उत्तरकाण्ड

उत्तरकाण्ड · दोहा ६८(ख)–७७(ख)

शेअर करा

दोहा ६८(ख)

मोहि भयउ अति मोह प्रभु बंधन रन महूँ निरखि। चिदानंद संदोह राम बिकल कारन कवन ॥ ६८ (ख)॥

mohi bhayau ati moha prabhu baṃdhana rana mahūm̐ nirakhi| cidānaṃda saṃdoha rāma bikala kārana kavana || 68 (kha)||

देखि चरित अति नर अनुसारी। भयउ हृदयँ मम संसय भारी॥

dekhi carita ati nara anusārī| bhayau hṛdayam̐ mama saṃsaya bhārī||

सोरठा १

सोइ भ्रम अब हित करि मैं माना। कीन्ह अनुग्रह कृपानिधाना॥

soi bhrama aba hita kari maiṃ mānā| kīnha anugraha kṛpānidhānā||

जो अति आतप ब्याकुल होई। तरु छाया सुख जानइ सोई॥ जौं नहिं होत मोह अति मोही। मिलतेउँ तात कवन बिधि तोही॥

jo ati ātapa byākula hoī| taru chāyā sukha jānai soī|| jauṃ nahiṃ hota moha ati mohī| milateum̐ tāta kavana bidhi tohī||

सुनतेउँ किमि हरि कथा सुहाई। अति बिचित्र बहु बिधि तुम्ह गाई॥ निगमागम पुरान मत एहा। कहहिं सिद्ध मुनि नहिं संदेहा॥

sunateum̐ kimi hari kathā suhāī| ati bicitra bahu bidhi tumha gāī|| nigamāgama purāna mata ehā| kahahiṃ siddha muni nahiṃ saṃdehā||

संत बिसुद्ध मिलहिं परि तेही। चितवहिं राम कृपा करि जेही॥ राम कृपाँ तव दरसन भयऊ। तव प्रसाद सब संसय गयऊ॥

saṃta bisuddha milahiṃ pari tehī| citavahiṃ rāma kṛpā kari jehī|| rāma kṛpām̐ tava darasana bhayaū| tava prasāda saba saṃsaya gayaū||

दोहा ६९(क)

सुनि बिहंगपति बानी सहित बिनय अनुराग। पुलक गात लोचन सजल मन हरषेउ अति काग ॥ ६९ (क)॥

suni bihaṃgapati bānī sahita binaya anurāga| pulaka gāta locana sajala mana haraṣeu ati kāga || 69 (ka)||

दोहा ६९(ख)

श्रोता सुमति सुसील सुचि कथा रसिक हरिदास। पाइ़ उमा अति गोप्यमपि सजन करहिं प्रकास ॥ ६९ (ख)॥

śrotā sumati susīla suci kathā rasika haridāsa| pāi umā ati gopyamapi sajana karahiṃ prakāsa || 69 (kha)||

बोलेउ काकभसुंड बहोरी। नभग नाथ पर प्रीति न थोरी॥ सब बिधि नाथ पूज्य तुम्ह मेरे। कृपापात्र रघुनायक केरे॥

boleu kākabhasuṃḍa bahorī| nabhaga nātha para prīti na thorī|| saba bidhi nātha pūjya tumha mere| kṛpāpātra raghunāyaka kere||

तुम्हहि न संसय मोह न माया। मो पर नाथ कीन्ह तुम्ह दाया॥ पठइ मोह मिस खगपति तोही। रघुपति दीन्हि बड़ाई मोही॥

tumhahi na saṃsaya moha na māyā| mo para nātha kīnha tumha dāyā|| paṭhai moha misa khagapati tohī| raghupati dīnhi baṛāī mohī||

तुम्ह निज मोह कही खग साईं। सो नहिं कछु आचरज गोसाईं॥ नारद भव बिरंचि सनकादी। जे मुनिनायक आतमबादी॥

tumha nija moha kahī khaga sāīṃ| so nahiṃ kachu ācaraja gosāīṃ|| nārada bhava biraṃci sanakādī| je munināyaka ātamabādī||

मोह न अंध कीन्ह केहि केही। को जग काम नचाव न जेही॥ तृस्नाँ केहि न कीन्ह बौराहा। केहि कर हृदय क्रोध नहिं दाहा॥

moha na aṃdha kīnha kehi kehī| ko jaga kāma nacāva na jehī|| tṛsnām̐ kehi na kīnha baurāhā| kehi kara hṛdaya krodha nahiṃ dāhā||

दोहा ७०(क)

ग्यानी तापस सूर कबि कोबिद गुन आगार। केहि के लोभ बिडंबना कीन्हि न एहिं संसार ॥ ७० (क)॥

gyānī tāpasa sūra kabi kobida guna āgāra| kehi ke lobha biḍaṃbanā kīnhi na ehiṃ saṃsāra || 70 (ka)||

श्रीमद बक़ न कौन्ह केहि प्रभुता बधिर न काहि। मृगलोचनि के नेन सर को अस लाग न जाहि॥ ७० (ख )॥

śrīmada baqa na kaunha kehi prabhutā badhira na kāhi| mṛgalocani ke nena sara ko asa lāga na jāhi|| 70 (kha )||

गुन कृत सन्यपात नहिं केही। कोउ न मान मद तजेउ निबेही॥ जोबन ज्वर केहि नहिं बलकावा। ममता केहि कर जस न नसावा॥

guna kṛta sanyapāta nahiṃ kehī| kou na māna mada tajeu nibehī|| jobana jvara kehi nahiṃ balakāvā| mamatā kehi kara jasa na nasāvā||

मच्छर काहि कलंक न लावा। काहि न सोक समीर डोलावा॥ चिंता साँपिनि को नहिं खाया। को जग जाहि न ब्यापी माया॥

macchara kāhi kalaṃka na lāvā| kāhi na soka samīra ḍolāvā|| ciṃtā sām̐pini ko nahiṃ khāyā| ko jaga jāhi na byāpī māyā||

कीट मनोरथ दारु सरीरा। जेहि न लाग घुन को अस धीरा॥ सुत बित लोक ईषना तीनी। केहि के मति इन्ह कृत न मलीनी॥

kīṭa manoratha dāru sarīrā| jehi na lāga ghuna ko asa dhīrā|| suta bita loka īṣanā tīnī| kehi ke mati inha kṛta na malīnī||

यह सब माया कर परिवारा। प्रबल अमिति को बरनै पारा॥ सिव चतुरानन जाहि डेराहीं। अपर जीव केहि लेखे माहीं॥

yaha saba māyā kara parivārā| prabala amiti ko baranai pārā|| siva caturānana jāhi ḍerāhīṃ| apara jīva kehi lekhe māhīṃ||

दोहा ७१(क)

ब्यापि रहेउ संसार महूँ माया कटक प्रचंड। सेनापति कामादि भट दंभ कपट पाषंड ॥ ७१ (क)॥

byāpi raheu saṃsāra mahūm̐ māyā kaṭaka pracaṃḍa| senāpati kāmādi bhaṭa daṃbha kapaṭa pāṣaṃḍa || 71 (ka)||

सोरठा ७१(ख)

दासी रघुबीर के समुझें मिथ्या सोपि। छूट न राम कृपा बिनु नाथ कह पद रोपि ॥ ७१ (ख)॥

dāsī raghubīra ke samujheṃ mithyā sopi| chūṭa na rāma kṛpā binu nātha kaha pada ropi || 71 (kha)||

जो माया सब जगहि नचावा। जासु चरित लखि काहुँ न पावा॥

jo māyā saba jagahi nacāvā| jāsu carita lakhi kāhum̐ na pāvā||

सोरठा १

सोइ प्रभु भ्रू बिलास खगराजा। नाच नटी इव सहित समाजा॥

soi prabhu bhrū bilāsa khagarājā| nāca naṭī iva sahita samājā||

सोरठा २

सोइ सच्चिदानंद घन रामा। अज बिग्यान रूपो बल धामा॥ ब्यापक ब्याप्य अखंड अनंता। अखिल अमोघसक्ति भगवंता॥

soi saccidānaṃda ghana rāmā| aja bigyāna rūpo bala dhāmā|| byāpaka byāpya akhaṃḍa anaṃtā| akhila amoghasakti bhagavaṃtā||

अगुन अदभ्र गिरा गोतीता। सबदरसी अनवद्य अजीता॥ निर्मम निराकार निरमोहा। नित्य निरंजन सुख संदोहा॥

aguna adabhra girā gotītā| sabadarasī anavadya ajītā|| nirmama nirākāra niramohā| nitya niraṃjana sukha saṃdohā||

प्रकृति पार प्रभु सब उर बासी। ब्रह्म निरीह बिरज अबिनासी॥ इहाँ मोह कर कारन नाहीं। रबि सन्मुख तम कबहुँ कि जाहीं॥

prakṛti pāra prabhu saba ura bāsī| brahma nirīha biraja abināsī|| ihām̐ moha kara kārana nāhīṃ| rabi sanmukha tama kabahum̐ ki jāhīṃ||

दोहा ७२(क)

भगत हेतु भगवान प्रभु राम धरेउ तनु भूप। किए चरित पावन परम प्राकृत नर अनुरूप ॥ ७२ (क)॥

bhagata hetu bhagavāna prabhu rāma dhareu tanu bhūpa| kie carita pāvana parama prākṛta nara anurūpa || 72 (ka)||

दोहा

जथा अनेक बेष धरि नृत्य करइ़ नट कोइ।

jathā aneka beṣa dhari nṛtya karai naṭa koi|

सोरठा ७२(ख)

सोइ सोइ भाव देखावइ आपुन होइ न सोइ ॥ ७२ (ख)॥

soi soi bhāva dekhāvai āpuna hoi na soi || 72 (kha)||

असि रघुपति लीला उरगारी। दनुज बिमोहनि जन सुखकारी॥ जे मति मलिन बिषयबस कामी। प्रभु मोह धरहिं इमि स्वामी॥

asi raghupati līlā uragārī| danuja bimohani jana sukhakārī|| je mati malina biṣayabasa kāmī| prabhu moha dharahiṃ imi svāmī||

नयन दोष जा कहँ जब होई। पीत बरन ससि कहुँ कह सोई॥ जब जेहि दिसि भ्रम होइ खगेसा। सो कह पच्छिम उयउ दिनेसा॥

nayana doṣa jā kaham̐ jaba hoī| pīta barana sasi kahum̐ kaha soī|| jaba jehi disi bhrama hoi khagesā| so kaha pacchima uyau dinesā||

नौकारूढ़ चलत जग देखा। अचल मोह बस आपुहि लेखा॥ बालक भ्रमहिं न भ्रमहिं गृहादीं। कहहिं परस्पर मिथ्याबादी॥

naukārūṛha calata jaga dekhā| acala moha basa āpuhi lekhā|| bālaka bhramahiṃ na bhramahiṃ gṛhādīṃ| kahahiṃ paraspara mithyābādī||

हरि बिषइक अस मोह बिहंगा। सपनेहुँ नहिं अग्यान प्रसंगा॥ मायाबस मतिमंद अभागी। हृदयँ जमनिका बहुबिधि लागी॥

hari biṣaika asa moha bihaṃgā| sapanehum̐ nahiṃ agyāna prasaṃgā|| māyābasa matimaṃda abhāgī| hṛdayam̐ jamanikā bahubidhi lāgī||

ते सठ हठ बस संसय करहीं। निज अग्यान राम पर धरहीं॥

te saṭha haṭha basa saṃsaya karahīṃ| nija agyāna rāma para dharahīṃ||

दोहा ७३(क)

काम क्रोध मद लोभ रत गृहासक्त दुखरूप। ते किमि जानहिं रघुपतिहि मूढ़ परे तम कूप ॥ ७३ (क)॥

kāma krodha mada lobha rata gṛhāsakta dukharūpa| te kimi jānahiṃ raghupatihi mūṛha pare tama kūpa || 73 (ka)||

दोहा ७३(ख)

निर्गुन रूप सुलभ अति सगुन जान नहिं कोइ। सुगम अगम नाना चरित सुनि मुनि मन भ्रम होइ ॥ ७३ (ख)॥

nirguna rūpa sulabha ati saguna jāna nahiṃ koi| sugama agama nānā carita suni muni mana bhrama hoi || 73 (kha)||

सुनु खगेस रघुपति प्रभुताई। कहउँ जथामति कथा सुहाई॥ जेहि बिधि मोह भयउ प्रभु मोही। सोउ सब कथा सुनावउँ तोही॥

sunu khagesa raghupati prabhutāī| kahaum̐ jathāmati kathā suhāī|| jehi bidhi moha bhayau prabhu mohī| sou saba kathā sunāvaum̐ tohī||

राम कृपा भाजन तुम्ह ताता। हरि गुन प्रीति मोहि सुखदाता॥ ताते नहिं कछु तुम्हहिं दुरावउँ। परम रहस्य मनोहर गावउँ॥

rāma kṛpā bhājana tumha tātā| hari guna prīti mohi sukhadātā|| tāte nahiṃ kachu tumhahiṃ durāvaum̐| parama rahasya manohara gāvaum̐||

सुनहु राम कर सहज सुभाऊ। जन अभिमान न राखहिं काऊ॥ संसृत मूल सूलप्रद नाना। सकल सोक दायक अभिमाना॥

sunahu rāma kara sahaja subhāū| jana abhimāna na rākhahiṃ kāū|| saṃsṛta mūla sūlaprada nānā| sakala soka dāyaka abhimānā||

ताते करहिं कृपानिधि दूरी। सेवक पर ममता अति भूरी॥ जिमि सिसु तन ब्रन होइ गोसाई। मातु चिराव कठिन की नाईं॥

tāte karahiṃ kṛpānidhi dūrī| sevaka para mamatā ati bhūrī|| jimi sisu tana brana hoi gosāī| mātu cirāva kaṭhina kī nāīṃ||

दोहा ७४(क)

जदपि प्रथम दुख पावइ रोवइ बाल अधीर। ब्याधि नास हित जननी गनति न सो सिसु पीर ॥ ७४ (क)॥

jadapi prathama dukha pāvai rovai bāla adhīra| byādhi nāsa hita jananī ganati na so sisu pīra || 74 (ka)||

तिमि रघुपति निज दास कर हरहिं मान हित लागि। तुलसिदास ऐसे प्रभुहि कस न भजहु भ्रम त्यागि॥ ७४ (ख )॥

timi raghupati nija dāsa kara harahiṃ māna hita lāgi| tulasidāsa aise prabhuhi kasa na bhajahu bhrama tyāgi|| 74 (kha )||

राम कृपा आपनि जड़ताई। कहउँ खगेस सुनहु मन लाई॥ जब जब राम मनुज तनु धरहीं। भक्त हेतु लीला बहु करहीं॥

rāma kṛpā āpani jaṛatāī| kahaum̐ khagesa sunahu mana lāī|| jaba jaba rāma manuja tanu dharahīṃ| bhakta hetu līlā bahu karahīṃ||

तब तब अवधपुरी मैं ज़ाऊँ। बालचरित बिलोकि हरषाऊँ॥ जन्म महोत्सव देखउँ जाई। बरष पाँच तहँ रहउँ लोभाई॥

taba taba avadhapurī maiṃ zāūm̐| bālacarita biloki haraṣāūm̐|| janma mahotsava dekhaum̐ jāī| baraṣa pām̐ca taham̐ rahaum̐ lobhāī||

इष्टदेव मम बालक रामा। सोभा बपुष कोटि सत कामा॥ निज प्रभु बदन निहारि निहारी। लोचन सुफल करउँ उरगारी॥

iṣṭadeva mama bālaka rāmā| sobhā bapuṣa koṭi sata kāmā|| nija prabhu badana nihāri nihārī| locana suphala karaum̐ uragārī||

लघु बायस बपु धरि हरि संगा। देखउँ बालचरित बहुरंगा॥

laghu bāyasa bapu dhari hari saṃgā| dekhaum̐ bālacarita bahuraṃgā||

दोहा ७५(क)

लरिकाईं जहँ जहँ फिरहिं तहँ तहँ संग उड़ाउँ। जूठनि परइ अजिर महँ सो उठाइ करि खाउँ ॥ ७५ (क)॥

larikāīṃ jaham̐ jaham̐ phirahiṃ taham̐ taham̐ saṃga uṛāum̐| jūṭhani parai ajira maham̐ so uṭhāi kari khāum̐ || 75 (ka)||

दोहा ७५(ख)

एक बार अतिसय सब चरित किए रघुबीर। सुमिरत प्रभु लीला सोइ पुलकित भयउ सरीर ॥ ७५ (ख)॥

eka bāra atisaya saba carita kie raghubīra| sumirata prabhu līlā soi pulakita bhayau sarīra || 75 (kha)||

कहइ भसुंड सुनहु खगनायक। राम चरित सेवक सुखदायक नृप मंदिर सुंदर सब भाँती। खचित कनक मनि नाना जाती॥

kahai bhasuṃḍa sunahu khaganāyaka| rāma carita sevaka sukhadāyaka nṛpa maṃdira suṃdara saba bhām̐tī| khacita kanaka mani nānā jātī||

बरनि न जाइ रुचिर अँगनाई। जहँ खेलहिं नित चारिउ भाई॥ बालबिनोद करत रघुराई। बिचरत अजिर जननि सुखदाई॥

barani na jāi rucira am̐ganāī| jaham̐ khelahiṃ nita cāriu bhāī|| bālabinoda karata raghurāī| bicarata ajira janani sukhadāī||

मरकत मृदुल कलेवर स्यामा। अंग अंग प्रति छबि बहु कामा॥ नव राजीव अरुन मृदु चरना। पदज रुचिर नख ससि दुति हरना॥

marakata mṛdula kalevara syāmā| aṃga aṃga prati chabi bahu kāmā|| nava rājīva aruna mṛdu caranā| padaja rucira nakha sasi duti haranā||

ललित अंक कुलिसादिक चारी। नूपुर चारू मधुर रवकारी॥ चारु पुरट मनि रचित बनाई। कटि किंकिन कल मुखर सुहाई॥

lalita aṃka kulisādika cārī| nūpura cārū madhura ravakārī|| cāru puraṭa mani racita banāī| kaṭi kiṃkina kala mukhara suhāī||

दोहा ७६

रेखा त्रय सुंदर उदर नाभी रुचिर गँभीर। उर आयत शभ्राजत बिबिधि बाल बिभूषन चीर ॥ ७६॥

rekhā traya suṃdara udara nābhī rucira gam̐bhīra| ura āyata śabhrājata bibidhi bāla bibhūṣana cīra || 76||

अरुन पानि नख करज मनोहर। बाहु बिसाल बिभूषन सुंदर॥ कंध बाल केहरि दर ग्रीवा। चारु चिबुक आनन छबि सींवा॥

aruna pāni nakha karaja manohara| bāhu bisāla bibhūṣana suṃdara|| kaṃdha bāla kehari dara grīvā| cāru cibuka ānana chabi sīṃvā||

कलबल बचन अधर अरुनारे। दुइ दुइ दसन बिसद बर बारे॥ ललित कपोल मनोहर नासा। सकल सुखद ससि कर सम हासा॥

kalabala bacana adhara arunāre| dui dui dasana bisada bara bāre|| lalita kapola manohara nāsā| sakala sukhada sasi kara sama hāsā||

नील कंज लोचन भव मोचन। भ्राजत भाल तिलक गोरोचन॥ बिकट भृकुटि सम श्रवन सुहाए। कुंचित कच मेचक छबि छाए॥

nīla kaṃja locana bhava mocana| bhrājata bhāla tilaka gorocana|| bikaṭa bhṛkuṭi sama śravana suhāe| kuṃcita kaca mecaka chabi chāe||

पीत झीनि झगुली तन सोही। किलकनि चितवनि भावति मोही॥ रूप रासि नृप अजिर बिहारी। नाचहिं निज प्रतिबिंब निहारी॥

pīta jhīni jhagulī tana sohī| kilakani citavani bhāvati mohī|| rūpa rāsi nṛpa ajira bihārī| nācahiṃ nija pratibiṃba nihārī||

मोहि सन करहीं बिबिध बिधि क्रीड़ा। बरनत मोहि होति अति ब्रीड़ा॥ किलकत मोहि धरन जब धावहिं। चलउँ भागि तब पूप देखावहिं॥

mohi sana karahīṃ bibidha bidhi krīṛā| baranata mohi hoti ati brīṛā|| kilakata mohi dharana jaba dhāvahiṃ| calaum̐ bhāgi taba pūpa dekhāvahiṃ||

दोहा ७७(क)

आवत निकट हँसहिं प्रभु भाजत रुदन कराहिं। जाउँ समीप गहन पद फिरि फिरि चितइ पराहिं ॥ ७७ (क)॥

āvata nikaṭa ham̐sahiṃ prabhu bhājata rudana karāhiṃ| jāum̐ samīpa gahana pada phiri phiri citai parāhiṃ || 77 (ka)||

दोहा ७७(ख)

प्राकृत सिसु इव लीला देखि भयउ मोहि मोह। कवन चरित्र करत प्रभु चिदानंद संदोह ॥ ७७ (ख)॥

prākṛta sisu iva līlā dekhi bhayau mohi moha| kavana caritra karata prabhu cidānaṃda saṃdoha || 77 (kha)||

एतना मन आनत खगराया। रघुपति प्रेरित ब्यापी माया॥

etanā mana ānata khagarāyā| raghupati prerita byāpī māyā||

सोरठा १

सो माया न दुखद मोहि काहीं। आन जीव इव संसृत नाहीं॥

so māyā na dukhada mohi kāhīṃ| āna jīva iva saṃsṛta nāhīṃ||