बालकाण्ड

बालकाण्ड · दोहा २५०–२६५

विभज्यताम्

सुनि पन सकल भूप अभिलाषे। भटमानी अतिसय मन माखे॥ परिकर बाँधि उठे अकुलाई। चले इष्टदेवन्ह सिर नाई॥

suni pana sakala bhūpa abhilāṣe| bhaṭamānī atisaya mana mākhe|| parikara bām̐dhi uṭhe akulāī| cale iṣṭadevanha sira nāī||

तमकि ताकि तकि सिवधनु धरहीं। उठइ न कोटि भाँति बलु करहीं॥ जिन्ह के कछु बिचारु मन माहीं। चाप समीप महीप न जाहीं॥

tamaki tāki taki sivadhanu dharahīṃ| uṭhai na koṭi bhām̐ti balu karahīṃ|| jinha ke kachu bicāru mana māhīṃ| cāpa samīpa mahīpa na jāhīṃ||

दोहा २५०

तमकि धरहिं धनु मूढ़ नृप उठइ न चलहिं लजाइ। मनहुँ पाइ भट बाहुबलु अधिकु अधिकु गरुआइ ॥ २५०॥

tamaki dharahiṃ dhanu mūṛha nṛpa uṭhai na calahiṃ lajāi| manahum̐ pāi bhaṭa bāhubalu adhiku adhiku garuāi || 250||

भूप सहस दस एकहि बारा। लगे उठावन टरइ न टारा॥ डगइ न संभु सरासन कैसें। कामी बचन सती मनु जैसें॥

bhūpa sahasa dasa ekahi bārā| lage uṭhāvana ṭarai na ṭārā|| ḍagai na saṃbhu sarāsana kaiseṃ| kāmī bacana satī manu jaiseṃ||

सब नृप भए जोगु उपहासी। जैसें बिनु बिराग संन्यासी॥ कीरति बिजय बीरता भारी। चले चाप कर बरबस हारी॥

saba nṛpa bhae jogu upahāsī| jaiseṃ binu birāga saṃnyāsī|| kīrati bijaya bīratā bhārī| cale cāpa kara barabasa hārī||

श्रीहत भए हारि हियँ राजा। बैठे निज निज जाइ समाजा॥ नृपन्ह बिलोकि जनकु अकुलाने। बोले बचन रोष जनु साने॥

śrīhata bhae hāri hiyam̐ rājā| baiṭhe nija nija jāi samājā|| nṛpanha biloki janaku akulāne| bole bacana roṣa janu sāne||

दीप दीप के भूपति नाना। आए सुनि हम जो पनु ठाना॥ देव दनुज धरि मनुज सरीरा। बिपुल बीर आए रनधीरा॥

dīpa dīpa ke bhūpati nānā| āe suni hama jo panu ṭhānā|| deva danuja dhari manuja sarīrā| bipula bīra āe ranadhīrā||

दोहा २५१

कुअँरि मनोहर बिजय बड़ि कीरति अति कमनीय। पावनिहार बिरंचि जनु रचेउ न धनु दमनीय ॥ २५१॥

kuam̐ri manohara bijaya baṛi kīrati ati kamanīya| pāvanihāra biraṃci janu raceu na dhanu damanīya || 251||

कहहु काहि यहु लाभु न भावा। काहुँ न संकर चाप चढ़ावा॥ रहउ चढ़ाउब तोरब भाई। तिलु भरि भूमि न सके छड़ाई॥

kahahu kāhi yahu lābhu na bhāvā| kāhum̐ na saṃkara cāpa caṛhāvā|| rahau caṛhāuba toraba bhāī| tilu bhari bhūmi na sake chaṛāī||

अब जनि कोउ माखै भट मानी। बीर बिहीन मही मैं जानी॥ तजहु आस निज निज गृह जाहू। लिखा न बिधि बैदेहि बिबाहू॥

aba jani kou mākhai bhaṭa mānī| bīra bihīna mahī maiṃ jānī|| tajahu āsa nija nija gṛha jāhū| likhā na bidhi baidehi bibāhū||

सुकृत जाइ जौं पनु परिहरऊँ। कुअँरि कुआरि रहउ का करऊँ॥ जो जनतेउँ बिनु भट भुबि भाई। तौ पनु करि होतेउँ न हँसाई॥

sukṛta jāi jauṃ panu pariharaūm̐| kuam̐ri kuāri rahau kā karaūm̐|| jo janateum̐ binu bhaṭa bhubi bhāī| tau panu kari hoteum̐ na ham̐sāī||

जनक बचन सुनि सब नर नारी। देखि जानकिहि भए दुखारी॥ माखे लखनु कुटिल भइँ भौंहें। रदपट फरकत नयन रिसौंहें॥

janaka bacana suni saba nara nārī| dekhi jānakihi bhae dukhārī|| mākhe lakhanu kuṭila bhaim̐ bhauṃheṃ| radapaṭa pharakata nayana risauṃheṃ||

दोहा २५२

कहि न सकत रघुबीर डर लगे बचन जनु बान। नाइ राम पद कमल सिरु बोले गिरा प्रमान ॥ २५२॥

kahi na sakata raghubīra ḍara lage bacana janu bāna| nāi rāma pada kamala siru bole girā pramāna || 252||

रघुबंसिन्ह महुँ जहँ कोउ होई। तेहिं समाज अस कहइ न कोई॥ कही जनक जसि अनुचित बानी। बिद्यमान रघुकुल मनि जानी॥

raghubaṃsinha mahum̐ jaham̐ kou hoī| tehiṃ samāja asa kahai na koī|| kahī janaka jasi anucita bānī| bidyamāna raghukula mani jānī||

सुनहु भानुकुल पंकज भानू। कहउँ सुभाउ न कछु अभिमानू॥ जौ तुम्हारि अनुसासन पावौं। कंदुक इव ब्रह्मांड उठावौं॥

sunahu bhānukula paṃkaja bhānū| kahaum̐ subhāu na kachu abhimānū|| jau tumhāri anusāsana pāvauṃ| kaṃduka iva brahmāṃḍa uṭhāvauṃ||

काचे घट जिमि डारौं फोरी। सकउँ मेरु मूलक जिमि तोरी॥ तव प्रताप महिमा भगवाना। को बापुरो पिनाक पुराना॥

kāce ghaṭa jimi ḍārauṃ phorī| sakaum̐ meru mūlaka jimi torī|| tava pratāpa mahimā bhagavānā| ko bāpuro pināka purānā||

नाथ जानि अस आयसु होऊ। कौतुकु करौं बिलोकिअ सोऊ॥ कमल नाल जिमि चाफ चढ़ावौं। जोजन सत प्रमान लै धावौं॥

nātha jāni asa āyasu hoū| kautuku karauṃ bilokia soū|| kamala nāla jimi cāpha caṛhāvauṃ| jojana sata pramāna lai dhāvauṃ||

दोहा २५३

तोरौं छत्रक दंड जिमि तव प्रताप बल नाथ। जौं न करौं प्रभु पद सपथ कर न धरौं धनु भाथ ॥ २५३॥

torauṃ chatraka daṃḍa jimi tava pratāpa bala nātha| jauṃ na karauṃ prabhu pada sapatha kara na dharauṃ dhanu bhātha || 253||

लखन सकोप बचन जे बोले। डगमगानि महि दिग्गज डोले॥ सकल लोक सब भूप डेराने। सिय हियँ हरषु जनकु सकुचाने॥

lakhana sakopa bacana je bole| ḍagamagāni mahi diggaja ḍole|| sakala loka saba bhūpa ḍerāne| siya hiyam̐ haraṣu janaku sakucāne||

गुर रघुपति सब मुनि मन माहीं। मुदित भए पुनि पुनि पुलकाहीं॥ सयनहिं रघुपति लखनु नेवारे। प्रेम समेत निकट बैठारे॥

gura raghupati saba muni mana māhīṃ| mudita bhae puni puni pulakāhīṃ|| sayanahiṃ raghupati lakhanu nevāre| prema sameta nikaṭa baiṭhāre||

बिस्वामित्र समय सुभ जानी। बोले अति सनेहमय बानी॥ उठहु राम भंजहु भवचापा। मेटहु तात जनक परितापा॥

bisvāmitra samaya subha jānī| bole ati sanehamaya bānī|| uṭhahu rāma bhaṃjahu bhavacāpā| meṭahu tāta janaka paritāpā||

सुनि गुरु बचन चरन सिरु नावा। हरषु बिषादु न कछु उर आवा॥ ठाढ़े भए उठि सहज सुभाएँ। ठवनि जुबा मृगराजु लजाएँ॥

suni guru bacana carana siru nāvā| haraṣu biṣādu na kachu ura āvā|| ṭhāṛhe bhae uṭhi sahaja subhāem̐| ṭhavani jubā mṛgarāju lajāem̐||

दोहा २५४

उदित उदयगिरि मंच पर रघुबर बालपतंग। बिकसे संत सरोज सब हरषे लोचन भृंग ॥ २५४॥

udita udayagiri maṃca para raghubara bālapataṃga| bikase saṃta saroja saba haraṣe locana bhṛṃga || 254||

नृपन्ह केरि आसा निसि नासी। बचन नखत अवली न प्रकासी॥ मानी महिप कुमुद सकुचाने। कपटी भूप उलूक लुकाने॥

nṛpanha keri āsā nisi nāsī| bacana nakhata avalī na prakāsī|| mānī mahipa kumuda sakucāne| kapaṭī bhūpa ulūka lukāne||

भए बिसोक कोक मुनि देवा। बरिसहिं सुमन जनावहिं सेवा॥ गुर पद बंदि सहित अनुरागा। राम मुनिन्ह सन आयसु मागा॥

bhae bisoka koka muni devā| barisahiṃ sumana janāvahiṃ sevā|| gura pada baṃdi sahita anurāgā| rāma muninha sana āyasu māgā||

सहजहिं चले सकल जग स्वामी। मत्त मंजु बर कुंजर गामी॥ चलत राम सब पुर नर नारी। पुलक पूरि तन भए सुखारी॥

sahajahiṃ cale sakala jaga svāmī| matta maṃju bara kuṃjara gāmī|| calata rāma saba pura nara nārī| pulaka pūri tana bhae sukhārī||

बंदि पितर सुर सुकृत सँभारे। जौं कछु पुन्य प्रभाउ हमारे॥ तौ सिवधनु मृनाल की नाईं। तोरहुँ राम गनेस गोसाईं॥

baṃdi pitara sura sukṛta sam̐bhāre| jauṃ kachu punya prabhāu hamāre|| tau sivadhanu mṛnāla kī nāīṃ| torahum̐ rāma ganesa gosāīṃ||

दोहा २५५

रामहि प्रेम समेत लखि सखिन्ह समीप बोलाइ। सीता मातु सनेह बस बचन कहइ बिलखाइ ॥ २५५॥

rāmahi prema sameta lakhi sakhinha samīpa bolāi| sītā mātu saneha basa bacana kahai bilakhāi || 255||

सखि सब कौतुक देखनिहारे। जेठ कहावत हितू हमारे॥ कोउ न बुझाइ कहइ गुर पाहीं। ए बालक असि हठ भलि नाहीं॥

sakhi saba kautuka dekhanihāre| jeṭha kahāvata hitū hamāre|| kou na bujhāi kahai gura pāhīṃ| e bālaka asi haṭha bhali nāhīṃ||

रावन बान छुआ नहिं चापा। हारे सकल भूप करि दापा॥

rāvana bāna chuā nahiṃ cāpā| hāre sakala bhūpa kari dāpā||

सोरठा २

सो धनु राजकुअँर कर देहीं। बाल मराल कि मंदर लेहीं॥

so dhanu rājakuam̐ra kara dehīṃ| bāla marāla ki maṃdara lehīṃ||

भूप सयानप सकल सिरानी। सखि बिधि गति कछु जाति न जानी॥ बोली चतुर सखी मृदु बानी। तेजवंत लघु गनिअ न रानी॥

bhūpa sayānapa sakala sirānī| sakhi bidhi gati kachu jāti na jānī|| bolī catura sakhī mṛdu bānī| tejavaṃta laghu gania na rānī||

कहँ कुंभज कहँ सिंधु अपारा। सोषेउ सुजसु सकल संसारा॥ रबि मंडल देखत लघु लागा। उदयँ तासु तिभुवन तम भागा॥

kaham̐ kuṃbhaja kaham̐ siṃdhu apārā| soṣeu sujasu sakala saṃsārā|| rabi maṃḍala dekhata laghu lāgā| udayam̐ tāsu tibhuvana tama bhāgā||

दोहा २५६

मंत्र परम लघु जासु बस बिधि हरि हर सुर सर्ब। महामत्त गजराज कहुँ बस कर अंकुस खर्ब ॥ २५६॥

maṃtra parama laghu jāsu basa bidhi hari hara sura sarba| mahāmatta gajarāja kahum̐ basa kara aṃkusa kharba || 256||

काम कुसुम धनु सायक लीन्हे। सकल भुवन अपने बस कीन्हे॥ देबि तजिअ संसउ अस जानी। भंजब धनुष रामु सुनु रानी॥

kāma kusuma dhanu sāyaka līnhe| sakala bhuvana apane basa kīnhe|| debi tajia saṃsau asa jānī| bhaṃjaba dhanuṣa rāmu sunu rānī||

सखी बचन सुनि भै परतीती। मिटा बिषादु बढ़ी अति प्रीती॥ तब रामहि बिलोकि बैदेही। सभय हृदयँ बिनवति जेहि तेही॥

sakhī bacana suni bhai paratītī| miṭā biṣādu baṛhī ati prītī|| taba rāmahi biloki baidehī| sabhaya hṛdayam̐ binavati jehi tehī||

मनहीं मन मनाव अकुलानी। होहु प्रसन्न महेस भवानी॥ करहु सफल आपनि सेवकाई। करि हितु हरहु चाप गरुआई॥

manahīṃ mana manāva akulānī| hohu prasanna mahesa bhavānī|| karahu saphala āpani sevakāī| kari hitu harahu cāpa garuāī||

गननायक बरदायक देवा। आजु लगें कीन्हिउँ तुअ सेवा॥ बार बार बिनती सुनि मोरी। करहु चाप गुरुता अति थोरी॥

gananāyaka baradāyaka devā| āju lageṃ kīnhium̐ tua sevā|| bāra bāra binatī suni morī| karahu cāpa gurutā ati thorī||

दोहा २५७

देखि देखि रघुबीर तन सुर मनाव धरि धीर। भरे बिलोचन प्रेम जल पुलकावली सरीर ॥ २५७॥

dekhi dekhi raghubīra tana sura manāva dhari dhīra| bhare bilocana prema jala pulakāvalī sarīra || 257||

नीकें निरखि नयन भरि सोभा। पितु पनु सुमिरि बहुरि मनु छोभा॥ अहह तात दारुनि हठ ठानी। समुझत नहिं कछु लाभु न हानी॥

nīkeṃ nirakhi nayana bhari sobhā| pitu panu sumiri bahuri manu chobhā|| ahaha tāta dāruni haṭha ṭhānī| samujhata nahiṃ kachu lābhu na hānī||

सचिव सभय सिख देइ न कोई। बुध समाज बड़ अनुचित होई॥ कहँ धनु कुलिसहु चाहि कठोरा। कहँ स्यामल मृदुगात किसोरा॥

saciva sabhaya sikha dei na koī| budha samāja baṛa anucita hoī|| kaham̐ dhanu kulisahu cāhi kaṭhorā| kaham̐ syāmala mṛdugāta kisorā||

बिधि केहि भाँति धरौं उर धीरा। सिरस सुमन कन बेधिअ हीरा॥ सकल सभा कै मति भै भोरी। अब मोहि संभुचाप गति तोरी॥

bidhi kehi bhām̐ti dharauṃ ura dhīrā| sirasa sumana kana bedhia hīrā|| sakala sabhā kai mati bhai bhorī| aba mohi saṃbhucāpa gati torī||

निज जड़ता लोगन्ह पर डारी। होहि हरुअ रघुपतिहि निहारी॥ अति परिताप सीय मन माही। लव निमेष जुग सब सय जाहीं॥

nija jaṛatā loganha para ḍārī| hohi harua raghupatihi nihārī|| ati paritāpa sīya mana māhī| lava nimeṣa juga saba saya jāhīṃ||

दोहा २५८

प्रभुहि चितइ पुनि चितव महि राजत लोचन लोल। खेलत मनसिज मीन जुग जनु बिधु मंडल डोल ॥ २५८॥

prabhuhi citai puni citava mahi rājata locana lola| khelata manasija mīna juga janu bidhu maṃḍala ḍola || 258||

गिरा अलिनि मुख पंकज रोकी। प्रगट न लाज निसा अवलोकी॥ लोचन जलु रह लोचन कोना। जैसे परम कृपन कर सोना॥

girā alini mukha paṃkaja rokī| pragaṭa na lāja nisā avalokī|| locana jalu raha locana konā| jaise parama kṛpana kara sonā||

सकुची ब्याकुलता बड़ि जानी। धरि धीरजु प्रतीति उर आनी॥ तन मन बचन मोर पनु साचा। रघुपति पद सरोज चितु राचा॥

sakucī byākulatā baṛi jānī| dhari dhīraju pratīti ura ānī|| tana mana bacana mora panu sācā| raghupati pada saroja citu rācā||

तौ भगवानु सकल उर बासी। करिहिं मोहि रघुबर कै दासी॥ जेहि कें जेहि पर सत्य सनेहू। सो तेहि मिलइ न कछु संहेहू॥

tau bhagavānu sakala ura bāsī| karihiṃ mohi raghubara kai dāsī|| jehi keṃ jehi para satya sanehū| so tehi milai na kachu saṃhehū||

प्रभु तन चितइ प्रेम तन ठाना। कृपानिधान राम सबु जाना॥ सियहि बिलोकि तकेउ धनु कैसे। चितव गरुरु लघु ब्यालहि जैसे॥

prabhu tana citai prema tana ṭhānā| kṛpānidhāna rāma sabu jānā|| siyahi biloki takeu dhanu kaise| citava garuru laghu byālahi jaise||

दोहा २५९

लखन लखेउ रघुबंसमनि ताकेउ हर कोदंडु। पुलकि गात बोले बचन चरन चापि ब्रह्मांडु॥

lakhana lakheu raghubaṃsamani tākeu hara kodaṃḍu| pulaki gāta bole bacana carana cāpi brahmāṃḍu||

दिसकुंजरहु कमठ अहि कोला। धरहु धरनि धरि धीर न डोला॥ रामु चहहिं संकर धनु तोरा। होहु सजग सुनि आयसु मोरा॥

disakuṃjarahu kamaṭha ahi kolā| dharahu dharani dhari dhīra na ḍolā|| rāmu cahahiṃ saṃkara dhanu torā| hohu sajaga suni āyasu morā||

चाप सपीप रामु जब आए। नर नारिन्ह सुर सुकृत मनाए॥ सब कर संसउ अरु अग्यानू। मंद महीपन्ह कर अभिमानू॥

cāpa sapīpa rāmu jaba āe| nara nārinha sura sukṛta manāe|| saba kara saṃsau aru agyānū| maṃda mahīpanha kara abhimānū||

भृगुपति केरि गरब गरुआई। सुर मुनिबरन्ह केरि कदराई॥ सिय कर सोचु जनक पछितावा। रानिन्ह कर दारुन दुख दावा॥

bhṛgupati keri garaba garuāī| sura munibaranha keri kadarāī|| siya kara socu janaka pachitāvā| rāninha kara dāruna dukha dāvā||

संभुचाप बड बोहितु पाई। चढे जाइ सब संगु बनाई॥ राम बाहुबल सिंधु अपारू। चहत पारु नहि कोउ कड़हारू॥

saṃbhucāpa baḍa bohitu pāī| caḍhe jāi saba saṃgu banāī|| rāma bāhubala siṃdhu apārū| cahata pāru nahi kou kaṛahārū||

दोहा २६०

राम बिलोके लोग सब चित्र लिखे से देखि। चितई सीय कृपायतन जानी बिकल बिसेषि ॥ २६०॥

rāma biloke loga saba citra likhe se dekhi| citaī sīya kṛpāyatana jānī bikala biseṣi || 260||

देखी बिपुल बिकल बैदेही। निमिष बिहात कलप सम तेही॥ तृषित बारि बिनु जो तनु त्यागा। मुएँ करइ का सुधा तड़ागा॥

dekhī bipula bikala baidehī| nimiṣa bihāta kalapa sama tehī|| tṛṣita bāri binu jo tanu tyāgā| muem̐ karai kā sudhā taṛāgā||

का बरषा सब कृषी सुखानें। समय चुकें पुनि का पछितानें॥ अस जियँ जानि जानकी देखी। प्रभु पुलके लखि प्रीति बिसेषी॥

kā baraṣā saba kṛṣī sukhāneṃ| samaya cukeṃ puni kā pachitāneṃ|| asa jiyam̐ jāni jānakī dekhī| prabhu pulake lakhi prīti biseṣī||

गुरहि प्रनामु मनहि मन कीन्हा। अति लाघवँ उठाइ धनु लीन्हा॥ दमकेउ दामिनि जिमि जब लयऊ। पुनि नभ धनु मंडल सम भयऊ॥

gurahi pranāmu manahi mana kīnhā| ati lāghavam̐ uṭhāi dhanu līnhā|| damakeu dāmini jimi jaba layaū| puni nabha dhanu maṃḍala sama bhayaū||

लेत चढ़ावत खैंचत गाढ़ें। काहुँ न लखा देख सबु ठाढ़ें॥ तेहि छन राम मध्य धनु तोरा। भरे भुवन धुनि घोर कठोरा॥

leta caṛhāvata khaiṃcata gāṛheṃ| kāhum̐ na lakhā dekha sabu ṭhāṛheṃ|| tehi chana rāma madhya dhanu torā| bhare bhuvana dhuni ghora kaṭhorā||

छंद

भरे भुवन घोर कठोर रव रबि बाजि तजि मारगु चले। चिक्करहिं दिग्गज डोल महि अहि कोल कूरुम कलमले॥ सुर असुर मुनि कर कान दीन्हें सकल बिकल बिचारहीं। कोदंड खंडेड राम तुलसी जयति बचन उचारहीं॥

bhare bhuvana ghora kaṭhora rava rabi bāji taji māragu cale| cikkarahiṃ diggaja ḍola mahi ahi kola kūruma kalamale|| sura asura muni kara kāna dīnheṃ sakala bikala bicārahīṃ| kodaṃḍa khaṃḍeḍa rāma tulasī jayati bacana ucārahīṃ||

सोरठा २६१

संकर चापु जहाजु सागरु रघुबर बाहुबलु। बूड़ सो सकल समाजु चढ़ा जो प्रथमहिं मोह बस ॥ २६१॥

saṃkara cāpu jahāju sāgaru raghubara bāhubalu| būṛa so sakala samāju caṛhā jo prathamahiṃ moha basa || 261||

प्रभु दोउ चापखंड महि डारे। देखि लोग सब भए सुखारे॥ कोसिकरुप पयोनिधि पावन। प्रेम बारि अवगाहु सुहावन॥

prabhu dou cāpakhaṃḍa mahi ḍāre| dekhi loga saba bhae sukhāre|| kosikarupa payonidhi pāvana| prema bāri avagāhu suhāvana||

रामरूप राकेसु निहारी। बढ़त बीचि पुलकावलि भारी॥ बाजे नभ गहगहे निसाना। देवबधू नाचहिं करि गाना॥

rāmarūpa rākesu nihārī| baṛhata bīci pulakāvali bhārī|| bāje nabha gahagahe nisānā| devabadhū nācahiṃ kari gānā||

ब्रह्मादिक सुर सिद्ध मुनीसा। प्रभुहि प्रसंसहि देहिं असीसा॥ बरिसहिं सुमन रंग बहु माला। गावहिं किंनर गीत रसाला॥

brahmādika sura siddha munīsā| prabhuhi prasaṃsahi dehiṃ asīsā|| barisahiṃ sumana raṃga bahu mālā| gāvahiṃ kiṃnara gīta rasālā||

रही भुवन भरि जय जय बानी। धनुषभंग धुनि जात न जानी॥ मुदित कहहिं जहँ तहँ नर नारी। भंजेउ राम संभुधनु भारी॥

rahī bhuvana bhari jaya jaya bānī| dhanuṣabhaṃga dhuni jāta na jānī|| mudita kahahiṃ jaham̐ taham̐ nara nārī| bhaṃjeu rāma saṃbhudhanu bhārī||

दोहा २६२

बंदी मागध सूतगन बिरुद बदहिं मतिधीर। करहिं निछावरि लोग सब हय गय धन मनि चीर ॥ २६२॥

baṃdī māgadha sūtagana biruda badahiṃ matidhīra| karahiṃ nichāvari loga saba haya gaya dhana mani cīra || 262||

झाँझि मृदंग संख सहनाई। भेरि ढोल दुंदुभी सुहाई॥ बाजहिं बहु बाजने सुहाए। जहँ तहँ जुबतिन्ह मंगल गाए॥

jhām̐jhi mṛdaṃga saṃkha sahanāī| bheri ḍhola duṃdubhī suhāī|| bājahiṃ bahu bājane suhāe| jaham̐ taham̐ jubatinha maṃgala gāe||

सखिन्ह सहित हरषी अति रानी। सूखत धान परा जनु पानी॥ जनक लहेउ सुखु सोचु बिहाई। पैरत थकें थाह जनु पाई॥

sakhinha sahita haraṣī ati rānī| sūkhata dhāna parā janu pānī|| janaka laheu sukhu socu bihāī| pairata thakeṃ thāha janu pāī||

श्रीहत भए भूप धनु टूटे। जैसें दिवस दीप छबि छूटे॥ सीय सुखहि बरनिअ केहि भाँती। जनु चातकी पाइ जलु स्वाती॥

śrīhata bhae bhūpa dhanu ṭūṭe| jaiseṃ divasa dīpa chabi chūṭe|| sīya sukhahi barania kehi bhām̐tī| janu cātakī pāi jalu svātī||

रामहि लखनु बिलोकत कैसें। ससिहि चकोर किसोरकु जैसें॥ सतानंद तब आयसु दीन्हा। सीताँ गमनु राम पहिं कीन्हा॥

rāmahi lakhanu bilokata kaiseṃ| sasihi cakora kisoraku jaiseṃ|| satānaṃda taba āyasu dīnhā| sītām̐ gamanu rāma pahiṃ kīnhā||

दोहा २६३

संग सखीं सुदंर चतुर गावहिं मंगलचार। गवनी बाल मराल गति सुषमा अंग अपार॥ २६ ३

saṃga sakhīṃ sudaṃra catura gāvahiṃ maṃgalacāra| gavanī bāla marāla gati suṣamā aṃga apāra|| 26 3

सखिन्ह मध्य सिय सोहति कैसे। छबिगन मध्य महाछबि जैसें॥ कर सरोज जयमाल सुहाई। बिस्व बिजय सोभा जेहिं छाई॥

sakhinha madhya siya sohati kaise| chabigana madhya mahāchabi jaiseṃ|| kara saroja jayamāla suhāī| bisva bijaya sobhā jehiṃ chāī||

तन सकोचु मन परम उछाहू। गूढ़ प्रेमु लखि परइ न काहू॥ जाइ समीप राम छबि देखी। रहि जनु कुँअरि चित्र अवरेखी॥

tana sakocu mana parama uchāhū| gūṛha premu lakhi parai na kāhū|| jāi samīpa rāma chabi dekhī| rahi janu kum̐ari citra avarekhī||

चतुर सखीं लखि कहा बुझाई। पहिरावहु जयमाल सुहाई॥ सुनत जुगल कर माल उठाई। प्रेम बिबस पहिराइ न जाई॥

catura sakhīṃ lakhi kahā bujhāī| pahirāvahu jayamāla suhāī|| sunata jugala kara māla uṭhāī| prema bibasa pahirāi na jāī||

सोरठा ४

सोहत जनु जुग जलज सनाला। ससिहि सभीत देत जयमाला॥ गावहिं छबि अवलोकि सहेली। सियँ जयमाल राम उर मेली॥

sohata janu juga jalaja sanālā| sasihi sabhīta deta jayamālā|| gāvahiṃ chabi avaloki sahelī| siyam̐ jayamāla rāma ura melī||

सोरठा २६४

रघुबर उर जयमाल देखि देव बरिसहिं सुमन। सकुचे सकल भुआल जनु बिलोकि रबि कुमुदगन ॥ २६४॥

raghubara ura jayamāla dekhi deva barisahiṃ sumana| sakuce sakala bhuāla janu biloki rabi kumudagana || 264||

पुर अरु ब्योम बाजने बाजे। खल भए मलिन साधु सब राजे॥ सुर किंनर नर नाग मुनीसा। जय जय जय कहि देहिं असीसा॥

pura aru byoma bājane bāje| khala bhae malina sādhu saba rāje|| sura kiṃnara nara nāga munīsā| jaya jaya jaya kahi dehiṃ asīsā||

नाचहिं गावहिं बिबुध बधूटीं। बार बार कुसुमांजलि छूटीं॥ जहँ तहँ बिप्र बेदधुनि करहीं। बंदी बिरदावलि उच्चरहीं॥

nācahiṃ gāvahiṃ bibudha badhūṭīṃ| bāra bāra kusumāṃjali chūṭīṃ|| jaham̐ taham̐ bipra bedadhuni karahīṃ| baṃdī biradāvali uccarahīṃ||

महि पाताल नाक जसु ब्यापा। राम बरी सिय भंजेउ चापा॥

mahi pātāla nāka jasu byāpā| rāma barī siya bhaṃjeu cāpā||

सोरठा ४

सोहति सीय राम कै जौरी। छबि सिंगारु मनहुँ एक ठोरी॥ सखीं कहहिं प्रभुपद गहु सीता। करति न चरन परस अति भीता॥

sohati sīya rāma kai jaurī| chabi siṃgāru manahum̐ eka ṭhorī|| sakhīṃ kahahiṃ prabhupada gahu sītā| karati na carana parasa ati bhītā||

दोहा २६५

गौतम तिय गति सुरति करि नहिं परसति पग पानि। मन बिहसे रघुबंसमनि प्रीति अलौकिक जानि ॥ २६५॥

gautama tiya gati surati kari nahiṃ parasati paga pāni| mana bihase raghubaṃsamani prīti alaukika jāni || 265||

तब सिय देखि भूप अभिलाषे। कूर कपूत मूढ़ मन माखे॥ उठि उठि पहिरि सनाह अभागे। जहँ तहँ गाल बजावन लागे॥

taba siya dekhi bhūpa abhilāṣe| kūra kapūta mūṛha mana mākhe|| uṭhi uṭhi pahiri sanāha abhāge| jaham̐ taham̐ gāla bajāvana lāge||

लेहु छड़ाइ सीय कह कोऊ। धरि बाँधहु नृप बालक दोऊ॥ तोरें धनुषु चाड़ नहिं सरई। जीवत हमहि कुअँरि को बरई॥

lehu chaṛāi sīya kaha koū| dhari bām̐dhahu nṛpa bālaka doū|| toreṃ dhanuṣu cāṛa nahiṃ saraī| jīvata hamahi kuam̐ri ko baraī||

जौं बिदेहु कछु करै सहाई। जीतहु समर सहित दोउ भाई॥ साधु भूप बोले सुनि बानी। राजसमाजहि लाज लजानी॥

jauṃ bidehu kachu karai sahāī| jītahu samara sahita dou bhāī|| sādhu bhūpa bole suni bānī| rājasamājahi lāja lajānī||

बलु प्रतापु बीरता बड़ाई। नाक पिनाकहि संग सिधाई॥

balu pratāpu bīratā baṛāī| nāka pinākahi saṃga sidhāī||

सोरठा ४

सोइ सूरता कि अब कहुँ पाई। असि बुधि तौ बिधि मुहँ मसि लाई॥

soi sūratā ki aba kahum̐ pāī| asi budhi tau bidhi muham̐ masi lāī||