Bal Kand — बालकाण्ड

बालकाण्ड · दोहा २००–२१६

साझा करें

एहि बिधि राम जगत पितु माता। कोसलपुर बासिन्ह सुखदाता॥ जिन्ह रघुनाथ चरन रति मानी। तिन्ह की यह गति प्रगट भवानी॥

ehi bidhi rāma jagata pitu mātā| kosalapura bāsinha sukhadātā|| jinha raghunātha carana rati mānī| tinha kī yaha gati pragaṭa bhavānī||

रघुपति बिमुख जतन कर कोरी। कवन सकइ भव बंधन छोरी॥ जीव चराचर बस कै राखे। सो माया प्रभु सों भय भाखे॥

raghupati bimukha jatana kara korī| kavana sakai bhava baṃdhana chorī|| jīva carācara basa kai rākhe| so māyā prabhu soṃ bhaya bhākhe||

भृकुटि बिलास नचावइ ताही। अस प्रभु छाड़ि भजिअ कहु काही॥ मन क्रम बचन छाड़ि चतुराई। भजत कृपा करिहहिं रघुराई॥

bhṛkuṭi bilāsa nacāvai tāhī| asa prabhu chāṛi bhajia kahu kāhī|| mana krama bacana chāṛi caturāī| bhajata kṛpā karihahiṃ raghurāī||

एहि बिधि सिसुबिनोद प्रभु कीन्हा। सकल नगरबासिन्ह सुख दीन्हा॥ लै उछंग कबहुँक हलरावै। कबहुँ पालनें घालि झुलावै॥

ehi bidhi sisubinoda prabhu kīnhā| sakala nagarabāsinha sukha dīnhā|| lai uchaṃga kabahum̐ka halarāvai| kabahum̐ pālaneṃ ghāli jhulāvai||

दोहा २००

प्रेम मगन कौसल्या निसि दिन जात न जान। सुत सनेह बस माता बालचरित कर गान ॥ २००॥

prema magana kausalyā nisi dina jāta na jāna| suta saneha basa mātā bālacarita kara gāna || 200||

एक बार जननीं अन्हवाए। करि सिंगार पलनाँ पौढ़ाए॥ निज कुल इष्टदेव भगवाना। पूजा हेतु कीन्ह अस्नाना॥

eka bāra jananīṃ anhavāe| kari siṃgāra palanām̐ pauṛhāe|| nija kula iṣṭadeva bhagavānā| pūjā hetu kīnha asnānā||

करि पूजा नैबेद्य चढ़ावा। आपु गई जहँ पाक बनावा॥ बहुरि मातु तहवाँ चलि आई। भोजन करत देख सुत जाई॥

kari pūjā naibedya caṛhāvā| āpu gaī jaham̐ pāka banāvā|| bahuri mātu tahavām̐ cali āī| bhojana karata dekha suta jāī||

गै जननी सिसु पहिं भयभीता। देखा बाल तहाँ पुनि सूता॥ बहुरि आइ देखा सुत सोई। हृदयँ कंप मन धीर न होई॥

gai jananī sisu pahiṃ bhayabhītā| dekhā bāla tahām̐ puni sūtā|| bahuri āi dekhā suta soī| hṛdayam̐ kaṃpa mana dhīra na hoī||

इहाँ उहाँ दुइ बालक देखा। मतिभ्रम मोर कि आन बिसेषा॥ देखि राम जननी अकुलानी। प्रभु हँसि दीन्ह मधुर मुसुकानी॥

ihām̐ uhām̐ dui bālaka dekhā| matibhrama mora ki āna biseṣā|| dekhi rāma jananī akulānī| prabhu ham̐si dīnha madhura musukānī||

दोहा २०१

देखरावा मातहि निज अदभुत रुप अखंड। रोम रोम प्रति लागे कोटि कोटि ब्रह्मंड ॥ २०१॥

dekharāvā mātahi nija adabhuta rupa akhaṃḍa| roma roma prati lāge koṭi koṭi brahmaṃḍa || 201||

अगनित रबि ससि सिव चतुरानन। बहु गिरि सरित सिंधु महि कानन॥ काल कर्म गुन ग्यान सुभाऊ। सोउ देखा जो सुना न काऊ॥

aganita rabi sasi siva caturānana| bahu giri sarita siṃdhu mahi kānana|| kāla karma guna gyāna subhāū| sou dekhā jo sunā na kāū||

देखी माया सब बिधि गाढ़ी। अति सभीत जोरें कर ठाढ़ी॥ देखा जीव नचावइ जाही। देखी भगति जो छोरइ ताही॥

dekhī māyā saba bidhi gāṛhī| ati sabhīta joreṃ kara ṭhāṛhī|| dekhā jīva nacāvai jāhī| dekhī bhagati jo chorai tāhī||

तन पुलकित मुख बचन न आवा। नयन मूदि चरननि सिरु नावा॥ बिसमयवंत देखि महतारी। भए बहुरि सिसुरूप खरारी॥

tana pulakita mukha bacana na āvā| nayana mūdi caranani siru nāvā|| bisamayavaṃta dekhi mahatārī| bhae bahuri sisurūpa kharārī||

अस्तुति करि न जाइ भय माना। जगत पिता मैं सुत करि जाना॥ हरि जननि बहुबिधि समुझाई। यह जनि कतहुँ कहसि सुनु माई॥

astuti kari na jāi bhaya mānā| jagata pitā maiṃ suta kari jānā|| hari janani bahubidhi samujhāī| yaha jani katahum̐ kahasi sunu māī||

दोहा २०२

बार बार कौसल्या बिनय करइ कर जोरि। अब जनि कबहूँ ब्यापै प्रभु मोहि माया तोरि ॥ २०२॥

bāra bāra kausalyā binaya karai kara jori| aba jani kabahūm̐ byāpai prabhu mohi māyā tori || 202||

बालचरित हरि बहुबिधि कीन्हा। अति अनंद दासन्ह कहँ दीन्हा॥ कछुक काल बीतें सब भाई। बड़े भए परिजन सुखदाई॥

bālacarita hari bahubidhi kīnhā| ati anaṃda dāsanha kaham̐ dīnhā|| kachuka kāla bīteṃ saba bhāī| baṛe bhae parijana sukhadāī||

चूड़ाकरन कीन्ह गुरु जाई। बिप्रन्ह पुनि दछिना बहु पाई॥ परम मनोहर चरित अपारा। करत फिरत चारिउ सुकुमारा॥

cūṛākarana kīnha guru jāī| bipranha puni dachinā bahu pāī|| parama manohara carita apārā| karata phirata cāriu sukumārā||

मन क्रम बचन अगोचर जोई। दसरथ अजिर बिचर प्रभु सोई॥ भोजन करत बोल जब राजा। नहिं आवत तजि बाल समाजा॥

mana krama bacana agocara joī| dasaratha ajira bicara prabhu soī|| bhojana karata bola jaba rājā| nahiṃ āvata taji bāla samājā||

कौसल्या जब बोलन जाई। ठुमकु ठुमकु प्रभु चलहिं पराई॥ निगम नेति सिव अंत न पावा। ताहि धरै जननी हठि धावा॥

kausalyā jaba bolana jāī| ṭhumaku ṭhumaku prabhu calahiṃ parāī|| nigama neti siva aṃta na pāvā| tāhi dharai jananī haṭhi dhāvā||

धूरस धूरि भरें तनु आए। भूपति बिहसि गोद बैठाए॥

dhūrasa dhūri bhareṃ tanu āe| bhūpati bihasi goda baiṭhāe||

दोहा २०३

भोजन करत चपल चित इत उत अवसरु पाइ। भाजि चले किलकत मुख दधि ओदन लपटाइ ॥ २०३॥

bhojana karata capala cita ita uta avasaru pāi| bhāji cale kilakata mukha dadhi odana lapaṭāi || 203||

बालचरित अति सरल सुहाए। सारद सेष संभु श्रुति गाए॥ जिन कर मन इन्ह सन नहिं राता। ते जन बंचित किए बिधाता॥

bālacarita ati sarala suhāe| sārada seṣa saṃbhu śruti gāe|| jina kara mana inha sana nahiṃ rātā| te jana baṃcita kie bidhātā||

भए कुमार जबहिं सब भ्राता। दीन्ह जनेऊ गुरु पितु माता॥ गुरगृहँ गए पढ़न रघुराई। अलप काल बिद्या सब आई॥

bhae kumāra jabahiṃ saba bhrātā| dīnha janeū guru pitu mātā|| guragṛham̐ gae paṛhana raghurāī| alapa kāla bidyā saba āī||

जाकी सहज स्वास श्रुति चारी। सो हरि पढ़ यह कौतुक भारी॥ बिद्या बिनय निपुन गुन सीला। खेलहिं खेल सकल नृपलीला॥

jākī sahaja svāsa śruti cārī| so hari paṛha yaha kautuka bhārī|| bidyā binaya nipuna guna sīlā| khelahiṃ khela sakala nṛpalīlā||

करतल बान धनुष अति सोहा। देखत रूप चराचर मोहा॥ जिन्ह बीथिन्ह बिहरहिं सब भाई। थकित होहिं सब लोग लुगाई॥

karatala bāna dhanuṣa ati sohā| dekhata rūpa carācara mohā|| jinha bīthinha biharahiṃ saba bhāī| thakita hohiṃ saba loga lugāī||

दोहा २०४

कोसलपुर बासी नर नारि बृद्ध अरु बाल। प्रानहु ते प्रिय लागत सब कहुँ राम कृपाल ॥ २०४॥

kosalapura bāsī nara nāri bṛddha aru bāla| prānahu te priya lāgata saba kahum̐ rāma kṛpāla || 204||

बंधु सखा संग लेहिं बोलाई। बन मृगया नित खेलहिं जाई॥ पावन मृग मारहिं जियँ जानी। दिन प्रति नृपहि देखावहिं आनी॥

baṃdhu sakhā saṃga lehiṃ bolāī| bana mṛgayā nita khelahiṃ jāī|| pāvana mṛga mārahiṃ jiyam̐ jānī| dina prati nṛpahi dekhāvahiṃ ānī||

जे मृग राम बान के मारे। ते तनु तजि सुरलोक सिधारे॥ अनुज सखा सँग भोजन करहीं। मातु पिता अग्या अनुसरहीं॥

je mṛga rāma bāna ke māre| te tanu taji suraloka sidhāre|| anuja sakhā sam̐ga bhojana karahīṃ| mātu pitā agyā anusarahīṃ||

जेहि बिधि सुखी होहिं पुर लोगा। करहिं कृपानिधि सोइ संजोगा॥ बेद पुरान सुनहिं मन लाई। आपु कहहिं अनुजन्ह समुझाई॥

jehi bidhi sukhī hohiṃ pura logā| karahiṃ kṛpānidhi soi saṃjogā|| beda purāna sunahiṃ mana lāī| āpu kahahiṃ anujanha samujhāī||

प्रातकाल उठि कै रघुनाथा। मातु पिता गुरु नावहिं माथा॥ आयसु मागि करहिं पुर काजा। देखि चरित हरषइ मन राजा॥

prātakāla uṭhi kai raghunāthā| mātu pitā guru nāvahiṃ māthā|| āyasu māgi karahiṃ pura kājā| dekhi carita haraṣai mana rājā||

दोहा २०५

ब्यापक अकल अनीह अज निर्गुन नाम न रूप। भगत हेतु नाना बिधि करत चरित्र अनूप ॥ २०५॥

byāpaka akala anīha aja nirguna nāma na rūpa| bhagata hetu nānā bidhi karata caritra anūpa || 205||

यह सब चरित कहा मैं गाई। आगिलि कथा सुनहु मन लाई॥ बिस्वामित्र महामुनि ग्यानी। बसहि बिपिन सुभ आश्रम जानी॥

yaha saba carita kahā maiṃ gāī| āgili kathā sunahu mana lāī|| bisvāmitra mahāmuni gyānī| basahi bipina subha āśrama jānī||

जहँ जप जग्य मुनि करही। अति मारीच सुबाहुहि डरहीं॥ देखत जग्य निसाचर धावहि। करहि उपद्रव मुनि दुख पावहिं॥

jaham̐ japa jagya muni karahī| ati mārīca subāhuhi ḍarahīṃ|| dekhata jagya nisācara dhāvahi| karahi upadrava muni dukha pāvahiṃ||

गाधितनय मन चिंता ब्यापी। हरि बिनु मरहि न निसिचर पापी॥ तब मुनिवर मन कीन्ह बिचारा। प्रभु अवतरेउ हरन महि भारा॥

gādhitanaya mana ciṃtā byāpī| hari binu marahi na nisicara pāpī|| taba munivara mana kīnha bicārā| prabhu avatareu harana mahi bhārā||

एहुँ मिस देखौं पद जाई। करि बिनती आनौ दोउ भाई॥ ग्यान बिराग सकल गुन अयना। सो प्रभु मै देखब भरि नयना॥

ehum̐ misa dekhauṃ pada jāī| kari binatī ānau dou bhāī|| gyāna birāga sakala guna ayanā| so prabhu mai dekhaba bhari nayanā||

दोहा २०६

बहुबिधि करत मनोरथ जात लागि नहिं बार। करि मज्जन सरऊ जल गए भूप दरबार ॥ २०६॥

bahubidhi karata manoratha jāta lāgi nahiṃ bāra| kari majjana saraū jala gae bhūpa darabāra || 206||

मुनि आगमन सुना जब राजा। मिलन गयऊ लै बिप्र समाजा॥ करि दंडवत मुनिहि सनमानी। निज आसन बैठारेन्हि आनी॥

muni āgamana sunā jaba rājā| milana gayaū lai bipra samājā|| kari daṃḍavata munihi sanamānī| nija āsana baiṭhārenhi ānī||

चरन पखारि कीन्हि अति पूजा। मो सम आजु धन्य नहिं दूजा॥ बिबिध भाँति भोजन करवावा। मुनिवर हृदयँ हरष अति पावा॥

carana pakhāri kīnhi ati pūjā| mo sama āju dhanya nahiṃ dūjā|| bibidha bhām̐ti bhojana karavāvā| munivara hṛdayam̐ haraṣa ati pāvā||

पुनि चरननि मेले सुत चारी। राम देखि मुनि देह बिसारी॥ भए मगन देखत मुख सोभा। जनु चकोर पूरन ससि लोभा॥

puni caranani mele suta cārī| rāma dekhi muni deha bisārī|| bhae magana dekhata mukha sobhā| janu cakora pūrana sasi lobhā||

तब मन हरषि बचन कह राऊ। मुनि अस कृपा न कीन्हिहु काऊ॥ केहि कारन आगमन तुम्हारा। कहहु सो करत न लावउँ बारा॥

taba mana haraṣi bacana kaha rāū| muni asa kṛpā na kīnhihu kāū|| kehi kārana āgamana tumhārā| kahahu so karata na lāvaum̐ bārā||

असुर समूह सतावहिं मोही। मै जाचन आयउँ नृप तोही॥ अनुज समेत देहु रघुनाथा। निसिचर बध मैं होब सनाथा॥

asura samūha satāvahiṃ mohī| mai jācana āyaum̐ nṛpa tohī|| anuja sameta dehu raghunāthā| nisicara badha maiṃ hoba sanāthā||

दोहा २०७

देहु भूप मन हरषित तजहु मोह अग्यान। धर्म सुजस प्रभु तुम्ह कौं इन्ह कहँ अति कल्यान ॥ २०७॥

dehu bhūpa mana haraṣita tajahu moha agyāna| dharma sujasa prabhu tumha kauṃ inha kaham̐ ati kalyāna || 207||

सुनि राजा अति अप्रिय बानी। हृदय कंप मुख दुति कुमुलानी॥ चौथेंपन पायउँ सुत चारी। बिप्र बचन नहिं कहेहु बिचारी॥

suni rājā ati apriya bānī| hṛdaya kaṃpa mukha duti kumulānī|| cautheṃpana pāyaum̐ suta cārī| bipra bacana nahiṃ kahehu bicārī||

मागहु भूमि धेनु धन कोसा। सर्बस देउँ आजु सहरोसा॥ देह प्रान तें प्रिय कछु नाही। सोउ मुनि देउँ निमिष एक माही॥

māgahu bhūmi dhenu dhana kosā| sarbasa deum̐ āju saharosā|| deha prāna teṃ priya kachu nāhī| sou muni deum̐ nimiṣa eka māhī||

सब सुत प्रिय मोहि प्रान कि नाईं। राम देत नहिं बनइ गोसाई॥ कहँ निसिचर अति घोर कठोरा। कहँ सुंदर सुत परम किसोरा॥

saba suta priya mohi prāna ki nāīṃ| rāma deta nahiṃ banai gosāī|| kaham̐ nisicara ati ghora kaṭhorā| kaham̐ suṃdara suta parama kisorā||

सुनि नृप गिरा प्रेम रस सानी। हृदयँ हरष माना मुनि ग्यानी॥ तब बसिष्ट बहु निधि समुझावा। नृप संदेह नास कहँ पावा॥

suni nṛpa girā prema rasa sānī| hṛdayam̐ haraṣa mānā muni gyānī|| taba basiṣṭa bahu nidhi samujhāvā| nṛpa saṃdeha nāsa kaham̐ pāvā||

अति आदर दोउ तनय बोलाए। हृदयँ लाइ बहु भाँति सिखाए॥ मेरे प्रान नाथ सुत दोऊ। तुम्ह मुनि पिता आन नहिं कोऊ॥

ati ādara dou tanaya bolāe| hṛdayam̐ lāi bahu bhām̐ti sikhāe|| mere prāna nātha suta doū| tumha muni pitā āna nahiṃ koū||

दोहा २०८(क)

सौंपे भूप रिषिहि सुत बहु बिधि देइ असीस। जननी भवन गए प्रभु चले नाइ पद सीस ॥ २०८ (क)॥

sauṃpe bhūpa riṣihi suta bahu bidhi dei asīsa| jananī bhavana gae prabhu cale nāi pada sīsa || 208 (ka)||

सोरठा २०८(ख)

पुरुषसिंह दोउ बीर हरषि चले मुनि भय हरन। कृपासिंधु मतिधीर अखिल बिस्व कारन करन ॥ २०८ (ख)॥

puruṣasiṃha dou bīra haraṣi cale muni bhaya harana| kṛpāsiṃdhu matidhīra akhila bisva kārana karana || 208 (kha)||

अरुन नयन उर बाहु बिसाला। नील जलज तनु स्याम तमाला॥ कटि पट पीत कसें बर भाथा। रुचिर चाप सायक दुहुँ हाथा॥

aruna nayana ura bāhu bisālā| nīla jalaja tanu syāma tamālā|| kaṭi paṭa pīta kaseṃ bara bhāthā| rucira cāpa sāyaka duhum̐ hāthā||

स्याम गौर सुंदर दोउ भाई। बिस्बामित्र महानिधि पाई॥ प्रभु ब्रह्मन्यदेव मै जाना। मोहि निति पिता तजेहु भगवाना॥

syāma gaura suṃdara dou bhāī| bisbāmitra mahānidhi pāī|| prabhu brahmanyadeva mai jānā| mohi niti pitā tajehu bhagavānā||

चले जात मुनि दीन्हि दिखाई। सुनि ताड़का क्रोध करि धाई॥ एकहिं बान प्रान हरि लीन्हा। दीन जानि तेहि निज पद दीन्हा॥

cale jāta muni dīnhi dikhāī| suni tāṛakā krodha kari dhāī|| ekahiṃ bāna prāna hari līnhā| dīna jāni tehi nija pada dīnhā||

तब रिषि निज नाथहि जियँ चीन्ही। बिद्यानिधि कहुँ बिद्या दीन्ही॥ जाते लाग न छुधा पिपासा। अतुलित बल तनु तेज प्रकासा॥

taba riṣi nija nāthahi jiyam̐ cīnhī| bidyānidhi kahum̐ bidyā dīnhī|| jāte lāga na chudhā pipāsā| atulita bala tanu teja prakāsā||

दोहा २०९

आयुष सब समर्पि कै प्रभु निज आश्रम आनि। कंद मूल फल भोजन दीन्ह भगति हित जानि ॥ २०९॥

āyuṣa saba samarpi kai prabhu nija āśrama āni| kaṃda mūla phala bhojana dīnha bhagati hita jāni || 209||

प्रात कहा मुनि सन रघुराई। निर्भय जग्य करहु तुम्ह जाई॥ होम करन लागे मुनि झारी। आपु रहे मख कीं रखवारी॥

prāta kahā muni sana raghurāī| nirbhaya jagya karahu tumha jāī|| homa karana lāge muni jhārī| āpu rahe makha kīṃ rakhavārī||

सुनि मारीच निसाचर क्रोही। लै सहाय धावा मुनिद्रोही॥ बिनु फर बान राम तेहि मारा। सत जोजन गा सागर पारा॥

suni mārīca nisācara krohī| lai sahāya dhāvā munidrohī|| binu phara bāna rāma tehi mārā| sata jojana gā sāgara pārā||

पावक सर सुबाहु पुनि मारा। अनुज निसाचर कटकु सँघारा॥ मारि असुर द्विज निर्मयकारी। अस्तुति करहिं देव मुनि झारी॥

pāvaka sara subāhu puni mārā| anuja nisācara kaṭaku sam̐ghārā|| māri asura dvija nirmayakārī| astuti karahiṃ deva muni jhārī||

तहँ पुनि कछुक दिवस रघुराया। रहे कीन्हि बिप्रन्ह पर दाया॥ भगति हेतु बहु कथा पुराना। कहे बिप्र जद्यपि प्रभु जाना॥

taham̐ puni kachuka divasa raghurāyā| rahe kīnhi bipranha para dāyā|| bhagati hetu bahu kathā purānā| kahe bipra jadyapi prabhu jānā||

तब मुनि सादर कहा बुझाई। चरित एक प्रभु देखिअ जाई॥ धनुषजग्य मुनि रघुकुल नाथा। हरषि चले मुनिबर के साथा॥

taba muni sādara kahā bujhāī| carita eka prabhu dekhia jāī|| dhanuṣajagya muni raghukula nāthā| haraṣi cale munibara ke sāthā||

आश्रम एक दीख मग माहीं। खग मृग जीव जंतु तहँ नाहीं॥ पूछा मुनिहि सिला प्रभु देखी। सकल कथा मुनि कहा बिसेषी॥

āśrama eka dīkha maga māhīṃ| khaga mṛga jīva jaṃtu taham̐ nāhīṃ|| pūchā munihi silā prabhu dekhī| sakala kathā muni kahā biseṣī||

दोहा २१०

गौतम नारि श्राप बस उपल देह धरि धीर। चरन कमल रज चाहति कृपा करहु रघुबीर ॥ २१०॥

gautama nāri śrāpa basa upala deha dhari dhīra| carana kamala raja cāhati kṛpā karahu raghubīra || 210||

छंद १

परसत पद पावन सोक नसावन प्रगट भई तपपुंज सही। देखत रघुनायक जन सुख दायक सनमुख होइ कर जोरि रही॥ अति प्रेम अधीरा पुलक सरीरा मुख नहिं आवइ बचन कही। अतिसय बड़भागी चरनन्हि लागी जुगल नयन जलधार बही॥

parasata pada pāvana soka nasāvana pragaṭa bhaī tapapuṃja sahī| dekhata raghunāyaka jana sukha dāyaka sanamukha hoi kara jori rahī|| ati prema adhīrā pulaka sarīrā mukha nahiṃ āvai bacana kahī| atisaya baṛabhāgī carananhi lāgī jugala nayana jaladhāra bahī||

दोहा २

धीरजु मन कीन्हा प्रभु कहुँ चीन्हा रघुपति कृपाँ भगति पाई। अति निर्मल बानीं अस्तुति ठानी ग्यानगम्य जय रघुराई॥ मै नारि अपावन प्रभु जग पावन रावन रिपु जन सुखदाई। राजीव बिलोचन भव भय मोचन पाहि पाहि सरनहिं आई॥

dhīraju mana kīnhā prabhu kahum̐ cīnhā raghupati kṛpām̐ bhagati pāī| ati nirmala bānīṃ astuti ṭhānī gyānagamya jaya raghurāī|| mai nāri apāvana prabhu jaga pāvana rāvana ripu jana sukhadāī| rājīva bilocana bhava bhaya mocana pāhi pāhi saranahiṃ āī||

मुनि श्राप जो दीन्हा अति भल कीन्हा परम अनुग्रह मैं माना। देखेउँ भरि लोचन हरि भवमोचन इहइ लाभ संकर जाना॥ बिनती प्रभु मोरी मैं मति भोरी नाथ न मागउँ बर आना। पद कमल परागा रस अनुरागा मम मन मधुप करै पाना।

muni śrāpa jo dīnhā ati bhala kīnhā parama anugraha maiṃ mānā| dekheum̐ bhari locana hari bhavamocana ihai lābha saṃkara jānā|| binatī prabhu morī maiṃ mati bhorī nātha na māgaum̐ bara ānā| pada kamala parāgā rasa anurāgā mama mana madhupa karai pānā|

जेहिं पद सुरसरिता परम पुनीता प्रगट भई सिव सीस धरी।

jehiṃ pada surasaritā parama punītā pragaṭa bhaī siva sīsa dharī|

सोरठा ४

सोइ पद पंकज जेहि पूजत अज मम सिर धरेउ कृपाल हरी॥ एहि भाँति सिधारी गौतम नारी बार बार हरि चरन परी। जो अति मन भावा सो बरु पावा गै पतिलोक अनंद भरी॥

soi pada paṃkaja jehi pūjata aja mama sira dhareu kṛpāla harī|| ehi bhām̐ti sidhārī gautama nārī bāra bāra hari carana parī| jo ati mana bhāvā so baru pāvā gai patiloka anaṃda bharī||

दोहा २११

अस प्रभु दीनबंधु हरि कारन रहित दयाल। तुलसिदास सठ तेहि भजु छाड़ि कपट जंजाल ॥ २११॥

asa prabhu dīnabaṃdhu hari kārana rahita dayāla| tulasidāsa saṭha tehi bhaju chāṛi kapaṭa jaṃjāla || 211||

चले राम लछिमन मुनि संगा। गए जहाँ जग पावनि गंगा॥ गाधिसूनु सब कथा सुनाई। जेहि प्रकार सुरसरि महि आई॥

cale rāma lachimana muni saṃgā| gae jahām̐ jaga pāvani gaṃgā|| gādhisūnu saba kathā sunāī| jehi prakāra surasari mahi āī||

तब प्रभु रिषिन्ह समेत नहाए। बिबिध दान महिदेवन्हि पाए॥ हरषि चले मुनि बृंद सहाया। बेगि बिदेह नगर निअराया॥

taba prabhu riṣinha sameta nahāe| bibidha dāna mahidevanhi pāe|| haraṣi cale muni bṛṃda sahāyā| begi bideha nagara niarāyā||

पुर रम्यता राम जब देखी। हरषे अनुज समेत बिसेषी॥

pura ramyatā rāma jaba dekhī| haraṣe anuja sameta biseṣī||

गुंजत मंजु मत्त रस भृंगा। कूजत कल बहुबरन बिहंगा॥ बरन बरन बिकसे बन जाता। त्रिबिध समीर सदा सुखदाता॥

guṃjata maṃju matta rasa bhṛṃgā| kūjata kala bahubarana bihaṃgā|| barana barana bikase bana jātā| tribidha samīra sadā sukhadātā||

दोहा २१२

सुमन बाटिका बाग बन बिपुल बिहंग निवास। फूलत फलत सुपल्लवत सोहत पुर चहुँ पास ॥ २१२॥

sumana bāṭikā bāga bana bipula bihaṃga nivāsa| phūlata phalata supallavata sohata pura cahum̐ pāsa || 212||

बनइ न बरनत नगर निकाई। जहाँ जाइ मन तहँइँ लोभाई॥ चारु बजारु बिचित्र अँबारी। मनिमय बिधि जनु स्वकर सँवारी॥

banai na baranata nagara nikāī| jahām̐ jāi mana taham̐im̐ lobhāī|| cāru bajāru bicitra am̐bārī| manimaya bidhi janu svakara sam̐vārī||

धनिक बनिक बर धनद समाना। बैठ सकल बस्तु लै नाना॥ चौहट सुंदर गलीं सुहाई। संतत रहहिं सुगंध सिंचाई॥

dhanika banika bara dhanada samānā| baiṭha sakala bastu lai nānā|| cauhaṭa suṃdara galīṃ suhāī| saṃtata rahahiṃ sugaṃdha siṃcāī||

मंगलमय मंदिर सब केरें। चित्रित जनु रतिनाथ चितेरें॥ पुर नर नारि सुभग सुचि संता। धरमसील ग्यानी गुनवंता॥

maṃgalamaya maṃdira saba kereṃ| citrita janu ratinātha citereṃ|| pura nara nāri subhaga suci saṃtā| dharamasīla gyānī gunavaṃtā||

अति अनूप जहँ जनक निवासू। बिथकहिं बिबुध बिलोकि बिलासू॥ होत चकित चित कोट बिलोकी। सकल भुवन सोभा जनु रोकी॥

ati anūpa jaham̐ janaka nivāsū| bithakahiṃ bibudha biloki bilāsū|| hota cakita cita koṭa bilokī| sakala bhuvana sobhā janu rokī||

दोहा २१३

धवल धाम मनि पुरट पट सुघटित नाना भाँति। सिय निवास सुंदर सदन सोभा किमि कहि जाति ॥ २१३॥

dhavala dhāma mani puraṭa paṭa sughaṭita nānā bhām̐ti| siya nivāsa suṃdara sadana sobhā kimi kahi jāti || 213||

सुभग द्वार सब कुलिस कपाटा। भूप भीर नट मागध भाटा॥ बनी बिसाल बाजि गज साला। हय गय रथ संकुल सब काला॥

subhaga dvāra saba kulisa kapāṭā| bhūpa bhīra naṭa māgadha bhāṭā|| banī bisāla bāji gaja sālā| haya gaya ratha saṃkula saba kālā||

सूर सचिव सेनप बहुतेरे। नृपगृह सरिस सदन सब केरे॥ पुर बाहेर सर सारित समीपा। उतरे जहँ तहँ बिपुल महीपा॥

sūra saciva senapa bahutere| nṛpagṛha sarisa sadana saba kere|| pura bāhera sara sārita samīpā| utare jaham̐ taham̐ bipula mahīpā||

देखि अनूप एक अँवराई। सब सुपास सब भाँति सुहाई॥ कौसिक कहेउ मोर मनु माना। इहाँ रहिअ रघुबीर सुजाना॥

dekhi anūpa eka am̐varāī| saba supāsa saba bhām̐ti suhāī|| kausika kaheu mora manu mānā| ihām̐ rahia raghubīra sujānā||

भलेहिं नाथ कहि कृपानिकेता। उतरे तहँ मुनिबृंद समेता॥ बिस्वामित्र महामुनि आए। समाचार मिथिलापति पाए॥

bhalehiṃ nātha kahi kṛpāniketā| utare taham̐ munibṛṃda sametā|| bisvāmitra mahāmuni āe| samācāra mithilāpati pāe||

दोहा २१४

संग सचिव सुचि भूरि भट भूसुर बर गुर ग्याति। चले मिलन मुनिनायकहि मुदित राउ एहि भाँति ॥ २१४॥

saṃga saciva suci bhūri bhaṭa bhūsura bara gura gyāti| cale milana munināyakahi mudita rāu ehi bhām̐ti || 214||

कीन्ह प्रनामु चरन धरि माथा। दीन्हि असीस मुदित मुनिनाथा॥ बिप्रबृंद सब सादर बंदे। जानि भाग्य बड़ राउ अनंदे॥

kīnha pranāmu carana dhari māthā| dīnhi asīsa mudita munināthā|| biprabṛṃda saba sādara baṃde| jāni bhāgya baṛa rāu anaṃde||

कुसल प्रस्न कहि बारहिं बारा। बिस्वामित्र नृपहि बैठारा॥ तेहि अवसर आए दोउ भाई। गए रहे देखन फुलवाई॥

kusala prasna kahi bārahiṃ bārā| bisvāmitra nṛpahi baiṭhārā|| tehi avasara āe dou bhāī| gae rahe dekhana phulavāī||

स्याम गौर मृदु बयस किसोरा। लोचन सुखद बिस्व चित चोरा॥ उठे सकल जब रघुपति आए। बिस्वामित्र निकट बैठाए॥

syāma gaura mṛdu bayasa kisorā| locana sukhada bisva cita corā|| uṭhe sakala jaba raghupati āe| bisvāmitra nikaṭa baiṭhāe||

भए सब सुखी देखि दोउ भ्राता। बारि बिलोचन पुलकित गाता॥ मूरति मधुर मनोहर देखी। भयउ बिदेहु बिदेहु बिसेषी॥

bhae saba sukhī dekhi dou bhrātā| bāri bilocana pulakita gātā|| mūrati madhura manohara dekhī| bhayau bidehu bidehu biseṣī||

दोहा २१५

प्रेम मगन मनु जानि नृपु करि बिबेकु धरि धीर। बोलेउ मुनि पद नाइ सिरु गदगद गिरा गभीर ॥ २१५॥

prema magana manu jāni nṛpu kari bibeku dhari dhīra| boleu muni pada nāi siru gadagada girā gabhīra || 215||

कहहु नाथ सुंदर दोउ बालक। मुनिकुल तिलक कि नृपकुल पालक॥ ब्रह्म जो निगम नेति कहि गावा। उभय बेष धरि की सोइ आवा॥

kahahu nātha suṃdara dou bālaka| munikula tilaka ki nṛpakula pālaka|| brahma jo nigama neti kahi gāvā| ubhaya beṣa dhari kī soi āvā||

सहज बिरागरुप मनु मोरा। थकित होत जिमि चंद चकोरा॥ ताते प्रभु पूछउँ सतिभाऊ। कहहु नाथ जनि करहु दुराऊ॥

sahaja birāgarupa manu morā| thakita hota jimi caṃda cakorā|| tāte prabhu pūchaum̐ satibhāū| kahahu nātha jani karahu durāū||

इन्हहि बिलोकत अति अनुरागा। बरबस ब्रह्मसुखहि मन त्यागा॥ कह मुनि बिहसि कहेहु नृप नीका। बचन तुम्हार न होइ अलीका॥

inhahi bilokata ati anurāgā| barabasa brahmasukhahi mana tyāgā|| kaha muni bihasi kahehu nṛpa nīkā| bacana tumhāra na hoi alīkā||

ए प्रिय सबहि जहाँ लगि प्रानी। मन मुसुकाहिं रामु सुनि बानी॥ रघुकुल मनि दसरथ के जाए। मम हित लागि नरेस पठाए॥

e priya sabahi jahām̐ lagi prānī| mana musukāhiṃ rāmu suni bānī|| raghukula mani dasaratha ke jāe| mama hita lāgi naresa paṭhāe||

दोहा २१६

रामु लखनु दोउ बंधुबर रूप सील बल धाम। मख राखेउ सबु साखि जगु जिते असुर संग्राम ॥ २१६॥

rāmu lakhanu dou baṃdhubara rūpa sīla bala dhāma| makha rākheu sabu sākhi jagu jite asura saṃgrāma || 216||