अयोध्याकाण्ड

अयोध्याकाण्ड · दोहा २७७–२९३

विभज्यताम्

जासु ग्यानु रबि भव निसि नासा। बचन किरन मुनि कमल बिकासा॥ तेहि कि मोह ममता निअराई। यह सिय राम सनेह बड़ाई॥

jāsu gyānu rabi bhava nisi nāsā| bacana kirana muni kamala bikāsā|| tehi ki moha mamatā niarāī| yaha siya rāma saneha baṛāī||

बिषई साधक सिद्ध सयाने। त्रिबिध जीव जग बेद बखाने॥ राम सनेह सरस मन जासू। साधु सभाँ बड़ आदर तासू

biṣaī sādhaka siddha sayāne| tribidha jīva jaga beda bakhāne|| rāma saneha sarasa mana jāsū| sādhu sabhām̐ baṛa ādara tāsū

सोरठा ३

सोह न राम पेम बिनु ग्यानू। करनधार बिनु जिमि जलजानू॥ मुनि बहुबिधि बिदेहु समुझाए। रामघाट सब लोग नहाए॥

soha na rāma pema binu gyānū| karanadhāra binu jimi jalajānū|| muni bahubidhi bidehu samujhāe| rāmaghāṭa saba loga nahāe||

सकल सोक संकुल नर नारी। सो बासरु बीतेउ बिनु बारी॥ पसु खग मृगन्ह न कीन्ह अहारू। प्रिय परिजन कर कौन बिचारू॥

sakala soka saṃkula nara nārī| so bāsaru bīteu binu bārī|| pasu khaga mṛganha na kīnha ahārū| priya parijana kara kauna bicārū||

दोहा २७७

दोउ समाज निमिराजु रघुराजु नहाने प्रात। बैठे सब बट बिटप तर मन मलीन कृस गात ॥ २७७॥

dou samāja nimirāju raghurāju nahāne prāta| baiṭhe saba baṭa biṭapa tara mana malīna kṛsa gāta || 277||

जे महिसुर दसरथ पुर बासी। जे मिथिलापति नगर निवासी॥ हंस बंस गुर जनक पुरोधा। जिन्ह जग मगु परमारथु सोधा॥

je mahisura dasaratha pura bāsī| je mithilāpati nagara nivāsī|| haṃsa baṃsa gura janaka purodhā| jinha jaga magu paramārathu sodhā||

लगे कहन उपदेस अनेका। सहित धरम नय बिरति बिबेका॥ कौसिक कहि कहि कथा पुरानीं। समुझाई सब सभा सुबानीं॥

lage kahana upadesa anekā| sahita dharama naya birati bibekā|| kausika kahi kahi kathā purānīṃ| samujhāī saba sabhā subānīṃ||

तब रघुनाथ कोसिकहि कहेऊ। नाथ कालि जल बिनु सबु रहेऊ॥ मुनि कह उचित कहत रघुराई। गयउ बीति दिन पहर अढ़ाई॥

taba raghunātha kosikahi kaheū| nātha kāli jala binu sabu raheū|| muni kaha ucita kahata raghurāī| gayau bīti dina pahara aṛhāī||

रिषि रुख लखि कह तेरहुतिराजू। इहाँ उचित नहिं असन अनाजू॥ कहा भूप भल सबहि सोहाना। पाइ रजायसु चले नहाना॥

riṣi rukha lakhi kaha terahutirājū| ihām̐ ucita nahiṃ asana anājū|| kahā bhūpa bhala sabahi sohānā| pāi rajāyasu cale nahānā||

दोहा २७८

तेहि अवसर फल फूल दल मूल अनेक प्रकार। लइ आए बनचर बिपुल भरि भरि काँवरि भार ॥ २७८॥

tehi avasara phala phūla dala mūla aneka prakāra| lai āe banacara bipula bhari bhari kām̐vari bhāra || 278||

कामद मे गिरि राम प्रसादा। अवलोकत अपहरत बिषादा॥ सर सरिता बन भूमि बिभागा। जनु उमगत आनँद अनुरागा॥

kāmada me giri rāma prasādā| avalokata apaharata biṣādā|| sara saritā bana bhūmi bibhāgā| janu umagata ānam̐da anurāgā||

बेलि बिटप सब सफल सफूला। बोलत खग मृग अलि अनुकूला॥ तेहि अवसर बन अधिक उछाहू। त्रिबिध समीर सुखद सब काहू॥

beli biṭapa saba saphala saphūlā| bolata khaga mṛga ali anukūlā|| tehi avasara bana adhika uchāhū| tribidha samīra sukhada saba kāhū||

जाइ न बरनि मनोहरताई। जनु महि करति जनक पहुनाई॥ तब सब लोग नहाइ नहाई। राम जनक मुनि आयसु पाई॥ देखि देखि तरुबर अनुरागे। जहँ तहँ पुरजन उतरन लागे॥ दल फल मूल कंद बिधि नाना। पावन सुंदर सुधा समाना॥

jāi na barani manoharatāī| janu mahi karati janaka pahunāī|| taba saba loga nahāi nahāī| rāma janaka muni āyasu pāī|| dekhi dekhi tarubara anurāge| jaham̐ taham̐ purajana utarana lāge|| dala phala mūla kaṃda bidhi nānā| pāvana suṃdara sudhā samānā||

दोहा २७९

सादर सब कहँ रामगुर पठए भरि भरि भार। पूजि पितर सुर अतिथि गुर लगे करन फरहार ॥ २७९॥

sādara saba kaham̐ rāmagura paṭhae bhari bhari bhāra| pūji pitara sura atithi gura lage karana pharahāra || 279||

एहि बिधि बासर बीते चारी। रामु निरखि नर नारि सुखारी॥ दुहु समाज असि रुचि मन माहीं। बिनु सिय राम फिरब भल नाहीं॥

ehi bidhi bāsara bīte cārī| rāmu nirakhi nara nāri sukhārī|| duhu samāja asi ruci mana māhīṃ| binu siya rāma phiraba bhala nāhīṃ||

सीता राम संग बनबासू। कोटि अमरपुर सरिस सुपासू॥ परिहरि लखन रामु बैदेही। जेहि घरु भाव बाम बिधि तेही॥

sītā rāma saṃga banabāsū| koṭi amarapura sarisa supāsū|| parihari lakhana rāmu baidehī| jehi gharu bhāva bāma bidhi tehī||

दाहिन दइउ होइ जब सबही। राम समीप बसिअ बन तबही॥ मंदाकिनि मज्जनु तिहु काला। राम दरसु मुद मंगल माला॥

dāhina daiu hoi jaba sabahī| rāma samīpa basia bana tabahī|| maṃdākini majjanu tihu kālā| rāma darasu muda maṃgala mālā||

अटनु राम गिरि बन तापस थल। असनु अमिअ सम कंद मूल फल॥ सुख समेत संबत दुइ साता। पल सम होहिं न जनिअहिं जाता॥

aṭanu rāma giri bana tāpasa thala| asanu amia sama kaṃda mūla phala|| sukha sameta saṃbata dui sātā| pala sama hohiṃ na janiahiṃ jātā||

दोहा २८०

एहि सुख जोग न लोग सब कहहिं कहाँ अस भागु। सहज सुभायँ समाज दुहु राम चरन अनुरागु ॥ २८०॥

ehi sukha joga na loga saba kahahiṃ kahām̐ asa bhāgu| sahaja subhāyam̐ samāja duhu rāma carana anurāgu || 280||

एहि बिधि सकल मनोरथ करहीं। बचन सप्रेम सुनत मन हरहीं॥ सीय मातु तेहि समय पठाईं। दासीं देखि सुअवसरु आईं॥

ehi bidhi sakala manoratha karahīṃ| bacana saprema sunata mana harahīṃ|| sīya mātu tehi samaya paṭhāīṃ| dāsīṃ dekhi suavasaru āīṃ||

सावकास सुनि सब सिय सासू। आयउ जनकराज रनिवासू॥ कौसल्याँ सादर सनमानी। आसन दिए समय सम आनी॥

sāvakāsa suni saba siya sāsū| āyau janakarāja ranivāsū|| kausalyām̐ sādara sanamānī| āsana die samaya sama ānī||

सीलु सनेह सकल दुहु ओरा। द्रवहिं देखि सुनि कुलिस कठोरा॥ पुलक सिथिल तन बारि बिलोचन। महि नख लिखन लगीं सब सोचन॥

sīlu saneha sakala duhu orā| dravahiṃ dekhi suni kulisa kaṭhorā|| pulaka sithila tana bāri bilocana| mahi nakha likhana lagīṃ saba socana||

सब सिय राम प्रीति कि सि मूरती। जनु करुना बहु बेष बिसूरति॥ सीय मातु कह बिधि बुधि बाँकी। जो पय फेनु फोर पबि टाँकी॥

saba siya rāma prīti ki si mūratī| janu karunā bahu beṣa bisūrati|| sīya mātu kaha bidhi budhi bām̐kī| jo paya phenu phora pabi ṭām̐kī||

दोहा २८१

सुनिअ सुधा देखिअहिं गरल सब करतूति कराल। जहँ तहँ काक उलूक बक मानस सकृत मराल ॥ २८१॥

sunia sudhā dekhiahiṃ garala saba karatūti karāla| jaham̐ taham̐ kāka ulūka baka mānasa sakṛta marāla || 281||

सुनि ससोच कह देबि सुमित्रा। बिधि गति बड़ि बिपरीत बिचित्रा॥ जो सृजि पालइ हरइ बहोरी। बाल केलि सम बिधि मति भोरी॥

suni sasoca kaha debi sumitrā| bidhi gati baṛi biparīta bicitrā|| jo sṛji pālai harai bahorī| bāla keli sama bidhi mati bhorī||

कौसल्या कह दोसु न काहू। करम बिबस दुख सुख छति लाहू॥ कठिन करम गति जान बिधाता। जो सुभ असुभ सकल फल दाता॥

kausalyā kaha dosu na kāhū| karama bibasa dukha sukha chati lāhū|| kaṭhina karama gati jāna bidhātā| jo subha asubha sakala phala dātā||

ईस रजाइ सीस सबही कें। उतपति थिति लय बिषहु अमी कें॥ देबि मोह बस सोचिअ बादी। बिधि प्रपंचु अस अचल अनादी॥

īsa rajāi sīsa sabahī keṃ| utapati thiti laya biṣahu amī keṃ|| debi moha basa socia bādī| bidhi prapaṃcu asa acala anādī||

भूपति जिअब मरब उर आनी। सोचिअ सखि लखि निज हित हानी॥ सीय मातु कह सत्य सुबानी। सुकृती अवधि अवधपति रानी॥

bhūpati jiaba maraba ura ānī| socia sakhi lakhi nija hita hānī|| sīya mātu kaha satya subānī| sukṛtī avadhi avadhapati rānī||

दोहा २८२

लखनु राम सिय जाहुँ बन भल परिनाम न पोचु। गहबरि हियँ कह कौसिला मोहि भरत कर सोचु ॥ २८२॥

lakhanu rāma siya jāhum̐ bana bhala parināma na pocu| gahabari hiyam̐ kaha kausilā mohi bharata kara socu || 282||

ईस प्रसाद असीस तुम्हारी। सुत सुतबधू देवसरि बारी॥ राम सपथ मैं कीन्ह न काऊ। सो करि कहउँ सखी सति भाऊ॥

īsa prasāda asīsa tumhārī| suta sutabadhū devasari bārī|| rāma sapatha maiṃ kīnha na kāū| so kari kahaum̐ sakhī sati bhāū||

भरत सील गुन बिनय बड़ाई। भायप भगति भरोस भलाई॥ कहत सारदहु कर मति हीचे। सागर सीप कि जाहिं उलीचे॥

bharata sīla guna binaya baṛāī| bhāyapa bhagati bharosa bhalāī|| kahata sāradahu kara mati hīce| sāgara sīpa ki jāhiṃ ulīce||

जानउँ सदा भरत कुलदीपा। बार बार मोहि कहेउ महीपा॥ कसें कनकु मनि पारिखि पाएँ। पुरुष परिखिअहिं समयँ सुभाएँ॥

jānaum̐ sadā bharata kuladīpā| bāra bāra mohi kaheu mahīpā|| kaseṃ kanaku mani pārikhi pāem̐| puruṣa parikhiahiṃ samayam̐ subhāem̐||

अनुचित आजु कहब अस मोरा। सोक सनेहँ सयानप थोरा॥ सुनि सुरसरि सम पावनि बानी। भईं सनेह बिकल सब रानी॥

anucita āju kahaba asa morā| soka saneham̐ sayānapa thorā|| suni surasari sama pāvani bānī| bhaīṃ saneha bikala saba rānī||

दोहा २८३

कौसल्या कह धीर धरि सुनहु देबि मिथिलेसि। को बिबेकनिधि बल्लभहि तुम्हहि सकइ उपदेसि ॥ २८३॥

kausalyā kaha dhīra dhari sunahu debi mithilesi| ko bibekanidhi ballabhahi tumhahi sakai upadesi || 283||

रानि राय सन अवसरु पाई। अपनी भाँति कहब समुझाई॥ रखिअहिं लखनु भरतु गबनहिं बन। जौं यह मत मानै महीप मन॥

rāni rāya sana avasaru pāī| apanī bhām̐ti kahaba samujhāī|| rakhiahiṃ lakhanu bharatu gabanahiṃ bana| jauṃ yaha mata mānai mahīpa mana||

तौ भल जतनु करब सुबिचारी। मोरें सौचु भरत कर भारी॥ गूढ़ सनेह भरत मन माही। रहें नीक मोहि लागत नाहीं॥

tau bhala jatanu karaba subicārī| moreṃ saucu bharata kara bhārī|| gūṛha saneha bharata mana māhī| raheṃ nīka mohi lāgata nāhīṃ||

लखि सुभाउ सुनि सरल सुबानी। सब भइ मगन करुन रस रानी॥ नभ प्रसून झरि धन्य धन्य धुनि। सिथिल सनेहँ सिद्ध जोगी मुनि॥

lakhi subhāu suni sarala subānī| saba bhai magana karuna rasa rānī|| nabha prasūna jhari dhanya dhanya dhuni| sithila saneham̐ siddha jogī muni||

सबु रनिवासु बिथकि लखि रहेऊ। तब धरि धीर सुमित्राँ कहेऊ॥ देबि दंड जुग जामिनि बीती। राम मातु सुनी उठी सप्रीती॥

sabu ranivāsu bithaki lakhi raheū| taba dhari dhīra sumitrām̐ kaheū|| debi daṃḍa juga jāmini bītī| rāma mātu sunī uṭhī saprītī||

दोहा २८४

बेगि पाउ धारिअ थलहि कह सनेहँ सतिभाय। हमरें तौ अब ईस गति के मिथिलेस सहाय ॥ २८४॥

begi pāu dhāria thalahi kaha saneham̐ satibhāya| hamareṃ tau aba īsa gati ke mithilesa sahāya || 284||

लखि सनेह सुनि बचन बिनीता। जनकप्रिया गह पाय पुनीता॥ देबि उचित असि बिनय तुम्हारी। दसरथ घरिनि राम महतारी॥

lakhi saneha suni bacana binītā| janakapriyā gaha pāya punītā|| debi ucita asi binaya tumhārī| dasaratha gharini rāma mahatārī||

प्रभु अपने नीचहु आदरहीं। अगिनि धूम गिरि सिर तिनु धरहीं॥ सेवकु राउ करम मन बानी। सदा सहाय महेसु भवानी॥

prabhu apane nīcahu ādarahīṃ| agini dhūma giri sira tinu dharahīṃ|| sevaku rāu karama mana bānī| sadā sahāya mahesu bhavānī||

रउरे अंग जोगु जग को है। दीप सहाय कि दिनकर सोहै॥ रामु जाइ बनु करि सुर काजू। अचल अवधपुर करिहहिं राजू॥

raure aṃga jogu jaga ko hai| dīpa sahāya ki dinakara sohai|| rāmu jāi banu kari sura kājū| acala avadhapura karihahiṃ rājū||

अमर नाग नर राम बाहुबल। सुख बसिहहिं अपनें अपने थल॥ यह सब जागबलिक कहि राखा। देबि न होइ मुधा मुनि भाषा॥

amara nāga nara rāma bāhubala| sukha basihahiṃ apaneṃ apane thala|| yaha saba jāgabalika kahi rākhā| debi na hoi mudhā muni bhāṣā||

दोहा २८५

अस कहि पग परि पेम अति सिय हित बिनय सुनाइ। सिय समेत सियमातु तब चली सुआयसु पाइ ॥ २८५॥

asa kahi paga pari pema ati siya hita binaya sunāi| siya sameta siyamātu taba calī suāyasu pāi || 285||

प्रिय परिजनहि मिली बैदेही। जो जेहि जोगु भाँति तेहि तेही॥ तापस बेष जानकी देखी। भा सबु बिकल बिषाद बिसेषी॥

priya parijanahi milī baidehī| jo jehi jogu bhām̐ti tehi tehī|| tāpasa beṣa jānakī dekhī| bhā sabu bikala biṣāda biseṣī||

जनक राम गुर आयसु पाई। चले थलहि सिय देखी आई॥ लीन्हि लाइ उर जनक जानकी। पाहुन पावन पेम प्रान की॥

janaka rāma gura āyasu pāī| cale thalahi siya dekhī āī|| līnhi lāi ura janaka jānakī| pāhuna pāvana pema prāna kī||

उर उमगेउ अंबुधि अनुरागू। भयउ भूप मनु मनहुँ पयागू॥ सिय सनेह बटु बाढ़त जोहा। ता पर राम पेम सिसु सोहा॥

ura umageu aṃbudhi anurāgū| bhayau bhūpa manu manahum̐ payāgū|| siya saneha baṭu bāṛhata johā| tā para rāma pema sisu sohā||

चिरजीवी मुनि ग्यान बिकल जनु। बूड़त लहेउ बाल अवलंबनु॥ मोह मगन मति नहिं बिदेह की। महिमा सिय रघुबर सनेह की॥

cirajīvī muni gyāna bikala janu| būṛata laheu bāla avalaṃbanu|| moha magana mati nahiṃ bideha kī| mahimā siya raghubara saneha kī||

दोहा २८६

सिय पितु मातु सनेह बस बिकल न सकी सँभारि। धरनिसुताँ धीरजु धरेउ समउ सुधरमु बिचारि ॥ २८६॥

siya pitu mātu saneha basa bikala na sakī sam̐bhāri| dharanisutām̐ dhīraju dhareu samau sudharamu bicāri || 286||

तापस बेष जनक सिय देखी। भयउ पेमु परितोषु बिसेषी॥ पुत्रि पवित्र किए कुल दोऊ। सुजस धवल जगु कह सबु कोऊ॥

tāpasa beṣa janaka siya dekhī| bhayau pemu paritoṣu biseṣī|| putri pavitra kie kula doū| sujasa dhavala jagu kaha sabu koū||

जिति सुरसरि कीरति सरि तोरी। गवनु कीन्ह बिधि अंड करोरी॥ गंग अवनि थल तीनि बड़ेरे। एहिं किए साधु समाज घनेरे॥

jiti surasari kīrati sari torī| gavanu kīnha bidhi aṃḍa karorī|| gaṃga avani thala tīni baṛere| ehiṃ kie sādhu samāja ghanere||

पितु कह सत्य सनेहँ सुबानी। सीय सकुच महुँ मनहुँ समानी॥ पुनि पितु मातु लीन्ह उर लाई। सिख आसिष हित दीन्हि सुहाई॥

pitu kaha satya saneham̐ subānī| sīya sakuca mahum̐ manahum̐ samānī|| puni pitu mātu līnha ura lāī| sikha āsiṣa hita dīnhi suhāī||

कहति न सीय सकुचि मन माहीं। इहाँ बसब रजनीं भल नाहीं॥ लखि रुख रानि जनायउ राऊ। हृदयँ सराहत सीलु सुभाऊ॥

kahati na sīya sakuci mana māhīṃ| ihām̐ basaba rajanīṃ bhala nāhīṃ|| lakhi rukha rāni janāyau rāū| hṛdayam̐ sarāhata sīlu subhāū||

दोहा २८७

बार बार मिलि भेंट सिय बिदा कीन्ह सनमानि। कही समय सिर भरत गति रानि सुबानि सयानि ॥ २८७॥

bāra bāra mili bheṃṭa siya bidā kīnha sanamāni| kahī samaya sira bharata gati rāni subāni sayāni || 287||

सुनि भूपाल भरत ब्यवहारू। सोन सुगंध सुधा ससि सारू॥ मूदे सजल नयन पुलके तन। सुजसु सराहन लगे मुदित मन॥

suni bhūpāla bharata byavahārū| sona sugaṃdha sudhā sasi sārū|| mūde sajala nayana pulake tana| sujasu sarāhana lage mudita mana||

सावधान सुनु सुमुखि सुलोचनि। भरत कथा भव बंध बिमोचनि॥ धरम राजनय ब्रह्मबिचारू। इहाँ जथामति मोर प्रचारू॥

sāvadhāna sunu sumukhi sulocani| bharata kathā bhava baṃdha bimocani|| dharama rājanaya brahmabicārū| ihām̐ jathāmati mora pracārū||

सोरठा ३

सो मति मोरि भरत महिमाही। कहै काह छलि छुअति न छाँही॥ बिधि गनपति अहिपति सिव सारद। कबि कोबिद बुध बुद्धि बिसारद॥

so mati mori bharata mahimāhī| kahai kāha chali chuati na chām̐hī|| bidhi ganapati ahipati siva sārada| kabi kobida budha buddhi bisārada||

भरत चरित कीरति करतूती। धरम सील गुन बिमल बिभूती॥ समुझत सुनत सुखद सब काहू। सुचि सुरसरि रुचि निदर सुधाहू॥

bharata carita kīrati karatūtī| dharama sīla guna bimala bibhūtī|| samujhata sunata sukhada saba kāhū| suci surasari ruci nidara sudhāhū||

दोहा २८८

निरवधि गुन निरुपम पुरुषु भरतु भरत सम जानि। कहिअ सुमेरु कि सेर सम कबिकुल मति सकुचानि ॥ २८८॥

niravadhi guna nirupama puruṣu bharatu bharata sama jāni| kahia sumeru ki sera sama kabikula mati sakucāni || 288||

अगम सबहि बरनत बरबरनी। जिमि जलहीन मीन गमु धरनी॥ भरत अमित महिमा सुनु रानी। जानहिं रामु न सकहिं बखानी॥

agama sabahi baranata barabaranī| jimi jalahīna mīna gamu dharanī|| bharata amita mahimā sunu rānī| jānahiṃ rāmu na sakahiṃ bakhānī||

बरनि सप्रेम भरत अनुभाऊ। तिय जिय की रुचि लखि कह राऊ॥ बहुरहिं लखनु भरतु बन जाहीं। सब कर भल सब के मन माहीं॥

barani saprema bharata anubhāū| tiya jiya kī ruci lakhi kaha rāū|| bahurahiṃ lakhanu bharatu bana jāhīṃ| saba kara bhala saba ke mana māhīṃ||

देबि परंतु भरत रघुबर की। प्रीति प्रतीति जाइ नहिं तरकी॥ भरतु अवधि सनेह ममता की। जद्यपि रामु सीम समता की॥

debi paraṃtu bharata raghubara kī| prīti pratīti jāi nahiṃ tarakī|| bharatu avadhi saneha mamatā kī| jadyapi rāmu sīma samatā kī||

परमारथ स्वारथ सुख सारे। भरत न सपनेहुँ मनहुँ निहारे॥ साधन सिद्ध राम पग नेहू। मोहि लखि परत भरत मत एहू॥

paramāratha svāratha sukha sāre| bharata na sapanehum̐ manahum̐ nihāre|| sādhana siddha rāma paga nehū| mohi lakhi parata bharata mata ehū||

दोहा २८९

भोरेहुँ भरत न पेलिहहिं मनसहुँ राम रजाइ। करिअ न सोचु सनेह बस कहेउ भूप बिलखाइ ॥ २८९॥

bhorehum̐ bharata na pelihahiṃ manasahum̐ rāma rajāi| karia na socu saneha basa kaheu bhūpa bilakhāi || 289||

राम भरत गुन गनत सप्रीती। निसि दंपतिहि पलक सम बीती॥ राज समाज प्रात जुग जागे। न्हाइ न्हाइ सुर पूजन लागे॥

rāma bharata guna ganata saprītī| nisi daṃpatihi palaka sama bītī|| rāja samāja prāta juga jāge| nhāi nhāi sura pūjana lāge||

गे नहाइ गुर पहीं रघुराई। बंदि चरन बोले रुख पाई॥ नाथ भरतु पुरजन महतारी। सोक बिकल बनबास दुखारी॥

ge nahāi gura pahīṃ raghurāī| baṃdi carana bole rukha pāī|| nātha bharatu purajana mahatārī| soka bikala banabāsa dukhārī||

सहित समाज राउ मिथिलेसू। बहुत दिवस भए सहत कलेसू॥ उचित होइ सोइ कीजिअ नाथा। हित सबही कर रौरें हाथा॥

sahita samāja rāu mithilesū| bahuta divasa bhae sahata kalesū|| ucita hoi soi kījia nāthā| hita sabahī kara raureṃ hāthā||

अस कहि अति सकुचे रघुराऊ। मुनि पुलके लखि सीलु सुभाऊ॥ तुम्ह बिनु राम सकल सुख साजा। नरक सरिस दुहु राज समाजा॥

asa kahi ati sakuce raghurāū| muni pulake lakhi sīlu subhāū|| tumha binu rāma sakala sukha sājā| naraka sarisa duhu rāja samājā||

दोहा २९०

प्रान प्रान के जीव के जिव सुख के सुख राम। तुम्ह तजि तात सोहात गृह जिन्हहि तिन्हहिं बिधि बाम ॥ २९०॥

prāna prāna ke jīva ke jiva sukha ke sukha rāma| tumha taji tāta sohāta gṛha jinhahi tinhahiṃ bidhi bāma || 290||

सोरठा १

सो सुखु करमु धरमु जरि जाऊ। जहँ न राम पद पंकज भाऊ॥ जोगु कुजोगु ग्यानु अग्यानू। जहँ नहिं राम पेम परधानू॥

so sukhu karamu dharamu jari jāū| jaham̐ na rāma pada paṃkaja bhāū|| jogu kujogu gyānu agyānū| jaham̐ nahiṃ rāma pema paradhānū||

तुम्ह बिनु दुखी सुखी तुम्ह तेहीं। तुम्ह जानहु जिय जो जेहि केहीं॥ राउर आयसु सिर सबही कें। बिदित कृपालहि गति सब नीकें॥

tumha binu dukhī sukhī tumha tehīṃ| tumha jānahu jiya jo jehi kehīṃ|| rāura āyasu sira sabahī keṃ| bidita kṛpālahi gati saba nīkeṃ||

आपु आश्रमहि धारिअ पाऊ। भयउ सनेह सिथिल मुनिराऊ॥ करि प्रनाम तब रामु सिधाए। रिषि धरि धीर जनक पहिं आए॥

āpu āśramahi dhāria pāū| bhayau saneha sithila munirāū|| kari pranāma taba rāmu sidhāe| riṣi dhari dhīra janaka pahiṃ āe||

राम बचन गुरु नृपहि सुनाए। सील सनेह सुभायँ सुहाए॥ महाराज अब कीजिअ सोई। सब कर धरम सहित हित होई॥

rāma bacana guru nṛpahi sunāe| sīla saneha subhāyam̐ suhāe|| mahārāja aba kījia soī| saba kara dharama sahita hita hoī||

दोहा २९१

ग्यान निधान सुजान सुचि धरम धीर नरपाल। तुम्ह बिनु असमंजस समन को समरथ एहि काल ॥ २९१॥

gyāna nidhāna sujāna suci dharama dhīra narapāla| tumha binu asamaṃjasa samana ko samaratha ehi kāla || 291||

सुनि मुनि बचन जनक अनुरागे। लखि गति ग्यानु बिरागु बिरागे॥ सिथिल सनेहँ गुनत मन माहीं। आए इहाँ कीन्ह भल नाही॥

suni muni bacana janaka anurāge| lakhi gati gyānu birāgu birāge|| sithila saneham̐ gunata mana māhīṃ| āe ihām̐ kīnha bhala nāhī||

रामहि रायँ कहेउ बन जाना। कीन्ह आपु प्रिय प्रेम प्रवाना॥ हम अब बन तें बनहि पठाई। प्रमुदित फिरब बिबेक बड़ाई॥

rāmahi rāyam̐ kaheu bana jānā| kīnha āpu priya prema pravānā|| hama aba bana teṃ banahi paṭhāī| pramudita phiraba bibeka baṛāī||

तापस मुनि महिसुर सुनि देखी। भए प्रेम बस बिकल बिसेषी॥ समउ समुझि धरि धीरजु राजा। चले भरत पहिं सहित समाजा॥

tāpasa muni mahisura suni dekhī| bhae prema basa bikala biseṣī|| samau samujhi dhari dhīraju rājā| cale bharata pahiṃ sahita samājā||

भरत आइ आगें भइ लीन्हे। अवसर सरिस सुआसन दीन्हे॥ तात भरत कह तेरहुति राऊ। तुम्हहि बिदित रघुबीर सुभाऊ॥

bharata āi āgeṃ bhai līnhe| avasara sarisa suāsana dīnhe|| tāta bharata kaha terahuti rāū| tumhahi bidita raghubīra subhāū||

दोहा २९२

राम सत्यब्रत धरम रत सब कर सीलु सनेहु। संकट सहत सकोच बस कहिअ जो आयसु देहु ॥ २९२॥

rāma satyabrata dharama rata saba kara sīlu sanehu| saṃkaṭa sahata sakoca basa kahia jo āyasu dehu || 292||

सुनि तन पुलकि नयन भरि बारी। बोले भरतु धीर धरि भारी॥ प्रभु प्रिय पूज्य पिता सम आपू। कुलगुरु सम हित माय न बापू॥

suni tana pulaki nayana bhari bārī| bole bharatu dhīra dhari bhārī|| prabhu priya pūjya pitā sama āpū| kulaguru sama hita māya na bāpū||

कौसिकादि मुनि सचिव समाजू। ग्यान अंबुनिधि आपुनु आजू॥ सिसु सेवक आयसु अनुगामी। जानि मोहि सिख देइअ स्वामी॥

kausikādi muni saciva samājū| gyāna aṃbunidhi āpunu ājū|| sisu sevaka āyasu anugāmī| jāni mohi sikha deia svāmī||

एहिं समाज थल बूझब राउर। मौन मलिन मैं बोलब बाउर॥ छोटे बदन कहउँ बड़ि बाता। छमब तात लखि बाम बिधाता॥

ehiṃ samāja thala būjhaba rāura| mauna malina maiṃ bolaba bāura|| choṭe badana kahaum̐ baṛi bātā| chamaba tāta lakhi bāma bidhātā||

आगम निगम प्रसिद्ध पुराना। सेवाधरमु कठिन जगु जाना॥ स्वामि धरम स्वारथहि बिरोधू। बैरु अंध प्रेमहि न प्रबोधू॥

āgama nigama prasiddha purānā| sevādharamu kaṭhina jagu jānā|| svāmi dharama svārathahi birodhū| bairu aṃdha premahi na prabodhū||

दोहा २९३

राखि राम रुख धरमु ब्रतु पराधीन मोहि जानि। सब कें संमत सर्ब हित करिअ पेमु पहिचानि ॥ २९३॥

rākhi rāma rukha dharamu bratu parādhīna mohi jāni| saba keṃ saṃmata sarba hita karia pemu pahicāni || 293||