Ayodhya Kand — अयोध्याकाण्ड

अयोध्याकाण्ड · दोहा २६१–२७६

साझा करें

बिधि न सकेउ सहि मोर दुलारा। नीच बीचु जननी मिस पारा॥ यहउ कहत मोहि आजु न सोभा। अपनीं समुझि साधु सुचि को भा॥

bidhi na sakeu sahi mora dulārā| nīca bīcu jananī misa pārā|| yahau kahata mohi āju na sobhā| apanīṃ samujhi sādhu suci ko bhā||

मातु मंदि मैं साधु सुचाली। उर अस आनत कोटि कुचाली॥ फरइ कि कोदव बालि सुसाली। मुकुता प्रसव कि संबुक काली॥

mātu maṃdi maiṃ sādhu sucālī| ura asa ānata koṭi kucālī|| pharai ki kodava bāli susālī| mukutā prasava ki saṃbuka kālī||

सपनेहुँ दोसक लेसु न काहू। मोर अभाग उदधि अवगाहू॥ बिनु समुझें निज अघ परिपाकू। जारिउँ जायँ जननि कहि काकू॥

sapanehum̐ dosaka lesu na kāhū| mora abhāga udadhi avagāhū|| binu samujheṃ nija agha paripākū| jārium̐ jāyam̐ janani kahi kākū||

हृदयँ हेरि हारेउँ सब ओरा। एकहि भाँति भलेहिं भल मोरा॥ गुर गोसाइँ साहिब सिय रामू। लागत मोहि नीक परिनामू॥

hṛdayam̐ heri hāreum̐ saba orā| ekahi bhām̐ti bhalehiṃ bhala morā|| gura gosāim̐ sāhiba siya rāmū| lāgata mohi nīka parināmū||

दोहा २६१

साधु सभा गुर प्रभु निकट कहउँ सुथल सति भाउ। प्रेम प्रपंचु कि झूठ फुर जानहिं मुनि रघुराउ ॥ २६१॥

sādhu sabhā gura prabhu nikaṭa kahaum̐ suthala sati bhāu| prema prapaṃcu ki jhūṭha phura jānahiṃ muni raghurāu || 261||

भूपति मरन पेम पनु राखी। जननी कुमति जगतु सबु साखी॥ देखि न जाहि बिकल महतारी। जरहिं दुसह जर पुर नर नारी॥

bhūpati marana pema panu rākhī| jananī kumati jagatu sabu sākhī|| dekhi na jāhi bikala mahatārī| jarahiṃ dusaha jara pura nara nārī||

महीं सकल अनरथ कर मूला। सो सुनि समुझि सहिउँ सब सूला॥ सुनि बन गवनु कीन्ह रघुनाथा। करि मुनि बेष लखन सिय साथा॥ बिनु पानहिन्ह पयादेहि पाएँ। संकरु साखि रहेउँ एहि घाएँ॥ बहुरि निहार निषाद सनेहू। कुलिस कठिन उर भयउ न बेहू॥

mahīṃ sakala anaratha kara mūlā| so suni samujhi sahium̐ saba sūlā|| suni bana gavanu kīnha raghunāthā| kari muni beṣa lakhana siya sāthā|| binu pānahinha payādehi pāem̐| saṃkaru sākhi raheum̐ ehi ghāem̐|| bahuri nihāra niṣāda sanehū| kulisa kaṭhina ura bhayau na behū||

अब सबु आँखिन्ह देखेउँ आई। जिअत जीव जड़ सबइ सहाई॥ जिन्हहि निरखि मग साँपिनि बीछी। तजहिं बिषम बिषु तामस तीछी॥

aba sabu ām̐khinha dekheum̐ āī| jiata jīva jaṛa sabai sahāī|| jinhahi nirakhi maga sām̐pini bīchī| tajahiṃ biṣama biṣu tāmasa tīchī||

दोहा २६२

तेइ रघुनंदनु लखनु सिय अनहित लागे जाहि। तासु तनय तजि दुसह दुख दैउ सहावइ काहि ॥ २६२॥

tei raghunaṃdanu lakhanu siya anahita lāge jāhi| tāsu tanaya taji dusaha dukha daiu sahāvai kāhi || 262||

सुनि अति बिकल भरत बर बानी। आरति प्रीति बिनय नय सानी॥

suni ati bikala bharata bara bānī| ārati prīti binaya naya sānī||

सोरठा १

सोक मगन सब सभाँ खभारू। मनहुँ कमल बन परेउ तुसारू॥

soka magana saba sabhām̐ khabhārū| manahum̐ kamala bana pareu tusārū||

कहि अनेक बिधि कथा पुरानी। भरत प्रबोधु कीन्ह मुनि ग्यानी॥ बोले उचित बचन रघुनंदू। दिनकर कुल कैरव बन चंदू॥

kahi aneka bidhi kathā purānī| bharata prabodhu kīnha muni gyānī|| bole ucita bacana raghunaṃdū| dinakara kula kairava bana caṃdū||

तात जाँय जियँ करहु गलानी। ईस अधीन जीव गति जानी॥ तीनि काल तिभुअन मत मोरें। पुन्यसिलोक तात तर तोरे॥

tāta jām̐ya jiyam̐ karahu galānī| īsa adhīna jīva gati jānī|| tīni kāla tibhuana mata moreṃ| punyasiloka tāta tara tore||

उर आनत तुम्ह पर कुटिलाई। जाइ लोकु परलोकु नसाई॥

ura ānata tumha para kuṭilāī| jāi loku paraloku nasāī||

दोहा ४

दोसु देहिं जननिहि जड़ तेई। जिन्ह गुर साधु सभा नहिं सेई॥

dosu dehiṃ jananihi jaṛa teī| jinha gura sādhu sabhā nahiṃ seī||

दोहा २६३

मिटिहहिं पाप प्रपंच सब अखिल अमंगल भार। लोक सुजसु परलोक सुखु सुमिरत नामु तुम्हार ॥ २६३॥

miṭihahiṃ pāpa prapaṃca saba akhila amaṃgala bhāra| loka sujasu paraloka sukhu sumirata nāmu tumhāra || 263||

कहउँ सुभाउ सत्य सिव साखी। भरत भूमि रह राउरि राखी॥ तात कुतरक करहु जनि जाएँ। बैर पेम नहि दुरइ दुराएँ॥

kahaum̐ subhāu satya siva sākhī| bharata bhūmi raha rāuri rākhī|| tāta kutaraka karahu jani jāem̐| baira pema nahi durai durāem̐||

मुनि गन निकट बिहग मृग जाहीं। बाधक बधिक बिलोकि पराहीं॥ हित अनहित पसु पच्छिउ जाना। मानुष तनु गुन ग्यान निधाना॥

muni gana nikaṭa bihaga mṛga jāhīṃ| bādhaka badhika biloki parāhīṃ|| hita anahita pasu pacchiu jānā| mānuṣa tanu guna gyāna nidhānā||

तात तुम्हहि मैं जानउँ नीकें। करौं काह असमंजस जीकें॥ राखेउ रायँ सत्य मोहि त्यागी। तनु परिहरेउ पेम पन लागी॥

tāta tumhahi maiṃ jānaum̐ nīkeṃ| karauṃ kāha asamaṃjasa jīkeṃ|| rākheu rāyam̐ satya mohi tyāgī| tanu parihareu pema pana lāgī||

तासु बचन मेटत मन सोचू। तेहि तें अधिक तुम्हार सँकोचू॥ ता पर गुर मोहि आयसु दीन्हा। अवसि जो कहहु चहउँ सोइ कीन्हा॥

tāsu bacana meṭata mana socū| tehi teṃ adhika tumhāra sam̐kocū|| tā para gura mohi āyasu dīnhā| avasi jo kahahu cahaum̐ soi kīnhā||

दोहा २६४

मनु प्रसन्न करि सकुच तजि कहहु करौं सोइ आजु। सत्यसंध रघुबर बचन सुनि भा सुखी समाजु ॥ २६४॥

manu prasanna kari sakuca taji kahahu karauṃ soi āju| satyasaṃdha raghubara bacana suni bhā sukhī samāju || 264||

सुर गन सहित सभय सुरराजू। सोचहिं चाहत होन अकाजू॥ बनत उपाउ करत कछु नाहीं। राम सरन सब गे मन माहीं॥

sura gana sahita sabhaya surarājū| socahiṃ cāhata hona akājū|| banata upāu karata kachu nāhīṃ| rāma sarana saba ge mana māhīṃ||

बहुरि बिचारि परस्पर कहहीं। रघुपति भगत भगति बस अहहीं॥ सुधि करि अंबरीष दुरबासा। भे सुर सुरपति निपट निरासा॥

bahuri bicāri paraspara kahahīṃ| raghupati bhagata bhagati basa ahahīṃ|| sudhi kari aṃbarīṣa durabāsā| bhe sura surapati nipaṭa nirāsā||

सहे सुरन्ह बहु काल बिषादा। नरहरि किए प्रगट प्रहलादा॥ लगि लगि कान कहहिं धुनि माथा। अब सुर काज भरत के हाथा॥

sahe suranha bahu kāla biṣādā| narahari kie pragaṭa prahalādā|| lagi lagi kāna kahahiṃ dhuni māthā| aba sura kāja bharata ke hāthā||

आन उपाउ न देखिअ देवा। मानत रामु सुसेवक सेवा॥ हियँ सपेम सुमिरहु सब भरतहि। निज गुन सील राम बस करतहि॥

āna upāu na dekhia devā| mānata rāmu susevaka sevā|| hiyam̐ sapema sumirahu saba bharatahi| nija guna sīla rāma basa karatahi||

दोहा २६५

सुनि सुर मत सुरगुर कहेउ भल तुम्हार बड़ भागु। सकल सुमंगल मूल जग भरत चरन अनुरागु ॥ २६५॥

suni sura mata suragura kaheu bhala tumhāra baṛa bhāgu| sakala sumaṃgala mūla jaga bharata carana anurāgu || 265||

सीतापति सेवक सेवकाई। कामधेनु सय सरिस सुहाई॥ भरत भगति तुम्हरें मन आई। तजहु सोचु बिधि बात बनाई॥

sītāpati sevaka sevakāī| kāmadhenu saya sarisa suhāī|| bharata bhagati tumhareṃ mana āī| tajahu socu bidhi bāta banāī||

देखु देवपति भरत प्रभाऊ। सहज सुभायँ बिबस रघुराऊ॥ मन थिर करहु देव डरु नाहीं। भरतहि जानि राम परिछाहीं॥

dekhu devapati bharata prabhāū| sahaja subhāyam̐ bibasa raghurāū|| mana thira karahu deva ḍaru nāhīṃ| bharatahi jāni rāma parichāhīṃ||

सुनो सुरगुर सुर संमत सोचू। अंतरजामी प्रभुहि सकोचू॥ निज सिर भारु भरत जियँ जाना। करत कोटि बिधि उर अनुमाना॥

suno suragura sura saṃmata socū| aṃtarajāmī prabhuhi sakocū|| nija sira bhāru bharata jiyam̐ jānā| karata koṭi bidhi ura anumānā||

करि बिचारु मन दीन्ही ठीका। राम रजायस आपन नीका॥ निज पन तजि राखेउ पनु मोरा। छोहु सनेहु कीन्ह नहिं थोरा॥

kari bicāru mana dīnhī ṭhīkā| rāma rajāyasa āpana nīkā|| nija pana taji rākheu panu morā| chohu sanehu kīnha nahiṃ thorā||

दोहा २६६

कीन्ह अनुग्रह अमित अति सब बिधि सीतानाथ। करि प्रनामु बोले भरतु जोरि जलज जुग हाथ ॥ २६६॥

kīnha anugraha amita ati saba bidhi sītānātha| kari pranāmu bole bharatu jori jalaja juga hātha || 266||

कहौं कहावौं का अब स्वामी। कृपा अंबुनिधि अंतरजामी॥ गुर प्रसन्न साहिब अनुकूला। मिटी मलिन मन कलपित सूला॥

kahauṃ kahāvauṃ kā aba svāmī| kṛpā aṃbunidhi aṃtarajāmī|| gura prasanna sāhiba anukūlā| miṭī malina mana kalapita sūlā||

अपडर डरेउँ न सोच समूलें। रबिहि न दोसु देव दिसि भूलें॥ मोर अभागु मातु कुटिलाई। बिधि गति बिषम काल कठिनाई॥

apaḍara ḍareum̐ na soca samūleṃ| rabihi na dosu deva disi bhūleṃ|| mora abhāgu mātu kuṭilāī| bidhi gati biṣama kāla kaṭhināī||

पाउ रोपि सब मिलि मोहि घाला। प्रनतपाल पन आपन पाला॥ यह नइ रीति न राउरि होई। लोकहुँ बेद बिदित नहिं गोई॥

pāu ropi saba mili mohi ghālā| pranatapāla pana āpana pālā|| yaha nai rīti na rāuri hoī| lokahum̐ beda bidita nahiṃ goī||

जगु अनभल भल एकु गोसाईं। कहिअ होइ भल कासु भलाईं॥ देउ देवतरु सरिस सुभाऊ। सनमुख बिमुख न काहुहि काऊ॥

jagu anabhala bhala eku gosāīṃ| kahia hoi bhala kāsu bhalāīṃ|| deu devataru sarisa subhāū| sanamukha bimukha na kāhuhi kāū||

दोहा २६७

जाइ निकट पहिचानि तरु छाहँ समनि सब सोच। मागत अभिमत पाव जग राउ रंकु भल पोच ॥ २६७॥

jāi nikaṭa pahicāni taru chāham̐ samani saba soca| māgata abhimata pāva jaga rāu raṃku bhala poca || 267||

लखि सब बिधि गुर स्वामि सनेहू। मिटेउ छोभु नहिं मन संदेहू॥ अब करुनाकर कीजिअ सोई। जन हित प्रभु चित छोभु न होई॥

lakhi saba bidhi gura svāmi sanehū| miṭeu chobhu nahiṃ mana saṃdehū|| aba karunākara kījia soī| jana hita prabhu cita chobhu na hoī||

जो सेवकु साहिबहि सँकोची। निज हित चहइ तासु मति पोची॥ सेवक हित साहिब सेवकाई। करै सकल सुख लोभ बिहाई॥

jo sevaku sāhibahi sam̐kocī| nija hita cahai tāsu mati pocī|| sevaka hita sāhiba sevakāī| karai sakala sukha lobha bihāī||

स्वारथु नाथ फिरें सबही का। किएँ रजाइ कोटि बिधि नीका॥ यह स्वारथ परमारथ सारु। सकल सुकृत फल सुगति सिंगारु॥

svārathu nātha phireṃ sabahī kā| kiem̐ rajāi koṭi bidhi nīkā|| yaha svāratha paramāratha sāru| sakala sukṛta phala sugati siṃgāru||

देव एक बिनती सुनि मोरी। उचित होइ तस करब बहोरी॥ तिलक समाजु साजि सबु आना। करिअ सुफल प्रभु जौं मनु माना॥

deva eka binatī suni morī| ucita hoi tasa karaba bahorī|| tilaka samāju sāji sabu ānā| karia suphala prabhu jauṃ manu mānā||

दोहा २६८

सानुज पठइअ मोहि बन कीजिअ सबहि सनाथ। नतरु फेरिअहिं बंधु दोउ नाथ चलौं मैं साथ ॥ २६८॥

sānuja paṭhaia mohi bana kījia sabahi sanātha| nataru pheriahiṃ baṃdhu dou nātha calauṃ maiṃ sātha || 268||

नतरु जाहिं बन तीनिउ भाई। बहुरिअ सीय सहित रघुराई॥ जेहि बिधि प्रभु प्रसन्न मन होई। करुना सागर कीजिअ सोई॥

nataru jāhiṃ bana tīniu bhāī| bahuria sīya sahita raghurāī|| jehi bidhi prabhu prasanna mana hoī| karunā sāgara kījia soī||

देवँ दीन्ह सबु मोहि अभारु। मोरें नीति न धरम बिचारु॥ कहउँ बचन सब स्वारथ हेतू। रहत न आरत कें चित चेतू॥

devam̐ dīnha sabu mohi abhāru| moreṃ nīti na dharama bicāru|| kahaum̐ bacana saba svāratha hetū| rahata na ārata keṃ cita cetū||

उतरु देइ सुनि स्वामि रजाई। सो सेवकु लखि लाज लजाई॥ अस मैं अवगुन उदधि अगाधू। स्वामि सनेहँ सराहत साधू॥

utaru dei suni svāmi rajāī| so sevaku lakhi lāja lajāī|| asa maiṃ avaguna udadhi agādhū| svāmi saneham̐ sarāhata sādhū||

अब कृपाल मोहि सो मत भावा। सकुच स्वामि मन जाइँ न पावा॥ प्रभु पद सपथ कहउँ सति भाऊ। जग मंगल हित एक उपाऊ॥

aba kṛpāla mohi so mata bhāvā| sakuca svāmi mana jāim̐ na pāvā|| prabhu pada sapatha kahaum̐ sati bhāū| jaga maṃgala hita eka upāū||

दोहा

प्रभु प्रसन्न मन सकुच तजि जो जेहि आयसु देब।

prabhu prasanna mana sakuca taji jo jehi āyasu deba|

सोरठा २६९

सो सिर धरि धरि करिहि सबु मिटिहि अनट अवरेब ॥ २६९॥

so sira dhari dhari karihi sabu miṭihi anaṭa avareba || 269||

भरत बचन सुचि सुनि सुर हरषे। साधु सराहि सुमन सुर बरषे॥ असमंजस बस अवध नेवासी। प्रमुदित मन तापस बनबासी॥

bharata bacana suci suni sura haraṣe| sādhu sarāhi sumana sura baraṣe|| asamaṃjasa basa avadha nevāsī| pramudita mana tāpasa banabāsī||

चुपहिं रहे रघुनाथ सँकोची। प्रभु गति देखि सभा सब सोची॥ जनक दूत तेहि अवसर आए। मुनि बसिष्ठँ सुनि बेगि बोलाए॥

cupahiṃ rahe raghunātha sam̐kocī| prabhu gati dekhi sabhā saba socī|| janaka dūta tehi avasara āe| muni basiṣṭham̐ suni begi bolāe||

करि प्रनाम तिन्ह रामु निहारे। बेषु देखि भए निपट दुखारे॥ दूतन्ह मुनिबर बूझी बाता। कहहु बिदेह भूप कुसलाता॥

kari pranāma tinha rāmu nihāre| beṣu dekhi bhae nipaṭa dukhāre|| dūtanha munibara būjhī bātā| kahahu bideha bhūpa kusalātā||

सुनि सकुचाइ नाइ महि माथा। बोले चर बर जोरें हाथा॥ बूझब राउर सादर साईं। कुसल हेतु सो भयउ गोसाईं॥

suni sakucāi nāi mahi māthā| bole cara bara joreṃ hāthā|| būjhaba rāura sādara sāīṃ| kusala hetu so bhayau gosāīṃ||

दोहा २७०

नाहि त कोसल नाथ कें साथ कुसल गइ नाथ। मिथिला अवध बिसेष तें जगु सब भयउ अनाथ ॥ २७०॥

nāhi ta kosala nātha keṃ sātha kusala gai nātha| mithilā avadha biseṣa teṃ jagu saba bhayau anātha || 270||

कोसलपति गति सुनि जनकौरा। भे सब लोक सोक बस बौरा॥ जेहिं देखे तेहि समय बिदेहू। नामु सत्य अस लाग न केहू॥

kosalapati gati suni janakaurā| bhe saba loka soka basa baurā|| jehiṃ dekhe tehi samaya bidehū| nāmu satya asa lāga na kehū||

रानि कुचालि सुनत नरपालहि। सूझ न कछु जस मनि बिनु ब्यालहि॥ भरत राज रघुबर बनबासू। भा मिथिलेसहि हृदयँ हराँसू॥

rāni kucāli sunata narapālahi| sūjha na kachu jasa mani binu byālahi|| bharata rāja raghubara banabāsū| bhā mithilesahi hṛdayam̐ harām̐sū||

नृप बूझे बुध सचिव समाजू। कहहु बिचारि उचित का आजू॥ समुझि अवध असमंजस दोऊ। चलिअ कि रहिअ न कह कछु कोऊ॥

nṛpa būjhe budha saciva samājū| kahahu bicāri ucita kā ājū|| samujhi avadha asamaṃjasa doū| calia ki rahia na kaha kachu koū||

नृपहि धीर धरि हृदयँ बिचारी। पठए अवध चतुर चर चारी॥ बूझि भरत सति भाउ कुभाऊ। आएहु बेगि न होइ लखाऊ॥

nṛpahi dhīra dhari hṛdayam̐ bicārī| paṭhae avadha catura cara cārī|| būjhi bharata sati bhāu kubhāū| āehu begi na hoi lakhāū||

दोहा २७१

गए अवध चर भरत गति बूझि देखि करतूति। चले चित्रकूटहि भरतु चार चले तेरहूति ॥ २७१॥

gae avadha cara bharata gati būjhi dekhi karatūti| cale citrakūṭahi bharatu cāra cale terahūti || 271||

दूतन्ह आइ भरत कइ करनी। जनक समाज जथामति बरनी॥ सुनि गुर परिजन सचिव महीपति। भे सब सोच सनेहँ बिकल अति॥

dūtanha āi bharata kai karanī| janaka samāja jathāmati baranī|| suni gura parijana saciva mahīpati| bhe saba soca saneham̐ bikala ati||

धरि धीरजु करि भरत बड़ाई। लिए सुभट साहनी बोलाई॥ घर पुर देस राखि रखवारे। हय गय रथ बहु जान सँवारे॥

dhari dhīraju kari bharata baṛāī| lie subhaṭa sāhanī bolāī|| ghara pura desa rākhi rakhavāre| haya gaya ratha bahu jāna sam̐vāre||

दुघरी साधि चले ततकाला। किए बिश्रामु न मग महीपाला॥ भोरहिं आजु नहाइ प्रयागा। चले जमुन उतरन सबु लागा॥

dugharī sādhi cale tatakālā| kie biśrāmu na maga mahīpālā|| bhorahiṃ āju nahāi prayāgā| cale jamuna utarana sabu lāgā||

खबरि लेन हम पठए नाथा। तिन्ह कहि अस महि नायउ माथा॥ साथ किरात छ सातक दीन्हे। मुनिबर तुरत बिदा चर कीन्हे॥

khabari lena hama paṭhae nāthā| tinha kahi asa mahi nāyau māthā|| sātha kirāta cha sātaka dīnhe| munibara turata bidā cara kīnhe||

दोहा २७२

सुनत जनक आगवनु सबु हरषेउ अवध समाजु। रघुनंदनहि सकोचु बड़ सोच बिबस सुरराजु ॥ २७२॥

sunata janaka āgavanu sabu haraṣeu avadha samāju| raghunaṃdanahi sakocu baṛa soca bibasa surarāju || 272||

गरइ गलानि कुटिल कैकेई। काहि कहै केहि दूषनु देई॥ अस मन आनि मुदित नर नारी। भयउ बहोरि रहब दिन चारी॥

garai galāni kuṭila kaikeī| kāhi kahai kehi dūṣanu deī|| asa mana āni mudita nara nārī| bhayau bahori rahaba dina cārī||

एहि प्रकार गत बासर सोऊ। प्रात नहान लाग सबु कोऊ॥ करि मज्जनु पूजहिं नर नारी। गनप गौरि तिपुरारि तमारी॥

ehi prakāra gata bāsara soū| prāta nahāna lāga sabu koū|| kari majjanu pūjahiṃ nara nārī| ganapa gauri tipurāri tamārī||

रमा रमन पद बंदि बहोरी। बिनवहिं अंजुलि अंचल जोरी॥ राजा रामु जानकी रानी। आनँद अवधि अवध रजधानी॥

ramā ramana pada baṃdi bahorī| binavahiṃ aṃjuli aṃcala jorī|| rājā rāmu jānakī rānī| ānam̐da avadhi avadha rajadhānī||

सुबस बसउ फिरि सहित समाजा। भरतहि रामु करहुँ जुबराजा॥ एहि सुख सुधाँ सींची सब काहू। देव देहु जग जीवन लाहू॥

subasa basau phiri sahita samājā| bharatahi rāmu karahum̐ jubarājā|| ehi sukha sudhām̐ sīṃcī saba kāhū| deva dehu jaga jīvana lāhū||

दोहा २७३

गुर समाज भाइन्ह सहित राम राजु पुर होउ। अछत राम राजा अवध मरिअ माग सबु कोउ ॥ २७३॥

gura samāja bhāinha sahita rāma rāju pura hou| achata rāma rājā avadha maria māga sabu kou || 273||

सुनि सनेहमय पुरजन बानी। निंदहिं जोग बिरति मुनि ग्यानी॥ एहि बिधि नित्यकरम करि पुरजन। रामहि करहिं प्रनाम पुलकि तन॥

suni sanehamaya purajana bānī| niṃdahiṃ joga birati muni gyānī|| ehi bidhi nityakarama kari purajana| rāmahi karahiṃ pranāma pulaki tana||

ऊँच नीच मध्यम नर नारी। लहहिं दरसु निज निज अनुहारी॥ सावधान सबही सनमानहिं। सकल सराहत कृपानिधानहिं॥

ūm̐ca nīca madhyama nara nārī| lahahiṃ darasu nija nija anuhārī|| sāvadhāna sabahī sanamānahiṃ| sakala sarāhata kṛpānidhānahiṃ||

लरिकाइहि ते रघुबर बानी। पालत नीति प्रीति पहिचानी॥ सील सकोच सिंधु रघुराऊ। सुमुख सुलोचन सरल सुभाऊ॥

larikāihi te raghubara bānī| pālata nīti prīti pahicānī|| sīla sakoca siṃdhu raghurāū| sumukha sulocana sarala subhāū||

कहत राम गुन गन अनुरागे। सब निज भाग सराहन लागे॥ हम सम पुन्य पुंज जग थोरे। जिन्हहि रामु जानत करि मोरे॥

kahata rāma guna gana anurāge| saba nija bhāga sarāhana lāge|| hama sama punya puṃja jaga thore| jinhahi rāmu jānata kari more||

दोहा २७४

प्रेम मगन तेहि समय सब सुनि आवत मिथिलेसु। सहित सभा संभ्रम उठेउ रबिकुल कमल दिनेसु ॥ २७४॥

prema magana tehi samaya saba suni āvata mithilesu| sahita sabhā saṃbhrama uṭheu rabikula kamala dinesu || 274||

भाइ सचिव गुर पुरजन साथा। आगें गवनु कीन्ह रघुनाथा॥ गिरिबरु दीख जनकपति जबहीं। करि प्रनाम रथ त्यागेउ तबहीं॥

bhāi saciva gura purajana sāthā| āgeṃ gavanu kīnha raghunāthā|| giribaru dīkha janakapati jabahīṃ| kari pranāma ratha tyāgeu tabahīṃ||

राम दरस लालसा उछाहू। पथ श्रम लेसु कलेसु न काहू॥ मन तहँ जहँ रघुबर बैदेही। बिनु मन तन दुख सुख सुधि केही॥

rāma darasa lālasā uchāhū| patha śrama lesu kalesu na kāhū|| mana taham̐ jaham̐ raghubara baidehī| binu mana tana dukha sukha sudhi kehī||

आवत जनकु चले एहि भाँती। सहित समाज प्रेम मति माती॥ आए निकट देखि अनुरागे। सादर मिलन परसपर लागे॥

āvata janaku cale ehi bhām̐tī| sahita samāja prema mati mātī|| āe nikaṭa dekhi anurāge| sādara milana parasapara lāge||

लगे जनक मुनिजन पद बंदन। रिषिन्ह प्रनामु कीन्ह रघुनंदन॥ भाइन्ह सहित रामु मिलि राजहि। चले लवाइ समेत समाजहि॥

lage janaka munijana pada baṃdana| riṣinha pranāmu kīnha raghunaṃdana|| bhāinha sahita rāmu mili rājahi| cale lavāi sameta samājahi||

दोहा २७५

आश्रम सागर सांत रस पूरन पावन पाथु। सेन मनहुँ करुना सरित लिएँ जाहिं रघुनाथु ॥ २७५॥

āśrama sāgara sāṃta rasa pūrana pāvana pāthu| sena manahum̐ karunā sarita liem̐ jāhiṃ raghunāthu || 275||

बोरति ग्यान बिराग करारे। बचन ससोक मिलत नद नारे॥

borati gyāna birāga karāre| bacana sasoka milata nada nāre||

सोरठा १

सोच उसास समीर तंरगा। धीरज तट तरुबर कर भंगा॥

soca usāsa samīra taṃragā| dhīraja taṭa tarubara kara bhaṃgā||

बिषम बिषाद तोरावति धारा। भय भ्रम भवँर अबर्त अपारा॥ केवट बुध बिद्या बड़ि नावा। सकहिं न खेइ ऐक नहिं आवा॥

biṣama biṣāda torāvati dhārā| bhaya bhrama bhavam̐ra abarta apārā|| kevaṭa budha bidyā baṛi nāvā| sakahiṃ na khei aika nahiṃ āvā||

बनचर कोल किरात बिचारे। थके बिलोकि पथिक हियँ हारे॥ आश्रम उदधि मिली जब जाई। मनहुँ उठेउ अंबुधि अकुलाई॥

banacara kola kirāta bicāre| thake biloki pathika hiyam̐ hāre|| āśrama udadhi milī jaba jāī| manahum̐ uṭheu aṃbudhi akulāī||

सोरठा ४

सोक बिकल दोउ राज समाजा। रहा न ग्यानु न धीरजु लाजा॥ भूप रूप गुन सील सराही। रोवहिं सोक सिंधु अवगाही॥

soka bikala dou rāja samājā| rahā na gyānu na dhīraju lājā|| bhūpa rūpa guna sīla sarāhī| rovahiṃ soka siṃdhu avagāhī||

छंद

अवगाहि सोक समुद्र सोचहिं नारि नर ब्याकुल महा। दे दोष सकल सरोष बोलहिं बाम बिधि कीन्हों कहा॥ सुर सिद्ध तापस जोगिजन मुनि देखि दसा बिदेह की। तुलसी न समरथु कोउ जो तरि सके सरित सनेह की॥

avagāhi soka samudra socahiṃ nāri nara byākula mahā| de doṣa sakala saroṣa bolahiṃ bāma bidhi kīnhoṃ kahā|| sura siddha tāpasa jogijana muni dekhi dasā bideha kī| tulasī na samarathu kou jo tari sake sarita saneha kī||

सोरठा २७६

किए अमित उपदेस जहंँ तह लोगन्ह मुनिबरन्ह। धीरजु धरिअ नरेस कहेउ बसिष्ट बिदेह सन ॥ २७६॥

kie amita upadesa jahaṃm̐ taha loganha munibaranha| dhīraju dharia naresa kaheu basiṣṭa bideha sana || 276||