Ayodhya Kand — अयोध्याकाण्ड

अयोध्याकाण्ड · दोहा २०६–२२३

साझा करें

प्रमुदित तीरथराज निवासी। बैखानस बटु गृही उदासी॥ कहहिं परसपर मिलि दस पाँचा। भरत सनेह सीलु सुचि साँचा॥

pramudita tīratharāja nivāsī| baikhānasa baṭu gṛhī udāsī|| kahahiṃ parasapara mili dasa pām̐cā| bharata saneha sīlu suci sām̐cā||

सुनत राम गुन ग्राम सुहाए। भरद्वाज मुनिबर पहिं आए॥ दंड प्रनामु करत मुनि देखे। मूरतिमंत भाग्य निज लेखे॥

sunata rāma guna grāma suhāe| bharadvāja munibara pahiṃ āe|| daṃḍa pranāmu karata muni dekhe| mūratimaṃta bhāgya nija lekhe||

धाइ उठाइ लाइ उर लीन्हे। दीन्हि असीस कृतारथ कीन्हे॥ आसनु दीन्ह नाइ सिरु बैठे। चहत सकुच गृहँ जनु भजि पैठे॥

dhāi uṭhāi lāi ura līnhe| dīnhi asīsa kṛtāratha kīnhe|| āsanu dīnha nāi siru baiṭhe| cahata sakuca gṛham̐ janu bhaji paiṭhe||

मुनि पूँछब कछु यह बड़ सोचू। बोले रिषि लखि सीलु सँकोचू॥ सुनहु भरत हम सब सुधि पाई। बिधि करतब पर किछु न बसाई॥

muni pūm̐chaba kachu yaha baṛa socū| bole riṣi lakhi sīlu sam̐kocū|| sunahu bharata hama saba sudhi pāī| bidhi karataba para kichu na basāī||

दोहा २०६

तुम्ह गलानि जियँ जनि करहु समुझी मातु करतूति। तात कैकइहि दोसु नहिं गई गिरा मति धूति ॥ २०६॥

tumha galāni jiyam̐ jani karahu samujhī mātu karatūti| tāta kaikaihi dosu nahiṃ gaī girā mati dhūti || 206||

यहउ कहत भल कहिहि न कोऊ। लोकु बेद बुध संमत दोऊ॥ तात तुम्हार बिमल जसु गाई। पाइहि लोकउ बेदु बड़ाई॥

yahau kahata bhala kahihi na koū| loku beda budha saṃmata doū|| tāta tumhāra bimala jasu gāī| pāihi lokau bedu baṛāī||

लोक बेद संमत सबु कहई। जेहि पितु देइ राजु सो लहई॥ राउ सत्यब्रत तुम्हहि बोलाई। देत राजु सुखु धरमु बड़ाई॥

loka beda saṃmata sabu kahaī| jehi pitu dei rāju so lahaī|| rāu satyabrata tumhahi bolāī| deta rāju sukhu dharamu baṛāī||

राम गवनु बन अनरथ मूला। जो सुनि सकल बिस्व भइ सूला॥

rāma gavanu bana anaratha mūlā| jo suni sakala bisva bhai sūlā||

सोरठा ३

सो भावी बस रानि अयानी। करि कुचालि अंतहुँ पछितानी॥

so bhāvī basa rāni ayānī| kari kucāli aṃtahum̐ pachitānī||

तहँउँ तुम्हार अलप अपराधू। कहै सो अधम अयान असाधू॥ करतेहु राजु त तुम्हहि न दोषू। रामहि होत सुनत संतोषू॥

taham̐um̐ tumhāra alapa aparādhū| kahai so adhama ayāna asādhū|| karatehu rāju ta tumhahi na doṣū| rāmahi hota sunata saṃtoṣū||

दोहा २०७

अब अति कीन्हेहु भरत भल तुम्हहि उचित मत एहु। सकल सुमंगल मूल जग रघुबर चरन सनेहु ॥ २०७॥

aba ati kīnhehu bharata bhala tumhahi ucita mata ehu| sakala sumaṃgala mūla jaga raghubara carana sanehu || 207||

सोरठा १

सो तुम्हार धनु जीवनु प्राना। भूरिभाग को तुम्हहि समाना॥ यह तम्हार आचरजु न ताता। दसरथ सुअन राम प्रिय भ्राता॥

so tumhāra dhanu jīvanu prānā| bhūribhāga ko tumhahi samānā|| yaha tamhāra ācaraju na tātā| dasaratha suana rāma priya bhrātā||

सुनहु भरत रघुबर मन माहीं। पेम पात्रु तुम्ह सम कोउ नाहीं॥ लखन राम सीतहि अति प्रीती। निसि सब तुम्हहि सराहत बीती॥

sunahu bharata raghubara mana māhīṃ| pema pātru tumha sama kou nāhīṃ|| lakhana rāma sītahi ati prītī| nisi saba tumhahi sarāhata bītī||

जाना मरमु नहात प्रयागा। मगन होहिं तुम्हरें अनुरागा॥ तुम्ह पर अस सनेहु रघुबर कें। सुख जीवन जग जस जड़ नर कें॥

jānā maramu nahāta prayāgā| magana hohiṃ tumhareṃ anurāgā|| tumha para asa sanehu raghubara keṃ| sukha jīvana jaga jasa jaṛa nara keṃ||

यह न अधिक रघुबीर बड़ाई। प्रनत कुटुंब पाल रघुराई॥ तुम्ह तौ भरत मोर मत एहू। धरें देह जनु राम सनेहू॥

yaha na adhika raghubīra baṛāī| pranata kuṭuṃba pāla raghurāī|| tumha tau bharata mora mata ehū| dhareṃ deha janu rāma sanehū||

दोहा २०८

तुम्ह कहँ भरत कलंक यह हम सब कहँ उपदेसु। राम भगति रस सिद्धि हित भा यह समउ गनेसु ॥ २०८॥

tumha kaham̐ bharata kalaṃka yaha hama saba kaham̐ upadesu| rāma bhagati rasa siddhi hita bhā yaha samau ganesu || 208||

नव बिधु बिमल तात जसु तोरा। रघुबर किंकर कुमुद चकोरा॥ उदित सदा अँथइहि कबहूँ ना। घटिहि न जग नभ दिन दिन दूना॥

nava bidhu bimala tāta jasu torā| raghubara kiṃkara kumuda cakorā|| udita sadā am̐thaihi kabahūm̐ nā| ghaṭihi na jaga nabha dina dina dūnā||

कोक तिलोक प्रीति अति करिही। प्रभु प्रताप रबि छबिहि न हरिही॥ निसि दिन सुखद सदा सब काहू। ग्रसिहि न कैकइ करतबु राहू॥

koka tiloka prīti ati karihī| prabhu pratāpa rabi chabihi na harihī|| nisi dina sukhada sadā saba kāhū| grasihi na kaikai karatabu rāhū||

पूरन राम सुपेम पियूषा। गुर अवमान दोष नहिं दूषा॥ राम भगत अब अमिअँ अघाहूँ। कीन्हेहु सुलभ सुधा बसुधाहूँ॥

pūrana rāma supema piyūṣā| gura avamāna doṣa nahiṃ dūṣā|| rāma bhagata aba amiam̐ aghāhūm̐| kīnhehu sulabha sudhā basudhāhūm̐||

भूप भगीरथ सुरसरि आनी। सुमिरत सकल सुंमगल खानी॥ दसरथ गुन गन बरनि न जाहीं। अधिकु कहा जेहि सम जग नाहीं॥

bhūpa bhagīratha surasari ānī| sumirata sakala suṃmagala khānī|| dasaratha guna gana barani na jāhīṃ| adhiku kahā jehi sama jaga nāhīṃ||

दोहा २०९

जासु सनेह सकोच बस राम प्रगट भए आइ। जे हर हिय नयननि कबहुँ निरखे नहीं अघाइ ॥ २०९॥

jāsu saneha sakoca basa rāma pragaṭa bhae āi| je hara hiya nayanani kabahum̐ nirakhe nahīṃ aghāi || 209||

कीरति बिधु तुम्ह कीन्ह अनूपा। जहँ बस राम पेम मृगरूपा॥ तात गलानि करहु जियँ जाएँ। डरहु दरिद्रहि पारसु पाएँ॥

kīrati bidhu tumha kīnha anūpā| jaham̐ basa rāma pema mṛgarūpā|| tāta galāni karahu jiyam̐ jāem̐| ḍarahu daridrahi pārasu pāem̐||

सुनहु भरत हम झूठ न कहहीं। उदासीन तापस बन रहहीं॥ सब साधन कर सुफल सुहावा। लखन राम सिय दरसनु पावा॥

sunahu bharata hama jhūṭha na kahahīṃ| udāsīna tāpasa bana rahahīṃ|| saba sādhana kara suphala suhāvā| lakhana rāma siya darasanu pāvā||

तेहि फल कर फलु दरस तुम्हारा। सहित पयाग सुभाग हमारा॥ भरत धन्य तुम्ह जसु जगु जयऊ। कहि अस पेम मगन पुनि भयऊ॥

tehi phala kara phalu darasa tumhārā| sahita payāga subhāga hamārā|| bharata dhanya tumha jasu jagu jayaū| kahi asa pema magana puni bhayaū||

सुनि मुनि बचन सभासद हरषे। साधु सराहि सुमन सुर बरषे॥ धन्य धन्य धुनि गगन पयागा। सुनि सुनि भरतु मगन अनुरागा॥

suni muni bacana sabhāsada haraṣe| sādhu sarāhi sumana sura baraṣe|| dhanya dhanya dhuni gagana payāgā| suni suni bharatu magana anurāgā||

दोहा २१०

पुलक गात हियँ रामु सिय सजल सरोरुह नैन। करि प्रनामु मुनि मंडलिहि बोले गदगद बैन ॥ २१०॥

pulaka gāta hiyam̐ rāmu siya sajala saroruha naina| kari pranāmu muni maṃḍalihi bole gadagada baina || 210||

मुनि समाजु अरु तीरथराजू। साँचिहुँ सपथ अघाइ अकाजू॥ एहिं थल जौं किछु कहिअ बनाई। एहि सम अधिक न अघ अधमाई॥

muni samāju aru tīratharājū| sām̐cihum̐ sapatha aghāi akājū|| ehiṃ thala jauṃ kichu kahia banāī| ehi sama adhika na agha adhamāī||

तुम्ह सर्बग्य कहउँ सतिभाऊ। उर अंतरजामी रघुराऊ॥ मोहि न मातु करतब कर सोचू। नहिं दुखु जियँ जगु जानिहि पोचू॥

tumha sarbagya kahaum̐ satibhāū| ura aṃtarajāmī raghurāū|| mohi na mātu karataba kara socū| nahiṃ dukhu jiyam̐ jagu jānihi pocū||

नाहिन डरु बिगरिहि परलोकू। पितहु मरन कर मोहि न सोकू॥ सुकृत सुजस भरि भुअन सुहाए। लछिमन राम सरिस सुत पाए॥

nāhina ḍaru bigarihi paralokū| pitahu marana kara mohi na sokū|| sukṛta sujasa bhari bhuana suhāe| lachimana rāma sarisa suta pāe||

राम बिरहँ तजि तनु छनभंगू। भूप सोच कर कवन प्रसंगू॥ राम लखन सिय बिनु पग पनहीं। करि मुनि बेष फिरहिं बन बनही॥

rāma biraham̐ taji tanu chanabhaṃgū| bhūpa soca kara kavana prasaṃgū|| rāma lakhana siya binu paga panahīṃ| kari muni beṣa phirahiṃ bana banahī||

दोहा २११

अजिन बसन फल असन महि सयन डासि कुस पात। बसि तरु तर नित सहत हिम आतप बरषा बात ॥ २११॥

ajina basana phala asana mahi sayana ḍāsi kusa pāta| basi taru tara nita sahata hima ātapa baraṣā bāta || 211||

एहि दुख दाहँ दहइ दिन छाती। भूख न बासर नीद न राती॥ एहि कुरोग कर औषधु नाहीं। सोधेउँ सकल बिस्व मन माहीं॥

ehi dukha dāham̐ dahai dina chātī| bhūkha na bāsara nīda na rātī|| ehi kuroga kara auṣadhu nāhīṃ| sodheum̐ sakala bisva mana māhīṃ||

मातु कुमत बढ़ई अघ मूला। तेहिं हमार हित कीन्ह बँसूला॥ कलि कुकाठ कर कीन्ह कुजंत्रू। गाड़ि अवधि पढ़ि कठिन कुमंत्रु॥

mātu kumata baṛhaī agha mūlā| tehiṃ hamāra hita kīnha bam̐sūlā|| kali kukāṭha kara kīnha kujaṃtrū| gāṛi avadhi paṛhi kaṭhina kumaṃtru||

मोहि लगि यहु कुठाटु तेहिं ठाटा। घालेसि सब जगु बारहबाटा॥ मिटइ कुजोगु राम फिरि आएँ। बसइ अवध नहिं आन उपाएँ॥

mohi lagi yahu kuṭhāṭu tehiṃ ṭhāṭā| ghālesi saba jagu bārahabāṭā|| miṭai kujogu rāma phiri āem̐| basai avadha nahiṃ āna upāem̐||

भरत बचन सुनि मुनि सुखु पाई। सबहिं कीन्ह बहु भाँति बड़ाई॥ तात करहु जनि सोचु बिसेषी। सब दुखु मिटहि राम पग देखी॥

bharata bacana suni muni sukhu pāī| sabahiṃ kīnha bahu bhām̐ti baṛāī|| tāta karahu jani socu biseṣī| saba dukhu miṭahi rāma paga dekhī||

दोहा २१२

करि प्रबोध मुनिबर कहेउ अतिथि पेमप्रिय होहु। कंद मूल फल फूल हम देहिं लेहु करि छोहु ॥ २१२॥

kari prabodha munibara kaheu atithi pemapriya hohu| kaṃda mūla phala phūla hama dehiṃ lehu kari chohu || 212||

सुनि मुनि बचन भरत हिंय सोचू। भयउ कुअवसर कठिन सँकोचू॥ जानि गरुइ गुर गिरा बहोरी। चरन बंदि बोले कर जोरी॥

suni muni bacana bharata hiṃya socū| bhayau kuavasara kaṭhina sam̐kocū|| jāni garui gura girā bahorī| carana baṃdi bole kara jorī||

सिर धरि आयसु करिअ तुम्हारा। परम धरम यहु नाथ हमारा॥ भरत बचन मुनिबर मन भाए। सुचि सेवक सिष निकट बोलाए॥

sira dhari āyasu karia tumhārā| parama dharama yahu nātha hamārā|| bharata bacana munibara mana bhāe| suci sevaka siṣa nikaṭa bolāe||

चाहिए कीन्ह भरत पहुनाई। कंद मूल फल आनहु जाई॥ भलेहीं नाथ कहि तिन्ह सिर नाए। प्रमुदित निज निज काज सिधाए॥

cāhie kīnha bharata pahunāī| kaṃda mūla phala ānahu jāī|| bhalehīṃ nātha kahi tinha sira nāe| pramudita nija nija kāja sidhāe||

मुनिहि सोच पाहुन बड़ नेवता। तसि पूजा चाहिअ जस देवता॥ सुनि रिधि सिधि अनिमादिक आई। आयसु होइ सो करहिं गोसाई॥

munihi soca pāhuna baṛa nevatā| tasi pūjā cāhia jasa devatā|| suni ridhi sidhi animādika āī| āyasu hoi so karahiṃ gosāī||

दोहा २१३

राम बिरह ब्याकुल भरतु सानुज सहित समाज। पहुनाई करि हरहु श्रम कहा मुदित मुनिराज ॥ २१३॥

rāma biraha byākula bharatu sānuja sahita samāja| pahunāī kari harahu śrama kahā mudita munirāja || 213||

रिधि सिधि सिर धरि मुनिबर बानी। बड़भागिनि आपुहि अनुमानी॥ कहहिं परसपर सिधि समुदाई। अतुलित अतिथि राम लघु भाई॥

ridhi sidhi sira dhari munibara bānī| baṛabhāgini āpuhi anumānī|| kahahiṃ parasapara sidhi samudāī| atulita atithi rāma laghu bhāī||

मुनि पद बंदि करिअ सोइ आजू। होइ सुखी सब राज समाजू॥ अस कहि रचेउ रुचिर गृह नाना। जेहि बिलोकि बिलखाहिं बिमाना॥

muni pada baṃdi karia soi ājū| hoi sukhī saba rāja samājū|| asa kahi raceu rucira gṛha nānā| jehi biloki bilakhāhiṃ bimānā||

भोग बिभूति भूरि भरि राखे। देखत जिन्हहि अमर अभिलाषे॥ दासीं दास साजु सब लीन्हें। जोगवत रहहिं मनहि मनु दीन्हें॥

bhoga bibhūti bhūri bhari rākhe| dekhata jinhahi amara abhilāṣe|| dāsīṃ dāsa sāju saba līnheṃ| jogavata rahahiṃ manahi manu dīnheṃ||

सब समाजु सजि सिधि पल माहीं। जे सुख सुरपुर सपनेहुँ नाहीं॥ प्रथमहिं बास दिए सब केही। सुंदर सुखद जथा रुचि जेही॥

saba samāju saji sidhi pala māhīṃ| je sukha surapura sapanehum̐ nāhīṃ|| prathamahiṃ bāsa die saba kehī| suṃdara sukhada jathā ruci jehī||

दोहा २१४

बहुरि सपरिजन भरत कहुँ रिषि अस आयसु दीन्ह। बिधि बिसमय दायकु बिभव मुनिबर तपबल कीन्ह ॥ २१४॥

bahuri saparijana bharata kahum̐ riṣi asa āyasu dīnha| bidhi bisamaya dāyaku bibhava munibara tapabala kīnha || 214||

मुनि प्रभाउ जब भरत बिलोका। सब लघु लगे लोकपति लोका॥ सुख समाजु नहिं जाइ बखानी। देखत बिरति बिसारहीं ग्यानी॥

muni prabhāu jaba bharata bilokā| saba laghu lage lokapati lokā|| sukha samāju nahiṃ jāi bakhānī| dekhata birati bisārahīṃ gyānī||

आसन सयन सुबसन बिताना। बन बाटिका बिहग मृग नाना॥ सुरभि फूल फल अमिअ समाना। बिमल जलासय बिबिध बिधाना॥

āsana sayana subasana bitānā| bana bāṭikā bihaga mṛga nānā|| surabhi phūla phala amia samānā| bimala jalāsaya bibidha bidhānā||

असन पान सुच अमिअ अमी से। देखि लोग सकुचात जमी से॥ सुर सुरभी सुरतरु सबही कें। लखि अभिलाषु सुरेस सची कें॥

asana pāna suca amia amī se| dekhi loga sakucāta jamī se|| sura surabhī surataru sabahī keṃ| lakhi abhilāṣu suresa sacī keṃ||

रितु बसंत बह त्रिबिध बयारी। सब कहँ सुलभ पदारथ चारी॥ स्त्रक चंदन बनितादिक भोगा। देखि हरष बिसमय बस लोगा॥

ritu basaṃta baha tribidha bayārī| saba kaham̐ sulabha padāratha cārī|| straka caṃdana banitādika bhogā| dekhi haraṣa bisamaya basa logā||

दोहा २१५

संपत चकई भरतु चक मुनि आयस खेलवार। तेहि निसि आश्रम पिंजराँ राखे भा भिनुसार ॥ २१५॥

saṃpata cakaī bharatu caka muni āyasa khelavāra| tehi nisi āśrama piṃjarām̐ rākhe bhā bhinusāra || 215||

कीन्ह निमज्जनु तीरथराजा। नाइ मुनिहि सिरु सहित समाजा॥ रिषि आयसु असीस सिर राखी। करि दंडवत बिनय बहु भाषी॥

kīnha nimajjanu tīratharājā| nāi munihi siru sahita samājā|| riṣi āyasu asīsa sira rākhī| kari daṃḍavata binaya bahu bhāṣī||

पथ गति कुसल साथ सब लीन्हे। चले चित्रकूटहिं चितु दीन्हें॥ रामसखा कर दीन्हें लागू। चलत देह धरि जनु अनुरागू॥

patha gati kusala sātha saba līnhe| cale citrakūṭahiṃ citu dīnheṃ|| rāmasakhā kara dīnheṃ lāgū| calata deha dhari janu anurāgū||

नहिं पद त्रान सीस नहिं छाया। पेमु नेमु ब्रतु धरमु अमाया॥ लखन राम सिय पंथ कहानी। पूँछत सखहि कहत मृदु बानी॥

nahiṃ pada trāna sīsa nahiṃ chāyā| pemu nemu bratu dharamu amāyā|| lakhana rāma siya paṃtha kahānī| pūm̐chata sakhahi kahata mṛdu bānī||

राम बास थल बिटप बिलोकें। उर अनुराग रहत नहिं रोकैं॥ दैखि दसा सुर बरिसहिं फूला। भइ मृदु महि मगु मंगल मूला॥

rāma bāsa thala biṭapa bilokeṃ| ura anurāga rahata nahiṃ rokaiṃ|| daikhi dasā sura barisahiṃ phūlā| bhai mṛdu mahi magu maṃgala mūlā||

दोहा २१६

किएँ जाहिं छाया जलद सुखद बहइ बर बात। तस मगु भयउ न राम कहँ जस भा भरतहि जात ॥ २१६॥

kiem̐ jāhiṃ chāyā jalada sukhada bahai bara bāta| tasa magu bhayau na rāma kaham̐ jasa bhā bharatahi jāta || 216||

जड़ चेतन मग जीव घनेरे। जे चितए प्रभु जिन्ह प्रभु हेरे॥ ते सब भए परम पद जोगू। भरत दरस मेटा भव रोगू॥

jaṛa cetana maga jīva ghanere| je citae prabhu jinha prabhu here|| te saba bhae parama pada jogū| bharata darasa meṭā bhava rogū||

यह बड़ि बात भरत कइ नाहीं। सुमिरत जिनहि रामु मन माहीं॥ बारक राम कहत जग जेऊ। होत तरन तारन नर तेऊ॥

yaha baṛi bāta bharata kai nāhīṃ| sumirata jinahi rāmu mana māhīṃ|| bāraka rāma kahata jaga jeū| hota tarana tārana nara teū||

भरतु राम प्रिय पुनि लघु भ्राता। कस न होइ मगु मंगलदाता॥ सिद्ध साधु मुनिबर अस कहहीं। भरतहि निरखि हरषु हियँ लहहीं॥

bharatu rāma priya puni laghu bhrātā| kasa na hoi magu maṃgaladātā|| siddha sādhu munibara asa kahahīṃ| bharatahi nirakhi haraṣu hiyam̐ lahahīṃ||

देखि प्रभाउ सुरेसहि सोचू। जगु भल भलेहि पोच कहुँ पोचू॥ गुर सन कहेउ करिअ प्रभु सोई। रामहि भरतहि भेंट न होई॥

dekhi prabhāu suresahi socū| jagu bhala bhalehi poca kahum̐ pocū|| gura sana kaheu karia prabhu soī| rāmahi bharatahi bheṃṭa na hoī||

दोहा २१७

रामु सँकोची प्रेम बस भरत सपेम पयोधि। बनी बात बेगरन चहति करिअ जतनु छलु सोधि ॥ २१७॥

rāmu sam̐kocī prema basa bharata sapema payodhi| banī bāta begarana cahati karia jatanu chalu sodhi || 217||

बचन सुनत सुरगुरु मुसकाने। सहसनयन बिनु लोचन जाने॥ मायापति सेवक सन माया। करइ त उलटि परइ सुरराया॥

bacana sunata suraguru musakāne| sahasanayana binu locana jāne|| māyāpati sevaka sana māyā| karai ta ulaṭi parai surarāyā||

तब किछु कीन्ह राम रुख जानी। अब कुचालि करि होइहि हानी॥ सुनु सुरेस रघुनाथ सुभाऊ। निज अपराध रिसाहिं न काऊ॥

taba kichu kīnha rāma rukha jānī| aba kucāli kari hoihi hānī|| sunu suresa raghunātha subhāū| nija aparādha risāhiṃ na kāū||

जो अपराधु भगत कर करई। राम रोष पावक सो जरई॥ लोकहुँ बेद बिदित इतिहासा। यह महिमा जानहिं दुरबासा॥

jo aparādhu bhagata kara karaī| rāma roṣa pāvaka so jaraī|| lokahum̐ beda bidita itihāsā| yaha mahimā jānahiṃ durabāsā||

भरत सरिस को राम सनेही। जगु जप राम रामु जप जेही॥

bharata sarisa ko rāma sanehī| jagu japa rāma rāmu japa jehī||

दोहा २१८

मनहुँ न आनिअ अमरपति रघुबर भगत अकाजु। अजसु लोक परलोक दुख दिन दिन सोक समाजु ॥ २१८॥

manahum̐ na ānia amarapati raghubara bhagata akāju| ajasu loka paraloka dukha dina dina soka samāju || 218||

सुनु सुरेस उपदेसु हमारा। रामहि सेवकु परम पिआरा॥ मानत सुखु सेवक सेवकाई। सेवक बैर बैरु अधिकाई॥

sunu suresa upadesu hamārā| rāmahi sevaku parama piārā|| mānata sukhu sevaka sevakāī| sevaka baira bairu adhikāī||

जद्यपि सम नहिं राग न रोषू। गहहिं न पाप पूनु गुन दोषू॥ करम प्रधान बिस्व करि राखा। जो जस करइ सो तस फलु चाखा॥

jadyapi sama nahiṃ rāga na roṣū| gahahiṃ na pāpa pūnu guna doṣū|| karama pradhāna bisva kari rākhā| jo jasa karai so tasa phalu cākhā||

तदपि करहिं सम बिषम बिहारा। भगत अभगत हृदय अनुसारा॥ अगुन अलेप अमान एकरस। रामु सगुन भए भगत पेम बस॥

tadapi karahiṃ sama biṣama bihārā| bhagata abhagata hṛdaya anusārā|| aguna alepa amāna ekarasa| rāmu saguna bhae bhagata pema basa||

राम सदा सेवक रुचि राखी। बेद पुरान साधु सुर साखी॥ अस जियँ जानि तजहु कुटिलाई। करहु भरत पद प्रीति सुहाई॥

rāma sadā sevaka ruci rākhī| beda purāna sādhu sura sākhī|| asa jiyam̐ jāni tajahu kuṭilāī| karahu bharata pada prīti suhāī||

दोहा २१९

राम भगत परहित निरत पर दुख दुखी दयाल। भगत सिरोमनि भरत तें जनि डरपहु सुरपाल ॥ २१९॥

rāma bhagata parahita nirata para dukha dukhī dayāla| bhagata siromani bharata teṃ jani ḍarapahu surapāla || 219||

सत्यसंध प्रभु सुर हितकारी। भरत राम आयस अनुसारी॥ स्वारथ बिबस बिकल तुम्ह होहू। भरत दोसु नहिं राउर मोहू॥

satyasaṃdha prabhu sura hitakārī| bharata rāma āyasa anusārī|| svāratha bibasa bikala tumha hohū| bharata dosu nahiṃ rāura mohū||

सुनि सुरबर सुरगुर बर बानी। भा प्रमोदु मन मिटी गलानी॥ बरषि प्रसून हरषि सुरराऊ। लगे सराहन भरत सुभाऊ॥

suni surabara suragura bara bānī| bhā pramodu mana miṭī galānī|| baraṣi prasūna haraṣi surarāū| lage sarāhana bharata subhāū||

एहि बिधि भरत चले मग जाहीं। दसा देखि मुनि सिद्ध सिहाहीं॥ जबहिं रामु कहि लेहिं उसासा। उमगत पेमु मनहँ चहु पासा॥

ehi bidhi bharata cale maga jāhīṃ| dasā dekhi muni siddha sihāhīṃ|| jabahiṃ rāmu kahi lehiṃ usāsā| umagata pemu manaham̐ cahu pāsā||

द्रवहिं बचन सुनि कुलिस पषाना। पुरजन पेमु न जाइ बखाना॥ बीच बास करि जमुनहिं आए। निरखि नीरु लोचन जल छाए॥

dravahiṃ bacana suni kulisa paṣānā| purajana pemu na jāi bakhānā|| bīca bāsa kari jamunahiṃ āe| nirakhi nīru locana jala chāe||

दोहा २२०

रघुबर बरन बिलोकि बर बारि समेत समाज। होत मगन बारिधि बिरह चढ़े बिबेक जहाज ॥ २२०॥

raghubara barana biloki bara bāri sameta samāja| hota magana bāridhi biraha caṛhe bibeka jahāja || 220||

जमुन तीर तेहि दिन करि बासू। भयउ समय सम सबहि सुपासू॥ रातहिं घाट घाट की तरनी। आईं अगनित जाहिं न बरनी॥

jamuna tīra tehi dina kari bāsū| bhayau samaya sama sabahi supāsū|| rātahiṃ ghāṭa ghāṭa kī taranī| āīṃ aganita jāhiṃ na baranī||

प्रात पार भए एकहि खेंवाँ। तोषे रामसखा की सेवाँ॥ चले नहाइ नदिहि सिर नाई। साथ निषादनाथ दोउ भाई॥

prāta pāra bhae ekahi kheṃvām̐| toṣe rāmasakhā kī sevām̐|| cale nahāi nadihi sira nāī| sātha niṣādanātha dou bhāī||

आगें मुनिबर बाहन आछें। राजसमाज जाइ सबु पाछें॥ तेहिं पाछें दोउ बंधु पयादें। भूषन बसन बेष सुठि सादें॥

āgeṃ munibara bāhana ācheṃ| rājasamāja jāi sabu pācheṃ|| tehiṃ pācheṃ dou baṃdhu payādeṃ| bhūṣana basana beṣa suṭhi sādeṃ||

सेवक सुह्रद सचिवसुत साथा। सुमिरत लखनु सीय रघुनाथा॥ जहँ जहँ राम बास बिश्रामा। तहँ तहँ करहिं सप्रेम प्रनामा॥

sevaka suhrada sacivasuta sāthā| sumirata lakhanu sīya raghunāthā|| jaham̐ jaham̐ rāma bāsa biśrāmā| taham̐ taham̐ karahiṃ saprema pranāmā||

दोहा २२१

मगबासी नर नारि सुनि धाम काम तजि धाइ। देखि सरूप सनेह सब मुदित जनम फलु पाइ ॥ २२१॥

magabāsī nara nāri suni dhāma kāma taji dhāi| dekhi sarūpa saneha saba mudita janama phalu pāi || 221||

कहहिं सपेम एक एक पाहीं। रामु लखनु सखि होहिं कि नाहीं॥ बय बपु बरन रूप सोइ आली। सीलु सनेहु सरिस सम चाली॥

kahahiṃ sapema eka eka pāhīṃ| rāmu lakhanu sakhi hohiṃ ki nāhīṃ|| baya bapu barana rūpa soi ālī| sīlu sanehu sarisa sama cālī||

बेषु न सो सखि सीय न संगा। आगें अनी चली चतुरंगा॥ नहिं प्रसन्न मुख मानस खेदा। सखि संदेहु होइ एहिं भेदा॥

beṣu na so sakhi sīya na saṃgā| āgeṃ anī calī caturaṃgā|| nahiṃ prasanna mukha mānasa khedā| sakhi saṃdehu hoi ehiṃ bhedā||

तासु तरक तियगन मन मानी। कहहिं सकल तेहि सम न सयानी॥ तेहि सराहि बानी फुरि पूजी। बोली मधुर बचन तिय दूजी॥

tāsu taraka tiyagana mana mānī| kahahiṃ sakala tehi sama na sayānī|| tehi sarāhi bānī phuri pūjī| bolī madhura bacana tiya dūjī||

कहि सपेम सब कथाप्रसंगू। जेहि बिधि राम राज रस भंगू॥ भरतहि बहुरि सराहन लागी। सील सनेह सुभाय सुभागी॥

kahi sapema saba kathāprasaṃgū| jehi bidhi rāma rāja rasa bhaṃgū|| bharatahi bahuri sarāhana lāgī| sīla saneha subhāya subhāgī||

दोहा २२२

चलत पयादें खात फल पिता दीन्ह तजि राजु। जात मनावन रघुबरहि भरत सरिस को आजु ॥ २२२॥

calata payādeṃ khāta phala pitā dīnha taji rāju| jāta manāvana raghubarahi bharata sarisa ko āju || 222||

भायप भगति भरत आचरनू। कहत सुनत दुख दूषन हरनू॥ जो कछु कहब थोर सखि सोई। राम बंधु अस काहे न होई॥

bhāyapa bhagati bharata ācaranū| kahata sunata dukha dūṣana haranū|| jo kachu kahaba thora sakhi soī| rāma baṃdhu asa kāhe na hoī||

हम सब सानुज भरतहि देखें। भइन्ह धन्य जुबती जन लेखें॥ सुनि गुन देखि दसा पछिताहीं। कैकइ जननि जोगु सुतु नाहीं॥

hama saba sānuja bharatahi dekheṃ| bhainha dhanya jubatī jana lekheṃ|| suni guna dekhi dasā pachitāhīṃ| kaikai janani jogu sutu nāhīṃ||

कोउ कह दूषनु रानिहि नाहिन। बिधि सबु कीन्ह हमहि जो दाहिन॥ कहँ हम लोक बेद बिधि हीनी। लघु तिय कुल करतूति मलीनी॥

kou kaha dūṣanu rānihi nāhina| bidhi sabu kīnha hamahi jo dāhina|| kaham̐ hama loka beda bidhi hīnī| laghu tiya kula karatūti malīnī||

बसहिं कुदेस कुगाँव कुबामा। कहँ यह दरसु पुन्य परिनामा॥ अस अनंदु अचिरिजु प्रति ग्रामा। जनु मरुभूमि कलपतरु जामा॥

basahiṃ kudesa kugām̐va kubāmā| kaham̐ yaha darasu punya parināmā|| asa anaṃdu aciriju prati grāmā| janu marubhūmi kalapataru jāmā||

दोहा २२३

भरत दरसु देखत खुलेउ मग लोगन्ह कर भागु। जनु सिंघलबासिन्ह भयउ बिधि बस सुलभ प्रयागु ॥ २२३॥

bharata darasu dekhata khuleu maga loganha kara bhāgu| janu siṃghalabāsinha bhayau bidhi basa sulabha prayāgu || 223||