अयोध्याकाण्ड

अयोध्याकाण्ड · दोहा ७२–८९

शेअर करा

दीन्हि मोहि सिख नीकि गोसाईं। लागि अगम अपनी कदराईं॥ नरबर धीर धरम धुर धारी। निगम नीति कहुँ ते अधिकारी॥

dīnhi mohi sikha nīki gosāīṃ| lāgi agama apanī kadarāīṃ|| narabara dhīra dharama dhura dhārī| nigama nīti kahum̐ te adhikārī||

मैं सिसु प्रभु सनेहँ प्रतिपाला। मंदरु मेरु कि लेहिं मराला॥ गुर पितु मातु न जानउँ काहू। कहउँ सुभाउ नाथ पतिआहू॥

maiṃ sisu prabhu saneham̐ pratipālā| maṃdaru meru ki lehiṃ marālā|| gura pitu mātu na jānaum̐ kāhū| kahaum̐ subhāu nātha patiāhū||

जहँ लगि जगत सनेह सगाई। प्रीति प्रतीति निगम निजु गाई॥ मोरें सबइ एक तुम्ह स्वामी। दीनबंधु उर अंतरजामी॥

jaham̐ lagi jagata saneha sagāī| prīti pratīti nigama niju gāī|| moreṃ sabai eka tumha svāmī| dīnabaṃdhu ura aṃtarajāmī||

धरम नीति उपदेसिअ ताही। कीरति भूति सुगति प्रिय जाही॥ मन क्रम बचन चरन रत होई। कृपासिंधु परिहरिअ कि सोई॥

dharama nīti upadesia tāhī| kīrati bhūti sugati priya jāhī|| mana krama bacana carana rata hoī| kṛpāsiṃdhu pariharia ki soī||

दोहा ७२

करुनासिंधु सुबंध के सुनि मृदु बचन बिनीत। समुझाए उर लाइ प्रभु जानि सनेहँ सभीत ॥ ७२॥

karunāsiṃdhu subaṃdha ke suni mṛdu bacana binīta| samujhāe ura lāi prabhu jāni saneham̐ sabhīta || 72||

मागहु बिदा मातु सन जाई। आवहु बेगि चलहु बन भाई॥ मुदित भए सुनि रघुबर बानी। भयउ लाभ बड़ गइ बड़ि हानी॥

māgahu bidā mātu sana jāī| āvahu begi calahu bana bhāī|| mudita bhae suni raghubara bānī| bhayau lābha baṛa gai baṛi hānī||

हरषित ह्दयँ मातु पहिं आए। मनहुँ अंध फिरि लोचन पाए॥ जाइ जननि पग नायउ माथा। मनु रघुनंदन जानकि साथा॥

haraṣita hdayam̐ mātu pahiṃ āe| manahum̐ aṃdha phiri locana pāe|| jāi janani paga nāyau māthā| manu raghunaṃdana jānaki sāthā||

पूँछे मातु मलिन मन देखी। लखन कही सब कथा बिसेषी॥ गई सहमि सुनि बचन कठोरा। मृगी देखि दव जनु चहु ओरा॥

pūm̐che mātu malina mana dekhī| lakhana kahī saba kathā biseṣī|| gaī sahami suni bacana kaṭhorā| mṛgī dekhi dava janu cahu orā||

लखन लखेउ भा अनरथ आजू। एहिं सनेह बस करब अकाजू॥ मागत बिदा सभय सकुचाहीं। जाइ संग बिधि कहिहि कि नाही॥

lakhana lakheu bhā anaratha ājū| ehiṃ saneha basa karaba akājū|| māgata bidā sabhaya sakucāhīṃ| jāi saṃga bidhi kahihi ki nāhī||

दोहा ७३

समुझि सुमित्राँ राम सिय रूप सुसीलु सुभाउ। नृप सनेहु लखि धुनेउ सिरु पापिनि दीन्ह कुदाउ ॥ ७३॥

samujhi sumitrām̐ rāma siya rūpa susīlu subhāu| nṛpa sanehu lakhi dhuneu siru pāpini dīnha kudāu || 73||

धीरजु धरेउ कुअवसर जानी। सहज सुह्द बोली मृदु बानी॥ तात तुम्हारि मातु बैदेही। पिता रामु सब भाँति सनेही॥

dhīraju dhareu kuavasara jānī| sahaja suhda bolī mṛdu bānī|| tāta tumhāri mātu baidehī| pitā rāmu saba bhām̐ti sanehī||

अवध तहाँ जहँ राम निवासू। तहँइँ दिवसु जहँ भानु प्रकासू॥ जौ पै सीय रामु बन जाहीं। अवध तुम्हार काजु कछु नाहिं॥

avadha tahām̐ jaham̐ rāma nivāsū| taham̐im̐ divasu jaham̐ bhānu prakāsū|| jau pai sīya rāmu bana jāhīṃ| avadha tumhāra kāju kachu nāhiṃ||

गुर पितु मातु बंधु सुर साई। सेइअहिं सकल प्रान की नाईं॥ रामु प्रानप्रिय जीवन जी के। स्वारथ रहित सखा सबही कै॥

gura pitu mātu baṃdhu sura sāī| seiahiṃ sakala prāna kī nāīṃ|| rāmu prānapriya jīvana jī ke| svāratha rahita sakhā sabahī kai||

पूजनीय प्रिय परम जहाँ तें। सब मानिअहिं राम के नातें॥ अस जियँ जानि संग बन जाहू। लेहु तात जग जीवन लाहू॥

pūjanīya priya parama jahām̐ teṃ| saba māniahiṃ rāma ke nāteṃ|| asa jiyam̐ jāni saṃga bana jāhū| lehu tāta jaga jīvana lāhū||

दोहा ७४

भूरि भाग भाजनु भयहु मोहि समेत बलि जाउँ। जौम तुम्हरें मन छाड़ि छलु कीन्ह राम पद ठाउँ ॥ ७४॥

bhūri bhāga bhājanu bhayahu mohi sameta bali jāum̐| jauma tumhareṃ mana chāṛi chalu kīnha rāma pada ṭhāum̐ || 74||

पुत्रवती जुबती जग सोई। रघुपति भगतु जासु सुतु होई॥ नतरु बाँझ भलि बादि बिआनी। राम बिमुख सुत तें हित जानी॥

putravatī jubatī jaga soī| raghupati bhagatu jāsu sutu hoī|| nataru bām̐jha bhali bādi biānī| rāma bimukha suta teṃ hita jānī||

तुम्हरेहिं भाग रामु बन जाहीं। दूसर हेतु तात कछु नाहीं॥ सकल सुकृत कर बड़ फलु एहू। राम सीय पद सहज सनेहू॥

tumharehiṃ bhāga rāmu bana jāhīṃ| dūsara hetu tāta kachu nāhīṃ|| sakala sukṛta kara baṛa phalu ehū| rāma sīya pada sahaja sanehū||

राग रोषु इरिषा मदु मोहू। जनि सपनेहुँ इन्ह के बस होहू॥ सकल प्रकार बिकार बिहाई। मन क्रम बचन करेहु सेवकाई॥

rāga roṣu iriṣā madu mohū| jani sapanehum̐ inha ke basa hohū|| sakala prakāra bikāra bihāī| mana krama bacana karehu sevakāī||

तुम्ह कहुँ बन सब भाँति सुपासू। सँग पितु मातु रामु सिय जासू॥ जेहिं न रामु बन लहहिं कलेसू। सुत सोइ करेहु इहइ उपदेसू॥

tumha kahum̐ bana saba bhām̐ti supāsū| sam̐ga pitu mātu rāmu siya jāsū|| jehiṃ na rāmu bana lahahiṃ kalesū| suta soi karehu ihai upadesū||

छंद

उपदेसु यहु जेहिं तात तुम्हरे राम सिय सुख पावहीं। पितु मातु प्रिय परिवार पुर सुख सुरति बन बिसरावहीं॥ तुलसी प्रभुहि सिख देइ आयसु दीन्ह पुनि आसिष दई। रति होउ अबिरल अमल सिय रघुबीर पद नित नित नई॥

upadesu yahu jehiṃ tāta tumhare rāma siya sukha pāvahīṃ| pitu mātu priya parivāra pura sukha surati bana bisarāvahīṃ|| tulasī prabhuhi sikha dei āyasu dīnha puni āsiṣa daī| rati hou abirala amala siya raghubīra pada nita nita naī||

सोरठा ७५

मातु चरन सिरु नाइ चले तुरत संकित हृदयँ। बागुर बिषम तोराइ मनहुँ भाग मृगु भाग बस ॥ ७५॥

mātu carana siru nāi cale turata saṃkita hṛdayam̐| bāgura biṣama torāi manahum̐ bhāga mṛgu bhāga basa || 75||

गए लखनु जहँ जानकिनाथू। भे मन मुदित पाइ प्रिय साथू॥ बंदि राम सिय चरन सुहाए। चले संग नृपमंदिर आए॥

gae lakhanu jaham̐ jānakināthū| bhe mana mudita pāi priya sāthū|| baṃdi rāma siya carana suhāe| cale saṃga nṛpamaṃdira āe||

कहहिं परसपर पुर नर नारी। भलि बनाइ बिधि बात बिगारी॥ तन कृस दुखु बदन मलीने। बिकल मनहुँ माखी मधु छीने॥

kahahiṃ parasapara pura nara nārī| bhali banāi bidhi bāta bigārī|| tana kṛsa dukhu badana malīne| bikala manahum̐ mākhī madhu chīne||

कर मीजहिं सिरु धुनि पछिताहीं। जनु बिन पंख बिहग अकुलाहीं॥ भइ बड़ि भीर भूप दरबारा। बरनि न जाइ बिषादु अपारा॥

kara mījahiṃ siru dhuni pachitāhīṃ| janu bina paṃkha bihaga akulāhīṃ|| bhai baṛi bhīra bhūpa darabārā| barani na jāi biṣādu apārā||

सचिवँ उठाइ राउ बैठारे। कहि प्रिय बचन रामु पगु धारे॥ सिय समेत दोउ तनय निहारी। ब्याकुल भयउ भूमिपति भारी॥

sacivam̐ uṭhāi rāu baiṭhāre| kahi priya bacana rāmu pagu dhāre|| siya sameta dou tanaya nihārī| byākula bhayau bhūmipati bhārī||

दोहा ७६

सीय सहित सुत सुभग दोउ देखि देखि अकुलाइ। बारहिं बार सनेह बस राउ लेइ उर लाइ ॥ ७६॥

sīya sahita suta subhaga dou dekhi dekhi akulāi| bārahiṃ bāra saneha basa rāu lei ura lāi || 76||

सकइ न बोलि बिकल नरनाहू। सोक जनित उर दारुन दाहू॥ नाइ सीसु पद अति अनुरागा। उठि रघुबीर बिदा तब मागा॥

sakai na boli bikala naranāhū| soka janita ura dāruna dāhū|| nāi sīsu pada ati anurāgā| uṭhi raghubīra bidā taba māgā||

पितु असीस आयसु मोहि दीजै। हरष समय बिसमउ कत कीजै॥ तात किएँ प्रिय प्रेम प्रमादू। जसु जग जाइ होइ अपबादू॥

pitu asīsa āyasu mohi dījai| haraṣa samaya bisamau kata kījai|| tāta kiem̐ priya prema pramādū| jasu jaga jāi hoi apabādū||

सुनि सनेह बस उठि नरनाहाँ। बैठारे रघुपति गहि बाहाँ॥ सुनहु तात तुम्ह कहुँ मुनि कहहीं। रामु चराचर नायक अहहीं॥

suni saneha basa uṭhi naranāhām̐| baiṭhāre raghupati gahi bāhām̐|| sunahu tāta tumha kahum̐ muni kahahīṃ| rāmu carācara nāyaka ahahīṃ||

सुभ अरु असुभ करम अनुहारी। ईस देइ फलु ह्दयँ बिचारी॥ करइ जो करम पाव फल सोई। निगम नीति असि कह सबु कोई॥

subha aru asubha karama anuhārī| īsa dei phalu hdayam̐ bicārī|| karai jo karama pāva phala soī| nigama nīti asi kaha sabu koī||

दोहा ७७

औरु करै अपराधु कोउ और पाव फल भोगु। अति बिचित्र भगवंत गति को जग जानै जोगु ॥ ७७॥

auru karai aparādhu kou aura pāva phala bhogu| ati bicitra bhagavaṃta gati ko jaga jānai jogu || 77||

रायँ राम राखन हित लागी। बहुत उपाय किए छलु त्यागी॥ लखी राम रुख रहत न जाने। धरम धुरंधर धीर सयाने॥

rāyam̐ rāma rākhana hita lāgī| bahuta upāya kie chalu tyāgī|| lakhī rāma rukha rahata na jāne| dharama dhuraṃdhara dhīra sayāne||

तब नृप सीय लाइ उर लीन्ही। अति हित बहुत भाँति सिख दीन्ही॥ कहि बन के दुख दुसह सुनाए। सासु ससुर पितु सुख समुझाए॥

taba nṛpa sīya lāi ura līnhī| ati hita bahuta bhām̐ti sikha dīnhī|| kahi bana ke dukha dusaha sunāe| sāsu sasura pitu sukha samujhāe||

सिय मनु राम चरन अनुरागा। घरु न सुगमु बनु बिषमु न लागा॥ औरउ सबहिं सीय समुझाई। कहि कहि बिपिन बिपति अधिकाई॥

siya manu rāma carana anurāgā| gharu na sugamu banu biṣamu na lāgā|| aurau sabahiṃ sīya samujhāī| kahi kahi bipina bipati adhikāī||

सचिव नारि गुर नारि सयानी। सहित सनेह कहहिं मृदु बानी॥ तुम्ह कहुँ तौ न दीन्ह बनबासू। करहु जो कहहिं ससुर गुर सासू॥

saciva nāri gura nāri sayānī| sahita saneha kahahiṃ mṛdu bānī|| tumha kahum̐ tau na dīnha banabāsū| karahu jo kahahiṃ sasura gura sāsū||

दोहा ७८

-सिख सीतलि हित मधुर मृदु सुनि सीतहि न सोहानि। सरद चंद चंदनि लगत जनु चकई अकुलानि ॥ ७८॥

-sikha sītali hita madhura mṛdu suni sītahi na sohāni| sarada caṃda caṃdani lagata janu cakaī akulāni || 78||

सीय सकुच बस उतरु न देई। सो सुनि तमकि उठी कैकेई॥ मुनि पट भूषन भाजन आनी। आगें धरि बोली मृदु बानी॥

sīya sakuca basa utaru na deī| so suni tamaki uṭhī kaikeī|| muni paṭa bhūṣana bhājana ānī| āgeṃ dhari bolī mṛdu bānī||

नृपहि प्रान प्रिय तुम्ह रघुबीरा। सील सनेह न छाड़िहि भीरा॥ सुकृत सुजसु परलोकु नसाऊ। तुम्हहि जान बन कहिहि न काऊ॥

nṛpahi prāna priya tumha raghubīrā| sīla saneha na chāṛihi bhīrā|| sukṛta sujasu paraloku nasāū| tumhahi jāna bana kahihi na kāū||

अस बिचारि सोइ करहु जो भावा। राम जननि सिख सुनि सुखु पावा॥ भूपहि बचन बानसम लागे। करहिं न प्रान पयान अभागे॥

asa bicāri soi karahu jo bhāvā| rāma janani sikha suni sukhu pāvā|| bhūpahi bacana bānasama lāge| karahiṃ na prāna payāna abhāge||

लोग बिकल मुरुछित नरनाहू। काह करिअ कछु सूझ न काहू॥ रामु तुरत मुनि बेषु बनाई। चले जनक जननिहि सिरु नाई॥

loga bikala muruchita naranāhū| kāha karia kachu sūjha na kāhū|| rāmu turata muni beṣu banāī| cale janaka jananihi siru nāī||

दोहा ७९

सजि बन साजु समाजु सबु बनिता बंधु समेत। बंदि बिप्र गुर चरन प्रभु चले करि सबहि अचेत ॥ ७९॥

saji bana sāju samāju sabu banitā baṃdhu sameta| baṃdi bipra gura carana prabhu cale kari sabahi aceta || 79||

निकसि बसिष्ठ द्वार भए ठाढ़े। देखे लोग बिरह दव दाढ़े॥ कहि प्रिय बचन सकल समुझाए। बिप्र बृंद रघुबीर बोलाए॥

nikasi basiṣṭha dvāra bhae ṭhāṛhe| dekhe loga biraha dava dāṛhe|| kahi priya bacana sakala samujhāe| bipra bṛṃda raghubīra bolāe||

गुर सन कहि बरषासन दीन्हे। आदर दान बिनय बस कीन्हे॥ जाचक दान मान संतोषे। मीत पुनीत प्रेम परितोषे॥

gura sana kahi baraṣāsana dīnhe| ādara dāna binaya basa kīnhe|| jācaka dāna māna saṃtoṣe| mīta punīta prema paritoṣe||

दासीं दास बोलाइ बहोरी। गुरहि सौंपि बोले कर जोरी॥ सब कै सार सँभार गोसाईं। करबि जनक जननी की नाई॥

dāsīṃ dāsa bolāi bahorī| gurahi sauṃpi bole kara jorī|| saba kai sāra sam̐bhāra gosāīṃ| karabi janaka jananī kī nāī||

बारहिं बार जोरि जुग पानी। कहत रामु सब सन मृदु बानी॥

bārahiṃ bāra jori juga pānī| kahata rāmu saba sana mṛdu bānī||

सोरठा ४

सोइ सब भाँति मोर हितकारी। जेहि तें रहै भुआल सुखारी॥

soi saba bhām̐ti mora hitakārī| jehi teṃ rahai bhuāla sukhārī||

दोहा

मातु सकल मोरे बिरहँ जेहिं न होहिं दुख दीन।

mātu sakala more biraham̐ jehiṃ na hohiṃ dukha dīna|

सोरठा ८०

सोइ उपाउ तुम्ह करेहु सब पुर जन परम प्रबीन ॥ ८०॥

soi upāu tumha karehu saba pura jana parama prabīna || 80||

एहि बिधि राम सबहि समुझावा। गुर पद पदुम हरषि सिरु नावा॥ गनपती गौरि गिरीसु मनाई। चले असीस पाइ रघुराई॥

ehi bidhi rāma sabahi samujhāvā| gura pada paduma haraṣi siru nāvā|| ganapatī gauri girīsu manāī| cale asīsa pāi raghurāī||

राम चलत अति भयउ बिषादू। सुनि न जाइ पुर आरत नादू॥ कुसगुन लंक अवध अति सोकू। हहरष बिषाद बिबस सुरलोकू॥

rāma calata ati bhayau biṣādū| suni na jāi pura ārata nādū|| kusaguna laṃka avadha ati sokū| haharaṣa biṣāda bibasa suralokū||

गइ मुरुछा तब भूपति जागे। बोलि सुमंत्रु कहन अस लागे॥ रामु चले बन प्रान न जाहीं। केहि सुख लागि रहत तन माहीं॥

gai muruchā taba bhūpati jāge| boli sumaṃtru kahana asa lāge|| rāmu cale bana prāna na jāhīṃ| kehi sukha lāgi rahata tana māhīṃ||

एहि तें कवन ब्यथा बलवाना। जो दुखु पाइ तजहिं तनु प्राना॥ पुनि धरि धीर कहइ नरनाहू। लै रथु संग सखा तुम्ह जाहू॥

ehi teṃ kavana byathā balavānā| jo dukhu pāi tajahiṃ tanu prānā|| puni dhari dhīra kahai naranāhū| lai rathu saṃga sakhā tumha jāhū||

दोहा ८१

-सुठि सुकुमार कुमार दोउ जनकसुता सुकुमारि। रथ चढ़ाइ देखराइ बनु फिरेहु गएँ दिन चारि ॥ ८१॥

-suṭhi sukumāra kumāra dou janakasutā sukumāri| ratha caṛhāi dekharāi banu phirehu gaem̐ dina cāri || 81||

जौ नहिं फिरहिं धीर दोउ भाई। सत्यसंध दृढ़ब्रत रघुराई॥ तौ तुम्ह बिनय करेहु कर जोरी। फेरिअ प्रभु मिथिलेसकिसोरी॥

jau nahiṃ phirahiṃ dhīra dou bhāī| satyasaṃdha dṛṛhabrata raghurāī|| tau tumha binaya karehu kara jorī| pheria prabhu mithilesakisorī||

जब सिय कानन देखि डेराई। कहेहु मोरि सिख अवसरु पाई॥ सासु ससुर अस कहेउ सँदेसू। पुत्रि फिरिअ बन बहुत कलेसू॥

jaba siya kānana dekhi ḍerāī| kahehu mori sikha avasaru pāī|| sāsu sasura asa kaheu sam̐desū| putri phiria bana bahuta kalesū||

पितृगृह कबहुँ कबहुँ ससुरारी। रहेहु जहाँ रुचि होइ तुम्हारी॥ एहि बिधि करेहु उपाय कदंबा। फिरइ त होइ प्रान अवलंबा॥

pitṛgṛha kabahum̐ kabahum̐ sasurārī| rahehu jahām̐ ruci hoi tumhārī|| ehi bidhi karehu upāya kadaṃbā| phirai ta hoi prāna avalaṃbā||

नाहिं त मोर मरनु परिनामा। कछु न बसाइ भएँ बिधि बामा॥ अस कहि मुरुछि परा महि राऊ। रामु लखनु सिय आनि देखाऊ॥

nāhiṃ ta mora maranu parināmā| kachu na basāi bhaem̐ bidhi bāmā|| asa kahi muruchi parā mahi rāū| rāmu lakhanu siya āni dekhāū||

दोहा ८२

-पाइ रजायसु नाइ सिरु रथु अति बेग बनाइ। गयउ जहाँ बाहेर नगर सीय सहित दोउ भाइ ॥ ८२॥

-pāi rajāyasu nāi siru rathu ati bega banāi| gayau jahām̐ bāhera nagara sīya sahita dou bhāi || 82||

तब सुमंत्र नृप बचन सुनाए। करि बिनती रथ रामु चढ़ाए॥ चढ़ि रथ सीय सहित दोउ भाई। चले हृदयँ अवधहि सिरु नाई॥

taba sumaṃtra nṛpa bacana sunāe| kari binatī ratha rāmu caṛhāe|| caṛhi ratha sīya sahita dou bhāī| cale hṛdayam̐ avadhahi siru nāī||

चलत रामु लखि अवध अनाथा। बिकल लोग सब लागे साथा॥ कृपासिंधु बहुबिधि समुझावहिं। फिरहिं प्रेम बस पुनि फिरि आवहिं॥

calata rāmu lakhi avadha anāthā| bikala loga saba lāge sāthā|| kṛpāsiṃdhu bahubidhi samujhāvahiṃ| phirahiṃ prema basa puni phiri āvahiṃ||

लागति अवध भयावनि भारी। मानहुँ कालराति अँधिआरी॥ घोर जंतु सम पुर नर नारी। डरपहिं एकहि एक निहारी॥

lāgati avadha bhayāvani bhārī| mānahum̐ kālarāti am̐dhiārī|| ghora jaṃtu sama pura nara nārī| ḍarapahiṃ ekahi eka nihārī||

घर मसान परिजन जनु भूता। सुत हित मीत मनहुँ जमदूता॥ बागन्ह बिटप बेलि कुम्हिलाहीं। सरित सरोवर देखि न जाहीं॥

ghara masāna parijana janu bhūtā| suta hita mīta manahum̐ jamadūtā|| bāganha biṭapa beli kumhilāhīṃ| sarita sarovara dekhi na jāhīṃ||

दोहा ८३

हय गय कोटिन्ह केलिमृग पुरपसु चातक मोर। पिक रथांग सुक सारिका सारस हंस चकोर ॥ ८३॥

haya gaya koṭinha kelimṛga purapasu cātaka mora| pika rathāṃga suka sārikā sārasa haṃsa cakora || 83||

राम बियोग बिकल सब ठाढ़े। जहँ तहँ मनहुँ चित्र लिखि काढ़े॥ नगरु सफल बनु गहबर भारी। खग मृग बिपुल सकल नर नारी॥

rāma biyoga bikala saba ṭhāṛhe| jaham̐ taham̐ manahum̐ citra likhi kāṛhe|| nagaru saphala banu gahabara bhārī| khaga mṛga bipula sakala nara nārī||

बिधि कैकेई किरातिनि कीन्ही। जेंहि दव दुसह दसहुँ दिसि दीन्ही॥ सहि न सके रघुबर बिरहागी। चले लोग सब ब्याकुल भागी॥

bidhi kaikeī kirātini kīnhī| jeṃhi dava dusaha dasahum̐ disi dīnhī|| sahi na sake raghubara birahāgī| cale loga saba byākula bhāgī||

सबहिं बिचार कीन्ह मन माहीं। राम लखन सिय बिनु सुखु नाहीं॥ जहाँ रामु तहँ सबुइ समाजू। बिनु रघुबीर अवध नहिं काजू॥

sabahiṃ bicāra kīnha mana māhīṃ| rāma lakhana siya binu sukhu nāhīṃ|| jahām̐ rāmu taham̐ sabui samājū| binu raghubīra avadha nahiṃ kājū||

चले साथ अस मंत्रु दृढ़ाई। सुर दुर्लभ सुख सदन बिहाई॥ राम चरन पंकज प्रिय जिन्हही। बिषय भोग बस करहिं कि तिन्हही॥

cale sātha asa maṃtru dṛṛhāī| sura durlabha sukha sadana bihāī|| rāma carana paṃkaja priya jinhahī| biṣaya bhoga basa karahiṃ ki tinhahī||

दोहा ८४

बालक बृद्ध बिहाइ गृँह लगे लोग सब साथ। तमसा तीर निवासु किय प्रथम दिवस रघुनाथ ॥ ८४॥

bālaka bṛddha bihāi gṛm̐ha lage loga saba sātha| tamasā tīra nivāsu kiya prathama divasa raghunātha || 84||

रघुपति प्रजा प्रेमबस देखी। सदय हृदयँ दुखु भयउ बिसेषी॥ करुनामय रघुनाथ गोसाँई। बेगि पाइअहिं पीर पराई॥

raghupati prajā premabasa dekhī| sadaya hṛdayam̐ dukhu bhayau biseṣī|| karunāmaya raghunātha gosām̐ī| begi pāiahiṃ pīra parāī||

कहि सप्रेम मृदु बचन सुहाए। बहुबिधि राम लोग समुझाए॥ किए धरम उपदेस घनेरे। लोग प्रेम बस फिरहिं न फेरे॥

kahi saprema mṛdu bacana suhāe| bahubidhi rāma loga samujhāe|| kie dharama upadesa ghanere| loga prema basa phirahiṃ na phere||

सीलु सनेहु छाड़ि नहिं जाई। असमंजस बस भे रघुराई॥ लोग सोग श्रम बस गए सोई। कछुक देवमायाँ मति मोई॥

sīlu sanehu chāṛi nahiṃ jāī| asamaṃjasa basa bhe raghurāī|| loga soga śrama basa gae soī| kachuka devamāyām̐ mati moī||

जबहिं जाम जुग जामिनि बीती। राम सचिव सन कहेउ सप्रीती॥ खोज मारि रथु हाँकहु ताता। आन उपायँ बनिहि नहिं बाता॥

jabahiṃ jāma juga jāmini bītī| rāma saciva sana kaheu saprītī|| khoja māri rathu hām̐kahu tātā| āna upāyam̐ banihi nahiṃ bātā||

दोहा ८५

राम लखन सुय जान चढ़ि संभु चरन सिरु नाइ। सचिवँ चलायउ तुरत रथु इत उत खोज दुराइ ॥ ८५॥

rāma lakhana suya jāna caṛhi saṃbhu carana siru nāi| sacivam̐ calāyau turata rathu ita uta khoja durāi || 85||

जागे सकल लोग भएँ भोरू। गे रघुनाथ भयउ अति सोरू॥ रथ कर खोज कतहहुँ नहिं पावहिं। राम राम कहि चहु दिसि धावहिं॥

jāge sakala loga bhaem̐ bhorū| ge raghunātha bhayau ati sorū|| ratha kara khoja katahahum̐ nahiṃ pāvahiṃ| rāma rāma kahi cahu disi dhāvahiṃ||

मनहुँ बारिनिधि बूड़ जहाजू। भयउ बिकल बड़ बनिक समाजू॥ एकहि एक देंहिं उपदेसू। तजे राम हम जानि कलेसू॥

manahum̐ bārinidhi būṛa jahājū| bhayau bikala baṛa banika samājū|| ekahi eka deṃhiṃ upadesū| taje rāma hama jāni kalesū||

निंदहिं आपु सराहहिं मीना। धिग जीवनु रघुबीर बिहीना॥ जौं पै प्रिय बियोगु बिधि कीन्हा। तौ कस मरनु न मागें दीन्हा॥

niṃdahiṃ āpu sarāhahiṃ mīnā| dhiga jīvanu raghubīra bihīnā|| jauṃ pai priya biyogu bidhi kīnhā| tau kasa maranu na māgeṃ dīnhā||

एहि बिधि करत प्रलाप कलापा। आए अवध भरे परितापा॥ बिषम बियोगु न जाइ बखाना। अवधि आस सब राखहिं प्राना॥

ehi bidhi karata pralāpa kalāpā| āe avadha bhare paritāpā|| biṣama biyogu na jāi bakhānā| avadhi āsa saba rākhahiṃ prānā||

दोहा ८६

राम दरस हित नेम ब्रत लगे करन नर नारि। मनहुँ कोक कोकी कमल दीन बिहीन तमारि ॥ ८६॥

rāma darasa hita nema brata lage karana nara nāri| manahum̐ koka kokī kamala dīna bihīna tamāri || 86||

सीता सचिव सहित दोउ भाई। सृंगबेरपुर पहुँचे जाई॥ उतरे राम देवसरि देखी। कीन्ह दंडवत हरषु बिसेषी॥

sītā saciva sahita dou bhāī| sṛṃgaberapura pahum̐ce jāī|| utare rāma devasari dekhī| kīnha daṃḍavata haraṣu biseṣī||

लखन सचिवँ सियँ किए प्रनामा। सबहि सहित सुखु पायउ रामा॥ गंग सकल मुद मंगल मूला। सब सुख करनि हरनि सब सूला॥

lakhana sacivam̐ siyam̐ kie pranāmā| sabahi sahita sukhu pāyau rāmā|| gaṃga sakala muda maṃgala mūlā| saba sukha karani harani saba sūlā||

कहि कहि कोटिक कथा प्रसंगा। रामु बिलोकहिं गंग तरंगा॥ सचिवहि अनुजहि प्रियहि सुनाई। बिबुध नदी महिमा अधिकाई॥

kahi kahi koṭika kathā prasaṃgā| rāmu bilokahiṃ gaṃga taraṃgā|| sacivahi anujahi priyahi sunāī| bibudha nadī mahimā adhikāī||

मज्जनु कीन्ह पंथ श्रम गयऊ। सुचि जलु पिअत मुदित मन भयऊ॥ सुमिरत जाहि मिटइ श्रम भारू। तेहि श्रम यह लौकिक ब्यवहारू॥

majjanu kīnha paṃtha śrama gayaū| suci jalu piata mudita mana bhayaū|| sumirata jāhi miṭai śrama bhārū| tehi śrama yaha laukika byavahārū||

दोहा ८७

सुध्द सचिदानंदमय कंद भानुकुल केतु। चरित करत नर अनुहरत संसृति सागर सेतु ॥ ८७॥

sudhda sacidānaṃdamaya kaṃda bhānukula ketu| carita karata nara anuharata saṃsṛti sāgara setu || 87||

यह सुधि गुहँ निषाद जब पाई। मुदित लिए प्रिय बंधु बोलाई॥ लिए फल मूल भेंट भरि भारा। मिलन चलेउ हिंयँ हरषु अपारा॥

yaha sudhi guham̐ niṣāda jaba pāī| mudita lie priya baṃdhu bolāī|| lie phala mūla bheṃṭa bhari bhārā| milana caleu hiṃyam̐ haraṣu apārā||

करि दंडवत भेंट धरि आगें। प्रभुहि बिलोकत अति अनुरागें॥ सहज सनेह बिबस रघुराई। पूँछी कुसल निकट बैठाई॥

kari daṃḍavata bheṃṭa dhari āgeṃ| prabhuhi bilokata ati anurāgeṃ|| sahaja saneha bibasa raghurāī| pūm̐chī kusala nikaṭa baiṭhāī||

नाथ कुसल पद पंकज देखें। भयउँ भागभाजन जन लेखें॥ देव धरनि धनु धामु तुम्हारा। मैं जनु नीचु सहित परिवारा॥

nātha kusala pada paṃkaja dekheṃ| bhayaum̐ bhāgabhājana jana lekheṃ|| deva dharani dhanu dhāmu tumhārā| maiṃ janu nīcu sahita parivārā||

कृपा करिअ पुर धारिअ पाऊ। थापिय जनु सबु लोगु सिहाऊ॥ कहेहु सत्य सबु सखा सुजाना। मोहि दीन्ह पितु आयसु आना॥

kṛpā karia pura dhāria pāū| thāpiya janu sabu logu sihāū|| kahehu satya sabu sakhā sujānā| mohi dīnha pitu āyasu ānā||

दोहा ८८

बरष चारिदस बासु बन मुनि ब्रत बेषु अहारु। ग्राम बासु नहिं उचित सुनि गुहहि भयउ दुखु भारु ॥ ८८॥

baraṣa cāridasa bāsu bana muni brata beṣu ahāru| grāma bāsu nahiṃ ucita suni guhahi bhayau dukhu bhāru || 88||

राम लखन सिय रूप निहारी। कहहिं सप्रेम ग्राम नर नारी॥ ते पितु मातु कहहु सखि कैसे। जिन्ह पठए बन बालक ऐसे॥

rāma lakhana siya rūpa nihārī| kahahiṃ saprema grāma nara nārī|| te pitu mātu kahahu sakhi kaise| jinha paṭhae bana bālaka aise||

एक कहहिं भल भूपति कीन्हा। लोयन लाहु हमहि बिधि दीन्हा॥ तब निषादपति उर अनुमाना। तरु सिंसुपा मनोहर जाना॥

eka kahahiṃ bhala bhūpati kīnhā| loyana lāhu hamahi bidhi dīnhā|| taba niṣādapati ura anumānā| taru siṃsupā manohara jānā||

लै रघुनाथहि ठाउँ देखावा। कहेउ राम सब भाँति सुहावा॥ पुरजन करि जोहारु घर आए। रघुबर संध्या करन सिधाए॥

lai raghunāthahi ṭhāum̐ dekhāvā| kaheu rāma saba bhām̐ti suhāvā|| purajana kari johāru ghara āe| raghubara saṃdhyā karana sidhāe||

गुहँ सँवारि साँथरी डसाई। कुस किसलयमय मृदुल सुहाई॥ सुचि फल मूल मधुर मृदु जानी। दोना भरि भरि राखेसि पानी॥

guham̐ sam̐vāri sām̐tharī ḍasāī| kusa kisalayamaya mṛdula suhāī|| suci phala mūla madhura mṛdu jānī| donā bhari bhari rākhesi pānī||

दोहा ८९

सिय सुमंत्र भ्राता सहित कंद मूल फल खाइ। सयन कीन्ह रघुबंसमनि पाय पलोटत भाइ ॥ ८९॥

siya sumaṃtra bhrātā sahita kaṃda mūla phala khāi| sayana kīnha raghubaṃsamani pāya paloṭata bhāi || 89||

उठे लखनु प्रभु सोवत जानी। कहि सचिवहि सोवन मृदु बानी॥ कछुक दूर सजि बान सरासन। जागन लगे बैठि बीरासन॥

uṭhe lakhanu prabhu sovata jānī| kahi sacivahi sovana mṛdu bānī|| kachuka dūra saji bāna sarāsana| jāgana lage baiṭhi bīrāsana||

गुँह बोलाइ पाहरू प्रतीती। ठावँ ठाँव राखे अति प्रीती॥ आपु लखन पहिं बैठेउ जाई। कटि भाथी सर चाप चढ़ाई॥

gum̐ha bolāi pāharū pratītī| ṭhāvam̐ ṭhām̐va rākhe ati prītī|| āpu lakhana pahiṃ baiṭheu jāī| kaṭi bhāthī sara cāpa caṛhāī||

सोरठा ३

सोवत प्रभुहि निहारि निषादू। भयउ प्रेम बस ह्दयँ बिषादू॥ तनु पुलकित जलु लोचन बहई। बचन सप्रेम लखन सन कहई॥

sovata prabhuhi nihāri niṣādū| bhayau prema basa hdayam̐ biṣādū|| tanu pulakita jalu locana bahaī| bacana saprema lakhana sana kahaī||