उत्तरकाण्ड

उत्तरकाण्ड · दोहा ३६–५२(ख)

शेअर करा

सनकादिक बिधि लोक सिधाए। भ्रातन्ह राम चरन सिरु नाए॥ पूछत प्रभुहि सकल सकुचाहीं। चितवहिं सब मारुतसुत पाहीं॥

sanakādika bidhi loka sidhāe| bhrātanha rāma carana siru nāe|| pūchata prabhuhi sakala sakucāhīṃ| citavahiṃ saba mārutasuta pāhīṃ||

सुनि चहहिं प्रभु मुख कै बानी। जो सुनि होइ सकल भ्रम हानी॥ अंतरजामी प्रभु सभ जाना। बूझत कहहु काह हनुमाना॥

suni cahahiṃ prabhu mukha kai bānī| jo suni hoi sakala bhrama hānī|| aṃtarajāmī prabhu sabha jānā| būjhata kahahu kāha hanumānā||

जोरि पानि कह तब हनुमंता। सुनहु दीनदयाल भगवंता॥ नाथ भरत कछु पूँछन चहहीं। प्रस्न करत मन सकुचत अहहीं॥

jori pāni kaha taba hanumaṃtā| sunahu dīnadayāla bhagavaṃtā|| nātha bharata kachu pūm̐chana cahahīṃ| prasna karata mana sakucata ahahīṃ||

तुम्ह जानहु कपि मोर सुभाऊ। भरतहि मोहि कछु अंतर काऊ॥ सुनि प्रभु बचन भरत गहे चरना। सुनहु नाथ प्रनतारति हरना॥

tumha jānahu kapi mora subhāū| bharatahi mohi kachu aṃtara kāū|| suni prabhu bacana bharata gahe caranā| sunahu nātha pranatārati haranā||

दोहा ३६

नाथ न मोहि संदेह कछू सपनेहूँं सोक न मोह। केवल कृपा तुम्हारिहि कृपानंद संदोह ॥ ३६॥

nātha na mohi saṃdeha kachū sapanehūm̐ṃ soka na moha| kevala kṛpā tumhārihi kṛpānaṃda saṃdoha || 36||

करउँ कृपानिधि एक ढिठाई। मैं सेवक तुम्ह जन सुखदाई॥ संतन्ह कै महिमा रघुराई। बहु बिधि बेद पुरानन्ह गाई॥

karaum̐ kṛpānidhi eka ḍhiṭhāī| maiṃ sevaka tumha jana sukhadāī|| saṃtanha kai mahimā raghurāī| bahu bidhi beda purānanha gāī||

श्रीमुख तुम्ह पुनि कीन्हि बड़ाई। तिन्ह पर प्रभुहि प्रीति अधिकाई॥ सुना चहउँ प्रभु तिन्ह कर लच्छन। कृपासिंधु गुन ग्यान बिचच्छन॥

śrīmukha tumha puni kīnhi baṛāī| tinha para prabhuhi prīti adhikāī|| sunā cahaum̐ prabhu tinha kara lacchana| kṛpāsiṃdhu guna gyāna bicacchana||

संत असंत भेद बिलगाई। प्रनतपाल मोहि कहहु बुझाई॥ संतन्ह के लच्छन सुनु भ्राता। अगनित श्रुति पुरान बिख्याता॥

saṃta asaṃta bheda bilagāī| pranatapāla mohi kahahu bujhāī|| saṃtanha ke lacchana sunu bhrātā| aganita śruti purāna bikhyātā||

संत असंतन्हि कै असि करनी। जिमि कुठार चंदन आचरनी॥ काटइ परसु मलय सुनु भाई। निज गुन देइ सुगंध बसाई॥

saṃta asaṃtanhi kai asi karanī| jimi kuṭhāra caṃdana ācaranī|| kāṭai parasu malaya sunu bhāī| nija guna dei sugaṃdha basāī||

दोहा ३७

ताते सुर सीसन्ह चढ़त जग बल्लभ श्रीखंड। अनल दाहि पीटत घनहिं परसु बदन यह दंड ॥ ३७॥

tāte sura sīsanha caṛhata jaga ballabha śrīkhaṃḍa| anala dāhi pīṭata ghanahiṃ parasu badana yaha daṃḍa || 37||

बिषय अलंपट सील गुनाकर। पर दुख दुख सुख सुख देखे पर॥ सम अभूतरिपु बिमद बिरागी। लोभामरष हरष भय त्यागी॥

biṣaya alaṃpaṭa sīla gunākara| para dukha dukha sukha sukha dekhe para|| sama abhūtaripu bimada birāgī| lobhāmaraṣa haraṣa bhaya tyāgī||

कोमलचित दीनन्ह पर दाया। मन बच क्रम मम भगति अमाया॥ सबहि मानप्रद आपु अमानी। भरत प्रान सम मम ते प्रानी॥

komalacita dīnanha para dāyā| mana baca krama mama bhagati amāyā|| sabahi mānaprada āpu amānī| bharata prāna sama mama te prānī||

बिगत काम मम नाम परायन। सांति बिरति बिनती मुदितायन॥ सीतलता सरलता मयत्री। द्विज पद प्रीति धर्म जनयत्री॥

bigata kāma mama nāma parāyana| sāṃti birati binatī muditāyana|| sītalatā saralatā mayatrī| dvija pada prīti dharma janayatrī||

ए सब लच्छन बसहिं जासु उर। जानेहु तात संत संतत फुर॥ सम दम नियम नीति नहिं डोलहिं। परुष बचन कबहूँ नहिं बोलहिं॥

e saba lacchana basahiṃ jāsu ura| jānehu tāta saṃta saṃtata phura|| sama dama niyama nīti nahiṃ ḍolahiṃ| paruṣa bacana kabahūm̐ nahiṃ bolahiṃ||

दोहा ३८

निंदा अस्तुति उभय सम ममता मम पद कंज। ते सज्जन मम प्रानप्रिय गुन मंदिर सुखपुंज ॥ ३८॥

niṃdā astuti ubhaya sama mamatā mama pada kaṃja| te sajjana mama prānapriya guna maṃdira sukhapuṃja || 38||

सनहु असंतन्ह केर सुभाऊ। भूलेहुँ संगति करिअ न काऊ॥ तिन्ह कर संग सदा दुखदाई। जिमि कलपहि घालइ हरहाई॥

sanahu asaṃtanha kera subhāū| bhūlehum̐ saṃgati karia na kāū|| tinha kara saṃga sadā dukhadāī| jimi kalapahi ghālai harahāī||

खलन्ह हृदयँ अति ताप बिसेषी। जरहिं सदा पर संपति देखी॥ जहँ कहुँ निंदा सुनहिं पराई। हरषहिं मनहुँ परी निधि पाई॥

khalanha hṛdayam̐ ati tāpa biseṣī| jarahiṃ sadā para saṃpati dekhī|| jaham̐ kahum̐ niṃdā sunahiṃ parāī| haraṣahiṃ manahum̐ parī nidhi pāī||

काम क्रोध मद लोभ परायन। निर्दय कपटी कुटिल मलायन॥ बयरु अकारन सब काहू सों। जो कर हित अनहित ताहू सों॥

kāma krodha mada lobha parāyana| nirdaya kapaṭī kuṭila malāyana|| bayaru akārana saba kāhū soṃ| jo kara hita anahita tāhū soṃ||

झूठइ लेना झूठइ देना। झूठइ भोजन झूठ चबेना॥ बोलहिं मधुर बचन जिमि मोरा। खाइ महा अति हृदय कठोरा॥

jhūṭhai lenā jhūṭhai denā| jhūṭhai bhojana jhūṭha cabenā|| bolahiṃ madhura bacana jimi morā| khāi mahā ati hṛdaya kaṭhorā||

दोहा ३९

पर द्रोही पर दार रत पर धन पर अपबाद। ते नर पॉवर पापमय देह धरें मनुजाद ॥ ३९॥

para drohī para dāra rata para dhana para apabāda| te nara pôvara pāpamaya deha dhareṃ manujāda || 39||

लोभइ ओढ़न लोभइ डासन। सिस्त्रोदर पर जमपुर त्रास न॥ काहू की जौं सुनहिं बड़ाई। स्वास लेहिं जनु जूड़ी आई॥

lobhai oṛhana lobhai ḍāsana| sistrodara para jamapura trāsa na|| kāhū kī jauṃ sunahiṃ baṛāī| svāsa lehiṃ janu jūṛī āī||

जब काहू कै देखहिं बिपती। सुखी भए मानहुँ जग नृपती॥ स्वारथ रत परिवार बिरोधी। लंपट काम लोभ अति क्रोधी॥

jaba kāhū kai dekhahiṃ bipatī| sukhī bhae mānahum̐ jaga nṛpatī|| svāratha rata parivāra birodhī| laṃpaṭa kāma lobha ati krodhī||

मातु पिता गुर बिप्र न मानहिं। आपु गए अरु घालहिं आनहिं॥ करहिं मोह बस द्रोह परावा। संत संग हरि कथा न भावा॥

mātu pitā gura bipra na mānahiṃ| āpu gae aru ghālahiṃ ānahiṃ|| karahiṃ moha basa droha parāvā| saṃta saṃga hari kathā na bhāvā||

अवगुन सिंधु मंदमति कामी। बेद बिदूषक परधन स्वामी॥ बिप्र द्रोह पर द्रोह बिसेषा। दंभ कपट जियँ धरें सुबेषा॥

avaguna siṃdhu maṃdamati kāmī| beda bidūṣaka paradhana svāmī|| bipra droha para droha biseṣā| daṃbha kapaṭa jiyam̐ dhareṃ subeṣā||

दोहा ४०

ऐसे अधम मनुज खल कृतजुग त्रेतां नाहिं। द्वापर कछुक बुंद बहु होइहहिं कलिजुग माहिं ॥ ४०॥

aise adhama manuja khala kṛtajuga tretāṃ nāhiṃ| dvāpara kachuka buṃda bahu hoihahiṃ kalijuga māhiṃ || 40||

पर हित सरिस धर्म नहिं भाई। पर पीड़ा सम नहिं अधमाई॥ निर्नय सकल पुरान बेद कर। कहेउँ तात जानहिं कोबिद नर॥

para hita sarisa dharma nahiṃ bhāī| para pīṛā sama nahiṃ adhamāī|| nirnaya sakala purāna beda kara| kaheum̐ tāta jānahiṃ kobida nara||

नर सरीर धरि जे पर पीरा। करहिं ते सहहिं महा भव भीरा॥ करहिं मोह बस नर अघ नाना। स्वारथ रत परलोक नसाना॥

nara sarīra dhari je para pīrā| karahiṃ te sahahiṃ mahā bhava bhīrā|| karahiṃ moha basa nara agha nānā| svāratha rata paraloka nasānā||

कालरूप तिन्ह कहँ मैं भ्राता। सुभ अरु असुभ कर्म फल दाता॥ अस बिचारि जे परम सयाने। भजहिं मोहि संसृत दुख जाने॥

kālarūpa tinha kaham̐ maiṃ bhrātā| subha aru asubha karma phala dātā|| asa bicāri je parama sayāne| bhajahiṃ mohi saṃsṛta dukha jāne||

त्यागहिं कर्म सुभासुभ दायक। भजहिं मोहि सुर नर मुनि नायक॥ संत असंतन्ह के गुन भाषे। ते न परहिं भव जिन्ह लखि राखे॥

tyāgahiṃ karma subhāsubha dāyaka| bhajahiṃ mohi sura nara muni nāyaka|| saṃta asaṃtanha ke guna bhāṣe| te na parahiṃ bhava jinha lakhi rākhe||

दोहा ४१

सुनहु तात माया कृत गुन अरु दोष अनेक। गुन यह उभय न देखिअहिं देखिअ सो अबिबेक ॥ ४१॥

sunahu tāta māyā kṛta guna aru doṣa aneka| guna yaha ubhaya na dekhiahiṃ dekhia so abibeka || 41||

श्रीमुख बचन सुनत सब भाई। हरषे प्रेम न हृदयँ समाई॥ करहिं बिनय अति बारहिं बारा। हनूमान हियँ हरष अपारा॥

śrīmukha bacana sunata saba bhāī| haraṣe prema na hṛdayam̐ samāī|| karahiṃ binaya ati bārahiṃ bārā| hanūmāna hiyam̐ haraṣa apārā||

पुनि रघुपति निज मंदिर गए। एहि बिधि चरित करत नित नए॥ बार बार नारद मुनि आवहिं। चरित पुनीत राम के गावहिं॥

puni raghupati nija maṃdira gae| ehi bidhi carita karata nita nae|| bāra bāra nārada muni āvahiṃ| carita punīta rāma ke gāvahiṃ||

नित नव चरन देखि मुनि जाहीं। ब्रह्मलोक सब कथा कहाहीं॥ सुनि बिरंचि अतिसय सुख मानहिं। पुनि पुनि तात करहु गुन गानहिं॥

nita nava carana dekhi muni jāhīṃ| brahmaloka saba kathā kahāhīṃ|| suni biraṃci atisaya sukha mānahiṃ| puni puni tāta karahu guna gānahiṃ||

सनकादिक नारदहि सराहहिं। जद्यपि ब्रह्म निरत मुनि आहहिं॥ सुनि गुन गान समाधि बिसारी। सादर सुनहिं परम अधिकारी॥

sanakādika nāradahi sarāhahiṃ| jadyapi brahma nirata muni āhahiṃ|| suni guna gāna samādhi bisārī| sādara sunahiṃ parama adhikārī||

दोहा ४२

जीवनमुक्त ब्रहापर चरित सुनहिं तजि ध्यान। जे हरि कथों न करहिं रति तिन्ह के हिय पाषान ॥ ४२॥

jīvanamukta brahāpara carita sunahiṃ taji dhyāna| je hari kathoṃ na karahiṃ rati tinha ke hiya pāṣāna || 42||

एक बार रघुनाथ बोलाए। गुर द्विज पुरबासी सब आए॥ बैठे गुर मुनि अरु द्विज सज्जन। बोले बचन भगत भव भंजन॥

eka bāra raghunātha bolāe| gura dvija purabāsī saba āe|| baiṭhe gura muni aru dvija sajjana| bole bacana bhagata bhava bhaṃjana||

सनहु सकल पुरजन मम बानी। कहउँ न कछु ममता उर आनी॥ नहिं अनीति नहिं कछु प्रभुताई। सुनहु करहु जो तुम्हहि सोहाई॥

sanahu sakala purajana mama bānī| kahaum̐ na kachu mamatā ura ānī|| nahiṃ anīti nahiṃ kachu prabhutāī| sunahu karahu jo tumhahi sohāī||

सोरठा ३

सोइ सेवक प्रियतम मम सोई। मम अनुसासन मानै जोई॥ जौं अनीति कछु भाषौं भाई। तौं मोहि बरजहु भय बिसराई॥

soi sevaka priyatama mama soī| mama anusāsana mānai joī|| jauṃ anīti kachu bhāṣauṃ bhāī| tauṃ mohi barajahu bhaya bisarāī||

बड़ें भाग मानुष तनु पावा। सुर दुर्लभ सब ग्रंथिन्ह गावा॥ साधन धाम मोच्छ कर द्वारा। पाइ न जेहिं परलोक सँवारा॥

baṛeṃ bhāga mānuṣa tanu pāvā| sura durlabha saba graṃthinha gāvā|| sādhana dhāma moccha kara dvārā| pāi na jehiṃ paraloka sam̐vārā||

दोहा ४३

सो परत्र दुख पावइ सिर धुनि धुनि पछिताइ। कालहि कर्महि इईस्वरहि मिथ्या दोस लगाइ ॥ ४३॥

so paratra dukha pāvai sira dhuni dhuni pachitāi| kālahi karmahi iīsvarahi mithyā dosa lagāi || 43||

एहि तन कर फल बिषय न भाई। स्वर्गउ स्वल्प अंत दुखदाई॥ नर तनु पाइ बिषयँ मन देहीं। पलटि सुधा ते सठ बिष लेहीं॥

ehi tana kara phala biṣaya na bhāī| svargau svalpa aṃta dukhadāī|| nara tanu pāi biṣayam̐ mana dehīṃ| palaṭi sudhā te saṭha biṣa lehīṃ||

ताहि कबहुँ भल कहइ न कोई। गुंजा ग्रहइ परस मनि खोई॥ आकर चारि लच्छ चौरासी। जोनि भ्रमत यह जिव अबिनासी॥

tāhi kabahum̐ bhala kahai na koī| guṃjā grahai parasa mani khoī|| ākara cāri laccha caurāsī| joni bhramata yaha jiva abināsī||

फिरत सदा माया कर प्रेरा। काल कर्म सुभाव गुन घेरा॥ कबहुँक करि करुना नर देही। देत ईस बिनु हेतु सनेही॥

phirata sadā māyā kara prerā| kāla karma subhāva guna gherā|| kabahum̐ka kari karunā nara dehī| deta īsa binu hetu sanehī||

नर तनु भव बारिधि कहुँ बेरो। सन्मुख मरुत अनुग्रह मेरो॥ करनधार सदगुर दृढ़ नावा। दुर्लभ साज सुलभ करि पावा॥

nara tanu bhava bāridhi kahum̐ bero| sanmukha maruta anugraha mero|| karanadhāra sadagura dṛṛha nāvā| durlabha sāja sulabha kari pāvā||

दोहा

जो न तरे भव सागर नर समाज अस पाइ।

jo na tare bhava sāgara nara samāja asa pāi|

सोरठा ४४

कृत निंदक मंदमति आत्माहन गति जाइ ॥ ४४॥

kṛta niṃdaka maṃdamati ātmāhana gati jāi || 44||

जौं परलोक इहाँ सुख चहहू। सुनि मम बचन ह्रृदयँ दृढ़ गहहू॥ सुलभ सुखद मारग यह भाई। भगति मोरि पुरान श्रुति गाई॥

jauṃ paraloka ihām̐ sukha cahahū| suni mama bacana hrṛdayam̐ dṛṛha gahahū|| sulabha sukhada māraga yaha bhāī| bhagati mori purāna śruti gāī||

ग्यान अगम प्रत्यूह अनेका। साधन कठिन न मन कहुँ टेका॥ करत कष्ट बहु पावइ कोऊ। भक्ति हीन मोहि प्रिय नहिं सोऊ॥

gyāna agama pratyūha anekā| sādhana kaṭhina na mana kahum̐ ṭekā|| karata kaṣṭa bahu pāvai koū| bhakti hīna mohi priya nahiṃ soū||

भक्ति सुतंत्र सकल सुख खानी। बिनु सतसंग न पावहिं प्रानी॥ पुन्य पुंज बिनु मिलहिं न संता। सतसंगति संसृति कर अंता॥

bhakti sutaṃtra sakala sukha khānī| binu satasaṃga na pāvahiṃ prānī|| punya puṃja binu milahiṃ na saṃtā| satasaṃgati saṃsṛti kara aṃtā||

पुन्य एक जग महुँ नहिं दूजा। मन क्रम बचन बिप्र पद पूजा॥ सानुकूल तेहि पर मुनि देवा। जो तजि कपटु करइ द्विज सेवा॥

punya eka jaga mahum̐ nahiṃ dūjā| mana krama bacana bipra pada pūjā|| sānukūla tehi para muni devā| jo taji kapaṭu karai dvija sevā||

दोहा ४५

औरउ एक गुपुत मत सबहि कहडउँ कर जोरि। संकर भजन बिना नर भगति न पावइ मोरि ॥ ४५॥

aurau eka guputa mata sabahi kahaḍaum̐ kara jori| saṃkara bhajana binā nara bhagati na pāvai mori || 45||

कहहु भगति पथ कवन प्रयासा। जोग न मख जप तप उपवासा॥ सरल सुभाव न मन कुटिलाई। जथा लाभ संतोष सदाई॥

kahahu bhagati patha kavana prayāsā| joga na makha japa tapa upavāsā|| sarala subhāva na mana kuṭilāī| jathā lābha saṃtoṣa sadāī||

मोर दास कहाइ नर आसा। करइ तौ कहहु कहा बिस्वासा॥ बहुत कहउँ का कथा बढ़ाई। एहि आचरन बस्य मैं भाई॥

mora dāsa kahāi nara āsā| karai tau kahahu kahā bisvāsā|| bahuta kahaum̐ kā kathā baṛhāī| ehi ācarana basya maiṃ bhāī||

बैर न बिग्रह आस न त्रासा। सुखमय ताहि सदा सब आसा॥ अनारंभ अनिकेत अमानी। अनघ अरोष दच्छ बिग्यानी॥

baira na bigraha āsa na trāsā| sukhamaya tāhi sadā saba āsā|| anāraṃbha aniketa amānī| anagha aroṣa daccha bigyānī||

प्रीति सदा सज्जन संसर्गा। तृन सम बिषय स्वर्ग अपबर्गा॥ भगति पच्छ हठ नहिं सठताई। दुष्ट तर्क सब दूरि बहाई॥

prīti sadā sajjana saṃsargā| tṛna sama biṣaya svarga apabargā|| bhagati paccha haṭha nahiṃ saṭhatāī| duṣṭa tarka saba dūri bahāī||

दोहा ४६

मम गुन ग्राम नाम रत गत ममता मद मोह। ता कर सुख सोइ जानइ परानंद संदोह ॥ ४६॥

mama guna grāma nāma rata gata mamatā mada moha| tā kara sukha soi jānai parānaṃda saṃdoha || 46||

सुनत सुधासम बचन राम के। गहे सबनि पद कृपाधाम के॥ जननि जनक गुर बंधु हमारे। कृपा निधान प्रान ते प्यारे॥

sunata sudhāsama bacana rāma ke| gahe sabani pada kṛpādhāma ke|| janani janaka gura baṃdhu hamāre| kṛpā nidhāna prāna te pyāre||

तनु धनु धाम राम हितकारी। सब बिधि तुम्ह प्रनतारति हारी॥ असि सिख तुम्ह बिनु देइ न कोऊ। मातु पिता स्वारथ रत ओऊ॥

tanu dhanu dhāma rāma hitakārī| saba bidhi tumha pranatārati hārī|| asi sikha tumha binu dei na koū| mātu pitā svāratha rata oū||

हेतु रहित जग जुग उपकारी। तुम्ह तुम्हार सेवक असुरारी॥ स्वारथ मीत सकल जग माहीं। सपनेहुँ प्रभु परमारथ नाहीं॥

hetu rahita jaga juga upakārī| tumha tumhāra sevaka asurārī|| svāratha mīta sakala jaga māhīṃ| sapanehum̐ prabhu paramāratha nāhīṃ||

सबके बचन प्रेम रस साने। सुनि रघुनाथ हृदयँ हरषाने॥ निज निज गृह गए आयसु पाई। बरनत प्रभु बतकही सुहाई॥

sabake bacana prema rasa sāne| suni raghunātha hṛdayam̐ haraṣāne|| nija nija gṛha gae āyasu pāī| baranata prabhu batakahī suhāī||

दोहा ४७

उमा अवधबासी नर नारि कृतारथ रूप। ब्रह्मा सच्चचिदानंद घन रघुनायक जहं भूपष। 9॥

umā avadhabāsī nara nāri kṛtāratha rūpa| brahmā saccacidānaṃda ghana raghunāyaka jahaṃ bhūpaṣa| 9||

एक बार बसिष्ट मुनि आए। जहाँ राम सुखधाम सुहाए॥ अति आदर रघुनायक कीन्हा। पद पखारि पादोदक लीन्हा॥

eka bāra basiṣṭa muni āe| jahām̐ rāma sukhadhāma suhāe|| ati ādara raghunāyaka kīnhā| pada pakhāri pādodaka līnhā||

राम सुनहु मुनि कह कर जोरी। कृपासिंधु बिनती कछु मोरी॥ देखि देखि आचरन तुम्हारा। होत मोह मम हृदयँ अपारा॥

rāma sunahu muni kaha kara jorī| kṛpāsiṃdhu binatī kachu morī|| dekhi dekhi ācarana tumhārā| hota moha mama hṛdayam̐ apārā||

महिमा अमित बेद नहिं जाना। मैं केहि भाँति कहउँ भगवाना॥ उपरोहित्य कर्म अति मंदा। बेद पुरान सुमृति कर निंदा॥

mahimā amita beda nahiṃ jānā| maiṃ kehi bhām̐ti kahaum̐ bhagavānā|| uparohitya karma ati maṃdā| beda purāna sumṛti kara niṃdā||

जब न लेउँ मैं तब बिधि मोही। कहा लाभ आगें सुत तोही॥ परमातमा ब्रह्म नर रूपा। होइहि रघुकुल भूषन भूपा॥

jaba na leum̐ maiṃ taba bidhi mohī| kahā lābha āgeṃ suta tohī|| paramātamā brahma nara rūpā| hoihi raghukula bhūṣana bhūpā||

दोहा ४८

तब मैं हृदयें बिचारा जोग जग्य ब्रत दान। जा कहूँ करिअ सो पैहँ धर्म न एहि सम आन ॥ ४८॥

taba maiṃ hṛdayeṃ bicārā joga jagya brata dāna| jā kahūm̐ karia so paiham̐ dharma na ehi sama āna || 48||

जप तप नियम जोग निज धर्मा। श्रुति संभव नाना सुभ कर्मा॥ ग्यान दया दम तीरथ मज्जन। जहँ लगि धर्म कहत श्रुति सज्जन॥

japa tapa niyama joga nija dharmā| śruti saṃbhava nānā subha karmā|| gyāna dayā dama tīratha majjana| jaham̐ lagi dharma kahata śruti sajjana||

आगम निगम पुरान अनेका। पढ़े सुने कर फल प्रभु एका॥ तब पद पंकज प्रीति निरंतर। सब साधन कर यह फल सुंदर॥

āgama nigama purāna anekā| paṛhe sune kara phala prabhu ekā|| taba pada paṃkaja prīti niraṃtara| saba sādhana kara yaha phala suṃdara||

छूटइ मल कि मलहि के धोएँ। घृत कि पाव कोइ बारि बिलोएँ॥ प्रेम भगति जल बिनु रघुराई। अभिअंतर मल कबहुँ न जाई॥

chūṭai mala ki malahi ke dhoem̐| ghṛta ki pāva koi bāri biloem̐|| prema bhagati jala binu raghurāī| abhiaṃtara mala kabahum̐ na jāī||

सोरठा ४

सोइ सर्बग्य तग्य सोइ पंडित। सोइ गुन गृह बिग्यान अखंडित॥ दच्छ सकल लच्छन जुत सोई। जाकें पद सरोज रति होई॥

soi sarbagya tagya soi paṃḍita| soi guna gṛha bigyāna akhaṃḍita|| daccha sakala lacchana juta soī| jākeṃ pada saroja rati hoī||

दोहा ४९

नाथ एक बर मागउँ राम कृपा करि देहु। जन्म जन्म प्रभु पद कमल कबहुँ घटे जनि नेहु ॥ ४९॥

nātha eka bara māgaum̐ rāma kṛpā kari dehu| janma janma prabhu pada kamala kabahum̐ ghaṭe jani nehu || 49||

अस कहि मुनि बसिष्ट गृह आए। कृपासिंधु के मन अति भाए॥ हनूमान भरतादिक भ्राता। संग लिए सेवक सुखदाता॥

asa kahi muni basiṣṭa gṛha āe| kṛpāsiṃdhu ke mana ati bhāe|| hanūmāna bharatādika bhrātā| saṃga lie sevaka sukhadātā||

पुनि कृपाल पुर बाहेर गए। गज रथ तुरग मगावत भए॥ देखि कृपा करि सकल सराहे। दिए उचित जिन्ह जिन्ह तेइ चाहे॥

puni kṛpāla pura bāhera gae| gaja ratha turaga magāvata bhae|| dekhi kṛpā kari sakala sarāhe| die ucita jinha jinha tei cāhe||

हरन सकल श्रम प्रभु श्रम पाई। गए जहाँ सीतल अवँराई॥ भरत दीन्ह निज बसन डसाई। बैठे प्रभु सेवहिं सब भाई॥

harana sakala śrama prabhu śrama pāī| gae jahām̐ sītala avam̐rāī|| bharata dīnha nija basana ḍasāī| baiṭhe prabhu sevahiṃ saba bhāī||

मारुतसुत तब मारूत करई। पुलक बपुष लोचन जल भरई॥ हनूमान सम नहिं बड़भागी। नहिं कोउ राम चरन अनुरागी॥ गिरिजा जासु प्रीति सेवकाई। बार बार प्रभु निज मुख गाई॥

mārutasuta taba mārūta karaī| pulaka bapuṣa locana jala bharaī|| hanūmāna sama nahiṃ baṛabhāgī| nahiṃ kou rāma carana anurāgī|| girijā jāsu prīti sevakāī| bāra bāra prabhu nija mukha gāī||

दोहा ५०

तेहिं अवसर मुनि नारद आए करतल बीन। गावन लगे राम कल कीरति सदा नबीन ॥ ५०॥

tehiṃ avasara muni nārada āe karatala bīna| gāvana lage rāma kala kīrati sadā nabīna || 50||

मामवलोकय पंकज लोचन। कृपा बिलोकनि सोच बिमोचन॥ नील तामरस स्याम काम अरि। हृदय कंज मकरंद मधुप हरि॥

māmavalokaya paṃkaja locana| kṛpā bilokani soca bimocana|| nīla tāmarasa syāma kāma ari| hṛdaya kaṃja makaraṃda madhupa hari||

जातुधान बरूथ बल भंजन। मुनि सज्जन रंजन अघ गंजन॥ भूसुर ससि नव बृंद बलाहक। असरन सरन दीन जन गाहक॥

jātudhāna barūtha bala bhaṃjana| muni sajjana raṃjana agha gaṃjana|| bhūsura sasi nava bṛṃda balāhaka| asarana sarana dīna jana gāhaka||

भुज बल बिपुल भार महि खंडित। खर दूषन बिराध बध पंडित॥ रावनारि सुखरूप भूपबर। जय दसरथ कुल कुमुद सुधाकर॥

bhuja bala bipula bhāra mahi khaṃḍita| khara dūṣana birādha badha paṃḍita|| rāvanāri sukharūpa bhūpabara| jaya dasaratha kula kumuda sudhākara||

सुजस पुरान बिदित निगमागम। गावत सुर मुनि संत समागम॥ कारुनीक ब्यलीक मद खंडन। सब बिधि कुसल कोसला मंडन॥

sujasa purāna bidita nigamāgama| gāvata sura muni saṃta samāgama|| kārunīka byalīka mada khaṃḍana| saba bidhi kusala kosalā maṃḍana||

कलि मल मथन नाम ममताहन। तुलसीदास प्रभु पाहि प्रनत जन॥

kali mala mathana nāma mamatāhana| tulasīdāsa prabhu pāhi pranata jana||

दोहा

प्रेम सहित मुनि नारद बरनि राम गुन ग्राम।

prema sahita muni nārada barani rāma guna grāma|

सोरठा ५१

भासिंधु हदयें धरि गए जहाँ बिधि धाम ॥ ५१॥

bhāsiṃdhu hadayeṃ dhari gae jahām̐ bidhi dhāma || 51||

गिरिजा सुनहु बिसद यह कथा। मैं सब कही मोरि मति जथा॥ राम चरित सत कोटि अपारा। श्रुति सारदा न बरनै पारा॥

girijā sunahu bisada yaha kathā| maiṃ saba kahī mori mati jathā|| rāma carita sata koṭi apārā| śruti sāradā na baranai pārā||

राम अनंत अनंत गुनानी। जन्म कर्म अनंत नामानी॥ जल सीकर महि रज गनि जाहीं। रघुपति चरित न बरनि सिराहीं॥

rāma anaṃta anaṃta gunānī| janma karma anaṃta nāmānī|| jala sīkara mahi raja gani jāhīṃ| raghupati carita na barani sirāhīṃ||

बिमल कथा हरि पद दायनी। भगति होइ सुनि अनपायनी॥ उमा कहिउँ सब कथा सुहाई। जो भुसुंडि खगपतिहि सुनाई॥

bimala kathā hari pada dāyanī| bhagati hoi suni anapāyanī|| umā kahium̐ saba kathā suhāī| jo bhusuṃḍi khagapatihi sunāī||

कछुक राम गुन कहेउँ बखानी। अब का कहौं सो कहहु भवानी॥ सुनि सुभ कथा उमा हरषानी। बोली अति बिनीत मृदु बानी॥

kachuka rāma guna kaheum̐ bakhānī| aba kā kahauṃ so kahahu bhavānī|| suni subha kathā umā haraṣānī| bolī ati binīta mṛdu bānī||

धन्य धन्य मैं धन्य पुरारी। सुनेउँ राम गुन भव भय हारी॥

dhanya dhanya maiṃ dhanya purārī| suneum̐ rāma guna bhava bhaya hārī||

दोहा ५२(क)

तुम्हरी कृपां कृपायतन अब कृतकृत्य न मोह। जानेउँ राम प्रताप प्रभु चिदानंद संदोह ॥ ५२ (क)॥

tumharī kṛpāṃ kṛpāyatana aba kṛtakṛtya na moha| jāneum̐ rāma pratāpa prabhu cidānaṃda saṃdoha || 52 (ka)||

दोहा ५२(ख)

नाथ तवानन ससि स्त्वत कथा सुधा रघुबीर। श्रवन पुटन्हि मन पान करि नहिं अघात मतिधीर ॥ ५२ (ख)॥

nātha tavānana sasi stvata kathā sudhā raghubīra| śravana puṭanhi mana pāna kari nahiṃ aghāta matidhīra || 52 (kha)||