बालकाण्ड

बालकाण्ड · दोहा १०२–१२०(क)

शेअर करा

बहु बिधि संभु सास समुझाई। गवनी भवन चरन सिरु नाई॥ जननीं उमा बोलि तब लीन्ही। लै उछंग सुंदर सिख दीन्ही॥

bahu bidhi saṃbhu sāsa samujhāī| gavanī bhavana carana siru nāī|| jananīṃ umā boli taba līnhī| lai uchaṃga suṃdara sikha dīnhī||

करेहु सदा संकर पद पूजा। नारिधरमु पति देउ न दूजा॥ बचन कहत भरे लोचन बारी। बहुरि लाइ उर लीन्हि कुमारी॥

karehu sadā saṃkara pada pūjā| nāridharamu pati deu na dūjā|| bacana kahata bhare locana bārī| bahuri lāi ura līnhi kumārī||

कत बिधि सृजीं नारि जग माहीं। पराधीन सपनेहुँ सुखु नाहीं॥ भै अति प्रेम बिकल महतारी। धीरजु कीन्ह कुसमय बिचारी॥

kata bidhi sṛjīṃ nāri jaga māhīṃ| parādhīna sapanehum̐ sukhu nāhīṃ|| bhai ati prema bikala mahatārī| dhīraju kīnha kusamaya bicārī||

पुनि पुनि मिलति परति गहि चरना। परम प्रेम कछु जाइ न बरना॥ सब नारिन्ह मिलि भेटि भवानी। जाइ जननि उर पुनि लपटानी॥

puni puni milati parati gahi caranā| parama prema kachu jāi na baranā|| saba nārinha mili bheṭi bhavānī| jāi janani ura puni lapaṭānī||

छंद

जननिहि बहुरि मिलि चली उचित असीस सब काहूँ दईं। फिरि फिरि बिलोकति मातु तन तब खीं सर ले सिव पहिं गईं॥ जाचक सकल संतोषि संकरु उमा सहित भवन चले। सब अमर हरषे सुमन बरघि निसान नभ बाजे भले॥

jananihi bahuri mili calī ucita asīsa saba kāhūm̐ daīṃ| phiri phiri bilokati mātu tana taba khīṃ sara le siva pahiṃ gaīṃ|| jācaka sakala saṃtoṣi saṃkaru umā sahita bhavana cale| saba amara haraṣe sumana baraghi nisāna nabha bāje bhale||

दोहा १०२

चले संग हिमवंतु तब पहुंचावन अति हेतु। बिबिध भांति परितोषु करि बिदा कीन्ह बृषकेतु ॥ १०२॥

cale saṃga himavaṃtu taba pahuṃcāvana ati hetu| bibidha bhāṃti paritoṣu kari bidā kīnha bṛṣaketu || 102||

तुरत भवन आए गिरिराई। सकल सैल सर लिए बोलाई॥ आदर दान बिनय बहुमाना। सब कर बिदा कीन्ह हिमवाना॥

turata bhavana āe girirāī| sakala saila sara lie bolāī|| ādara dāna binaya bahumānā| saba kara bidā kīnha himavānā||

जबहिं संभु कैलासहिं आए। सुर सब निज निज लोक सिधाए॥ जगत मातु पितु संभु भवानी। तेही सिंगारु न कहउँ बखानी॥

jabahiṃ saṃbhu kailāsahiṃ āe| sura saba nija nija loka sidhāe|| jagata mātu pitu saṃbhu bhavānī| tehī siṃgāru na kahaum̐ bakhānī||

करहिं बिबिध बिधि भोग बिलासा। गनन्ह समेत बसहिं कैलासा॥ हर गिरिजा बिहार नित नयऊ। एहि बिधि बिपुल काल चलि गयऊ॥

karahiṃ bibidha bidhi bhoga bilāsā| gananha sameta basahiṃ kailāsā|| hara girijā bihāra nita nayaū| ehi bidhi bipula kāla cali gayaū||

तब जनमेउ षटबदन कुमारा। तारकु असुर समर जेहिं मारा॥ आगम निगम प्रसिद्ध पुराना। षन्मुख जन्मु सकल जग जाना॥

taba janameu ṣaṭabadana kumārā| tāraku asura samara jehiṃ mārā|| āgama nigama prasiddha purānā| ṣanmukha janmu sakala jaga jānā||

दोहा

छ० -ज्जगु जान पन्पुख जन्मु कर्म प्रतापु पुरुषारथु महा। तेहि हेतु मैं बृषकेतु सुत कर चरित संछेपहिं कहा॥ यह उमा संभु बिबाहु जे नर नारि कहहिं जे गावहीं। कल्यान काज बिबाह मंगल सर्बदा सुख पावहीं

cha0 -jjagu jāna panpukha janmu karma pratāpu puruṣārathu mahā| tehi hetu maiṃ bṛṣaketu suta kara carita saṃchepahiṃ kahā|| yaha umā saṃbhu bibāhu je nara nāri kahahiṃ je gāvahīṃ| kalyāna kāja bibāha maṃgala sarbadā sukha pāvahīṃ

दोहा १०३

चरित सिंधु गिरिजा रमन बेद न पावहिं पारु। बरनै तुलसीदासु किमि अति मतिमंद गवॉँरु ॥ १०३॥

carita siṃdhu girijā ramana beda na pāvahiṃ pāru| baranai tulasīdāsu kimi ati matimaṃda gavôm̐ru || 103||

संभु चरित सुनि सरस सुहावा। भरद्वाज मुनि अति सुख पावा॥ बहु लालसा कथा पर बाढ़ी। नयनन्हि नीरु रोमावलि ठाढ़ी॥

saṃbhu carita suni sarasa suhāvā| bharadvāja muni ati sukha pāvā|| bahu lālasā kathā para bāṛhī| nayananhi nīru romāvali ṭhāṛhī||

प्रेम बिबस मुख आव न बानी। दसा देखि हरषे मुनि ग्यानी॥ अहो धन्य तव जन्मु मुनीसा। तुम्हहि प्रान सम प्रिय गौरीसा॥

prema bibasa mukha āva na bānī| dasā dekhi haraṣe muni gyānī|| aho dhanya tava janmu munīsā| tumhahi prāna sama priya gaurīsā||

सिव पद कमल जिन्हहि रति नाहीं। रामहि ते सपनेहुँ न सोहाहीं॥ बिनु छल बिस्वनाथ पद नेहू। राम भगत कर लच्छन एहू॥

siva pada kamala jinhahi rati nāhīṃ| rāmahi te sapanehum̐ na sohāhīṃ|| binu chala bisvanātha pada nehū| rāma bhagata kara lacchana ehū||

सिव सम को रघुपति ब्रतधारी। बिनु अघ तजी सती असि नारी॥ पनु करि रघुपति भगति देखाई। को सिव सम रामहि प्रिय भाई॥

siva sama ko raghupati bratadhārī| binu agha tajī satī asi nārī|| panu kari raghupati bhagati dekhāī| ko siva sama rāmahi priya bhāī||

दोहा १०४

प्रथमहिं मै कहि सिव चरित बूझा मरमु तुम्हार। सुचि सेवक तुम्ह राम के रहित समस्त बिकार ॥ १०४॥

prathamahiṃ mai kahi siva carita būjhā maramu tumhāra| suci sevaka tumha rāma ke rahita samasta bikāra || 104||

मैं जाना तुम्हार गुन सीला। कहउँ सुनहु अब रघुपति लीला॥ सुनु मुनि आजु समागम तोरें। कहि न जाइ जस सुखु मन मोरें॥

maiṃ jānā tumhāra guna sīlā| kahaum̐ sunahu aba raghupati līlā|| sunu muni āju samāgama toreṃ| kahi na jāi jasa sukhu mana moreṃ||

राम चरित अति अमित मुनिसा। कहि न सकहिं सत कोटि अहीसा॥ तदपि जथाश्रुत कहउँ बखानी। सुमिरि गिरापति प्रभु धनुपानी॥

rāma carita ati amita munisā| kahi na sakahiṃ sata koṭi ahīsā|| tadapi jathāśruta kahaum̐ bakhānī| sumiri girāpati prabhu dhanupānī||

सारद दारुनारि सम स्वामी। रामु सूत्रधर अंतरजामी॥ जेहि पर कृपा करहिं जनु जानी। कबि उर अजिर नचावहिं बानी॥

sārada dārunāri sama svāmī| rāmu sūtradhara aṃtarajāmī|| jehi para kṛpā karahiṃ janu jānī| kabi ura ajira nacāvahiṃ bānī||

प्रनवउँ सोइ कृपाल रघुनाथा। बरनउँ बिसद तासु गुन गाथा॥ परम रम्य गिरिबरु कैलासू। सदा जहाँ सिव उमा निवासू॥

pranavaum̐ soi kṛpāla raghunāthā| baranaum̐ bisada tāsu guna gāthā|| parama ramya giribaru kailāsū| sadā jahām̐ siva umā nivāsū||

दोहा १०५

सिद्ध तपोधन जोगिजन सूर किंनर मुनिबृंद। बसहिं तहाँ सुकृती सकल सेवहिं सिब सुखकंद ॥ १०५॥

siddha tapodhana jogijana sūra kiṃnara munibṛṃda| basahiṃ tahām̐ sukṛtī sakala sevahiṃ siba sukhakaṃda || 105||

हरि हर बिमुख धर्म रति नाहीं। ते नर तहँ सपनेहुँ नहिं जाहीं॥ तेहि गिरि पर बट बिटप बिसाला। नित नूतन सुंदर सब काला॥

hari hara bimukha dharma rati nāhīṃ| te nara taham̐ sapanehum̐ nahiṃ jāhīṃ|| tehi giri para baṭa biṭapa bisālā| nita nūtana suṃdara saba kālā||

त्रिबिध समीर सुसीतलि छाया। सिव बिश्राम बिटप श्रुति गाया॥ एक बार तेहि तर प्रभु गयऊ। तरु बिलोकि उर अति सुखु भयऊ॥

tribidha samīra susītali chāyā| siva biśrāma biṭapa śruti gāyā|| eka bāra tehi tara prabhu gayaū| taru biloki ura ati sukhu bhayaū||

निज कर डासि नागरिपु छाला। बैठै सहजहिं संभु कृपाला॥ कुंद इंदु दर गौर सरीरा। भुज प्रलंब परिधन मुनिचीरा॥

nija kara ḍāsi nāgaripu chālā| baiṭhai sahajahiṃ saṃbhu kṛpālā|| kuṃda iṃdu dara gaura sarīrā| bhuja pralaṃba paridhana municīrā||

तरुन अरुन अंबुज सम चरना। नख दुति भगत हृदय तम हरना॥ भुजग भूति भूषन त्रिपुरारी। आननु सरद चंद छबि हारी॥

taruna aruna aṃbuja sama caranā| nakha duti bhagata hṛdaya tama haranā|| bhujaga bhūti bhūṣana tripurārī| ānanu sarada caṃda chabi hārī||

दोहा १०६

जटा मुकुट सुरसरित सिर लोचन नलिन बिसाल। नीलकंठ लावन्यनिधि सोह बालबिधु भाल ॥ १०६॥

jaṭā mukuṭa surasarita sira locana nalina bisāla| nīlakaṃṭha lāvanyanidhi soha bālabidhu bhāla || 106||

बैठे सोह कामरिपु कैसें। धरें सरीरु सांतरसु जैसें॥ पारबती भल अवसरु जानी। गई संभु पहिं मातु भवानी॥

baiṭhe soha kāmaripu kaiseṃ| dhareṃ sarīru sāṃtarasu jaiseṃ|| pārabatī bhala avasaru jānī| gaī saṃbhu pahiṃ mātu bhavānī||

जानि प्रिया आदरु अति कीन्हा। बाम भाग आसनु हर दीन्हा॥ बैठीं सिव समीप हरषाई। पूरुब जन्म कथा चित आई॥

jāni priyā ādaru ati kīnhā| bāma bhāga āsanu hara dīnhā|| baiṭhīṃ siva samīpa haraṣāī| pūruba janma kathā cita āī||

पति हियँ हेतु अधिक अनुमानी। बिहसि उमा बोलीं प्रिय बानी॥ कथा जो सकल लोक हितकारी। सोइ पूछन चह सैलकुमारी॥

pati hiyam̐ hetu adhika anumānī| bihasi umā bolīṃ priya bānī|| kathā jo sakala loka hitakārī| soi pūchana caha sailakumārī||

बिस्वनाथ मम नाथ पुरारी। त्रिभुवन महिमा बिदित तुम्हारी॥ चर अरु अचर नाग नर देवा। सकल करहिं पद पंकज सेवा॥

bisvanātha mama nātha purārī| tribhuvana mahimā bidita tumhārī|| cara aru acara nāga nara devā| sakala karahiṃ pada paṃkaja sevā||

दोहा १०७

प्रभु समरथ सर्बग्य सिव सकल कला गुन धाम। जोग ग्यान बैराग्य निधि प्रनत कलपतरु नाम ॥ १०७॥

prabhu samaratha sarbagya siva sakala kalā guna dhāma| joga gyāna bairāgya nidhi pranata kalapataru nāma || 107||

जौं मो पर प्रसन्न सुखरासी। जानिअ सत्य मोहि निज दासी॥ तौं प्रभु हरहु मोर अग्याना। कहि रघुनाथ कथा बिधि नाना॥

jauṃ mo para prasanna sukharāsī| jānia satya mohi nija dāsī|| tauṃ prabhu harahu mora agyānā| kahi raghunātha kathā bidhi nānā||

जासु भवनु सुरतरु तर होई। सहि कि दरिद्र जनित दुखु सोई॥ ससिभूषन अस हृदयँ बिचारी। हरहु नाथ मम मति भ्रम भारी॥

jāsu bhavanu surataru tara hoī| sahi ki daridra janita dukhu soī|| sasibhūṣana asa hṛdayam̐ bicārī| harahu nātha mama mati bhrama bhārī||

प्रभु जे मुनि परमारथबादी। कहहिं राम कहुँ ब्रह्म अनादी॥ सेस सारदा बेद पुराना। सकल करहिं रघुपति गुन गाना॥

prabhu je muni paramārathabādī| kahahiṃ rāma kahum̐ brahma anādī|| sesa sāradā beda purānā| sakala karahiṃ raghupati guna gānā||

तुम्ह पुनि राम राम दिन राती। सादर जपहु अनँग आराती॥ रामु सो अवध नृपति सुत सोई। की अज अगुन अलखगति कोई॥

tumha puni rāma rāma dina rātī| sādara japahu anam̐ga ārātī|| rāmu so avadha nṛpati suta soī| kī aja aguna alakhagati koī||

दोहा १०८

जौं नृप तनय त ब्रह्म किमि नारि बिरहँ मति भोरि। देख चरित महिमा सुनत भ्रमति बुद्धि अति मोरि ॥ १०८॥

jauṃ nṛpa tanaya ta brahma kimi nāri biraham̐ mati bhori| dekha carita mahimā sunata bhramati buddhi ati mori || 108||

जौं अनीह ब्यापक बिभु कोऊ। कबहु बुझाइ नाथ मोहि सोऊ॥ अग्य जानि रिस उर जनि धरहू। जेहि बिधि मोह मिटै सोइ करहू॥

jauṃ anīha byāpaka bibhu koū| kabahu bujhāi nātha mohi soū|| agya jāni risa ura jani dharahū| jehi bidhi moha miṭai soi karahū||

मै बन दीखि राम प्रभुताई। अति भय बिकल न तुम्हहि सुनाई॥ तदपि मलिन मन बोधु न आवा। सो फलु भली भाँति हम पावा॥

mai bana dīkhi rāma prabhutāī| ati bhaya bikala na tumhahi sunāī|| tadapi malina mana bodhu na āvā| so phalu bhalī bhām̐ti hama pāvā||

अजहूँ कछु संसउ मन मोरे। करहु कृपा बिनवउँ कर जोरें॥ प्रभु तब मोहि बहु भाँति प्रबोधा। नाथ सो समुझि करहु जनि क्रोधा॥

ajahūm̐ kachu saṃsau mana more| karahu kṛpā binavaum̐ kara joreṃ|| prabhu taba mohi bahu bhām̐ti prabodhā| nātha so samujhi karahu jani krodhā||

तब कर अस बिमोह अब नाहीं। रामकथा पर रुचि मन माहीं॥ कहहु पुनीत राम गुन गाथा। भुजगराज भूषन सुरनाथा॥

taba kara asa bimoha aba nāhīṃ| rāmakathā para ruci mana māhīṃ|| kahahu punīta rāma guna gāthā| bhujagarāja bhūṣana suranāthā||

दोहा १०९

बंदउ पद धरि धरनि सिरु बिनय करउँ कर जोरि। बरनहु रघुबर बिसद जसु श्रुति सिद्धांत निचोरि ॥ १०९॥

baṃdau pada dhari dharani siru binaya karaum̐ kara jori| baranahu raghubara bisada jasu śruti siddhāṃta nicori || 109||

जदपि जोषिता नहिं अधिकारी। दासी मन क्रम बचन तुम्हारी॥ गूढ़उ तत्व न साधु दुरावहिं। आरत अधिकारी जहँ पावहिं॥

jadapi joṣitā nahiṃ adhikārī| dāsī mana krama bacana tumhārī|| gūṛhau tatva na sādhu durāvahiṃ| ārata adhikārī jaham̐ pāvahiṃ||

अति आरति पूछउँ सुरराया। रघुपति कथा कहहु करि दाया॥ प्रथम सो कारन कहहु बिचारी। निर्गुन ब्रह्म सगुन बपु धारी॥

ati ārati pūchaum̐ surarāyā| raghupati kathā kahahu kari dāyā|| prathama so kārana kahahu bicārī| nirguna brahma saguna bapu dhārī||

पुनि प्रभु कहहु राम अवतारा। बालचरित पुनि कहहु उदारा॥ कहहु जथा जानकी बिबाहीं। राज तजा सो दूषन काहीं॥

puni prabhu kahahu rāma avatārā| bālacarita puni kahahu udārā|| kahahu jathā jānakī bibāhīṃ| rāja tajā so dūṣana kāhīṃ||

बन बसि कीन्हे चरित अपारा। कहहु नाथ जिमि रावन मारा॥ राज बैठि कीन्हीं बहु लीला। सकल कहहु संकर सुखलीला॥

bana basi kīnhe carita apārā| kahahu nātha jimi rāvana mārā|| rāja baiṭhi kīnhīṃ bahu līlā| sakala kahahu saṃkara sukhalīlā||

दोहा ११०

बहुरि कहहु करुनायतन कीन्ह जो अचरज राम। प्रजा सहित रघुबंसमनि किमि गवने निज धाम ॥ ११०॥

bahuri kahahu karunāyatana kīnha jo acaraja rāma| prajā sahita raghubaṃsamani kimi gavane nija dhāma || 110||

पुनि प्रभु कहहु सो तत्व बखानी। जेहिं बिग्यान मगन मुनि ग्यानी॥ भगति ग्यान बिग्यान बिरागा। पुनि सब बरनहु सहित बिभागा॥

puni prabhu kahahu so tatva bakhānī| jehiṃ bigyāna magana muni gyānī|| bhagati gyāna bigyāna birāgā| puni saba baranahu sahita bibhāgā||

औरउ राम रहस्य अनेका। कहहु नाथ अति बिमल बिबेका॥ जो प्रभु मैं पूछा नहि होई। सोउ दयाल राखहु जनि गोई॥

aurau rāma rahasya anekā| kahahu nātha ati bimala bibekā|| jo prabhu maiṃ pūchā nahi hoī| sou dayāla rākhahu jani goī||

तुम्ह त्रिभुवन गुर बेद बखाना। आन जीव पाँवर का जाना॥ प्रस्न उमा कै सहज सुहाई। छल बिहीन सुनि सिव मन भाई॥

tumha tribhuvana gura beda bakhānā| āna jīva pām̐vara kā jānā|| prasna umā kai sahaja suhāī| chala bihīna suni siva mana bhāī||

हर हियँ रामचरित सब आए। प्रेम पुलक लोचन जल छाए॥ श्रीरघुनाथ रूप उर आवा। परमानंद अमित सुख पावा॥

hara hiyam̐ rāmacarita saba āe| prema pulaka locana jala chāe|| śrīraghunātha rūpa ura āvā| paramānaṃda amita sukha pāvā||

दोहा १११

मगन ध्यानरस दंड जुग पुनि मन बाहेर कीन्ह। रघुपति चरित महेस तब हरषित बरनै लीन्ह ॥ १११॥

magana dhyānarasa daṃḍa juga puni mana bāhera kīnha| raghupati carita mahesa taba haraṣita baranai līnha || 111||

झूठेउ सत्य जाहि बिनु जानें। जिमि भुजंग बिनु रजु पहिचानें॥ जेहि जानें जग जाइ हेराई। जागें जथा सपन भ्रम जाई॥

jhūṭheu satya jāhi binu jāneṃ| jimi bhujaṃga binu raju pahicāneṃ|| jehi jāneṃ jaga jāi herāī| jāgeṃ jathā sapana bhrama jāī||

बंदउँ बालरूप सोई रामू। सब सिधि सुलभ जपत जिसु नामू मंगल भवन अमंगल हारी। द्रवउ सो दसरथ अजिर बिहारी॥

baṃdaum̐ bālarūpa soī rāmū| saba sidhi sulabha japata jisu nāmū maṃgala bhavana amaṃgala hārī| dravau so dasaratha ajira bihārī||

करि प्रनाम रामहि त्रिपुरारी। हरषि सुधा सम गिरा उचारी॥ धन्य धन्य गिरिराजकुमारी। तुम्ह समान नहिं कोउ उपकारी॥

kari pranāma rāmahi tripurārī| haraṣi sudhā sama girā ucārī|| dhanya dhanya girirājakumārī| tumha samāna nahiṃ kou upakārī||

पूँछेहु रघुपति कथा प्रसंगा। सकल लोक जग पावनि गंगा॥ तुम्ह रघुबीर चरन अनुरागी। कीन्हहु प्रस्न जगत हित लागी॥

pūm̐chehu raghupati kathā prasaṃgā| sakala loka jaga pāvani gaṃgā|| tumha raghubīra carana anurāgī| kīnhahu prasna jagata hita lāgī||

दोहा

रामकृपा तें पारबति सपनेहुँ तव मन माहिं।

rāmakṛpā teṃ pārabati sapanehum̐ tava mana māhiṃ|

सोरठा ११२

सोक मोह संदेह भ्रम मम बिचार कछु नाहिं ॥ ११२॥

soka moha saṃdeha bhrama mama bicāra kachu nāhiṃ || 112||

तदपि असंका कीन्हिहु सोई। कहत सुनत सब कर हित होई॥ जिन्ह हरि कथा सुनी नहिं काना। श्रवन रंध्र अहिभवन समाना॥

tadapi asaṃkā kīnhihu soī| kahata sunata saba kara hita hoī|| jinha hari kathā sunī nahiṃ kānā| śravana raṃdhra ahibhavana samānā||

नयनन्हि संत दरस नहिं देखा। लोचन मोरपंख कर लेखा॥ ते सिर कटु तुंबरि समतूला। जे न नमत हरि गुर पद मूला॥

nayananhi saṃta darasa nahiṃ dekhā| locana morapaṃkha kara lekhā|| te sira kaṭu tuṃbari samatūlā| je na namata hari gura pada mūlā||

जिन्ह हरिभगति हृदयँ नहिं आनी। जीवत सव समान तेइ प्रानी॥ जो नहिं करइ राम गुन गाना। जीह सो दादुर जीह समाना॥

jinha haribhagati hṛdayam̐ nahiṃ ānī| jīvata sava samāna tei prānī|| jo nahiṃ karai rāma guna gānā| jīha so dādura jīha samānā||

कुलिस कठोर निठुर सोइ छाती। सुनि हरिचरित न जो हरषाती॥ गिरिजा सुनहु राम कै लीला। सुर हित दनुज बिमोहनसीला॥

kulisa kaṭhora niṭhura soi chātī| suni haricarita na jo haraṣātī|| girijā sunahu rāma kai līlā| sura hita danuja bimohanasīlā||

दोहा ११३

रामकथा सुरधेनु सम सेवत सब सुख दानि। सतसमाज सुरलोक सब को न सुनै अस जानि ॥ ११३॥

rāmakathā suradhenu sama sevata saba sukha dāni| satasamāja suraloka saba ko na sunai asa jāni || 113||

रामकथा सुंदर कर तारी। संसय बिहग उडावनिहारी॥ रामकथा कलि बिटप कुठारी। सादर सुनु गिरिराजकुमारी॥

rāmakathā suṃdara kara tārī| saṃsaya bihaga uḍāvanihārī|| rāmakathā kali biṭapa kuṭhārī| sādara sunu girirājakumārī||

राम नाम गुन चरित सुहाए। जनम करम अगनित श्रुति गाए॥ जथा अनंत राम भगवाना। तथा कथा कीरति गुन नाना॥

rāma nāma guna carita suhāe| janama karama aganita śruti gāe|| jathā anaṃta rāma bhagavānā| tathā kathā kīrati guna nānā||

तदपि जथा श्रुत जसि मति मोरी। कहिहउँ देखि प्रीति अति तोरी॥ उमा प्रस्न तव सहज सुहाई। सुखद संतसंमत मोहि भाई॥

tadapi jathā śruta jasi mati morī| kahihaum̐ dekhi prīti ati torī|| umā prasna tava sahaja suhāī| sukhada saṃtasaṃmata mohi bhāī||

एक बात नहि मोहि सोहानी। जदपि मोह बस कहेहु भवानी॥ तुम जो कहा राम कोउ आना। जेहि श्रुति गाव धरहिं मुनि ध्याना॥

eka bāta nahi mohi sohānī| jadapi moha basa kahehu bhavānī|| tuma jo kahā rāma kou ānā| jehi śruti gāva dharahiṃ muni dhyānā||

दोहा ११४

कहहि सुनहि अस अधम नर ग्रसे जे मोह पिसाच। पाषंडी हरि पद बिमुख जानहिं झूठ न साच ॥ ११४॥

kahahi sunahi asa adhama nara grase je moha pisāca| pāṣaṃḍī hari pada bimukha jānahiṃ jhūṭha na sāca || 114||

अग्य अकोबिद अंध अभागी। काई बिषय मुकर मन लागी॥ लंपट कपटी कुटिल बिसेषी। सपनेहुँ संतसभा नहिं देखी॥

agya akobida aṃdha abhāgī| kāī biṣaya mukara mana lāgī|| laṃpaṭa kapaṭī kuṭila biseṣī| sapanehum̐ saṃtasabhā nahiṃ dekhī||

कहहिं ते बेद असंमत बानी। जिन्ह कें सूझ लाभु नहिं हानी॥ मुकर मलिन अरु नयन बिहीना। राम रूप देखहिं किमि दीना॥

kahahiṃ te beda asaṃmata bānī| jinha keṃ sūjha lābhu nahiṃ hānī|| mukara malina aru nayana bihīnā| rāma rūpa dekhahiṃ kimi dīnā||

जिन्ह कें अगुन न सगुन बिबेका। जल्पहिं कल्पित बचन अनेका॥ हरिमाया बस जगत भ्रमाहीं। तिन्हहि कहत कछु अघटित नाहीं॥

jinha keṃ aguna na saguna bibekā| jalpahiṃ kalpita bacana anekā|| harimāyā basa jagata bhramāhīṃ| tinhahi kahata kachu aghaṭita nāhīṃ||

बातुल भूत बिबस मतवारे। ते नहिं बोलहिं बचन बिचारे॥ जिन्ह कृत महामोह मद पाना। तिन् कर कहा करिअ नहिं काना॥

bātula bhūta bibasa matavāre| te nahiṃ bolahiṃ bacana bicāre|| jinha kṛta mahāmoha mada pānā| tin kara kahā karia nahiṃ kānā||

सोरठा ११५

अस निज हृदयँ बिचारि तजु संसय भजु राम पद। सुनु गिरिराज कुमारि भ्रम तम रबि कर बचन मम ॥ ११५॥

asa nija hṛdayam̐ bicāri taju saṃsaya bhaju rāma pada| sunu girirāja kumāri bhrama tama rabi kara bacana mama || 115||

सगुनहि अगुनहि नहिं कछु भेदा। गावहिं मुनि पुरान बुध बेदा॥ अगुन अरुप अलख अज जोई। भगत प्रेम बस सगुन सो होई॥

sagunahi agunahi nahiṃ kachu bhedā| gāvahiṃ muni purāna budha bedā|| aguna arupa alakha aja joī| bhagata prema basa saguna so hoī||

जो गुन रहित सगुन सोइ कैसें। जलु हिम उपल बिलग नहिं जैसें॥ जासु नाम भ्रम तिमिर पतंगा। तेहि किमि कहिअ बिमोह प्रसंगा॥

jo guna rahita saguna soi kaiseṃ| jalu hima upala bilaga nahiṃ jaiseṃ|| jāsu nāma bhrama timira pataṃgā| tehi kimi kahia bimoha prasaṃgā||

राम सच्चिदानंद दिनेसा। नहिं तहँ मोह निसा लवलेसा॥ सहज प्रकासरुप भगवाना। नहिं तहँ पुनि बिग्यान बिहाना॥

rāma saccidānaṃda dinesā| nahiṃ taham̐ moha nisā lavalesā|| sahaja prakāsarupa bhagavānā| nahiṃ taham̐ puni bigyāna bihānā||

हरष बिषाद ग्यान अग्याना। जीव धर्म अहमिति अभिमाना॥ राम ब्रह्म ब्यापक जग जाना। परमानन्द परेस पुराना॥

haraṣa biṣāda gyāna agyānā| jīva dharma ahamiti abhimānā|| rāma brahma byāpaka jaga jānā| paramānanda paresa purānā||

दोहा ११६

पुरुष प्रसिद्ध प्रकास निधि प्रगट परावर नाथ। रघुकुलमनि मम स्वामि सोइ कहि सिवँ नायउ माथ ॥ ११६॥

puruṣa prasiddha prakāsa nidhi pragaṭa parāvara nātha| raghukulamani mama svāmi soi kahi sivam̐ nāyau mātha || 116||

निज भ्रम नहिं समुझहिं अग्यानी। प्रभु पर मोह धरहिं जड़ प्रानी॥ जथा गगन घन पटल निहारी। झाँपेउ मानु कहहिं कुबिचारी॥

nija bhrama nahiṃ samujhahiṃ agyānī| prabhu para moha dharahiṃ jaṛa prānī|| jathā gagana ghana paṭala nihārī| jhām̐peu mānu kahahiṃ kubicārī||

चितव जो लोचन अंगुलि लाएँ। प्रगट जुगल ससि तेहि के भाएँ॥ उमा राम बिषइक अस मोहा। नभ तम धूम धूरि जिमि सोहा॥

citava jo locana aṃguli lāem̐| pragaṭa jugala sasi tehi ke bhāem̐|| umā rāma biṣaika asa mohā| nabha tama dhūma dhūri jimi sohā||

बिषय करन सुर जीव समेता। सकल एक तें एक सचेता॥ सब कर परम प्रकासक जोई। राम अनादि अवधपति सोई॥

biṣaya karana sura jīva sametā| sakala eka teṃ eka sacetā|| saba kara parama prakāsaka joī| rāma anādi avadhapati soī||

जगत प्रकास्य प्रकासक रामू। मायाधीस ग्यान गुन धामू॥ जासु सत्यता तें जड माया। भास सत्य इव मोह सहाया॥

jagata prakāsya prakāsaka rāmū| māyādhīsa gyāna guna dhāmū|| jāsu satyatā teṃ jaḍa māyā| bhāsa satya iva moha sahāyā||

दोहा ११७

रजत सीप महुँ मास जिमि जथा भानु कर बारि। जदपि मृषा तिहुँ काल सोइ भ्रम न सकइ कोउ टारि ॥ ११७॥

rajata sīpa mahum̐ māsa jimi jathā bhānu kara bāri| jadapi mṛṣā tihum̐ kāla soi bhrama na sakai kou ṭāri || 117||

एहि बिधि जग हरि आश्रित रहई। जदपि असत्य देत दुख अहई॥ जौं सपनें सिर काटै कोई। बिनु जागें न दूरि दुख होई॥

ehi bidhi jaga hari āśrita rahaī| jadapi asatya deta dukha ahaī|| jauṃ sapaneṃ sira kāṭai koī| binu jāgeṃ na dūri dukha hoī||

जासु कृपाँ अस भ्रम मिटि जाई। गिरिजा सोइ कृपाल रघुराई॥ आदि अंत कोउ जासु न पावा। मति अनुमानि निगम अस गावा॥

jāsu kṛpām̐ asa bhrama miṭi jāī| girijā soi kṛpāla raghurāī|| ādi aṃta kou jāsu na pāvā| mati anumāni nigama asa gāvā||

बिनु पद चलइ सुनइ बिनु काना। कर बिनु करम करइ बिधि नाना॥ आनन रहित सकल रस भोगी। बिनु बानी बकता बड़ जोगी॥

binu pada calai sunai binu kānā| kara binu karama karai bidhi nānā|| ānana rahita sakala rasa bhogī| binu bānī bakatā baṛa jogī||

तनु बिनु परस नयन बिनु देखा। ग्रहइ घ्रान बिनु बास असेषा॥ असि सब भाँति अलौकिक करनी। महिमा जासु जाइ नहिं बरनी॥

tanu binu parasa nayana binu dekhā| grahai ghrāna binu bāsa aseṣā|| asi saba bhām̐ti alaukika karanī| mahimā jāsu jāi nahiṃ baranī||

दोहा

जेहि इमि गावहि बेद बुध जाहि धरहिं मुनि ध्यान।

jehi imi gāvahi beda budha jāhi dharahiṃ muni dhyāna|

सोरठा ११८

सोइ दसरथ सुत भगत हित कोसलपति भगवान ॥ ११८॥

soi dasaratha suta bhagata hita kosalapati bhagavāna || 118||

कासीं मरत जंतु अवलोकी। जासु नाम बल करउँ बिसोकी॥

kāsīṃ marata jaṃtu avalokī| jāsu nāma bala karaum̐ bisokī||

सोरठा १

सोइ प्रभु मोर चराचर स्वामी। रघुबर सब उर अंतरजामी॥

soi prabhu mora carācara svāmī| raghubara saba ura aṃtarajāmī||

बिबसहुँ जासु नाम नर कहहीं। जनम अनेक रचित अघ दहहीं॥ सादर सुमिरन जे नर करहीं। भव बारिधि गोपद इव तरहीं॥

bibasahum̐ jāsu nāma nara kahahīṃ| janama aneka racita agha dahahīṃ|| sādara sumirana je nara karahīṃ| bhava bāridhi gopada iva tarahīṃ||

राम सो परमातमा भवानी। तहँ भ्रम अति अबिहित तव बानी॥ अस संसय आनत उर माहीं। ग्यान बिराग सकल गुन जाहीं॥

rāma so paramātamā bhavānī| taham̐ bhrama ati abihita tava bānī|| asa saṃsaya ānata ura māhīṃ| gyāna birāga sakala guna jāhīṃ||

सुनि सिव के भ्रम भंजन बचना। मिटि गै सब कुतरक कै रचना॥ भइ रघुपति पद प्रीति प्रतीती। दारुन असंभावना बीती॥

suni siva ke bhrama bhaṃjana bacanā| miṭi gai saba kutaraka kai racanā|| bhai raghupati pada prīti pratītī| dāruna asaṃbhāvanā bītī||

दोहा ११९

पुनि पुनि प्रभु पद कमल गहि जोरि पंकरुह पानि। बोली गिरिजा बचन बर मनहुँ प्रेम रस सानि ॥ ११९॥

puni puni prabhu pada kamala gahi jori paṃkaruha pāni| bolī girijā bacana bara manahum̐ prema rasa sāni || 119||

ससि कर सम सुनि गिरा तुम्हारी। मिटा मोह सरदातप भारी॥ तुम्ह कृपाल सबु संसउ हरेऊ। राम स्वरुप जानि मोहि परेऊ॥

sasi kara sama suni girā tumhārī| miṭā moha saradātapa bhārī|| tumha kṛpāla sabu saṃsau hareū| rāma svarupa jāni mohi pareū||

नाथ कृपाँ अब गयउ बिषादा। सुखी भयउँ प्रभु चरन प्रसादा॥ अब मोहि आपनि किंकरि जानी। जदपि सहज जड नारि अयानी॥

nātha kṛpām̐ aba gayau biṣādā| sukhī bhayaum̐ prabhu carana prasādā|| aba mohi āpani kiṃkari jānī| jadapi sahaja jaḍa nāri ayānī||

प्रथम जो मैं पूछा सोइ कहहू। जौं मो पर प्रसन्न प्रभु अहहू॥ राम ब्रह्म चिनमय अबिनासी। सर्ब रहित सब उर पुर बासी॥

prathama jo maiṃ pūchā soi kahahū| jauṃ mo para prasanna prabhu ahahū|| rāma brahma cinamaya abināsī| sarba rahita saba ura pura bāsī||

नाथ धरेउ नरतनु केहि हेतू। मोहि समुझाइ कहहु बृषकेतू॥ उमा बचन सुनि परम बिनीता। रामकथा पर प्रीति पुनीता॥

nātha dhareu naratanu kehi hetū| mohi samujhāi kahahu bṛṣaketū|| umā bacana suni parama binītā| rāmakathā para prīti punītā||

दोहा १२०(क)

हिंयँ हरषे कामारि तब संकर सहज सुजान। बहु बिधि उमहि प्रसंसि पुनि बोले कृपानिधान ॥ १२० (क)॥

hiṃyam̐ haraṣe kāmāri taba saṃkara sahaja sujāna| bahu bidhi umahi prasaṃsi puni bole kṛpānidhāna || 120 (ka)||