लङ्काकाण्ड

लङ्काकाण्ड · दोहा ९०–१००

विभज्यताम्

अस कहि रथ रघुनाथ चलावा। बिप्र चरन पंकज सिरु नावा॥ तब लंकेस क्रोध उर छावा। गर्जत तर्जत सन्मुख धावा॥

asa kahi ratha raghunātha calāvā| bipra carana paṃkaja siru nāvā|| taba laṃkesa krodha ura chāvā| garjata tarjata sanmukha dhāvā||

जीतेहु जे भट संजुग माहीं। सुनु तापस मैं तिन्ह सम नाहीं॥ रावन नाम जगत जस जाना। लोकप जाकें बंदीखाना॥

jītehu je bhaṭa saṃjuga māhīṃ| sunu tāpasa maiṃ tinha sama nāhīṃ|| rāvana nāma jagata jasa jānā| lokapa jākeṃ baṃdīkhānā||

खर दूषन बिराध तुम्ह मारा। बधेहु ब्याध इव बालि बिचारा॥ निसिचर निकर सुभट संघारेहु। कुंभकरन घननादहि मारेहु॥

khara dūṣana birādha tumha mārā| badhehu byādha iva bāli bicārā|| nisicara nikara subhaṭa saṃghārehu| kuṃbhakarana ghananādahi mārehu||

आजु बयरु सबु लेउँ निबाही। जौं रन भूप भाजि नहिं जाहीं॥ आजु करउँ खलु काल हवाले। परेहु कठिन रावन के पाले॥

āju bayaru sabu leum̐ nibāhī| jauṃ rana bhūpa bhāji nahiṃ jāhīṃ|| āju karaum̐ khalu kāla havāle| parehu kaṭhina rāvana ke pāle||

सुनि दुर्बचन कालबस जाना। बिहँसि बचन कह कृपानिधाना॥ सत्य सत्य सब तव प्रभुताई। जल्पसि जनि देखाउ मनुसाई॥

suni durbacana kālabasa jānā| biham̐si bacana kaha kṛpānidhānā|| satya satya saba tava prabhutāī| jalpasi jani dekhāu manusāī||

छंद

जनि जल्पना करि सुजसु नासहि नीति सुनहि करहि छमा। संसार महेँ पूरुष त्रिबिध पाटल रसाल पनस समा॥ एक सुमनप्रद एक सुमन फल एक फलइ केवल लागहीं। एक कहहिं कहहिं करहिं अपर एक करहिं कहत न बागहीं॥

jani jalpanā kari sujasu nāsahi nīti sunahi karahi chamā| saṃsāra mahem̐ pūruṣa tribidha pāṭala rasāla panasa samā|| eka sumanaprada eka sumana phala eka phalai kevala lāgahīṃ| eka kahahiṃ kahahiṃ karahiṃ apara eka karahiṃ kahata na bāgahīṃ||

दोहा ९०

राम बचन सुनि बिहँसा मोहि सिखावत ग्यान। बयरु करत नहिं तब डरे अब लागे प्रिय प्रान ॥ ९०॥

rāma bacana suni biham̐sā mohi sikhāvata gyāna| bayaru karata nahiṃ taba ḍare aba lāge priya prāna || 90||

कहि दुर्बचन क्रुद्ध दसकंधर। कुलिस समान लाग छाँड़ै सर॥ नानाकार सिलीमुख धाए। दिसि अरु बिदिस गगन महि छाए॥

kahi durbacana kruddha dasakaṃdhara| kulisa samāna lāga chām̐ṛai sara|| nānākāra silīmukha dhāe| disi aru bidisa gagana mahi chāe||

पावक सर छाँड़ेउ रघुबीरा। छन महुँ जरे निसाचर तीरा॥ छाड़िसि तीब्र सक्ति खिसिआई। बान संग प्रभु फेरि चलाई॥

pāvaka sara chām̐ṛeu raghubīrā| chana mahum̐ jare nisācara tīrā|| chāṛisi tībra sakti khisiāī| bāna saṃga prabhu pheri calāī||

कोटिक चक्र त्रिसूल पबारै। बिनु प्रयास प्रभु काटि निवारै॥ निफल होहिं रावन सर कैसें। खल के सकल मनोरथ जैसें॥

koṭika cakra trisūla pabārai| binu prayāsa prabhu kāṭi nivārai|| niphala hohiṃ rāvana sara kaiseṃ| khala ke sakala manoratha jaiseṃ||

तब सत बान सारथी मारेसि। परेउ भूमि जय राम पुकारेसि॥ राम कृपा करि सूत उठावा। तब प्रभु परम क्रोध कहुँ पावा॥

taba sata bāna sārathī māresi| pareu bhūmi jaya rāma pukāresi|| rāma kṛpā kari sūta uṭhāvā| taba prabhu parama krodha kahum̐ pāvā||

छंद

भए क्रुद्ध जुद्ध बिरुद्ध रघुपति त्रोन सायक कसमसे। कोदंड धुनि अति चंड सुनि मनुजाद सब मारुत ग्रसे॥ मंदोदरी उर कंप कंपति कमठ भू भूधर त्रसे। चिक्करहिं दिग्गज दसन गहि महि देखि कौतुक सुर हैंसे॥

bhae kruddha juddha biruddha raghupati trona sāyaka kasamase| kodaṃḍa dhuni ati caṃḍa suni manujāda saba māruta grase|| maṃdodarī ura kaṃpa kaṃpati kamaṭha bhū bhūdhara trase| cikkarahiṃ diggaja dasana gahi mahi dekhi kautuka sura haiṃse||

दोहा ९१

तानेउ चाप श्रवन लगि छॉड़े बिसिख कराल। राम मारगन गन चले लहलहात जनु ब्याला ॥ ९१॥

tāneu cāpa śravana lagi chôṛe bisikha karāla| rāma māragana gana cale lahalahāta janu byālā || 91||

चले बान सपच्छ जनु उरगा। प्रथमहिं हतेउ सारथी तुरगा॥ रथ बिभंजि हति केतु पताका। गर्जा अति अंतर बल थाका॥

cale bāna sapaccha janu uragā| prathamahiṃ hateu sārathī turagā|| ratha bibhaṃji hati ketu patākā| garjā ati aṃtara bala thākā||

तुरत आन रथ चढ़ि खिसिआना। अस्त्र सस्त्र छाँड़ेसि बिधि नाना॥ बिफल होहिं सब उद्यम ताके। जिमि परद्रोह निरत मनसा के॥

turata āna ratha caṛhi khisiānā| astra sastra chām̐ṛesi bidhi nānā|| biphala hohiṃ saba udyama tāke| jimi paradroha nirata manasā ke||

तब रावन दस सूल चलावा। बाजि चारि महि मारि गिरावा॥ तुरग उठाइ कोपि रघुनायक। खैंचि सरासन छाँड़े सायक॥

taba rāvana dasa sūla calāvā| bāji cāri mahi māri girāvā|| turaga uṭhāi kopi raghunāyaka| khaiṃci sarāsana chām̐ṛe sāyaka||

रावन सिर सरोज बनचारी। चलि रघुबीर सिलीमुख धारी॥ दस दस बान भाल दस मारे। निसरि गए चले रुधिर पनारे॥

rāvana sira saroja banacārī| cali raghubīra silīmukha dhārī|| dasa dasa bāna bhāla dasa māre| nisari gae cale rudhira panāre||

स्त्रवत रुधिर धायउ बलवाना। प्रभु पुनि कृत धनु सर संधाना॥ तीस तीर रघुबीर पबारे। भुजन्हि समेत सीस महि पारे॥

stravata rudhira dhāyau balavānā| prabhu puni kṛta dhanu sara saṃdhānā|| tīsa tīra raghubīra pabāre| bhujanhi sameta sīsa mahi pāre||

काटतहीं पुनि भए नबीने। राम बहोरि भुजा सिर छीने॥ प्रभु बहु बार बाहु सिर हए। कटत झटिति पुनि नूतन भए॥

kāṭatahīṃ puni bhae nabīne| rāma bahori bhujā sira chīne|| prabhu bahu bāra bāhu sira hae| kaṭata jhaṭiti puni nūtana bhae||

पुनि पुनि प्रभु काटत भुज सीसा। अति कौतुकी कोसलाधीसा॥ रहे छाइ नभ सिर अरु बाहू। मानहुँ अमित केतु अरु राहू॥

puni puni prabhu kāṭata bhuja sīsā| ati kautukī kosalādhīsā|| rahe chāi nabha sira aru bāhū| mānahum̐ amita ketu aru rāhū||

छंद

जनु राहु केतु अनेक नभ पथ स्त्रवत सोनित धावहीं। रघुबीर तीर प्रचंड लागहिं भूमि गिरन न पावहीं॥ एक एक सर सिर निकर छेदे नभ उड़त इमि सोहहीं। जनु कोपि दिनकर कर निकर जहेँ तहँ बिधुंतुद पोहहीं॥

janu rāhu ketu aneka nabha patha stravata sonita dhāvahīṃ| raghubīra tīra pracaṃḍa lāgahiṃ bhūmi girana na pāvahīṃ|| eka eka sara sira nikara chede nabha uṛata imi sohahīṃ| janu kopi dinakara kara nikara jahem̐ taham̐ bidhuṃtuda pohahīṃ||

दोहा ९२

जिमि जिमि प्रभु हर तासु सिर तिमि तिमि होहिं अपार। सेवत बिषय बिबर्ध जिमि नित नित नूतन मार ॥ ९२॥

jimi jimi prabhu hara tāsu sira timi timi hohiṃ apāra| sevata biṣaya bibardha jimi nita nita nūtana māra || 92||

दसमुख देखि सिरन्ह कै बाढ़ी। बिसरा मरन भई रिस गाढ़ी॥ गर्जेउ मूढ़ महा अभिमानी। धायउ दसहु सरासन तानी॥

dasamukha dekhi siranha kai bāṛhī| bisarā marana bhaī risa gāṛhī|| garjeu mūṛha mahā abhimānī| dhāyau dasahu sarāsana tānī||

समर भूमि दसकंधर कोप्यो। बरषि बान रघुपति रथ तोप्यो॥ दंड एक रथ देखि न परेऊ। जनु निहार महुँ दिनकर दुरेऊ॥

samara bhūmi dasakaṃdhara kopyo| baraṣi bāna raghupati ratha topyo|| daṃḍa eka ratha dekhi na pareū| janu nihāra mahum̐ dinakara dureū||

हाहाकार सुरन्ह जब कीन्हा। तब प्रभु कोपि कारमुक लीन्हा॥ सर निवारि रिपु के सिर काटे। ते दिसि बिदिस गगन महि पाटे॥

hāhākāra suranha jaba kīnhā| taba prabhu kopi kāramuka līnhā|| sara nivāri ripu ke sira kāṭe| te disi bidisa gagana mahi pāṭe||

काटे सिर नभ मारग धावहिं। जय जय धुनि करि भय उपजावहिं॥ कहँ लछिमन सुग्रीव कपीसा। कहँ रघुबीर कोसलाधीसा॥

kāṭe sira nabha māraga dhāvahiṃ| jaya jaya dhuni kari bhaya upajāvahiṃ|| kaham̐ lachimana sugrīva kapīsā| kaham̐ raghubīra kosalādhīsā||

छंद

करहें रामु कहि सिर निकर धाए देखि मर्कट भजि चले। संधानि धनु रघुबंसमनि हँंसि सरन्हि सिर बेधे भले॥ सिर मालिका कर कालिका गहि बूंद बूंदन्हि बहु मिलीं। करि रुधिर सरि मज्जनु मनहुँ संग्राम बट पूजन चलीं॥

karaheṃ rāmu kahi sira nikara dhāe dekhi markaṭa bhaji cale| saṃdhāni dhanu raghubaṃsamani ham̐ṃsi saranhi sira bedhe bhale|| sira mālikā kara kālikā gahi būṃda būṃdanhi bahu milīṃ| kari rudhira sari majjanu manahum̐ saṃgrāma baṭa pūjana calīṃ||

दोहा ९३

पुनि दसकंठ क़द्ध होइ छॉड़ी सक्ति प्रचंड। चली बिभीषन सन्मुख मनहूं काल कर दंड ॥ ९३॥

puni dasakaṃṭha qaddha hoi chôṛī sakti pracaṃḍa| calī bibhīṣana sanmukha manahūṃ kāla kara daṃḍa || 93||

आवत देखि सक्ति अति घोरा। प्रनतारति भंजन पन मोरा॥ तुरत बिभीषन पाछें मेला। सन्मुख राम सहेउ सोइ सेला॥

āvata dekhi sakti ati ghorā| pranatārati bhaṃjana pana morā|| turata bibhīṣana pācheṃ melā| sanmukha rāma saheu soi selā||

लागि सक्ति मुरुछा कछु भई। प्रभु कृत खेल सुरन्ह बिकलई॥ देखि बिभीषन प्रभु श्रम पायो। गहि कर गदा क्रुद्ध होइ धायो॥

lāgi sakti muruchā kachu bhaī| prabhu kṛta khela suranha bikalaī|| dekhi bibhīṣana prabhu śrama pāyo| gahi kara gadā kruddha hoi dhāyo||

रे कुभाग्य सठ मंद कुबुद्धे। तैं सुर नर मुनि नाग बिरुद्धे॥ सादर सिव कहुँ सीस चढ़ाए। एक एक के कोटिन्ह पाए॥

re kubhāgya saṭha maṃda kubuddhe| taiṃ sura nara muni nāga biruddhe|| sādara siva kahum̐ sīsa caṛhāe| eka eka ke koṭinha pāe||

तेहि कारन खल अब लगि बाँच्यो। अब तव कालु सीस पर नाच्यो॥ राम बिमुख सठ चहसि संपदा। अस कहि हनेसि माझ उर गदा॥

tehi kārana khala aba lagi bām̐cyo| aba tava kālu sīsa para nācyo|| rāma bimukha saṭha cahasi saṃpadā| asa kahi hanesi mājha ura gadā||

छंद

उर माझ गदा प्रहार घोर कठोर लागत महि परो। दस बदन सोनित स्त्रवत पुनि संभारि धायो रिस भरथो॥ द्व भिरे अतिबल मल्लजुद्ध बिरुद्ध एक एकहि हने। रघुबीर बल दर्पित बिभीषनु घालि नहिं ता कहूँ गने॥

ura mājha gadā prahāra ghora kaṭhora lāgata mahi paro| dasa badana sonita stravata puni saṃbhāri dhāyo risa bharatho|| dva bhire atibala mallajuddha biruddha eka ekahi hane| raghubīra bala darpita bibhīṣanu ghāli nahiṃ tā kahūm̐ gane||

दोहा

उमा बिभीषनु रावनहि सन्मुख चितव कि काउ।

umā bibhīṣanu rāvanahi sanmukha citava ki kāu|

सोरठा ९४

अब भिरत काल ज्यों श्रीरघुबीर प्रभाउ ॥ ९४॥

aba bhirata kāla jyoṃ śrīraghubīra prabhāu || 94||

देखा श्रमित बिभीषनु भारी। धायउ हनूमान गिरि धारी॥ रथ तुरंग सारथी निपाता। हृदय माझ तेहि मारेसि लाता॥

dekhā śramita bibhīṣanu bhārī| dhāyau hanūmāna giri dhārī|| ratha turaṃga sārathī nipātā| hṛdaya mājha tehi māresi lātā||

ठाढ़ रहा अति कंपित गाता। गयउ बिभीषनु जहँ जनत्राता॥ पुनि रावन कपि हतेउ पचारी। चलेउ गगन कपि पूँछ पसारी॥

ṭhāṛha rahā ati kaṃpita gātā| gayau bibhīṣanu jaham̐ janatrātā|| puni rāvana kapi hateu pacārī| caleu gagana kapi pūm̐cha pasārī||

गहिसि पूँछ कपि सहित उड़ाना। पुनि फिरि भिरेउ प्रबल हनुमाना॥ लरत अकास जुगल सम जोधा। एकहि एकु हनत करि क्रोधा॥

gahisi pūm̐cha kapi sahita uṛānā| puni phiri bhireu prabala hanumānā|| larata akāsa jugala sama jodhā| ekahi eku hanata kari krodhā||

सोरठा ४

सोहहिं नभ छल बल बहु करहीं। कज्जल गिरि सुमेरु जनु लरहीं॥ बुधि बल निसिचर परइ न पार् यो। तब मारुत सुत प्रभु संभार् यो॥

sohahiṃ nabha chala bala bahu karahīṃ| kajjala giri sumeru janu larahīṃ|| budhi bala nisicara parai na pār yo| taba māruta suta prabhu saṃbhār yo||

छंद

संभारि श्रीरघुबीर धीर पचारि कपि रावनु हन्यो। महि परत पुनि उठि लरत देवन्ह जुगल कहुँ जय जय भन्यो॥ हनुमंत संकट देखि मर्कट भालु क्रोधातुर चले। रन मत्त रावन सकल सुभट प्रचंड भुज बल दलमले॥

saṃbhāri śrīraghubīra dhīra pacāri kapi rāvanu hanyo| mahi parata puni uṭhi larata devanha jugala kahum̐ jaya jaya bhanyo|| hanumaṃta saṃkaṭa dekhi markaṭa bhālu krodhātura cale| rana matta rāvana sakala subhaṭa pracaṃḍa bhuja bala dalamale||

दोहा ९५

तब रघुबीर पचारे धाए कीस प्रचंड। कपि बल प्रबल देखि तेहिं कीन्ह प्रगट पाषंड ॥ ९५॥

taba raghubīra pacāre dhāe kīsa pracaṃḍa| kapi bala prabala dekhi tehiṃ kīnha pragaṭa pāṣaṃḍa || 95||

अंतरधान भयउ छन एका। पुनि प्रगटे खल रूप अनेका॥ रघुपति कटक भालु कपि जेते। जहँ तहँ प्रगट दसानन तेते॥

aṃtaradhāna bhayau chana ekā| puni pragaṭe khala rūpa anekā|| raghupati kaṭaka bhālu kapi jete| jaham̐ taham̐ pragaṭa dasānana tete||

देखे कपिन्ह अमित दससीसा। जहँ तहँ भजे भालु अरु कीसा॥ भागे बानर धरहिं न धीरा। त्राहि त्राहि लछिमन रघुबीरा॥

dekhe kapinha amita dasasīsā| jaham̐ taham̐ bhaje bhālu aru kīsā|| bhāge bānara dharahiṃ na dhīrā| trāhi trāhi lachimana raghubīrā||

दहँ दिसि धावहिं कोटिन्ह रावन। गर्जहिं घोर कठोर भयावन॥ डरे सकल सुर चले पराई। जय कै आस तजहु अब भाई॥

daham̐ disi dhāvahiṃ koṭinha rāvana| garjahiṃ ghora kaṭhora bhayāvana|| ḍare sakala sura cale parāī| jaya kai āsa tajahu aba bhāī||

सब सुर जिते एक दसकंधर। अब बहु भए तकहु गिरि कंदर॥ रहे बिरंचि संभु मुनि ग्यानी। जिन्ह जिन्ह प्रभु महिमा कछु जानी॥

saba sura jite eka dasakaṃdhara| aba bahu bhae takahu giri kaṃdara|| rahe biraṃci saṃbhu muni gyānī| jinha jinha prabhu mahimā kachu jānī||

छंद

जाना प्रताप ते रहे निर्भय कपिन्ह रिपु माने फुरे। चले बिचलि मर्कट भालु सकल कृपाल पाहि भयातुरे॥ हनुमंत अंगद नील नल अतिबल लरत रन बाँकुरे। मर्दहिं दसानन कोटि कोटिन्ह कपट भू भट अंकुरे॥

jānā pratāpa te rahe nirbhaya kapinha ripu māne phure| cale bicali markaṭa bhālu sakala kṛpāla pāhi bhayāture|| hanumaṃta aṃgada nīla nala atibala larata rana bām̐kure| mardahiṃ dasānana koṭi koṭinha kapaṭa bhū bhaṭa aṃkure||

दोहा ९६

सुर बानर देखे बिकल हैँस्यो कोसलाधीस। सजि सारंग एक सर हते सकल दससीस ॥ ९६॥

sura bānara dekhe bikala haim̐syo kosalādhīsa| saji sāraṃga eka sara hate sakala dasasīsa || 96||

प्रभु छन महुँ माया सब काटी। जिमि रबि उएँ जाहिं तम फाटी॥ रावनु एकु देखि सुर हरषे। फिरे सुमन बहु प्रभु पर बरषे॥

prabhu chana mahum̐ māyā saba kāṭī| jimi rabi uem̐ jāhiṃ tama phāṭī|| rāvanu eku dekhi sura haraṣe| phire sumana bahu prabhu para baraṣe||

भुज उठाइ रघुपति कपि फेरे। फिरे एक एकन्ह तब टेरे॥ प्रभु बलु पाइ भालु कपि धाए। तरल तमकि संजुग महि आए॥

bhuja uṭhāi raghupati kapi phere| phire eka ekanha taba ṭere|| prabhu balu pāi bhālu kapi dhāe| tarala tamaki saṃjuga mahi āe||

अस्तुति करत देवतन्हि देखें। भयउँ एक मैं इन्ह के लेखें॥ सठहु सदा तुम्ह मोर मरायल। अस कहि कोपि गगन पर धायल॥

astuti karata devatanhi dekheṃ| bhayaum̐ eka maiṃ inha ke lekheṃ|| saṭhahu sadā tumha mora marāyala| asa kahi kopi gagana para dhāyala||

हाहाकार करत सुर भागे। खलहु जाहु कहँ मोरें आगे॥ देखि बिकल सुर अंगद धायो। कूदि चरन गहि भूमि गिरायो॥

hāhākāra karata sura bhāge| khalahu jāhu kaham̐ moreṃ āge|| dekhi bikala sura aṃgada dhāyo| kūdi carana gahi bhūmi girāyo||

छंद

गहि भूमि पारथो लात मारो बालिसुत प्रभु पहिं गयो। संभारि उठि दसकंठ घोर कठोर रव गर्जत भयो॥ करि दाप चाप चढ़ाइ दस संधानि सर बहु बरषई। किए सकल भट घायल भयाकुल देखि निज बल हरषढ॥

gahi bhūmi pāratho lāta māro bālisuta prabhu pahiṃ gayo| saṃbhāri uṭhi dasakaṃṭha ghora kaṭhora rava garjata bhayo|| kari dāpa cāpa caṛhāi dasa saṃdhāni sara bahu baraṣaī| kie sakala bhaṭa ghāyala bhayākula dekhi nija bala haraṣaḍha||

दोहा ९७

तब रघुपति रावन के सीस भुजा सर चाप। काटे बहुत बढ़े पुनि जिमि तीरथ कर पाप ॥ ९७॥

taba raghupati rāvana ke sīsa bhujā sara cāpa| kāṭe bahuta baṛhe puni jimi tīratha kara pāpa || 97||

सिर भुज बाढ़ि देखि रिपु केरी। भालु कपिन्ह रिस भई घनेरी॥ मरत न मूढ़ कटेउ भुज सीसा। धाए कोपि भालु भट कीसा॥

sira bhuja bāṛhi dekhi ripu kerī| bhālu kapinha risa bhaī ghanerī|| marata na mūṛha kaṭeu bhuja sīsā| dhāe kopi bhālu bhaṭa kīsā||

बालितनय मारुति नल नीला। बानरराज दुबिद बलसीला॥ बिटप महीधर करहिं प्रहारा। सोइ गिरि तरु गहि कपिन्ह सो मारा॥

bālitanaya māruti nala nīlā| bānararāja dubida balasīlā|| biṭapa mahīdhara karahiṃ prahārā| soi giri taru gahi kapinha so mārā||

एक नखन्हि रिपु बपुष बिदारी। भअगि चलहिं एक लातन्ह मारी॥ तब नल नील सिरन्हि चढ़ि गयऊ। नखन्हि लिलार बिदारत भयऊ॥

eka nakhanhi ripu bapuṣa bidārī| bhaagi calahiṃ eka lātanha mārī|| taba nala nīla siranhi caṛhi gayaū| nakhanhi lilāra bidārata bhayaū||

रुधिर देखि बिषाद उर भारी। तिन्हहि धरन कहुँ भुजा पसारी॥ गहे न जाहिं करन्हि पर फिरहीं। जनु जुग मधुप कमल बन चरहीं॥

rudhira dekhi biṣāda ura bhārī| tinhahi dharana kahum̐ bhujā pasārī|| gahe na jāhiṃ karanhi para phirahīṃ| janu juga madhupa kamala bana carahīṃ||

कोपि कूदि द्वौ धरेसि बहोरी। महि पटकत भजे भुजा मरोरी॥ पुनि सकोप दस धनु कर लीन्हे। सरन्हि मारि घायल कपि कीन्हे॥

kopi kūdi dvau dharesi bahorī| mahi paṭakata bhaje bhujā marorī|| puni sakopa dasa dhanu kara līnhe| saranhi māri ghāyala kapi kīnhe||

हनुमदादि मुरुछित करि बंदर। पाइ प्रदोष हरष दसकंधर॥ मुरुछित देखि सकल कपि बीरा। जामवंत धायउ रनधीरा॥

hanumadādi muruchita kari baṃdara| pāi pradoṣa haraṣa dasakaṃdhara|| muruchita dekhi sakala kapi bīrā| jāmavaṃta dhāyau ranadhīrā||

संग भालु भूधर तरु धारी। मारन लगे पचारि पचारी॥ भयउ क्रुद्ध रावन बलवाना। गहि पद महि पटकइ भट नाना॥

saṃga bhālu bhūdhara taru dhārī| mārana lage pacāri pacārī|| bhayau kruddha rāvana balavānā| gahi pada mahi paṭakai bhaṭa nānā||

देखि भालुपति निज दल घाता। कोपि माझ उर मारेसि लाता॥

dekhi bhālupati nija dala ghātā| kopi mājha ura māresi lātā||

छंद

उर लात घात प्रचंड लागत बिकल रथ ते महि परा। गहि भालु बीसहूँ कर मनहूँ कमलन्हि बसे निसि मधुकरा॥ मुरुछित बिलोकि बहोरि पद हति भालुपति प्रभु पहिं गयो। निसि जानि स्यंदन घालि तेहि तब सूत जतनु करत भयो॥

ura lāta ghāta pracaṃḍa lāgata bikala ratha te mahi parā| gahi bhālu bīsahūm̐ kara manahūm̐ kamalanhi base nisi madhukarā|| muruchita biloki bahori pada hati bhālupati prabhu pahiṃ gayo| nisi jāni syaṃdana ghāli tehi taba sūta jatanu karata bhayo||

दोहा ९८

मुरुछा बिगत भालु कपि सब आए प्रभु पास। निसिचर सकल रावनहि घेरि रहे अति त्रास ॥ ९८॥

muruchā bigata bhālu kapi saba āe prabhu pāsa| nisicara sakala rāvanahi gheri rahe ati trāsa || 98||

तेही निसि सीता पहिं जाई। त्रिजटा कहि सब कथा सुनाई॥ सिर भुज बाढ़ि सुनत रिपु केरी। सीता उर भइ त्रास घनेरी॥

tehī nisi sītā pahiṃ jāī| trijaṭā kahi saba kathā sunāī|| sira bhuja bāṛhi sunata ripu kerī| sītā ura bhai trāsa ghanerī||

मुख मलीन उपजी मन चिंता। त्रिजटा सन बोली तब सीता॥ होइहि कहा कहसि किन माता। केहि बिधि मरिहि बिस्व दुखदाता॥

mukha malīna upajī mana ciṃtā| trijaṭā sana bolī taba sītā|| hoihi kahā kahasi kina mātā| kehi bidhi marihi bisva dukhadātā||

रघुपति सर सिर कटेहुँ न मरई। बिधि बिपरीत चरित सब करई॥ मोर अभाग्य जिआवत ओही। जेहिं हौ हरि पद कमल बिछोही॥

raghupati sara sira kaṭehum̐ na maraī| bidhi biparīta carita saba karaī|| mora abhāgya jiāvata ohī| jehiṃ hau hari pada kamala bichohī||

जेहिं कृत कपट कनक मृग झूठा। अजहुँ सो दैव मोहि पर रूठा॥ जेहिं बिधि मोहि दुख दुसह सहाए। लछिमन कहुँ कटु बचन कहाए॥

jehiṃ kṛta kapaṭa kanaka mṛga jhūṭhā| ajahum̐ so daiva mohi para rūṭhā|| jehiṃ bidhi mohi dukha dusaha sahāe| lachimana kahum̐ kaṭu bacana kahāe||

रघुपति बिरह सबिष सर भारी। तकि तकि मार बार बहु मारी॥ ऐसेहुँ दुख जो राख मम प्राना। सोइ बिधि ताहि जिआव न आना॥

raghupati biraha sabiṣa sara bhārī| taki taki māra bāra bahu mārī|| aisehum̐ dukha jo rākha mama prānā| soi bidhi tāhi jiāva na ānā||

बहु बिधि कर बिलाप जानकी। करि करि सुरति कृपानिधान की॥ कह त्रिजटा सुनु राजकुमारी। उर सर लागत मरइ सुरारी॥

bahu bidhi kara bilāpa jānakī| kari kari surati kṛpānidhāna kī|| kaha trijaṭā sunu rājakumārī| ura sara lāgata marai surārī||

प्रभु ताते उर हतइ न तेही। एहि के हृदयँ बसति बैदेही॥

prabhu tāte ura hatai na tehī| ehi ke hṛdayam̐ basati baidehī||

छंद

एहि के हदयें बस जानकी जानकी उर मम बास है। मम उदर भुअन अनेक लागत बान सब कर नास है॥ सुनि बचन हरष बिषाद मन अति देखि पुनि त्रिजटाँ कहा। अब मरिहि रिपु एहि बिधि सुनहि सुंदरि तजहि संसय महा॥

ehi ke hadayeṃ basa jānakī jānakī ura mama bāsa hai| mama udara bhuana aneka lāgata bāna saba kara nāsa hai|| suni bacana haraṣa biṣāda mana ati dekhi puni trijaṭām̐ kahā| aba marihi ripu ehi bidhi sunahi suṃdari tajahi saṃsaya mahā||

दोहा ९९

काटत सिर होइ़हि बिकल छुटि जाइहि तव ध्यान। तब रावनहि हृदय महूँ मरिहहिं रामु सुजान ॥ ९९॥

kāṭata sira hoihi bikala chuṭi jāihi tava dhyāna| taba rāvanahi hṛdaya mahūm̐ marihahiṃ rāmu sujāna || 99||

अस कहि बहुत भाँति समुझाई। पुनि त्रिजटा निज भवन सिधाई॥ राम सुभाउ सुमिरि बैदेही। उपजी बिरह बिथा अति तेही॥

asa kahi bahuta bhām̐ti samujhāī| puni trijaṭā nija bhavana sidhāī|| rāma subhāu sumiri baidehī| upajī biraha bithā ati tehī||

निसिहि ससिहि निंदति बहु भाँती। जुग सम भई सिराति न राती॥ करति बिलाप मनहिं मन भारी। राम बिरहँ जानकी दुखारी॥

nisihi sasihi niṃdati bahu bhām̐tī| juga sama bhaī sirāti na rātī|| karati bilāpa manahiṃ mana bhārī| rāma biraham̐ jānakī dukhārī||

जब अति भयउ बिरह उर दाहू। फरकेउ बाम नयन अरु बाहू॥ सगुन बिचारि धरी मन धीरा। अब मिलिहहिं कृपाल रघुबीरा॥

jaba ati bhayau biraha ura dāhū| pharakeu bāma nayana aru bāhū|| saguna bicāri dharī mana dhīrā| aba milihahiṃ kṛpāla raghubīrā||

इहाँ अर्धनिसि रावनु जागा। निज सारथि सन खीझन लागा॥ सठ रनभूमि छड़ाइसि मोही। धिग धिग अधम मंदमति तोही॥

ihām̐ ardhanisi rāvanu jāgā| nija sārathi sana khījhana lāgā|| saṭha ranabhūmi chaṛāisi mohī| dhiga dhiga adhama maṃdamati tohī||

तेहिं पद गहि बहु बिधि समुझावा। भौरु भएँ रथ चढ़ि पुनि धावा॥ सुनि आगवनु दसानन केरा। कपि दल खरभर भयउ घनेरा॥

tehiṃ pada gahi bahu bidhi samujhāvā| bhauru bhaem̐ ratha caṛhi puni dhāvā|| suni āgavanu dasānana kerā| kapi dala kharabhara bhayau ghanerā||

जहँ तहँ भूधर बिटप उपारी। धाए कटकटाइ भट भारी॥

jaham̐ taham̐ bhūdhara biṭapa upārī| dhāe kaṭakaṭāi bhaṭa bhārī||

छंद

धाए जो मर्कट बिकट भालु कराल कर भूधर धरा। अति कोप करहिं प्रहार मारत भजि चले रजनीचरा॥ बिचलाइ दल बलवंत कीसन्ह घेरि पुनि रावनु लियो। चहूँ दिसि चपेटन्हि मारि नखन्हि बिदारि तनु ब्याकुल कियो॥

dhāe jo markaṭa bikaṭa bhālu karāla kara bhūdhara dharā| ati kopa karahiṃ prahāra mārata bhaji cale rajanīcarā|| bicalāi dala balavaṃta kīsanha gheri puni rāvanu liyo| cahūm̐ disi capeṭanhi māri nakhanhi bidāri tanu byākula kiyo||

दोहा १००

देखि महा मर्कट प्रबल रावन कीन्ह बिचार। अंतरहित होइ निमिष महूँ कृत माया बिस्तार ॥ १००॥

dekhi mahā markaṭa prabala rāvana kīnha bicāra| aṃtarahita hoi nimiṣa mahūm̐ kṛta māyā bistāra || 100||

छंद १

जब कीन्ह तेहिं पाषंड। भए प्रगट जंतु प्रचंड। बेताल भूत पिसाच। कर धरें धनु नाराच॥ १॥

jaba kīnha tehiṃ pāṣaṃḍa| bhae pragaṭa jaṃtu pracaṃḍa| betāla bhūta pisāca| kara dhareṃ dhanu nārāca|| 1||

दोहा २

जोगिनि गहें करबाल। एक हाथ मनुज कपाल। करि सद्य सोनित पान। नाचहिं करहिं बहु गान ॥ २॥

jogini gaheṃ karabāla| eka hātha manuja kapāla| kari sadya sonita pāna| nācahiṃ karahiṃ bahu gāna || 2||

दोहा ३

धरु मारु बोलहिं घोर। रहि पूरि धुनि चहुँ ओर। मुख बाइ धावहिं खान। तब लगे कीस परान ॥ ३॥

dharu māru bolahiṃ ghora| rahi pūri dhuni cahum̐ ora| mukha bāi dhāvahiṃ khāna| taba lage kīsa parāna || 3||

दोहा ४

जहँ जाहिं मर्कट भागि। तहँ बरत देखहिं आगि। भए बिकल बानर भालु। पुनि लाग बरषै बालु ॥ ४॥

jaham̐ jāhiṃ markaṭa bhāgi| taham̐ barata dekhahiṃ āgi| bhae bikala bānara bhālu| puni lāga baraṣai bālu || 4||

दोहा ५

जहँ तहँ थकित करि कीस। गर्जेउ बहुरि दससीस। लछिमन कपीस समेत। भए सकल बीर अचेत ॥ ५॥

jaham̐ taham̐ thakita kari kīsa| garjeu bahuri dasasīsa| lachimana kapīsa sameta| bhae sakala bīra aceta || 5||

दोहा ६

हा राम हा रघुनाथ। कहि सुभट मीजहिं हाथ। एहि बिधि सकल बल तोरि। तेहिं कीन्ह कपट बहोरि ॥ ६॥

hā rāma hā raghunātha| kahi subhaṭa mījahiṃ hātha| ehi bidhi sakala bala tori| tehiṃ kīnha kapaṭa bahori || 6||

दोहा ७

प्रगटेसि बिपुल हनुमान। धाए गहे पाषान। तिन्ह रामु घेरे जाइ। चहुँ दिसि बरूथ बनाइ ॥ ७॥

pragaṭesi bipula hanumāna| dhāe gahe pāṣāna| tinha rāmu ghere jāi| cahum̐ disi barūtha banāi || 7||

दोहा ८

मारहु धरहु जनि जाइ। कटकटहिं पूँछ उठाइ। दहँ दिसि लँगूर बिराज। तेहिं मध्य कोसलराज ॥ ८॥

mārahu dharahu jani jāi| kaṭakaṭahiṃ pūm̐cha uṭhāi| daham̐ disi lam̐gūra birāja| tehiṃ madhya kosalarāja || 8||

छंद १

तेहिं मध्य कोसलराज सुंदर स्याम तन सोभा लही। जनु इंद्रधनुष अनेक की बर बारि तुंग तमालही॥ प्रभु देखि हरष बिषाद उर सुर बदत जय जय जय करी। रघुबीर एकहि तीर कोपि निमेष महुँ माया हरी॥

tehiṃ madhya kosalarāja suṃdara syāma tana sobhā lahī| janu iṃdradhanuṣa aneka kī bara bāri tuṃga tamālahī|| prabhu dekhi haraṣa biṣāda ura sura badata jaya jaya jaya karī| raghubīra ekahi tīra kopi nimeṣa mahum̐ māyā harī||

दोहा २

माया बिगत कपि भालु हरषे बिटप गिरि गहि सब फिरे। सर निकर छाड़े राम रावन बाहु सिर पुनि महि गिरे॥ श्रीराम रावन समर चरित अनेक कल्प जो गावहीं। सत सेष सारद निगम कबि तेउ तदपि पार न पावहीं॥

māyā bigata kapi bhālu haraṣe biṭapa giri gahi saba phire| sara nikara chāṛe rāma rāvana bāhu sira puni mahi gire|| śrīrāma rāvana samara carita aneka kalpa jo gāvahīṃ| sata seṣa sārada nigama kabi teu tadapi pāra na pāvahīṃ||