिंघबधुहि जिमि ससक सिआरा॥ मैं सुकुमारि नाथ बन जोगू। तुम्हहि उचित तप मो कहुँ भोगू॥

ko prabhu sam̐ga mohi citavanihārā| siṃghabadhuhi jimi sasaka siārā|| maiṃ sukumāri nātha bana jogū| tumhahi ucita tapa mo kahum̐ bhogū||

दोहा ६७

ऐसेउ बचन कठोर सुनि जौं न ह्रदउ बिलगान। तौ प्रभु बिषम बियोग दुख सहिहहिं पावँर प्रान ॥ ६७॥

aiseu bacana kaṭhora suni jauṃ na hradau bilagāna| tau prabhu biṣama biyoga dukha sahihahiṃ pāvam̐ra prāna || 67||

अस कहि सीय बिकल भइ भारी। बचन बियोगु न सकी सँभारी॥ देखि दसा रघुपति जियँ जाना। हठि राखें नहिं राखिहि प्राना॥

asa kahi sīya bikala bhai bhārī| bacana biyogu na sakī sam̐bhārī|| dekhi dasā raghupati jiyam̐ jānā| haṭhi rākheṃ nahiṃ rākhihi prānā||

कहेउ कृपाल भानुकुलनाथा। परिहरि सोचु चलहु बन साथा॥ नहिं बिषाद कर अवसरु आजू। बेगि करहु बन गवन समाजू॥

kaheu kṛpāla bhānukulanāthā| parihari socu calahu bana sāthā|| nahiṃ biṣāda kara avasaru ājū| begi karahu bana gavana samājū||

कहि प्रिय बचन प्रिया समुझाई। लगे मातु पद आसिष पाई॥ बेगि प्रजा दुख मेटब आई। जननी निठुर बिसरि जनि जाई॥

kahi priya bacana priyā samujhāī| lage mātu pada āsiṣa pāī|| begi prajā dukha meṭaba āī| jananī niṭhura bisari jani jāī||

फिरहि दसा बिधि बहुरि कि मोरी। देखिहउँ नयन मनोहर जोरी॥ सुदिन सुघरी तात कब होइहि। जननी जिअत बदन बिधु जोइहि॥

phirahi dasā bidhi bahuri ki morī| dekhihaum̐ nayana manohara jorī|| sudina sugharī tāta kaba hoihi| jananī jiata badana bidhu joihi||

दोहा ६८

बहुरि बच्छ कहि लालु कहि रघुपति रघुबर तात। कबहिं बोलाइ लगाइ हियँ हरषि निरखिहउँ गात ॥ ६८॥

bahuri baccha kahi lālu kahi raghupati raghubara tāta| kabahiṃ bolāi lagāi hiyam̐ haraṣi nirakhihaum̐ gāta || 68||

लखि सनेह कातरि महतारी। बचनु न आव बिकल भइ भारी॥ राम प्रबोधु कीन्ह बिधि नाना। समउ सनेहु न जाइ बखाना॥

lakhi saneha kātari mahatārī| bacanu na āva bikala bhai bhārī|| rāma prabodhu kīnha bidhi nānā| samau sanehu na jāi bakhānā||

तब जानकी सासु पग लागी। सुनिअ माय मैं परम अभागी॥ सेवा समय दैअँ बनु दीन्हा। मोर मनोरथु सफल न कीन्हा॥

taba jānakī sāsu paga lāgī| sunia māya maiṃ parama abhāgī|| sevā samaya daiam̐ banu dīnhā| mora manorathu saphala na kīnhā||

तजब छोभु जनि छाड़िअ छोहू। करमु कठिन कछु दोसु न मोहू॥ सुनि सिय बचन सासु अकुलानी। दसा कवनि बिधि कहौं बखानी॥

tajaba chobhu jani chāṛia chohū| karamu kaṭhina kachu dosu na mohū|| suni siya bacana sāsu akulānī| dasā kavani bidhi kahauṃ bakhānī||

बारहि बार लाइ उर लीन्ही। धरि धीरजु सिख आसिष दीन्ही॥ अचल होउ अहिवातु तुम्हारा। जब लगि गंग जमुन जल धारा॥

bārahi bāra lāi ura līnhī| dhari dhīraju sikha āsiṣa dīnhī|| acala hou ahivātu tumhārā| jaba lagi gaṃga jamuna jala dhārā||

दोहा ६९

सीतहि सासु असीस सिख दीन्हि अनेक प्रकार। चली नाइ पद पदुम सिरु अति हित बारहिं बार ॥ ६९॥

sītahi sāsu asīsa sikha dīnhi aneka prakāra| calī nāi pada paduma siru ati hita bārahiṃ bāra || 69||

समाचार जब लछिमन पाए। ब्याकुल बिलख बदन उठि धाए॥ कंप पुलक तन नयन सनीरा। गहे चरन अति प्रेम अधीरा॥

samācāra jaba lachimana pāe| byākula bilakha badana uṭhi dhāe|| kaṃpa pulaka tana nayana sanīrā| gahe carana ati prema adhīrā||

कहि न सकत कछु चितवत ठाढ़े। मीनु दीन जनु जल तें काढ़े॥

kahi na sakata kachu citavata ṭhāṛhe| mīnu dīna janu jala teṃ kāṛhe||

सोरठा २

सोचु हृदयँ बिधि का होनिहारा। सबु सुखु सुकृत सिरान हमारा॥

socu hṛdayam̐ bidhi kā honihārā| sabu sukhu sukṛta sirāna hamārā||

मो कहुँ काह कहब रघुनाथा। रखिहहिं भवन कि लेहहिं साथा॥ राम बिलोकि बंधु कर जोरें। देह गेह सब सन तृनु तोरें॥

mo kahum̐ kāha kahaba raghunāthā| rakhihahiṃ bhavana ki lehahiṃ sāthā|| rāma biloki baṃdhu kara joreṃ| deha geha saba sana tṛnu toreṃ||

बोले बचनु राम नय नागर। सील सनेह सरल सुख सागर॥ तात प्रेम बस जनि कदराहू। समुझि हृदयँ परिनाम उछाहू॥

bole bacanu rāma naya nāgara| sīla saneha sarala sukha sāgara|| tāta prema basa jani kadarāhū| samujhi hṛdayam̐ parināma uchāhū||

दोहा ७०

मातु पिता गुरु स्वामि सिख सिर धरि करहि सुभायँ। लहेउ लाभु तिन्ह जनम कर नतरु जनमु जग जायँ ॥ ७०॥

mātu pitā guru svāmi sikha sira dhari karahi subhāyam̐| laheu lābhu tinha janama kara nataru janamu jaga jāyam̐ || 70||

अस जियँ जानि सुनहु सिख भाई। करहु मातु पितु पद सेवकाई॥ भवन भरतु रिपुसूदन नाहीं। राउ बृद्ध मम दुखु मन माहीं॥

asa jiyam̐ jāni sunahu sikha bhāī| karahu mātu pitu pada sevakāī|| bhavana bharatu ripusūdana nāhīṃ| rāu bṛddha mama dukhu mana māhīṃ||

मैं बन जाउँ तुम्हहि लेइ साथा। होइ सबहि बिधि अवध अनाथा॥ गुरु पितु मातु प्रजा परिवारू। सब कहुँ परइ दुसह दुख भारू॥

maiṃ bana jāum̐ tumhahi lei sāthā| hoi sabahi bidhi avadha anāthā|| guru pitu mātu prajā parivārū| saba kahum̐ parai dusaha dukha bhārū||

रहहु करहु सब कर परितोषू। नतरु तात होइहि बड़ दोषू॥ जासु राज प्रिय प्रजा दुखारी। सो नृपु अवसि नरक अधिकारी॥

rahahu karahu saba kara paritoṣū| nataru tāta hoihi baṛa doṣū|| jāsu rāja priya prajā dukhārī| so nṛpu avasi naraka adhikārī||

रहहु तात असि नीति बिचारी। सुनत लखनु भए ब्याकुल भारी॥ सिअरें बचन सूखि गए कैंसें। परसत तुहिन तामरसु जैसें॥

rahahu tāta asi nīti bicārī| sunata lakhanu bhae byākula bhārī|| siareṃ bacana sūkhi gae kaiṃseṃ| parasata tuhina tāmarasu jaiseṃ||

दोहा ७१

उतरु न आवत प्रेम बस गहे चरन अकुलाइ। नाथ दासु मैं स्वामि तुम्ह तजहु त काह बसाइ ॥ ७१॥

utaru na āvata prema basa gahe carana akulāi| nātha dāsu maiṃ svāmi tumha tajahu ta kāha basāi || 71||