अयोध्याकाण्ड

अयोध्याकाण्ड · दोहा ३२३–३२६

शेअर करा

सचिव सुसेवक भरत प्रबोधे। निज निज काज पाइ पाइ सिख ओधे॥ पुनि सिख दीन्ह बोलि लघु भाई। सौंपी सकल मातु सेवकाई॥

saciva susevaka bharata prabodhe| nija nija kāja pāi pāi sikha odhe|| puni sikha dīnha boli laghu bhāī| sauṃpī sakala mātu sevakāī||

भूसुर बोलि भरत कर जोरे। करि प्रनाम बय बिनय निहोरे॥ ऊँच नीच कारजु भल पोचू। आयसु देब न करब सँकोचू॥

bhūsura boli bharata kara jore| kari pranāma baya binaya nihore|| ūm̐ca nīca kāraju bhala pocū| āyasu deba na karaba sam̐kocū||

परिजन पुरजन प्रजा बोलाए। समाधानु करि सुबस बसाए॥ सानुज गे गुर गेहँ बहोरी। करि दंडवत कहत कर जोरी॥

parijana purajana prajā bolāe| samādhānu kari subasa basāe|| sānuja ge gura geham̐ bahorī| kari daṃḍavata kahata kara jorī||

आयसु होइ त रहौं सनेमा। बोले मुनि तन पुलकि सपेमा॥ समुझव कहब करब तुम्ह जोई। धरम सारु जग होइहि सोई॥

āyasu hoi ta rahauṃ sanemā| bole muni tana pulaki sapemā|| samujhava kahaba karaba tumha joī| dharama sāru jaga hoihi soī||

दोहा ३२३

सुनि सिख पाइ असीस बड़ि गनक बोलि दिनु साधि। सिंघासन प्रभु पादुका बैठारे निरुपाधि ॥ ३२३॥

suni sikha pāi asīsa baṛi ganaka boli dinu sādhi| siṃghāsana prabhu pādukā baiṭhāre nirupādhi || 323||

राम मातु गुर पद सिरु नाई। प्रभु पद पीठ रजायसु पाई॥ नंदिगावँ करि परन कुटीरा। कीन्ह निवासु धरम धुर धीरा॥

rāma mātu gura pada siru nāī| prabhu pada pīṭha rajāyasu pāī|| naṃdigāvam̐ kari parana kuṭīrā| kīnha nivāsu dharama dhura dhīrā||

जटाजूट सिर मुनिपट धारी। महि खनि कुस साँथरी सँवारी॥ असन बसन बासन ब्रत नेमा। करत कठिन रिषिधरम सप्रेमा॥

jaṭājūṭa sira munipaṭa dhārī| mahi khani kusa sām̐tharī sam̐vārī|| asana basana bāsana brata nemā| karata kaṭhina riṣidharama sapremā||

भूषन बसन भोग सुख भूरी। मन तन बचन तजे तिन तूरी॥ अवध राजु सुर राजु सिहाई। दसरथ धनु सुनि धनदु लजाई॥

bhūṣana basana bhoga sukha bhūrī| mana tana bacana taje tina tūrī|| avadha rāju sura rāju sihāī| dasaratha dhanu suni dhanadu lajāī||

तेहिं पुर बसत भरत बिनु रागा। चंचरीक जिमि चंपक बागा॥ रमा बिलासु राम अनुरागी। तजत बमन जिमि जन बड़भागी॥

tehiṃ pura basata bharata binu rāgā| caṃcarīka jimi caṃpaka bāgā|| ramā bilāsu rāma anurāgī| tajata bamana jimi jana baṛabhāgī||

दोहा ३२४

राम पेम भाजन भरतु बड़े न एहिं करतूति। चातक हंस सराहिअत टेंक बिबेक बिभूति ॥ ३२४॥

rāma pema bhājana bharatu baṛe na ehiṃ karatūti| cātaka haṃsa sarāhiata ṭeṃka bibeka bibhūti || 324||

देह दिनहुँ दिन दूबरि होई। घटइ तेजु बलु मुखछबि सोई॥ नित नव राम प्रेम पनु पीना। बढ़त धरम दलु मनु न मलीना॥

deha dinahum̐ dina dūbari hoī| ghaṭai teju balu mukhachabi soī|| nita nava rāma prema panu pīnā| baṛhata dharama dalu manu na malīnā||

जिमि जलु निघटत सरद प्रकासे। बिलसत बेतस बनज बिकासे॥ सम दम संजम नियम उपासा। नखत भरत हिय बिमल अकासा॥

jimi jalu nighaṭata sarada prakāse| bilasata betasa banaja bikāse|| sama dama saṃjama niyama upāsā| nakhata bharata hiya bimala akāsā||

ध्रुव बिस्वास अवधि राका सी। स्वामि सुरति सुरबीथि बिकासी॥ राम पेम बिधु अचल अदोषा। सहित समाज सोह नित चोखा॥

dhruva bisvāsa avadhi rākā sī| svāmi surati surabīthi bikāsī|| rāma pema bidhu acala adoṣā| sahita samāja soha nita cokhā||

भरत रहनि समुझनि करतूती। भगति बिरति गुन बिमल बिभूती॥ बरनत सकल सुकचि सकुचाहीं। सेस गनेस गिरा गमु नाहीं॥

bharata rahani samujhani karatūtī| bhagati birati guna bimala bibhūtī|| baranata sakala sukaci sakucāhīṃ| sesa ganesa girā gamu nāhīṃ||

दोहा ३२५

नित पूजत प्रभु पाँवरी प्रीति न हृदयँ समाति। मागि मागि आयसु करत राज काज बहु भाँति ॥ ३२५॥

nita pūjata prabhu pām̐varī prīti na hṛdayam̐ samāti| māgi māgi āyasu karata rāja kāja bahu bhām̐ti || 325||

पुलक गात हियँ सिय रघुबीरू। जीह नामु जप लोचन नीरू॥ लखन राम सिय कानन बसहीं। भरतु भवन बसि तप तनु कसहीं॥

pulaka gāta hiyam̐ siya raghubīrū| jīha nāmu japa locana nīrū|| lakhana rāma siya kānana basahīṃ| bharatu bhavana basi tapa tanu kasahīṃ||

दोहा २

दोउ दिसि समुझि कहत सबु लोगू। सब बिधि भरत सराहन जोगू॥ सुनि ब्रत नेम साधु सकुचाहीं। देखि दसा मुनिराज लजाहीं॥

dou disi samujhi kahata sabu logū| saba bidhi bharata sarāhana jogū|| suni brata nema sādhu sakucāhīṃ| dekhi dasā munirāja lajāhīṃ||

परम पुनीत भरत आचरनू। मधुर मंजु मुद मंगल करनू॥ हरन कठिन कलि कलुष कलेसू। महामोह निसि दलन दिनेसू॥

parama punīta bharata ācaranū| madhura maṃju muda maṃgala karanū|| harana kaṭhina kali kaluṣa kalesū| mahāmoha nisi dalana dinesū||

पाप पुंज कुंजर मृगराजू। समन सकल संताप समाजू॥ जन रंजन भंजन भव भारू। राम सनेह सुधाकर सारू॥

pāpa puṃja kuṃjara mṛgarājū| samana sakala saṃtāpa samājū|| jana raṃjana bhaṃjana bhava bhārū| rāma saneha sudhākara sārū||

छंद

सिय राम प्रेम पियूष पूरन होत जनमु न भरत को। मुनिमन अगम जम नियम सम दम बिषम ब्रत आचरत को॥ दुख दाह दारिद दंभ दूषन सुजस मिस अपहरत को। कलिकाल तुलसी से सठन्हि हठि राम सनमुख करत को॥

siya rāma prema piyūṣa pūrana hota janamu na bharata ko| munimana agama jama niyama sama dama biṣama brata ācarata ko|| dukha dāha dārida daṃbha dūṣana sujasa misa apaharata ko| kalikāla tulasī se saṭhanhi haṭhi rāma sanamukha karata ko||

सोरठा ३२६

भरत चरित करि नेमु तुलसी जो सादर सुनहिं। सीय राम पद पेमु अवसि होइ भव रस बिरति ॥ ३२६॥

bharata carita kari nemu tulasī jo sādara sunahiṃ| sīya rāma pada pemu avasi hoi bhava rasa birati || 326||

अत्रिके अतिथि 7॥ करि पूजा कहि बचन सुहाए। दिए मूल फल प्रभु मन भाए॥

atrike atithi 7|| kari pūjā kahi bacana suhāe| die mūla phala prabhu mana bhāe||