Uttar Kand — उत्तरकाण्ड

उत्तरकाण्ड · दोहा १९(क)–३५

साझा करें

भरत अनुज सौमित्र समेता। पठवन चले भगत कृत चेता॥ अंगद हृदयँ प्रेम नहिं थोरा। फिरि फिरि चितव राम कीं ओरा॥

bharata anuja saumitra sametā| paṭhavana cale bhagata kṛta cetā|| aṃgada hṛdayam̐ prema nahiṃ thorā| phiri phiri citava rāma kīṃ orā||

बार बार कर दंड प्रनामा। मन अस रहन कहहिं मोहि रामा॥ राम बिलोकनि बोलनि चलनी। सुमिरि सुमिरि सोचत हँसि मिलनी॥

bāra bāra kara daṃḍa pranāmā| mana asa rahana kahahiṃ mohi rāmā|| rāma bilokani bolani calanī| sumiri sumiri socata ham̐si milanī||

प्रभु रुख देखि बिनय बहु भाषी। चलेउ हृदयँ पद पंकज राखी॥ अति आदर सब कपि पहुँचाए। भाइन्ह सहित भरत पुनि आए॥

prabhu rukha dekhi binaya bahu bhāṣī| caleu hṛdayam̐ pada paṃkaja rākhī|| ati ādara saba kapi pahum̐cāe| bhāinha sahita bharata puni āe||

तब सुग्रीव चरन गहि नाना। भाँति बिनय कीन्हे हनुमाना॥ दिन दस करि रघुपति पद सेवा। पुनि तव चरन देखिहउँ देवा॥

taba sugrīva carana gahi nānā| bhām̐ti binaya kīnhe hanumānā|| dina dasa kari raghupati pada sevā| puni tava carana dekhihaum̐ devā||

पुन्य पुंज तुम्ह पवनकुमारा। सेवहु जाइ कृपा आगारा॥ अस कहि कपि सब चले तुरंता। अंगद कहइ सुनहु हनुमंता॥

punya puṃja tumha pavanakumārā| sevahu jāi kṛpā āgārā|| asa kahi kapi saba cale turaṃtā| aṃgada kahai sunahu hanumaṃtā||

दोहा १९(क)

कहेह दंडवत प्रभु सें तुम्हहि कहउँ कर जोरि। बार बार रघुनायकहि सुरति कराएहु मोरि ॥ १९ (क)॥

kaheha daṃḍavata prabhu seṃ tumhahi kahaum̐ kara jori| bāra bāra raghunāyakahi surati karāehu mori || 19 (ka)||

अस कहि चलेउ बालिसुत फिरि आयउ हनुमंत। तासु प्रीति प्रभु सन कही मगन भए भगवंत॥ १९ (ख )॥

asa kahi caleu bālisuta phiri āyau hanumaṃta| tāsu prīti prabhu sana kahī magana bhae bhagavaṃta|| 19 (kha )||

दोहा १९(ग)

कुलिसहु चाहि कठोर अति कोमल कुसुमहु चाहि। चित्त खगेस राम कर समुझि परइ कहु काहि ॥ १९ (ग)॥

kulisahu cāhi kaṭhora ati komala kusumahu cāhi| citta khagesa rāma kara samujhi parai kahu kāhi || 19 (ga)||

पुनि कृपाल लियो बोलि निषादा। दीन्हे भूषन बसन प्रसादा॥ जाहु भवन मम सुमिरन करेहू। मन क्रम बचन धर्म अनुसरेहू॥

puni kṛpāla liyo boli niṣādā| dīnhe bhūṣana basana prasādā|| jāhu bhavana mama sumirana karehū| mana krama bacana dharma anusarehū||

तुम्ह मम सखा भरत सम भ्राता। सदा रहेहु पुर आवत जाता॥ बचन सुनत उपजा सुख भारी। परेउ चरन भरि लोचन बारी॥

tumha mama sakhā bharata sama bhrātā| sadā rahehu pura āvata jātā|| bacana sunata upajā sukha bhārī| pareu carana bhari locana bārī||

चरन नलिन उर धरि गृह आवा। प्रभु सुभाउ परिजनन्हि सुनावा॥ रघुपति चरित देखि पुरबासी। पुनि पुनि कहहिं धन्य सुखरासी॥

carana nalina ura dhari gṛha āvā| prabhu subhāu parijananhi sunāvā|| raghupati carita dekhi purabāsī| puni puni kahahiṃ dhanya sukharāsī||

राम राज बैंठें त्रेलोका। हरषित भए गए सब सोका॥ बयरु न कर काहू सन कोई। राम प्रताप बिषमता खोई॥

rāma rāja baiṃṭheṃ trelokā| haraṣita bhae gae saba sokā|| bayaru na kara kāhū sana koī| rāma pratāpa biṣamatā khoī||

दोहा २०

बरनाश्रम निज निज धरम निरत बेद पथ लोग।त चलहिं सदा पावहिं सुखहि नहिं भय सोक न रोग ॥ २०॥

baranāśrama nija nija dharama nirata beda patha loga|ta calahiṃ sadā pāvahiṃ sukhahi nahiṃ bhaya soka na roga || 20||

दैहिक दैविक भौतिक तापा। राम राज नहिं काहुहि ब्यापा॥ सब नर करहिं परस्पर प्रीती। चलहिं स्वधर्म निरत श्रुति नीती॥

daihika daivika bhautika tāpā| rāma rāja nahiṃ kāhuhi byāpā|| saba nara karahiṃ paraspara prītī| calahiṃ svadharma nirata śruti nītī||

चारिउ चरन धर्म जग माहीं। पूरि रहा सपनेहुँ अघ नाहीं॥ राम भगति रत नर अरु नारी। सकल परम गति के अधिकारी॥

cāriu carana dharma jaga māhīṃ| pūri rahā sapanehum̐ agha nāhīṃ|| rāma bhagati rata nara aru nārī| sakala parama gati ke adhikārī||

अल्पमृत्यु नहिं कवनिउ पीरा। सब सुंदर सब बिरुज सरीरा॥ नहिं दरिद्र कोउ दुखी न दीना। नहिं कोउ अबुध न लच्छन हीना॥

alpamṛtyu nahiṃ kavaniu pīrā| saba suṃdara saba biruja sarīrā|| nahiṃ daridra kou dukhī na dīnā| nahiṃ kou abudha na lacchana hīnā||

सब निर्दंभ धर्मरत पुनी। नर अरु नारि चतुर सब गुनी॥ सब गुनग्य पंडित सब ग्यानी। सब कृतग्य नहिं कपट सयानी॥

saba nirdaṃbha dharmarata punī| nara aru nāri catura saba gunī|| saba gunagya paṃḍita saba gyānī| saba kṛtagya nahiṃ kapaṭa sayānī||

दोहा २१

राम राज नभगेस सुनु सचराचर जग माहिं। काल कर्म सुभाव गुन कृत दुख काहुहि नाहिं ॥ २१॥

rāma rāja nabhagesa sunu sacarācara jaga māhiṃ| kāla karma subhāva guna kṛta dukha kāhuhi nāhiṃ || 21||

भूमि सप्त सागर मेखला। एक भूप रघुपति कोसला॥ भुअन अनेक रोम प्रति जासू। यह प्रभुता कछु बहुत न तासू॥

bhūmi sapta sāgara mekhalā| eka bhūpa raghupati kosalā|| bhuana aneka roma prati jāsū| yaha prabhutā kachu bahuta na tāsū||

सोरठा

सो महिमा समुझत प्रभु केरी। यह बरनत हीनता घनेरी॥

so mahimā samujhata prabhu kerī| yaha baranata hīnatā ghanerī||

सोरठा २

सोउ महिमा खगेस जिन्ह जानी। फिरी एहिं चरित तिन्हहुँ रति मानी॥

sou mahimā khagesa jinha jānī| phirī ehiṃ carita tinhahum̐ rati mānī||

सोरठा ३

सोउ जाने कर फल यह लीला। कहहिं महा मुनिबर दमसीला॥ राम राज कर सुख संपदा। बरनि न सकइ फनीस सारदा॥

sou jāne kara phala yaha līlā| kahahiṃ mahā munibara damasīlā|| rāma rāja kara sukha saṃpadā| barani na sakai phanīsa sāradā||

सब उदार सब पर उपकारी। बिप्र चरन सेवक नर नारी॥ एकनारि ब्रत रत सब झारी। ते मन बच क्रम पति हितकारी॥

saba udāra saba para upakārī| bipra carana sevaka nara nārī|| ekanāri brata rata saba jhārī| te mana baca krama pati hitakārī||

दोहा २२

दंड जतिन्ह कर भेद जहें नर्तक नृत्य समाज। जीतहु मनहि सुनिअ अस रामचंद्र के राज ॥ २२॥

daṃḍa jatinha kara bheda jaheṃ nartaka nṛtya samāja| jītahu manahi sunia asa rāmacaṃdra ke rāja || 22||

फूलहिं फरहिं सदा तरु कानन। रहहि एक सँग गज पंचानन॥ खग मृग सहज बयरु बिसराई। सबन्हि परस्पर प्रीति बढ़ाई॥

phūlahiṃ pharahiṃ sadā taru kānana| rahahi eka sam̐ga gaja paṃcānana|| khaga mṛga sahaja bayaru bisarāī| sabanhi paraspara prīti baṛhāī||

कूजहिं खग मृग नाना बृंदा। अभय चरहिं बन करहिं अनंदा॥ सीतल सुरभि पवन बह मंदा। गूंजत अलि लै चलि मकरंदा॥

kūjahiṃ khaga mṛga nānā bṛṃdā| abhaya carahiṃ bana karahiṃ anaṃdā|| sītala surabhi pavana baha maṃdā| gūṃjata ali lai cali makaraṃdā||

लता बिटप मागें मधु चवहीं। मनभावतो धेनु पय स्त्रवहीं॥ ससि संपन्न सदा रह धरनी। त्रेताँ भइ कृतजुग कै करनी॥

latā biṭapa māgeṃ madhu cavahīṃ| manabhāvato dhenu paya stravahīṃ|| sasi saṃpanna sadā raha dharanī| tretām̐ bhai kṛtajuga kai karanī||

प्रगटीं गिरिन्ह बिबिध मनि खानी। जगदातमा भूप जग जानी॥ सरिता सकल बहहिं बर बारी। सीतल अमल स्वाद सुखकारी॥

pragaṭīṃ girinha bibidha mani khānī| jagadātamā bhūpa jaga jānī|| saritā sakala bahahiṃ bara bārī| sītala amala svāda sukhakārī||

सागर निज मरजादाँ रहहीं। डारहिं रत्न तटन्हि नर लहहीं॥ सरसिज संकुल सकल तड़ागा। अति प्रसन्न दस दिसा बिभागा॥

sāgara nija marajādām̐ rahahīṃ| ḍārahiṃ ratna taṭanhi nara lahahīṃ|| sarasija saṃkula sakala taṛāgā| ati prasanna dasa disā bibhāgā||

दोहा २३

बिधु महि पूर मयूखन्हि रबि तप जेतनेहि काज। मागें बारिद देहिं जल रामचंद्र कें राज ॥ २३॥

bidhu mahi pūra mayūkhanhi rabi tapa jetanehi kāja| māgeṃ bārida dehiṃ jala rāmacaṃdra keṃ rāja || 23||

कोटिन्ह बाजिमेध प्रभु कीन्हे। दान अनेक द्विजन्ह कहँ दीन्हे॥ श्रुति पथ पालक धर्म धुरंधर। गुनातीत अरु भोग पुरंदर॥

koṭinha bājimedha prabhu kīnhe| dāna aneka dvijanha kaham̐ dīnhe|| śruti patha pālaka dharma dhuraṃdhara| gunātīta aru bhoga puraṃdara||

पति अनुकूल सदा रह सीता। सोभा खानि सुसील बिनीता॥ जानति कृपासिंधु प्रभुताई। सेवति चरन कमल मन लाई॥

pati anukūla sadā raha sītā| sobhā khāni susīla binītā|| jānati kṛpāsiṃdhu prabhutāī| sevati carana kamala mana lāī||

जद्यपि गृहँ सेवक सेवकिनी। बिपुल सदा सेवा बिधि गुनी॥ निज कर गृह परिचरजा करई। रामचंद्र आयसु अनुसरई॥

jadyapi gṛham̐ sevaka sevakinī| bipula sadā sevā bidhi gunī|| nija kara gṛha paricarajā karaī| rāmacaṃdra āyasu anusaraī||

जेहि बिधि कृपासिंधु सुख मानइ। सोइ कर श्री सेवा बिधि जानइ॥ कौसल्यादि सासु गृह माहीं। सेवइ सबन्हि मान मद नाहीं॥

jehi bidhi kṛpāsiṃdhu sukha mānai| soi kara śrī sevā bidhi jānai|| kausalyādi sāsu gṛha māhīṃ| sevai sabanhi māna mada nāhīṃ||

उमा रमा ब्रह्मादि बंदिता। जगदंबा संततमनिंदिता॥

umā ramā brahmādi baṃditā| jagadaṃbā saṃtatamaniṃditā||

दोहा २४

जासु कृपा कटठाच्छ सुर चाहत चितव न सोइ। राम पदारबिंद रति करति सुभावहि खोइ़ ॥ २४॥

jāsu kṛpā kaṭaṭhāccha sura cāhata citava na soi| rāma padārabiṃda rati karati subhāvahi khoi || 24||

सेवहिं सानकूल सब भाई। राम चरन रति अति अधिकाई॥ प्रभु मुख कमल बिलोकत रहहीं। कबहुँ कृपाल हमहि कछु कहहीं॥

sevahiṃ sānakūla saba bhāī| rāma carana rati ati adhikāī|| prabhu mukha kamala bilokata rahahīṃ| kabahum̐ kṛpāla hamahi kachu kahahīṃ||

राम करहिं भ्रातन्ह पर प्रीती। नाना भाँति सिखावहिं नीती॥ हरषित रहहिं नगर के लोगा। करहिं सकल सुर दुर्लभ भोगा॥

rāma karahiṃ bhrātanha para prītī| nānā bhām̐ti sikhāvahiṃ nītī|| haraṣita rahahiṃ nagara ke logā| karahiṃ sakala sura durlabha bhogā||

अहनिसि बिधिहि मनावत रहहीं। श्रीरघुबीर चरन रति चहहीं॥ दुइ सुत सुन्दर सीताँ जाए। लव कुस बेद पुरानन्ह गाए॥

ahanisi bidhihi manāvata rahahīṃ| śrīraghubīra carana rati cahahīṃ|| dui suta sundara sītām̐ jāe| lava kusa beda purānanha gāe||

दोहा

दोउ बिजई बिनई गुन मंदिर। हरि प्रतिबिंब मनहुँ अति सुंदर॥ दुइ दुइ सुत सब भ्रातन्ह केरे। भए रूप गुन सील घनेरे॥

dou bijaī binaī guna maṃdira| hari pratibiṃba manahum̐ ati suṃdara|| dui dui suta saba bhrātanha kere| bhae rūpa guna sīla ghanere||

दोहा

ग्यान गिरा गोतीत अज माया मन गुन पार।

gyāna girā gotīta aja māyā mana guna pāra|

सोरठा २५

इ सच्चिदानंद घन कर नर चरित उदार ॥ २५॥

i saccidānaṃda ghana kara nara carita udāra || 25||

प्रातकाल सरऊ करि मज्जन। बैठहिं सभाँ संग द्विज सज्जन॥ बेद पुरान बसिष्ट बखानहिं। सुनहिं राम जद्यपि सब जानहिं॥

prātakāla saraū kari majjana| baiṭhahiṃ sabhām̐ saṃga dvija sajjana|| beda purāna basiṣṭa bakhānahiṃ| sunahiṃ rāma jadyapi saba jānahiṃ||

अनुजन्ह संजुत भोजन करहीं। देखि सकल जननीं सुख भरहीं॥ भरत सत्रुहन दोनउ भाई। सहित पवनसुत उपबन जाई॥

anujanha saṃjuta bhojana karahīṃ| dekhi sakala jananīṃ sukha bharahīṃ|| bharata satruhana donau bhāī| sahita pavanasuta upabana jāī||

बूझहिं बैठि राम गुन गाहा। कह हनुमान सुमति अवगाहा॥ सुनत बिमल गुन अति सुख पावहिं। बहुरि बहुरि करि बिनय कहावहिं॥

būjhahiṃ baiṭhi rāma guna gāhā| kaha hanumāna sumati avagāhā|| sunata bimala guna ati sukha pāvahiṃ| bahuri bahuri kari binaya kahāvahiṃ||

सब कें गृह गृह होहिं पुराना। रामचरित पावन बिधि नाना॥ नर अरु नारि राम गुन गानहिं। करहिं दिवस निसि जात न जानहिं॥

saba keṃ gṛha gṛha hohiṃ purānā| rāmacarita pāvana bidhi nānā|| nara aru nāri rāma guna gānahiṃ| karahiṃ divasa nisi jāta na jānahiṃ||

दोहा २६

अवधपुरी बासिन्ह कर सुख संपदा समाज। सहस सेष नहिं कहि सकहिं जहँ नृप राम बिराज ॥ २६॥

avadhapurī bāsinha kara sukha saṃpadā samāja| sahasa seṣa nahiṃ kahi sakahiṃ jaham̐ nṛpa rāma birāja || 26||

नारदादि सनकादि मुनीसा। दरसन लागि कोसलाधीसा॥ दिन प्रति सकल अजोध्या आवहिं। देखि नगरु बिरागु बिसरावहिं॥

nāradādi sanakādi munīsā| darasana lāgi kosalādhīsā|| dina prati sakala ajodhyā āvahiṃ| dekhi nagaru birāgu bisarāvahiṃ||

जातरूप मनि रचित अटारीं। नाना रंग रुचिर गच ढारीं॥ पुर चहुँ पास कोट अति सुंदर। रचे कँगूरा रंग रंग बर॥

jātarūpa mani racita aṭārīṃ| nānā raṃga rucira gaca ḍhārīṃ|| pura cahum̐ pāsa koṭa ati suṃdara| race kam̐gūrā raṃga raṃga bara||

नव ग्रह निकर अनीक बनाई। जनु घेरी अमरावति आई॥ महि बहु रंग रचित गच काँचा। जो बिलोकि मुनिबर मन नाचा॥

nava graha nikara anīka banāī| janu gherī amarāvati āī|| mahi bahu raṃga racita gaca kām̐cā| jo biloki munibara mana nācā||

धवल धाम ऊपर नभ चुंबत। कलस मनहुँ रबि ससि दुति निंदत॥ बहु मनि रचित झरोखा भ्राजहिं। गृह गृह प्रति मनि दीप बिराजहिं॥

dhavala dhāma ūpara nabha cuṃbata| kalasa manahum̐ rabi sasi duti niṃdata|| bahu mani racita jharokhā bhrājahiṃ| gṛha gṛha prati mani dīpa birājahiṃ||

छंद

मनि दीप राजहिं भवन शभ्राजहिं देहरीं बिदट्रुम रची। मनि खंभ भीति बिरंचि बिरची कनक मनि मरकत खची॥ सुंदर मनोहर मंदिरायत अजिर रुचिर फटिक रचे। प्रति द्वार द्वार कपाट पुरट बनाइ बह बज़न्हि खचे॥

mani dīpa rājahiṃ bhavana śabhrājahiṃ deharīṃ bidaṭruma racī| mani khaṃbha bhīti biraṃci biracī kanaka mani marakata khacī|| suṃdara manohara maṃdirāyata ajira rucira phaṭika race| prati dvāra dvāra kapāṭa puraṭa banāi baha bazanhi khace||

दोहा २७

चारु चित्रसाला गृह गृह प्रति लिखे बनाइ। राम चरित जे निरख मुनि ते मन लेहिं चोराइ ॥ २७॥

cāru citrasālā gṛha gṛha prati likhe banāi| rāma carita je nirakha muni te mana lehiṃ corāi || 27||

सुमन बाटिका सबहिं लगाई। बिबिध भाँति करि जतन बनाई॥ लता ललित बहु जाति सुहाई। फूलहिं सदा बंसत कि नाई॥

sumana bāṭikā sabahiṃ lagāī| bibidha bhām̐ti kari jatana banāī|| latā lalita bahu jāti suhāī| phūlahiṃ sadā baṃsata ki nāī||

गुंजत मधुकर मुखर मनोहर। मारुत त्रिबिध सदा बह सुंदर॥ नाना खग बालकन्हि जिआए। बोलत मधुर उड़ात सुहाए॥

guṃjata madhukara mukhara manohara| māruta tribidha sadā baha suṃdara|| nānā khaga bālakanhi jiāe| bolata madhura uṛāta suhāe||

मोर हंस सारस पारावत। भवननि पर सोभा अति पावत॥ जहँ तहँ देखहिं निज परिछाहीं। बहु बिधि कूजहिं नृत्य कराहीं॥

mora haṃsa sārasa pārāvata| bhavanani para sobhā ati pāvata|| jaham̐ taham̐ dekhahiṃ nija parichāhīṃ| bahu bidhi kūjahiṃ nṛtya karāhīṃ||

सुक सारिका पढ़ावहिं बालक। कहहु राम रघुपति जनपालक॥ राज दुआर सकल बिधि चारू। बीथीं चौहट रूचिर बजारू॥

suka sārikā paṛhāvahiṃ bālaka| kahahu rāma raghupati janapālaka|| rāja duāra sakala bidhi cārū| bīthīṃ cauhaṭa rūcira bajārū||

छंद

बाजार रुचिर न बनइ बरनत बस्तु बिनु गथ पाइए। जहँ भूप रमानिवास तहें की संपदा किमि गाइए॥ बैठे बजाज सराफ बनिक अनेक मनहूँ कुबेर ते। सब सुखी सब सच्चरित सुंदर नारि नर सिसु जरठ जे॥

bājāra rucira na banai baranata bastu binu gatha pāie| jaham̐ bhūpa ramānivāsa taheṃ kī saṃpadā kimi gāie|| baiṭhe bajāja sarāpha banika aneka manahūm̐ kubera te| saba sukhī saba saccarita suṃdara nāri nara sisu jaraṭha je||

दोहा २८

उत्तर दिसि सरजू बह निर्मल जल गंभीर। बाँधे घाट मनोहर स्वल्प पंक नहिं तीर ॥ २८॥

uttara disi sarajū baha nirmala jala gaṃbhīra| bām̐dhe ghāṭa manohara svalpa paṃka nahiṃ tīra || 28||

दूरि फराक रुचिर सो घाटा। जहँ जल पिअहिं बाजि गज ठाटा॥ पनिघट परम मनोहर नाना। तहाँ न पुरुष करहिं अस्नाना॥

dūri pharāka rucira so ghāṭā| jaham̐ jala piahiṃ bāji gaja ṭhāṭā|| panighaṭa parama manohara nānā| tahām̐ na puruṣa karahiṃ asnānā||

राजघाट सब बिधि सुंदर बर। मज्जहिं तहाँ बरन चारिउ नर॥ तीर तीर देवन्ह के मंदिर। चहुँ दिसि तिन्ह के उपबन सुंदर॥

rājaghāṭa saba bidhi suṃdara bara| majjahiṃ tahām̐ barana cāriu nara|| tīra tīra devanha ke maṃdira| cahum̐ disi tinha ke upabana suṃdara||

कहुँ कहुँ सरिता तीर उदासी। बसहिं ग्यान रत मुनि संन्यासी॥ तीर तीर तुलसिका सुहाई। बृंद बृंद बहु मुनिन्ह लगाई॥

kahum̐ kahum̐ saritā tīra udāsī| basahiṃ gyāna rata muni saṃnyāsī|| tīra tīra tulasikā suhāī| bṛṃda bṛṃda bahu muninha lagāī||

पुर सोभा कछु बरनि न जाई। बाहेर नगर परम रुचिराई॥ देखत पुरी अखिल अघ भागा। बन उपबन बापिका तड़ागा॥

pura sobhā kachu barani na jāī| bāhera nagara parama rucirāī|| dekhata purī akhila agha bhāgā| bana upabana bāpikā taṛāgā||

छंद

बापीं तड़ाग अनूप कृप मनोहरायत सोहहीं। बहु रंग कंज अनेक खग कूजहिं मधुप गुंजारहीं। आराम रम्य पिकादि खग रव जनु पथिक हंकारहीं॥

bāpīṃ taṛāga anūpa kṛpa manoharāyata sohahīṃ| bahu raṃga kaṃja aneka khaga kūjahiṃ madhupa guṃjārahīṃ| ārāma ramya pikādi khaga rava janu pathika haṃkārahīṃ||

दोहा २९

रमानाथ जहेँँ राजा सो पुर बरनि कि जाइ। अनिमादिक सुख संपदा रहीं अवध सब छाइ ॥ २९॥

ramānātha jahem̐m̐ rājā so pura barani ki jāi| animādika sukha saṃpadā rahīṃ avadha saba chāi || 29||

जहँ तहँ नर रघुपति गुन गावहिं। बैठि परसपर इहइ सिखावहिं॥ भजहु प्रनत प्रतिपालक रामहि। सोभा सील रूप गुन धामहि॥

jaham̐ taham̐ nara raghupati guna gāvahiṃ| baiṭhi parasapara ihai sikhāvahiṃ|| bhajahu pranata pratipālaka rāmahi| sobhā sīla rūpa guna dhāmahi||

जलज बिलोचन स्यामल गातहि। पलक नयन इव सेवक त्रातहि॥ धृत सर रुचिर चाप तूनीरहि। संत कंज बन रबि रनधीरहि॥

jalaja bilocana syāmala gātahi| palaka nayana iva sevaka trātahi|| dhṛta sara rucira cāpa tūnīrahi| saṃta kaṃja bana rabi ranadhīrahi||

काल कराल ब्याल खगराजहि। नमत राम अकाम ममता जहि॥ लोभ मोह मृगजूथ किरातहि। मनसिज करि हरि जन सुखदातहि॥

kāla karāla byāla khagarājahi| namata rāma akāma mamatā jahi|| lobha moha mṛgajūtha kirātahi| manasija kari hari jana sukhadātahi||

संसय सोक निबिड़ तम भानुहि। दनुज गहन घन दहन कृसानुहि॥ जनकसुता समेत रघुबीरहि। कस न भजहु भंजन भव भीरहि॥

saṃsaya soka nibiṛa tama bhānuhi| danuja gahana ghana dahana kṛsānuhi|| janakasutā sameta raghubīrahi| kasa na bhajahu bhaṃjana bhava bhīrahi||

बहु बासना मसक हिम रासिहि। सदा एकरस अज अबिनासिहि॥ मुनि रंजन भंजन महि भारहि। तुलसिदास के प्रभुहि उदारहि॥

bahu bāsanā masaka hima rāsihi| sadā ekarasa aja abināsihi|| muni raṃjana bhaṃjana mahi bhārahi| tulasidāsa ke prabhuhi udārahi||

दोहा ३०

एहि बिधि नगर नारि नर करहिं राम गुन गान। सानुकूल सब पर रहहिं संतत कृपानिधान ॥ ३०॥

ehi bidhi nagara nāri nara karahiṃ rāma guna gāna| sānukūla saba para rahahiṃ saṃtata kṛpānidhāna || 30||

जब ते राम प्रताप खगेसा। उदित भयउ अति प्रबल दिनेसा॥ पूरि प्रकास रहेउ तिहुँ लोका। बहुतेन्ह सुख बहुतन मन सोका॥

jaba te rāma pratāpa khagesā| udita bhayau ati prabala dinesā|| pūri prakāsa raheu tihum̐ lokā| bahutenha sukha bahutana mana sokā||

जिन्हहि सोक ते कहउँ बखानी। प्रथम अबिद्या निसा नसानी॥ अघ उलूक जहँ तहाँ लुकाने। काम क्रोध कैरव सकुचाने॥

jinhahi soka te kahaum̐ bakhānī| prathama abidyā nisā nasānī|| agha ulūka jaham̐ tahām̐ lukāne| kāma krodha kairava sakucāne||

बिबिध कर्म गुन काल सुभाऊ। ए चकोर सुख लहहिं न काऊ॥ मत्सर मान मोह मद चोरा। इन्ह कर हुनर न कवनिहुँ ओरा॥

bibidha karma guna kāla subhāū| e cakora sukha lahahiṃ na kāū|| matsara māna moha mada corā| inha kara hunara na kavanihum̐ orā||

धरम तड़ाग ग्यान बिग्याना। ए पंकज बिकसे बिधि नाना॥ सुख संतोष बिराग बिबेका। बिगत सोक ए कोक अनेका॥

dharama taṛāga gyāna bigyānā| e paṃkaja bikase bidhi nānā|| sukha saṃtoṣa birāga bibekā| bigata soka e koka anekā||

दोहा ३१

यह प्रताप रब जाकें उर जब करइ प्रकास। प७छ़िले बाढ़हिं प्रथम जे कहे ते पावहिं नास ॥ ३१॥

yaha pratāpa raba jākeṃ ura jaba karai prakāsa| pa7chile bāṛhahiṃ prathama je kahe te pāvahiṃ nāsa || 31||

भ्रातन्ह सहित रामु एक बारा। संग परम प्रिय पवनकुमारा॥ सुंदर उपबन देखन गए। सब तरु कुसुमित पल्लव नए॥

bhrātanha sahita rāmu eka bārā| saṃga parama priya pavanakumārā|| suṃdara upabana dekhana gae| saba taru kusumita pallava nae||

जानि समय सनकादिक आए। तेज पुंज गुन सील सुहाए॥ ब्रह्मानंद सदा लयलीना। देखत बालक बहुकालीना॥

jāni samaya sanakādika āe| teja puṃja guna sīla suhāe|| brahmānaṃda sadā layalīnā| dekhata bālaka bahukālīnā||

रूप धरें जनु चारिउ बेदा। समदरसी मुनि बिगत बिभेदा॥ आसा बसन ब्यसन यह तिन्हहीं। रघुपति चरित होइ तहँ सुनहीं॥

rūpa dhareṃ janu cāriu bedā| samadarasī muni bigata bibhedā|| āsā basana byasana yaha tinhahīṃ| raghupati carita hoi taham̐ sunahīṃ||

तहाँ रहे सनकादि भवानी। जहँ घटसंभव मुनिबर ग्यानी॥ राम कथा मुनिबर बहु बरनी। ग्यान जोनि पावक जिमि अरनी॥

tahām̐ rahe sanakādi bhavānī| jaham̐ ghaṭasaṃbhava munibara gyānī|| rāma kathā munibara bahu baranī| gyāna joni pāvaka jimi aranī||

दोहा ३२

देखि राम मुनि आवत हरघि दंडवत कौन्ह। स्वागत पूँछि पीत पट प्रभु बैठन कहूँ दीन्ह ॥ ३२॥

dekhi rāma muni āvata haraghi daṃḍavata kaunha| svāgata pūm̐chi pīta paṭa prabhu baiṭhana kahūm̐ dīnha || 32||

कीन्ह दंडवत तीनिउँ भाई। सहित पवनसुत सुख अधिकाई॥ मुनि रघुपति छबि अतुल बिलोकी। भए मगन मन सके न रोकी॥

kīnha daṃḍavata tīnium̐ bhāī| sahita pavanasuta sukha adhikāī|| muni raghupati chabi atula bilokī| bhae magana mana sake na rokī||

स्यामल गात सरोरुह लोचन। सुंदरता मंदिर भव मोचन॥ एकटक रहे निमेष न लावहिं। प्रभु कर जोरें सीस नवावहिं॥

syāmala gāta saroruha locana| suṃdaratā maṃdira bhava mocana|| ekaṭaka rahe nimeṣa na lāvahiṃ| prabhu kara joreṃ sīsa navāvahiṃ||

तिन्ह कै दसा देखि रघुबीरा। स्त्रवत नयन जल पुलक सरीरा॥ कर गहि प्रभु मुनिबर बैठारे। परम मनोहर बचन उचारे॥

tinha kai dasā dekhi raghubīrā| stravata nayana jala pulaka sarīrā|| kara gahi prabhu munibara baiṭhāre| parama manohara bacana ucāre||

आजु धन्य मैं सुनहु मुनीसा। तुम्हरें दरस जाहिं अघ खीसा॥ बड़े भाग पाइब सतसंगा। बिनहिं प्रयास होहिं भव भंगा॥

āju dhanya maiṃ sunahu munīsā| tumhareṃ darasa jāhiṃ agha khīsā|| baṛe bhāga pāiba satasaṃgā| binahiṃ prayāsa hohiṃ bhava bhaṃgā||

दोहा ३३

संत संग अपबर्ग कर कामी भव कर पंथ। कहहिं संत कबि कोबिद श्रुति पुरान सदग्रंथ ॥ ३३॥

saṃta saṃga apabarga kara kāmī bhava kara paṃtha| kahahiṃ saṃta kabi kobida śruti purāna sadagraṃtha || 33||

सुनि प्रभु बचन हरषि मुनि चारी। पुलकित तन अस्तुति अनुसारी॥ जय भगवंत अनंत अनामय। अनघ अनेक एक करुनामय॥

suni prabhu bacana haraṣi muni cārī| pulakita tana astuti anusārī|| jaya bhagavaṃta anaṃta anāmaya| anagha aneka eka karunāmaya||

जय निर्गुन जय जय गुन सागर। सुख मंदिर सुंदर अति नागर॥ जय इंदिरा रमन जय भूधर। अनुपम अज अनादि सोभाकर॥

jaya nirguna jaya jaya guna sāgara| sukha maṃdira suṃdara ati nāgara|| jaya iṃdirā ramana jaya bhūdhara| anupama aja anādi sobhākara||

ग्यान निधान अमान मानप्रद। पावन सुजस पुरान बेद बद॥ तग्य कृतग्य अग्यता भंजन। नाम अनेक अनाम निरंजन॥

gyāna nidhāna amāna mānaprada| pāvana sujasa purāna beda bada|| tagya kṛtagya agyatā bhaṃjana| nāma aneka anāma niraṃjana||

सर्ब सर्बगत सर्ब उरालय। बससि सदा हम कहुँ परिपालय॥ द्वंद बिपति भव फंद बिभंजय। ह्रदि बसि राम काम मद गंजय॥

sarba sarbagata sarba urālaya| basasi sadā hama kahum̐ paripālaya|| dvaṃda bipati bhava phaṃda bibhaṃjaya| hradi basi rāma kāma mada gaṃjaya||

दोहा ३४

परमानंद कृपायतन मन परिपूरन काम। प्रेम भगति अनपायनी देहु हमहि श्रीराम ॥ ३४॥

paramānaṃda kṛpāyatana mana paripūrana kāma| prema bhagati anapāyanī dehu hamahi śrīrāma || 34||

देहु भगति रघुपति अति पावनि। त्रिबिध ताप भव दाप नसावनि॥ प्रनत काम सुरधेनु कलपतरु। होइ प्रसन्न दीजै प्रभु यह बरु॥

dehu bhagati raghupati ati pāvani| tribidha tāpa bhava dāpa nasāvani|| pranata kāma suradhenu kalapataru| hoi prasanna dījai prabhu yaha baru||

भव बारिधि कुंभज रघुनायक। सेवत सुलभ सकल सुख दायक॥ मन संभव दारुन दुख दारय। दीनबंधु समता बिस्तारय॥

bhava bāridhi kuṃbhaja raghunāyaka| sevata sulabha sakala sukha dāyaka|| mana saṃbhava dāruna dukha dāraya| dīnabaṃdhu samatā bistāraya||

आस त्रास इरिषादि निवारक। बिनय बिबेक बिरति बिस्तारक॥ भूप मौलि मन मंडन धरनी। देहि भगति संसृति सरि तरनी॥

āsa trāsa iriṣādi nivāraka| binaya bibeka birati bistāraka|| bhūpa mauli mana maṃḍana dharanī| dehi bhagati saṃsṛti sari taranī||

मुनि मन मानस हंस निरंतर। चरन कमल बंदित अज संकर॥ रघुकुल केतु सेतु श्रुति रच्छक। काल करम सुभाउ गुन भच्छक॥

muni mana mānasa haṃsa niraṃtara| carana kamala baṃdita aja saṃkara|| raghukula ketu setu śruti racchaka| kāla karama subhāu guna bhacchaka||

तारन तरन हरन सब दूषन। तुलसिदास प्रभु त्रिभुवन भूषन॥

tārana tarana harana saba dūṣana| tulasidāsa prabhu tribhuvana bhūṣana||

दोहा ३५

बार बार अस्तुति करि प्रेम सहित सिरु नाइ। ब्रहा भवन सनकादि गे अति अभीष्ट बर पाइ ॥ ३५॥

bāra bāra astuti kari prema sahita siru nāi| brahā bhavana sanakādi ge ati abhīṣṭa bara pāi || 35||