Ayodhya Kand — अयोध्याकाण्ड

अयोध्याकाण्ड · दोहा १२७–१४३

साझा करें

चिदानंदमय देह तुम्हारी। बिगत बिकार जान अधिकारी॥ नर तनु धरेहु संत सुर काजा। कहहु करहु जस प्राकृत राजा॥

cidānaṃdamaya deha tumhārī| bigata bikāra jāna adhikārī|| nara tanu dharehu saṃta sura kājā| kahahu karahu jasa prākṛta rājā||

राम देखि सुनि चरित तुम्हारे। जड़ मोहहिं बुध होहिं सुखारे॥ तुम्ह जो कहहु करहु सबु साँचा। जस काछिअ तस चाहिअ नाचा॥

rāma dekhi suni carita tumhāre| jaṛa mohahiṃ budha hohiṃ sukhāre|| tumha jo kahahu karahu sabu sām̐cā| jasa kāchia tasa cāhia nācā||

दोहा १२७

पूँछेहु मोहि कि रहौं कहँ मैं पूँछत सकुचाउँ। जहँ न होहु तहँ देहु कहि तुम्हहि देखावौं ठाउँ ॥ १२७॥

pūm̐chehu mohi ki rahauṃ kaham̐ maiṃ pūm̐chata sakucāum̐| jaham̐ na hohu taham̐ dehu kahi tumhahi dekhāvauṃ ṭhāum̐ || 127||

सुनि मुनि बचन प्रेम रस साने। सकुचि राम मन महुँ मुसुकाने॥ बालमीकि हँसि कहहिं बहोरी। बानी मधुर अमिअ रस बोरी॥

suni muni bacana prema rasa sāne| sakuci rāma mana mahum̐ musukāne|| bālamīki ham̐si kahahiṃ bahorī| bānī madhura amia rasa borī||

सुनहु राम अब कहउँ निकेता। जहाँ बसहु सिय लखन समेता॥ जिन्ह के श्रवन समुद्र समाना। कथा तुम्हारि सुभग सरि नाना॥

sunahu rāma aba kahaum̐ niketā| jahām̐ basahu siya lakhana sametā|| jinha ke śravana samudra samānā| kathā tumhāri subhaga sari nānā||

भरहिं निरंतर होहिं न पूरे। तिन्ह के हिय तुम्ह कहुँ गृह रूरे॥ लोचन चातक जिन्ह करि राखे। रहहिं दरस जलधर अभिलाषे॥

bharahiṃ niraṃtara hohiṃ na pūre| tinha ke hiya tumha kahum̐ gṛha rūre|| locana cātaka jinha kari rākhe| rahahiṃ darasa jaladhara abhilāṣe||

निदरहिं सरित सिंधु सर भारी। रूप बिंदु जल होहिं सुखारी॥ तिन्ह के हृदय सदन सुखदायक। बसहु बंधु सिय सह रघुनायक॥

nidarahiṃ sarita siṃdhu sara bhārī| rūpa biṃdu jala hohiṃ sukhārī|| tinha ke hṛdaya sadana sukhadāyaka| basahu baṃdhu siya saha raghunāyaka||

दोहा १२८

जसु तुम्हार मानस बिमल हंसिनि जीहा जासु। मुकुताहल गुन गन चुनइ राम बसहु हियँ तासु ॥ १२८॥

jasu tumhāra mānasa bimala haṃsini jīhā jāsu| mukutāhala guna gana cunai rāma basahu hiyam̐ tāsu || 128||

प्रभु प्रसाद सुचि सुभग सुबासा। सादर जासु लहइ नित नासा॥ तुम्हहि निबेदित भोजन करहीं। प्रभु प्रसाद पट भूषन धरहीं॥

prabhu prasāda suci subhaga subāsā| sādara jāsu lahai nita nāsā|| tumhahi nibedita bhojana karahīṃ| prabhu prasāda paṭa bhūṣana dharahīṃ||

सीस नवहिं सुर गुरु द्विज देखी। प्रीति सहित करि बिनय बिसेषी॥ कर नित करहिं राम पद पूजा। राम भरोस हृदयँ नहि दूजा॥

sīsa navahiṃ sura guru dvija dekhī| prīti sahita kari binaya biseṣī|| kara nita karahiṃ rāma pada pūjā| rāma bharosa hṛdayam̐ nahi dūjā||

चरन राम तीरथ चलि जाहीं। राम बसहु तिन्ह के मन माहीं॥ मंत्रराजु नित जपहिं तुम्हारा। पूजहिं तुम्हहि सहित परिवारा॥

carana rāma tīratha cali jāhīṃ| rāma basahu tinha ke mana māhīṃ|| maṃtrarāju nita japahiṃ tumhārā| pūjahiṃ tumhahi sahita parivārā||

तरपन होम करहिं बिधि नाना। बिप्र जेवाँइ देहिं बहु दाना॥ तुम्ह तें अधिक गुरहि जियँ जानी। सकल भायँ सेवहिं सनमानी॥

tarapana homa karahiṃ bidhi nānā| bipra jevām̐i dehiṃ bahu dānā|| tumha teṃ adhika gurahi jiyam̐ jānī| sakala bhāyam̐ sevahiṃ sanamānī||

दोहा १२९

सबु करि मागहिं एक फलु राम चरन रति होउ। तिन्ह कें मन मंदिर बसहु सिय रघुनंदन दोउ ॥ १२९॥

sabu kari māgahiṃ eka phalu rāma carana rati hou| tinha keṃ mana maṃdira basahu siya raghunaṃdana dou || 129||

काम कोह मद मान न मोहा। लोभ न छोभ न राग न द्रोहा॥ जिन्ह कें कपट दंभ नहिं माया। तिन्ह कें हृदय बसहु रघुराया॥

kāma koha mada māna na mohā| lobha na chobha na rāga na drohā|| jinha keṃ kapaṭa daṃbha nahiṃ māyā| tinha keṃ hṛdaya basahu raghurāyā||

सब के प्रिय सब के हितकारी। दुख सुख सरिस प्रसंसा गारी॥ कहहिं सत्य प्रिय बचन बिचारी। जागत सोवत सरन तुम्हारी॥

saba ke priya saba ke hitakārī| dukha sukha sarisa prasaṃsā gārī|| kahahiṃ satya priya bacana bicārī| jāgata sovata sarana tumhārī||

तुम्हहि छाड़ि गति दूसरि नाहीं। राम बसहु तिन्ह के मन माहीं॥ जननी सम जानहिं परनारी। धनु पराव बिष तें बिष भारी॥

tumhahi chāṛi gati dūsari nāhīṃ| rāma basahu tinha ke mana māhīṃ|| jananī sama jānahiṃ paranārī| dhanu parāva biṣa teṃ biṣa bhārī||

जे हरषहिं पर संपति देखी। दुखित होहिं पर बिपति बिसेषी॥ जिन्हहि राम तुम्ह प्रानपिआरे। तिन्ह के मन सुभ सदन तुम्हारे॥

je haraṣahiṃ para saṃpati dekhī| dukhita hohiṃ para bipati biseṣī|| jinhahi rāma tumha prānapiāre| tinha ke mana subha sadana tumhāre||

दोहा १३०

स्वामि सखा पितु मातु गुर जिन्ह के सब तुम्ह तात। मन मंदिर तिन्ह कें बसहु सीय सहित दोउ भ्रात ॥ १३०॥

svāmi sakhā pitu mātu gura jinha ke saba tumha tāta| mana maṃdira tinha keṃ basahu sīya sahita dou bhrāta || 130||

अवगुन तजि सब के गुन गहहीं। बिप्र धेनु हित संकट सहहीं॥ नीति निपुन जिन्ह कइ जग लीका। घर तुम्हार तिन्ह कर मनु नीका॥

avaguna taji saba ke guna gahahīṃ| bipra dhenu hita saṃkaṭa sahahīṃ|| nīti nipuna jinha kai jaga līkā| ghara tumhāra tinha kara manu nīkā||

गुन तुम्हार समुझइ निज दोसा। जेहि सब भाँति तुम्हार भरोसा॥ राम भगत प्रिय लागहिं जेही। तेहि उर बसहु सहित बैदेही॥

guna tumhāra samujhai nija dosā| jehi saba bhām̐ti tumhāra bharosā|| rāma bhagata priya lāgahiṃ jehī| tehi ura basahu sahita baidehī||

जाति पाँति धनु धरम बड़ाई। प्रिय परिवार सदन सुखदाई॥ सब तजि तुम्हहि रहइ उर लाई। तेहि के हृदयँ रहहु रघुराई॥

jāti pām̐ti dhanu dharama baṛāī| priya parivāra sadana sukhadāī|| saba taji tumhahi rahai ura lāī| tehi ke hṛdayam̐ rahahu raghurāī||

सरगु नरकु अपबरगु समाना। जहँ तहँ देख धरें धनु बाना॥ करम बचन मन राउर चेरा। राम करहु तेहि कें उर डेरा॥

saragu naraku apabaragu samānā| jaham̐ taham̐ dekha dhareṃ dhanu bānā|| karama bacana mana rāura cerā| rāma karahu tehi keṃ ura ḍerā||

दोहा १३१

जाहि न चाहिअ कबहुँ कछु तुम्ह सन सहज सनेहु। बसहु निरंतर तासु मन सो राउर निज गेहु ॥ १३१॥

jāhi na cāhia kabahum̐ kachu tumha sana sahaja sanehu| basahu niraṃtara tāsu mana so rāura nija gehu || 131||

एहि बिधि मुनिबर भवन देखाए। बचन सप्रेम राम मन भाए॥ कह मुनि सुनहु भानुकुलनायक। आश्रम कहउँ समय सुखदायक॥

ehi bidhi munibara bhavana dekhāe| bacana saprema rāma mana bhāe|| kaha muni sunahu bhānukulanāyaka| āśrama kahaum̐ samaya sukhadāyaka||

चित्रकूट गिरि करहु निवासू। तहँ तुम्हार सब भाँति सुपासू॥ सैलु सुहावन कानन चारू। करि केहरि मृग बिहग बिहारू॥

citrakūṭa giri karahu nivāsū| taham̐ tumhāra saba bhām̐ti supāsū|| sailu suhāvana kānana cārū| kari kehari mṛga bihaga bihārū||

नदी पुनीत पुरान बखानी। अत्रिप्रिया निज तपबल आनी॥ सुरसरि धार नाउँ मंदाकिनि। जो सब पातक पोतक डाकिनि॥

nadī punīta purāna bakhānī| atripriyā nija tapabala ānī|| surasari dhāra nāum̐ maṃdākini| jo saba pātaka potaka ḍākini||

अत्रि आदि मुनिबर बहु बसहीं। करहिं जोग जप तप तन कसहीं॥ चलहु सफल श्रम सब कर करहू। राम देहु गौरव गिरिबरहू॥

atri ādi munibara bahu basahīṃ| karahiṃ joga japa tapa tana kasahīṃ|| calahu saphala śrama saba kara karahū| rāma dehu gaurava giribarahū||

दोहा १३२

चित्रकूट महिमा अमित कहीं महामुनि गाइ। आए नहाए सरित बर सिय समेत दोउ भाइ ॥ १३२॥

citrakūṭa mahimā amita kahīṃ mahāmuni gāi| āe nahāe sarita bara siya sameta dou bhāi || 132||

रघुबर कहेउ लखन भल घाटू। करहु कतहुँ अब ठाहर ठाटू॥ लखन दीख पय उतर करारा। चहुँ दिसि फिरेउ धनुष जिमि नारा॥

raghubara kaheu lakhana bhala ghāṭū| karahu katahum̐ aba ṭhāhara ṭhāṭū|| lakhana dīkha paya utara karārā| cahum̐ disi phireu dhanuṣa jimi nārā||

नदी पनच सर सम दम दाना। सकल कलुष कलि साउज नाना॥ चित्रकूट जनु अचल अहेरी। चुकइ न घात मार मुठभेरी॥

nadī panaca sara sama dama dānā| sakala kaluṣa kali sāuja nānā|| citrakūṭa janu acala aherī| cukai na ghāta māra muṭhabherī||

अस कहि लखन ठाउँ देखरावा। थलु बिलोकि रघुबर सुखु पावा॥ रमेउ राम मनु देवन्ह जाना। चले सहित सुर थपति प्रधाना॥

asa kahi lakhana ṭhāum̐ dekharāvā| thalu biloki raghubara sukhu pāvā|| rameu rāma manu devanha jānā| cale sahita sura thapati pradhānā||

कोल किरात बेष सब आए। रचे परन तृन सदन सुहाए॥ बरनि न जाहि मंजु दुइ साला। एक ललित लघु एक बिसाला॥

kola kirāta beṣa saba āe| race parana tṛna sadana suhāe|| barani na jāhi maṃju dui sālā| eka lalita laghu eka bisālā||

दोहा

लखन जानकी सहित प्रभु राजत रुचिर निकेत।

lakhana jānakī sahita prabhu rājata rucira niketa|

सोरठा १३३

सोह मदनु मुनि बेष जनु रति रितुराज समेत ॥ १३३॥

soha madanu muni beṣa janu rati riturāja sameta || 133||

अमर नाग किंनर दिसिपाला। चित्रकूट आए तेहि काला॥ राम प्रनामु कीन्ह सब काहू। मुदित देव लहि लोचन लाहू॥

amara nāga kiṃnara disipālā| citrakūṭa āe tehi kālā|| rāma pranāmu kīnha saba kāhū| mudita deva lahi locana lāhū||

बरषि सुमन कह देव समाजू। नाथ सनाथ भए हम आजू॥ करि बिनती दुख दुसह सुनाए। हरषित निज निज सदन सिधाए॥

baraṣi sumana kaha deva samājū| nātha sanātha bhae hama ājū|| kari binatī dukha dusaha sunāe| haraṣita nija nija sadana sidhāe||

चित्रकूट रघुनंदनु छाए। समाचार सुनि सुनि मुनि आए॥ आवत देखि मुदित मुनिबृंदा। कीन्ह दंडवत रघुकुल चंदा॥

citrakūṭa raghunaṃdanu chāe| samācāra suni suni muni āe|| āvata dekhi mudita munibṛṃdā| kīnha daṃḍavata raghukula caṃdā||

मुनि रघुबरहि लाइ उर लेहीं। सुफल होन हित आसिष देहीं॥ सिय सौमित्र राम छबि देखहिं। साधन सकल सफल करि लेखहिं॥

muni raghubarahi lāi ura lehīṃ| suphala hona hita āsiṣa dehīṃ|| siya saumitra rāma chabi dekhahiṃ| sādhana sakala saphala kari lekhahiṃ||

दोहा १३४

जथाजोग सनमानि प्रभु बिदा किए मुनिबृंद। करहि जोग जप जाग तप निज आश्रमन्हि सुछंद ॥ १३४॥

jathājoga sanamāni prabhu bidā kie munibṛṃda| karahi joga japa jāga tapa nija āśramanhi suchaṃda || 134||

यह सुधि कोल किरातन्ह पाई। हरषे जनु नव निधि घर आई॥ कंद मूल फल भरि भरि दोना। चले रंक जनु लूटन सोना॥

yaha sudhi kola kirātanha pāī| haraṣe janu nava nidhi ghara āī|| kaṃda mūla phala bhari bhari donā| cale raṃka janu lūṭana sonā||

तिन्ह महँ जिन्ह देखे दोउ भ्राता। अपर तिन्हहि पूँछहि मगु जाता॥ कहत सुनत रघुबीर निकाई। आइ सबन्हि देखे रघुराई॥

tinha maham̐ jinha dekhe dou bhrātā| apara tinhahi pūm̐chahi magu jātā|| kahata sunata raghubīra nikāī| āi sabanhi dekhe raghurāī||

करहिं जोहारु भेंट धरि आगे। प्रभुहि बिलोकहिं अति अनुरागे॥ चित्र लिखे जनु जहँ तहँ ठाढ़े। पुलक सरीर नयन जल बाढ़े॥

karahiṃ johāru bheṃṭa dhari āge| prabhuhi bilokahiṃ ati anurāge|| citra likhe janu jaham̐ taham̐ ṭhāṛhe| pulaka sarīra nayana jala bāṛhe||

राम सनेह मगन सब जाने। कहि प्रिय बचन सकल सनमाने॥ प्रभुहि जोहारि बहोरि बहोरी। बचन बिनीत कहहिं कर जोरी॥

rāma saneha magana saba jāne| kahi priya bacana sakala sanamāne|| prabhuhi johāri bahori bahorī| bacana binīta kahahiṃ kara jorī||

दोहा १३५

अब हम नाथ सनाथ सब भए देखि प्रभु पाय। भाग हमारे आगमनु राउर कोसलराय ॥ १३५॥

aba hama nātha sanātha saba bhae dekhi prabhu pāya| bhāga hamāre āgamanu rāura kosalarāya || 135||

धन्य भूमि बन पंथ पहारा। जहँ जहँ नाथ पाउ तुम्ह धारा॥ धन्य बिहग मृग काननचारी। सफल जनम भए तुम्हहि निहारी॥

dhanya bhūmi bana paṃtha pahārā| jaham̐ jaham̐ nātha pāu tumha dhārā|| dhanya bihaga mṛga kānanacārī| saphala janama bhae tumhahi nihārī||

हम सब धन्य सहित परिवारा। दीख दरसु भरि नयन तुम्हारा॥ कीन्ह बासु भल ठाउँ बिचारी। इहाँ सकल रितु रहब सुखारी॥

hama saba dhanya sahita parivārā| dīkha darasu bhari nayana tumhārā|| kīnha bāsu bhala ṭhāum̐ bicārī| ihām̐ sakala ritu rahaba sukhārī||

हम सब भाँति करब सेवकाई। करि केहरि अहि बाघ बराई॥ बन बेहड़ गिरि कंदर खोहा। सब हमार प्रभु पग पग जोहा॥

hama saba bhām̐ti karaba sevakāī| kari kehari ahi bāgha barāī|| bana behaṛa giri kaṃdara khohā| saba hamāra prabhu paga paga johā||

तहँ तहँ तुम्हहि अहेर खेलाउब। सर निरझर जलठाउँ देखाउब॥ हम सेवक परिवार समेता। नाथ न सकुचब आयसु देता॥

taham̐ taham̐ tumhahi ahera khelāuba| sara nirajhara jalaṭhāum̐ dekhāuba|| hama sevaka parivāra sametā| nātha na sakucaba āyasu detā||

दोहा १३६

बेद बचन मुनि मन अगम ते प्रभु करुना ऐन। बचन किरातन्ह के सुनत जिमि पितु बालक बैन ॥ १३६॥

beda bacana muni mana agama te prabhu karunā aina| bacana kirātanha ke sunata jimi pitu bālaka baina || 136||

रामहि केवल प्रेमु पिआरा। जानि लेउ जो जाननिहारा॥ राम सकल बनचर तब तोषे। कहि मृदु बचन प्रेम परिपोषे॥

rāmahi kevala premu piārā| jāni leu jo jānanihārā|| rāma sakala banacara taba toṣe| kahi mṛdu bacana prema paripoṣe||

बिदा किए सिर नाइ सिधाए। प्रभु गुन कहत सुनत घर आए॥ एहि बिधि सिय समेत दोउ भाई। बसहिं बिपिन सुर मुनि सुखदाई॥

bidā kie sira nāi sidhāe| prabhu guna kahata sunata ghara āe|| ehi bidhi siya sameta dou bhāī| basahiṃ bipina sura muni sukhadāī||

जब ते आइ रहे रघुनायकु। तब तें भयउ बनु मंगलदायकु॥ फूलहिं फलहिं बिटप बिधि नाना। मंजु बलित बर बेलि बिताना॥

jaba te āi rahe raghunāyaku| taba teṃ bhayau banu maṃgaladāyaku|| phūlahiṃ phalahiṃ biṭapa bidhi nānā| maṃju balita bara beli bitānā||

सुरतरु सरिस सुभायँ सुहाए। मनहुँ बिबुध बन परिहरि आए॥ गंज मंजुतर मधुकर श्रेनी। त्रिबिध बयारि बहइ सुख देनी॥

surataru sarisa subhāyam̐ suhāe| manahum̐ bibudha bana parihari āe|| gaṃja maṃjutara madhukara śrenī| tribidha bayāri bahai sukha denī||

दोहा १३७

नीलकंठ कलकंठ सुक चातक चक्क चकोर। भाँति भाँति बोलहिं बिहग श्रवन सुखद चित चोर ॥ १३७॥

nīlakaṃṭha kalakaṃṭha suka cātaka cakka cakora| bhām̐ti bhām̐ti bolahiṃ bihaga śravana sukhada cita cora || 137||

केरि केहरि कपि कोल कुरंगा। बिगतबैर बिचरहिं सब संगा॥ फिरत अहेर राम छबि देखी। होहिं मुदित मृगबंद बिसेषी॥

keri kehari kapi kola kuraṃgā| bigatabaira bicarahiṃ saba saṃgā|| phirata ahera rāma chabi dekhī| hohiṃ mudita mṛgabaṃda biseṣī||

बिबुध बिपिन जहँ लगि जग माहीं। देखि राम बनु सकल सिहाहीं॥ सुरसरि सरसइ दिनकर कन्या। मेकलसुता गोदावरि धन्या॥

bibudha bipina jaham̐ lagi jaga māhīṃ| dekhi rāma banu sakala sihāhīṃ|| surasari sarasai dinakara kanyā| mekalasutā godāvari dhanyā||

सब सर सिंधु नदी नद नाना। मंदाकिनि कर करहिं बखाना॥ उदय अस्त गिरि अरु कैलासू। मंदर मेरु सकल सुरबासू॥

saba sara siṃdhu nadī nada nānā| maṃdākini kara karahiṃ bakhānā|| udaya asta giri aru kailāsū| maṃdara meru sakala surabāsū||

सैल हिमाचल आदिक जेते। चित्रकूट जसु गावहिं तेते॥ बिंधि मुदित मन सुखु न समाई। श्रम बिनु बिपुल बड़ाई पाई॥

saila himācala ādika jete| citrakūṭa jasu gāvahiṃ tete|| biṃdhi mudita mana sukhu na samāī| śrama binu bipula baṛāī pāī||

दोहा १३८

चित्रकूट के बिहग मृग बेलि बिटप तृन जाति। पुन्य पुंज सब धन्य अस कहहिं देव दिन राति ॥ १३८॥

citrakūṭa ke bihaga mṛga beli biṭapa tṛna jāti| punya puṃja saba dhanya asa kahahiṃ deva dina rāti || 138||

नयनवंत रघुबरहि बिलोकी। पाइ जनम फल होहिं बिसोकी॥ परसि चरन रज अचर सुखारी। भए परम पद के अधिकारी॥

nayanavaṃta raghubarahi bilokī| pāi janama phala hohiṃ bisokī|| parasi carana raja acara sukhārī| bhae parama pada ke adhikārī||

सोरठा २

सो बनु सैलु सुभायँ सुहावन। मंगलमय अति पावन पावन॥ महिमा कहिअ कवनि बिधि तासू। सुखसागर जहँ कीन्ह निवासू॥

so banu sailu subhāyam̐ suhāvana| maṃgalamaya ati pāvana pāvana|| mahimā kahia kavani bidhi tāsū| sukhasāgara jaham̐ kīnha nivāsū||

पय पयोधि तजि अवध बिहाई। जहँ सिय लखनु रामु रहे आई॥ कहि न सकहिं सुषमा जसि कानन। जौं सत सहस होंहिं सहसानन॥

paya payodhi taji avadha bihāī| jaham̐ siya lakhanu rāmu rahe āī|| kahi na sakahiṃ suṣamā jasi kānana| jauṃ sata sahasa hoṃhiṃ sahasānana||

सोरठा ४

सो मैं बरनि कहौं बिधि केहीं। डाबर कमठ कि मंदर लेहीं॥ सेवहिं लखनु करम मन बानी। जाइ न सीलु सनेहु बखानी॥

so maiṃ barani kahauṃ bidhi kehīṃ| ḍābara kamaṭha ki maṃdara lehīṃ|| sevahiṃ lakhanu karama mana bānī| jāi na sīlu sanehu bakhānī||

दोहा १३९

-छिनु छिनु लखि सिय राम पद जानि आपु पर नेहु। करत न सपनेहुँ लखनु चितु बंधु मातु पितु गेहु ॥ १३९॥

-chinu chinu lakhi siya rāma pada jāni āpu para nehu| karata na sapanehum̐ lakhanu citu baṃdhu mātu pitu gehu || 139||

राम संग सिय रहति सुखारी। पुर परिजन गृह सुरति बिसारी॥ छिनु छिनु पिय बिधु बदनु निहारी। प्रमुदित मनहुँ चकोरकुमारी॥

rāma saṃga siya rahati sukhārī| pura parijana gṛha surati bisārī|| chinu chinu piya bidhu badanu nihārī| pramudita manahum̐ cakorakumārī||

नाह नेहु नित बढ़त बिलोकी। हरषित रहति दिवस जिमि कोकी॥ सिय मनु राम चरन अनुरागा। अवध सहस सम बनु प्रिय लागा॥

nāha nehu nita baṛhata bilokī| haraṣita rahati divasa jimi kokī|| siya manu rāma carana anurāgā| avadha sahasa sama banu priya lāgā||

परनकुटी प्रिय प्रियतम संगा। प्रिय परिवारु कुरंग बिहंगा॥ सासु ससुर सम मुनितिय मुनिबर। असनु अमिअ सम कंद मूल फर॥

paranakuṭī priya priyatama saṃgā| priya parivāru kuraṃga bihaṃgā|| sāsu sasura sama munitiya munibara| asanu amia sama kaṃda mūla phara||

नाथ साथ साँथरी सुहाई। मयन सयन सय सम सुखदाई॥ लोकप होहिं बिलोकत जासू। तेहि कि मोहि सक बिषय बिलासू॥

nātha sātha sām̐tharī suhāī| mayana sayana saya sama sukhadāī|| lokapa hohiṃ bilokata jāsū| tehi ki mohi saka biṣaya bilāsū||

दोहा १४०

-सुमिरत रामहि तजहिं जन तृन सम बिषय बिलासु। रामप्रिया जग जननि सिय कछु न आचरजु तासु ॥ १४०॥

-sumirata rāmahi tajahiṃ jana tṛna sama biṣaya bilāsu| rāmapriyā jaga janani siya kachu na ācaraju tāsu || 140||

सीय लखन जेहि बिधि सुखु लहहीं। सोइ रघुनाथ करहि सोइ कहहीं॥ कहहिं पुरातन कथा कहानी। सुनहिं लखनु सिय अति सुखु मानी॥

sīya lakhana jehi bidhi sukhu lahahīṃ| soi raghunātha karahi soi kahahīṃ|| kahahiṃ purātana kathā kahānī| sunahiṃ lakhanu siya ati sukhu mānī||

जब जब रामु अवध सुधि करहीं। तब तब बारि बिलोचन भरहीं॥ सुमिरि मातु पितु परिजन भाई। भरत सनेहु सीलु सेवकाई॥

jaba jaba rāmu avadha sudhi karahīṃ| taba taba bāri bilocana bharahīṃ|| sumiri mātu pitu parijana bhāī| bharata sanehu sīlu sevakāī||

कृपासिंधु प्रभु होहिं दुखारी। धीरजु धरहिं कुसमउ बिचारी॥ लखि सिय लखनु बिकल होइ जाहीं। जिमि पुरुषहि अनुसर परिछाहीं॥

kṛpāsiṃdhu prabhu hohiṃ dukhārī| dhīraju dharahiṃ kusamau bicārī|| lakhi siya lakhanu bikala hoi jāhīṃ| jimi puruṣahi anusara parichāhīṃ||

प्रिया बंधु गति लखि रघुनंदनु। धीर कृपाल भगत उर चंदनु॥ लगे कहन कछु कथा पुनीता। सुनि सुखु लहहिं लखनु अरु सीता॥

priyā baṃdhu gati lakhi raghunaṃdanu| dhīra kṛpāla bhagata ura caṃdanu|| lage kahana kachu kathā punītā| suni sukhu lahahiṃ lakhanu aru sītā||

दोहा १४१

रामु लखन सीता सहित सोहत परन निकेत। जिमि बासव बस अमरपुर सची जयंत समेत ॥ १४१॥

rāmu lakhana sītā sahita sohata parana niketa| jimi bāsava basa amarapura sacī jayaṃta sameta || 141||

जोगवहिं प्रभु सिय लखनहिं कैसें। पलक बिलोचन गोलक जैसें॥ सेवहिं लखनु सीय रघुबीरहि। जिमि अबिबेकी पुरुष सरीरहि॥

jogavahiṃ prabhu siya lakhanahiṃ kaiseṃ| palaka bilocana golaka jaiseṃ|| sevahiṃ lakhanu sīya raghubīrahi| jimi abibekī puruṣa sarīrahi||

एहि बिधि प्रभु बन बसहिं सुखारी। खग मृग सुर तापस हितकारी॥ कहेउँ राम बन गवनु सुहावा। सुनहु सुमंत्र अवध जिमि आवा॥

ehi bidhi prabhu bana basahiṃ sukhārī| khaga mṛga sura tāpasa hitakārī|| kaheum̐ rāma bana gavanu suhāvā| sunahu sumaṃtra avadha jimi āvā||

फिरेउ निषादु प्रभुहि पहुँचाई। सचिव सहित रथ देखेसि आई॥ मंत्री बिकल बिलोकि निषादू। कहि न जाइ जस भयउ बिषादू॥

phireu niṣādu prabhuhi pahum̐cāī| saciva sahita ratha dekhesi āī|| maṃtrī bikala biloki niṣādū| kahi na jāi jasa bhayau biṣādū||

राम राम सिय लखन पुकारी। परेउ धरनितल ब्याकुल भारी॥ देखि दखिन दिसि हय हिहिनाहीं। जनु बिनु पंख बिहग अकुलाहीं॥

rāma rāma siya lakhana pukārī| pareu dharanitala byākula bhārī|| dekhi dakhina disi haya hihināhīṃ| janu binu paṃkha bihaga akulāhīṃ||

दोहा १४२

नहिं तृन चरहिं पिअहिं जलु मोचहिं लोचन बारि। ब्याकुल भए निषाद सब रघुबर बाजि निहारि ॥ १४२॥

nahiṃ tṛna carahiṃ piahiṃ jalu mocahiṃ locana bāri| byākula bhae niṣāda saba raghubara bāji nihāri || 142||

धरि धीरज तब कहइ निषादू। अब सुमंत्र परिहरहु बिषादू॥ तुम्ह पंडित परमारथ ग्याता। धरहु धीर लखि बिमुख बिधाता॥

dhari dhīraja taba kahai niṣādū| aba sumaṃtra pariharahu biṣādū|| tumha paṃḍita paramāratha gyātā| dharahu dhīra lakhi bimukha bidhātā||

बिबिध कथा कहि कहि मृदु बानी। रथ बैठारेउ बरबस आनी॥

bibidha kathā kahi kahi mṛdu bānī| ratha baiṭhāreu barabasa ānī||

सोरठा २

सोक सिथिल रथ सकइ न हाँकी। रघुबर बिरह पीर उर बाँकी॥

soka sithila ratha sakai na hām̐kī| raghubara biraha pīra ura bām̐kī||

चरफराहिं मग चलहिं न घोरे। बन मृग मनहुँ आनि रथ जोरे॥ अढ़ुकि परहिं फिरि हेरहिं पीछें। राम बियोगि बिकल दुख तीछें॥

carapharāhiṃ maga calahiṃ na ghore| bana mṛga manahum̐ āni ratha jore|| aṛhuki parahiṃ phiri herahiṃ pīcheṃ| rāma biyogi bikala dukha tīcheṃ||

जो कह रामु लखनु बैदेही। हिंकरि हिंकरि हित हेरहिं तेही॥ बाजि बिरह गति कहि किमि जाती। बिनु मनि फनिक बिकल जेहि भाँती॥

jo kaha rāmu lakhanu baidehī| hiṃkari hiṃkari hita herahiṃ tehī|| bāji biraha gati kahi kimi jātī| binu mani phanika bikala jehi bhām̐tī||

दोहा १४३

भयउ निषाद बिषादबस देखत सचिव तुरंग। बोलि सुसेवक चारि तब दिए सारथी संग ॥ १४३॥

bhayau niṣāda biṣādabasa dekhata saciva turaṃga| boli susevaka cāri taba die sārathī saṃga || 143||