Aranya Kand — अरण्यकाण्ड

अरण्यकाण्ड · दोहा ४२(ख)–४६(क)

साझा करें

दोहा ४२(ख)

एवमस्तु मुनि सन कहेउ कृपासिंधु रघुनाथ। तब नारद मन हरष अति प्रभु पद नायउ माथ ॥ ४२ (ख)॥

evamastu muni sana kaheu kṛpāsiṃdhu raghunātha| taba nārada mana haraṣa ati prabhu pada nāyau mātha || 42 (kha)||

अति प्रसन्न रघुनाथहि जानी। पुनि नारद बोले मृदु बानी॥ राम जबहिं प्रेरेउ निज माया। मोहेहु मोहि सुनहु रघुराया॥

ati prasanna raghunāthahi jānī| puni nārada bole mṛdu bānī|| rāma jabahiṃ prereu nija māyā| mohehu mohi sunahu raghurāyā||

तब बिबाह मैं चाहउँ कीन्हा। प्रभु केहि कारन करै न दीन्हा॥ सुनु मुनि तोहि कहउँ सहरोसा। भजहिं जे मोहि तजि सकल भरोसा॥

taba bibāha maiṃ cāhaum̐ kīnhā| prabhu kehi kārana karai na dīnhā|| sunu muni tohi kahaum̐ saharosā| bhajahiṃ je mohi taji sakala bharosā||

करउँ सदा तिन्ह कै रखवारी। जिमि बालक राखइ महतारी॥ गह सिसु बच्छ अनल अहि धाई। तहँ राखइ जननी अरगाई॥

karaum̐ sadā tinha kai rakhavārī| jimi bālaka rākhai mahatārī|| gaha sisu baccha anala ahi dhāī| taham̐ rākhai jananī aragāī||

प्रौढ़ भएँ तेहि सुत पर माता। प्रीति करइ नहिं पाछिलि बाता॥ मोरे प्रौढ़ तनय सम ग्यानी। बालक सुत सम दास अमानी॥

prauṛha bhaem̐ tehi suta para mātā| prīti karai nahiṃ pāchili bātā|| more prauṛha tanaya sama gyānī| bālaka suta sama dāsa amānī||

जनहि मोर बल निज बल ताही। दुहु कहँ काम क्रोध रिपु आही॥ यह बिचारि पंडित मोहि भजहीं। पाएहुँ ग्यान भगति नहिं तजहीं॥

janahi mora bala nija bala tāhī| duhu kaham̐ kāma krodha ripu āhī|| yaha bicāri paṃḍita mohi bhajahīṃ| pāehum̐ gyāna bhagati nahiṃ tajahīṃ||

दोहा ४३

काम क्रोध लोभादि मद प्रबल मोह कै धारि। तिन्ह महँ अति दारुन दुखद मायारूपी नारि ॥ ४३॥

kāma krodha lobhādi mada prabala moha kai dhāri| tinha maham̐ ati dāruna dukhada māyārūpī nāri || 43||

सुनि मुनि कह पुरान श्रुति संता। मोह बिपिन कहुँ नारि बसंता॥ जप तप नेम जलाश्रय झारी। होइ ग्रीषम सोषइ सब नारी॥

suni muni kaha purāna śruti saṃtā| moha bipina kahum̐ nāri basaṃtā|| japa tapa nema jalāśraya jhārī| hoi grīṣama soṣai saba nārī||

काम क्रोध मद मत्सर भेका। इन्हहि हरषप्रद बरषा एका॥ दुर्बासना कुमुद समुदाई। तिन्ह कहँ सरद सदा सुखदाई॥

kāma krodha mada matsara bhekā| inhahi haraṣaprada baraṣā ekā|| durbāsanā kumuda samudāī| tinha kaham̐ sarada sadā sukhadāī||

धर्म सकल सरसीरुह बृंदा। होइ हिम तिन्हहि दहइ सुख मंदा॥ पुनि ममता जवास बहुताई। पलुहइ नारि सिसिर रितु पाई॥

dharma sakala sarasīruha bṛṃdā| hoi hima tinhahi dahai sukha maṃdā|| puni mamatā javāsa bahutāī| paluhai nāri sisira ritu pāī||

पाप उलूक निकर सुखकारी। नारि निबिड़ रजनी अँधिआरी॥ बुधि बल सील सत्य सब मीना। बनसी सम त्रिय कहहिं प्रबीना॥

pāpa ulūka nikara sukhakārī| nāri nibiṛa rajanī am̐dhiārī|| budhi bala sīla satya saba mīnā| banasī sama triya kahahiṃ prabīnā||

दोहा ४४

अवगुन मूल सूलप्रद प्रमदा सब दुख खानि। ताते कीन्ह निवारन मुनि मैं यह जियँ जानि ॥ ४४॥

avaguna mūla sūlaprada pramadā saba dukha khāni| tāte kīnha nivārana muni maiṃ yaha jiyam̐ jāni || 44||

सुनि रघुपति के बचन सुहाए। मुनि तन पुलक नयन भरि आए॥ कहहु कवन प्रभु कै असि रीती। सेवक पर ममता अरु प्रीती॥

suni raghupati ke bacana suhāe| muni tana pulaka nayana bhari āe|| kahahu kavana prabhu kai asi rītī| sevaka para mamatā aru prītī||

जे न भजहिं अस प्रभु भ्रम त्यागी। ग्यान रंक नर मंद अभागी॥ पुनि सादर बोले मुनि नारद। सुनहु राम बिग्यान बिसारद॥

je na bhajahiṃ asa prabhu bhrama tyāgī| gyāna raṃka nara maṃda abhāgī|| puni sādara bole muni nārada| sunahu rāma bigyāna bisārada||

संतन्ह के लच्छन रघुबीरा। कहहु नाथ भव भंजन भीरा॥ सुनु मुनि संतन्ह के गुन कहऊँ। जिन्ह ते मैं उन्ह कें बस रहऊँ॥

saṃtanha ke lacchana raghubīrā| kahahu nātha bhava bhaṃjana bhīrā|| sunu muni saṃtanha ke guna kahaūm̐| jinha te maiṃ unha keṃ basa rahaūm̐||

षट बिकार जित अनघ अकामा। अचल अकिंचन सुचि सुखधामा॥ अमितबोध अनीह मितभोगी। सत्यसार कबि कोबिद जोगी॥

ṣaṭa bikāra jita anagha akāmā| acala akiṃcana suci sukhadhāmā|| amitabodha anīha mitabhogī| satyasāra kabi kobida jogī||

सावधान मानद मदहीना। धीर धर्म गति परम प्रबीना॥

sāvadhāna mānada madahīnā| dhīra dharma gati parama prabīnā||

दोहा ४५

गुनागार संसार दुख रहित बिगत संदेह। तजि मम चरन सरोज प्रिय तिन्ह कहुँ देह न गेह ॥ ४५॥

gunāgāra saṃsāra dukha rahita bigata saṃdeha| taji mama carana saroja priya tinha kahum̐ deha na geha || 45||

निज गुन श्रवन सुनत सकुचाहीं। पर गुन सुनत अधिक हरषाहीं॥ सम सीतल नहिं त्यागहिं नीती। सरल सुभाउ सबहिं सन प्रीती॥

nija guna śravana sunata sakucāhīṃ| para guna sunata adhika haraṣāhīṃ|| sama sītala nahiṃ tyāgahiṃ nītī| sarala subhāu sabahiṃ sana prītī||

जप तप ब्रत दम संजम नेमा। गुरु गोबिंद बिप्र पद प्रेमा॥ श्रद्धा छमा मयत्री दाया। मुदिता मम पद प्रीति अमाया॥

japa tapa brata dama saṃjama nemā| guru gobiṃda bipra pada premā|| śraddhā chamā mayatrī dāyā| muditā mama pada prīti amāyā||

बिरति बिबेक बिनय बिग्याना। बोध जथारथ बेद पुराना॥ दंभ मान मद करहिं न काऊ। भूलि न देहिं कुमारग पाऊ॥

birati bibeka binaya bigyānā| bodha jathāratha beda purānā|| daṃbha māna mada karahiṃ na kāū| bhūli na dehiṃ kumāraga pāū||

गावहिं सुनहिं सदा मम लीला। हेतु रहित परहित रत सीला॥ मुनि सुनु साधुन्ह के गुन जेते। कहि न सकहिं सारद श्रुति तेते॥

gāvahiṃ sunahiṃ sadā mama līlā| hetu rahita parahita rata sīlā|| muni sunu sādhunha ke guna jete| kahi na sakahiṃ sārada śruti tete||

छंद

कहि सक न सारद सेष नारद सुनत पद पंकज गहे। अस दीनबंधु कृपाल अपने भगत गुन निज मुख कहे॥ सिर नाइ़ बारहिं तब्वार चरनन्हि ब्रह्मपुर नारद गए॥ ते धन्य तुलसीदास आस बिहाइ़ जे हरि रेंग रए॥

kahi saka na sārada seṣa nārada sunata pada paṃkaja gahe| asa dīnabaṃdhu kṛpāla apane bhagata guna nija mukha kahe|| sira nāi bārahiṃ tabvāra carananhi brahmapura nārada gae|| te dhanya tulasīdāsa āsa bihāi je hari reṃga rae||

दोहा ४६(क)

रावनारि जसु पावन गावहिं सुनहिं जे लोग। राम भगति दृढ़ पावहिं बिनु बिराग जप जोग ॥ ४६ (क)॥

rāvanāri jasu pāvana gāvahiṃ sunahiṃ je loga| rāma bhagati dṛṛha pāvahiṃ binu birāga japa joga || 46 (ka)||

दीप सिखा सम जुबति तन मन जनि होसि पतंग। भजहि राम तजि काम मद करहि सदा सतसंग॥ ४६ ( ख )॥

dīpa sikhā sama jubati tana mana jani hosi pataṃga| bhajahi rāma taji kāma mada karahi sadā satasaṃga|| 46 ( kha )||