बालकाण्ड

बालकाण्ड · दोहा ५०–६४

विभज्यताम्

संभु समय तेहि रामहि देखा। उपजा हियँ अति हरपु बिसेषा॥ भरि लोचन छबिसिंधु निहारी। कुसमय जानिन कीन्हि चिन्हारी॥

saṃbhu samaya tehi rāmahi dekhā| upajā hiyam̐ ati harapu biseṣā|| bhari locana chabisiṃdhu nihārī| kusamaya jānina kīnhi cinhārī||

जय सच्चिदानंद जग पावन। अस कहि चलेउ मनोज नसावन॥ चले जात सिव सती समेता। पुनि पुनि पुलकत कृपानिकेता॥

jaya saccidānaṃda jaga pāvana| asa kahi caleu manoja nasāvana|| cale jāta siva satī sametā| puni puni pulakata kṛpāniketā||

सतीं सो दसा संभु कै देखी। उर उपजा संदेहु बिसेषी॥ संकरु जगतबंद्य जगदीसा। सुर नर मुनि सब नावत सीसा॥

satīṃ so dasā saṃbhu kai dekhī| ura upajā saṃdehu biseṣī|| saṃkaru jagatabaṃdya jagadīsā| sura nara muni saba nāvata sīsā||

तिन्ह नृपसुतहि नह परनामा। कहि सच्चिदानंद परधमा॥ भए मगन छबि तासु बिलोकी। अजहुँ प्रीति उर रहति न रोकी॥

tinha nṛpasutahi naha paranāmā| kahi saccidānaṃda paradhamā|| bhae magana chabi tāsu bilokī| ajahum̐ prīti ura rahati na rokī||

दोहा

ब्रह्म जो व्यापक बिरज अज अकल अनीह अभेद।

brahma jo vyāpaka biraja aja akala anīha abheda|

सोरठा ५०

सो कि देह धरि होइ नर जाहि न जानत वेद ॥ ५०॥

so ki deha dhari hoi nara jāhi na jānata veda || 50||

बिष्नु जो सुर हित नरतनु धारी। सोउ सर्बग्य जथा त्रिपुरारी॥ खोजइ सो कि अग्य इव नारी। ग्यानधाम श्रीपति असुरारी॥

biṣnu jo sura hita naratanu dhārī| sou sarbagya jathā tripurārī|| khojai so ki agya iva nārī| gyānadhāma śrīpati asurārī||

संभुगिरा पुनि मृषा न होई। सिव सर्बग्य जान सबु कोई॥ अस संसय मन भयउ अपारा। होई न हृदयँ प्रबोध प्रचारा॥

saṃbhugirā puni mṛṣā na hoī| siva sarbagya jāna sabu koī|| asa saṃsaya mana bhayau apārā| hoī na hṛdayam̐ prabodha pracārā||

जद्यपि प्रगट न कहेउ भवानी। हर अंतरजामी सब जानी॥ सुनहि सती तव नारि सुभाऊ। संसय अस न धरिअ उर काऊ॥

jadyapi pragaṭa na kaheu bhavānī| hara aṃtarajāmī saba jānī|| sunahi satī tava nāri subhāū| saṃsaya asa na dharia ura kāū||

जासु कथा कुभंज रिषि गाई। भगति जासु मैं मुनिहि सुनाई॥

jāsu kathā kubhaṃja riṣi gāī| bhagati jāsu maiṃ munihi sunāī||

सोरठा ४

सोउ मम इष्टदेव रघुबीरा। सेवत जाहि सदा मुनि धीरा॥

sou mama iṣṭadeva raghubīrā| sevata jāhi sadā muni dhīrā||

छंद

मुनि धीर जोगी सिद्ध संतत बिमल मन जेहि ध्यावहीं। कहि नेति निगम पुरान आगम जासु कीरति गावहीं॥

muni dhīra jogī siddha saṃtata bimala mana jehi dhyāvahīṃ| kahi neti nigama purāna āgama jāsu kīrati gāvahīṃ||

सोरठा

इ रामु ब्यापक ब्रह्म भुवन निकाय पति माया धनी। अवतरेउ अपने भगत हित निजतंत्र नित रघुक़ुलमनी॥

i rāmu byāpaka brahma bhuvana nikāya pati māyā dhanī| avatareu apane bhagata hita nijataṃtra nita raghuqulamanī||

सोरठा ५१

लाग न उर उपदेसु जदपि कहेउ सितें बार बहु। बोले बिहसि महेसु हरिमाया बलु जानि जियें ॥ ५१॥

lāga na ura upadesu jadapi kaheu siteṃ bāra bahu| bole bihasi mahesu harimāyā balu jāni jiyeṃ || 51||

जौं तुम्हरें मन अति संदेहू। तौ किन जाइ परीछा लेहू॥ तब लगि बैठ अहउँ बटछाहिं। जब लगि तुम्ह ऐहहु मोहि पाही॥

jauṃ tumhareṃ mana ati saṃdehū| tau kina jāi parīchā lehū|| taba lagi baiṭha ahaum̐ baṭachāhiṃ| jaba lagi tumha aihahu mohi pāhī||

जैसें जाइ मोह भ्रम भारी। करेहु सो जतनु बिबेक बिचारी॥ चलीं सती सिव आयसु पाई। करहिं बिचारु करौं का भाई॥

jaiseṃ jāi moha bhrama bhārī| karehu so jatanu bibeka bicārī|| calīṃ satī siva āyasu pāī| karahiṃ bicāru karauṃ kā bhāī||

इहाँ संभु अस मन अनुमाना। दच्छसुता कहुँ नहिं कल्याना॥ मोरेहु कहें न संसय जाहीं। बिधी बिपरीत भलाई नाहीं॥

ihām̐ saṃbhu asa mana anumānā| dacchasutā kahum̐ nahiṃ kalyānā|| morehu kaheṃ na saṃsaya jāhīṃ| bidhī biparīta bhalāī nāhīṃ||

होइहि सोइ जो राम रचि राखा। को करि तर्क बढ़ावै साखा॥ अस कहि लगे जपन हरिनामा। गई सती जहँ प्रभु सुखधामा॥

hoihi soi jo rāma raci rākhā| ko kari tarka baṛhāvai sākhā|| asa kahi lage japana harināmā| gaī satī jaham̐ prabhu sukhadhāmā||

दोहा ५२

पुनि पुनि हृदयँ विचारु करि धरि सीता कर रुप। आगें होइ चलि पंथ तेहि जेहिं आवत नरभूप ॥ ५२॥

puni puni hṛdayam̐ vicāru kari dhari sītā kara rupa| āgeṃ hoi cali paṃtha tehi jehiṃ āvata narabhūpa || 52||

लछिमन दीख उमाकृत बेषा। चकित भए भ्रम हदयें बिसेषा॥ कहि न सकत कछु अति गंभीरा। प्रभु प्रभाउ जानत मतिधीरा॥

lachimana dīkha umākṛta beṣā| cakita bhae bhrama hadayeṃ biseṣā|| kahi na sakata kachu ati gaṃbhīrā| prabhu prabhāu jānata matidhīrā||

सती कपटु जानेउ सुरस्वामी। सबदरसी सब अंतरजामी॥ सुमिरत जाहि मिटइ अग्याना। सोइ सरबग्य रामु भगवाना॥

satī kapaṭu jāneu surasvāmī| sabadarasī saba aṃtarajāmī|| sumirata jāhi miṭai agyānā| soi sarabagya rāmu bhagavānā||

सती कीन्ह चह तहँहुँ दुराऊ। देखहु नारि सुभाव प्रभाऊ॥ निज माया बलु हृदयँ बखानी। बोले बिहसि रामु मृदु बानी॥

satī kīnha caha taham̐hum̐ durāū| dekhahu nāri subhāva prabhāū|| nija māyā balu hṛdayam̐ bakhānī| bole bihasi rāmu mṛdu bānī||

जोरि पानि प्रभु कीन्ह प्रनामू। पिता समेत लीन्ह निज नामू॥ कहेउ बहोरि कहाँ बृषकेतू। बिपिन अकेलि फिरहु केहि हेतू॥

jori pāni prabhu kīnha pranāmū| pitā sameta līnha nija nāmū|| kaheu bahori kahām̐ bṛṣaketū| bipina akeli phirahu kehi hetū||

दोहा ५३

राम बचन मृदु गूढ़ सुनि उपजा अति संकोचु। सती सभीत महेस पहिं चलीं हृदयँ बड़ सोचु ॥ ५३॥

rāma bacana mṛdu gūṛha suni upajā ati saṃkocu| satī sabhīta mahesa pahiṃ calīṃ hṛdayam̐ baṛa socu || 53||

मैं संकर कर कहा न माना। निज अग्यानु राम पर आना॥ जाइ उतरु अब देहउँ काहा। उर उपजा अति दारुन दाहा॥

maiṃ saṃkara kara kahā na mānā| nija agyānu rāma para ānā|| jāi utaru aba dehaum̐ kāhā| ura upajā ati dāruna dāhā||

जाना राम सतीं दुखु पावा। निज प्रभाउ कछु प्रगटि जनावा॥ सतीं दीख कौतुकु मग जाता। आगें रामु सहित श्री भ्राता॥

jānā rāma satīṃ dukhu pāvā| nija prabhāu kachu pragaṭi janāvā|| satīṃ dīkha kautuku maga jātā| āgeṃ rāmu sahita śrī bhrātā||

फिरि चितवा पाछें प्रभु देखा। सहित बंधु सिय सुंदर वेषा॥ जहँ चितवहिं तहँ प्रभु आसीना। सेवहिं सिद्ध मुनीस प्रबीना॥

phiri citavā pācheṃ prabhu dekhā| sahita baṃdhu siya suṃdara veṣā|| jaham̐ citavahiṃ taham̐ prabhu āsīnā| sevahiṃ siddha munīsa prabīnā||

देखे सिव बिधि बिष्नु अनेका। अमित प्रभाउ एक तें एका॥ बंदत चरन करत प्रभु सेवा। बिबिध बेष देखे सब देवा॥

dekhe siva bidhi biṣnu anekā| amita prabhāu eka teṃ ekā|| baṃdata carana karata prabhu sevā| bibidha beṣa dekhe saba devā||

दोहा ५४

सती बिधात्री इंदिरा देखीं अमित अनूप। जेहिं जेहिं बेष अजादि सुर तेहि तेहि तन अनुरूप ॥ ५४॥

satī bidhātrī iṃdirā dekhīṃ amita anūpa| jehiṃ jehiṃ beṣa ajādi sura tehi tehi tana anurūpa || 54||

देखे जहँ तहँ रघुपति जेते। सक्तिन्ह सहित सकल सुर तेते॥ जीव चराचर जो संसारा। देखे सकल अनेक प्रकारा॥

dekhe jaham̐ taham̐ raghupati jete| saktinha sahita sakala sura tete|| jīva carācara jo saṃsārā| dekhe sakala aneka prakārā||

पूजहिं प्रभुहि देव बहु बेषा। राम रूप दूसर नहिं देखा॥ अवलोके रघुपति बहुतेरे। सीता सहित न बेष घनेरे॥

pūjahiṃ prabhuhi deva bahu beṣā| rāma rūpa dūsara nahiṃ dekhā|| avaloke raghupati bahutere| sītā sahita na beṣa ghanere||

सोरठा ३

सोइ रघुबर सोइ लछिमनु सीता। देखि सती अति भई सभीता॥ हृदय कंप तन सुधि कछु नाहीं। नयन मूदि बैठीं मग माहीं॥

soi raghubara soi lachimanu sītā| dekhi satī ati bhaī sabhītā|| hṛdaya kaṃpa tana sudhi kachu nāhīṃ| nayana mūdi baiṭhīṃ maga māhīṃ||

बहुरि बिलोकेउ नयन उघारी। कछु न दीख तहँ दच्छकुमारी॥ पुनि पुनि नाइ राम पद सीसा। चलीं तहाँ जहँ रहे गिरीसा॥

bahuri bilokeu nayana ughārī| kachu na dīkha taham̐ dacchakumārī|| puni puni nāi rāma pada sīsā| calīṃ tahām̐ jaham̐ rahe girīsā||

दोहा ५५

गई समीप महेस तब हँसि पूछी कुसलात। लीन्ही परीछा कवन बिधि कहहु सत्य सब बात ॥ ५५॥

gaī samīpa mahesa taba ham̐si pūchī kusalāta| līnhī parīchā kavana bidhi kahahu satya saba bāta || 55||

सतीं समुझि रघुबीर प्रभाऊ। भय बस सिव सन कीन्ह दुराऊ॥ कछु न परीछा लीन्हि गोसाई। कीन्ह प्रनामु तुम्हारिहि नाई॥

satīṃ samujhi raghubīra prabhāū| bhaya basa siva sana kīnha durāū|| kachu na parīchā līnhi gosāī| kīnha pranāmu tumhārihi nāī||

जो तुम्ह कहा सो मृषा न होई। मोरें मन प्रतीति अति सोई॥ तब संकर देखेउ धरि ध्याना। सतीं जो कीन्ह चरित सब जाना॥

jo tumha kahā so mṛṣā na hoī| moreṃ mana pratīti ati soī|| taba saṃkara dekheu dhari dhyānā| satīṃ jo kīnha carita saba jānā||

बहुरि राममायहि सिरु नावा। प्रेरि सतिहि जेहिं झूँठ कहावा॥ हरि इच्छा भावी बलवाना। हृदयँ बिचारत संभु सुजाना॥

bahuri rāmamāyahi siru nāvā| preri satihi jehiṃ jhūm̐ṭha kahāvā|| hari icchā bhāvī balavānā| hṛdayam̐ bicārata saṃbhu sujānā||

सतीं कीन्ह सीता कर बेषा। सिव उर भयउ बिषाद बिसेषा॥ जौं अब करउँ सती सन प्रीती। मिटइ भगति पथु होइ अनीती॥

satīṃ kīnha sītā kara beṣā| siva ura bhayau biṣāda biseṣā|| jauṃ aba karaum̐ satī sana prītī| miṭai bhagati pathu hoi anītī||

दोहा ५६

परम पुनीत न जाइ तजि किएँ प्रेम बड़ पापु। प्रगटि न कहत महेसु कछु हृदयँ अधिक संतापु ॥ ५६॥

parama punīta na jāi taji kiem̐ prema baṛa pāpu| pragaṭi na kahata mahesu kachu hṛdayam̐ adhika saṃtāpu || 56||

तब संकर प्रभु पद सिरु नावा। सुमिरत रामु हृदयँ अस आवा॥ एहिं तन सतिहि भेट मोहि नाहीं। सिव संकल्पु कीन्ह मन माहीं॥

taba saṃkara prabhu pada siru nāvā| sumirata rāmu hṛdayam̐ asa āvā|| ehiṃ tana satihi bheṭa mohi nāhīṃ| siva saṃkalpu kīnha mana māhīṃ||

अस बिचारि संकरु मतिधीरा। चले भवन सुमिरत रघुबीरा॥ चलत गगन भै गिरा सुहाई। जय महेस भलि भगति दृढ़ाई॥

asa bicāri saṃkaru matidhīrā| cale bhavana sumirata raghubīrā|| calata gagana bhai girā suhāī| jaya mahesa bhali bhagati dṛṛhāī||

अस पन तुम्ह बिनु करइ को आना। रामभगत समरथ भगवाना॥ सुनि नभगिरा सती उर सोचा। पूछा सिवहि समेत सकोचा॥

asa pana tumha binu karai ko ānā| rāmabhagata samaratha bhagavānā|| suni nabhagirā satī ura socā| pūchā sivahi sameta sakocā||

कीन्ह कवन पन कहहु कृपाला। सत्यधाम प्रभु दीनदयाला॥ जदपि सतीं पूछा बहु भाँती। तदपि न कहेउ त्रिपुर आराती॥

kīnha kavana pana kahahu kṛpālā| satyadhāma prabhu dīnadayālā|| jadapi satīṃ pūchā bahu bhām̐tī| tadapi na kaheu tripura ārātī||

दोहा ५७(क)

सतीं हृदय अनुमान किय सबु जानेउ सर्बग्य। कीन्ह कपटु मैं संभु सन नारि सहज जड़ अग्य ॥ ५७ (क)॥

satīṃ hṛdaya anumāna kiya sabu jāneu sarbagya| kīnha kapaṭu maiṃ saṃbhu sana nāri sahaja jaṛa agya || 57 (ka)||

सोरठा ५७(ख)

जलु पय सरिस बिकाइ देखहु प्रीति कि रीति भलि। बिलग होइ रसु जाइ कपट खटाई परत पुनि ॥ ५७ (ख)॥

jalu paya sarisa bikāi dekhahu prīti ki rīti bhali| bilaga hoi rasu jāi kapaṭa khaṭāī parata puni || 57 (kha)||

हृदयँ सोचु समुझत निज करनी। चिंता अमित जाइ नहि बरनी॥ कृपासिंधु सिव परम अगाधा। प्रगट न कहेउ मोर अपराधा॥

hṛdayam̐ socu samujhata nija karanī| ciṃtā amita jāi nahi baranī|| kṛpāsiṃdhu siva parama agādhā| pragaṭa na kaheu mora aparādhā||

संकर रुख अवलोकि भवानी। प्रभु मोहि तजेउ हृदयँ अकुलानी॥ निज अघ समुझि न कछु कहि जाई। तपइ अवाँ इव उर अधिकाई॥

saṃkara rukha avaloki bhavānī| prabhu mohi tajeu hṛdayam̐ akulānī|| nija agha samujhi na kachu kahi jāī| tapai avām̐ iva ura adhikāī||

सतिहि ससोच जानि बृषकेतू। कहीं कथा सुंदर सुख हेतू॥ बरनत पंथ बिबिध इतिहासा। बिस्वनाथ पहुँचे कैलासा॥

satihi sasoca jāni bṛṣaketū| kahīṃ kathā suṃdara sukha hetū|| baranata paṃtha bibidha itihāsā| bisvanātha pahum̐ce kailāsā||

तहँ पुनि संभु समुझि पन आपन। बैठे बट तर करि कमलासन॥ संकर सहज सरुप सम्हारा। लागि समाधि अखंड अपारा॥

taham̐ puni saṃbhu samujhi pana āpana| baiṭhe baṭa tara kari kamalāsana|| saṃkara sahaja sarupa samhārā| lāgi samādhi akhaṃḍa apārā||

दोहा ५८

सती बसहि कैलास तब अधिक सोचु मन माहिं। मरमु न कोऊ जान कछु जुग सम दिवस सिराहिं ॥ ५८॥

satī basahi kailāsa taba adhika socu mana māhiṃ| maramu na koū jāna kachu juga sama divasa sirāhiṃ || 58||

नित नव सोचु सतीं उर भारा। कब जैहउँ दुख सागर पारा॥ मैं जो कीन्ह रघुपति अपमाना। पुनिपति बचनु मृषा करि जाना॥

nita nava socu satīṃ ura bhārā| kaba jaihaum̐ dukha sāgara pārā|| maiṃ jo kīnha raghupati apamānā| punipati bacanu mṛṣā kari jānā||

सोरठा २

सो फलु मोहि बिधाताँ दीन्हा। जो कछु उचित रहा सोइ कीन्हा॥ अब बिधि अस बूझिअ नहि तोही। संकर बिमुख जिआवसि मोही॥

so phalu mohi bidhātām̐ dīnhā| jo kachu ucita rahā soi kīnhā|| aba bidhi asa būjhia nahi tohī| saṃkara bimukha jiāvasi mohī||

कहि न जाई कछु हृदय गलानी। मन महुँ रामाहि सुमिर सयानी॥ जौ प्रभु दीनदयालु कहावा। आरती हरन बेद जसु गावा॥

kahi na jāī kachu hṛdaya galānī| mana mahum̐ rāmāhi sumira sayānī|| jau prabhu dīnadayālu kahāvā| āratī harana beda jasu gāvā||

तौ मैं बिनय करउँ कर जोरी। छूटउ बेगि देह यह मोरी॥ जौं मोरे सिव चरन सनेहू। मन क्रम बचन सत्य ब्रतु एहू॥

tau maiṃ binaya karaum̐ kara jorī| chūṭau begi deha yaha morī|| jauṃ more siva carana sanehū| mana krama bacana satya bratu ehū||

दोहा ५९

तौ सबदरसी सुनिअ प्रभु करउ सो बेगि उपाइ। होइ मरनु जेही बिनहिं श्रम दुसह बिपत्ति बिहाइ ॥ ५९॥

tau sabadarasī sunia prabhu karau so begi upāi| hoi maranu jehī binahiṃ śrama dusaha bipatti bihāi || 59||

एहि बिधि दुखित प्रजेसकुमारी। अकथनीय दारुन दुखु भारी॥ बीतें संबत सहस सतासी। तजी समाधि संभु अबिनासी॥

ehi bidhi dukhita prajesakumārī| akathanīya dāruna dukhu bhārī|| bīteṃ saṃbata sahasa satāsī| tajī samādhi saṃbhu abināsī||

राम नाम सिव सुमिरन लागे। जानेउ सतीं जगतपति जागे॥ जाइ संभु पद बंदनु कीन्ही। सनमुख संकर आसनु दीन्हा॥

rāma nāma siva sumirana lāge| jāneu satīṃ jagatapati jāge|| jāi saṃbhu pada baṃdanu kīnhī| sanamukha saṃkara āsanu dīnhā||

लगे कहन हरिकथा रसाला। दच्छ प्रजेस भए तेहि काला॥ देखा बिधि बिचारि सब लायक। दच्छहि कीन्ह प्रजापति नायक॥

lage kahana harikathā rasālā| daccha prajesa bhae tehi kālā|| dekhā bidhi bicāri saba lāyaka| dacchahi kīnha prajāpati nāyaka||

बड़ अधिकार दच्छ जब पावा। अति अभिमानु हृदयँ तब आवा॥ नहिं कोउ अस जनमा जग माहीं। प्रभुता पाइ जाहि मद नाहीं॥

baṛa adhikāra daccha jaba pāvā| ati abhimānu hṛdayam̐ taba āvā|| nahiṃ kou asa janamā jaga māhīṃ| prabhutā pāi jāhi mada nāhīṃ||

दोहा ६०

दच्छ लिए मुनि बोलि सब करन लगे बड़ जाग। नेवते सादर सकल सुर जे पावत मख भाग ॥ ६०॥

daccha lie muni boli saba karana lage baṛa jāga| nevate sādara sakala sura je pāvata makha bhāga || 60||

किंनर नाग सिद्ध गंधर्बा। बधुन्ह समेत चले सुर सर्बा॥ बिष्नु बिरंचि महेसु बिहाई। चले सकल सुर जान बनाई॥

kiṃnara nāga siddha gaṃdharbā| badhunha sameta cale sura sarbā|| biṣnu biraṃci mahesu bihāī| cale sakala sura jāna banāī||

सतीं बिलोके ब्योम बिमाना। जात चले सुंदर बिधि नाना॥ सुर सुंदरी करहिं कल गाना। सुनत श्रवन छूटहिं मुनि ध्याना॥

satīṃ biloke byoma bimānā| jāta cale suṃdara bidhi nānā|| sura suṃdarī karahiṃ kala gānā| sunata śravana chūṭahiṃ muni dhyānā||

पूछेउ तब सिवँ कहेउ बखानी। पिता जग्य सुनि कछु हरषानी॥ जौं महेसु मोहि आयसु देहीं। कुछ दिन जाइ रहौं मिस एहीं॥

pūcheu taba sivam̐ kaheu bakhānī| pitā jagya suni kachu haraṣānī|| jauṃ mahesu mohi āyasu dehīṃ| kucha dina jāi rahauṃ misa ehīṃ||

पति परित्याग हृदय दुखु भारी। कहइ न निज अपराध बिचारी॥ बोली सती मनोहर बानी। भय संकोच प्रेम रस सानी॥

pati parityāga hṛdaya dukhu bhārī| kahai na nija aparādha bicārī|| bolī satī manohara bānī| bhaya saṃkoca prema rasa sānī||

दोहा ६१

पिता भवन उत्सव परम जौं प्रभु आयसु होइ। तौ मै जाउँ कृपायतन सादर देखन सोइ ॥ ६१॥

pitā bhavana utsava parama jauṃ prabhu āyasu hoi| tau mai jāum̐ kṛpāyatana sādara dekhana soi || 61||

कहेहु नीक मोरेहुँ मन भावा। यह अनुचित नहिं नेवत पठावा॥ दच्छ सकल निज सुता बोलाई। हमरें बयर तुम्हउ बिसराई॥

kahehu nīka morehum̐ mana bhāvā| yaha anucita nahiṃ nevata paṭhāvā|| daccha sakala nija sutā bolāī| hamareṃ bayara tumhau bisarāī||

ब्रह्मसभाँ हम सन दुखु माना। तेहि तें अजहुँ करहिं अपमाना॥ जौं बिनु बोलें जाहु भवानी। रहइ न सीलु सनेहु न कानी॥

brahmasabhām̐ hama sana dukhu mānā| tehi teṃ ajahum̐ karahiṃ apamānā|| jauṃ binu boleṃ jāhu bhavānī| rahai na sīlu sanehu na kānī||

जदपि मित्र प्रभु पितु गुर गेहा। जाइअ बिनु बोलेहुँ न सँदेहा॥ तदपि बिरोध मान जहँ कोई। तहाँ गएँ कल्यानु न होई॥

jadapi mitra prabhu pitu gura gehā| jāia binu bolehum̐ na sam̐dehā|| tadapi birodha māna jaham̐ koī| tahām̐ gaem̐ kalyānu na hoī||

भाँति अनेक संभु समुझावा। भावी बस न ग्यानु उर आवा॥ कह प्रभु जाहु जो बिनहिं बोलाएँ। नहिं भलि बात हमारे भाएँ॥

bhām̐ti aneka saṃbhu samujhāvā| bhāvī basa na gyānu ura āvā|| kaha prabhu jāhu jo binahiṃ bolāem̐| nahiṃ bhali bāta hamāre bhāem̐||

दोहा ६२

कहि देखा हर जतन बहु रहइ न दच्छकुमारि। दिए मुख्य गन संग तब बिदा कीन्ह त्रिपुरारि ॥ ६२॥

kahi dekhā hara jatana bahu rahai na dacchakumāri| die mukhya gana saṃga taba bidā kīnha tripurāri || 62||

पिता भवन जब गई भवानी। दच्छ त्रास काहुँ न सनमानी॥ सादर भलेहिं मिली एक माता। भगिनीं मिलीं बहुत मुसुकाता॥

pitā bhavana jaba gaī bhavānī| daccha trāsa kāhum̐ na sanamānī|| sādara bhalehiṃ milī eka mātā| bhaginīṃ milīṃ bahuta musukātā||

दच्छ न कछु पूछी कुसलाता। सतिहि बिलोकि जरे सब गाता॥ सतीं जाइ देखेउ तब जागा। कतहुँ न दीख संभु कर भागा॥

daccha na kachu pūchī kusalātā| satihi biloki jare saba gātā|| satīṃ jāi dekheu taba jāgā| katahum̐ na dīkha saṃbhu kara bhāgā||

तब चित चढ़ेउ जो संकर कहेऊ। प्रभु अपमानु समुझि उर दहेऊ॥ पाछिल दुखु न हृदयँ अस ब्यापा। जस यह भयउ महा परितापा॥

taba cita caṛheu jo saṃkara kaheū| prabhu apamānu samujhi ura daheū|| pāchila dukhu na hṛdayam̐ asa byāpā| jasa yaha bhayau mahā paritāpā||

जद्यपि जग दारुन दुख नाना। सब तें कठिन जाति अवमाना॥ समुझि सो सतिहि भयउ अति क्रोधा। बहु बिधि जननीं कीन्ह प्रबोधा॥

jadyapi jaga dāruna dukha nānā| saba teṃ kaṭhina jāti avamānā|| samujhi so satihi bhayau ati krodhā| bahu bidhi jananīṃ kīnha prabodhā||

दोहा ६३

सिव अपमानु न जाइ सहि हृदयँ न होइ प्रबोध। सकल सभहि हठि हटकि तब बोलीं बचन सक्रोध ॥ ६३॥

siva apamānu na jāi sahi hṛdayam̐ na hoi prabodha| sakala sabhahi haṭhi haṭaki taba bolīṃ bacana sakrodha || 63||

सुनहु सभासद सकल मुनिंदा। कही सुनी जिन्ह संकर निंदा॥

sunahu sabhāsada sakala muniṃdā| kahī sunī jinha saṃkara niṃdā||

सोरठा १

सो फलु तुरत लहब सब काहूँ। भली भाँति पछिताब पिताहूँ॥

so phalu turata lahaba saba kāhūm̐| bhalī bhām̐ti pachitāba pitāhūm̐||

संत संभु श्रीपति अपबादा। सुनिअ जहाँ तहँ असि मरजादा॥ काटिअ तासु जीभ जो बसाई। श्रवन मूदि न त चलिअ पराई॥

saṃta saṃbhu śrīpati apabādā| sunia jahām̐ taham̐ asi marajādā|| kāṭia tāsu jībha jo basāī| śravana mūdi na ta calia parāī||

जगदातमा महेसु पुरारी। जगत जनक सब के हितकारी॥ पिता मंदमति निंदत तेही। दच्छ सुक्र संभव यह देही॥

jagadātamā mahesu purārī| jagata janaka saba ke hitakārī|| pitā maṃdamati niṃdata tehī| daccha sukra saṃbhava yaha dehī||

तजिहउँ तुरत देह तेहि हेतू। उर धरि चंद्रमौलि बृषकेतू॥ अस कहि जोग अगिनि तनु जारा। भयउ सकल मख हाहाकारा॥

tajihaum̐ turata deha tehi hetū| ura dhari caṃdramauli bṛṣaketū|| asa kahi joga agini tanu jārā| bhayau sakala makha hāhākārā||

दोहा ६४

सती मरनु सुनि संभु गन लगे करन मख खीस। जग्य बिधंस बिलोकि भृगु रच्छा कीन्हि मुनीस ॥ ६४॥

satī maranu suni saṃbhu gana lage karana makha khīsa| jagya bidhaṃsa biloki bhṛgu racchā kīnhi munīsa || 64||