Ayodhya Kand — अयोध्याकाण्ड

अयोध्याकाण्ड · दोहा २२४–२४२

साझा करें

निज गुन सहित राम गुन गाथा। सुनत जाहिं सुमिरत रघुनाथा॥ तीरथ मुनि आश्रम सुरधामा। निरखि निमज्जहिं करहिं प्रनामा॥

nija guna sahita rāma guna gāthā| sunata jāhiṃ sumirata raghunāthā|| tīratha muni āśrama suradhāmā| nirakhi nimajjahiṃ karahiṃ pranāmā||

मनहीं मन मागहिं बरु एहू। सीय राम पद पदुम सनेहू॥ मिलहिं किरात कोल बनबासी। बैखानस बटु जती उदासी॥

manahīṃ mana māgahiṃ baru ehū| sīya rāma pada paduma sanehū|| milahiṃ kirāta kola banabāsī| baikhānasa baṭu jatī udāsī||

करि प्रनामु पूँछहिं जेहिं तेही। केहि बन लखनु रामु बैदेही॥ ते प्रभु समाचार सब कहहीं। भरतहि देखि जनम फलु लहहीं॥

kari pranāmu pūm̐chahiṃ jehiṃ tehī| kehi bana lakhanu rāmu baidehī|| te prabhu samācāra saba kahahīṃ| bharatahi dekhi janama phalu lahahīṃ||

जे जन कहहिं कुसल हम देखे। ते प्रिय राम लखन सम लेखे॥ एहि बिधि बूझत सबहि सुबानी। सुनत राम बनबास कहानी॥

je jana kahahiṃ kusala hama dekhe| te priya rāma lakhana sama lekhe|| ehi bidhi būjhata sabahi subānī| sunata rāma banabāsa kahānī||

दोहा २२४

तेहि बासर बसि प्रातहीं चले सुमिरि रघुनाथ। राम दरस की लालसा भरत सरिस सब साथ ॥ २२४॥

tehi bāsara basi prātahīṃ cale sumiri raghunātha| rāma darasa kī lālasā bharata sarisa saba sātha || 224||

मंगल सगुन होहिं सब काहू। फरकहिं सुखद बिलोचन बाहू॥ भरतहि सहित समाज उछाहू। मिलिहहिं रामु मिटहि दुख दाहू॥

maṃgala saguna hohiṃ saba kāhū| pharakahiṃ sukhada bilocana bāhū|| bharatahi sahita samāja uchāhū| milihahiṃ rāmu miṭahi dukha dāhū||

करत मनोरथ जस जियँ जाके। जाहिं सनेह सुराँ सब छाके॥ सिथिल अंग पग मग डगि डोलहिं। बिहबल बचन पेम बस बोलहिं॥

karata manoratha jasa jiyam̐ jāke| jāhiṃ saneha surām̐ saba chāke|| sithila aṃga paga maga ḍagi ḍolahiṃ| bihabala bacana pema basa bolahiṃ||

रामसखाँ तेहि समय देखावा। सैल सिरोमनि सहज सुहावा॥ जासु समीप सरित पय तीरा। सीय समेत बसहिं दोउ बीरा॥

rāmasakhām̐ tehi samaya dekhāvā| saila siromani sahaja suhāvā|| jāsu samīpa sarita paya tīrā| sīya sameta basahiṃ dou bīrā||

देखि करहिं सब दंड प्रनामा। कहि जय जानकि जीवन रामा॥ प्रेम मगन अस राज समाजू। जनु फिरि अवध चले रघुराजू॥

dekhi karahiṃ saba daṃḍa pranāmā| kahi jaya jānaki jīvana rāmā|| prema magana asa rāja samājū| janu phiri avadha cale raghurājū||

दोहा २२५

भरत प्रेमु तेहि समय जस तस कहि सकइ न सेषु। कबिहिं अगम जिमि ब्रह्मसुखु अह मम मलिन जनेषु ॥ २२५॥

bharata premu tehi samaya jasa tasa kahi sakai na seṣu| kabihiṃ agama jimi brahmasukhu aha mama malina janeṣu || 225||

सकल सनेह सिथिल रघुबर कें। गए कोस दुइ दिनकर ढरकें॥ जलु थलु देखि बसे निसि बीतें। कीन्ह गवन रघुनाथ पिरीतें॥

sakala saneha sithila raghubara keṃ| gae kosa dui dinakara ḍharakeṃ|| jalu thalu dekhi base nisi bīteṃ| kīnha gavana raghunātha pirīteṃ||

उहाँ रामु रजनी अवसेषा। जागे सीयँ सपन अस देखा॥ सहित समाज भरत जनु आए। नाथ बियोग ताप तन ताए॥

uhām̐ rāmu rajanī avaseṣā| jāge sīyam̐ sapana asa dekhā|| sahita samāja bharata janu āe| nātha biyoga tāpa tana tāe||

सकल मलिन मन दीन दुखारी। देखीं सासु आन अनुहारी॥ सुनि सिय सपन भरे जल लोचन। भए सोचबस सोच बिमोचन॥

sakala malina mana dīna dukhārī| dekhīṃ sāsu āna anuhārī|| suni siya sapana bhare jala locana| bhae socabasa soca bimocana||

लखन सपन यह नीक न होई। कठिन कुचाह सुनाइहि कोई॥ अस कहि बंधु समेत नहाने। पूजि पुरारि साधु सनमाने॥

lakhana sapana yaha nīka na hoī| kaṭhina kucāha sunāihi koī|| asa kahi baṃdhu sameta nahāne| pūji purāri sādhu sanamāne||

छंद

सनमानि सुर मुनि बंदि बैठे उतर दिसि देखत भए। नभ धूरि खग मृग भूरि भागे बिकल प्रभु आश्रम गए॥ तुलसी उठे अवलोकि कारनु काह चित सचकित रहे। सब समाचार किरात कोलन्हि आइ तेहि अवसर कहे॥

sanamāni sura muni baṃdi baiṭhe utara disi dekhata bhae| nabha dhūri khaga mṛga bhūri bhāge bikala prabhu āśrama gae|| tulasī uṭhe avaloki kāranu kāha cita sacakita rahe| saba samācāra kirāta kolanhi āi tehi avasara kahe||

सोरठा २२६

सुनत सुमंगल बैन मन प्रमोद तन पुलक भर। सरद सरोरुह नैन तुलसी भरे सनेह जल ॥ २२६॥

sunata sumaṃgala baina mana pramoda tana pulaka bhara| sarada saroruha naina tulasī bhare saneha jala || 226||

बहुरि सोचबस भे सियरवनू। कारन कवन भरत आगवनू॥ एक आइ अस कहा बहोरी। सेन संग चतुरंग न थोरी॥

bahuri socabasa bhe siyaravanū| kārana kavana bharata āgavanū|| eka āi asa kahā bahorī| sena saṃga caturaṃga na thorī||

सोरठा २

सो सुनि रामहि भा अति सोचू। इत पितु बच इत बंधु सकोचू॥ भरत सुभाउ समुझि मन माहीं। प्रभु चित हित थिति पावत नाही॥

so suni rāmahi bhā ati socū| ita pitu baca ita baṃdhu sakocū|| bharata subhāu samujhi mana māhīṃ| prabhu cita hita thiti pāvata nāhī||

समाधान तब भा यह जाने। भरतु कहे महुँ साधु सयाने॥ लखन लखेउ प्रभु हृदयँ खभारू। कहत समय सम नीति बिचारू॥

samādhāna taba bhā yaha jāne| bharatu kahe mahum̐ sādhu sayāne|| lakhana lakheu prabhu hṛdayam̐ khabhārū| kahata samaya sama nīti bicārū||

बिनु पूँछ कछु कहउँ गोसाईं। सेवकु समयँ न ढीठ ढिठाई॥ तुम्ह सर्बग्य सिरोमनि स्वामी। आपनि समुझि कहउँ अनुगामी॥

binu pūm̐cha kachu kahaum̐ gosāīṃ| sevaku samayam̐ na ḍhīṭha ḍhiṭhāī|| tumha sarbagya siromani svāmī| āpani samujhi kahaum̐ anugāmī||

दोहा २२७

नाथ सुह्रद सुठि सरल चित सील सनेह निधान। सब पर प्रीति प्रतीति जियँ जानिअ आपु समान ॥ २२७॥

nātha suhrada suṭhi sarala cita sīla saneha nidhāna| saba para prīti pratīti jiyam̐ jānia āpu samāna || 227||

बिषई जीव पाइ प्रभुताई। मूढ़ मोह बस होहिं जनाई॥ भरतु नीति रत साधु सुजाना। प्रभु पद प्रेम सकल जगु जाना॥

biṣaī jīva pāi prabhutāī| mūṛha moha basa hohiṃ janāī|| bharatu nīti rata sādhu sujānā| prabhu pada prema sakala jagu jānā||

तेऊ आजु राम पदु पाई। चले धरम मरजाद मेटाई॥ कुटिल कुबंध कुअवसरु ताकी। जानि राम बनवास एकाकी॥

teū āju rāma padu pāī| cale dharama marajāda meṭāī|| kuṭila kubaṃdha kuavasaru tākī| jāni rāma banavāsa ekākī||

करि कुमंत्रु मन साजि समाजू। आए करै अकंटक राजू॥ कोटि प्रकार कलपि कुटलाई। आए दल बटोरि दोउ भाई॥

kari kumaṃtru mana sāji samājū| āe karai akaṃṭaka rājū|| koṭi prakāra kalapi kuṭalāī| āe dala baṭori dou bhāī||

जौं जियँ होति न कपट कुचाली। केहि सोहाति रथ बाजि गजाली॥ भरतहि दोसु देइ को जाएँ। जग बौराइ राज पदु पाएँ॥

jauṃ jiyam̐ hoti na kapaṭa kucālī| kehi sohāti ratha bāji gajālī|| bharatahi dosu dei ko jāem̐| jaga baurāi rāja padu pāem̐||

दोहा २२८

ससि गुर तिय गामी नघुषु चढ़ेउ भूमिसुर जान। लोक बेद तें बिमुख भा अधम न बेन समान ॥ २२८॥

sasi gura tiya gāmī naghuṣu caṛheu bhūmisura jāna| loka beda teṃ bimukha bhā adhama na bena samāna || 228||

सहसबाहु सुरनाथु त्रिसंकू। केहि न राजमद दीन्ह कलंकू॥ भरत कीन्ह यह उचित उपाऊ। रिपु रिन रंच न राखब काऊ॥

sahasabāhu suranāthu trisaṃkū| kehi na rājamada dīnha kalaṃkū|| bharata kīnha yaha ucita upāū| ripu rina raṃca na rākhaba kāū||

एक कीन्हि नहिं भरत भलाई। निदरे रामु जानि असहाई॥ समुझि परिहि सोउ आजु बिसेषी। समर सरोष राम मुखु पेखी॥

eka kīnhi nahiṃ bharata bhalāī| nidare rāmu jāni asahāī|| samujhi parihi sou āju biseṣī| samara saroṣa rāma mukhu pekhī||

एतना कहत नीति रस भूला। रन रस बिटपु पुलक मिस फूला॥ प्रभु पद बंदि सीस रज राखी। बोले सत्य सहज बलु भाषी॥

etanā kahata nīti rasa bhūlā| rana rasa biṭapu pulaka misa phūlā|| prabhu pada baṃdi sīsa raja rākhī| bole satya sahaja balu bhāṣī||

अनुचित नाथ न मानब मोरा। भरत हमहि उपचार न थोरा॥ कहँ लगि सहिअ रहिअ मनु मारें। नाथ साथ धनु हाथ हमारें॥

anucita nātha na mānaba morā| bharata hamahi upacāra na thorā|| kaham̐ lagi sahia rahia manu māreṃ| nātha sātha dhanu hātha hamāreṃ||

दोहा २२९

छत्रि जाति रघुकुल जनमु राम अनुग जगु जान। लातहुँ मारें चढ़ति सिर नीच को धूरि समान ॥ २२९॥

chatri jāti raghukula janamu rāma anuga jagu jāna| lātahum̐ māreṃ caṛhati sira nīca ko dhūri samāna || 229||

उठि कर जोरि रजायसु मागा। मनहुँ बीर रस सोवत जागा॥ बाँधि जटा सिर कसि कटि भाथा। साजि सरासनु सायकु हाथा॥

uṭhi kara jori rajāyasu māgā| manahum̐ bīra rasa sovata jāgā|| bām̐dhi jaṭā sira kasi kaṭi bhāthā| sāji sarāsanu sāyaku hāthā||

आजु राम सेवक जसु लेऊँ। भरतहि समर सिखावन देऊँ॥ राम निरादर कर फलु पाई। सोवहुँ समर सेज दोउ भाई॥

āju rāma sevaka jasu leūm̐| bharatahi samara sikhāvana deūm̐|| rāma nirādara kara phalu pāī| sovahum̐ samara seja dou bhāī||

आइ बना भल सकल समाजू। प्रगट करउँ रिस पाछिल आजू॥ जिमि करि निकर दलइ मृगराजू। लेइ लपेटि लवा जिमि बाजू॥

āi banā bhala sakala samājū| pragaṭa karaum̐ risa pāchila ājū|| jimi kari nikara dalai mṛgarājū| lei lapeṭi lavā jimi bājū||

तैसेहिं भरतहि सेन समेता। सानुज निदरि निपातउँ खेता॥ जौं सहाय कर संकरु आई। तौ मारउँ रन राम दोहाई॥

taisehiṃ bharatahi sena sametā| sānuja nidari nipātaum̐ khetā|| jauṃ sahāya kara saṃkaru āī| tau māraum̐ rana rāma dohāī||

दोहा २३०

अति सरोष माखे लखनु लखि सुनि सपथ प्रवान। सभय लोक सब लोकपति चाहत भभरि भगान ॥ २३०॥

ati saroṣa mākhe lakhanu lakhi suni sapatha pravāna| sabhaya loka saba lokapati cāhata bhabhari bhagāna || 230||

जगु भय मगन गगन भइ बानी। लखन बाहुबलु बिपुल बखानी॥ तात प्रताप प्रभाउ तुम्हारा। को कहि सकइ को जाननिहारा॥

jagu bhaya magana gagana bhai bānī| lakhana bāhubalu bipula bakhānī|| tāta pratāpa prabhāu tumhārā| ko kahi sakai ko jānanihārā||

अनुचित उचित काजु किछु होऊ। समुझि करिअ भल कह सबु कोऊ॥ सहसा करि पाछैं पछिताहीं। कहहिं बेद बुध ते बुध नाहीं॥

anucita ucita kāju kichu hoū| samujhi karia bhala kaha sabu koū|| sahasā kari pāchaiṃ pachitāhīṃ| kahahiṃ beda budha te budha nāhīṃ||

सुनि सुर बचन लखन सकुचाने। राम सीयँ सादर सनमाने॥ कही तात तुम्ह नीति सुहाई। सब तें कठिन राजमदु भाई॥

suni sura bacana lakhana sakucāne| rāma sīyam̐ sādara sanamāne|| kahī tāta tumha nīti suhāī| saba teṃ kaṭhina rājamadu bhāī||

जो अचवँत नृप मातहिं तेई। नाहिन साधुसभा जेहिं सेई॥ सुनहु लखन भल भरत सरीसा। बिधि प्रपंच महँ सुना न दीसा॥

jo acavam̐ta nṛpa mātahiṃ teī| nāhina sādhusabhā jehiṃ seī|| sunahu lakhana bhala bharata sarīsā| bidhi prapaṃca maham̐ sunā na dīsā||

दोहा २३१

भरतहि होइ न राजमदु बिधि हरि हर पद पाइ। कबहुँ कि काँजी सीकरनि छीरसिंधु बिनसाइ ॥ २३१॥

bharatahi hoi na rājamadu bidhi hari hara pada pāi| kabahum̐ ki kām̐jī sīkarani chīrasiṃdhu binasāi || 231||

तिमिरु तरुन तरनिहि मकु गिलई। गगनु मगन मकु मेघहिं मिलई॥ गोपद जल बूड़हिं घटजोनी। सहज छमा बरु छाड़ै छोनी॥

timiru taruna taranihi maku gilaī| gaganu magana maku meghahiṃ milaī|| gopada jala būṛahiṃ ghaṭajonī| sahaja chamā baru chāṛai chonī||

मसक फूँक मकु मेरु उड़ाई। होइ न नृपमदु भरतहि भाई॥ लखन तुम्हार सपथ पितु आना। सुचि सुबंधु नहिं भरत समाना॥

masaka phūm̐ka maku meru uṛāī| hoi na nṛpamadu bharatahi bhāī|| lakhana tumhāra sapatha pitu ānā| suci subaṃdhu nahiṃ bharata samānā||

सगुन खीरु अवगुन जलु ताता। मिलइ रचइ परपंचु बिधाता॥ भरतु हंस रबिबंस तड़ागा। जनमि कीन्ह गुन दोष बिभागा॥

saguna khīru avaguna jalu tātā| milai racai parapaṃcu bidhātā|| bharatu haṃsa rabibaṃsa taṛāgā| janami kīnha guna doṣa bibhāgā||

गहि गुन पय तजि अवगुन बारी। निज जस जगत कीन्हि उजिआरी॥ कहत भरत गुन सीलु सुभाऊ। पेम पयोधि मगन रघुराऊ॥

gahi guna paya taji avaguna bārī| nija jasa jagata kīnhi ujiārī|| kahata bharata guna sīlu subhāū| pema payodhi magana raghurāū||

दोहा २३२

सुनि रघुबर बानी बिबुध देखि भरत पर हेतु। सकल सराहत राम सो प्रभु को कृपानिकेतु ॥ २३२॥

suni raghubara bānī bibudha dekhi bharata para hetu| sakala sarāhata rāma so prabhu ko kṛpāniketu || 232||

जौं न होत जग जनम भरत को। सकल धरम धुर धरनि धरत को॥ कबि कुल अगम भरत गुन गाथा। को जानइ तुम्ह बिनु रघुनाथा॥

jauṃ na hota jaga janama bharata ko| sakala dharama dhura dharani dharata ko|| kabi kula agama bharata guna gāthā| ko jānai tumha binu raghunāthā||

लखन राम सियँ सुनि सुर बानी। अति सुखु लहेउ न जाइ बखानी॥ इहाँ भरतु सब सहित सहाए। मंदाकिनीं पुनीत नहाए॥

lakhana rāma siyam̐ suni sura bānī| ati sukhu laheu na jāi bakhānī|| ihām̐ bharatu saba sahita sahāe| maṃdākinīṃ punīta nahāe||

सरित समीप राखि सब लोगा। मागि मातु गुर सचिव नियोगा॥ चले भरतु जहँ सिय रघुराई। साथ निषादनाथु लघु भाई॥

sarita samīpa rākhi saba logā| māgi mātu gura saciva niyogā|| cale bharatu jaham̐ siya raghurāī| sātha niṣādanāthu laghu bhāī||

समुझि मातु करतब सकुचाहीं। करत कुतरक कोटि मन माहीं॥ रामु लखनु सिय सुनि मम नाऊँ। उठि जनि अनत जाहिं तजि ठाऊँ॥

samujhi mātu karataba sakucāhīṃ| karata kutaraka koṭi mana māhīṃ|| rāmu lakhanu siya suni mama nāūm̐| uṭhi jani anata jāhiṃ taji ṭhāūm̐||

दोहा २३३

मातु मते महुँ मानि मोहि जो कछु करहिं सो थोर। अघ अवगुन छमि आदरहिं समुझि आपनी ओर ॥ २३३॥

mātu mate mahum̐ māni mohi jo kachu karahiṃ so thora| agha avaguna chami ādarahiṃ samujhi āpanī ora || 233||

जौं परिहरहिं मलिन मनु जानी। जौ सनमानहिं सेवकु मानी॥ मोरें सरन रामहि की पनही। राम सुस्वामि दोसु सब जनही॥

jauṃ pariharahiṃ malina manu jānī| jau sanamānahiṃ sevaku mānī|| moreṃ sarana rāmahi kī panahī| rāma susvāmi dosu saba janahī||

जग जस भाजन चातक मीना। नेम पेम निज निपुन नबीना॥ अस मन गुनत चले मग जाता। सकुच सनेहँ सिथिल सब गाता॥

jaga jasa bhājana cātaka mīnā| nema pema nija nipuna nabīnā|| asa mana gunata cale maga jātā| sakuca saneham̐ sithila saba gātā||

फेरत मनहुँ मातु कृत खोरी। चलत भगति बल धीरज धोरी॥ जब समुझत रघुनाथ सुभाऊ। तब पथ परत उताइल पाऊ

pherata manahum̐ mātu kṛta khorī| calata bhagati bala dhīraja dhorī|| jaba samujhata raghunātha subhāū| taba patha parata utāila pāū

भरत दसा तेहि अवसर कैसी। जल प्रबाहँ जल अलि गति जैसी॥ देखि भरत कर सोचु सनेहू। भा निषाद तेहि समयँ बिदेहू॥

bharata dasā tehi avasara kaisī| jala prabāham̐ jala ali gati jaisī|| dekhi bharata kara socu sanehū| bhā niṣāda tehi samayam̐ bidehū||

दोहा २३४

लगे होन मंगल सगुन सुनि गुनि कहत निषादु। मिटिहि सोचु होइहि हरषु पुनि परिनाम बिषादु ॥ २३४॥

lage hona maṃgala saguna suni guni kahata niṣādu| miṭihi socu hoihi haraṣu puni parināma biṣādu || 234||

सेवक बचन सत्य सब जाने। आश्रम निकट जाइ निअराने॥ भरत दीख बन सैल समाजू। मुदित छुधित जनु पाइ सुनाजू॥

sevaka bacana satya saba jāne| āśrama nikaṭa jāi niarāne|| bharata dīkha bana saila samājū| mudita chudhita janu pāi sunājū||

ईति भीति जनु प्रजा दुखारी। त्रिबिध ताप पीड़ित ग्रह मारी॥ जाइ सुराज सुदेस सुखारी। होहिं भरत गति तेहि अनुहारी॥

īti bhīti janu prajā dukhārī| tribidha tāpa pīṛita graha mārī|| jāi surāja sudesa sukhārī| hohiṃ bharata gati tehi anuhārī||

राम बास बन संपति भ्राजा। सुखी प्रजा जनु पाइ सुराजा॥ सचिव बिरागु बिबेकु नरेसू। बिपिन सुहावन पावन देसू॥

rāma bāsa bana saṃpati bhrājā| sukhī prajā janu pāi surājā|| saciva birāgu bibeku naresū| bipina suhāvana pāvana desū||

भट जम नियम सैल रजधानी। सांति सुमति सुचि सुंदर रानी॥ सकल अंग संपन्न सुराऊ। राम चरन आश्रित चित चाऊ॥

bhaṭa jama niyama saila rajadhānī| sāṃti sumati suci suṃdara rānī|| sakala aṃga saṃpanna surāū| rāma carana āśrita cita cāū||

दोहा २३५

जीति मोह महिपालु दल सहित बिबेक भुआलु। करत अकंटक राजु पुरँ सुख संपदा सुकालु ॥ २३५॥

jīti moha mahipālu dala sahita bibeka bhuālu| karata akaṃṭaka rāju puram̐ sukha saṃpadā sukālu || 235||

बन प्रदेस मुनि बास घनेरे। जनु पुर नगर गाउँ गन खेरे॥ बिपुल बिचित्र बिहग मृग नाना। प्रजा समाजु न जाइ बखाना॥

bana pradesa muni bāsa ghanere| janu pura nagara gāum̐ gana khere|| bipula bicitra bihaga mṛga nānā| prajā samāju na jāi bakhānā||

खगहा करि हरि बाघ बराहा। देखि महिष बृष साजु सराहा॥ बयरु बिहाइ चरहिं एक संगा। जहँ तहँ मनहुँ सेन चतुरंगा॥

khagahā kari hari bāgha barāhā| dekhi mahiṣa bṛṣa sāju sarāhā|| bayaru bihāi carahiṃ eka saṃgā| jaham̐ taham̐ manahum̐ sena caturaṃgā||

झरना झरहिं मत्त गज गाजहिं। मनहुँ निसान बिबिधि बिधि बाजहिं॥ चक चकोर चातक सुक पिक गन। कूजत मंजु मराल मुदित मन॥

jharanā jharahiṃ matta gaja gājahiṃ| manahum̐ nisāna bibidhi bidhi bājahiṃ|| caka cakora cātaka suka pika gana| kūjata maṃju marāla mudita mana||

अलिगन गावत नाचत मोरा। जनु सुराज मंगल चहु ओरा॥ बेलि बिटप तृन सफल सफूला। सब समाजु मुद मंगल मूला॥

aligana gāvata nācata morā| janu surāja maṃgala cahu orā|| beli biṭapa tṛna saphala saphūlā| saba samāju muda maṃgala mūlā||

दोहा २३६

राम सैल सोभा निरखि भरत हृदयँ अति पेमु। तापस तप फलु पाइ जिमि सुखी सिरानें नेमु ॥ २३६॥

rāma saila sobhā nirakhi bharata hṛdayam̐ ati pemu| tāpasa tapa phalu pāi jimi sukhī sirāneṃ nemu || 236||

तब केवट ऊँचें चढ़ि धाई। कहेउ भरत सन भुजा उठाई॥ नाथ देखिअहिं बिटप बिसाला। पाकरि जंबु रसाल तमाला॥

taba kevaṭa ūm̐ceṃ caṛhi dhāī| kaheu bharata sana bhujā uṭhāī|| nātha dekhiahiṃ biṭapa bisālā| pākari jaṃbu rasāla tamālā||

जिन्ह तरुबरन्ह मध्य बटु सोहा। मंजु बिसाल देखि मनु मोहा॥ नील सघन पल्ल्व फल लाला। अबिरल छाहँ सुखद सब काला॥

jinha tarubaranha madhya baṭu sohā| maṃju bisāla dekhi manu mohā|| nīla saghana pallva phala lālā| abirala chāham̐ sukhada saba kālā||

मानहुँ तिमिर अरुनमय रासी। बिरची बिधि सँकेलि सुषमा सी॥ ए तरु सरित समीप गोसाँई। रघुबर परनकुटी जहँ छाई॥

mānahum̐ timira arunamaya rāsī| biracī bidhi sam̐keli suṣamā sī|| e taru sarita samīpa gosām̐ī| raghubara paranakuṭī jaham̐ chāī||

तुलसी तरुबर बिबिध सुहाए। कहुँ कहुँ सियँ कहुँ लखन लगाए॥ बट छायाँ बेदिका बनाई। सियँ निज पानि सरोज सुहाई॥

tulasī tarubara bibidha suhāe| kahum̐ kahum̐ siyam̐ kahum̐ lakhana lagāe|| baṭa chāyām̐ bedikā banāī| siyam̐ nija pāni saroja suhāī||

दोहा २३७

जहाँ बैठि मुनिगन सहित नित सिय रामु सुजान। सुनहिं कथा इतिहास सब आगम निगम पुरान ॥ २३७॥

jahām̐ baiṭhi munigana sahita nita siya rāmu sujāna| sunahiṃ kathā itihāsa saba āgama nigama purāna || 237||

सखा बचन सुनि बिटप निहारी। उमगे भरत बिलोचन बारी॥ करत प्रनाम चले दोउ भाई। कहत प्रीति सारद सकुचाई॥

sakhā bacana suni biṭapa nihārī| umage bharata bilocana bārī|| karata pranāma cale dou bhāī| kahata prīti sārada sakucāī||

हरषहिं निरखि राम पद अंका। मानहुँ पारसु पायउ रंका॥ रज सिर धरि हियँ नयनन्हि लावहिं। रघुबर मिलन सरिस सुख पावहिं॥

haraṣahiṃ nirakhi rāma pada aṃkā| mānahum̐ pārasu pāyau raṃkā|| raja sira dhari hiyam̐ nayananhi lāvahiṃ| raghubara milana sarisa sukha pāvahiṃ||

देखि भरत गति अकथ अतीवा। प्रेम मगन मृग खग जड़ जीवा॥ सखहि सनेह बिबस मग भूला। कहि सुपंथ सुर बरषहिं फूला॥

dekhi bharata gati akatha atīvā| prema magana mṛga khaga jaṛa jīvā|| sakhahi saneha bibasa maga bhūlā| kahi supaṃtha sura baraṣahiṃ phūlā||

निरखि सिद्ध साधक अनुरागे। सहज सनेहु सराहन लागे॥ होत न भूतल भाउ भरत को। अचर सचर चर अचर करत को॥

nirakhi siddha sādhaka anurāge| sahaja sanehu sarāhana lāge|| hota na bhūtala bhāu bharata ko| acara sacara cara acara karata ko||

दोहा २३८

पेम अमिअ मंदरु बिरहु भरतु पयोधि गँभीर। मथि प्रगटेउ सुर साधु हित कृपासिंधु रघुबीर ॥ २३८॥

pema amia maṃdaru birahu bharatu payodhi gam̐bhīra| mathi pragaṭeu sura sādhu hita kṛpāsiṃdhu raghubīra || 238||

सखा समेत मनोहर जोटा। लखेउ न लखन सघन बन ओटा॥ भरत दीख प्रभु आश्रमु पावन। सकल सुमंगल सदनु सुहावन॥

sakhā sameta manohara joṭā| lakheu na lakhana saghana bana oṭā|| bharata dīkha prabhu āśramu pāvana| sakala sumaṃgala sadanu suhāvana||

करत प्रबेस मिटे दुख दावा। जनु जोगीं परमारथु पावा॥ देखे भरत लखन प्रभु आगे। पूँछे बचन कहत अनुरागे॥

karata prabesa miṭe dukha dāvā| janu jogīṃ paramārathu pāvā|| dekhe bharata lakhana prabhu āge| pūm̐che bacana kahata anurāge||

सीस जटा कटि मुनि पट बाँधें। तून कसें कर सरु धनु काँधें॥ बेदी पर मुनि साधु समाजू। सीय सहित राजत रघुराजू॥

sīsa jaṭā kaṭi muni paṭa bām̐dheṃ| tūna kaseṃ kara saru dhanu kām̐dheṃ|| bedī para muni sādhu samājū| sīya sahita rājata raghurājū||

बलकल बसन जटिल तनु स्यामा। जनु मुनि बेष कीन्ह रति कामा॥ कर कमलनि धनु सायकु फेरत। जिय की जरनि हरत हँसि हेरत॥

balakala basana jaṭila tanu syāmā| janu muni beṣa kīnha rati kāmā|| kara kamalani dhanu sāyaku pherata| jiya kī jarani harata ham̐si herata||

दोहा २३९

लसत मंजु मुनि मंडली मध्य सीय रघुचंदु। ग्यान सभाँ जनु तनु धरे भगति सच्चिदानंदु ॥ २३९॥

lasata maṃju muni maṃḍalī madhya sīya raghucaṃdu| gyāna sabhām̐ janu tanu dhare bhagati saccidānaṃdu || 239||

सानुज सखा समेत मगन मन। बिसरे हरष सोक सुख दुख गन॥ पाहि नाथ कहि पाहि गोसाई। भूतल परे लकुट की नाई॥

sānuja sakhā sameta magana mana| bisare haraṣa soka sukha dukha gana|| pāhi nātha kahi pāhi gosāī| bhūtala pare lakuṭa kī nāī||

बचन सपेम लखन पहिचाने। करत प्रनामु भरत जियँ जाने॥ बंधु सनेह सरस एहि ओरा। उत साहिब सेवा बस जोरा॥

bacana sapema lakhana pahicāne| karata pranāmu bharata jiyam̐ jāne|| baṃdhu saneha sarasa ehi orā| uta sāhiba sevā basa jorā||

मिलि न जाइ नहिं गुदरत बनई। सुकबि लखन मन की गति भनई॥ रहे राखि सेवा पर भारू। चढ़ी चंग जनु खैंच खेलारू॥

mili na jāi nahiṃ gudarata banaī| sukabi lakhana mana kī gati bhanaī|| rahe rākhi sevā para bhārū| caṛhī caṃga janu khaiṃca khelārū||

कहत सप्रेम नाइ महि माथा। भरत प्रनाम करत रघुनाथा॥ उठे रामु सुनि पेम अधीरा। कहुँ पट कहुँ निषंग धनु तीरा॥

kahata saprema nāi mahi māthā| bharata pranāma karata raghunāthā|| uṭhe rāmu suni pema adhīrā| kahum̐ paṭa kahum̐ niṣaṃga dhanu tīrā||

दोहा २४०

बरबस लिए उठाइ उर लाए कृपानिधान। भरत राम की मिलनि लखि बिसरे सबहि अपान ॥ २४०॥

barabasa lie uṭhāi ura lāe kṛpānidhāna| bharata rāma kī milani lakhi bisare sabahi apāna || 240||

मिलनि प्रीति किमि जाइ बखानी। कबिकुल अगम करम मन बानी॥ परम पेम पूरन दोउ भाई। मन बुधि चित अहमिति बिसराई॥

milani prīti kimi jāi bakhānī| kabikula agama karama mana bānī|| parama pema pūrana dou bhāī| mana budhi cita ahamiti bisarāī||

कहहु सुपेम प्रगट को करई। केहि छाया कबि मति अनुसरई॥ कबिहि अरथ आखर बलु साँचा। अनुहरि ताल गतिहि नटु नाचा॥

kahahu supema pragaṭa ko karaī| kehi chāyā kabi mati anusaraī|| kabihi aratha ākhara balu sām̐cā| anuhari tāla gatihi naṭu nācā||

अगम सनेह भरत रघुबर को। जहँ न जाइ मनु बिधि हरि हर को॥

agama saneha bharata raghubara ko| jaham̐ na jāi manu bidhi hari hara ko||

सोरठा

सो मैं कुमति कहौं केहि भाँती। बाज सुराग कि गाँडर ताँती॥

so maiṃ kumati kahauṃ kehi bhām̐tī| bāja surāga ki gām̐ḍara tām̐tī||

मिलनि बिलोकि भरत रघुबर की। सुरगन सभय धकधकी धरकी॥ समुझाए सुरगुरु जड़ जागे। बरषि प्रसून प्रसंसन लागे॥

milani biloki bharata raghubara kī| suragana sabhaya dhakadhakī dharakī|| samujhāe suraguru jaṛa jāge| baraṣi prasūna prasaṃsana lāge||

दोहा २४१

मिलि सपेम रिपुसूदनहि केवटु भेंटेउ राम। भूरि भायँ भेंटे भरत लछिमन करत प्रनाम ॥ २४१॥

mili sapema ripusūdanahi kevaṭu bheṃṭeu rāma| bhūri bhāyam̐ bheṃṭe bharata lachimana karata pranāma || 241||

भेंटेउ लखन ललकि लघु भाई। बहुरि निषादु लीन्ह उर लाई॥ पुनि मुनिगन दुहुँ भाइन्ह बंदे। अभिमत आसिष पाइ अनंदे॥

bheṃṭeu lakhana lalaki laghu bhāī| bahuri niṣādu līnha ura lāī|| puni munigana duhum̐ bhāinha baṃde| abhimata āsiṣa pāi anaṃde||

सानुज भरत उमगि अनुरागा। धरि सिर सिय पद पदुम परागा॥ पुनि पुनि करत प्रनाम उठाए। सिर कर कमल परसि बैठाए॥

sānuja bharata umagi anurāgā| dhari sira siya pada paduma parāgā|| puni puni karata pranāma uṭhāe| sira kara kamala parasi baiṭhāe||

सीयँ असीस दीन्हि मन माहीं। मगन सनेहँ देह सुधि नाहीं॥ सब बिधि सानुकूल लखि सीता। भे निसोच उर अपडर बीता॥

sīyam̐ asīsa dīnhi mana māhīṃ| magana saneham̐ deha sudhi nāhīṃ|| saba bidhi sānukūla lakhi sītā| bhe nisoca ura apaḍara bītā||

कोउ किछु कहइ न कोउ किछु पूँछा। प्रेम भरा मन निज गति छूँछा॥ तेहि अवसर केवटु धीरजु धरि। जोरि पानि बिनवत प्रनामु करि॥

kou kichu kahai na kou kichu pūm̐chā| prema bharā mana nija gati chūm̐chā|| tehi avasara kevaṭu dhīraju dhari| jori pāni binavata pranāmu kari||

दोहा २४२

नाथ साथ मुनिनाथ के मातु सकल पुर लोग। सेवक सेनप सचिव सब आए बिकल बियोग ॥ २४२॥

nātha sātha muninātha ke mātu sakala pura loga| sevaka senapa saciva saba āe bikala biyoga || 242||