Lanka Kand — लङ्काकाण्ड

लङ्काकाण्ड · दोहा ७५–८९

साझा करें

मेघनाद के मुरछा जागी। पितहि बिलोकि लाज अति लागी॥ तुरत गयउ गिरिबर कंदरा। करौं अजय मख अस मन धरा॥

meghanāda ke murachā jāgī| pitahi biloki lāja ati lāgī|| turata gayau giribara kaṃdarā| karauṃ ajaya makha asa mana dharā||

इहाँ बिभीषन मंत्र बिचारा। सुनहु नाथ बल अतुल उदारा॥ मेघनाद मख करइ अपावन। खल मायावी देव सतावन॥

ihām̐ bibhīṣana maṃtra bicārā| sunahu nātha bala atula udārā|| meghanāda makha karai apāvana| khala māyāvī deva satāvana||

जौं प्रभु सिद्ध होइ सो पाइहि। नाथ बेगि पुनि जीति न जाइहि॥ सुनि रघुपति अतिसय सुख माना। बोले अंगदादि कपि नाना॥

jauṃ prabhu siddha hoi so pāihi| nātha begi puni jīti na jāihi|| suni raghupati atisaya sukha mānā| bole aṃgadādi kapi nānā||

लछिमन संग जाहु सब भाई। करहु बिधंस जग्य कर जाई॥ तुम्ह लछिमन मारेहु रन ओही। देखि सभय सुर दुख अति मोही॥

lachimana saṃga jāhu saba bhāī| karahu bidhaṃsa jagya kara jāī|| tumha lachimana mārehu rana ohī| dekhi sabhaya sura dukha ati mohī||

मारेहु तेहि बल बुद्धि उपाई। जेहिं छीजै निसिचर सुनु भाई॥ जामवंत सुग्रीव बिभीषन। सेन समेत रहेहु तीनिउ जन॥

mārehu tehi bala buddhi upāī| jehiṃ chījai nisicara sunu bhāī|| jāmavaṃta sugrīva bibhīṣana| sena sameta rahehu tīniu jana||

जब रघुबीर दीन्हि अनुसासन। कटि निषंग कसि साजि सरासन॥ प्रभु प्रताप उर धरि रनधीरा। बोले घन इव गिरा गँभीरा॥

jaba raghubīra dīnhi anusāsana| kaṭi niṣaṃga kasi sāji sarāsana|| prabhu pratāpa ura dhari ranadhīrā| bole ghana iva girā gam̐bhīrā||

जौं तेहि आजु बधें बिनु आवौं। तौ रघुपति सेवक न कहावौं॥ जौं सत संकर करहिं सहाई। तदपि हतउँ रघुबीर दोहाई॥

jauṃ tehi āju badheṃ binu āvauṃ| tau raghupati sevaka na kahāvauṃ|| jauṃ sata saṃkara karahiṃ sahāī| tadapi hataum̐ raghubīra dohāī||

दोहा ७५

रघुपति चरन नाइ सिरु चलेउ तुरंत अनंत। अंगद नील मयंद नल संग सुभट हनुमंत ॥ ७५॥

raghupati carana nāi siru caleu turaṃta anaṃta| aṃgada nīla mayaṃda nala saṃga subhaṭa hanumaṃta || 75||

जाइ कपिन्ह सो देखा बैसा। आहुति देत रुधिर अरु भैंसा॥ कीन्ह कपिन्ह सब जग्य बिधंसा। जब न उठइ तब करहिं प्रसंसा॥

jāi kapinha so dekhā baisā| āhuti deta rudhira aru bhaiṃsā|| kīnha kapinha saba jagya bidhaṃsā| jaba na uṭhai taba karahiṃ prasaṃsā||

तदपि न उठइ धरेन्हि कच जाई। लातन्हि हति हति चले पराई॥ लै त्रिसुल धावा कपि भागे। आए जहँ रामानुज आगे॥

tadapi na uṭhai dharenhi kaca jāī| lātanhi hati hati cale parāī|| lai trisula dhāvā kapi bhāge| āe jaham̐ rāmānuja āge||

आवा परम क्रोध कर मारा। गर्ज घोर रव बारहिं बारा॥ कोपि मरुतसुत अंगद धाए। हति त्रिसूल उर धरनि गिराए॥

āvā parama krodha kara mārā| garja ghora rava bārahiṃ bārā|| kopi marutasuta aṃgada dhāe| hati trisūla ura dharani girāe||

प्रभु कहँ छाँड़ेसि सूल प्रचंडा। सर हति कृत अनंत जुग खंडा॥ उठि बहोरि मारुति जुबराजा। हतहिं कोपि तेहि घाउ न बाजा॥

prabhu kaham̐ chām̐ṛesi sūla pracaṃḍā| sara hati kṛta anaṃta juga khaṃḍā|| uṭhi bahori māruti jubarājā| hatahiṃ kopi tehi ghāu na bājā||

फिरे बीर रिपु मरइ न मारा। तब धावा करि घोर चिकारा॥ आवत देखि क्रुद्ध जनु काला। लछिमन छाड़े बिसिख कराला॥

phire bīra ripu marai na mārā| taba dhāvā kari ghora cikārā|| āvata dekhi kruddha janu kālā| lachimana chāṛe bisikha karālā||

देखेसि आवत पबि सम बाना। तुरत भयउ खल अंतरधाना॥ बिबिध बेष धरि करइ लराई। कबहुँक प्रगट कबहुँ दुरि जाई॥

dekhesi āvata pabi sama bānā| turata bhayau khala aṃtaradhānā|| bibidha beṣa dhari karai larāī| kabahum̐ka pragaṭa kabahum̐ duri jāī||

देखि अजय रिपु डरपे कीसा। परम क्रुद्ध तब भयउ अहीसा॥ लछिमन मन अस मंत्र दृढ़ावा। एहि पापिहि मैं बहुत खेलावा॥

dekhi ajaya ripu ḍarape kīsā| parama kruddha taba bhayau ahīsā|| lachimana mana asa maṃtra dṛṛhāvā| ehi pāpihi maiṃ bahuta khelāvā||

सुमिरि कोसलाधीस प्रतापा। सर संधान कीन्ह करि दापा॥ छाड़ा बान माझ उर लागा। मरती बार कपटु सब त्यागा॥

sumiri kosalādhīsa pratāpā| sara saṃdhāna kīnha kari dāpā|| chāṛā bāna mājha ura lāgā| maratī bāra kapaṭu saba tyāgā||

दोहा ७६

रामानुज कहँ रामु कहँ अस कहि छाँड़ेसि प्रान। धन्य धन्य तव जननी कह अंगद हनुमान ॥ ७६॥

rāmānuja kaham̐ rāmu kaham̐ asa kahi chām̐ṛesi prāna| dhanya dhanya tava jananī kaha aṃgada hanumāna || 76||

बिनु प्रयास हनुमान उठायो। लंका द्वार राखि पुनि आयो॥ तासु मरन सुनि सुर गंधर्बा। चढ़ि बिमान आए नभ सर्बा॥

binu prayāsa hanumāna uṭhāyo| laṃkā dvāra rākhi puni āyo|| tāsu marana suni sura gaṃdharbā| caṛhi bimāna āe nabha sarbā||

बरषि सुमन दुंदुभीं बजावहिं। श्रीरघुनाथ बिमल जसु गावहिं॥ जय अनंत जय जगदाधारा। तुम्ह प्रभु सब देवन्हि निस्तारा॥

baraṣi sumana duṃdubhīṃ bajāvahiṃ| śrīraghunātha bimala jasu gāvahiṃ|| jaya anaṃta jaya jagadādhārā| tumha prabhu saba devanhi nistārā||

अस्तुति करि सुर सिद्ध सिधाए। लछिमन कृपासिन्धु पहिं आए॥ सुत बध सुना दसानन जबहीं। मुरुछित भयउ परेउ महि तबहीं॥

astuti kari sura siddha sidhāe| lachimana kṛpāsindhu pahiṃ āe|| suta badha sunā dasānana jabahīṃ| muruchita bhayau pareu mahi tabahīṃ||

मंदोदरी रुदन कर भारी। उर ताड़न बहु भाँति पुकारी॥ नगर लोग सब ब्याकुल सोचा। सकल कहहिं दसकंधर पोचा॥

maṃdodarī rudana kara bhārī| ura tāṛana bahu bhām̐ti pukārī|| nagara loga saba byākula socā| sakala kahahiṃ dasakaṃdhara pocā||

दोहा ७७

तब दसकंठ बिबिध बिधि समुझाईं सब नारि। नस्वर रूप जगत सब देखहु हृदयँ बिचारि ॥ ७७॥

taba dasakaṃṭha bibidha bidhi samujhāīṃ saba nāri| nasvara rūpa jagata saba dekhahu hṛdayam̐ bicāri || 77||

तिन्हहि ग्यान उपदेसा रावन। आपुन मंद कथा सुभ पावन॥ पर उपदेस कुसल बहुतेरे। जे आचरहिं ते नर न घनेरे॥

tinhahi gyāna upadesā rāvana| āpuna maṃda kathā subha pāvana|| para upadesa kusala bahutere| je ācarahiṃ te nara na ghanere||

निसा सिरानि भयउ भिनुसारा। लगे भालु कपि चारिहुँ द्वारा॥ सुभट बोलाइ दसानन बोला। रन सन्मुख जा कर मन डोला॥

nisā sirāni bhayau bhinusārā| lage bhālu kapi cārihum̐ dvārā|| subhaṭa bolāi dasānana bolā| rana sanmukha jā kara mana ḍolā||

सोरठा ३

सो अबहीं बरु जाउ पराई। संजुग बिमुख भएँ न भलाई॥ निज भुज बल मैं बयरु बढ़ावा। देहउँ उतरु जो रिपु चढ़ि आवा॥

so abahīṃ baru jāu parāī| saṃjuga bimukha bhaem̐ na bhalāī|| nija bhuja bala maiṃ bayaru baṛhāvā| dehaum̐ utaru jo ripu caṛhi āvā||

अस कहि मरुत बेग रथ साजा। बाजे सकल जुझाऊ बाजा॥ चले बीर सब अतुलित बली। जनु कज्जल कै आँधी चली॥

asa kahi maruta bega ratha sājā| bāje sakala jujhāū bājā|| cale bīra saba atulita balī| janu kajjala kai ām̐dhī calī||

असगुन अमित होहिं तेहि काला। गनइ न भुजबल गर्ब बिसाला॥

asaguna amita hohiṃ tehi kālā| ganai na bhujabala garba bisālā||

छंद

अति गर्ब गनइ न सगुन असगुन स्त्रवहिं आयुध हाथ ते। भट गिरत रथ ते बाजि गज चिक्करत भाजहिं साथ ते॥ गोमाय गीध कराल खर रव स्वान बोलहिं अति घने। जनु कालदूत उलूक बोलहिं बचन परम भयावने॥

ati garba ganai na saguna asaguna stravahiṃ āyudha hātha te| bhaṭa girata ratha te bāji gaja cikkarata bhājahiṃ sātha te|| gomāya gīdha karāla khara rava svāna bolahiṃ ati ghane| janu kāladūta ulūka bolahiṃ bacana parama bhayāvane||

दोहा ७८

ताहि कि संपति सगुन सुभ सपनेहुं मन बिश्राम। भूत द्रोह रत मोहबस राम बिमुख रति काम ॥ ७८॥

tāhi ki saṃpati saguna subha sapanehuṃ mana biśrāma| bhūta droha rata mohabasa rāma bimukha rati kāma || 78||

चलेउ निसाचर कटकु अपारा। चतुरंगिनी अनी बहु धारा॥ बिबिध भाँति बाहन रथ जाना। बिपुल बरन पताक ध्वज नाना॥

caleu nisācara kaṭaku apārā| caturaṃginī anī bahu dhārā|| bibidha bhām̐ti bāhana ratha jānā| bipula barana patāka dhvaja nānā||

चले मत्त गज जूथ घनेरे। प्राबिट जलद मरुत जनु प्रेरे॥ बरन बरद बिरदैत निकाया। समर सूर जानहिं बहु माया॥

cale matta gaja jūtha ghanere| prābiṭa jalada maruta janu prere|| barana barada biradaita nikāyā| samara sūra jānahiṃ bahu māyā||

अति बिचित्र बाहिनी बिराजी। बीर बसंत सेन जनु साजी॥ चलत कटक दिगसिधुंर डगहीं। छुभित पयोधि कुधर डगमगहीं॥

ati bicitra bāhinī birājī| bīra basaṃta sena janu sājī|| calata kaṭaka digasidhuṃra ḍagahīṃ| chubhita payodhi kudhara ḍagamagahīṃ||

उठी रेनु रबि गयउ छपाई। मरुत थकित बसुधा अकुलाई॥ पनव निसान घोर रव बाजहिं। प्रलय समय के घन जनु गाजहिं॥

uṭhī renu rabi gayau chapāī| maruta thakita basudhā akulāī|| panava nisāna ghora rava bājahiṃ| pralaya samaya ke ghana janu gājahiṃ||

भेरि नफीरि बाज सहनाई। मारू राग सुभट सुखदाई॥ केहरि नाद बीर सब करहीं। निज निज बल पौरुष उच्चरहीं॥

bheri naphīri bāja sahanāī| mārū rāga subhaṭa sukhadāī|| kehari nāda bīra saba karahīṃ| nija nija bala pauruṣa uccarahīṃ||

कहइ दसानन सुनहु सुभट्टा। मर्दहु भालु कपिन्ह के ठट्टा॥ हौं मारिहउँ भूप द्वौ भाई। अस कहि सन्मुख फौज रेंगाई॥

kahai dasānana sunahu subhaṭṭā| mardahu bhālu kapinha ke ṭhaṭṭā|| hauṃ mārihaum̐ bhūpa dvau bhāī| asa kahi sanmukha phauja reṃgāī||

यह सुधि सकल कपिन्ह जब पाई। धाए करि रघुबीर दोहाई॥

yaha sudhi sakala kapinha jaba pāī| dhāe kari raghubīra dohāī||

छंद

धाए बिसाल कराल मर्कट भालु काल समान ते। मानहूँ सपच्छ उड़ाहिं भूधर बूंद नाना बान ते॥ नख दसन सैल महाद्रुमायुध सबल संक न मानहीं। जय राम रावन मत्त गज मृगराज सुजसु बखानहीं

dhāe bisāla karāla markaṭa bhālu kāla samāna te| mānahūm̐ sapaccha uṛāhiṃ bhūdhara būṃda nānā bāna te|| nakha dasana saila mahādrumāyudha sabala saṃka na mānahīṃ| jaya rāma rāvana matta gaja mṛgarāja sujasu bakhānahīṃ

दोहा ७९

दुहु दिसि जय जयकार करि निज निज जोरी जानि। भिरे बीर इत रामहि उत रावनहि बखानि ॥ ७९॥

duhu disi jaya jayakāra kari nija nija jorī jāni| bhire bīra ita rāmahi uta rāvanahi bakhāni || 79||

रावनु रथी बिरथ रघुबीरा। देखि बिभीषन भयउ अधीरा॥ अधिक प्रीति मन भा संदेहा। बंदि चरन कह सहित सनेहा॥

rāvanu rathī biratha raghubīrā| dekhi bibhīṣana bhayau adhīrā|| adhika prīti mana bhā saṃdehā| baṃdi carana kaha sahita sanehā||

नाथ न रथ नहिं तन पद त्राना। केहि बिधि जितब बीर बलवाना॥ सुनहु सखा कह कृपानिधाना। जेहिं जय होइ सो स्यंदन आना॥

nātha na ratha nahiṃ tana pada trānā| kehi bidhi jitaba bīra balavānā|| sunahu sakhā kaha kṛpānidhānā| jehiṃ jaya hoi so syaṃdana ānā||

सौरज धीरज तेहि रथ चाका। सत्य सील दृढ़ ध्वजा पताका॥ बल बिबेक दम परहित घोरे। छमा कृपा समता रजु जोरे॥

sauraja dhīraja tehi ratha cākā| satya sīla dṛṛha dhvajā patākā|| bala bibeka dama parahita ghore| chamā kṛpā samatā raju jore||

ईस भजनु सारथी सुजाना। बिरति चर्म संतोष कृपाना॥ दान परसु बुधि सक्ति प्रचंड़ा। बर बिग्यान कठिन कोदंडा॥

īsa bhajanu sārathī sujānā| birati carma saṃtoṣa kṛpānā|| dāna parasu budhi sakti pracaṃṛā| bara bigyāna kaṭhina kodaṃḍā||

अमल अचल मन त्रोन समाना। सम जम नियम सिलीमुख नाना॥ कवच अभेद बिप्र गुर पूजा। एहि सम बिजय उपाय न दूजा॥

amala acala mana trona samānā| sama jama niyama silīmukha nānā|| kavaca abheda bipra gura pūjā| ehi sama bijaya upāya na dūjā||

सखा धर्ममय अस रथ जाकें। जीतन कहँ न कतहुँ रिपु ताकें॥

sakhā dharmamaya asa ratha jākeṃ| jītana kaham̐ na katahum̐ ripu tākeṃ||

दोहा ८०(क)

महा अजय संसार रिपु जीति सकइ सो बीर। जाकें अस रथ होइ दृढ़ सुनहु सखा मतिधीर ॥ ८० (क)॥

mahā ajaya saṃsāra ripu jīti sakai so bīra| jākeṃ asa ratha hoi dṛṛha sunahu sakhā matidhīra || 80 (ka)||

दोहा ८०(ख)

सुनि प्रभु बचन बिभीषन हरषि गहे पद कंज। एहि मिस मोहि उपदेसेहु राम कृपा सुख पुंज ॥ ८० (ख)॥

suni prabhu bacana bibhīṣana haraṣi gahe pada kaṃja| ehi misa mohi upadesehu rāma kṛpā sukha puṃja || 80 (kha)||

दोहा ८०(ग)

उत पचार दसकंधर इत अंगद हनुमान। लरत निसाचर भालु कपि करि निज निज प्रभु आन ॥ ८० (ग)॥

uta pacāra dasakaṃdhara ita aṃgada hanumāna| larata nisācara bhālu kapi kari nija nija prabhu āna || 80 (ga)||

सुर ब्रह्मादि सिद्ध मुनि नाना। देखत रन नभ चढ़े बिमाना॥ हमहू उमा रहे तेहि संगा। देखत राम चरित रन रंगा॥

sura brahmādi siddha muni nānā| dekhata rana nabha caṛhe bimānā|| hamahū umā rahe tehi saṃgā| dekhata rāma carita rana raṃgā||

सुभट समर रस दुहु दिसि माते। कपि जयसील राम बल ताते॥ एक एक सन भिरहिं पचारहिं। एकन्ह एक मर्दि महि पारहिं॥

subhaṭa samara rasa duhu disi māte| kapi jayasīla rāma bala tāte|| eka eka sana bhirahiṃ pacārahiṃ| ekanha eka mardi mahi pārahiṃ||

मारहिं काटहिं धरहिं पछारहिं। सीस तोरि सीसन्ह सन मारहिं॥ उदर बिदारहिं भुजा उपारहिं। गहि पद अवनि पटकि भट डारहिं॥

mārahiṃ kāṭahiṃ dharahiṃ pachārahiṃ| sīsa tori sīsanha sana mārahiṃ|| udara bidārahiṃ bhujā upārahiṃ| gahi pada avani paṭaki bhaṭa ḍārahiṃ||

निसिचर भट महि गाड़हि भालू। ऊपर ढारि देहिं बहु बालू॥ बीर बलिमुख जुद्ध बिरुद्धे। देखिअत बिपुल काल जनु क्रुद्धे॥

nisicara bhaṭa mahi gāṛahi bhālū| ūpara ḍhāri dehiṃ bahu bālū|| bīra balimukha juddha biruddhe| dekhiata bipula kāla janu kruddhe||

छंद १

क्रद्धे कृतांत समान कपि तन स्त्रवत सोनित राजहीं। मर्दहिं निसाचर कटक भट बलवंत घन जिमि गाजहीं॥ मारहिं चपेटन्हि डाटि दातन्ह काटि लातन्ह मीजहीं। चिक्करहिं मर्कट भालु छल बल करहिं जेहिं खल जहीं छी॥

kraddhe kṛtāṃta samāna kapi tana stravata sonita rājahīṃ| mardahiṃ nisācara kaṭaka bhaṭa balavaṃta ghana jimi gājahīṃ|| mārahiṃ capeṭanhi ḍāṭi dātanha kāṭi lātanha mījahīṃ| cikkarahiṃ markaṭa bhālu chala bala karahiṃ jehiṃ khala jahīṃ chī||

दोहा २

धरि गाल फारहिं उर बिदारहिं गल अँतावरि मेलहीं। प्रह्वादपति जनु बिलबिध तनु धरि समर अंगन खेलहीं॥ धरु मारु काटु पछारु घोर गिरा गगन महि भरि रही। जय राम जो तृन ते कुलिस कर कुलिस ते कर तृन सही॥

dhari gāla phārahiṃ ura bidārahiṃ gala am̐tāvari melahīṃ| prahvādapati janu bilabidha tanu dhari samara aṃgana khelahīṃ|| dharu māru kāṭu pachāru ghora girā gagana mahi bhari rahī| jaya rāma jo tṛna te kulisa kara kulisa te kara tṛna sahī||

दोहा ८१

निज दल बिचलत देखेसि बीस भुजाँ दस चाप। रथ चढ़ि चलेउ दसानन फिरहु फिरहु करि दाप ॥ ८१॥

nija dala bicalata dekhesi bīsa bhujām̐ dasa cāpa| ratha caṛhi caleu dasānana phirahu phirahu kari dāpa || 81||

धायउ परम क्रुद्ध दसकंधर। सन्मुख चले हूह दै बंदर॥ गहि कर पादप उपल पहारा। डारेन्हि ता पर एकहिं बारा॥

dhāyau parama kruddha dasakaṃdhara| sanmukha cale hūha dai baṃdara|| gahi kara pādapa upala pahārā| ḍārenhi tā para ekahiṃ bārā||

लागहिं सैल बज्र तन तासू। खंड खंड होइ फूटहिं आसू॥ चला न अचल रहा रथ रोपी। रन दुर्मद रावन अति कोपी॥

lāgahiṃ saila bajra tana tāsū| khaṃḍa khaṃḍa hoi phūṭahiṃ āsū|| calā na acala rahā ratha ropī| rana durmada rāvana ati kopī||

इत उत झपटि दपटि कपि जोधा। मर्दै लाग भयउ अति क्रोधा॥ चले पराइ भालु कपि नाना। त्राहि त्राहि अंगद हनुमाना॥

ita uta jhapaṭi dapaṭi kapi jodhā| mardai lāga bhayau ati krodhā|| cale parāi bhālu kapi nānā| trāhi trāhi aṃgada hanumānā||

पाहि पाहि रघुबीर गोसाई। यह खल खाइ काल की नाई॥ तेहि देखे कपि सकल पराने। दसहुँ चाप सायक संधाने॥

pāhi pāhi raghubīra gosāī| yaha khala khāi kāla kī nāī|| tehi dekhe kapi sakala parāne| dasahum̐ cāpa sāyaka saṃdhāne||

छंद

संधानि धनु सर निकर छाड़ेसि उरग जिमि उड़ि लागहीं। रहे पूरि सर धरनी गगन दिसि बिदिसि कहें कपि भागहीं॥ भयो अति कोलाहल बिकल कपि दल भालु बोलहिं आतुरे। रघुबीर करुना सिंधु आरत बंधु जन रच्छक हरे॥

saṃdhāni dhanu sara nikara chāṛesi uraga jimi uṛi lāgahīṃ| rahe pūri sara dharanī gagana disi bidisi kaheṃ kapi bhāgahīṃ|| bhayo ati kolāhala bikala kapi dala bhālu bolahiṃ āture| raghubīra karunā siṃdhu ārata baṃdhu jana racchaka hare||

दोहा ८२

निज दल बिकल देखि कटि कसि निषंग धनु हाथ। लछिमन चले क़ुद्ध होइ नाइ राम पद माथ ॥ ८२॥

nija dala bikala dekhi kaṭi kasi niṣaṃga dhanu hātha| lachimana cale quddha hoi nāi rāma pada mātha || 82||

रे खल का मारसि कपि भालू। मोहि बिलोकु तोर मैं कालू॥ खोजत रहेउँ तोहि सुतघाती। आजु निपाति जुड़ावउँ छाती॥

re khala kā mārasi kapi bhālū| mohi biloku tora maiṃ kālū|| khojata raheum̐ tohi sutaghātī| āju nipāti juṛāvaum̐ chātī||

अस कहि छाड़ेसि बान प्रचंडा। लछिमन किए सकल सत खंडा॥ कोटिन्ह आयुध रावन डारे। तिल प्रवान करि काटि निवारे॥

asa kahi chāṛesi bāna pracaṃḍā| lachimana kie sakala sata khaṃḍā|| koṭinha āyudha rāvana ḍāre| tila pravāna kari kāṭi nivāre||

पुनि निज बानन्ह कीन्ह प्रहारा। स्यंदनु भंजि सारथी मारा॥ सत सत सर मारे दस भाला। गिरि सृंगन्ह जनु प्रबिसहिं ब्याला॥

puni nija bānanha kīnha prahārā| syaṃdanu bhaṃji sārathī mārā|| sata sata sara māre dasa bhālā| giri sṛṃganha janu prabisahiṃ byālā||

पुनि सत सर मारा उर माहीं। परेउ धरनि तल सुधि कछु नाहीं॥ उठा प्रबल पुनि मुरुछा जागी। छाड़िसि ब्रह्म दीन्हि जो साँगी॥

puni sata sara mārā ura māhīṃ| pareu dharani tala sudhi kachu nāhīṃ|| uṭhā prabala puni muruchā jāgī| chāṛisi brahma dīnhi jo sām̐gī||

छंद

सो ब्रहमा दत्त प्रचंड सक्ति अनंत उर लागी सही। परथो बीर बिकल उठाव दसमुख अतुल बल महिमा रही॥ ब्रह्मांड भवन बिराज जाकें एक सिर जिमि रज कनी। तेहि चह उठावन मूढ़ रावन जान नहिं त्रिभुअन धनी॥

so brahamā datta pracaṃḍa sakti anaṃta ura lāgī sahī| paratho bīra bikala uṭhāva dasamukha atula bala mahimā rahī|| brahmāṃḍa bhavana birāja jākeṃ eka sira jimi raja kanī| tehi caha uṭhāvana mūṛha rāvana jāna nahiṃ tribhuana dhanī||

दोहा ८३

देखि पवनसुत धायउ बोलत बचन कठोर। आवत कपिहि हन्यो तेहिं मुष्टि प्रहार प्रघोर ॥ ८३॥

dekhi pavanasuta dhāyau bolata bacana kaṭhora| āvata kapihi hanyo tehiṃ muṣṭi prahāra praghora || 83||

जानु टेकि कपि भूमि न गिरा। उठा सँभारि बहुत रिस भरा॥ मुठिका एक ताहि कपि मारा। परेउ सैल जनु बज्र प्रहारा॥

jānu ṭeki kapi bhūmi na girā| uṭhā sam̐bhāri bahuta risa bharā|| muṭhikā eka tāhi kapi mārā| pareu saila janu bajra prahārā||

मुरुछा गै बहोरि सो जागा। कपि बल बिपुल सराहन लागा॥ धिग धिग मम पौरुष धिग मोही। जौं तैं जिअत रहेसि सुरद्रोही॥

muruchā gai bahori so jāgā| kapi bala bipula sarāhana lāgā|| dhiga dhiga mama pauruṣa dhiga mohī| jauṃ taiṃ jiata rahesi suradrohī||

अस कहि लछिमन कहुँ कपि ल्यायो। देखि दसानन बिसमय पायो॥ कह रघुबीर समुझु जियँ भ्राता। तुम्ह कृतांत भच्छक सुर त्राता॥

asa kahi lachimana kahum̐ kapi lyāyo| dekhi dasānana bisamaya pāyo|| kaha raghubīra samujhu jiyam̐ bhrātā| tumha kṛtāṃta bhacchaka sura trātā||

सुनत बचन उठि बैठ कृपाला। गई गगन सो सकति कराला॥ पुनि कोदंड बान गहि धाए। रिपु सन्मुख अति आतुर आए॥

sunata bacana uṭhi baiṭha kṛpālā| gaī gagana so sakati karālā|| puni kodaṃḍa bāna gahi dhāe| ripu sanmukha ati ātura āe||

छंद

आतुर बहोरि बिभंजि स्यंदन सूत हति ब्याकुल कियो। गिर्‌यो धरनि दसकंधर बिकलतर बान सत बेध्यो हियो॥ सारथी दूसर घालि रथ तेहि तुरत लंका ले गयो। रघुबीर बंधु प्रताप पुंज बहोरि प्रभु चरनन्हि नयो॥

ātura bahori bibhaṃji syaṃdana sūta hati byākula kiyo| giryo dharani dasakaṃdhara bikalatara bāna sata bedhyo hiyo|| sārathī dūsara ghāli ratha tehi turata laṃkā le gayo| raghubīra baṃdhu pratāpa puṃja bahori prabhu carananhi nayo||

दोहा ८४

उहाँ दसानन जागि करि करे लाग कछ जग्य। राम बिरोध बिजय चह सठ हठ बस अति अग्य ॥ ८४॥

uhām̐ dasānana jāgi kari kare lāga kacha jagya| rāma birodha bijaya caha saṭha haṭha basa ati agya || 84||

इहाँ बिभीषन सब सुधि पाई। सपदि जाइ रघुपतिहि सुनाई॥ नाथ करइ रावन एक जागा। सिद्ध भएँ नहिं मरिहि अभागा॥

ihām̐ bibhīṣana saba sudhi pāī| sapadi jāi raghupatihi sunāī|| nātha karai rāvana eka jāgā| siddha bhaem̐ nahiṃ marihi abhāgā||

पठवहु नाथ बेगि भट बंदर। करहिं बिधंस आव दसकंधर॥ प्रात होत प्रभु सुभट पठाए। हनुमदादि अंगद सब धाए॥

paṭhavahu nātha begi bhaṭa baṃdara| karahiṃ bidhaṃsa āva dasakaṃdhara|| prāta hota prabhu subhaṭa paṭhāe| hanumadādi aṃgada saba dhāe||

कौतुक कूदि चढ़े कपि लंका। पैठे रावन भवन असंका॥ जग्य करत जबहीं सो देखा। सकल कपिन्ह भा क्रोध बिसेषा॥

kautuka kūdi caṛhe kapi laṃkā| paiṭhe rāvana bhavana asaṃkā|| jagya karata jabahīṃ so dekhā| sakala kapinha bhā krodha biseṣā||

रन ते निलज भाजि गृह आवा। इहाँ आइ बक ध्यान लगावा॥ अस कहि अंगद मारा लाता। चितव न सठ स्वारथ मन राता॥

rana te nilaja bhāji gṛha āvā| ihām̐ āi baka dhyāna lagāvā|| asa kahi aṃgada mārā lātā| citava na saṭha svāratha mana rātā||

छंद

नहिं चितव जब करि कोप कपि गहि द्सन लातन्ह मारहीं। धरि केस नारि निकारि बाहेर ते5तिदीन पुकारहीं॥ तब उठेउ क़्य्द्ध कृतांत सम गहि चरन बानर डारई। एहि बीच कपिन्ह बिधंस कृत मख देखि मन महूँ हारई॥

nahiṃ citava jaba kari kopa kapi gahi dsana lātanha mārahīṃ| dhari kesa nāri nikāri bāhera te5tidīna pukārahīṃ|| taba uṭheu qyddha kṛtāṃta sama gahi carana bānara ḍāraī| ehi bīca kapinha bidhaṃsa kṛta makha dekhi mana mahūm̐ hāraī||

दोहा ८५

जग्य बिधंंसि कुसल कपि आए रघुपति पास। चलेउ निसाचर क्रुद्ध होइ त्यागि जिवन के आस ॥ ८५॥

jagya bidhaṃṃsi kusala kapi āe raghupati pāsa| caleu nisācara kruddha hoi tyāgi jivana ke āsa || 85||

चलत होहिं अति असुभ भयंकर। बैठहिं गीध उड़ाइ सिरन्ह पर॥ भयउ कालबस काहु न माना। कहेसि बजावहु जुद्ध निसाना॥

calata hohiṃ ati asubha bhayaṃkara| baiṭhahiṃ gīdha uṛāi siranha para|| bhayau kālabasa kāhu na mānā| kahesi bajāvahu juddha nisānā||

चली तमीचर अनी अपारा। बहु गज रथ पदाति असवारा॥ प्रभु सन्मुख धाए खल कैंसें। सलभ समूह अनल कहँ जैंसें॥

calī tamīcara anī apārā| bahu gaja ratha padāti asavārā|| prabhu sanmukha dhāe khala kaiṃseṃ| salabha samūha anala kaham̐ jaiṃseṃ||

इहाँ देवतन्ह अस्तुति कीन्ही। दारुन बिपति हमहि एहिं दीन्ही॥ अब जनि राम खेलावहु एही। अतिसय दुखित होति बैदेही॥

ihām̐ devatanha astuti kīnhī| dāruna bipati hamahi ehiṃ dīnhī|| aba jani rāma khelāvahu ehī| atisaya dukhita hoti baidehī||

देव बचन सुनि प्रभु मुसकाना। उठि रघुबीर सुधारे बाना॥ जटा जूट दृढ़ बाँधै माथे। सोहहिं सुमन बीच बिच गाथे॥

deva bacana suni prabhu musakānā| uṭhi raghubīra sudhāre bānā|| jaṭā jūṭa dṛṛha bām̐dhai māthe| sohahiṃ sumana bīca bica gāthe||

अरुन नयन बारिद तनु स्यामा। अखिल लोक लोचनाभिरामा॥ कटितट परिकर कस्यो निषंगा। कर कोदंड कठिन सारंगा॥

aruna nayana bārida tanu syāmā| akhila loka locanābhirāmā|| kaṭitaṭa parikara kasyo niṣaṃgā| kara kodaṃḍa kaṭhina sāraṃgā||

छंद

सारंग कर सुंदर निषंग सिलीमुखाकर कटि कस्यो। भुजदंड पीन मनोहरायत उर धरासुर पद लस्यो॥ कह दास तुलसी जबहिं प्रभु सर चाप कर फेरन लगे। ब्रह्मांड दिग्गज कमठ अहि महि सिंधु भूधर डगमगे॥

sāraṃga kara suṃdara niṣaṃga silīmukhākara kaṭi kasyo| bhujadaṃḍa pīna manoharāyata ura dharāsura pada lasyo|| kaha dāsa tulasī jabahiṃ prabhu sara cāpa kara pherana lage| brahmāṃḍa diggaja kamaṭha ahi mahi siṃdhu bhūdhara ḍagamage||

दोहा ८६

सोभा देखि हरघि सुर बरषहिं सुमन अपार। जय जय जय करुनानिधि छवि बल गुन आगार ॥ ८६॥

sobhā dekhi haraghi sura baraṣahiṃ sumana apāra| jaya jaya jaya karunānidhi chavi bala guna āgāra || 86||

एहीं बीच निसाचर अनी। कसमसात आई अति घनी॥ देखि चले सन्मुख कपि भट्टा। प्रलयकाल के जनु घन घट्टा॥

ehīṃ bīca nisācara anī| kasamasāta āī ati ghanī|| dekhi cale sanmukha kapi bhaṭṭā| pralayakāla ke janu ghana ghaṭṭā||

बहु कृपान तरवारि चमंकहिं। जनु दहँ दिसि दामिनीं दमंकहिं॥ गज रथ तुरग चिकार कठोरा। गर्जहिं मनहुँ बलाहक घोरा॥

bahu kṛpāna taravāri camaṃkahiṃ| janu daham̐ disi dāminīṃ damaṃkahiṃ|| gaja ratha turaga cikāra kaṭhorā| garjahiṃ manahum̐ balāhaka ghorā||

कपि लंगूर बिपुल नभ छाए। मनहुँ इंद्रधनु उए सुहाए॥ उठइ धूरि मानहुँ जलधारा। बान बुंद भै बृष्टि अपारा॥

kapi laṃgūra bipula nabha chāe| manahum̐ iṃdradhanu ue suhāe|| uṭhai dhūri mānahum̐ jaladhārā| bāna buṃda bhai bṛṣṭi apārā||

दुहुँ दिसि पर्बत करहिं प्रहारा। बज्रपात जनु बारहिं बारा॥ रघुपति कोपि बान झरि लाई। घायल भै निसिचर समुदाई॥

duhum̐ disi parbata karahiṃ prahārā| bajrapāta janu bārahiṃ bārā|| raghupati kopi bāna jhari lāī| ghāyala bhai nisicara samudāī||

लागत बान बीर चिक्करहीं। घुर्मि घुर्मि जहँ तहँ महि परहीं॥ स्त्रवहिं सैल जनु निर्झर भारी। सोनित सरि कादर भयकारी॥

lāgata bāna bīra cikkarahīṃ| ghurmi ghurmi jaham̐ taham̐ mahi parahīṃ|| stravahiṃ saila janu nirjhara bhārī| sonita sari kādara bhayakārī||

छंद

कादर भयंकर रुधिर सरिता चली परम अपावनी।

kādara bhayaṃkara rudhira saritā calī parama apāvanī|

दोहा

उ कूल दल रथ रेत चक्र अबर्त बहति भयावनी॥ जलजंतु गज पदचर तुरग खर बिबिध बाहन को गने। सर सक्ति तोमर सर्प चाप तरंग चर्म कमठ घने॥

u kūla dala ratha reta cakra abarta bahati bhayāvanī|| jalajaṃtu gaja padacara turaga khara bibidha bāhana ko gane| sara sakti tomara sarpa cāpa taraṃga carma kamaṭha ghane||

दोहा ८७

बीर परहिं जनु तीर तरु मज़ा बहु बह फेन। कादर देखि डरहिं तहँ सुभटन्ह के मन चेन ॥ ८७॥

bīra parahiṃ janu tīra taru mazā bahu baha phena| kādara dekhi ḍarahiṃ taham̐ subhaṭanha ke mana cena || 87||

मज्जहि भूत पिसाच बेताला। प्रमथ महा झोटिंग कराला॥ काक कंक लै भुजा उड़ाहीं। एक ते छीनि एक लै खाहीं॥

majjahi bhūta pisāca betālā| pramatha mahā jhoṭiṃga karālā|| kāka kaṃka lai bhujā uṛāhīṃ| eka te chīni eka lai khāhīṃ||

एक कहहिं ऐसिउ सौंघाई। सठहु तुम्हार दरिद्र न जाई॥ कहँरत भट घायल तट गिरे। जहँ तहँ मनहुँ अर्धजल परे॥

eka kahahiṃ aisiu sauṃghāī| saṭhahu tumhāra daridra na jāī|| kaham̐rata bhaṭa ghāyala taṭa gire| jaham̐ taham̐ manahum̐ ardhajala pare||

खैंचहिं गीध आँत तट भए। जनु बंसी खेलत चित दए॥ बहु भट बहहिं चढ़े खग जाहीं। जनु नावरि खेलहिं सरि माहीं॥

khaiṃcahiṃ gīdha ām̐ta taṭa bhae| janu baṃsī khelata cita dae|| bahu bhaṭa bahahiṃ caṛhe khaga jāhīṃ| janu nāvari khelahiṃ sari māhīṃ||

जोगिनि भरि भरि खप्पर संचहिं। भूत पिसाच बधू नभ नंचहिं॥ भट कपाल करताल बजावहिं। चामुंडा नाना बिधि गावहिं॥

jogini bhari bhari khappara saṃcahiṃ| bhūta pisāca badhū nabha naṃcahiṃ|| bhaṭa kapāla karatāla bajāvahiṃ| cāmuṃḍā nānā bidhi gāvahiṃ||

जंबुक निकर कटक्कट कट्टहिं। खाहिं हुआहिं अघाहिं दपट्टहिं॥ कोटिन्ह रुंड मुंड बिनु डोल्लहिं। सीस परे महि जय जय बोल्लहिं॥

jaṃbuka nikara kaṭakkaṭa kaṭṭahiṃ| khāhiṃ huāhiṃ aghāhiṃ dapaṭṭahiṃ|| koṭinha ruṃḍa muṃḍa binu ḍollahiṃ| sīsa pare mahi jaya jaya bollahiṃ||

छंद

बोल्लहिं जो जय जय मुंड रुंड प्रचंड सिर बिनु धावहीं। खणप्परिन्ह खग्ग अलुज्झि जुज्झहिं सुभट भटन्ह ढहावहीं॥ तब्वानर निसाचर निकर मर्दहनिं राम बल दर्पित भण। संग्राम अंगन सुभट सोवहिं राम सर निकरन्हि हए॥

bollahiṃ jo jaya jaya muṃḍa ruṃḍa pracaṃḍa sira binu dhāvahīṃ| khaṇapparinha khagga alujjhi jujjhahiṃ subhaṭa bhaṭanha ḍhahāvahīṃ|| tabvānara nisācara nikara mardahaniṃ rāma bala darpita bhaṇa| saṃgrāma aṃgana subhaṭa sovahiṃ rāma sara nikaranhi hae||

दोहा ८८

रावन हृदयें बिचारा भा निसिचर संघार। में अकेल कपि भालु बहु माया करों अपार ॥ ८८॥

rāvana hṛdayeṃ bicārā bhā nisicara saṃghāra| meṃ akela kapi bhālu bahu māyā karoṃ apāra || 88||

देवन्ह प्रभुहि पयादें देखा। उपजा उर अति छोभ बिसेषा॥ सुरपति निज रथ तुरत पठावा। हरष सहित मातलि लै आवा॥

devanha prabhuhi payādeṃ dekhā| upajā ura ati chobha biseṣā|| surapati nija ratha turata paṭhāvā| haraṣa sahita mātali lai āvā||

तेज पुंज रथ दिब्य अनूपा। हरषि चढ़े कोसलपुर भूपा॥ चंचल तुरग मनोहर चारी। अजर अमर मन सम गतिकारी॥

teja puṃja ratha dibya anūpā| haraṣi caṛhe kosalapura bhūpā|| caṃcala turaga manohara cārī| ajara amara mana sama gatikārī||

रथारूढ़ रघुनाथहि देखी। धाए कपि बलु पाइ बिसेषी॥ सही न जाइ कपिन्ह कै मारी। तब रावन माया बिस्तारी॥

rathārūṛha raghunāthahi dekhī| dhāe kapi balu pāi biseṣī|| sahī na jāi kapinha kai mārī| taba rāvana māyā bistārī||

सोरठा ४

सो माया रघुबीरहि बाँची। लछिमन कपिन्ह सो मानी साँची॥ देखी कपिन्ह निसाचर अनी। अनुज सहित बहु कोसलधनी॥

so māyā raghubīrahi bām̐cī| lachimana kapinha so mānī sām̐cī|| dekhī kapinha nisācara anī| anuja sahita bahu kosaladhanī||

छंद

बहु राम लछिमन देखि मर्कट भालु मन अति अपडरे। जनु चित्र लिखित समेत लछिमन जहें सो तहँ चितवहिं खरे॥ निज सेन चकित बिलोकि हँसि सर चाप सजि कोसलधनी। माया हरी हरि निमिष महूँ हरषी सकल मर्कट अनी॥

bahu rāma lachimana dekhi markaṭa bhālu mana ati apaḍare| janu citra likhita sameta lachimana jaheṃ so taham̐ citavahiṃ khare|| nija sena cakita biloki ham̐si sara cāpa saji kosaladhanī| māyā harī hari nimiṣa mahūm̐ haraṣī sakala markaṭa anī||

दोहा ८९

बहुरि राम सब तन चितइ बोले बचन गंभीर। टद्वंदजुद्ध देखहु सकल श्रमित भए अति बीर ॥ ८९॥

bahuri rāma saba tana citai bole bacana gaṃbhīra| ṭadvaṃdajuddha dekhahu sakala śramita bhae ati bīra || 89||