Ayodhya Kand — अयोध्याकाण्ड

अयोध्याकाण्ड · दोहा २९४–३०५

साझा करें

भरत बचन सुनि देखि सुभाऊ। सहित समाज सराहत राऊ॥ सुगम अगम मृदु मंजु कठोरे। अरथु अमित अति आखर थोरे॥

bharata bacana suni dekhi subhāū| sahita samāja sarāhata rāū|| sugama agama mṛdu maṃju kaṭhore| arathu amita ati ākhara thore||

ज्यौ मुख मुकुर मुकुरु निज पानी। गहि न जाइ अस अदभुत बानी॥ भूप भरत मुनि सहित समाजू। गे जहँ बिबुध कुमुद द्विजराजू॥

jyau mukha mukura mukuru nija pānī| gahi na jāi asa adabhuta bānī|| bhūpa bharata muni sahita samājū| ge jaham̐ bibudha kumuda dvijarājū||

सुनि सुधि सोच बिकल सब लोगा। मनहुँ मीनगन नव जल जोगा॥ देवँ प्रथम कुलगुर गति देखी। निरखि बिदेह सनेह बिसेषी॥

suni sudhi soca bikala saba logā| manahum̐ mīnagana nava jala jogā|| devam̐ prathama kulagura gati dekhī| nirakhi bideha saneha biseṣī||

राम भगतिमय भरतु निहारे। सुर स्वारथी हहरि हियँ हारे॥ सब कोउ राम पेममय पेखा। भउ अलेख सोच बस लेखा॥

rāma bhagatimaya bharatu nihāre| sura svārathī hahari hiyam̐ hāre|| saba kou rāma pemamaya pekhā| bhau alekha soca basa lekhā||

दोहा २९४

रामु सनेह सकोच बस कह ससोच सुरराज। रचहु प्रपंचहि पंच मिलि नाहिं त भयउ अकाजु ॥ २९४॥

rāmu saneha sakoca basa kaha sasoca surarāja| racahu prapaṃcahi paṃca mili nāhiṃ ta bhayau akāju || 294||

सुरन्ह सुमिरि सारदा सराही। देबि देव सरनागत पाही॥ फेरि भरत मति करि निज माया। पालु बिबुध कुल करि छल छाया॥

suranha sumiri sāradā sarāhī| debi deva saranāgata pāhī|| pheri bharata mati kari nija māyā| pālu bibudha kula kari chala chāyā||

बिबुध बिनय सुनि देबि सयानी। बोली सुर स्वारथ जड़ जानी॥ मो सन कहहु भरत मति फेरू। लोचन सहस न सूझ सुमेरू॥

bibudha binaya suni debi sayānī| bolī sura svāratha jaṛa jānī|| mo sana kahahu bharata mati pherū| locana sahasa na sūjha sumerū||

बिधि हरि हर माया बड़ि भारी। सोउ न भरत मति सकइ निहारी॥

bidhi hari hara māyā baṛi bhārī| sou na bharata mati sakai nihārī||

सोरठा ३

सो मति मोहि कहत करु भोरी। चंदिनि कर कि चंडकर चोरी॥

so mati mohi kahata karu bhorī| caṃdini kara ki caṃḍakara corī||

भरत हृदयँ सिय राम निवासू। तहँ कि तिमिर जहँ तरनि प्रकासू॥ अस कहि सारद गइ बिधि लोका। बिबुध बिकल निसि मानहुँ कोका॥

bharata hṛdayam̐ siya rāma nivāsū| taham̐ ki timira jaham̐ tarani prakāsū|| asa kahi sārada gai bidhi lokā| bibudha bikala nisi mānahum̐ kokā||

दोहा २९५

सुर स्वारथी मलीन मन कीन्ह कुमंत्र कुठाटु। रचि प्रपंच माया प्रबल भय भ्रम अरति उचाटु ॥ २९५॥

sura svārathī malīna mana kīnha kumaṃtra kuṭhāṭu| raci prapaṃca māyā prabala bhaya bhrama arati ucāṭu || 295||

करि कुचालि सोचत सुरराजू। भरत हाथ सबु काजु अकाजू॥ गए जनकु रघुनाथ समीपा। सनमाने सब रबिकुल दीपा॥

kari kucāli socata surarājū| bharata hātha sabu kāju akājū|| gae janaku raghunātha samīpā| sanamāne saba rabikula dīpā||

समय समाज धरम अबिरोधा। बोले तब रघुबंस पुरोधा॥ जनक भरत संबादु सुनाई। भरत कहाउति कही सुहाई॥

samaya samāja dharama abirodhā| bole taba raghubaṃsa purodhā|| janaka bharata saṃbādu sunāī| bharata kahāuti kahī suhāī||

तात राम जस आयसु देहू। सो सबु करै मोर मत एहू॥ सुनि रघुनाथ जोरि जुग पानी। बोले सत्य सरल मृदु बानी॥

tāta rāma jasa āyasu dehū| so sabu karai mora mata ehū|| suni raghunātha jori juga pānī| bole satya sarala mṛdu bānī||

बिद्यमान आपुनि मिथिलेसू। मोर कहब सब भाँति भदेसू॥ राउर राय रजायसु होई। राउरि सपथ सही सिर सोई॥

bidyamāna āpuni mithilesū| mora kahaba saba bhām̐ti bhadesū|| rāura rāya rajāyasu hoī| rāuri sapatha sahī sira soī||

दोहा २९६

राम सपथ सुनि मुनि जनकु सकुचे सभा समेत। सकल बिलोकत भरत मुखु बनइ न उतरु देत ॥ २९६॥

rāma sapatha suni muni janaku sakuce sabhā sameta| sakala bilokata bharata mukhu banai na utaru deta || 296||

सभा सकुच बस भरत निहारी। रामबंधु धरि धीरजु भारी॥ कुसमउ देखि सनेहु सँभारा। बढ़त बिंधि जिमि घटज निवारा॥

sabhā sakuca basa bharata nihārī| rāmabaṃdhu dhari dhīraju bhārī|| kusamau dekhi sanehu sam̐bhārā| baṛhata biṃdhi jimi ghaṭaja nivārā||

सोरठा २

सोक कनकलोचन मति छोनी। हरी बिमल गुन गन जगजोनी॥ भरत बिबेक बराहँ बिसाला। अनायास उधरी तेहि काला॥

soka kanakalocana mati chonī| harī bimala guna gana jagajonī|| bharata bibeka barāham̐ bisālā| anāyāsa udharī tehi kālā||

करि प्रनामु सब कहँ कर जोरे। रामु राउ गुर साधु निहोरे॥ छमब आजु अति अनुचित मोरा। कहउँ बदन मृदु बचन कठोरा॥

kari pranāmu saba kaham̐ kara jore| rāmu rāu gura sādhu nihore|| chamaba āju ati anucita morā| kahaum̐ badana mṛdu bacana kaṭhorā||

हियँ सुमिरी सारदा सुहाई। मानस तें मुख पंकज आई॥ बिमल बिबेक धरम नय साली। भरत भारती मंजु मराली॥

hiyam̐ sumirī sāradā suhāī| mānasa teṃ mukha paṃkaja āī|| bimala bibeka dharama naya sālī| bharata bhāratī maṃju marālī||

दोहा २९७

निरखि बिबेक बिलोचनन्हि सिथिल सनेहँ समाजु। करि प्रनामु बोले भरतु सुमिरि सीय रघुराजु ॥ २९७॥

nirakhi bibeka bilocananhi sithila saneham̐ samāju| kari pranāmu bole bharatu sumiri sīya raghurāju || 297||

प्रभु पितु मातु सुह्रद गुर स्वामी। पूज्य परम हित अतंरजामी॥ सरल सुसाहिबु सील निधानू। प्रनतपाल सर्बग्य सुजानू॥

prabhu pitu mātu suhrada gura svāmī| pūjya parama hita ataṃrajāmī|| sarala susāhibu sīla nidhānū| pranatapāla sarbagya sujānū||

समरथ सरनागत हितकारी। गुनगाहकु अवगुन अघ हारी॥ स्वामि गोसाँइहि सरिस गोसाई। मोहि समान मैं साइँ दोहाई॥

samaratha saranāgata hitakārī| gunagāhaku avaguna agha hārī|| svāmi gosām̐ihi sarisa gosāī| mohi samāna maiṃ sāim̐ dohāī||

प्रभु पितु बचन मोह बस पेली। आयउँ इहाँ समाजु सकेली॥ जग भल पोच ऊँच अरु नीचू। अमिअ अमरपद माहुरु मीचू॥

prabhu pitu bacana moha basa pelī| āyaum̐ ihām̐ samāju sakelī|| jaga bhala poca ūm̐ca aru nīcū| amia amarapada māhuru mīcū||

राम रजाइ मेट मन माहीं। देखा सुना कतहुँ कोउ नाहीं॥

rāma rajāi meṭa mana māhīṃ| dekhā sunā katahum̐ kou nāhīṃ||

सोरठा ४

सो मैं सब बिधि कीन्हि ढिठाई। प्रभु मानी सनेह सेवकाई॥

so maiṃ saba bidhi kīnhi ḍhiṭhāī| prabhu mānī saneha sevakāī||

दोहा २९८

कृपाँ भलाई आपनी नाथ कीन्ह भल मोर। दूषन भे भूषन सरिस सुजसु चारु चहु ओर ॥ २९८॥

kṛpām̐ bhalāī āpanī nātha kīnha bhala mora| dūṣana bhe bhūṣana sarisa sujasu cāru cahu ora || 298||

राउरि रीति सुबानि बड़ाई। जगत बिदित निगमागम गाई॥ कूर कुटिल खल कुमति कलंकी। नीच निसील निरीस निसंकी॥

rāuri rīti subāni baṛāī| jagata bidita nigamāgama gāī|| kūra kuṭila khala kumati kalaṃkī| nīca nisīla nirīsa nisaṃkī||

तेउ सुनि सरन सामुहें आए। सकृत प्रनामु किहें अपनाए॥ देखि दोष कबहुँ न उर आने। सुनि गुन साधु समाज बखाने॥

teu suni sarana sāmuheṃ āe| sakṛta pranāmu kiheṃ apanāe|| dekhi doṣa kabahum̐ na ura āne| suni guna sādhu samāja bakhāne||

को साहिब सेवकहि नेवाजी। आपु समाज साज सब साजी॥ निज करतूति न समुझिअ सपनें। सेवक सकुच सोचु उर अपनें॥

ko sāhiba sevakahi nevājī| āpu samāja sāja saba sājī|| nija karatūti na samujhia sapaneṃ| sevaka sakuca socu ura apaneṃ||

सोरठा ४

सो गोसाइँ नहि दूसर कोपी। भुजा उठाइ कहउँ पन रोपी॥ पसु नाचत सुक पाठ प्रबीना। गुन गति नट पाठक आधीना॥

so gosāim̐ nahi dūsara kopī| bhujā uṭhāi kahaum̐ pana ropī|| pasu nācata suka pāṭha prabīnā| guna gati naṭa pāṭhaka ādhīnā||

दोहा २९९

यों सुधारि सनमानि जन किए साधु सिरमोर। को कृपाल बिनु पालिहै बिरिदावलि बरजोर ॥ २९९॥

yoṃ sudhāri sanamāni jana kie sādhu siramora| ko kṛpāla binu pālihai biridāvali barajora || 299||

सोरठा १

सोक सनेहँ कि बाल सुभाएँ। आयउँ लाइ रजायसु बाएँ॥ तबहुँ कृपाल हेरि निज ओरा। सबहि भाँति भल मानेउ मोरा॥

soka saneham̐ ki bāla subhāem̐| āyaum̐ lāi rajāyasu bāem̐|| tabahum̐ kṛpāla heri nija orā| sabahi bhām̐ti bhala māneu morā||

देखेउँ पाय सुमंगल मूला। जानेउँ स्वामि सहज अनुकूला॥ बड़ें समाज बिलोकेउँ भागू। बड़ीं चूक साहिब अनुरागू॥

dekheum̐ pāya sumaṃgala mūlā| jāneum̐ svāmi sahaja anukūlā|| baṛeṃ samāja bilokeum̐ bhāgū| baṛīṃ cūka sāhiba anurāgū||

कृपा अनुग्रह अंगु अघाई। कीन्हि कृपानिधि सब अधिकाई॥ राखा मोर दुलार गोसाईं। अपनें सील सुभायँ भलाईं॥

kṛpā anugraha aṃgu aghāī| kīnhi kṛpānidhi saba adhikāī|| rākhā mora dulāra gosāīṃ| apaneṃ sīla subhāyam̐ bhalāīṃ||

नाथ निपट मैं कीन्हि ढिठाई। स्वामि समाज सकोच बिहाई॥ अबिनय बिनय जथारुचि बानी। छमिहि देउ अति आरति जानी॥

nātha nipaṭa maiṃ kīnhi ḍhiṭhāī| svāmi samāja sakoca bihāī|| abinaya binaya jathāruci bānī| chamihi deu ati ārati jānī||

दोहा ३००

सुह्रद सुजान सुसाहिबहि बहुत कहब बड़ि खोरि। आयसु देइअ देव अब सबइ सुधारी मोरि ॥ ३००॥

suhrada sujāna susāhibahi bahuta kahaba baṛi khori| āyasu deia deva aba sabai sudhārī mori || 300||

प्रभु पद पदुम पराग दोहाई। सत्य सुकृत सुख सीवँ सुहाई॥

prabhu pada paduma parāga dohāī| satya sukṛta sukha sīvam̐ suhāī||

सोरठा १

सो करि कहउँ हिए अपने की। रुचि जागत सोवत सपने की॥

so kari kahaum̐ hie apane kī| ruci jāgata sovata sapane kī||

सहज सनेहँ स्वामि सेवकाई। स्वारथ छल फल चारि बिहाई॥ अग्या सम न सुसाहिब सेवा। सो प्रसादु जन पावै देवा॥

sahaja saneham̐ svāmi sevakāī| svāratha chala phala cāri bihāī|| agyā sama na susāhiba sevā| so prasādu jana pāvai devā||

अस कहि प्रेम बिबस भए भारी। पुलक सरीर बिलोचन बारी॥ प्रभु पद कमल गहे अकुलाई। समउ सनेहु न सो कहि जाई॥

asa kahi prema bibasa bhae bhārī| pulaka sarīra bilocana bārī|| prabhu pada kamala gahe akulāī| samau sanehu na so kahi jāī||

कृपासिंधु सनमानि सुबानी। बैठाए समीप गहि पानी॥ भरत बिनय सुनि देखि सुभाऊ। सिथिल सनेहँ सभा रघुराऊ॥

kṛpāsiṃdhu sanamāni subānī| baiṭhāe samīpa gahi pānī|| bharata binaya suni dekhi subhāū| sithila saneham̐ sabhā raghurāū||

छंद

रघुराउ सिथिल सनेहेँं साधु समाज मुनि मिथिला धनी। मन महुँ सराहत भरत भायप भगति को महिमा घनी॥ भरतहि प्रसंसत बिबुध बरषत सुमन मानस मलिन से। तुलसी बिकल सब लोग सुनि सकुचे निसागम नलिन से॥

raghurāu sithila sanehem̐ṃ sādhu samāja muni mithilā dhanī| mana mahum̐ sarāhata bharata bhāyapa bhagati ko mahimā ghanī|| bharatahi prasaṃsata bibudha baraṣata sumana mānasa malina se| tulasī bikala saba loga suni sakuce nisāgama nalina se||

सोरठा ३०१

देखि दुखारी दीन दुहु समाज नर नारि सब। मघवा महा मलीन मुए मारि मंगल चहत ॥ ३०१॥

dekhi dukhārī dīna duhu samāja nara nāri saba| maghavā mahā malīna mue māri maṃgala cahata || 301||

कपट कुचालि सीवँ सुरराजू। पर अकाज प्रिय आपन काजू॥ काक समान पाकरिपु रीती। छली मलीन कतहुँ न प्रतीती॥

kapaṭa kucāli sīvam̐ surarājū| para akāja priya āpana kājū|| kāka samāna pākaripu rītī| chalī malīna katahum̐ na pratītī||

प्रथम कुमत करि कपटु सँकेला। सो उचाटु सब कें सिर मेला॥ सुरमायाँ सब लोग बिमोहे। राम प्रेम अतिसय न बिछोहे॥

prathama kumata kari kapaṭu sam̐kelā| so ucāṭu saba keṃ sira melā|| suramāyām̐ saba loga bimohe| rāma prema atisaya na bichohe||

भय उचाट बस मन थिर नाहीं। छन बन रुचि छन सदन सोहाहीं॥ दुबिध मनोगति प्रजा दुखारी। सरित सिंधु संगम जनु बारी॥

bhaya ucāṭa basa mana thira nāhīṃ| chana bana ruci chana sadana sohāhīṃ|| dubidha manogati prajā dukhārī| sarita siṃdhu saṃgama janu bārī||

दुचित कतहुँ परितोषु न लहहीं। एक एक सन मरमु न कहहीं॥ लखि हियँ हँसि कह कृपानिधानू। सरिस स्वान मघवान जुबानू॥

ducita katahum̐ paritoṣu na lahahīṃ| eka eka sana maramu na kahahīṃ|| lakhi hiyam̐ ham̐si kaha kṛpānidhānū| sarisa svāna maghavāna jubānū||

दोहा ३०२

भरतु जनकु मुनिजन सचिव साधु सचेत बिहाइ। लागि देवमाया सबहि जथाजोगु जनु पाइ ॥ ३०२॥

bharatu janaku munijana saciva sādhu saceta bihāi| lāgi devamāyā sabahi jathājogu janu pāi || 302||

कृपासिंधु लखि लोग दुखारे। निज सनेहँ सुरपति छल भारे॥ सभा राउ गुर महिसुर मंत्री। भरत भगति सब कै मति जंत्री॥

kṛpāsiṃdhu lakhi loga dukhāre| nija saneham̐ surapati chala bhāre|| sabhā rāu gura mahisura maṃtrī| bharata bhagati saba kai mati jaṃtrī||

रामहि चितवत चित्र लिखे से। सकुचत बोलत बचन सिखे से॥ भरत प्रीति नति बिनय बड़ाई। सुनत सुखद बरनत कठिनाई॥

rāmahi citavata citra likhe se| sakucata bolata bacana sikhe se|| bharata prīti nati binaya baṛāī| sunata sukhada baranata kaṭhināī||

जासु बिलोकि भगति लवलेसू। प्रेम मगन मुनिगन मिथिलेसू॥ महिमा तासु कहै किमि तुलसी। भगति सुभायँ सुमति हियँ हुलसी॥

jāsu biloki bhagati lavalesū| prema magana munigana mithilesū|| mahimā tāsu kahai kimi tulasī| bhagati subhāyam̐ sumati hiyam̐ hulasī||

आपु छोटि महिमा बड़ि जानी। कबिकुल कानि मानि सकुचानी॥ कहि न सकति गुन रुचि अधिकाई। मति गति बाल बचन की नाई॥

āpu choṭi mahimā baṛi jānī| kabikula kāni māni sakucānī|| kahi na sakati guna ruci adhikāī| mati gati bāla bacana kī nāī||

दोहा ३०३

भरत बिमल जसु बिमल बिधु सुमति चकोरकुमारि। उदित बिमल जन हृदय नभ एकटक रही निहारि ॥ ३०३॥

bharata bimala jasu bimala bidhu sumati cakorakumāri| udita bimala jana hṛdaya nabha ekaṭaka rahī nihāri || 303||

भरत सुभाउ न सुगम निगमहूँ। लघु मति चापलता कबि छमहूँ॥ कहत सुनत सति भाउ भरत को। सीय राम पद होइ न रत को॥

bharata subhāu na sugama nigamahūm̐| laghu mati cāpalatā kabi chamahūm̐|| kahata sunata sati bhāu bharata ko| sīya rāma pada hoi na rata ko||

सुमिरत भरतहि प्रेमु राम को। जेहि न सुलभ तेहि सरिस बाम को॥ देखि दयाल दसा सबही की। राम सुजान जानि जन जी की॥

sumirata bharatahi premu rāma ko| jehi na sulabha tehi sarisa bāma ko|| dekhi dayāla dasā sabahī kī| rāma sujāna jāni jana jī kī||

धरम धुरीन धीर नय नागर। सत्य सनेह सील सुख सागर॥ देसु काल लखि समउ समाजू। नीति प्रीति पालक रघुराजू॥

dharama dhurīna dhīra naya nāgara| satya saneha sīla sukha sāgara|| desu kāla lakhi samau samājū| nīti prīti pālaka raghurājū||

बोले बचन बानि सरबसु से। हित परिनाम सुनत ससि रसु से॥ तात भरत तुम्ह धरम धुरीना। लोक बेद बिद प्रेम प्रबीना॥

bole bacana bāni sarabasu se| hita parināma sunata sasi rasu se|| tāta bharata tumha dharama dhurīnā| loka beda bida prema prabīnā||

दोहा ३०४

करम बचन मानस बिमल तुम्ह समान तुम्ह तात। गुर समाज लघु बंधु गुन कुसमयँ किमि कहि जात ॥ ३०४॥

karama bacana mānasa bimala tumha samāna tumha tāta| gura samāja laghu baṃdhu guna kusamayam̐ kimi kahi jāta || 304||

जानहु तात तरनि कुल रीती। सत्यसंध पितु कीरति प्रीती॥ समउ समाजु लाज गुरुजन की। उदासीन हित अनहित मन की॥

jānahu tāta tarani kula rītī| satyasaṃdha pitu kīrati prītī|| samau samāju lāja gurujana kī| udāsīna hita anahita mana kī||

तुम्हहि बिदित सबही कर करमू। आपन मोर परम हित धरमू। मोहि सब भाँति भरोस तुम्हारा। तदपि कहउँ अवसर अनुसारा॥

tumhahi bidita sabahī kara karamū| āpana mora parama hita dharamū| mohi saba bhām̐ti bharosa tumhārā| tadapi kahaum̐ avasara anusārā||

तात तात बिनु बात हमारी। केवल गुरुकुल कृपाँ सँभारी॥ नतरु प्रजा परिजन परिवारू। हमहि सहित सबु होत खुआरू॥

tāta tāta binu bāta hamārī| kevala gurukula kṛpām̐ sam̐bhārī|| nataru prajā parijana parivārū| hamahi sahita sabu hota khuārū||

जौं बिनु अवसर अथवँ दिनेसू। जग केहि कहहु न होइ कलेसू॥ तस उतपातु तात बिधि कीन्हा। मुनि मिथिलेस राखि सबु लीन्हा॥

jauṃ binu avasara athavam̐ dinesū| jaga kehi kahahu na hoi kalesū|| tasa utapātu tāta bidhi kīnhā| muni mithilesa rākhi sabu līnhā||

दोहा ३०५

राज काज सब लाज पति धरम धरनि धन धाम। गुर प्रभाउ पालिहि सबहि भल होइहि परिनाम ॥ ३०५॥

rāja kāja saba lāja pati dharama dharani dhana dhāma| gura prabhāu pālihi sabahi bhala hoihi parināma || 305||

सहित समाज तुम्हार हमारा। घर बन गुर प्रसाद रखवारा मातु पिता गुर स्वामि निदेसू। सकल धरम धरनीधर सेसू॥

sahita samāja tumhāra hamārā| ghara bana gura prasāda rakhavārā mātu pitā gura svāmi nidesū| sakala dharama dharanīdhara sesū||

सोरठा २

सो तुम्ह करहु करावहु मोहू। तात तरनिकुल पालक होहू। साधक एक सकल सिधि देनी। कीरति सुगति भूतिमय बेनी॥

so tumha karahu karāvahu mohū| tāta taranikula pālaka hohū| sādhaka eka sakala sidhi denī| kīrati sugati bhūtimaya benī||

सोरठा ३

सो बिचारि सहि संकटु भारी। करहु प्रजा परिवारु सुखारी॥ बाँटी बिपति सबहिं मोहि भाई। तुम्हहि अवधि भरि बड़ि कठिनाई॥

so bicāri sahi saṃkaṭu bhārī| karahu prajā parivāru sukhārī|| bām̐ṭī bipati sabahiṃ mohi bhāī| tumhahi avadhi bhari baṛi kaṭhināī||