Ayodhya Kand — अयोध्याकाण्ड

अयोध्याकाण्ड · दोहा १७३–१८६

साझा करें

सब बिधि सोचिअ पर अपकारी। निज तनु पोषक निरदय भारी॥

saba bidhi socia para apakārī| nija tanu poṣaka niradaya bhārī||

सोरठा २

सोचनीय सबहि बिधि सोई। जो न छाड़ि छलु हरि जन होई॥

socanīya sabahi bidhi soī| jo na chāṛi chalu hari jana hoī||

सोरठा ३

सोचनीय नहिं कोसलराऊ। भुवन चारिदस प्रगट प्रभाऊ॥ भयउ न अहइ न अब होनिहारा। भूप भरत जस पिता तुम्हारा॥

socanīya nahiṃ kosalarāū| bhuvana cāridasa pragaṭa prabhāū|| bhayau na ahai na aba honihārā| bhūpa bharata jasa pitā tumhārā||

बिधि हरि हरु सुरपति दिसिनाथा। बरनहिं सब दसरथ गुन गाथा॥

bidhi hari haru surapati disināthā| baranahiṃ saba dasaratha guna gāthā||

दोहा १७३

कहहु तात केहि भाँति कोउ करिहि बड़ाई तासु। राम लखन तुम्ह सत्रुहन सरिस सुअन सुचि जासु ॥ १७३॥

kahahu tāta kehi bhām̐ti kou karihi baṛāī tāsu| rāma lakhana tumha satruhana sarisa suana suci jāsu || 173||

सब प्रकार भूपति बड़भागी। बादि बिषादु करिअ तेहि लागी॥ यहु सुनि समुझि सोचु परिहरहू। सिर धरि राज रजायसु करहू॥

saba prakāra bhūpati baṛabhāgī| bādi biṣādu karia tehi lāgī|| yahu suni samujhi socu pariharahū| sira dhari rāja rajāyasu karahū||

राँय राजपदु तुम्ह कहुँ दीन्हा। पिता बचनु फुर चाहिअ कीन्हा॥ तजे रामु जेहिं बचनहि लागी। तनु परिहरेउ राम बिरहागी॥

rām̐ya rājapadu tumha kahum̐ dīnhā| pitā bacanu phura cāhia kīnhā|| taje rāmu jehiṃ bacanahi lāgī| tanu parihareu rāma birahāgī||

नृपहि बचन प्रिय नहिं प्रिय प्राना। करहु तात पितु बचन प्रवाना॥ करहु सीस धरि भूप रजाई। हइ तुम्ह कहँ सब भाँति भलाई॥

nṛpahi bacana priya nahiṃ priya prānā| karahu tāta pitu bacana pravānā|| karahu sīsa dhari bhūpa rajāī| hai tumha kaham̐ saba bhām̐ti bhalāī||

परसुराम पितु अग्या राखी। मारी मातु लोक सब साखी॥ तनय जजातिहि जौबनु दयऊ। पितु अग्याँ अघ अजसु न भयऊ॥

parasurāma pitu agyā rākhī| mārī mātu loka saba sākhī|| tanaya jajātihi jaubanu dayaū| pitu agyām̐ agha ajasu na bhayaū||

दोहा १७४

अनुचित उचित बिचारु तजि जे पालहिं पितु बैन। ते भाजन सुख सुजस के बसहिं अमरपति ऐन ॥ १७४॥

anucita ucita bicāru taji je pālahiṃ pitu baina| te bhājana sukha sujasa ke basahiṃ amarapati aina || 174||

अवसि नरेस बचन फुर करहू। पालहु प्रजा सोकु परिहरहू॥ सुरपुर नृप पाइहि परितोषू। तुम्ह कहुँ सुकृत सुजसु नहिं दोषू॥

avasi naresa bacana phura karahū| pālahu prajā soku pariharahū|| surapura nṛpa pāihi paritoṣū| tumha kahum̐ sukṛta sujasu nahiṃ doṣū||

बेद बिदित संमत सबही का। जेहि पितु देइ सो पावइ टीका॥ करहु राजु परिहरहु गलानी। मानहु मोर बचन हित जानी॥

beda bidita saṃmata sabahī kā| jehi pitu dei so pāvai ṭīkā|| karahu rāju pariharahu galānī| mānahu mora bacana hita jānī||

सुनि सुखु लहब राम बैदेहीं। अनुचित कहब न पंडित केहीं॥ कौसल्यादि सकल महतारीं। तेउ प्रजा सुख होहिं सुखारीं॥

suni sukhu lahaba rāma baidehīṃ| anucita kahaba na paṃḍita kehīṃ|| kausalyādi sakala mahatārīṃ| teu prajā sukha hohiṃ sukhārīṃ||

परम तुम्हार राम कर जानिहि। सो सब बिधि तुम्ह सन भल मानिहि॥ सौंपेहु राजु राम कै आएँ। सेवा करेहु सनेह सुहाएँ॥

parama tumhāra rāma kara jānihi| so saba bidhi tumha sana bhala mānihi|| sauṃpehu rāju rāma kai āem̐| sevā karehu saneha suhāem̐||

दोहा १७५

कीजिअ गुर आयसु अवसि कहहिं सचिव कर जोरि। रघुपति आएँ उचित जस तस तब करब बहोरि ॥ १७५॥

kījia gura āyasu avasi kahahiṃ saciva kara jori| raghupati āem̐ ucita jasa tasa taba karaba bahori || 175||

कौसल्या धरि धीरजु कहई। पूत पथ्य गुर आयसु अहई॥

kausalyā dhari dhīraju kahaī| pūta pathya gura āyasu ahaī||

सोरठा १

सो आदरिअ करिअ हित मानी। तजिअ बिषादु काल गति जानी॥

so ādaria karia hita mānī| tajia biṣādu kāla gati jānī||

बन रघुपति सुरपति नरनाहू। तुम्ह एहि भाँति तात कदराहू॥ परिजन प्रजा सचिव सब अंबा। तुम्हही सुत सब कहँ अवलंबा॥

bana raghupati surapati naranāhū| tumha ehi bhām̐ti tāta kadarāhū|| parijana prajā saciva saba aṃbā| tumhahī suta saba kaham̐ avalaṃbā||

लखि बिधि बाम कालु कठिनाई। धीरजु धरहु मातु बलि जाई॥ सिर धरि गुर आयसु अनुसरहू। प्रजा पालि परिजन दुखु हरहू॥

lakhi bidhi bāma kālu kaṭhināī| dhīraju dharahu mātu bali jāī|| sira dhari gura āyasu anusarahū| prajā pāli parijana dukhu harahū||

गुर के बचन सचिव अभिनंदनु। सुने भरत हिय हित जनु चंदनु॥ सुनी बहोरि मातु मृदु बानी। सील सनेह सरल रस सानी॥

gura ke bacana saciva abhinaṃdanu| sune bharata hiya hita janu caṃdanu|| sunī bahori mātu mṛdu bānī| sīla saneha sarala rasa sānī||

छंद

सानी सरल रस मातु बानी सुनि भरतु ब्याकुल भए। लोचन सरोरुह स्त्वत सींचत बिरह उर अंकुर नए॥

sānī sarala rasa mātu bānī suni bharatu byākula bhae| locana saroruha stvata sīṃcata biraha ura aṃkura nae||

सोरठा

दसा देखत समय तेहि बिसरी सबहि सुधि देह की। तुलसी सराहत सकल सादर सीवें सहज सनेह की॥

dasā dekhata samaya tehi bisarī sabahi sudhi deha kī| tulasī sarāhata sakala sādara sīveṃ sahaja saneha kī||

सोरठा १७६

भरतु कमल कर जोरि धीर धुरंधर धीर धरि। बचन अआअमिअँ जनु बोरि देत उचित उत्तर सबहि ॥ १७६॥

bharatu kamala kara jori dhīra dhuraṃdhara dhīra dhari| bacana aāamiam̐ janu bori deta ucita uttara sabahi || 176||

मोहि उपदेसु दीन्ह गुर नीका। प्रजा सचिव संमत सबही का॥ मातु उचित धरि आयसु दीन्हा। अवसि सीस धरि चाहउँ कीन्हा॥

mohi upadesu dīnha gura nīkā| prajā saciva saṃmata sabahī kā|| mātu ucita dhari āyasu dīnhā| avasi sīsa dhari cāhaum̐ kīnhā||

गुर पितु मातु स्वामि हित बानी। सुनि मन मुदित करिअ भलि जानी॥ उचित कि अनुचित किएँ बिचारू। धरमु जाइ सिर पातक भारू॥

gura pitu mātu svāmi hita bānī| suni mana mudita karia bhali jānī|| ucita ki anucita kiem̐ bicārū| dharamu jāi sira pātaka bhārū||

तुम्ह तौ देहु सरल सिख सोई। जो आचरत मोर भल होई॥ जद्यपि यह समुझत हउँ नीकें। तदपि होत परितोषु न जी कें॥

tumha tau dehu sarala sikha soī| jo ācarata mora bhala hoī|| jadyapi yaha samujhata haum̐ nīkeṃ| tadapi hota paritoṣu na jī keṃ||

अब तुम्ह बिनय मोरि सुनि लेहू। मोहि अनुहरत सिखावनु देहू॥ ऊतरु देउँ छमब अपराधू। दुखित दोष गुन गनहिं न साधू॥

aba tumha binaya mori suni lehū| mohi anuharata sikhāvanu dehū|| ūtaru deum̐ chamaba aparādhū| dukhita doṣa guna ganahiṃ na sādhū||

दोहा १७७

पितु सुरपुर सिय रामु बन करन कहहु मोहि राजु। एहि तें जानहु मोर हित कै आपन बड़ काजु ॥ १७७॥

pitu surapura siya rāmu bana karana kahahu mohi rāju| ehi teṃ jānahu mora hita kai āpana baṛa kāju || 177||

हित हमार सियपति सेवकाई। सो हरि लीन्ह मातु कुटिलाई॥ मैं अनुमानि दीख मन माहीं। आन उपायँ मोर हित नाहीं॥

hita hamāra siyapati sevakāī| so hari līnha mātu kuṭilāī|| maiṃ anumāni dīkha mana māhīṃ| āna upāyam̐ mora hita nāhīṃ||

सोरठा २

सोक समाजु राजु केहि लेखें। लखन राम सिय बिनु पद देखें॥ बादि बसन बिनु भूषन भारू। बादि बिरति बिनु ब्रह्म बिचारू॥

soka samāju rāju kehi lekheṃ| lakhana rāma siya binu pada dekheṃ|| bādi basana binu bhūṣana bhārū| bādi birati binu brahma bicārū||

सरुज सरीर बादि बहु भोगा। बिनु हरिभगति जायँ जप जोगा॥ जायँ जीव बिनु देह सुहाई। बादि मोर सबु बिनु रघुराई॥

saruja sarīra bādi bahu bhogā| binu haribhagati jāyam̐ japa jogā|| jāyam̐ jīva binu deha suhāī| bādi mora sabu binu raghurāī||

जाउँ राम पहिं आयसु देहू। एकहिं आँक मोर हित एहू॥ मोहि नृप करि भल आपन चहहू। सोउ सनेह जड़ता बस कहहू॥

jāum̐ rāma pahiṃ āyasu dehū| ekahiṃ ām̐ka mora hita ehū|| mohi nṛpa kari bhala āpana cahahū| sou saneha jaṛatā basa kahahū||

दोहा १७८

कैकेई सुअ कुटिलमति राम बिमुख गतलाज। तुम्ह चाहत सुखु मोहबस मोहि से अधम कें राज ॥ १७८॥

kaikeī sua kuṭilamati rāma bimukha gatalāja| tumha cāhata sukhu mohabasa mohi se adhama keṃ rāja || 178||

कहउँ साँचु सब सुनि पतिआहू। चाहिअ धरमसील नरनाहू॥ मोहि राजु हठि देइहहु जबहीं। रसा रसातल जाइहि तबहीं॥

kahaum̐ sām̐cu saba suni patiāhū| cāhia dharamasīla naranāhū|| mohi rāju haṭhi deihahu jabahīṃ| rasā rasātala jāihi tabahīṃ||

मोहि समान को पाप निवासू। जेहि लगि सीय राम बनबासू॥ रायँ राम कहुँ काननु दीन्हा। बिछुरत गमनु अमरपुर कीन्हा॥

mohi samāna ko pāpa nivāsū| jehi lagi sīya rāma banabāsū|| rāyam̐ rāma kahum̐ kānanu dīnhā| bichurata gamanu amarapura kīnhā||

मैं सठु सब अनरथ कर हेतू। बैठ बात सब सुनउँ सचेतू॥ बिनु रघुबीर बिलोकि अबासू। रहे प्रान सहि जग उपहासू॥

maiṃ saṭhu saba anaratha kara hetū| baiṭha bāta saba sunaum̐ sacetū|| binu raghubīra biloki abāsū| rahe prāna sahi jaga upahāsū||

राम पुनीत बिषय रस रूखे। लोलुप भूमि भोग के भूखे॥ कहँ लगि कहौं हृदय कठिनाई। निदरि कुलिसु जेहिं लही बड़ाई॥

rāma punīta biṣaya rasa rūkhe| lolupa bhūmi bhoga ke bhūkhe|| kaham̐ lagi kahauṃ hṛdaya kaṭhināī| nidari kulisu jehiṃ lahī baṛāī||

दोहा १७९

कारन तें कारजु कठिन होइ दोसु नहि मोर। कुलिस अस्थि तें उपल तें लोह कराल कठोर ॥ १७९॥

kārana teṃ kāraju kaṭhina hoi dosu nahi mora| kulisa asthi teṃ upala teṃ loha karāla kaṭhora || 179||

कैकेई भव तनु अनुरागे। पाँवर प्रान अघाइ अभागे॥ जौं प्रिय बिरहँ प्रान प्रिय लागे। देखब सुनब बहुत अब आगे॥

kaikeī bhava tanu anurāge| pām̐vara prāna aghāi abhāge|| jauṃ priya biraham̐ prāna priya lāge| dekhaba sunaba bahuta aba āge||

लखन राम सिय कहुँ बनु दीन्हा। पठइ अमरपुर पति हित कीन्हा॥ लीन्ह बिधवपन अपजसु आपू। दीन्हेउ प्रजहि सोकु संतापू॥

lakhana rāma siya kahum̐ banu dīnhā| paṭhai amarapura pati hita kīnhā|| līnha bidhavapana apajasu āpū| dīnheu prajahi soku saṃtāpū||

मोहि दीन्ह सुखु सुजसु सुराजू। कीन्ह कैकेईं सब कर काजू॥ एहि तें मोर काह अब नीका। तेहि पर देन कहहु तुम्ह टीका॥

mohi dīnha sukhu sujasu surājū| kīnha kaikeīṃ saba kara kājū|| ehi teṃ mora kāha aba nīkā| tehi para dena kahahu tumha ṭīkā||

कैकई जठर जनमि जग माहीं। यह मोहि कहँ कछु अनुचित नाहीं॥ मोरि बात सब बिधिहिं बनाई। प्रजा पाँच कत करहु सहाई॥

kaikaī jaṭhara janami jaga māhīṃ| yaha mohi kaham̐ kachu anucita nāhīṃ|| mori bāta saba bidhihiṃ banāī| prajā pām̐ca kata karahu sahāī||

दोहा १८०

ग्रह ग्रहीत पुनि बात बस तेहि पुनि बीछी मार। तेहि पिआइअ बारुनी कहहु काह उपचार ॥ १८०॥

graha grahīta puni bāta basa tehi puni bīchī māra| tehi piāia bārunī kahahu kāha upacāra || 180||

कैकइ सुअन जोगु जग जोई। चतुर बिरंचि दीन्ह मोहि सोई॥ दसरथ तनय राम लघु भाई। दीन्हि मोहि बिधि बादि बड़ाई॥

kaikai suana jogu jaga joī| catura biraṃci dīnha mohi soī|| dasaratha tanaya rāma laghu bhāī| dīnhi mohi bidhi bādi baṛāī||

तुम्ह सब कहहु कढ़ावन टीका। राय रजायसु सब कहँ नीका॥ उतरु देउँ केहि बिधि केहि केही। कहहु सुखेन जथा रुचि जेही॥

tumha saba kahahu kaṛhāvana ṭīkā| rāya rajāyasu saba kaham̐ nīkā|| utaru deum̐ kehi bidhi kehi kehī| kahahu sukhena jathā ruci jehī||

मोहि कुमातु समेत बिहाई। कहहु कहिहि के कीन्ह भलाई॥ मो बिनु को सचराचर माहीं। जेहि सिय रामु प्रानप्रिय नाहीं॥

mohi kumātu sameta bihāī| kahahu kahihi ke kīnha bhalāī|| mo binu ko sacarācara māhīṃ| jehi siya rāmu prānapriya nāhīṃ||

परम हानि सब कहँ बड़ लाहू। अदिनु मोर नहि दूषन काहू॥ संसय सील प्रेम बस अहहू। सबुइ उचित सब जो कछु कहहू॥

parama hāni saba kaham̐ baṛa lāhū| adinu mora nahi dūṣana kāhū|| saṃsaya sīla prema basa ahahū| sabui ucita saba jo kachu kahahū||

दोहा १८१

राम मातु सुठि सरलचित मो पर प्रेमु बिसेषि। कहइ सुभाय सनेह बस मोरि दीनता देखि ॥ १८१॥

rāma mātu suṭhi saralacita mo para premu biseṣi| kahai subhāya saneha basa mori dīnatā dekhi || 181||

गुर बिबेक सागर जगु जाना। जिन्हहि बिस्व कर बदर समाना॥ मो कहँ तिलक साज सज सोऊ। भएँ बिधि बिमुख बिमुख सबु कोऊ॥

gura bibeka sāgara jagu jānā| jinhahi bisva kara badara samānā|| mo kaham̐ tilaka sāja saja soū| bhaem̐ bidhi bimukha bimukha sabu koū||

परिहरि रामु सीय जग माहीं। कोउ न कहिहि मोर मत नाहीं॥

parihari rāmu sīya jaga māhīṃ| kou na kahihi mora mata nāhīṃ||

सोरठा २

सो मैं सुनब सहब सुखु मानी। अंतहुँ कीच तहाँ जहँ पानी॥

so maiṃ sunaba sahaba sukhu mānī| aṃtahum̐ kīca tahām̐ jaham̐ pānī||

डरु न मोहि जग कहिहि कि पोचू। परलोकहु कर नाहिन सोचू॥ एकइ उर बस दुसह दवारी। मोहि लगि भे सिय रामु दुखारी॥

ḍaru na mohi jaga kahihi ki pocū| paralokahu kara nāhina socū|| ekai ura basa dusaha davārī| mohi lagi bhe siya rāmu dukhārī||

जीवन लाहु लखन भल पावा। सबु तजि राम चरन मनु लावा॥ मोर जनम रघुबर बन लागी। झूठ काह पछिताउँ अभागी॥

jīvana lāhu lakhana bhala pāvā| sabu taji rāma carana manu lāvā|| mora janama raghubara bana lāgī| jhūṭha kāha pachitāum̐ abhāgī||

दोहा १८२

आपनि दारुन दीनता कहउँ सबहि सिरु नाइ। देखें बिनु रघुनाथ पद जिय कै जरनि न जाइ ॥ १८२॥

āpani dāruna dīnatā kahaum̐ sabahi siru nāi| dekheṃ binu raghunātha pada jiya kai jarani na jāi || 182||

आन उपाउ मोहि नहि सूझा। को जिय कै रघुबर बिनु बूझा॥ एकहिं आँक इहइ मन माहीं। प्रातकाल चलिहउँ प्रभु पाहीं॥

āna upāu mohi nahi sūjhā| ko jiya kai raghubara binu būjhā|| ekahiṃ ām̐ka ihai mana māhīṃ| prātakāla calihaum̐ prabhu pāhīṃ||

जद्यपि मैं अनभल अपराधी। भै मोहि कारन सकल उपाधी॥ तदपि सरन सनमुख मोहि देखी। छमि सब करिहहिं कृपा बिसेषी॥

jadyapi maiṃ anabhala aparādhī| bhai mohi kārana sakala upādhī|| tadapi sarana sanamukha mohi dekhī| chami saba karihahiṃ kṛpā biseṣī||

सील सकुच सुठि सरल सुभाऊ। कृपा सनेह सदन रघुराऊ॥ अरिहुक अनभल कीन्ह न रामा। मैं सिसु सेवक जद्यपि बामा॥

sīla sakuca suṭhi sarala subhāū| kṛpā saneha sadana raghurāū|| arihuka anabhala kīnha na rāmā| maiṃ sisu sevaka jadyapi bāmā||

तुम्ह पै पाँच मोर भल मानी। आयसु आसिष देहु सुबानी॥ जेहिं सुनि बिनय मोहि जनु जानी। आवहिं बहुरि रामु रजधानी॥

tumha pai pām̐ca mora bhala mānī| āyasu āsiṣa dehu subānī|| jehiṃ suni binaya mohi janu jānī| āvahiṃ bahuri rāmu rajadhānī||

दोहा १८३

जद्यपि जनमु कुमातु तें मैं सठु सदा सदोस। आपन जानि न त्यागिहहिं मोहि रघुबीर भरोस ॥ १८३॥

jadyapi janamu kumātu teṃ maiṃ saṭhu sadā sadosa| āpana jāni na tyāgihahiṃ mohi raghubīra bharosa || 183||

भरत बचन सब कहँ प्रिय लागे। राम सनेह सुधाँ जनु पागे॥ लोग बियोग बिषम बिष दागे। मंत्र सबीज सुनत जनु जागे॥

bharata bacana saba kaham̐ priya lāge| rāma saneha sudhām̐ janu pāge|| loga biyoga biṣama biṣa dāge| maṃtra sabīja sunata janu jāge||

मातु सचिव गुर पुर नर नारी। सकल सनेहँ बिकल भए भारी॥ भरतहि कहहि सराहि सराही। राम प्रेम मूरति तनु आही॥

mātu saciva gura pura nara nārī| sakala saneham̐ bikala bhae bhārī|| bharatahi kahahi sarāhi sarāhī| rāma prema mūrati tanu āhī||

तात भरत अस काहे न कहहू। प्रान समान राम प्रिय अहहू॥ जो पावँरु अपनी जड़ताई। तुम्हहि सुगाइ मातु कुटिलाई॥

tāta bharata asa kāhe na kahahū| prāna samāna rāma priya ahahū|| jo pāvam̐ru apanī jaṛatāī| tumhahi sugāi mātu kuṭilāī||

सोरठा ४

सो सठु कोटिक पुरुष समेता। बसिहि कलप सत नरक निकेता॥ अहि अघ अवगुन नहि मनि गहई। हरइ गरल दुख दारिद दहई॥

so saṭhu koṭika puruṣa sametā| basihi kalapa sata naraka niketā|| ahi agha avaguna nahi mani gahaī| harai garala dukha dārida dahaī||

दोहा

अवसि चलिअ बन रामु जहँ भरत मंत्रु भल कीन्ह।

avasi calia bana rāmu jaham̐ bharata maṃtru bhala kīnha|

सोरठा १८४

सोक सिंधु बूड़त सबहि तुम्ह अवलंबनु दीन्ह ॥ १८४॥

soka siṃdhu būṛata sabahi tumha avalaṃbanu dīnha || 184||

भा सब कें मन मोदु न थोरा। जनु घन धुनि सुनि चातक मोरा॥ चलत प्रात लखि निरनउ नीके। भरतु प्रानप्रिय भे सबही के॥

bhā saba keṃ mana modu na thorā| janu ghana dhuni suni cātaka morā|| calata prāta lakhi niranau nīke| bharatu prānapriya bhe sabahī ke||

मुनिहि बंदि भरतहि सिरु नाई। चले सकल घर बिदा कराई॥ धन्य भरत जीवनु जग माहीं। सीलु सनेहु सराहत जाहीं॥

munihi baṃdi bharatahi siru nāī| cale sakala ghara bidā karāī|| dhanya bharata jīvanu jaga māhīṃ| sīlu sanehu sarāhata jāhīṃ||

कहहि परसपर भा बड़ काजू। सकल चलै कर साजहिं साजू॥ जेहि राखहिं रहु घर रखवारी। सो जानइ जनु गरदनि मारी॥

kahahi parasapara bhā baṛa kājū| sakala calai kara sājahiṃ sājū|| jehi rākhahiṃ rahu ghara rakhavārī| so jānai janu garadani mārī||

कोउ कह रहन कहिअ नहिं काहू। को न चहइ जग जीवन लाहू॥

kou kaha rahana kahia nahiṃ kāhū| ko na cahai jaga jīvana lāhū||

दोहा १८५

जरउ सो संपति सदन सुखु सुहद मातु पितु भाइ। सनमुख होत जो राम पद करै न सहस सहाइ ॥ १८५॥

jarau so saṃpati sadana sukhu suhada mātu pitu bhāi| sanamukha hota jo rāma pada karai na sahasa sahāi || 185||

घर घर साजहिं बाहन नाना। हरषु हृदयँ परभात पयाना॥ भरत जाइ घर कीन्ह बिचारू। नगरु बाजि गज भवन भँडारू॥

ghara ghara sājahiṃ bāhana nānā| haraṣu hṛdayam̐ parabhāta payānā|| bharata jāi ghara kīnha bicārū| nagaru bāji gaja bhavana bham̐ḍārū||

संपति सब रघुपति कै आही। जौ बिनु जतन चलौं तजि ताही॥ तौ परिनाम न मोरि भलाई। पाप सिरोमनि साइँ दोहाई॥

saṃpati saba raghupati kai āhī| jau binu jatana calauṃ taji tāhī|| tau parināma na mori bhalāī| pāpa siromani sāim̐ dohāī||

करइ स्वामि हित सेवकु सोई। दूषन कोटि देइ किन कोई॥ अस बिचारि सुचि सेवक बोले। जे सपनेहुँ निज धरम न डोले॥

karai svāmi hita sevaku soī| dūṣana koṭi dei kina koī|| asa bicāri suci sevaka bole| je sapanehum̐ nija dharama na ḍole||

कहि सबु मरमु धरमु भल भाषा। जो जेहि लायक सो तेहिं राखा॥ करि सबु जतनु राखि रखवारे। राम मातु पहिं भरतु सिधारे॥

kahi sabu maramu dharamu bhala bhāṣā| jo jehi lāyaka so tehiṃ rākhā|| kari sabu jatanu rākhi rakhavāre| rāma mātu pahiṃ bharatu sidhāre||

दोहा १८६

आरत जननी जानि सब भरत सनेह सुजान। कहेउ बनावन पालकीं सजन सुखासन जान॥

ārata jananī jāni saba bharata saneha sujāna| kaheu banāvana pālakīṃ sajana sukhāsana jāna||