Lanka Kand — लङ्काकाण्ड

लङ्काकाण्ड · दोहा ५९–७४(ख)

साझा करें

परेउ मुरुछि महि लागत सायक। सुमिरत राम राम रघुनायक॥ सुनि प्रिय बचन भरत तब धाए। कपि समीप अति आतुर आए॥

pareu muruchi mahi lāgata sāyaka| sumirata rāma rāma raghunāyaka|| suni priya bacana bharata taba dhāe| kapi samīpa ati ātura āe||

बिकल बिलोकि कीस उर लावा। जागत नहिं बहु भाँति जगावा॥ मुख मलीन मन भए दुखारी। कहत बचन भरि लोचन बारी॥

bikala biloki kīsa ura lāvā| jāgata nahiṃ bahu bhām̐ti jagāvā|| mukha malīna mana bhae dukhārī| kahata bacana bhari locana bārī||

जेहिं बिधि राम बिमुख मोहि कीन्हा। तेहिं पुनि यह दारुन दुख दीन्हा॥ जौं मोरें मन बच अरु काया। प्रीति राम पद कमल अमाया॥

jehiṃ bidhi rāma bimukha mohi kīnhā| tehiṃ puni yaha dāruna dukha dīnhā|| jauṃ moreṃ mana baca aru kāyā| prīti rāma pada kamala amāyā||

तौ कपि होउ बिगत श्रम सूला। जौं मो पर रघुपति अनुकूला॥ सुनत बचन उठि बैठ कपीसा। कहि जय जयति कोसलाधीसा॥

tau kapi hou bigata śrama sūlā| jauṃ mo para raghupati anukūlā|| sunata bacana uṭhi baiṭha kapīsā| kahi jaya jayati kosalādhīsā||

सोरठा ५९

लीन्ह कपिहि उर लाइ पुलकित तनु लोचन सजल। प्रीति न हृदयँ समाइ सुमिरि राम रघुकुल तिलक ॥ ५९॥

līnha kapihi ura lāi pulakita tanu locana sajala| prīti na hṛdayam̐ samāi sumiri rāma raghukula tilaka || 59||

तात कुसल कहु सुखनिधान की। सहित अनुज अरु मातु जानकी॥ कपि सब चरित समास बखाने। भए दुखी मन महुँ पछिताने॥

tāta kusala kahu sukhanidhāna kī| sahita anuja aru mātu jānakī|| kapi saba carita samāsa bakhāne| bhae dukhī mana mahum̐ pachitāne||

अहह दैव मैं कत जग जायउँ। प्रभु के एकहु काज न आयउँ॥ जानि कुअवसरु मन धरि धीरा। पुनि कपि सन बोले बलबीरा॥

ahaha daiva maiṃ kata jaga jāyaum̐| prabhu ke ekahu kāja na āyaum̐|| jāni kuavasaru mana dhari dhīrā| puni kapi sana bole balabīrā||

तात गहरु होइहि तोहि जाता। काजु नसाइहि होत प्रभाता॥ चढ़ु मम सायक सैल समेता। पठवौं तोहि जहँ कृपानिकेता॥

tāta gaharu hoihi tohi jātā| kāju nasāihi hota prabhātā|| caṛhu mama sāyaka saila sametā| paṭhavauṃ tohi jaham̐ kṛpāniketā||

सुनि कपि मन उपजा अभिमाना। मोरें भार चलिहि किमि बाना॥ राम प्रभाव बिचारि बहोरी। बंदि चरन कह कपि कर जोरी॥

suni kapi mana upajā abhimānā| moreṃ bhāra calihi kimi bānā|| rāma prabhāva bicāri bahorī| baṃdi carana kaha kapi kara jorī||

दोहा ६०(क)

तव प्रताप उर राखि प्रभु जेहउँ नाथ तुरंत। अस कहि आयसु पाइ पद बंदि चलेउ हनुमंत ॥ ६० (क)॥

tava pratāpa ura rākhi prabhu jehaum̐ nātha turaṃta| asa kahi āyasu pāi pada baṃdi caleu hanumaṃta || 60 (ka)||

भरत बाहु बल सील गुन प्रभु पद प्रीति अपार। मन महुँ जात सराहत पुनि पुनि पवनकुमार॥ ६० (ख )॥

bharata bāhu bala sīla guna prabhu pada prīti apāra| mana mahum̐ jāta sarāhata puni puni pavanakumāra|| 60 (kha )||

उहाँ राम लछिमनहिं निहारी। बोले बचन मनुज अनुसारी॥ अर्ध राति गइ कपि नहिं आयउ। राम उठाइ अनुज उर लायउ॥

uhām̐ rāma lachimanahiṃ nihārī| bole bacana manuja anusārī|| ardha rāti gai kapi nahiṃ āyau| rāma uṭhāi anuja ura lāyau||

सकहु न दुखित देखि मोहि काऊ। बंधु सदा तव मृदुल सुभाऊ॥ मम हित लागि तजेहु पितु माता। सहेहु बिपिन हिम आतप बाता॥

sakahu na dukhita dekhi mohi kāū| baṃdhu sadā tava mṛdula subhāū|| mama hita lāgi tajehu pitu mātā| sahehu bipina hima ātapa bātā||

सोरठा ३

सो अनुराग कहाँ अब भाई। उठहु न सुनि मम बच बिकलाई॥ जौं जनतेउँ बन बंधु बिछोहू। पिता बचन मनतेउँ नहिं ओहू॥

so anurāga kahām̐ aba bhāī| uṭhahu na suni mama baca bikalāī|| jauṃ janateum̐ bana baṃdhu bichohū| pitā bacana manateum̐ nahiṃ ohū||

सुत बित नारि भवन परिवारा। होहिं जाहिं जग बारहिं बारा॥ अस बिचारि जियँ जागहु ताता। मिलइ न जगत सहोदर भ्राता॥

suta bita nāri bhavana parivārā| hohiṃ jāhiṃ jaga bārahiṃ bārā|| asa bicāri jiyam̐ jāgahu tātā| milai na jagata sahodara bhrātā||

जथा पंख बिनु खग अति दीना। मनि बिनु फनि करिबर कर हीना॥ अस मम जिवन बंधु बिनु तोही। जौं जड़ दैव जिआवै मोही॥

jathā paṃkha binu khaga ati dīnā| mani binu phani karibara kara hīnā|| asa mama jivana baṃdhu binu tohī| jauṃ jaṛa daiva jiāvai mohī||

जैहउँ अवध कवन मुहु लाई। नारि हेतु प्रिय भाइ गँवाई॥ बरु अपजस सहतेउँ जग माहीं। नारि हानि बिसेष छति नाहीं॥

jaihaum̐ avadha kavana muhu lāī| nāri hetu priya bhāi gam̐vāī|| baru apajasa sahateum̐ jaga māhīṃ| nāri hāni biseṣa chati nāhīṃ||

अब अपलोकु सोकु सुत तोरा। सहिहि निठुर कठोर उर मोरा॥ निज जननी के एक कुमारा। तात तासु तुम्ह प्रान अधारा॥

aba apaloku soku suta torā| sahihi niṭhura kaṭhora ura morā|| nija jananī ke eka kumārā| tāta tāsu tumha prāna adhārā||

सौंपेसि मोहि तुम्हहि गहि पानी। सब बिधि सुखद परम हित जानी॥ उतरु काह दैहउँ तेहि जाई। उठि किन मोहि सिखावहु भाई॥

sauṃpesi mohi tumhahi gahi pānī| saba bidhi sukhada parama hita jānī|| utaru kāha daihaum̐ tehi jāī| uṭhi kina mohi sikhāvahu bhāī||

बहु बिधि सिचत सोच बिमोचन। स्त्रवत सलिल राजिव दल लोचन॥ उमा एक अखंड रघुराई। नर गति भगत कृपाल देखाई॥

bahu bidhi sicata soca bimocana| stravata salila rājiva dala locana|| umā eka akhaṃḍa raghurāī| nara gati bhagata kṛpāla dekhāī||

सोरठा ६१

प्रभु प्रलाप सुनि कान बिकल भए बानर निकर। आइ गयउ हनुमान जिमि करुना महँ बीर रस ॥ ६१॥

prabhu pralāpa suni kāna bikala bhae bānara nikara| āi gayau hanumāna jimi karunā maham̐ bīra rasa || 61||

हरषि राम भेंटेउ हनुमाना। अति कृतग्य प्रभु परम सुजाना॥ तुरत बैद तब कीन्ह उपाई। उठि बैठे लछिमन हरषाई॥

haraṣi rāma bheṃṭeu hanumānā| ati kṛtagya prabhu parama sujānā|| turata baida taba kīnha upāī| uṭhi baiṭhe lachimana haraṣāī||

हृदयँ लाइ प्रभु भेंटेउ भ्राता। हरषे सकल भालु कपि ब्राता॥ कपि पुनि बैद तहाँ पहुँचावा। जेहि बिधि तबहिं ताहि लइ आवा॥

hṛdayam̐ lāi prabhu bheṃṭeu bhrātā| haraṣe sakala bhālu kapi brātā|| kapi puni baida tahām̐ pahum̐cāvā| jehi bidhi tabahiṃ tāhi lai āvā||

यह बृत्तांत दसानन सुनेऊ। अति बिषअद पुनि पुनि सिर धुनेऊ॥ ब्याकुल कुंभकरन पहिं आवा। बिबिध जतन करि ताहि जगावा॥

yaha bṛttāṃta dasānana suneū| ati biṣaada puni puni sira dhuneū|| byākula kuṃbhakarana pahiṃ āvā| bibidha jatana kari tāhi jagāvā||

जागा निसिचर देखिअ कैसा। मानहुँ कालु देह धरि बैसा॥ कुंभकरन बूझा कहु भाई। काहे तव मुख रहे सुखाई॥

jāgā nisicara dekhia kaisā| mānahum̐ kālu deha dhari baisā|| kuṃbhakarana būjhā kahu bhāī| kāhe tava mukha rahe sukhāī||

कथा कही सब तेहिं अभिमानी। जेहि प्रकार सीता हरि आनी॥ तात कपिन्ह सब निसिचर मारे। महामहा जोधा संघारे॥

kathā kahī saba tehiṃ abhimānī| jehi prakāra sītā hari ānī|| tāta kapinha saba nisicara māre| mahāmahā jodhā saṃghāre||

दुर्मुख सुररिपु मनुज अहारी। भट अतिकाय अकंपन भारी॥ अपर महोदर आदिक बीरा। परे समर महि सब रनधीरा॥

durmukha suraripu manuja ahārī| bhaṭa atikāya akaṃpana bhārī|| apara mahodara ādika bīrā| pare samara mahi saba ranadhīrā||

दोहा ६२

सुनि दसकंधर बचन तब कुंभकरन बिलखान। जगदंबा हरि आनि अब सठ चाहत कल्यान ॥ ६२॥

suni dasakaṃdhara bacana taba kuṃbhakarana bilakhāna| jagadaṃbā hari āni aba saṭha cāhata kalyāna || 62||

भल न कीन्ह तैं निसिचर नाहा। अब मोहि आइ जगाएहि काहा॥ अजहूँ तात त्यागि अभिमाना। भजहु राम होइहि कल्याना॥

bhala na kīnha taiṃ nisicara nāhā| aba mohi āi jagāehi kāhā|| ajahūm̐ tāta tyāgi abhimānā| bhajahu rāma hoihi kalyānā||

हैं दससीस मनुज रघुनायक। जाके हनूमान से पायक॥ अहह बंधु तैं कीन्हि खोटाई। प्रथमहिं मोहि न सुनाएहि आई॥

haiṃ dasasīsa manuja raghunāyaka| jāke hanūmāna se pāyaka|| ahaha baṃdhu taiṃ kīnhi khoṭāī| prathamahiṃ mohi na sunāehi āī||

कीन्हेहु प्रभू बिरोध तेहि देवक। सिव बिरंचि सुर जाके सेवक॥ नारद मुनि मोहि ग्यान जो कहा। कहतेउँ तोहि समय निरबहा॥

kīnhehu prabhū birodha tehi devaka| siva biraṃci sura jāke sevaka|| nārada muni mohi gyāna jo kahā| kahateum̐ tohi samaya nirabahā||

अब भरि अंक भेंटु मोहि भाई। लोचन सूफल करौ मैं जाई॥ स्याम गात सरसीरुह लोचन। देखौं जाइ ताप त्रय मोचन॥

aba bhari aṃka bheṃṭu mohi bhāī| locana sūphala karau maiṃ jāī|| syāma gāta sarasīruha locana| dekhauṃ jāi tāpa traya mocana||

दोहा ६३

राम रूप गुन सुमिरत मगन भयउ छन एक। रावन मागेउ कोटि घट मद अरु महिष अनेक ॥ ६३॥

rāma rūpa guna sumirata magana bhayau chana eka| rāvana māgeu koṭi ghaṭa mada aru mahiṣa aneka || 63||

महिष खाइ करि मदिरा पाना। गर्जा बज्राघात समाना॥ कुंभकरन दुर्मद रन रंगा। चला दुर्ग तजि सेन न संगा॥

mahiṣa khāi kari madirā pānā| garjā bajrāghāta samānā|| kuṃbhakarana durmada rana raṃgā| calā durga taji sena na saṃgā||

देखि बिभीषनु आगें आयउ। परेउ चरन निज नाम सुनायउ॥ अनुज उठाइ हृदयँ तेहि लायो। रघुपति भक्त जानि मन भायो॥

dekhi bibhīṣanu āgeṃ āyau| pareu carana nija nāma sunāyau|| anuja uṭhāi hṛdayam̐ tehi lāyo| raghupati bhakta jāni mana bhāyo||

तात लात रावन मोहि मारा। कहत परम हित मंत्र बिचारा॥ तेहिं गलानि रघुपति पहिं आयउँ। देखि दीन प्रभु के मन भायउँ॥

tāta lāta rāvana mohi mārā| kahata parama hita maṃtra bicārā|| tehiṃ galāni raghupati pahiṃ āyaum̐| dekhi dīna prabhu ke mana bhāyaum̐||

सुनु सुत भयउ कालबस रावन। सो कि मान अब परम सिखावन॥ धन्य धन्य तैं धन्य बिभीषन। भयहु तात निसिचर कुल भूषन॥

sunu suta bhayau kālabasa rāvana| so ki māna aba parama sikhāvana|| dhanya dhanya taiṃ dhanya bibhīṣana| bhayahu tāta nisicara kula bhūṣana||

बंधु बंस तैं कीन्ह उजागर। भजेहु राम सोभा सुख सागर॥

baṃdhu baṃsa taiṃ kīnha ujāgara| bhajehu rāma sobhā sukha sāgara||

दोहा ६४

बचन कर्म मन कपट तजि भजेहु राम रनधीर। जाहु न निज पर सूझ मोहि भयउँ कालबस बीर ॥ ६४॥

bacana karma mana kapaṭa taji bhajehu rāma ranadhīra| jāhu na nija para sūjha mohi bhayaum̐ kālabasa bīra || 64||

बंधु बचन सुनि चला बिभीषन। आयउ जहँ त्रैलोक बिभूषन॥ नाथ भूधराकार सरीरा। कुंभकरन आवत रनधीरा॥

baṃdhu bacana suni calā bibhīṣana| āyau jaham̐ trailoka bibhūṣana|| nātha bhūdharākāra sarīrā| kuṃbhakarana āvata ranadhīrā||

एतना कपिन्ह सुना जब काना। किलकिलाइ धाए बलवाना॥ लिए उठाइ बिटप अरु भूधर। कटकटाइ डारहिं ता ऊपर॥

etanā kapinha sunā jaba kānā| kilakilāi dhāe balavānā|| lie uṭhāi biṭapa aru bhūdhara| kaṭakaṭāi ḍārahiṃ tā ūpara||

कोटि कोटि गिरि सिखर प्रहारा। करहिं भालु कपि एक एक बारा॥ मुर् यो न मन तनु टर् यो न टार् यो। जिमि गज अर्क फलनि को मार्यो॥

koṭi koṭi giri sikhara prahārā| karahiṃ bhālu kapi eka eka bārā|| mur yo na mana tanu ṭar yo na ṭār yo| jimi gaja arka phalani ko māryo||

तब मारुतसुत मुठिका हन्यो। पर् यो धरनि ब्याकुल सिर धुन्यो॥ पुनि उठि तेहिं मारेउ हनुमंता। घुर्मित भूतल परेउ तुरंता॥

taba mārutasuta muṭhikā hanyo| par yo dharani byākula sira dhunyo|| puni uṭhi tehiṃ māreu hanumaṃtā| ghurmita bhūtala pareu turaṃtā||

पुनि नल नीलहि अवनि पछारेसि। जहँ तहँ पटकि पटकि भट डारेसि॥ चली बलीमुख सेन पराई। अति भय त्रसित न कोउ समुहाई॥

puni nala nīlahi avani pachāresi| jaham̐ taham̐ paṭaki paṭaki bhaṭa ḍāresi|| calī balīmukha sena parāī| ati bhaya trasita na kou samuhāī||

दोहा ६५

अंगदादि कपि मुरुछित करि समेत सुग्रीव। काँख दाबि कपिराज कहुँ चला अमित बल सींव ॥ ६५॥

aṃgadādi kapi muruchita kari sameta sugrīva| kām̐kha dābi kapirāja kahum̐ calā amita bala sīṃva || 65||

उमा करत रघुपति नरलीला। खेलत गरुड़ जिमि अहिगन मीला॥ भृकुटि भंग जो कालहि खाई। ताहि कि सोहइ ऐसि लराई॥

umā karata raghupati naralīlā| khelata garuṛa jimi ahigana mīlā|| bhṛkuṭi bhaṃga jo kālahi khāī| tāhi ki sohai aisi larāī||

जग पावनि कीरति बिस्तरिहहिं। गाइ गाइ भवनिधि नर तरिहहिं॥ मुरुछा गइ मारुतसुत जागा। सुग्रीवहि तब खोजन लागा॥

jaga pāvani kīrati bistarihahiṃ| gāi gāi bhavanidhi nara tarihahiṃ|| muruchā gai mārutasuta jāgā| sugrīvahi taba khojana lāgā||

सुग्रीवहु कै मुरुछा बीती। निबुक गयउ तेहि मृतक प्रतीती॥ काटेसि दसन नासिका काना। गरजि अकास चलउ तेहिं जाना॥

sugrīvahu kai muruchā bītī| nibuka gayau tehi mṛtaka pratītī|| kāṭesi dasana nāsikā kānā| garaji akāsa calau tehiṃ jānā||

गहेउ चरन गहि भूमि पछारा। अति लाघवँ उठि पुनि तेहि मारा॥ पुनि आयसु प्रभु पहिं बलवाना। जयति जयति जय कृपानिधाना॥

gaheu carana gahi bhūmi pachārā| ati lāghavam̐ uṭhi puni tehi mārā|| puni āyasu prabhu pahiṃ balavānā| jayati jayati jaya kṛpānidhānā||

नाक कान काटे जियँ जानी। फिरा क्रोध करि भइ मन ग्लानी॥ सहज भीम पुनि बिनु श्रुति नासा। देखत कपि दल उपजी त्रासा॥

nāka kāna kāṭe jiyam̐ jānī| phirā krodha kari bhai mana glānī|| sahaja bhīma puni binu śruti nāsā| dekhata kapi dala upajī trāsā||

दोहा ६६

जय जय जय रघुबंस मनि धाए कपि दै हूह। एकहि बार तासु पर छाड़ेन्हि गिरि तरु जूह ॥ ६६॥

jaya jaya jaya raghubaṃsa mani dhāe kapi dai hūha| ekahi bāra tāsu para chāṛenhi giri taru jūha || 66||

कुंभकरन रन रंग बिरुद्धा। सन्मुख चला काल जनु क्रुद्धा॥ कोटि कोटि कपि धरि धरि खाई। जनु टीड़ी गिरि गुहाँ समाई॥

kuṃbhakarana rana raṃga biruddhā| sanmukha calā kāla janu kruddhā|| koṭi koṭi kapi dhari dhari khāī| janu ṭīṛī giri guhām̐ samāī||

कोटिन्ह गहि सरीर सन मर्दा। कोटिन्ह मीजि मिलव महि गर्दा॥ मुख नासा श्रवनन्हि कीं बाटा। निसरि पराहिं भालु कपि ठाटा॥

koṭinha gahi sarīra sana mardā| koṭinha mīji milava mahi gardā|| mukha nāsā śravananhi kīṃ bāṭā| nisari parāhiṃ bhālu kapi ṭhāṭā||

रन मद मत्त निसाचर दर्पा। बिस्व ग्रसिहि जनु एहि बिधि अर्पा॥ मुरे सुभट सब फिरहिं न फेरे। सूझ न नयन सुनहिं नहिं टेरे॥

rana mada matta nisācara darpā| bisva grasihi janu ehi bidhi arpā|| mure subhaṭa saba phirahiṃ na phere| sūjha na nayana sunahiṃ nahiṃ ṭere||

कुंभकरन कपि फौज बिडारी। सुनि धाई रजनीचर धारी॥ देखि राम बिकल कटकाई। रिपु अनीक नाना बिधि आई॥

kuṃbhakarana kapi phauja biḍārī| suni dhāī rajanīcara dhārī|| dekhi rāma bikala kaṭakāī| ripu anīka nānā bidhi āī||

दोहा ६७

सुनु सुग्रीव बिभीषन अनुज सँभारेहु सैन। मैं देखउँ खल बल दलहि बोले राजिवनैन ॥ ६७॥

sunu sugrīva bibhīṣana anuja sam̐bhārehu saina| maiṃ dekhaum̐ khala bala dalahi bole rājivanaina || 67||

कर सारंग साजि कटि भाथा। अरि दल दलन चले रघुनाथा॥ प्रथम कीन्ह प्रभु धनुष टँकोरा। रिपु दल बधिर भयउ सुनि सोरा॥

kara sāraṃga sāji kaṭi bhāthā| ari dala dalana cale raghunāthā|| prathama kīnha prabhu dhanuṣa ṭam̐korā| ripu dala badhira bhayau suni sorā||

सत्यसंध छाँड़े सर लच्छा। कालसर्प जनु चले सपच्छा॥ जहँ तहँ चले बिपुल नाराचा। लगे कटन भट बिकट पिसाचा॥

satyasaṃdha chām̐ṛe sara lacchā| kālasarpa janu cale sapacchā|| jaham̐ taham̐ cale bipula nārācā| lage kaṭana bhaṭa bikaṭa pisācā||

कटहिं चरन उर सिर भुजदंडा। बहुतक बीर होहिं सत खंडा॥ घुर्मि घुर्मि घायल महि परहीं। उठि संभारि सुभट पुनि लरहीं॥

kaṭahiṃ carana ura sira bhujadaṃḍā| bahutaka bīra hohiṃ sata khaṃḍā|| ghurmi ghurmi ghāyala mahi parahīṃ| uṭhi saṃbhāri subhaṭa puni larahīṃ||

लागत बान जलद जिमि गाजहीं। बहुतक देखी कठिन सर भाजहिं॥ रुंड प्रचंड मुंड बिनु धावहिं। धरु धरु मारू मारु धुनि गावहिं॥

lāgata bāna jalada jimi gājahīṃ| bahutaka dekhī kaṭhina sara bhājahiṃ|| ruṃḍa pracaṃḍa muṃḍa binu dhāvahiṃ| dharu dharu mārū māru dhuni gāvahiṃ||

दोहा ६८

छन महुँ प्रभु के सायकन्हि काटे बिकट पिसाच। पुनि रघुबीर निषंग महुँ प्रबिसे सब नाराच ॥ ६८॥

chana mahum̐ prabhu ke sāyakanhi kāṭe bikaṭa pisāca| puni raghubīra niṣaṃga mahum̐ prabise saba nārāca || 68||

कुंभकरन मन दीख बिचारी। हति धन माझ निसाचर धारी॥ भा अति क्रुद्ध महाबल बीरा। कियो मृगनायक नाद गँभीरा॥

kuṃbhakarana mana dīkha bicārī| hati dhana mājha nisācara dhārī|| bhā ati kruddha mahābala bīrā| kiyo mṛganāyaka nāda gam̐bhīrā||

कोपि महीधर लेइ उपारी। डारइ जहँ मर्कट भट भारी॥ आवत देखि सैल प्रभू भारे। सरन्हि काटि रज सम करि डारे॥

kopi mahīdhara lei upārī| ḍārai jaham̐ markaṭa bhaṭa bhārī|| āvata dekhi saila prabhū bhāre| saranhi kāṭi raja sama kari ḍāre||

पुनि धनु तानि कोपि रघुनायक। छाँड़े अति कराल बहु सायक॥ तनु महुँ प्रबिसि निसरि सर जाहीं। जिमि दामिनि घन माझ समाहीं॥

puni dhanu tāni kopi raghunāyaka| chām̐ṛe ati karāla bahu sāyaka|| tanu mahum̐ prabisi nisari sara jāhīṃ| jimi dāmini ghana mājha samāhīṃ||

सोरठा ४

सोनित स्त्रवत सोह तन कारे। जनु कज्जल गिरि गेरु पनारे॥ बिकल बिलोकि भालु कपि धाए। बिहँसा जबहिं निकट कपि आए॥

sonita stravata soha tana kāre| janu kajjala giri geru panāre|| bikala biloki bhālu kapi dhāe| biham̐sā jabahiṃ nikaṭa kapi āe||

दोहा ६९

महानाद करि गर्जा कोटि कोटि गहि कीस। महि पटकइ गजराज इव सपथ करइ दससीस ॥ ६९॥

mahānāda kari garjā koṭi koṭi gahi kīsa| mahi paṭakai gajarāja iva sapatha karai dasasīsa || 69||

भागे भालु बलीमुख जूथा। बृकु बिलोकि जिमि मेष बरूथा॥ चले भागि कपि भालु भवानी। बिकल पुकारत आरत बानी॥

bhāge bhālu balīmukha jūthā| bṛku biloki jimi meṣa barūthā|| cale bhāgi kapi bhālu bhavānī| bikala pukārata ārata bānī||

यह निसिचर दुकाल सम अहई। कपिकुल देस परन अब चहई॥ कृपा बारिधर राम खरारी। पाहि पाहि प्रनतारति हारी॥

yaha nisicara dukāla sama ahaī| kapikula desa parana aba cahaī|| kṛpā bāridhara rāma kharārī| pāhi pāhi pranatārati hārī||

सकरुन बचन सुनत भगवाना। चले सुधारि सरासन बाना॥ राम सेन निज पाछैं घाली। चले सकोप महा बलसाली॥

sakaruna bacana sunata bhagavānā| cale sudhāri sarāsana bānā|| rāma sena nija pāchaiṃ ghālī| cale sakopa mahā balasālī||

खैंचि धनुष सर सत संधाने। छूटे तीर सरीर समाने॥ लागत सर धावा रिस भरा। कुधर डगमगत डोलति धरा॥

khaiṃci dhanuṣa sara sata saṃdhāne| chūṭe tīra sarīra samāne|| lāgata sara dhāvā risa bharā| kudhara ḍagamagata ḍolati dharā||

लीन्ह एक तेहिं सैल उपाटी। रघुकुल तिलक भुजा सोइ काटी॥ धावा बाम बाहु गिरि धारी। प्रभु सोउ भुजा काटि महि पारी॥

līnha eka tehiṃ saila upāṭī| raghukula tilaka bhujā soi kāṭī|| dhāvā bāma bāhu giri dhārī| prabhu sou bhujā kāṭi mahi pārī||

काटें भुजा सोह खल कैसा। पच्छहीन मंदर गिरि जैसा॥ उग्र बिलोकनि प्रभुहि बिलोका। ग्रसन चहत मानहुँ त्रेलोका॥

kāṭeṃ bhujā soha khala kaisā| pacchahīna maṃdara giri jaisā|| ugra bilokani prabhuhi bilokā| grasana cahata mānahum̐ trelokā||

दोहा ७०

करि चिक्कार घोर अति धावा बदनु पसारि। गगन सिद्ध सुर त्रासित हा हा हेति पुकारि ॥ ७०॥

kari cikkāra ghora ati dhāvā badanu pasāri| gagana siddha sura trāsita hā hā heti pukāri || 70||

सभय देव करुनानिधि जान्यो। श्रवन प्रजंत सरासनु तान्यो॥ बिसिख निकर निसिचर मुख भरेऊ। तदपि महाबल भूमि न परेऊ॥

sabhaya deva karunānidhi jānyo| śravana prajaṃta sarāsanu tānyo|| bisikha nikara nisicara mukha bhareū| tadapi mahābala bhūmi na pareū||

सरन्हि भरा मुख सन्मुख धावा। काल त्रोन सजीव जनु आवा॥ तब प्रभु कोपि तीब्र सर लीन्हा। धर ते भिन्न तासु सिर कीन्हा॥

saranhi bharā mukha sanmukha dhāvā| kāla trona sajīva janu āvā|| taba prabhu kopi tībra sara līnhā| dhara te bhinna tāsu sira kīnhā||

सोरठा ३

सो सिर परेउ दसानन आगें। बिकल भयउ जिमि फनि मनि त्यागें॥ धरनि धसइ धर धाव प्रचंडा। तब प्रभु काटि कीन्ह दुइ खंडा॥

so sira pareu dasānana āgeṃ| bikala bhayau jimi phani mani tyāgeṃ|| dharani dhasai dhara dhāva pracaṃḍā| taba prabhu kāṭi kīnha dui khaṃḍā||

परे भूमि जिमि नभ तें भूधर। हेठ दाबि कपि भालु निसाचर॥ तासु तेज प्रभु बदन समाना। सुर मुनि सबहिं अचंभव माना॥

pare bhūmi jimi nabha teṃ bhūdhara| heṭha dābi kapi bhālu nisācara|| tāsu teja prabhu badana samānā| sura muni sabahiṃ acaṃbhava mānā||

सुर दुंदुभीं बजावहिं हरषहिं। अस्तुति करहिं सुमन बहु बरषहिं॥ करि बिनती सुर सकल सिधाए। तेही समय देवरिषि आए॥

sura duṃdubhīṃ bajāvahiṃ haraṣahiṃ| astuti karahiṃ sumana bahu baraṣahiṃ|| kari binatī sura sakala sidhāe| tehī samaya devariṣi āe||

गगनोपरि हरि गुन गन गाए। रुचिर बीररस प्रभु मन भाए॥ बेगि हतहु खल कहि मुनि गए। राम समर महि सोभत भए॥

gaganopari hari guna gana gāe| rucira bīrarasa prabhu mana bhāe|| begi hatahu khala kahi muni gae| rāma samara mahi sobhata bhae||

छंद

संग्राम भूमि बिराज रघुपति अतुल बल कोसल धनी। श्रम बिंदु मुख राजीव लोचन अरुन तन सोनित कनी॥ भुज जुगल फेरत सर सरासन भालु कपि चहु दिसि बने। कह दास तुलसी कहि न सक छबि सेष जेहि आनन घने॥

saṃgrāma bhūmi birāja raghupati atula bala kosala dhanī| śrama biṃdu mukha rājīva locana aruna tana sonita kanī|| bhuja jugala pherata sara sarāsana bhālu kapi cahu disi bane| kaha dāsa tulasī kahi na saka chabi seṣa jehi ānana ghane||

दोहा ७१

निसिचर अधम मलाकर ताहि दीन्ह निज धाम। गणिरिजा ते नर मंदमति जे न भजहिं श्रीराम ॥ ७१॥

nisicara adhama malākara tāhi dīnha nija dhāma| gaṇirijā te nara maṃdamati je na bhajahiṃ śrīrāma || 71||

दिन कें अंत फिरीं दोउ अनी। समर भई सुभटन्ह श्रम घनी॥ राम कृपाँ कपि दल बल बाढ़ा। जिमि तृन पाइ लाग अति डाढ़ा॥

dina keṃ aṃta phirīṃ dou anī| samara bhaī subhaṭanha śrama ghanī|| rāma kṛpām̐ kapi dala bala bāṛhā| jimi tṛna pāi lāga ati ḍāṛhā||

छीजहिं निसिचर दिनु अरु राती। निज मुख कहें सुकृत जेहि भाँती॥ बहु बिलाप दसकंधर करई। बंधु सीस पुनि पुनि उर धरई॥

chījahiṃ nisicara dinu aru rātī| nija mukha kaheṃ sukṛta jehi bhām̐tī|| bahu bilāpa dasakaṃdhara karaī| baṃdhu sīsa puni puni ura dharaī||

रोवहिं नारि हृदय हति पानी। तासु तेज बल बिपुल बखानी॥ मेघनाद तेहि अवसर आयउ। कहि बहु कथा पिता समुझायउ॥

rovahiṃ nāri hṛdaya hati pānī| tāsu teja bala bipula bakhānī|| meghanāda tehi avasara āyau| kahi bahu kathā pitā samujhāyau||

देखेहु कालि मोरि मनुसाई। अबहिं बहुत का करौं बड़ाई॥ इष्टदेव सैं बल रथ पायउँ। सो बल तात न तोहि देखायउँ॥

dekhehu kāli mori manusāī| abahiṃ bahuta kā karauṃ baṛāī|| iṣṭadeva saiṃ bala ratha pāyaum̐| so bala tāta na tohi dekhāyaum̐||

एहि बिधि जल्पत भयउ बिहाना। चहुँ दुआर लागे कपि नाना॥ इत कपि भालु काल सम बीरा। उत रजनीचर अति रनधीरा॥

ehi bidhi jalpata bhayau bihānā| cahum̐ duāra lāge kapi nānā|| ita kapi bhālu kāla sama bīrā| uta rajanīcara ati ranadhīrā||

लरहिं सुभट निज निज जय हेतू। बरनि न जाइ समर खगकेतू॥

larahiṃ subhaṭa nija nija jaya hetū| barani na jāi samara khagaketū||

दोहा ७२

मेघनाद मायामय रथ चढ़ि गयउ अकास।गर्जेउ अट्टहास करि भइ कपि कटकहि त्रास ॥ ७२॥

meghanāda māyāmaya ratha caṛhi gayau akāsa|garjeu aṭṭahāsa kari bhai kapi kaṭakahi trāsa || 72||

सक्ति सूल तरवारि कृपाना। अस्त्र सस्त्र कुलिसायुध नाना॥ डारह परसु परिघ पाषाना। लागेउ बृष्टि करै बहु बाना॥

sakti sūla taravāri kṛpānā| astra sastra kulisāyudha nānā|| ḍāraha parasu parigha pāṣānā| lāgeu bṛṣṭi karai bahu bānā||

दस दिसि रहे बान नभ छाई। मानहुँ मघा मेघ झरि लाई॥ धरु धरु मारु सुनिअ धुनि काना। जो मारइ तेहि कोउ न जाना॥

dasa disi rahe bāna nabha chāī| mānahum̐ maghā megha jhari lāī|| dharu dharu māru sunia dhuni kānā| jo mārai tehi kou na jānā||

गहि गिरि तरु अकास कपि धावहिं। देखहि तेहि न दुखित फिरि आवहिं॥ अवघट घाट बाट गिरि कंदर। माया बल कीन्हेसि सर पंजर॥

gahi giri taru akāsa kapi dhāvahiṃ| dekhahi tehi na dukhita phiri āvahiṃ|| avaghaṭa ghāṭa bāṭa giri kaṃdara| māyā bala kīnhesi sara paṃjara||

जाहिं कहाँ ब्याकुल भए बंदर। सुरपति बंदि परे जनु मंदर॥ मारुतसुत अंगद नल नीला। कीन्हेसि बिकल सकल बलसीला॥

jāhiṃ kahām̐ byākula bhae baṃdara| surapati baṃdi pare janu maṃdara|| mārutasuta aṃgada nala nīlā| kīnhesi bikala sakala balasīlā||

पुनि लछिमन सुग्रीव बिभीषन। सरन्हि मारि कीन्हेसि जर्जर तन॥ पुनि रघुपति सैं जूझे लागा। सर छाँड़इ होइ लागहिं नागा॥

puni lachimana sugrīva bibhīṣana| saranhi māri kīnhesi jarjara tana|| puni raghupati saiṃ jūjhe lāgā| sara chām̐ṛai hoi lāgahiṃ nāgā||

ब्याल पास बस भए खरारी। स्वबस अनंत एक अबिकारी॥ नट इव कपट चरित कर नाना। सदा स्वतंत्र एक भगवाना॥

byāla pāsa basa bhae kharārī| svabasa anaṃta eka abikārī|| naṭa iva kapaṭa carita kara nānā| sadā svataṃtra eka bhagavānā||

रन सोभा लगि प्रभुहिं बँधायो। नागपास देवन्ह भय पायो॥

rana sobhā lagi prabhuhiṃ bam̐dhāyo| nāgapāsa devanha bhaya pāyo||

दोहा

गिरिजा जासु नाम जपि मुनि काटहिं भव पास।

girijā jāsu nāma japi muni kāṭahiṃ bhava pāsa|

सोरठा ७३

सो कि बंध तर आवइ ब्यापक बिस्व निवास ॥ ७३॥

so ki baṃdha tara āvai byāpaka bisva nivāsa || 73||

चरित राम के सगुन भवानी। तर्कि न जाहिं बुद्धि बल बानी॥ अस बिचारि जे तग्य बिरागी। रामहि भजहिं तर्क सब त्यागी॥

carita rāma ke saguna bhavānī| tarki na jāhiṃ buddhi bala bānī|| asa bicāri je tagya birāgī| rāmahi bhajahiṃ tarka saba tyāgī||

ब्याकुल कटकु कीन्ह घननादा। पुनि भा प्रगट कहइ दुर्बादा॥ जामवंत कह खल रहु ठाढ़ा। सुनि करि ताहि क्रोध अति बाढ़ा॥

byākula kaṭaku kīnha ghananādā| puni bhā pragaṭa kahai durbādā|| jāmavaṃta kaha khala rahu ṭhāṛhā| suni kari tāhi krodha ati bāṛhā||

बूढ़ जानि सठ छाँड़ेउँ तोही। लागेसि अधम पचारै मोही॥ अस कहि तरल त्रिसूल चलायो। जामवंत कर गहि सोइ धायो॥

būṛha jāni saṭha chām̐ṛeum̐ tohī| lāgesi adhama pacārai mohī|| asa kahi tarala trisūla calāyo| jāmavaṃta kara gahi soi dhāyo||

मारिसि मेघनाद कै छाती। परा भूमि घुर्मित सुरघाती॥ पुनि रिसान गहि चरन फिरायौ। महि पछारि निज बल देखरायो॥

mārisi meghanāda kai chātī| parā bhūmi ghurmita suraghātī|| puni risāna gahi carana phirāyau| mahi pachāri nija bala dekharāyo||

बर प्रसाद सो मरइ न मारा। तब गहि पद लंका पर डारा॥ इहाँ देवरिषि गरुड़ पठायो। राम समीप सपदि सो आयो॥

bara prasāda so marai na mārā| taba gahi pada laṃkā para ḍārā|| ihām̐ devariṣi garuṛa paṭhāyo| rāma samīpa sapadi so āyo||

दोहा ७४(क)

खगपति सब धरि खाए माया नाग बरूथ। माया बिगत भए सब हरषे बानर जूथ ॥ ७४ (क)॥

khagapati saba dhari khāe māyā nāga barūtha| māyā bigata bhae saba haraṣe bānara jūtha || 74 (ka)||

दोहा ७४(ख)

गहि गिरि पादप उपल नख धाए कीस रिसाइ। चले तमीचर बिकलतर गढ़ पर चढ़े पराइ ॥ ७४ (ख)॥

gahi giri pādapa upala nakha dhāe kīsa risāi| cale tamīcara bikalatara gaṛha para caṛhe parāi || 74 (kha)||