Sundar Kand — सुन्दरकाण्ड

सुन्दरकाण्ड · दोहा १६–३३

साझा करें

जौं रघुबीर होति सुधि पाई। करते नहिं बिलंबु रघुराई॥ रामबान रबि उएँ जानकी। तम बरूथ कहँ जातुधान की॥

jauṃ raghubīra hoti sudhi pāī| karate nahiṃ bilaṃbu raghurāī|| rāmabāna rabi uem̐ jānakī| tama barūtha kaham̐ jātudhāna kī||

अबहिं मातु मैं जाउँ लवाई। प्रभु आयसु नहिं राम दोहाई॥ कछुक दिवस जननी धरु धीरा। कपिन्ह सहित अइहहिं रघुबीरा॥

abahiṃ mātu maiṃ jāum̐ lavāī| prabhu āyasu nahiṃ rāma dohāī|| kachuka divasa jananī dharu dhīrā| kapinha sahita aihahiṃ raghubīrā||

निसिचर मारि तोहि लै जैहहिं। तिहुँ पुर नारदादि जसु गैहहिं॥ हैं सुत कपि सब तुम्हहि समाना। जातुधान अति भट बलवाना॥

nisicara māri tohi lai jaihahiṃ| tihum̐ pura nāradādi jasu gaihahiṃ|| haiṃ suta kapi saba tumhahi samānā| jātudhāna ati bhaṭa balavānā||

मोरें हृदय परम संदेहा। सुनि कपि प्रगट कीन्ह निज देहा॥ कनक भूधराकार सरीरा। समर भयंकर अतिबल बीरा॥

moreṃ hṛdaya parama saṃdehā| suni kapi pragaṭa kīnha nija dehā|| kanaka bhūdharākāra sarīrā| samara bhayaṃkara atibala bīrā||

सीता मन भरोस तब भयऊ। पुनि लघु रूप पवनसुत लयऊ॥

sītā mana bharosa taba bhayaū| puni laghu rūpa pavanasuta layaū||

दोहा १६

सुनु माता साखामृग नहिं बल बुद्धि बिसाल। प्रभु प्रताप तें गरुड़हि खाइ परम लघु ब्याल ॥ १६॥

sunu mātā sākhāmṛga nahiṃ bala buddhi bisāla| prabhu pratāpa teṃ garuṛahi khāi parama laghu byāla || 16||

मन संतोष सुनत कपि बानी। भगति प्रताप तेज बल सानी॥ आसिष दीन्हि रामप्रिय जाना। होहु तात बल सील निधाना॥

mana saṃtoṣa sunata kapi bānī| bhagati pratāpa teja bala sānī|| āsiṣa dīnhi rāmapriya jānā| hohu tāta bala sīla nidhānā||

अजर अमर गुननिधि सुत होहू। करहुँ बहुत रघुनायक छोहू॥ करहुँ कृपा प्रभु अस सुनि काना। निर्भर प्रेम मगन हनुमाना॥

ajara amara gunanidhi suta hohū| karahum̐ bahuta raghunāyaka chohū|| karahum̐ kṛpā prabhu asa suni kānā| nirbhara prema magana hanumānā||

बार बार नाएसि पद सीसा। बोला बचन जोरि कर कीसा॥ अब कृतकृत्य भयउँ मैं माता। आसिष तव अमोघ बिख्याता॥

bāra bāra nāesi pada sīsā| bolā bacana jori kara kīsā|| aba kṛtakṛtya bhayaum̐ maiṃ mātā| āsiṣa tava amogha bikhyātā||

सुनहु मातु मोहि अतिसय भूखा। लागि देखि सुंदर फल रूखा॥ सुनु सुत करहिं बिपिन रखवारी। परम सुभट रजनीचर भारी॥

sunahu mātu mohi atisaya bhūkhā| lāgi dekhi suṃdara phala rūkhā|| sunu suta karahiṃ bipina rakhavārī| parama subhaṭa rajanīcara bhārī||

तिन्ह कर भय माता मोहि नाहीं। जौं तुम्ह सुख मानहु मन माहीं॥

tinha kara bhaya mātā mohi nāhīṃ| jauṃ tumha sukha mānahu mana māhīṃ||

दोहा १७

देखि बुद्धि बल निपुन कपि कहेउ जानकीं जाहु। रघुपति चरन हृदयँ धरि तात मधुर फल खाहु ॥ १७॥

dekhi buddhi bala nipuna kapi kaheu jānakīṃ jāhu| raghupati carana hṛdayam̐ dhari tāta madhura phala khāhu || 17||

चलेउ नाइ सिरु पैठेउ बागा। फल खाएसि तरु तोरैं लागा॥ रहे तहाँ बहु भट रखवारे। कछु मारेसि कछु जाइ पुकारे॥

caleu nāi siru paiṭheu bāgā| phala khāesi taru toraiṃ lāgā|| rahe tahām̐ bahu bhaṭa rakhavāre| kachu māresi kachu jāi pukāre||

नाथ एक आवा कपि भारी। तेहिं असोक बाटिका उजारी॥ खाएसि फल अरु बिटप उपारे। रच्छक मर्दि मर्दि महि डारे॥

nātha eka āvā kapi bhārī| tehiṃ asoka bāṭikā ujārī|| khāesi phala aru biṭapa upāre| racchaka mardi mardi mahi ḍāre||

सुनि रावन पठए भट नाना। तिन्हहि देखि गर्जेउ हनुमाना॥ सब रजनीचर कपि संघारे। गए पुकारत कछु अधमारे॥

suni rāvana paṭhae bhaṭa nānā| tinhahi dekhi garjeu hanumānā|| saba rajanīcara kapi saṃghāre| gae pukārata kachu adhamāre||

पुनि पठयउ तेहिं अच्छकुमारा। चला संग लै सुभट अपारा॥ आवत देखि बिटप गहि तर्जा। ताहि निपाति महाधुनि गर्जा॥

puni paṭhayau tehiṃ acchakumārā| calā saṃga lai subhaṭa apārā|| āvata dekhi biṭapa gahi tarjā| tāhi nipāti mahādhuni garjā||

दोहा १८

कछु मारेसि कछु मर्देसि कछु मिलएसि धरि धूरि। कछु पुनि जाइ पुकारे प्रभु मर्कट बल भूरि ॥ १८॥

kachu māresi kachu mardesi kachu milaesi dhari dhūri| kachu puni jāi pukāre prabhu markaṭa bala bhūri || 18||

सुनि सुत बध लंकेस रिसाना। पठएसि मेघनाद बलवाना॥ मारसि जनि सुत बांधेसु ताही। देखिअ कपिहि कहाँ कर आही॥

suni suta badha laṃkesa risānā| paṭhaesi meghanāda balavānā|| mārasi jani suta bāṃdhesu tāhī| dekhia kapihi kahām̐ kara āhī||

चला इंद्रजित अतुलित जोधा। बंधु निधन सुनि उपजा क्रोधा॥ कपि देखा दारुन भट आवा। कटकटाइ गर्जा अरु धावा॥

calā iṃdrajita atulita jodhā| baṃdhu nidhana suni upajā krodhā|| kapi dekhā dāruna bhaṭa āvā| kaṭakaṭāi garjā aru dhāvā||

अति बिसाल तरु एक उपारा। बिरथ कीन्ह लंकेस कुमारा॥ रहे महाभट ताके संगा। गहि गहि कपि मर्दइ निज अंगा॥

ati bisāla taru eka upārā| biratha kīnha laṃkesa kumārā|| rahe mahābhaṭa tāke saṃgā| gahi gahi kapi mardai nija aṃgā||

तिन्हहि निपाति ताहि सन बाजा। भिरे जुगल मानहुँ गजराजा॥ मुठिका मारि चढ़ा तरु जाई। ताहि एक छन मुरुछा आई॥

tinhahi nipāti tāhi sana bājā| bhire jugala mānahum̐ gajarājā|| muṭhikā māri caṛhā taru jāī| tāhi eka chana muruchā āī||

उठि बहोरि कीन्हिसि बहु माया। जीति न जाइ प्रभंजन जाया॥

uṭhi bahori kīnhisi bahu māyā| jīti na jāi prabhaṃjana jāyā||

दोहा १९

ब्रह्म अस्त्र तेहिं साँधा कपि मन कीन्ह बिचार। जौं न ब्रह्मसर मानउँ महिमा मिटइ अपार ॥ १९॥

brahma astra tehiṃ sām̐dhā kapi mana kīnha bicāra| jauṃ na brahmasara mānaum̐ mahimā miṭai apāra || 19||

ब्रह्मबान कपि कहुँ तेहि मारा। परतिहुँ बार कटकु संघारा॥ तेहि देखा कपि मुरुछित भयऊ। नागपास बाँधेसि लै गयऊ॥

brahmabāna kapi kahum̐ tehi mārā| paratihum̐ bāra kaṭaku saṃghārā|| tehi dekhā kapi muruchita bhayaū| nāgapāsa bām̐dhesi lai gayaū||

जासु नाम जपि सुनहु भवानी। भव बंधन काटहिं नर ग्यानी॥ तासु दूत कि बंध तरु आवा। प्रभु कारज लगि कपिहिं बँधावा॥

jāsu nāma japi sunahu bhavānī| bhava baṃdhana kāṭahiṃ nara gyānī|| tāsu dūta ki baṃdha taru āvā| prabhu kāraja lagi kapihiṃ bam̐dhāvā||

कपि बंधन सुनि निसिचर धाए। कौतुक लागि सभाँ सब आए॥ दसमुख सभा दीखि कपि जाई। कहि न जाइ कछु अति प्रभुताई॥

kapi baṃdhana suni nisicara dhāe| kautuka lāgi sabhām̐ saba āe|| dasamukha sabhā dīkhi kapi jāī| kahi na jāi kachu ati prabhutāī||

कर जोरें सुर दिसिप बिनीता। भृकुटि बिलोकत सकल सभीता॥ देखि प्रताप न कपि मन संका। जिमि अहिगन महुँ गरुड़ असंका॥

kara joreṃ sura disipa binītā| bhṛkuṭi bilokata sakala sabhītā|| dekhi pratāpa na kapi mana saṃkā| jimi ahigana mahum̐ garuṛa asaṃkā||

दोहा २०

कपिहि बिलोकि दसानन बिहसा कहि दुर्बाद। सुत बध सुरति कीन्हि पुनि उपजा हृदयँ बिषाद ॥ २०॥

kapihi biloki dasānana bihasā kahi durbāda| suta badha surati kīnhi puni upajā hṛdayam̐ biṣāda || 20||

कह लंकेस कवन तैं कीसा। केहिं के बल घालेहि बन खीसा॥ की धौं श्रवन सुनेहि नहिं मोही। देखउँ अति असंक सठ तोही॥

kaha laṃkesa kavana taiṃ kīsā| kehiṃ ke bala ghālehi bana khīsā|| kī dhauṃ śravana sunehi nahiṃ mohī| dekhaum̐ ati asaṃka saṭha tohī||

मारे निसिचर केहिं अपराधा। कहु सठ तोहि न प्रान कइ बाधा॥ सुन रावन ब्रह्मांड निकाया। पाइ जासु बल बिरचित माया॥

māre nisicara kehiṃ aparādhā| kahu saṭha tohi na prāna kai bādhā|| suna rāvana brahmāṃḍa nikāyā| pāi jāsu bala biracita māyā||

जाकें बल बिरंचि हरि ईसा। पालत सृजत हरत दससीसा॥ जा बल सीस धरत सहसानन। अंडकोस समेत गिरि कानन॥

jākeṃ bala biraṃci hari īsā| pālata sṛjata harata dasasīsā|| jā bala sīsa dharata sahasānana| aṃḍakosa sameta giri kānana||

धरइ जो बिबिध देह सुरत्राता। तुम्ह ते सठन्ह सिखावनु दाता॥ हर कोदंड कठिन जेहि भंजा। तेहि समेत नृप दल मद गंजा॥

dharai jo bibidha deha suratrātā| tumha te saṭhanha sikhāvanu dātā|| hara kodaṃḍa kaṭhina jehi bhaṃjā| tehi sameta nṛpa dala mada gaṃjā||

खर दूषन त्रिसिरा अरु बाली। बधे सकल अतुलित बलसाली॥

khara dūṣana trisirā aru bālī| badhe sakala atulita balasālī||

दोहा २१

जाके बल लवलेस तें जितेहु चराचर झारि। तासु दूत मैं जा करि हरि आनेहु प्रिय नारि ॥ २१॥

jāke bala lavalesa teṃ jitehu carācara jhāri| tāsu dūta maiṃ jā kari hari ānehu priya nāri || 21||

जानउँ मैं तुम्हारि प्रभुताई। सहसबाहु सन परी लराई॥ समर बालि सन करि जसु पावा। सुनि कपि बचन बिहसि बिहरावा॥

jānaum̐ maiṃ tumhāri prabhutāī| sahasabāhu sana parī larāī|| samara bāli sana kari jasu pāvā| suni kapi bacana bihasi biharāvā||

खायउँ फल प्रभु लागी भूँखा। कपि सुभाव तें तोरेउँ रूखा॥ सब कें देह परम प्रिय स्वामी। मारहिं मोहि कुमारग गामी॥

khāyaum̐ phala prabhu lāgī bhūm̐khā| kapi subhāva teṃ toreum̐ rūkhā|| saba keṃ deha parama priya svāmī| mārahiṃ mohi kumāraga gāmī||

जिन्ह मोहि मारा ते मैं मारे। तेहि पर बाँधेउ तनयँ तुम्हारे॥ मोहि न कछु बाँधे कइ लाजा। कीन्ह चहउँ निज प्रभु कर काजा॥

jinha mohi mārā te maiṃ māre| tehi para bām̐dheu tanayam̐ tumhāre|| mohi na kachu bām̐dhe kai lājā| kīnha cahaum̐ nija prabhu kara kājā||

बिनती करउँ जोरि कर रावन। सुनहु मान तजि मोर सिखावन॥ देखहु तुम्ह निज कुलहि बिचारी। भ्रम तजि भजहु भगत भय हारी॥

binatī karaum̐ jori kara rāvana| sunahu māna taji mora sikhāvana|| dekhahu tumha nija kulahi bicārī| bhrama taji bhajahu bhagata bhaya hārī||

जाकें डर अति काल डेराई। जो सुर असुर चराचर खाई॥ तासों बयरु कबहुँ नहिं कीजै। मोरे कहें जानकी दीजै॥

jākeṃ ḍara ati kāla ḍerāī| jo sura asura carācara khāī|| tāsoṃ bayaru kabahum̐ nahiṃ kījai| more kaheṃ jānakī dījai||

दोहा २२

प्रनतपाल रघुनायक करुना सिंधु खरारि। गएँ सरन प्रभु राखिहैं तव अपराध बिसारि ॥ २२॥

pranatapāla raghunāyaka karunā siṃdhu kharāri| gaem̐ sarana prabhu rākhihaiṃ tava aparādha bisāri || 22||

राम चरन पंकज उर धरहू। लंका अचल राज तुम्ह करहू॥ रिषि पुलिस्त जसु बिमल मंयका। तेहि ससि महुँ जनि होहु कलंका॥

rāma carana paṃkaja ura dharahū| laṃkā acala rāja tumha karahū|| riṣi pulista jasu bimala maṃyakā| tehi sasi mahum̐ jani hohu kalaṃkā||

राम नाम बिनु गिरा न सोहा। देखु बिचारि त्यागि मद मोहा॥ बसन हीन नहिं सोह सुरारी। सब भूषण भूषित बर नारी॥

rāma nāma binu girā na sohā| dekhu bicāri tyāgi mada mohā|| basana hīna nahiṃ soha surārī| saba bhūṣaṇa bhūṣita bara nārī||

राम बिमुख संपति प्रभुताई। जाइ रही पाई बिनु पाई॥ सजल मूल जिन्ह सरितन्ह नाहीं। बरषि गए पुनि तबहिं सुखाहीं॥

rāma bimukha saṃpati prabhutāī| jāi rahī pāī binu pāī|| sajala mūla jinha saritanha nāhīṃ| baraṣi gae puni tabahiṃ sukhāhīṃ||

सुनु दसकंठ कहउँ पन रोपी। बिमुख राम त्राता नहिं कोपी॥ संकर सहस बिष्नु अज तोही। सकहिं न राखि राम कर द्रोही॥

sunu dasakaṃṭha kahaum̐ pana ropī| bimukha rāma trātā nahiṃ kopī|| saṃkara sahasa biṣnu aja tohī| sakahiṃ na rākhi rāma kara drohī||

दोहा २३

मोहमूल बहु सूल प्रद त्यागहु तम अभिमान। भजहु राम रघुनायक कृपा सिंधु भगवान ॥ २३॥

mohamūla bahu sūla prada tyāgahu tama abhimāna| bhajahu rāma raghunāyaka kṛpā siṃdhu bhagavāna || 23||

जदपि कहि कपि अति हित बानी। भगति बिबेक बिरति नय सानी॥ बोला बिहसि महा अभिमानी। मिला हमहि कपि गुर बड़ ग्यानी॥

jadapi kahi kapi ati hita bānī| bhagati bibeka birati naya sānī|| bolā bihasi mahā abhimānī| milā hamahi kapi gura baṛa gyānī||

मृत्यु निकट आई खल तोही। लागेसि अधम सिखावन मोही॥ उलटा होइहि कह हनुमाना। मतिभ्रम तोर प्रगट मैं जाना॥

mṛtyu nikaṭa āī khala tohī| lāgesi adhama sikhāvana mohī|| ulaṭā hoihi kaha hanumānā| matibhrama tora pragaṭa maiṃ jānā||

सुनि कपि बचन बहुत खिसिआना। बेगि न हरहुँ मूढ़ कर प्राना॥ सुनत निसाचर मारन धाए। सचिवन्ह सहित बिभीषनु आए॥

suni kapi bacana bahuta khisiānā| begi na harahum̐ mūṛha kara prānā|| sunata nisācara mārana dhāe| sacivanha sahita bibhīṣanu āe||

नाइ सीस करि बिनय बहूता। नीति बिरोध न मारिअ दूता॥ आन दंड कछु करिअ गोसाँई। सबहीं कहा मंत्र भल भाई॥

nāi sīsa kari binaya bahūtā| nīti birodha na māria dūtā|| āna daṃḍa kachu karia gosām̐ī| sabahīṃ kahā maṃtra bhala bhāī||

सुनत बिहसि बोला दसकंधर। अंग भंग करि पठइअ बंदर॥

sunata bihasi bolā dasakaṃdhara| aṃga bhaṃga kari paṭhaia baṃdara||

दोहा २४

कपि कें ममता पूँछ पर सबहि कहउँ समुझाइ। तेल बोरि पट बाँधि पुनि पावक देहु लगाइ ॥ २४॥

kapi keṃ mamatā pūm̐cha para sabahi kahaum̐ samujhāi| tela bori paṭa bām̐dhi puni pāvaka dehu lagāi || 24||

पूँछहीन बानर तहँ जाइहि। तब सठ निज नाथहि लइ आइहि॥ जिन्ह कै कीन्हसि बहुत बड़ाई। देखेउँमैं तिन्ह कै प्रभुताई॥

pūm̐chahīna bānara taham̐ jāihi| taba saṭha nija nāthahi lai āihi|| jinha kai kīnhasi bahuta baṛāī| dekheum̐maiṃ tinha kai prabhutāī||

बचन सुनत कपि मन मुसुकाना। भइ सहाय सारद मैं जाना॥ जातुधान सुनि रावन बचना। लागे रचैं मूढ़ सोइ रचना॥

bacana sunata kapi mana musukānā| bhai sahāya sārada maiṃ jānā|| jātudhāna suni rāvana bacanā| lāge racaiṃ mūṛha soi racanā||

रहा न नगर बसन घृत तेला। बाढ़ी पूँछ कीन्ह कपि खेला॥ कौतुक कहँ आए पुरबासी। मारहिं चरन करहिं बहु हाँसी॥

rahā na nagara basana ghṛta telā| bāṛhī pūm̐cha kīnha kapi khelā|| kautuka kaham̐ āe purabāsī| mārahiṃ carana karahiṃ bahu hām̐sī||

बाजहिं ढोल देहिं सब तारी। नगर फेरि पुनि पूँछ प्रजारी॥ पावक जरत देखि हनुमंता। भयउ परम लघु रुप तुरंता॥

bājahiṃ ḍhola dehiṃ saba tārī| nagara pheri puni pūm̐cha prajārī|| pāvaka jarata dekhi hanumaṃtā| bhayau parama laghu rupa turaṃtā||

निबुकि चढ़ेउ कपि कनक अटारीं। भई सभीत निसाचर नारीं॥

nibuki caṛheu kapi kanaka aṭārīṃ| bhaī sabhīta nisācara nārīṃ||

दोहा २५

हरि प्रेरित तेहि अवसर चले मरुत उनचास। अट्टहास करि गर्ज़ा कपि बढ़ि लाग अकास ॥ २५॥

hari prerita tehi avasara cale maruta unacāsa| aṭṭahāsa kari garzā kapi baṛhi lāga akāsa || 25||

देह बिसाल परम हरुआई। मंदिर तें मंदिर चढ़ धाई॥ जरइ नगर भा लोग बिहाला। झपट लपट बहु कोटि कराला॥

deha bisāla parama haruāī| maṃdira teṃ maṃdira caṛha dhāī|| jarai nagara bhā loga bihālā| jhapaṭa lapaṭa bahu koṭi karālā||

तात मातु हा सुनिअ पुकारा। एहि अवसर को हमहि उबारा॥ हम जो कहा यह कपि नहिं होई। बानर रूप धरें सुर कोई॥

tāta mātu hā sunia pukārā| ehi avasara ko hamahi ubārā|| hama jo kahā yaha kapi nahiṃ hoī| bānara rūpa dhareṃ sura koī||

साधु अवग्या कर फलु ऐसा। जरइ नगर अनाथ कर जैसा॥ जारा नगरु निमिष एक माहीं। एक बिभीषन कर गृह नाहीं॥

sādhu avagyā kara phalu aisā| jarai nagara anātha kara jaisā|| jārā nagaru nimiṣa eka māhīṃ| eka bibhīṣana kara gṛha nāhīṃ||

ता कर दूत अनल जेहिं सिरिजा। जरा न सो तेहि कारन गिरिजा॥ उलटि पलटि लंका सब जारी। कूदि परा पुनि सिंधु मझारी॥

tā kara dūta anala jehiṃ sirijā| jarā na so tehi kārana girijā|| ulaṭi palaṭi laṃkā saba jārī| kūdi parā puni siṃdhu majhārī||

दोहा २६

पूँछ बुझाइ खोइ श्रम धरि लघु रूप बहोरि। जनकसुता के आगें ठाढ़ भयउ कर जोरि ॥ २६॥

pūm̐cha bujhāi khoi śrama dhari laghu rūpa bahori| janakasutā ke āgeṃ ṭhāṛha bhayau kara jori || 26||

मातु मोहि दीजे कछु चीन्हा। जैसें रघुनायक मोहि दीन्हा॥ चूड़ामनि उतारि तब दयऊ। हरष समेत पवनसुत लयऊ॥

mātu mohi dīje kachu cīnhā| jaiseṃ raghunāyaka mohi dīnhā|| cūṛāmani utāri taba dayaū| haraṣa sameta pavanasuta layaū||

कहेहु तात अस मोर प्रनामा। सब प्रकार प्रभु पूरनकामा॥ दीन दयाल बिरिदु संभारी। हरहु नाथ मम संकट भारी॥

kahehu tāta asa mora pranāmā| saba prakāra prabhu pūranakāmā|| dīna dayāla biridu saṃbhārī| harahu nātha mama saṃkaṭa bhārī||

तात सक्रसुत कथा सुनाएहु। बान प्रताप प्रभुहि समुझाएहु॥ मास दिवस महुँ नाथु न आवा। तौ पुनि मोहि जिअत नहिं पावा॥

tāta sakrasuta kathā sunāehu| bāna pratāpa prabhuhi samujhāehu|| māsa divasa mahum̐ nāthu na āvā| tau puni mohi jiata nahiṃ pāvā||

कहु कपि केहि बिधि राखौं प्राना। तुम्हहू तात कहत अब जाना॥ तोहि देखि सीतलि भइ छाती। पुनि मो कहुँ सोइ दिनु सो राती॥

kahu kapi kehi bidhi rākhauṃ prānā| tumhahū tāta kahata aba jānā|| tohi dekhi sītali bhai chātī| puni mo kahum̐ soi dinu so rātī||

दोहा २७

जनकसुतहि समुझाइ करि बहु बिधि धीरजु दीन्ह। चरन कमल सिरु नाइ कपि गवनु राम पहिं कीन्ह ॥ २७॥

janakasutahi samujhāi kari bahu bidhi dhīraju dīnha| carana kamala siru nāi kapi gavanu rāma pahiṃ kīnha || 27||

चलत महाधुनि गर्जेसि भारी। गर्भ स्त्रवहिं सुनि निसिचर नारी॥ नाघि सिंधु एहि पारहि आवा। सबद किलकिला कपिन्ह सुनावा॥

calata mahādhuni garjesi bhārī| garbha stravahiṃ suni nisicara nārī|| nāghi siṃdhu ehi pārahi āvā| sabada kilakilā kapinha sunāvā||

हरषे सब बिलोकि हनुमाना। नूतन जन्म कपिन्ह तब जाना॥ मुख प्रसन्न तन तेज बिराजा। कीन्हेसि रामचन्द्र कर काजा॥

haraṣe saba biloki hanumānā| nūtana janma kapinha taba jānā|| mukha prasanna tana teja birājā| kīnhesi rāmacandra kara kājā||

मिले सकल अति भए सुखारी। तलफत मीन पाव जिमि बारी॥ चले हरषि रघुनायक पासा। पूँछत कहत नवल इतिहासा॥

mile sakala ati bhae sukhārī| talaphata mīna pāva jimi bārī|| cale haraṣi raghunāyaka pāsā| pūm̐chata kahata navala itihāsā||

तब मधुबन भीतर सब आए। अंगद संमत मधु फल खाए॥ रखवारे जब बरजन लागे। मुष्टि प्रहार हनत सब भागे॥

taba madhubana bhītara saba āe| aṃgada saṃmata madhu phala khāe|| rakhavāre jaba barajana lāge| muṣṭi prahāra hanata saba bhāge||

दोहा २८

जाइ पुकारे ते सब बन उजार जुबराज। सुनि सुग्रीव हरष कपि करि आए प्रभु काज ॥ २८॥

jāi pukāre te saba bana ujāra jubarāja| suni sugrīva haraṣa kapi kari āe prabhu kāja || 28||

जौं न होति सीता सुधि पाई। मधुबन के फल सकहिं कि खाई॥ एहि बिधि मन बिचार कर राजा। आइ गए कपि सहित समाजा॥

jauṃ na hoti sītā sudhi pāī| madhubana ke phala sakahiṃ ki khāī|| ehi bidhi mana bicāra kara rājā| āi gae kapi sahita samājā||

आइ सबन्हि नावा पद सीसा। मिलेउ सबन्हि अति प्रेम कपीसा॥ पूँछी कुसल कुसल पद देखी। राम कृपाँ भा काजु बिसेषी॥

āi sabanhi nāvā pada sīsā| mileu sabanhi ati prema kapīsā|| pūm̐chī kusala kusala pada dekhī| rāma kṛpām̐ bhā kāju biseṣī||

नाथ काजु कीन्हेउ हनुमाना। राखे सकल कपिन्ह के प्राना॥ सुनि सुग्रीव बहुरि तेहि मिलेऊ। कपिन्ह सहित रघुपति पहिं चलेऊ॥

nātha kāju kīnheu hanumānā| rākhe sakala kapinha ke prānā|| suni sugrīva bahuri tehi mileū| kapinha sahita raghupati pahiṃ caleū||

राम कपिन्ह जब आवत देखा। किएँ काजु मन हरष बिसेषा॥ फटिक सिला बैठे द्वौ भाई। परे सकल कपि चरनन्हि जाई॥

rāma kapinha jaba āvata dekhā| kiem̐ kāju mana haraṣa biseṣā|| phaṭika silā baiṭhe dvau bhāī| pare sakala kapi carananhi jāī||

दोहा २९

प्रीति सहित सब भेटे रघुपति करुना पुंज। पूँछी कुसल नाथ अब कुसल देखि पद कंज ॥ २९॥

prīti sahita saba bheṭe raghupati karunā puṃja| pūm̐chī kusala nātha aba kusala dekhi pada kaṃja || 29||

जामवंत कह सुनु रघुराया। जा पर नाथ करहु तुम्ह दाया॥ ताहि सदा सुभ कुसल निरंतर। सुर नर मुनि प्रसन्न ता ऊपर॥

jāmavaṃta kaha sunu raghurāyā| jā para nātha karahu tumha dāyā|| tāhi sadā subha kusala niraṃtara| sura nara muni prasanna tā ūpara||

सोरठा २

सोइ बिजई बिनई गुन सागर। तासु सुजसु त्रेलोक उजागर॥ प्रभु कीं कृपा भयउ सबु काजू। जन्म हमार सुफल भा आजू॥

soi bijaī binaī guna sāgara| tāsu sujasu treloka ujāgara|| prabhu kīṃ kṛpā bhayau sabu kājū| janma hamāra suphala bhā ājū||

नाथ पवनसुत कीन्हि जो करनी। सहसहुँ मुख न जाइ सो बरनी॥ पवनतनय के चरित सुहाए। जामवंत रघुपतिहि सुनाए॥

nātha pavanasuta kīnhi jo karanī| sahasahum̐ mukha na jāi so baranī|| pavanatanaya ke carita suhāe| jāmavaṃta raghupatihi sunāe||

सुनत कृपानिधि मन अति भाए। पुनि हनुमान हरषि हियँ लाए॥ कहहु तात केहि भाँति जानकी। रहति करति रच्छा स्वप्रान की॥

sunata kṛpānidhi mana ati bhāe| puni hanumāna haraṣi hiyam̐ lāe|| kahahu tāta kehi bhām̐ti jānakī| rahati karati racchā svaprāna kī||

दोहा ३०

नाम पाहरु दिवस निसि ध्यान तुम्हार कपाट। लोचन निज पद जंत्रित जाहिं प्रान केहिं बाट ॥ ३०॥

nāma pāharu divasa nisi dhyāna tumhāra kapāṭa| locana nija pada jaṃtrita jāhiṃ prāna kehiṃ bāṭa || 30||

चलत मोहि चूड़ामनि दीन्ही। रघुपति हृदयँ लाइ सोइ लीन्ही॥ नाथ जुगल लोचन भरि बारी। बचन कहे कछु जनककुमारी॥

calata mohi cūṛāmani dīnhī| raghupati hṛdayam̐ lāi soi līnhī|| nātha jugala locana bhari bārī| bacana kahe kachu janakakumārī||

अनुज समेत गहेहु प्रभु चरना। दीन बंधु प्रनतारति हरना॥ मन क्रम बचन चरन अनुरागी। केहि अपराध नाथ हौं त्यागी॥

anuja sameta gahehu prabhu caranā| dīna baṃdhu pranatārati haranā|| mana krama bacana carana anurāgī| kehi aparādha nātha hauṃ tyāgī||

अवगुन एक मोर मैं माना। बिछुरत प्रान न कीन्ह पयाना॥ नाथ सो नयनन्हि को अपराधा। निसरत प्रान करिहिं हठि बाधा॥

avaguna eka mora maiṃ mānā| bichurata prāna na kīnha payānā|| nātha so nayananhi ko aparādhā| nisarata prāna karihiṃ haṭhi bādhā||

बिरह अगिनि तनु तूल समीरा। स्वास जरइ छन माहिं सरीरा॥ नयन स्त्रवहि जलु निज हित लागी। जरैं न पाव देह बिरहागी॥

biraha agini tanu tūla samīrā| svāsa jarai chana māhiṃ sarīrā|| nayana stravahi jalu nija hita lāgī| jaraiṃ na pāva deha birahāgī||

सीता के अति बिपति बिसाला। बिनहिं कहें भलि दीनदयाला॥

sītā ke ati bipati bisālā| binahiṃ kaheṃ bhali dīnadayālā||

दोहा ३१

निमिष निमिष करुनानिधि जाहिं कलप सम बीति। बेगि चलिय प्रभु आनिअ भुज बल खल दल जीति ॥ ३१॥

nimiṣa nimiṣa karunānidhi jāhiṃ kalapa sama bīti| begi caliya prabhu ānia bhuja bala khala dala jīti || 31||

सुनि सीता दुख प्रभु सुख अयना। भरि आए जल राजिव नयना॥ बचन काँय मन मम गति जाही। सपनेहुँ बूझिअ बिपति कि ताही॥

suni sītā dukha prabhu sukha ayanā| bhari āe jala rājiva nayanā|| bacana kām̐ya mana mama gati jāhī| sapanehum̐ būjhia bipati ki tāhī||

कह हनुमंत बिपति प्रभु सोई। जब तव सुमिरन भजन न होई॥ केतिक बात प्रभु जातुधान की। रिपुहि जीति आनिबी जानकी॥

kaha hanumaṃta bipati prabhu soī| jaba tava sumirana bhajana na hoī|| ketika bāta prabhu jātudhāna kī| ripuhi jīti ānibī jānakī||

सुनु कपि तोहि समान उपकारी। नहिं कोउ सुर नर मुनि तनुधारी॥ प्रति उपकार करौं का तोरा। सनमुख होइ न सकत मन मोरा॥

sunu kapi tohi samāna upakārī| nahiṃ kou sura nara muni tanudhārī|| prati upakāra karauṃ kā torā| sanamukha hoi na sakata mana morā||

सुनु सुत उरिन मैं नाहीं। देखेउँ करि बिचार मन माहीं॥ पुनि पुनि कपिहि चितव सुरत्राता। लोचन नीर पुलक अति गाता॥

sunu suta urina maiṃ nāhīṃ| dekheum̐ kari bicāra mana māhīṃ|| puni puni kapihi citava suratrātā| locana nīra pulaka ati gātā||

दोहा ३२

सुनि प्रभु बचन बिलोकि मुख गात हरषि हनुमंत। चरन परेउ प्रेमाकुल त्राहि त्राहि भगवंत ॥ ३२॥

suni prabhu bacana biloki mukha gāta haraṣi hanumaṃta| carana pareu premākula trāhi trāhi bhagavaṃta || 32||

बार बार प्रभु चहइ उठावा। प्रेम मगन तेहि उठब न भावा॥ प्रभु कर पंकज कपि कें सीसा। सुमिरि सो दसा मगन गौरीसा॥

bāra bāra prabhu cahai uṭhāvā| prema magana tehi uṭhaba na bhāvā|| prabhu kara paṃkaja kapi keṃ sīsā| sumiri so dasā magana gaurīsā||

सावधान मन करि पुनि संकर। लागे कहन कथा अति सुंदर॥ कपि उठाइ प्रभु हृदयँ लगावा। कर गहि परम निकट बैठावा॥

sāvadhāna mana kari puni saṃkara| lāge kahana kathā ati suṃdara|| kapi uṭhāi prabhu hṛdayam̐ lagāvā| kara gahi parama nikaṭa baiṭhāvā||

कहु कपि रावन पालित लंका। केहि बिधि दहेउ दुर्ग अति बंका॥ प्रभु प्रसन्न जाना हनुमाना। बोला बचन बिगत अभिमाना॥

kahu kapi rāvana pālita laṃkā| kehi bidhi daheu durga ati baṃkā|| prabhu prasanna jānā hanumānā| bolā bacana bigata abhimānā||

साखामृग के बड़ि मनुसाई। साखा तें साखा पर जाई॥ नाघि सिंधु हाटकपुर जारा। निसिचर गन बिधि बिपिन उजारा॥

sākhāmṛga ke baṛi manusāī| sākhā teṃ sākhā para jāī|| nāghi siṃdhu hāṭakapura jārā| nisicara gana bidhi bipina ujārā||

सोरठा ५

सो सब तव प्रताप रघुराई। नाथ न कछू मोरि प्रभुताई॥

so saba tava pratāpa raghurāī| nātha na kachū mori prabhutāī||

दोहा ३३

ता कहुँ प्रभु कछु अगम नहिं जा पर तुम्ह अनुकुल। तब प्रभावँ बड़वानलहिं जारि सकइ खलु तूल ॥ ३३॥

tā kahum̐ prabhu kachu agama nahiṃ jā para tumha anukula| taba prabhāvam̐ baṛavānalahiṃ jāri sakai khalu tūla || 33||